30. august 2007

UKA2007/37

 

Inatsisissatut siunnersuummut oqaaseqaatit

Nalinginnaasumik oqaaseqaatit

1. Aallaqqaasiut:

a. Inatsisissatut siunnersuutip pingaarnerusutigut imarisai

Inatsisissatut siunnersuutip imarivai Ilisimatusarfimmi ilisimatusarnermut, ingerlatitseqqinnermut ilinniartitaanermullu sinaakkutissanut malittarisassat aamma aqutsinermut, pingaarnerusutigut aaqqissugaanermut kiisalu aningaasaqarnikkut allaffissornikkullu pissutsinut tunngasut. Inatsisissatut siunnersuutip Ilinniarfissuaq, Ilisimatusarfik, Isumaginninnermik Siunnersortinngorniat Ilinniarfiat (ISI), Tusagassiornermik Ilinniarfik aamma Peqqissaanermik Ilinniarfimmi peqqissaasunngorniarneq Ilisimatusarfiup ataanut aaqqissugaanikkut katersorpai.

b. Siunnersuutip siunertaa

Maanna Ilisimatusarfimmi ilinniartitaanerit aamma atorfinissutaasinnaasumik bacheloritut ilinniarnerit suliamut aalajangersimasumut ilinniarfinni sisamaasuni Inerisaavimmilu ingerlanneqartartut qulaani pineqartut, katigunnerisa kiisalu Groenlandicap, Oqaasileriffiup, Naatsorsueqqissaartarfiup Nunattalu Toqqorsiviata Pinngortitaleriffiup eqqannguanut nuunnerisigut, ingerlaqqiffiusumik ilinniartitaanerit aamma Kalaallit Nunaanni Kalaallit Nunaallu pillugu ilisimatusarneq ilisimatusarnikkullu paasisat ingerlateqqinnerat qitiusumik nukittorsarneqassapput.

Tassuunakkut Kalaallit Nunaata nunarsuaq tamakkerlugu issittumi ilisimatusarnikkut ataqqisaalluni qitiusumik peqataalernissaa sinaakkuserneqassaaq, Kalaallit Nunaat avataaniit ilisimatuunik akuerisaasunik ilinniartunillu ornigarneqarlualissalluni tamannalu aqqutigalugu Kalaallit Nunaata ilisimaneqassusiata siuarsarnissaanut peqataalissalluni.

c. Inatsisissatut siunnersuutip tunuliaqutaa

2001-imi Inatsisartut upernaakkut ataatsimiinneranni (oqaluuserisassani nr. 31) aalajangiunneqarpoq Ilimmarfik pilersinneqassasoq - ilisimatusarnermut ingerlaqqiffiusumillu ilinniartitaanernut qitiusutut. Aalajangiineq sioqqullugu suliaq annertooq ingerlanneqarpoq, 1993-imi aallartinneqartoq, siunnersuutigineqarlunilu Ilisimatusarfik, Isumaginninnermik Siunnersortinngorniat Ilinniarfiat (ISI) aamma Tusagassiornermik Ilinniarfik Ilimmarfimmut katersuun-neqassasut.

Kalaallit Nunaanni ilinniartitaanerit iluarsartuuteqqinnerinut ilaasumik taamanikkut naalakkersuisuusut kissaatigaat atorfinissutaasinnaasumik bachelorinngorniartarnerit (isumaginninnermi siunnersortitut, tusagassiortutut ilinniartitsisutullu) ilisimatusarnikkut tunngaveqartumik bachelorinngorniarninngorlugit annertusarneqassasut. Ilisimatusarfiup ilisimatusarnikkut tunngavilinnik bachelorinngortitsillunilu kandidatinngortitsisarnera pissutigalugu pissusissa-misoorpoq atorfinissutaasinnaasumik bachelorinngorniartarnerit Ilisimatusarfimmut katigun-nissaat. Suliamut tassunga ilaatillugu aammattaaq kissaatigineqarpoq peqqissaasutut ilinniar-neq kiisalu Inerisaavimmi perorsaanikkut inerisaanerit Ilisimatusarfimmut attuumassuteqalissasut.

Inatsisit atuuttut iluanni 2005-imiit misiligaalluni suliat aallartisarneqarput, ilinniarfinni ilinniartut atorfinissutaasinnaasumik bacheloritut angusaqarsinnaanngorlugit aaqqissuussisoqarluni, "atorfinissutaasinnaasumik bacheloritut" (qallunaatut: "professionsrettet bachelor") taaguuserlugit, bacheloritut ilinniarnernit "atuagarsorfiunerusunit" allaassutaat ersersinniarlugu.

Ilinniartitaanerit taakkua Ilisimatusarfimmut katigunnissaannut alloriarneq tulleq pivoq Ilisimatusarfik pillugu Inatsisartut inatsisaata nr. 16-ip, 31. oktober 1996-imeersup allanngortinneratigut, tassuunakkullu Ilisimatusarfik atorfinissutaasinnaasumik bacheloritut, diplomimik, masteritullu allagartartaartitsisinnaanngorlugu. Tamanna pillugu siunnersuut Inatsisartut 2006-imi ukiakkut ataatsimiinneranni oqallisigineqarpoq (oqallisissani imm. 42), Inatsisartullu inatsisaatigut nr. 17, 20. novemner 2006-imeersutut akuerineqarluni. Inatsisartut inatsisaat naapertorlugu suliamik ilinniarfiit suli nammineertuupput, kisiannili Ilisimatusarfiup ilisimatusarnermut pisariaqartut isumagissavai ilinniagartuutullu allagartartaartitsisartuulluni.

Inatsisartut inatsisissaattut siunnersuutip matuma suliaq 1993-imi aallartinneqartoq inernilissavaa Kalaallit Nunaanni upperisalerinikkut, inunnut tunngasutigut, inuiaqatigiilerinikkut, pe-rorsaanikkut peqqissutsikkullu ilisimatusarnermut, ingerlatitseqqinnermut ilinniartitaanermullu tunngasut katigunnissaannut sinaakkusiinikkut.

d. Malittarisassat atuuttut

Ilisimatusarfik pillugu Inatsisartut inatsisaat atuuttoq tassaavoq nr. 16, 31. oktober 1996-imeersoq. Taassuma taarserpaa Inatsisartut inatsisaat nr. 3, 9. maj 1989-imeersoq. Imm. C-p ataani eqqaaneqartutut inatsisartut inatsisaat atuuttoq Inatsisartut inatsisaatigut nr. 17, 20. november 2006-imeersukkut allanngortinneqarpoq. Inatsisartut inatsisaata malitsigisaanik nalunaarutit arlaqartut § 31, imm. 2-mut oqaaseqaatini eqqaaneqartut atuuttuulersinneqarput.

Ilinniarfinni sisamani ilinniarnerit – Ilisimatusarfimmut akuutinneqalersussatut siunnersuutaasut – tamarmik immikkut inatsisartut peqqussutaannik toqqammaveqarput. Peqqussutit taakkua naapertorlugit nalunaarutit kaajallaasitallu arlaqartut atuuttuulersinneqarput, taakkuttaaq § 31, imm. 2-mut oqaaseqaatini nalunaarsorneqarput.

Inatsisissatut siunnersuutip matuma atuutilersinneratigut inatsisartut peqqussutaat taakkua atorunnaarsinneqassapput, ilinniarfiillu pineqartut atorunnaarlutik Ilisimatusarfimmut ilaalissallutik.

Siunnersuutigineqarpoq nalunaarutit kaajallaasitallu atuuttuujunnaarsinneqarnissamik tungaannut aamma/imaluunniit siunnersuut manna naapertorlugu tunngaveqartunik allanik taarserneqarnissaminnut atuutiinnassasut, tak. ataani imm. 2, inatsissatut siunnersuutip pingaarnersaanut tunngasoq.

e. Inatsisissamik piareersaalluni suliaq

Immikkoortup siuliani siunnersuutip matuma tunuliaqutaa nassuiarneqarpoq. 2006-imi upernaakkut Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfik Ilisimatusarfiup aaqqissugaanissaa pillugu inatsisissamullu siunnersuusiorpoq, taakkununnga ilaallutik atorfinissutaasinnaasumik bachelorinngorniartarnerit.

