Unammilleqatigiinnermut inatsit malillugu malittarisassiorneq aalajangiinernilluunniit pisortatut oqartussat nalunaarutiginninnerat pillugu Namminersornerullutik Oqartussat nalunaarutaat nr. 16, 27. juni 2008-imeersoq

Unammilleqatigiinneq pillugu inatsisartut inatsisaat nr. 16, 19. november 2007-imeersumi § 2, imm. 7 malillugu aalajangersarneqarpoq:

 

Nalunaartussaatitaanerup annertussusia

§ 1.  Namminersornerullutik Oqartussat kommuninilu oqartussat inuutissarsiutigalugu ingerlatsineq pillugu malittarisassiortut aalajangiisartulluunniit, ingerlatsineq pisortaqarfimmit nammineq imaluunniit suliffeqarfimmit aqutsisutut oqartussaasup sinniisuuffigisaani ingerlanneqarpat, malittarisassiorneq aalajangiinerluunniit unammilleqatigiinnermik killiliisimappat killiliisinnaappalluunniit, malittarisassiorneq aalajangiinerluunniit Unammilleqatigiinnermut Nakkutilliisoqarfimmut nalunaarutiginnissaaq. Nalunaartussaatitaanermut aamma ilaapput akuersissutinik tunniussinerit.

§ 2.  § 1 naapertorlugu nalunaartussaatitaanermut ilaanngillat Namminersornerullutik Oqartussat kommuninilu oqartussat malittarisassiornerat aalajangiinerilluunniit
1) nioqqutissanik kiffatuussinernilluunnit nammineq pisianut, naleqquttumik akuttussusilimmik naligiimmik piumasaqaatit atorlugit neqeroorutigineqarsimasunut tunngasuuppat, imaluunniit
2) niuernermi piumasaqaatit malillugit nioqqutissanik kiffatuussinernilluunnit nammineq pisianut tunngasuuppat.

§ 3.  § 1 naapertorlugu nalunaartussaatitaanermut ilaanngilaq malittarisassiorneq aalajangernilluunniit,
1) tamanut saqqummiunneqarsimappat, imaluunniit
2) unammilleqatigiinnermik killilersuut pisortat malittarisassiornerannit toqqaannartumik pisariaqartumilluunniit kingunerippagu.

§ 4.  Unammilleqatigiinnermut Ataatsimiititaliaq aalajangersimasumik nalileereernikkut aalajangersinnaavoq malittarisassiornerit aalajangiinerilluunniit unammilleqatigiinnermut anikkinnerusumik sunniuteqartut nalunaartussaatitaanermut ilaatinneqassanngitsut.

Nalunaarutiginninneq

§ 5.  § 1 naapertorlugu nalunaarutiginninnermut ilanngunneqassaaq malittarisassiornerup aalajangiinerulluunniit assilinera oqartussat kikkut malittarisassiornermik aalajangiinermilluunniit akuersisimanersut, aamma inuussutissarsiutigalugu ingerlataq suna aalajangiinermut malittarisassiornermulluunniit pineqarnersoq nalunaarutigalugu. Malittarisassiorneq aalajangiinerlu ulloq suna akuerineqarsimanersoq aamma takuneqarsinnaassaaq.

§ 6.  Malittarisassiornerup aalajangiinerullu akuerineqartarnerata kingorna kingusinnerpaamik sapaatit akunneri sisamat qaangiutsinnagit nalunaarutiginninneq Unammilleqatigiinnermut Ataatsimiititaliamut tunniunneqassaaq.
Imm. 2.  Nalunaarutiginninnermi allannguinerit aamma akuerineqarnerisa kingorna sapaatit akunneri sisamat qaangiutsinnagit Unammilleqatigiinnermut Ataatsimiititaliamut nalunaarutigineqassapput.

§ 7.  Unammilleqatigiinnermut Nakkutilliisoqarfiup nalunaarutiginninnermik tigusineq tigusinerup kingorna ulluinnaat kingusinnerpaamik qulit qaangiutsinnagit allakkatigut uppernassassavaa.

Tamanut saqqummiussineq

§ 8.  Nalunaarummi matumani § 1-i naapertorlugu malittarisassiornermik aalajangiinermilluunniit nalunaarutiginninneq tamanut saqqummiunneqassanersoq Unammilleqatigiinnermut Ataatsimiititaliamit aalajangerneqassaaq, takuuk unammilleqatigiinneq pillugu inatsisartut inatsisaanni § 15, imm. 2, aamma imm. 4.

Allaffissorneq naammagittaalliornerlu

§ 9.  Malittarisassiorneq aalajangiinerluunniit nalunaarummi matumani § 1-i naapertorlugu nalunaartussaatitaanermut ilaanersoq Unammilleqatigiinnermut Ataatsimiititaliamit aalajangerneqassaaq.

§ 10.  Nalunaarummi matumani § 1-i aamma § 8-i naapertorlugit Unammilleqatigiinnermut Ataatsimiititaliamit aalajangiinerit Nunatta Eqqartuussivianut suliassanngortinneqarsinnaapput, takuuk unammilleqatigiinneq pillugu inatsisartut inatsisaanni § 26.

Atulersinnerani ikaarsaarnermilu aalajangersakkat

§ 11.  Namminersornerullutik Oqartussat kommunillu malittarisassiornerit aalajangiinerilluunniit, nalunaarummi matumani § 1-i naapertorlugu nalunaarutigineqartussat, 1. martsillu 2008-mi atuuttuusut, 1. septemberip 2008 nallertinnagu Unammilleqatigiinnermut Nakkutilliisoqarfimmut nalunaarutigineqassapput.

§ 12.  Nalunaarut manna 1. julip 2008-mi atulissaaq.

Namminersornerullutik Oqartussat, ulloq 27. juni 2008

Siverth K. Heilmann

/

Bent A. Sørensen