Kattussuunnerit, suliffeqarfinnik tigusinerit suliffeqarfinnillu katussinerit pillugit Unammilleqatigiinnermut Nakkutilliisoqarfimmut nalunaaruteqartarnermut malittarisassat pillugit Namminersornerullutik Oqartussat nr. 17, 27. juni 2008-imeersoq
Unammilleqatigiinneq pillugu inatsisartut inatsissaat nr. 16, 19. november 2007-imeersumi § 14, imm. 2 malillugu aamma Unammilleqatigiinnermut Ataatsimiititaliamit oqaaseqaateqarneratigut aalajangersarneqarpoq:
Nalunaaruteqartussaatitaaneq
§ 1. Kattussuunnerit, suliffeqarfinnik tigusinerit imaluunniit suliffeqarfinnik kattussinerit naammassineqarnerisa kingorna kingusinnerpaamik sapaatit akunneri sisamat qaangiutsinnagit, unammilleqatigiinneq pillugu inatsimmi § 14, imm. 1 naap., kattussuunneq, suliffeqarfinnik tigusineq suliffeqarfinnillu kattussinerit Unammilleqatigiinnermut Nakkutilliisoqarfimmut nalunaarutigineqassapput.
Imm. 2. Imm. 1 malillugu nalunaaruteqartussaaneq atuutinngilaq kattussuunneq, suliffeqarfimmik tigusineq imaluunnit suliffeqarfinnik kattussineq suliffeqarfiup piginnittuusup immikkoortortallu akornanni pisimappat imaluunniit suliffeqarfissuarmi ataatsimi suliffeqarfinni immikkoortortat akornanni pisimappat.
Imm. 3. Imm. 1 malillugu nalunaaruteqartussaatitaaneq taamaallaat atuuppoq suliffeqarfinni pineqartuni minnerpaamik ataaseq Kalaallit Nunaanniippat.§ 2. § 1 naapertorlugu nalunaaruteqarnissamut pisussaaffik kattussuunnermi, suliffeqarfimmik tigusinermi imaluunniit suliffeqarfinnik kattussinermi suliffeqarfimmi ingerlaannartumiippoq. Ingerlatseqatigiiffimmik nutaamik pilersitsisoqartillugu nalunaaruteqarnissamut pisussaaffik ingerlatseqatigiiffimmi nutaamiippoq.
§ 3. Nalunaaruteqartussaatitaanermut ilaapput kattussuunnerit, suliffeqarfinnik tigusinerit aamma suliffeqarfinnik kattussinerit, suliffeqarfinni peqataasuni attuumassuteqartunilu kaaviiaartitat tamarmiusut katillugit 20 million koruunit sinnersimatillugit, unammilleqatigiinneq pillugu inatsisartut inatsisaat malillugu kaaviiaartitat naatsorsorneqarneri pillugit Namminersornerullutik Oqartussat nalunaarutaat naap.
Nassuiaatit§ 4. Nalunaarummi matumani kattussuuneq pillugu taaguut aktiaateqarluni piginneqataassuteqarlunilu inatsimmi, kunngip peqqusineratigut Kalaallit Nunaannut atulersinneqartumi kattussuunnermi malittarisassanut naapertuuttumik paasineqassaaq ingerlatseqatigiiffiullu akiliisinnaajunnaarnertaqanngitsumik atorunnaarsinneqarneratigut ingerlatseqatigiiffiup pigisaanik nalilinnik akiitsuinillu ingerlatseqatigiiffimmut allamut tunniussisoqarnerani, aamma ingerlatseqatigiiffiit marluk amerlanerusulluunniit ingerlatseqatigiiffimmut nutaamut ataatsimut ataatsimuulersinneqaraangata atorneqartarluni.
§ 5. Nalunaarummi matumani suliffeqarfimmik tigusineq paasineqassaaq suliffeqarfiup aningaasaataanik imaluunniit taasisinnaatitaanerup ilaanik ima annertutigisumik pissarsineq aningaasaatit ilaannik imaluunniit taasisinnaatitaanermik suliffeqarfik tigusisuusoq inuilluunniit suliffeqarfiup iliuuseqarsinnaassusianik aalajangiisumik sunniuteqalerlutik.
§ 6. Nalunaarummi matumani suliffeqarfinnik kattussineq paasineqassaaq suliffeqarfinnik eqiterinerit allat, § 4 imaluunniit § 5-imi ilaatinneqanngitsut.
§ 7. Nalunaarummi matumani aalajangiisumik sunniuteqarneq atulersarpoq suliffeqarfik aningaasaqarnikkut piginnittuunikkut imaluunniit taasisinnaatitaanikkut suliffeqarfimmi allami aalajangiisumik sunniuteqarsinnaalerpat, aktiaateqarluni ingerlatseqatigiiffiit pillugit inatsimmi peqqussutikkut Kalaallit Nunaannut atulersinneqartumi § 2, naap.
Nalunaarutip tunniunneqarnera nalunaarutillu imaa§ 9. Kattussuunnernik, suliffeqarfinnik tigusinernik aamma suliffeqarfinnik kattussinernik § 1 malillugu nalunaaruteqarnermi immersugassiaq K5, nalunaarummut matumunga ilanngussaq atorneqassaaq.
Imm. 2. Immersugassiaq K5-imi allanneqarsimasunik paasissutissanik allagaatinillu tamanik nalunaarut imaqassaaq.
Pineqaatissiinerit§ 10. Unioqqutitsinerit unammilleqatigiinneq pillugu inatsisartut inatsisaanni § 29, imm. 1, nr. 5 aamma imm. 3 malillugit akiliisitsinermik kinguneqarsinnaapput.
Atulersinnera§ 11. Nalunaarut una 1. julip 2008-mi atulissaaq.
Namminersornerullutik Oqartussat ulloq 27. juni 2008
Siverth K. Heilmann/
Bent A. Sørensen