Siunnersuut taanna suliaavoq siulersuisoqartussanngorlugu fakultetillu marluusussanngorlugit, pisortat arlaqartut atorfeqartussanngorlugit ataatsimiititaliallu siunnersuisuusut arlaqartussanngorlugit, ilinniartitaanermut siunnersuisoqatigiinnit – ilaatigut ilinniartitsisussanik ilinniartitsinermit - misilittakkat tunngavigalugit. Inatsisissatut siunnersuummi ilaatigut danskit universiteteqarnermut inatsisaat nutaaq tunngavigineqarsimavoq.

Suliffeqarfiit pisortaasa juni 2006-imi ataatsimiinneranni aalajangiunneqarpoq, suliffiit pisortaat maanna Ilisimatusarfimmi siunnersuisoqatigeeqarluni (universitetsråd) aqutseriaaseq tunngavigalugu inatsisissatut siunnersuummik suliaqaqqissasut. Siunnersuut taanna Ilulissani februar 2007-imi isumasioqatigiinnermi sammineqarpoq, tassani peqataallutik siunnersuisoqatigiinniit peqataatitat, suliffeqarfiit pisortaat aamma Kultueqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmiit peqataatitat. Siunnersuut manna isumasioqatigiinnermi tassani oqallisaasut 2006-imilu upernaakkut siunnersuusiaq tunngavigalugit suliarineqarpoq. Kultureqarnermut, Ilinniartitaanermut, Ilisimatusarnermut Ilageeqarnermullu naalakkersuisoqarfiup malitsigitillugu inatsisissatut siunnersuut Ilimmarfiup pisortarigallagaasa ataanni suliffeqarfiit pisortaallu ingerlaavartumik oqallisigisarpaat.

2. Inatsisissatut siunnersuutip pingaarnersai

a. Ingerlatsinikkut inissisimaneq

Ilisimatusarfik, ilinniarfiit Inerisaavillu - Ilisimatusarfimmut atalersussatut siunnersuutigine-qartut - tamarmik Namminersornerullutik Oqartussat ataanniipput. Taamatullu Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfiup ataa-niillutik. Peqqissaasunngorniarneq Peqqissutsimut Naalakkersuisoqarfiup ataaniippoq.

Allaffissornikkut pisariillisaanerup ilaatut aamma Ilisimatusarfiup - ilinniarfiillu kattunnerup kingorna - nammineerluni allaffissornikkut suliassanik annertunerusunik suliaqarsinnaalernissamut periarfissaqalernissaa pissutigalugu, siunnersuutigineqarpoq, Ilisimatusarfik ullumerniit annertunerusumik nammineersinnaalissasoq. Tamanna aamma "talimik ungasissuseqarnermik" taaneqartartumut, nunanilu killerni universitetini periusaasumut naapertuuppoq, tassuunakkut ilisimatusarfiit ilisimatusarnissamut periusissaminnillu toqqaanissamut kiffaanngissuseqartitaasarmata allaffissornikkut immikkuualuttut allaat ilanngullugit aqunneqanngikkaluarlutik. Qitiusumit aqunneqarnermiit annertunerusumik kiffaanngissuseqarneq pisortaasut annertunerusumik pisinnaatitaanerulernerannik akoqartinneqassaaq, suliamut tunngasuinnaat qitiutinnagit, aammali aqutsineq, inerisaaneq aningaasanillu aqutsineq ilaatinneqarlutik.

Siunnersuutigineqarpoq Ilisimatusarfik Pinngortitaleriffittut Naatsorsueqqissaartarfittullu inissisimalissasoq. Suliffeqarfiit pineqartut tamarmik siulersuisoqarput, isertitsiffigisinnaasaminnik ingerlatsisinnaallutik, Namminersornerullutik Oqartussaannaanngitsunik sullissisinnaallutik sinneqartoorutitillu ukiumut aningaasalersuiffiusumut tullermut nuussinnaallugit. Pinngortitaleriffittaaq ilisimatusarnermik ingerlatsisarmat Ilisimatusarfiup assingusumik inissisimanissaa siunnersuutikkuminarpoq.

Taama inissisimalernerup nassatarissavaa Ilisimatusarfik nammineerluni ilisimatusarfinnik ilinniarfinnillu allanik Kalaallit Nunaata avataaniittunik ilinniartitaanerit ilisimatusarnerillu pillugit isumaqatigiissuteqarsinnaassammat, – tak. siunnersuummi § 6, taamatullu immikkut pisoqartillugu universitetit allat suleqatigalugit ilinniagartuutut allagartartaartitsisinnaassalluni, "joint degrees"-inik taaneqartartunik, § 5, imm. 2. Peqqissaasutut ilinniarnermi ilisimatusarneq tunuliaqutarineqartussaq Ilisimatusarfiullu ilinniagartuutut allagartaliisinnaanissaanut toqqammaviusoq taamaalilluni assersuutigalugu Syddansk Universitetimi – issittumi nakorsaatit pillugit ilisimatusarnermik ingerlataqartutut tusaamaneqareersumi – ingerlanneqarsinnaalissaaq.

Siunnersuutigineqarpoq Ilisimatusarfik angusaqarnissaqpillugu Naalakkersuisunik isumaqatigiissuteqarsinnaassasoq, tak. siunnersuummi § 9, imm. 6, tassuunakkut sinaakkutissat anguniakkallu iluanni aqutsineq eqqunneqarsinnaaqqullugu. Angusaqarnissamik isumaqatigiissutit Kalaallit Nunaata avataani ilisimatusarfinni ilisimaneqarput. Taamaaliortarneq Kalaallit Nunaanni ilaatigut KNR-ip Naalakkersuisullu tamanik sullissinissaq pillugu isumaqatigiissutaan-niit ilisimaneqarpoq.

b. Ilinniartitaanerit

Inatsisartut inatsisaat nr. 17, 20. november 2006-imeersoq aqqutigalugu Ilisimatusarfik pisinnaatinneqarpoq ilinniagartuutut atorfinissutaasinnaasumik bacheloritut allagartartaartitsinissamut. Tamatumani siunertaavoq ilinniartitaanerit nutaat arlaqartut aamma ingerlaqqiffiusumik ilinniakkat pioreersut Ilisimatusarfimmut attuumassuteqartinneqalernissaannut sinaakkusiinissaq. Inatsisartut inatsisaanni tassani aalajangersakkat siunnersuummi matumani §§ 2, imm. 1 aamma 4, imm. 4-tut ingerlateqqinneqarput.

Ilinniartitaanerit taakkua nutaat taaguutigilissavaat atorfinissutaasinnaasumik bachelori. Oqaatigineqareersutut ilinniartitaanerit taakku ilinniarfinni arlaqartuni misileraalluni aaqqissuussinertut maanna atuutereerput. Atorfinissutaasinnaasumik bacheloritut ilinniarnerit piffissaq tamaat ilinniarnerupput, ukiunik 3-4-nik sivisussuseqartut, sungiusarlunilu sulinermik annertuumik ilaqarlutik, kiisalu aalajangersimasumik suliaqarluni atorfininnissamut ammaassi-suullutik, soorlu ilinniartitsisutut, isumaginninnermi siunnersortitut, tusagassiortutut peqqissaasutulluunniit.

Atorfinissutaasinnaasumik bacheloritut gradimi pineqarput ilinniakkat, suliamut sammisumik ilinniartitaanerup ilisimatusarnermillu tunngaviliilluni atuagarsornikkut ilinniarnerup - ilinniagartuutut sammisat assigiinngitsut aqqutigalugit pisartut – akuleriiffii.

Ilutigisaanik ilinniagartuutut ilinniaqqinnerit Ilisimatusarfimmit neqeroorutigineqarsinnaalerput. Ilinniakkanut taakkununnga ilaapput diplomitaarniarnerit, bacheloritut aamma atorfinissutaasinnaasumik bachelorinngorniarnertut naleqartut aamma masterinngorniarnerit, bacheloritut diplomitaarniarlutillu ilinniarsimasut ingerlaqqiffigisinnaasaat.

