Karakteeriliisarnermi tulleriinnilersuineq allatullu naliliisarneq pillugit Namminersornerullutik Oqartussat nalunaarutaat nr. 14, 23. juni 2008-imeersoq

Ilisimatusarfik pillugu inatsisartut inatsisaanni nr. 19, 19. november 2007-imeersumi § 7, imm. 1, isumaginninnermi perorsaasussanik ilinniartitsineq pillugu inatsisartut peqqussutaanni nr. 2, 20. maj 1998-imeersumi § 19, inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit inatsisartut peqqussutaanni nr. 2, ulloq 31. maj 1999-imeersumi § 7, imm. 1, folkehøjskolit pillugit inatsisartut peqqussutaanni nr. 9, 21. maj 2002-meersumi § 1, imm. 2, ilageeqarneq pillugu inatsisartut peqqussutaanni nr. 15, 28. oktober 1993-imeersumi § 34 a, kingullermik inatsisartut peqqussutaatigut nr. 7, 30. oktober 1998-imeersukkut allanngortinneqartoq, imarsiornermik ilinniartitaanerit pillugit inatsisartut peqqussutaanni nr. 7, 11. november 2000-imeersumi § 6, imm. 2, § 8, imm. 2, § 9, imm. 2, § 10, imm. 2, § 11, imm. 2, § 13, imm. 2, aamma Ilisimatusarfimmiit oqaaseqaasiuteqqitaq naapertorlugit aalajangersarneqarput:

 

Kapitali 1
Tulleriinnilersuineq GGS

§ 1. Ilinniagaqartut misilitsinnerni soraarummeernernilu, ilinniartitaanerit ataasiakkaat pillugit malittarisassat malillugit misilitsinnerni, soraarummeernerni imaluunniit naggataarutaasumik allagartartaarnerni, karakteeriliisarnermi tulleriinnilersuineq Greenlandic Grading System (GGS) malillugu nalilersorneqassapput, taamaattorli takuuk kapitali 2:
A: Naammassisamut pitsaalluinnartumut.
B: Naammassisamut ajunngivissumut.
C: Naammassisamut ajunngitsumut.
D: Naammassisamut ajorpallaanngitsumut.
E: Naammassisamut naammattumut.
Fx: Naammassisamut naammaginanngitsumut.
F: Naammassisamut pitsaanngitsumut.
Imm. 2. Karakteeriliisarnermi tulleriinnilersuinerup tuluit oqaasiinut nutserneqarnerini nalunaarummut ilanngussaq 1-imi taaguutit atorneqassapput. Agguaqatigiissitsinermut naatsorsuisoqassappat nalunaarummut ilanngussaq 2-mi allamut nuussinermut tabeli atorneqassaaq.
Imm. 3. Karakteeriliisarnermi tulleriinnilersuineq aammattaaq ukiumoortumut karakteeriliinermi assigisaannilu piginnaassutsinik nalilersuinerni atorneqartassaaq.

§ 2. Karakteeri A naammassisamut pitsaalluinnartumut karakteeriliunneqartassaaq, atuartitsissummi anguniakkanik naammalluartumik naammassinninnermik takutitsisumut, amigaateqanngitsumut imaluunniit annikitsuinnarnik pingaaruteqanngitsumik amigaateqartumut.

§ 3. Karakteeri B naammassisamut ajunngivissumut karakteeriliunneqartassaaq, atuartitsissummi anguniakkanik annertuumik naammassinninnermik takutitsisumut, annikitsumik ikittuinnarnik pingaarutilinnik amigaateqartumut.

§ 4. Karakteeri C naammassisamut pitsaasumut karakteeriliunneqartassaaq, atuartitsissummi anguniakkanik naammassinninnermik takutitsisumut, arlalinnik amigaateqartumut.

