Unammilleqatigiinnermut Nakkutilliisoqarfiup ingerlatsinera pillugu Namminersornerullutik Oqartussat nalunaarutaat nr. 3, 1. februar 2008-imersoq
Unammilleqatigiinneq pillugu inatsisartut inatsisaat nr. 16, 19. november 2007-imeersumi § 17, imm. 3 naapertorlugu aalajangersarneqarpoq:
Kapitali 1
Unammilleqatiginnermut Nakkutilliisoqarfik§ 1. Unammilleqatigiinnermut Nakkutilliisoqarfik Unammilleqatigiinnermut Ataatsimiititaliamut allaffeqartitsinermigut unammilleqatigiinneq pillugu inatsisartut inatsisaannik atortitsinermigut Inuussutissarsiornermut Naalakkersuisumut attuumassuteqanngilaq.
Imm. 2. Unammilleqatigiinnermut Nakkutilliisoqarfik pisortamit aqunneqarpoq Unammilleqatigiinnermut Nakkutilliisoqarfiup ingerlatsineranut pingaarnertigut akisussaasuusoq. Taassuma peqannginnerani qaninnerpaatut tullersortaasoq taartaasarpoq.
Kapitali 2
Piginnaatitaaneq§ 2. Unammilleqatigiinnermut Ataatsimiititaliap suleriaasia aamma ingerlatsinera pillugu Namminersornerullutik Oqartussat nalunaarutaat nr. 2, 1. februar 2008-imeersumi §§ 4-6 naapertorlugit suliat Unammilleqatigiinnermut Ataatsimiititaliamit suliarineqartussaasut aalajangiiffigineqartussaasullu Unammilleqatigiinnermut Nakkutilliisoqarfimmit Unammilleqatigiinnermut Ataatsimiititaliamut saqqummiunneqartassapput, imaluunniit Unammilleqatigiinnermut Nakkutilliisoqarfiup isumaa naapertorlugu Unammilleqatigiinnermut Ataatsimiititaliamut saqqummiunneqartariaqartut.
Imm. 2. Unammilleqatigiinneq pillugu inatsisartut inatsisaat malillugu Unammilleqatigiinnermut Nakkutilliisoqarfiup aalajangersaaffigisassaani malittarisassanut missingersuutit Unammilleqatigiinnermut Nakkutilliisoqarfik Unammilleqatigiinnermut Ataatsimiititaliamut saqqummiussissaaq.
Imm. 3. Unammilleqatigiinnermut Nakkutilliisoqarfiup Unammilleqatigiinnermut Ataatsimiititaliap aalajangiineri suliarissavai unammilleqatigiinnerlu pillugu inatsisartut inatsisaannik ulluinnarni atortitsineq pillugu ilisimatitsisassalluni.§ 3. Unammilleqatigiinnermut Ataatsimiititaliaq sinnerlugu § 2, imm. 1 aamma 2-mut suliat ilaanngitsut Unammilleqatigiinnermut Nakkutilliisoqarfimmit, Unammilleqatigiinnermut Ataatsimiititaliap suleriaasia innersuussineralu naapertorlugu aalajangiiffigisarpai. Aammattaaq Unammilleqatigiinnermut Ataatsimiititaliaq sinnerlugu suliat § 2, imm. 1 aamma 2-mut ilaatinneqartut piareersarnerini atorneqartussani Unammilleqatigiinnermut Nakkutilliisoqarfik aalajangiisarpoq.
Imm. 2. Unammilleqatigiinnermut Nakkutilliisoqarfiup pisortaa, tamatuma saniatigut Unammilleqatigiinnermut Ataatsimiititaliap siulittaasua peqatigalugu suliani ataatsimiititaliap ataatsimiinnissaanut utaqqissunneqarsinnaanngitsuni aalajangiisinnaavoq.