Allaffissornikkut aningaasaqarnikkullu sunneqatigiinnerup – 2001-imili Ilimmarfik pillugu aalajangiiniarnermi tunngavigisanut ilaasup – saniatigut aammattaaq kissaataavoq ilinniartitaanerit pineqartut ilisimatusarnermik tunngaveqalersinnissaat, tassuunakkut suliamut tunngasutigut sunneqatigiinneq pilersikkumallugu aamma ilinniartitsisut ilinniartitaanerillu qaffasissusaat annertusarumallugu ilutigisaanillu ilinniartut annertunerusumik avatangiiseqatigiilernissaat angujumallugu.

Suli pingaaruteqartuassaaq ilinniartitsisut meeqqanik ilinniartitsisinnaanissaat peqqissaasullu napparsimasunik paarsisinnaanissaat, kisianni ilisimatusarnermik tunngaviliineq isumaqarpoq ilisimatuut suliamillu ingerlatsisut toqqaannarnerusumik tamanullu iluaqutaasumik attaveqatigiilernerat. Aammattaaq atorfinissutaasinnaasumik bachelorinngorniarnerni ilinniartitsisut piukkunnartut soqutiginnittullu ilisimatuunngorniarnissamut periarfissaqalissapput. Ilisimatusarnermik tunngaviliineq piviusunngortikkiartuaagassaavoq, ilinniakkat aaqqissugaanerisa ilisimasat misilittakkallu tigussaasut kiisalu ilisimatusarnikkut ilisimasat akuleriisinnerisigut pisussaq.

Immikkoortuni tulliuttuni allaaserineqarpoq, Ilisimatusarfiup qanoq ilusilernissaa siunnersuutigineqarnersoq, ilisimatusarfinni qangaaniilli ilinniartakkat atorfinissutaasinnaasumillu bachelorinngorniarnerit nutaat akuleriissilernissaasa siuarsarnissaat angujumallugu.

Ilisimatusarfiup ilinniakkanut ingerlaqqiffiusunut qitiunera ersersikkumallugu siunnersuutigineqarpoq, Ilisimatusarfiup piffissaq tamaat ilinniartitsissutigisartakkani piffissap ilaani pikkorissarnertulluunniit sivikinnerusutut (fagit ataasiakkaat) neqeroorutigisinnaalissagai, tak. siunnersuummi § 3, imm. 2 aamma 3. Taamaaliorneq ilaatigut amerlanerusut ilinniaqqikkumalernerannik ilaatigullu suliffeqarfiit sulisullu ilinniagartuutut allagartaqalinngikkaluarlutik im-mikkut ilisimaqalernissamik pisariaqartitsisut eqaatsumik aaqqissuussisinaanissaannik nassataqassaaq. Periarfissaq taanna aamma atorneqarsinnaavoq Kalaallit Nunaata avataaniit ilinniartut ilinniakkamik ilaanik Ilisimatusarfimmi ingerlatserusuttut kajumissaarnissaannut.

Nunarsuaq tamakkerlugu ilisimatusarnikkut ilinniartitaanerillu pillugit suleqatigiinneq ilisimatuunillu paarlaasseqatigiittarneq ukiuni kingullerni pingaaruteqarnerujartuinnarpoq. Universitetimut Ilisimatusarfittut angissusilimmut Issittumilu inissisimasumut, Ilisimatusarfiinnaanngitsumut aammali Kalaallit Nunaannut tamarmut annertuumik pingaaruteqarpoq, Ilisimatusarfiup Kalaallit Nunaata avataani ilisimatusarfinnik ilinniarfinnillu suleqateqartarnissamut periarfissinnissaa. Taammaat pisariaqarpoq Ilisimatusarfiup ilinniartitsinerisa Kalaallit Nunaata avataani ilinniartitaanerit assingusut pitsaassutsikkut piumasaqaataannut naapertuuttuunissaat, tassunga ilaallutik imaritinneqartut ilinniarnerillu sivisussusiat pillugu piumasaqaatit. Ilisimatusarfimmi ilinniagaq ikerinnarmut uniffiussanngilaq, kisiannili Kalaallit Nunaata avataani ilinniaqqinnermut ilisimatusarnermulluunniit atorneqarsinnaasariaqarluni. Taamaammat ilinniartitaanerit Bologna-mi ilusiliussamik taaneqartartoq naapertorlugu aaqissuunneqassapput, tassani Europami ilinniartitaanerit ingerlaqqiffiusut ataatsimoorussamik pitsaassuseqarnissaat isumaqatigiissutaavoq. Ilusiliussami tassani immikkoortut ilagaat European Credit Transfer System-imik (ECTS-imik) taaneqartartoq, killeqarfiit akimorlugit ilinniartitaanerit assersuunnissaannik periarfissiisoq. 60 ECTS points assigaat ukioq ataaseq piffissaq tamaat ilinniarneq (ilinniartup ukioq naallugu suliai). ECTS pointit atornissaannik piumasaqaat Inatsisartut inatsisaat nr. 17, 20. november 2006-imeersoq aqqutigalugu eqqunneqarpoq, siunnersuummilu matumani § 2-kkut ilaatinneqarluni.

Ilinniartitaanerit nutaat Ilisimatusarfimmut – taassuma inassuteqareerneratigut – ilaatinneqalersinnaapput, siunnersuummi § 4, imm. 1. Eqqarsaatigineqarpoq oqalutsitut ilinniarneq atorfinissutaasinnaasumik bacheloritut ilinniarnertut aaqqissuunneqassasoq, perorsaasunngorniarnerlu taamattuttaaq aaqqissuunneqassasoq takorloorneqarsinnaavoq. Aaammattaaq periarfissaavoq niuernikkut ilinniartitaanerit ingerlaqqiffiusut Ilisimatusarfimmut ilaalersinnaanerat imaluunniit suleqateqalersinnaanerat.

Nutaatut § 8-mi siunnersuutigineqarpoq Ilisimatusarfiup ilinniartut pisortatigoortumik ilinniarneranni inuutissarsiutitaarniarnerannilu ilitsersortassagai, soorlu suliamik ilinniarfiit taamaaliortartut.

c. Ilisimatusarfiup qullersai

Inatsisartut inatsisaanni atuuttumi Ilisimatusarfimmi siunnersuisooqatigiit (universitetsråd) tassaapput Ilisimatusarfiup oqartussaasui ataatsimoorlutik qullersaasut. Sallerpaatillugu suliassaraat suliamut aamma ilinniartitaanermut ilisimatusarnermullu tunngatillugu politikkeqarnermi apeqqutit kiisalu Ilisimatusarfiup sulinerani pingaarnerusutigut anguniagassat sinaakkutigisassallu aalajangersagassaralugit. Siunnersuisooqatigiit inissisimanerat oqaatigineqarsinnaavoq tassaasoq aqutsineq, ataqatigiissaarineq akuersissuteqarnerlu. Rektori siunnersui-sooqatigiinni siulittaasuuvoq, ilaasortallu sinneri tassaallutik atorfillit ilinniartullu, suleqatigisartakkaminnit toqqarneqartut aamma ilaasortaq ataaseq Kalaallit Nunaanni ilisimatusarnermik sulialinnut sinniisuusoq kiisalu Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmit peqataatitaq.

Suliamut sammisumik ilinniakkallu ataatsimuulerneq, siulersuisut avataaneersut amerlanerussuteqarfisaasa eqqunnerat – soorlu nunani allani universitetini aamma taamaattoqartoq – aamma Ilisimatusarfiup inuiaqatigiinnut avatangiiserisanut ammarnerunissaanik kissaateqarnerup nassataraat, siulersuisut Ilisimatusarfimmi qullersaallutik oqartussaanissaannik kissaateqarneq. Soorlu Ilisimatusarfiup ingerlatsinikkut inissisimanera pillugu eqqaaneqartoq, siulersuisoqarnerup siunertarisariaqarpaa, Namminersornerullutik Oqartussat ataanni ingerlatsivinnut nalinginnaasumik atuutsinneqartunut sanilliullugu siulersuisut annertunerusunik pisinnaatitaaffiligaanerat. Siulersuisoqartitsilluni ilusiliisarneq KNR-imit ingerlatseqatigiiffinnillu Namminersornerusunit pigineqartunit ilisimaneqarpoq.