§ 5. Karakteeri D naammassisamut ajorpallaanngitsumut karakteeriliunneqartassaaq, atuartitsissummi anguniakkanik annikinnerusumik naammassinninnermik takutitsisumut, amerlasuunik annertuunik amigaatilimmut.

§ 6. Karakteeri E naammassisamut naammattumut karakteeriliunneqartassaaq, atuartitsissummi anguniakkanik minnerpaamik akuerineqarsinnaasumik naammassinninnermik takutitsisumut.

§ 7. Karakteeri Fx naammassisamut naammaginanngitsumut karakteeriliunneqartassaaq, atuartitsissummut anguniakkanik akuerineqarsinnaasumik takutitsinngitsumut.

§ 8. Karakteeri F naammassisamut akuerineqarsinnaanngilluinartumut karakteeriliunneqartassaaq.

 

Kapitali 2
Allamik naliliineq

§ 9. Naliliineq "Angusivoq/Angusinngilaq" ilinniarnernut ataasiakkaanut malittarisassani tamanna aalajangersarneqarsimappat atorneqarsinnaavoq.

§ 10. Naliliineq "Angusivoq/Angusinngilaq" pillugu nalunaarummi aalajangersagaq taamaaqataanik "Akuerineqarpoq/Akuerineqanngilaq" atorlugu naliliinermi atorneqarsinnaavoq.

 

Kapitali 3
Karakteerinik aalajangersaaneq

§ 11. Misilitsinneq aallartinneqareersimappat misilitsinnermik naliliisoqassaaq, soraarsitaaneq imaluunniit napparsimaneq pissutigalugit misilitsinneq kipitinneqanngippat, napparsimasimanerlu pissutissaqartitsinngippat misilitseqqissinnaanermut.

§ 12. Ilinniartitaanernut ataasiakkaanut malittarisassat malillugit anguniakkanik qanoq annertutigisumik naammassisaqarnermik imaluunniit piginnaasaqarnermik naliliinermi ataatsimut naliliineq tunngavigalugu karakteerimik aalajangiisoqassaaq.

§ 13. Atuartitsissummut pineqartumut imaluunniit atuartitsissutit arlallit ingerlanerinut atuartitsissummi anguniakkat tunngavigalugit naammassisanik imaluunniit piginnaasanik naliliisoqassaaq (atuartitsissummut karakteeriliineq). Ilinniartitsinerup imarisaatut allaaserineqarsimasumi atuartitsissutip imaluunniit ingerlannerata siunertaa aallaavigalugu naammassisaqarneq imaluunniit piginnaasaqarneq nalilerneqassaaq. Karakteerit aalajangersimasumik agguarneqarniarnissaat anguniarneqassanngilaq (piviusut tunngavigalugit karakteeriliineq).

§ 14. Censori imaluunniit soraarummeersitsisoq peqataasimappat taanna karakteeriliisuussaaq. Censori soraarummeersitsisorlu naliliinermi peqataatillugit karakteeri taakku akornanni oqallisigineqarneratigut aalajangerneqassaaq.
Imm. 2. Censorip aamma soraarummeersitsisup ataatsimut naliliinissaq isumaqatigiissutiginngippassuk tamarmik immikkut karakteeriliissapput. Misilitsinnermi karakteeri tassaassaaq, karakteerit taakku agguaqatigiissitsinerat karakteeriliisarnermi tulleriinnilersuinermi karakteerimut qaffasinnerusumik qaninnermut akunnaallisillugu, censori qaffasinnerpaamik karakteeriliisimappat taamaassimanngippallu karakteerimut appasinnermut qaninnermut.
Imm. 3. Naammassisaq imaluunniit piginnaasaq "Angusivoq"-mut imaluunniit "Angusinngilaq"-mut nalilerneqassanersoq isumaqatigiinngittoqarpat censorip naliliinera aalajangiisuussaaq.