Imm. 3. Imm. 1 aamma 2 malillugit Unammilleqatigiinnermut Nakkutilliisoqarfiup aalajangiineri pillugit nalunaarusiaq Unammilleqatigiinnermut Ataatsimiititaliap tulliani ataatsimiinnerani Unammilleqatigiinnermut Nakkutilliisoqarfiup pisortaanit saqqummiunneqassapput.§ 4. Unammilleqatigiinneq pillugu inatsisartut inatsisaannik atortitsineq tassungalu atatillugu ingerlatsineq pillugit kiisalu unammilleqatigiinnermut pissutsinut allanut tunngatillugu nassuiaatit nalinginnaasut Unammilleqatigiinnermut Nakkutilliisoqarfimmit tamanut saqqummiunneqarsinnaapput.
§ 5. Unammilleqatigiinnermut Nakkutilliisoqarfiup pisortaa unammilleqatigiinneq pillugu inatsisartut inatsisaannik unioqqutitsineq pillugu unnerluutiginnittoqarnissaa peqatigisaanillu, unammilleqatigiinneq pillugu inatsisartut inatsisaanni § 29 naap. akiliisitsiniarnerup annertusissaanut tunngatillugu kaammattuuteqarnissaq siunertaralugu unnerluussisussaatitaasunut saaffiginnittoqassanersoq aalajangissaaq.
Imm. 2. Unammilleqatigiinnermut Nakkutilliisoqarfiup pisortaa unammilleqatigiinneq pillugu inatsisartut inatsisaanni § 28 naap., suliffeqarfiit ullormut sapaatip akunnikkaartumilluunniit pinngitsaaliissutaasumik akiliisinneqassanersut aalajangissaaq.
Kapitali 3
Aalajangiinerit§ 6. Unammilleqatigiinnermut Nakkutilliisoqarfiup aalajangiineri allaganngorlugit nalunaarutigineqassapput aalajangiinermullu aalajangiisuusimasunik pissutsit isummallu pillugit paasissutissanik imaqassallutik.
Imm. 2. Aalajangiinerit, Nunatta Eqqartuussivianut suliassanngortinneqarsinnaasut, aalajangiinerup Nunatta Eqqartuussivianut suliassanngortinneqarsinnaaneranut ilitsersuummik malitseqassapput, oqartussat naammagittaalliorfissat suliakkiinermi suleriaasissami paasissutissat allallugit, tassunga ilanngullugu piffissarititaasut.
Kapitali 4
Nalunaarutiginninnerit apeqquteqaatillu§ 7. Unammilleqatigiinneq pillugu inatsisartut inatsisaanni § 2, § 8, § 9, § 11, § 12, § 13 aamma § 14 naapertorlugit nalunaarutiginninnerit, apeqquteqaatit, saqqummiussinerit nalunaarutillu Unammilleqatigiinnermut Nakkutilliisoqarfimmut tunniunneqassapput.
Kapitali 5
Paasissutissat§ 8. Unammilleqatigiinnermut Ataatsimiititaliaq sinnerlugu Unammilleqatigiinnermut Nakkutilliisoqarfik paasissutissanik tamanik piumasaqarsinnaavoq, tassunga ilanngullugit naatsorsuutit, naatsorsuutinut atortut, atuakkanit tigulaarinerit, niuernermi pappilisat allat aamma paasissutissat qarasaasiakkut toqqorneqarsimasut ingerlatsinermut imaluunniit inatsisartut inatsisaanni aalajangersakkanut pissutsit ilaanerannik aalajangiiniarnermut pisariaqartinneqartutut isigineqartut, unammilleqatigiinneq pillugu inatsisartut inatsisaanni § 21 naap.
Kapitali 6
Nipangiussisussaatitaaneq§ 9. Unammilleqatigiinnermut Nakkutilliisoqarfimmi sulisut pisortat ingerlatsineranni suliassat suliarineqartarnerat pillugu inatsisartut inatsisaanni tamanna pillugu malittarisassat malillugit nipangiussisussaatitaapput.
Kapitali 7
Atulersinnera§ 10. Nalunaarut una martsip aallaqqaataani 2008-mi atulissaaq.
Namminersornerullutik Oqartussat, ulloq 1. februar 2008
Siverth K. Heilmann/
Peter Hansen