Ilusiliinissamik eqqarsaatersuutit inernerivaat, Ilisimatusarfiup qullersaasumik aqutsisuisa siunnersuisoqatigiinnit qinikkaniit siulersuisunut – ilaasortat amerlanerit avataaneersuuffigisaannut - allanngortinneqarnissaat, tassuunakkut Ilisimatusarfimmut suliffeqarfinnit assingusunit aqutsinermik misilittagallit aamma pilersaarusiorluarnermik aningaasaqarnermullu tunngasunik pisinnaasallit peqataatinneqarsinnaaleqqullugit. Siunnersuutaavoq ilaasortat sinneri maanna siunnersuisartoqatigiinnit atuuttunit ilisimaneqartutut, Ilisimatusarfiup sulisuisa ilinniartuisalu akornannit toqqarneqartassasut. Siulersuisunut tapertaliunneqassapput ilinniagartuut siunnersuisoqatigiiffiat (akademisk råd) atorfeqartut ilinniartullu akornannit toqqagaasut rektorimillu siulittaasuuffigineqartut. Tassuunakkut pilersaarusiornikkut politikkimullu tunngasutigut suliassat ulluinnarni suliassanit suliassanillu immikkut ilinniagartuutut tunuliaqu-taqarnissamik piumasaqaatitaqarfiusunit Ilisimatusarfimmullu attuumassuteqartunit – siulersuisut piginnaasaqarfigisassaattut ilimagineqarsinnaanngitsunit - immikkoortinneqassapput. Akerlianilli siulersuisut Ilisimatusarfimmut eqqutissavaat piginnaasat pilersaarusioqqissaarnermut aqutseriaatsinullu tunngasut, taamatullu Kalaallit Nunaata avataani ilisimatusarnermit ilinniartitaanermillu misilittakkat atitunerusut.

Taamaalilluni taamatut aaqqiinerup siulersuisoqarluni ilusiliinerup sunniuteqarluartarnera avatangiisinullu attaveqarluarnera Ilisimatusarfiullu nammineq ilinniagartuujussutsikkut pi-ginnaasai sumiiffimmilu pissutsinik ilisimasaqassusia katiguppai. Siunnersuummi §§ 9 – 11 innersuunneqarput.

d. Rektoreqarfik (rektorat)

Ilisimatusarfik pillugu Inatsisartut inatsisaat atuuttoq malillugu rektorip ulluinnarni aqutsineq isumagisaraa. Rektorip ikiortigaa rektorip tullersortaa (prorektor). Rektori Ilisimatusarfiup siunnersuisoqatigiivini aalajangersimasumik siulittaasuuvoq. Rektori aamma rektorip tullersortaa atorfilinnit ilinniartunillu qinigaasarput. Rektori ukiuni 3-ni rektorillu tullersortaa ukiumi ataatsimi ikkusimasussatut qinigaasarput. Rektorip rektorillu tullersortaata qinigaaffii aam-mattaaq kipungapput ataatsikkoorlutik qinigaasinnaanatik.

Siulersuisut tunngaviusumik suliassaraat ulluinnarni qullersaallutik aqutsisut atorfinitsillugillu soraarsinnissaat. Taamaammat siunnersuummut ilaavoq siulersuisut rektori atorfinitsissagaat, tamatumalu kingorna siulersuisut rektorip inassuteqareerneratigut rektorip ulluinnarni qanimut suleqatigissassai – tassalu rektorip tullersortaa ilisimatusarfiullu pisortaa – atorfinitsissavaat. Tassuunakkut akisussaallutik siulersuisut ulluinnarnilu aqutsisut sunniuteqarluartumik suleqatigiinnissaannut tunngavissaqalissaaq, tak. siunnersuummi § 9, imm. 4.

Suliamut, aqutsisinnaassusermut ilinniagartuujussutsimullu tunngatillugu rektorimut piumasaqaataasut allanngunngillat. Rektori ilinniagartuut siunnersuisoqatigiiffianni aalajangersimasumik siulittaasuussasoq siunnersuutaavoq. Aammattaaq rektorip rektorillu tullersortaata akisussaaffii allanngortinneqanngillat. Siunnersuummi §§ 12 aamma 13 innersuunneqarput.

e. Ilinniagartuut siunnersuisoqatigiiffiat

Ilinniagartuut siunnersuisoqatigiiffiannik rektorip siulittaasuuffigisaanik pilersitsinissaq siunnersuutaavoq.

Ilinniagartuut siunnersuisoqatigiiffiat inuttaqassaaq pisortanit, atorfilinnit ilinniartunillu. Qinersisartunit tallimanit qinersisoqartassaaq, tassuunakkut Ilisimatusarfimmi ilinniagaareersut atorfinissutaasinnaasumillu bacheloritut ilinniakkat nutaat atorfillit ilinniartullu akornannit peqataatitaqarsinnaaqqullugit, ilinniartitaanerit ilaasortaatitaasa oqimaaqatigiiffigisaannik.

Siunnersuutaavoq ilinniagartuut siunnersuisoqatigiiffiat annerusutigut Ilisimatusarfiup siunnersuisoqatigiivisa Inatsisartut inatsisaat maannamut atuuttoq naapertorlugu suliarisartagaat suliarisassagaat, siunnersuut manna malillugu siulersuisunut imaluunniit institutini siunnersuisoqatigiinnut suliassanngortinneqarsimanngippata. Ilinniagartuut siunnersuisoqatigiiffiat pillugu malittarisassat siunnersuummi §§ 14 – 16-imiipput.

f. Institutit

Instituti tassaavoq ilisimatusarnerup ilinniartitaanerullu ingerlanneqarfia. Ilisimatusarfik ullumikkut tallimanik instituteqarpoq:

• Ingerlatsinermut Instituti
• Inuiaat piorsarsimassusaasalu oqaluttuarisaanerannik ilisimatusarfik
• Oqaasilerinermut, atuakkialerinermut tusagassiuteqarnermullu ilisimatusarfik
• Upperisarsiornermut Instituti
• Ilinniaatsinut Instituti

Institutit tamarmik ilinniarnermut ataatsimiitaliaqarput, institutimi ilinniarnermut tunngasunik suliaqartut, tassunga ilaalluni ilinniartussanik akuersisarneq. Ilinniarnermut ataatsimiititaliat institutimi atorfilinnit ilinniartunillu toqqagaasarput. Ilinniarnermut ataatsimiititaliap ilinniagartuut ilaasortami akornannit institutip pisortassaa toqqartarpaat. Ilisimatusarfiup siunnersuisoqatigiivisa institutit suliassaqarfissaallu aalajangiuttarpai.

Oqaatigineqareersutut institutit pisortaat ullumikkut ilinniarnermut ataatsimiititalianit toqqarneqartarput. Siunnersuutigineqarpoq institutit pisortaat paarlaallugu rektorimit atorfinitsinneqartassasut, tak. siunnersuummi § 13, imm. 3. Institutimut qangaaniit Ilisimatusarfimmi ilin-niartitaanerit atorfinissutaasinnaasumillu bachelorinngorniarnerit ilaappata siunnersuutigineqarpoq instituti immikkoortortaqarfinnut aggulussinnaasoq, tak. siunnersuummi § 23.. Institutip ilisimatusarnikkut qaffasissusissaa qularnaarumallugu, siunnersuutigineqarpoq institutip pisortaa - maanna Inatsisartut inatsisaanni atuuttutut - ilisimatuutut akuerisaasasoq.