§ 15. Nalilersuinermi censorit amerlanerusut imaluunniit soraarummersitsisut amerlanerusut peqataasimappata tamarmik ataasiullutik § 14, imm. 1 malillugu censoritut soraarummeersitsisutullu piginnaasaqassapput. Censoriusuni aamma soraarummeersitsisuni tamani isumaqatigiinngittoqarsimappat nalilersuinerit ataasiakkaat agguaqatigiissinnerat karakeriliisarnermi tulleriinnilersuinermi karakteerimut qaninnermut akunnaallisillugu naliliineq aalajangerneqassaaq. Agguaqatigiissitsineq karakteerit marluk akornanniippat qaffasinnerusumut akunnaallisinneqassaaq.

§ 16. Naammassisanut imaluunniit piginnaasanut assigiinngitsunut arlalinnik karakteeriliinikkut karakteeriliisoqarsimappat karakteeri tassaassaaq karakteerit arlallit agguaqatigiissinnerat karakteeriliisarnermi tulleriinnilersuinermi karakteerimut qaninnermut akunnaallisillugu. Agguaqatigiissitsineq karakteerit marluk akornanniippat qaffasinnerusumut akunnaallisinneqassaaq. Ilinniartitaanernut ataasiakkaanut malittarisassani aalajangerneqarsimasinnaavoq, ataatsimoortumik karakteerimik aalajangiisoqassatillugu, karakteerit ilai assigiinngitsumik pingaartinneqarlutik naleqartinneqassasut.

 

Kapitali 4
Angusinissamut piumasaqaat

§ 17. Soraarummeernermi, misilitsinnermilu imaluunniit piginnaasamik naliliinermi angusinissamut piumasaqaateqarpat piumasaqaat naammassineqassaaq ilinniagaqartoq minnerpaamik karakteeri E-mik imaluunniit naliliinermi "Angusivoq"-mik angusaqarpat.
Imm. 2. Karakteerit arlallit ilaappata, imm. 1-imi piumasaqaatit naammassineqarsimassapput, agguaqatigiissitsinermi angusaq minnerpaamik 2,0-iuppat. Agguaqatigiissitsinermi minnerpaamik 2,0-imik angusaqarnissaq piviusunngortinneqarsinnaanngilaq akunnaallisaanikkut. Misilitsinnerni tamani "angusivoq" anguneqarsimassaaq, misilitsinnerni il.il. "angusivoq/angusinngilaq" naliliinermi atorneqartillugu. Aammattaaq ilinniakkat ataasiakkaat malittarisassaanni aalajangersarneqarsinnaavoq piumasaralugu, misilitsinnermi ataatsimi misilitsinnerniluunniit arlalilinni il.il. agguaqatigiissitsinermut ilaasuni, minnerpaamik karakteeri aalajangersimasoq anguneqarsimassasoq.

 

Kapitali 5
Misilitsinnermi imaluunniit soraarummeernermi ataatsimut angusat

§ 18. Karakteerit sorliit misilitsinnermi imaluunniit soraarummeernermi angusani tamarmiusuni ilaatinneqassanersut ilinniartitaanernut ataasiakkaanut malittarisassani takuneqarsinnaapput.

 

Kapitali 6
Misilitsinnermi imaluunniit soraarummeernermi agguaqatigiissitsineq

§ 19. Ilinniakkat ataasiakkaat malittarisassaanni aalajangersarneqarsinnaavoq, karakteerit ataasiakkaat misilitsinnermi soraarummeernermiluunniit tamarmiusumik angusaasunut ilaasut, assigiinngitsunik oqimaassuseqarlutik ilaatinneqassasut.
Imm. 2. Ilinniartitaanernut ataasiakkaanut malittarisassani aalajangersarneqarsimasinnaavoq agguaqatigiissitsineq immikkoortunut aalajangersimasunut karakteerit agguaqatigiissinnerinut naatsorsorneqassasoq. Taamaattoqartillugu angusinissamut piumasaqaat, § 17 naapertorlugu, immikkoortunut tamanut naammassineqarsimassaaq. Immikkoortuni assigiinngitsuni karakteerit assigiinngitsumik oqimaassuseqartinneqarpata, § 21, imm. 2-mi periuseq immikkoortunut tamanut atorneqassaaq.