Ilisimatusarfik nammineq aaqqissuussaanini pillugu oqartussaasariaqarpoq, tassunga ilaallutik institutit amerlassusissaat sulerinissaallu. Siunnersuut naapertorlugu suliaqarfiit allat Ilisimatusarfimmut ilanngunneqartussaammata, soorlu peqqissaasunngorniarneq, aamma periarfis-saasariaqarpoq institutit assigiinngitsunik angissuseqarsinnaanerat assigiinngitsunillu aaqqissugaasinnaanerat. Suliamut tunngatillugu ataqatigiissuseq aaqqissuussaanikkut agguataarnermi pingaarnerusariaqarpoq, killormut pinnani. Taamaammat siunnersuutigineqarpoq instituteqarnerup ilusiligaanera ima eqaatsigissasoq, assersuutigalugu upperisalerinerup – naak annertunngikkaluarluni – qangaaniilli susassaqarfinnut allanut attuumassuteqarnani nammineertuunini attatiinnarsinnaallugu.

Ilisimatusarfiup nammineq ilisimatusarnermik – ilinniakkamut atasussamik - ingerlatsinissaa siunertamut naapertuutinngippat, siunnersuutigineqarpoq ilinniagaq pineqartoq institutip avataanut inissinneqarsinnaasoq. Paarlaallugu universiteti pineqartoq isumaqatigiissuteqarfigineqassaaq tamatuminnga qularnaarisumik ilusiliinissaq pillugu, tak. siunnersuummi § 17, imm. 3. Isumaqatigiissut taamaattoq rektorimit akuerineqassaaq, tak. siunnersuummi § 13, imm. 6. Taamatut ilusiliinikkut qularnaarneqassaaq, peqqissaasutut ilinniarnerup ilisimatusarnermut attuumassuteqarnissaa assersuutigalugu Syddansk Universitetimut napparsimmavimmullu tassaniittumut. Taamaattoq pissutsit immikkut ittut akerliliinngippata institutip qangaaniilli ilisimatusarfinni ilinniarneqartartut atorfinissutaasinnaasumillu bachelorinngorniarnerit ilaatittariaqarpai. Taamaaliornikkut ilisimatusarnermut attuumassuteqarneq ataatsimoorussamik tunngavilik pilersinneqassaaq faginilu imarisamikkut assersuunneqarsinnaasuni ilisimatuut ilinniartitsisutut atorneqarsinnaalissallutik, bachelorinngorniarneq, kandidatinngorniarneq imaluunniit atorfinissutaasinnaasumik bachelorinngorniarneq apeqqutaatinnagit takuuk siunnersuummi § 17, imm. 2.

Institutit nalinginnaasumik ullumerniit anginerusussaammata, siunnersuutigineqarpoq institutit aningaasaqarnikkut missingersuusianut inassuteqaateqartassasut, imaappoq aningaasartuutissat agguaanissaannut siunnersuuteqartassasut. Aammattaaq institutit inassutigisassavaat institutip aaqqissugaanera qanoq issanersoq. Institutini siunnersuisoqatigiit misilittagaqarfigilerneri ilutigalugit, taakkununnga suliassanik annertunerusumik tunniussuinissaq kissaatiginassaaq, taamaaliornikkut rektori ilinniagartuut siunnersuisoqatigiiffiallu oqilisaakkumallugit. Innersuunneqarpoq siunnersuummi § 20.

Siunnersuutigineqarpoq ilinniakkanut ataatsimiititaliat (studienævn) institutini siunnersuisoqatigiinnik taarserneqassasut. Institutini siunnersuisoqatigiit tassaassapput institutip pisortai immikkoortunilu pisortaqarpat taakku ilanngullugit aalajangersimasumik inuttaasutut, atorfillilli ilinniartullu aammattaaq suli ilaasortaatitassaminnik qinersisinnaassapput. Ilisimatusarfimmi qangaaniilli ilinniartitaanerit atorfinissutaasinnaasumillu bachelorinngorniarnerit oqimaaqatigiimmik ilaasortaatitaqartikkumallugit siunnersuutigineqarpoq, ilinniartitaanerit taakkua tamarmik institutimi siunnersuisoqatigiinni peqataatitaqarnissaat qularnaarneqassasoq, siunnersuummi § 21.

g. Immikkoortortat

Qulaani eqqaaneqartutut tunngaviusumik isumaavoq, institutimut ilaasariaqartut ilisimatusarfimmi qangaaniilli ilinniagaasartoq ataaseq amerlanerilluunniit kiisalu atorfinissutaasinnaasumik bachelorinngornianik ilinniartitsineq. Naak institutip suliassarigaluaraa ilinniartitaane-rit marluiusut ataatsimoortilernissaat, ulluinnarni ilinniartitaanerit imarisamikkut, ingerlanne-qarnermikkut,ilinniartorisamikkullu ima assigiinngitsigaat, ilinniartitaanerit pineqartut immik-koortillugit allaffissornikkut ingerlanneqarnissaat periarfissinneqartariaqarluni. Taamaammat siunnersuutigineqarpoq institutip ataani immikkoortortaliorsinnaaneq periarfissinneqassasoq. Immikkoortortaq taamaattoq tassaasinnaavoq ilisimatusarfik allamik ingerlataqanngitsoq imaluunniit allamik ingerlataqarani ilinniarfiusinnaalluni, aammali akuleriinneqarsinnaapput.

Siunnersuutigineqarpoq immikkoortortaqarfik pisortamik aqunneqassasoq. Immikkoortortami pisortaq rektorimit atorfinitsinneqarlunilu soraarsinneqartassaaq. Immikkoortortaqarfinni anginerusuni soorlu ilinniartitsisunngorniarfimmi aammattaaq ilinniartitaanermi pisortaqarsinnaavoq, ilinniartitaanerit ataasiakkaat periusaat malillugu. Tamatigullumi naatsorsuutigineqarpoq atorfinissutaasinnaasumik bachelorinngornianik ilinniartitaanerni ilutsit ilisimaneqartut inatsisissatut siunnersuutip akuerineqarnerata kingorna ukiuni siullerni attattiinnarneqarallassasut.

Immikkoortortaqarfimmi suliarineqassapput pilersaarusiornermut ingerlatsinermullu tunngatillugu suliassat, soorlu ilinniartitsinerit soraarummeersitsinerillu, taamatuttaaq assersuutigalugu ilinniartunik ilitsersuineq tassaniissinnaavoq.

Immikkoortortaqarfiit pillugit aalajangersakkat pillugit takukkit §§ 23 aamma 24.

h. Pitsanngorsaanermi pitsaassusermillu siuarsaanermut siunnersuisoqatigiit

Nutaatut Ilisimatusarfiullu kissaateqarneratigut siunnersuutigineqarpoq institutit ataasiakkaat pitsanngorsaanermi pitsaassusermillu siuarsaanermut siunnersuisoqatigiinnik pilersitsisinnaasut. Atuisut siunnersuisoqatigiivi imaluunniit ilinniartitaanermut siunnersuisoqatigiit pineqartunut assingusut ilinniartitsisussanik ilinniartitsinermit suliamillu ilinniarfinnit allanit ilisimaneqarput. Siunnersuisoqatigiit siunertaraat ilaatigut Ilisimatusarfiup avammut ammarnissaanut peqataanissaq ilaatigullu suliamik ingerlatsisunit immersorneqarnissaq taakkunanngalu ilisimasanik misilittakkanillu paarlaasseqatigiinnissaq.

Pitsanngorsaanermi pitsaassusermillu siuarsaanermut siunnersuisoqatigiinnit siunnersorneqarnissamik isumasioqatigiittarnissamillu pisariaqartitsineq ilimanarpoq institutimiit institutimut piffissallu ingerlanerani nikerassasoq. Taamaammat siunnersuut taamaallaat siunnersuisoqatigiit suliassaqarfii, ataatsimiikulassusissaat assigisaallu pillugit malittarisassanik pingaarnerusuinnarnik imaqarpoq.