§ 20. Misilitsinnermi imaluunniit soraarummeernermi angusaq tamarmiusoq agguaqatigiissitsinikkut ersersinneqartarpoq kisitsisit arfineq-marluk aallaavigalugit karakteerilersueriaaseq tunuliaqutaralugu, tak. § 22. Agguaqatigiissitsinerup naatsorsornerani decimali ataaseq ilaatinneqassaaq. Agguaqatigiissitsinerup naatsorsornerani atuartitsissutit "Angusivoq/Angusinngilaq" atorlugu naliliiffigineqartut ilaatinneqassanngillat.

§ 21. § 16 naapertorlugu angusinissamut piumasaqaammi karakteerit arlallit peqataatinneqarpata, § 17 naapertorlugu karakteerimik ataatsimoortumik aalajangiinermi, aamma § 20 naapertorlugu agguaqatigiissitsinermik naatsorsuinermi, ilinniartitaanernut ataaasiakkaanut malittarisassani aalajangersarneqartutut assigiinngitsumik oqimaassuseqarlutik karakteerit ilaatinneqassapput.
Imm. 2. Agguaqatigiissitsinerit pingaartinneqartut tassaapput karakteerit ataasiakkaat katinneqarneri, karakteerit qanoq oqimaassuseqartinneranik amerlisarlugit, pingaartinneqartut katinnerinik agguarlugit.

 

Kapitali 7
Misilitsinnermi, soraarummeernermi naggataarnermilu uppernasaatit

§ 22. Misilitsinnermi, soraarummeernermi naggataarnermilu uppernarsaatini tulleriinnilersuineq GGS malillugu karakteeriliunneqartunut tamanut kisitsisit arfineq marluk aallaavigalugit tulleriinnilersuisarnermi kisitsit karakteerimut pineqartumut naapertuuttoq ilanngunneqartassaaq, ilanngussaq 2 naapertorlugu.
Imm. 2. Soraarummeernermi agguaqatigiissitsinermi angusaasup kisitsisit arfineq-marluk atorlugit karakteerilersueriaatsimi nalinga naatsorsorneqassaaq soraarummeernermullu uppernarsaammi ersilluni.

 

Kapitali 8
Immikkut akuersineq aamma saneqqussisinnaaneq

§ 23. Immikkut ittumik pisoqarneranik tunngavissaqartillugu, assersuutigalugu ilinniartup ilinniarnerminik naammassinninnissaata ilinniakkamulluunniit akuerisaanissaata tamanna pisariaqalersippagu, Ilinniartitaanermut Naalakkersuisoqarfik nalunaarutip sanioqqunneqarnissaa pillugu immikkut akuersisinnaavoq.
Imm. 2. Misiliinermut aamma ineriartortitsilluni suliaqarnermut atatillugu nalunaarummi malittarisassanik sanioqqutsisinnaaneq Ilinniartitaanermut Naalakkersuisoqarfimmit akuerineqarsinnaavoq.

 

Kapitali 9
Atuutilersitsinermi ikaarsaariarnermilu aalajangersakkat

§ 24. Nalunaarut aggustip aallaqqaataani 2008-mi atuutilerpoq piffissallu taassuma kingorna karakteerinut naliliinernullu sunniuteqassalluni.
Imm. 2. Ilutigisaanik Karakteeriliisarnermi naleqassutsinik tulleriinnilersuineq allatullu naliliisarneq pillugit Namminersornerullutik Oqartussat nalunaarutaat nr. 14, 9. april 2001-imeersoq atorunnaarsinneqarpoq.