Siunnersuutaavoq pitsanngorsaanermi pitsaassutsimillu siuarsaanermut siunnersuisoqatigiinni ilaasortat tassaassasut suliamik ilisimasallit avataaneersut, institutimi ilinniartut inassuteqareernerisigut rektorimit, institutimi aqutsisumit immikkoortortamilu pisortamit toqqarneqartut. Siunnersuutaavoq rektoreqarfimmit pitsanngorsaanermi pitsaassusermillu siuarsaanermut siunnersuisoqatigiinnut tamanut ilaasortat 1 - 3 toqqarneqassasut. Tamatumunnga pissutaavoq siunnersuisoqatigiit assigiinngitsut imminnut ataqatigiinnissaat kissaatigineqarmat. Taamaalilluni akornutissaqanngilaq inuup ataatsip siunnersuisoqatigiinnut marlunnut amerlanernulluunniit ilaasortaasinnaanera, naak siammaassinissaq anguniartariaqaraluartoq.

Pitsanngorsaanermi pitsaassusermillu siuarsaanermut siunnersuisoqatigiit pillugit malittari-sassat siunnersuummi §§ 25-26-miipput.

i. Pisinnaatitsinerit pissutsillu allat

Pisinnaatitsilluni aalajangersakkat atuuttut Inatsisartut inatsisaanni maanna atuuttumi §§ 18 aamma 19-imiipput. Malittarisassat pilersinneqarsimasut takussutissiarinerat siunnersuutip § 31, imm. 2-anut oqaaseqaatiniippoq.

Ilisimatusarfik anginerulertussaammat taamaalillunilu amerlanernik suliassaqalertussaalluni, suliffeqarfillu ataasiinnaammat siunnersuutigineqarpoq, Ilisimatusarfik ingerlatsinikkut malittarisassanik – atorfillit imaluunniit ilinniartut inatsisitigut pisinnaatitaaffiinik attuinngitsunik imaluunniit annikitsuinnarmik attuisunik - aalajangersaasinnaanissamut pisinnaatitaaffilerneqassasoq. Tamatumunnga assersuutaasinnaavoq ilinniartut ilinniartutut pineqaatissinneqarsin-naanerinut tunngasut. Taakkua maanna Ilinniartutut soraarsitaasinnaaneq pillugu Namminer-sornerullutik Oqartussat nalunaarutaanni nr. 8-mi, 2. januar 1990-imeersumi allaqqapput. Siunnersuutigineqarpoq rektorip pisinnaatitaaffik tamanna tigussagaa, kisiannili ilinniartitaanermut pisortaqarfimmut naammagittaalliorsinnaaneq periarfissaqassasoq.

Siunnersuutigineqarpoq Naalakkersuisut siunissami taamaallaat nalunaarusiortassasut ilinniartitaanerit ilusereeqatigiit pillugit, soorlu atorfinissutaasinnaasumik bachelorinngorniarneq pillugu aamma pitsaassutsimik inerisaaneq, Ilisimatusarfimmi ilisimatusakkanut soraarummeernernullu isersinnaaneq kiisalu atorfiit ilusaat pillugit. Ilisimatusarfik malittarisassaqartuassaaq (statut), allaffissornikkut pissutsinik aalajangersaaffiusumik, taakkununnga ilaallutik ataatsimoorussamik suleqatigiiffit. Siunnersuutigineqarpoq malittarisassaq maannatut Naalakkersuisunit akuerineqartassasoq. Siunnersuut manna Ilisimatusarfimmi allannguinernik anner-tuunik nassataqartussaammat, nutaamik malittarisassaliortoqartariaqassaaq.

Ilinniartitaanerit pillugit immikkoortoq b-mi eqqaaneqartutut, Naalakkersuisut Ilisimatusarfik pisinnaatissinnaavaat ilisimatusarfinnut ilinniarfinnullu allanut suleqatigiinnissamik isumaqatigiinniarnissamut. Tamatumunnga assersuutaasinnaavoq Peqqissaanermik Ilinniarfiup Syd-dansk Universitetimik peqqissaasutut ilinniartitaaneq tassungalu atasumik ilisimatusarnissaq pillugu isumaqatigiissutaa.

Pisinnaatitaaneq pillugu malittarisassat siunnersuummi § 7-imiipput. Angusaqarnissaq pillugu isumaqatigiissummut innersuussineq § 9. imm. 5-imiippoq.

j. Aningaasaqarnermut allaffissornermullu tunngasut

§ 27-mi siunnersuutigineqarpoq, Ilisimatusarfik Naatsorsueqqissaartarfik Pinngortitaleriffillu assigalugit aningaasaqarnikkut nammineersinnaaffeqassasoq. Tamatuma nassatarivaa Ilisimatusarfik allanit aningaasassarsiorsinnaalissammat, soorlu allanik ilisimatusarnikkut ilinniartitsinikkullu sullissilluni. Aammattaaq siunnersuutigineqarpoq Ilisimatusarfik tunissutisisinnaalissasoq, tunisisup kissaataa naapertorlugu nammineq atorsinnaasaminik, soorlu aningaasaateqarfinnik – aningaasanut inatsit aqqutigalugu tapiissutinit avissaaqqasunik. Taamatut aningaasalersorneqariaaseq Kalaallit Nunaata avataani universitetini nalinginnaavoq.

Siunnersuutigineqarpoq Ilisimatusarfik missingersersuusiortarneq, naatsorsuuserineq naatsorsuutinillu saqqummiineq pillugit malittarisassat qaqugukkulluunniit Namminersornerullutik Oqartussani atuuttut naapertorlugit naatsorsuutiminik saqqummiisassasoq.

Ilimmarfiup aalajangiiffiginissaanut tunngavigisani eqqaaneqarpoq suliffeqarfiit illoqatigiittut naapertuuffiatigut ataatsimoorussamik allaffissornikkut ingerlatsisariaqartut. Taamaammat § 29-mi siunnersuutigineqarpoq Ilisimatusarfik periarfissinneqassasoq Ilimmarfimmi suliffeqarfinnmik allanik allaffissornikkut sullissinissaminut.

3. Aningaasaqarnikkut allaffissornikkullu pisortanut sunniutissai

Immikkoortumi uani sammineqarput Ilisimatusarfiup aqunneqarneranik allannguinerup suliffeqarfiillu allat ilaatilernerisa kingunerisaannik aningaasaqarnermut allaffissornikkullu sunniutaasussat. Ilimmafimmut allaffissornikkut, ilinniartitaanikkut ilisimatusarnikkullu piumasaqaatit matumunnga ilaanngillat. Taakkua allakkut inatsisiliornikkut saqqummiunneqassapput, soorlu aningaasaliissutit pillugit inatsisitigut aamma angusasassat pillugit isumaqatigiissutiti-gut.

Ilisimatusarfik 13 mio. kr. missaanni aningaasaliiffigineqartarnikuusinnarluni suliffeqarfinngussaaq 100 mio. kr. missaannik aningaasaliiffigineqartartoq, taamaammallu suliffeqarfiit inatsisitigut ataatsimoortilerumallugit nutaamik inatsisiliornissaq pisariaqarpoq. Aningaasaqarnikkut sinaakkutigisat annertusineqarnissaat ilimasaarutigineqarnikuunngimmat pisariaqarpoq Ilisimatusarfiup aningaasarneranik naleqqussaanissaq, ilisimatusarnermut aningaasalersuinissaq siunertaralugu. Naalakkersuisut ilimagisaraat inersuarni ataatsimoorussamik ilin-niartitsisalernertigut fagillu ataatsimoorunneqartalernerisigut ilinniartitsinermi aningaasatigut sipaartoqassasoq. Aammattaaq allaffiit ataatsimut katigunnerisigut sipaartoqarsinnaavoq. Aammattaaq Naalakkersuisut isumaqarput aqutsisut nukittuut anguniagaqarluartullu kisimik taama angusaqarsinnaasut. Siunnersuummi allaaserineqartutut siulersuisut Naalakkersuisunut angusassat pillugit isumaqatigiissut aqqutigalugu pisussaaffiligaassapput, iluatsitsinermullu uuttuutaassapput Ilisimatusarfiup ilinniartunngorumasunik pilerilersitsisinnaassususia, naammassisaqartitsisinnaassusia nunarsuarlu tamaat akuerisaasumik ilisimatusarsinnaassusia.