§ 25. Ilinniartitaanernut § 24, imm. 1 oqaaseqatigiinnut siullernut ilaatinneqartunut § 24, imm. 2-mi taaneqartoq nalunaarut aamma atuutissaaq, napparsimasimalluni imaluunniit misilitseqqinnernut aggustip aallaqqaataa 2008 sioqqullugu ingerlanneqarsimasussaagaluartunut.

§ 26. Misilitsinnermi, soraarummeernermi imaluunniit naggataarnermut uppernarsaammi karakteerit tulleriinnilersueriaaseq 13 atorlugu karakteeriliunneqarsimasut GGS malillugu tulleriinnilersueriaatsimut allanngortinneqassapput, taamaattorli § 25 naapertorlugu. Karakteerinut allamut nuunneqarsimasunut § 24, imm. 2-mi taaneqartoq nalunaarut malillugu karakteeriliunneqarsimasut (tulleriinnilersueriaaseq 13 atorlugu karakteeriliunneqarsimasut) aamma uppernarsaammit takuneqarsinnaassapput.
Imm. 2. Allamut nuussineq tulleriinnilersuineq manna malillugu ingerlanneqassaaq:

13 atorl. tulle-riinnilersuineq	13	11	10	9	8	7	6	5	03	00
Tulleriinniler-suineq GGS	A	A	B	C	C	D	E	Fx	Fx	F

Imm. 3. Ilinniartitaanernut ataasiakkaanut malittarisassat malillugit agguaqatigiissitsineq naatsorsorneqassappat tamanna GGS tunngavigalugu tulleriinnilersueriaaseq kisiat tunngavigalugu agguaqatigiissitsineq ingerlanneqassaaq, taamaattorli § 25 naapertorlugu.

Namminersornerullutik Oqartussat ulloq 23. juni 2008

Tommy Marø

/

Lise Lennert Olsen

---

Ilanngussaq 1

Karakteeriliinermi tulleriinnilersuinerup tuluttuumut nutserneri

A:  For an excellent performance displaying a high level of command of all aspects of the relevant material, with no or only a few minor weaknesses.
B:  For a very good performance displaying a high level of command of most aspects of the relevant material, with only minor weaknesses.
C:  For a good performance displaying good command of the relevant material but also some weaknesses.
D:  For a fair performance displaying some command of the relevant material but also some major weaknesses.
E:  For a performance meeting only the minimum requirements for acceptance.
Fx: For a performance which does not meet the minimum requirements for acceptance.
F:  For a performance which is unacceptable in all respects.

 

Ilanngussaq 2

Tulleriinnilersuineq ECTS aammalu kisitsisit arfineq marluk tunngavigalugit tulleriinnilersuinerup akornanni naleqqiussinerit

Tulleriinnersuinermi GGS-imi karakteerip A-p kisitsisit arfineq marluk tunngavigalugit tulleriinnilersuinermi 12 assigaa

Tulleriinnersuinermi GGS-imi karakteerip B-p kisitsisit arfineq marluk tunngavigalugit tulleriinnilersuinermi 10 assigaa

Tulleriinnersuinermi GGS-imi karakteerip C-p kisitsisit arfineq marluk tunngavigalugit tulleriinnilersuinermi 7 assigaa

Tulleriinnersuinermi GGS-imi karakteerip D-p kisitsisit arfineq marluk tunngavigalugit tulleriinnilersuinermi 4 assigaa

Tulleriinnersuinermi GGS-imi karakteerip E-p kisitsisit arfineq marluk tunngavigalugit tulleriinnilersuinermi 02 assigaa

Tulleriinnersuinermi GGS-imi karakteerip Fx-p kisitsisit arfineq marluk tunngavigalugit tulleriinnilersuinermi 00 assigaa

Tulleriinnersuinermi GGS-imi karakteerip F-p kisitsisit arfineq marluk tunngavigalugit tulleriinnilersuinermi -3 assigaa