Siulersuisoqartitsilluni ilusiliinermi Siulersuisoqartitsilluni ilusiliinerup qanorpiaq aningaasaqarnikkut sunniuteqarnissaa aningaasanngorlugit nalileruminaappoq, kisianni siulersuisoqartitsilluni ilusiliinerup aningaasaliissutinut sunniutai – ilinniartitsinikkut ilisimatusarnikkullu anguniakkanut naleqqiullugit – nunarsuup sinnerani universitetini atorneqarput, aqutseriaasiullunilu namminersortutut ingerlatsisut ilarpassuisa aallaavittut atugarisaat.

Aqutseriaatsinut allanut naleqqiullugu – taamaallaat aningaasartuutaassapput siulersuisunut aningaasarsiarititat, angalanerit, allaffissorneq assigisaalu. Siulersuisunut aningaasarsiarititat ilimagisaasut tassaapput siulittaasumut ukiumut 70.000 kr ilaasortallu sinnerinut ukiumut 35.000 kr. Siulersuisunut aningaasartuutit katillugit ukiumut 420.000 kr-ussasut ilimagineqarpoq.

Aalajangiinissamut tunngavigisani 2001-imeersunili naatsorsuutigineqarpoq suliffeqarfiit arlallit Ilimmarfimmut katigunnerisigut allaffissornikkut sipaaruteqartoqassasoq. Sipaarutissat anguneqarsinnaapput ataatsimoorussamik allaffissornikkut suliassat ataatsimut katersuunnerisigut. Tamanna siunnersuummi matumani naatsorsuutigineqarpoq, siunnersuummi § 29, imm. 2.

Aammattaaq Ilisimatusarfiup ilinniarfiillu katigunnerisigut allaffissornikkut suliaasartunut tunngatillugu – soorlu allaffissornikkut suliassat ilinniartunut tunngasut, missingersuutit, naatsorsuuserinerup, toqqorsiveqarnerup, sulisunik allaffissornikkut sullissinerup, aqutsinerup allattoqarfiullu katigunnerisigut sipaartoqarsinnaavoq. Aammattaaq ilinniartitaanerit akimorlugit ilinniartitsisunik atuisinnaalerneq aqqutigalugu ilinniartitaanernillu assigiinngitsunit holdit ataatsimoortillugit ilinniartinnerisigut sipaarnissamut periarfissanik ammaassisoqassaaq.

Ilinniarfiit arfinillit nammineertuusimasut Ilisimatusarfimmut katersuunneqarpata, ilimagineqarpoq sunneqatigiinneq ataatsikkullu annertunerusunik ingerlatsinikkut iluaqutissat pilissasut ilinniartitsinermut, ilisimatusarnermut, ingerlatitseqinnermut allaffissornermullu tunngasutigut.

Ataatsimut isigalugu aningaasatigut sinaakkutigisat annertusinneqassanngillat, tassami Ilisimatusarfimmut ataatsimoortumik aningaasaliissutaasussat assigaat ilinniarfinnut maanna nammineertuusunut ukiuni missingersuusiorfiusuni aningaasaliissutaasut.

Annertunerusumik ilisimatusarnermut ilinniakkaminnillu naammassisartut amerlinerinut aningaasaliussassat, ilimagisaavoq allaffissornikkut ilinniartitsinikkullu atorluaanerunermit pissarsiarineqassasut. Ilisimatusarfik pillugu Inatsisartut inatsissaattut siunnersuutikkut siulersuisut annertunerusumik ingerlatsinikkut iluaqutissanik angusaqarnissaannut sakkussat pisaria-qartut pilersinneqassapput.

Ataatsimut isigalugu inatsissatut siunnersuutip sunniutigissavaa, aningaasat annertussutsimikkut taakkuinnaagaluartut inuiaqatigiinni kalaallini nalilinnik annertunerusunik pilersitsisoqarnera.

Agguaassinermut tunngasutigut ilimagisariaqarpoq sulisut allaffissornermik ilinniartitsinermillu suliaqartut ikileriarnerat, nukiillu ilisimatusarnermut atorneqartut annertuseriarnerat. Nunami maani sulisut paarlakaannerujussuisa ilimanarsisippaat sulisunik ikilisaanerit inuit namminneerlutik soraarnerisigut pisassasut.

2008-mi Inatsisartut aningaasanut inatsisissaatut siunnersuummi takuneqarsinnaapput ilinniartitsineq, ilisimatusarneq allaffissornerlu pillugit konto 40.12.24-mi kisitsisit pingaarutillit 2008-mut ukiunullu missingersuusiorfiusunut tunngasut. Pingaaruteqarpoq erseqqissassallugu Ilisimatusarfiup angisuup ataatsimoortullu pilersinnera annertunerusumik ilisimatusarnermik ilinniartitsinermillu nassataqartussaammat, annertusisamillu ingerlataqarnerup tamatuma aningaasalersornera ilinniartitsinermi annermillu allaffissornikkut sunneqatigiissitsinikkut pisussaammat, tassami Ilisimatusarfik tamarmiusoq annertunerusumik aningaasaliiffigineqassanngilaq. Ukiumit naatsorsuuseriffiusumit 2006-imiit 2008-mut ilinniartitsinerinnarmut toqqaannartumik aningaasartuutit 6%-imik qaffannissaat ilimagineqarpoq. Aningaasanut taakkununnga ilaanngillat ilinniartunik ilitsersuineq il.il., taakkua aalajangersimasumik aningaasartuutinik taaneqartut ataanniipput. Ukioq naallugu ilinniartut 2006-imiit 2008-mut 20% missaannik amerleriassasut ilimagineqarpoq. Amerliartortuarnissaannut apeqqutaassaaq ilinnialernissamut piareersaataasumik ilinniakkanik taaneqartartuni ilinniartut qanoq amerliartortiginerat, taakkununnga ilaallutik ilinnialernissamut piareersataasumik ukioq ataaseq pikkorissarsinnarlutik naammassisut amerlassusaat, taakkua 2008-miit GU-qarfinni pingasuni tamani pilersinneqassapput (Qaqortoq, Aasiaat maannamutullu Nuuk). Ilinnialernissamut piareersarluni ilinniarfinnit nalinginnaasunit naammassisartut 2006-2011-mi 20%-imik qaffariassasut ilimagineqarpoq.

Ilisimatusarfiup aningaasartuutai aalajangersimasut 2008-mi 61 mio. kr-iniit 2011-mi 57 mio. kr-inut ikileriassangatinneqarput, assigalugu 7%-imik appariarneq. Ilisimatusarnikkut inerisaanikkullu suliassat ineriartornerat malinnaavigiumallugu konto 40.12.24-mi ilisimatusarnermi ingerlatsinikkut anguniakkat arlallit ilanngunneqarnikuupput, soorlu allakkiat saqqummer-sinnissaat, isumasioqatigiinnernut saqqummiilluni peqataanerit, inerisaallunilu suliassat arlaqartut. 2008-mi inatsisissatut siunnersuummi 15,5 mio. Kr. Ilisimatusarfiup suliffeqarfiini ilisimatusarnermut immikkoortinneqarput. Taakkunannga Ilisimatusarfik Inerisaavillu 12 mio. kr. missaanni aningaasaliisuussapput. Ilisimatusarfiup aningaasaliinera 2006-imut naleqqiul-lugu nikissanngilaq, Inerisaaviullu aningaasaliinera annerusumik tassaalluni maannamut ilisimatusarnertut inerisaanertullu ingerlanneqartartut takussaasunngortinneqarnerat. Tusagassiortut Ilinniarfiannit, Isumaginninnermi Siunnersortinngorniat Ilinniarfiannit Ilinniarfissuarmillu ilisimatusarnermut aningaasaliissutaasussat 3 mio. kr. missaanniissapput. Kisitsisit suliffeqarfinnit imminernit nalunaarutaapput, aningaasallu ilinniartitsinermit tiguneqannginnissaat suliffeqarfiit ingerlatsinissaminnut kisitsisaannit ersipput, soorlu tiimit amerlassusissaattut ukiorlu kaajallallugu ilinniartut amerlassusissaattut, taakkununnga tunngatillugu suliffeqarfiniit amerlerialaarnissaat ilimagisaavoq.

Konto 40.12.24-mi ingerlatsinissamut tunngatillugu kisitsisit tunngavimmikkut ilitsersuutitut isigisariaapput, taamaalillutillu taamaallaat suliffeqarfiit naalakkersuisoqarfiullu aningaasanut inatsisissatut siunnersuutip saqqummiunnerani ilimagisaattut isigisariaqarlutik. Naatsorsuutaavoq angusassat pillugit naalakkersuisoqarfiup Ilisimatusarfiullu isumaqatigiissusiornerisi-gut ilimagisat pillugit immikkuualunnerusut ilanngussuunneqarsinnaalissasut, kiisalu isumaqatigiissutip peqataasut pisussaaffilissavai.

4. Aningaasatigut allaffissornikkullu inuutissarsiornermut sunniutissat

Siunnersuut inuutissarsiornermut aningaasatigut allaffissornikkullu sunniuteqassanngilaq.

5. Avatangiisinut pinngortitamullu sunniutit

Siunnersuut avatangiisinut pinngortitamullu sunniuteqassanngilaq.

6. Innuttaasunut allaffissornikkut sunniutit

Siunnersuut innuttaasunut allaffissornikkut sunniuteqassanngilaq.

7. Naalagaaffeqatigiinnermut namminersornermullu tunngasut

Siunnersuut naalagaaffeqatigiinnermut tunngasutigut sunniuteqassanngilaq. Ilisimatusarfik ataqqisaasoq Kalaallit Nunaannut namminersortumut iluaqutaassaaq.

8. Pisortanut kattuffinnullu tusarniaaneq

Siunnersuut 15. maj – 19. juni ukununnga tusarniaassutigineqarpoq:

KANUKOKA
Sulisitsisut Peqatigiiffiat (GA)
NUSUKA
ILIK
SIK
IMAK
ASG
PIP
Isumaginninnermi Siunnersortit Peqatigiiffiat
Tusagassiortut Peqatigiiffiat
Artek
Naalagaaffiup sinniisoqarfia
Peqqissaasut Kattuffiat
Ilisimatusarfik
Ilinniarfissuaq
Isumaginninnermik Siunnersortinngorniat Ilinniarfiat (ISI)
Tusagassiornermik Ilinniarfik
Peqqissaanermik Ilinniarfik
Inerisaavik
SPS
Oqaatsinik Pikkorissarfik
Oqaasileriffik
Pinngortitaleriffik
Nunatta Katersugaateqarfia Toqqorsivialu
Nunatta Atuagaateqarfia
Kalaallit Nunaanni Naatsorsueqqissaartarfik
Namminersornerusuni pisortaqarfiit tamarmik
Ministeriet for videnskab, teknologi og udvikling
Undervisningsministeriet
Rektoreqatigiit

Tusarniaanermi akissutit pingaarnersaat

Tusarniaanermit akissutit 24-upput, taakkunanngalu 16-it oqaaseqaatitaqarlutik. Tusarniaaffiit uku oqaaseqaateqanngillat: Ilaqutariinnermut Pisortaqarfik, Ineqarnermut Attaveqaateqarnermullu Pisortaqarfik, Akileraartarnermut Pisortaqarfik, ILIK, Inuussutissarsiuteqarnermut Pisortaqarfik, Rigsombudi, PIP aamma PI, taammaattorli taakku Peqqissutsimut Pisortaqarfimmit akissutit innersuuppaat. Uku oqaaseqaateqarput: IMAK, TI, DM – ilinniagartuut kattuffiat, Ilisimatusarfik, Ilinniarfissuaq, Tusagassiortut Peqatigiiffiat, Rektoreqatigiit, KANUKO-KA, Inerisaavik, Sulisitsisut Peqatigiiffiat (GA), Peqqissutsimut Pisortaqarfik, NKA, Ministeriet for Videnskab, Teknologi og Udvikling, Aningaasaqarnermut Pisortaqarfik, Deloitte aamma Aatsitassaqarnermut Pisortaqarfik.

Siunnersuutit oqaaseqaatillu ilarpassui inatsisissatut siunnersuummut maanna saqqummiunneqartumut ilanngupput. Saqqummiunnerat takujuminarnerusunngorumallugu tusarniaanermit akissutit qulequtakkaarneqarput, imm. 2-mi "Inatsisissatut siunnersuutip pingaarnersai"-ni ilusiliussaq qulaaniittoq malinneqarluni.

Nalinginnaasumik oqaaseqaatit

Akissuteqartut tamarluinnangajammik siunnersuut iluarisimaarpaat, taakkununnga ilaallutik Peqqissutsimut Pisortaqarfik, Aatsitassaqarnermut Pisortaqarfik, Inerisaavik, KANUKOKA aamma Tusagassiortunngorniat ilinniarfiat. Arlallit pissutsit immikkut ittut malugeqquaat, taakkualu immikkoortuni tulliuttuni sammineqarput. Rektoreqatigiit isumaqarput siunnersuut annertuumik angusaqarluarniarpalaartuusoq.

Ilisimatusarfiup siunnersuutigaa "inatsisissatut siunnersuut tunuartinneqassasoq ukiunilu 5-6-ini aaqqissuussinerugallartumik taarserneqarluni, suliamut sammisumik ilinniarfinni ilisimatusarnikkut piareersimanissaq pilersikkiartuaarneqarniassammat, qularnaarumallugu ilinniakkat taakkua maanna universitetini ilinniagaasartunut nallersuunnissaat." Piffissami tassani "Ilisimatusarfik pillugu inatsit siunissamut eqqanaagaq" suliarineqarsinnaavoq, Ilisimatusarfillu isumaqarpoq, "Ilisimatusarfiup aqutsinermut inatsit pisariaqartikkaa, suliassanut unamminartunullu nutaanut naapertuuttoq, atorfinissutaasinnaasumillu bachelorinngorniarnerit aku-liunnissaasa qularnaarnissaannut naapertuuttumik sakkuusinnaasoq." Ilisimatusarfiup tusarniaanermut akissutaani aammattaaq allaqqavoq: "Ilisimatusarfimmi nutaami anginerusumilu suliamut sammisumik ilinniakkat aallaqqaammut universitetini ilinniakkanut assingunatik CVU-mi ilinniakkanut assingunerat pissutigiinnarlugu Ilisimatusarfiup aqunneqarnera CVU-t aqunneqarnerat maliinnarlugu inatsisiliuuttariaqanngilaq. Paarlattuanik utaqqisoqartariaqarpoq ... ilinniakkat pineqartut namminerisaminnik ilisimatusarnissaminnut piareernissaasa tungaanut." Ilisimatusarfiup "nalilerpaa inatsisissatut siunnersuut nassiunneqartoq Ilisimatusarfiup suliarilerumaagaanik naammassinninnissamut naleqqutinngitsoq", aappaatigulli aamma Ilisimatusarfiup siunnersuut akuersarpaa, "siunnersuut arlalinnik atorluarsinnaasunik aala-jangersagaqartoq" oqaatigigamiuk. Ilisimatusarfiup tusarniaanermut akissummini suliaq aqqutigalugu ineriartornissaq – inatsisissatut siunnersuutip atorfinissutaasinnaasumik bacheloritut ilinniakkanut tunngaviligaa – pingaartinngilaa.

Ilisimatusarfiup aammattaaq naammagittaalliutigaa aaqqissugaanermi "quleriiaat" amerlaval-laarnerat – tallimaanerarlugillu. Aaqqissugaanermi "quleriit" pingasuupput: Rektoreqarfik, institutit immikkoortortaqarfiillu.

Ilisimatusarfik isumaqarpoq inatsisissatut siunnersuutip piviusunngortinnissaanut piffissaliussaq piviusorpalaanngitsumik sivikippallaartoq, tikkuarlugulu Danmarkimi universitetit pillugit inatsit aatsaat ukiut arlallit ingerlareersullu sunniummat. Rektorinik atorfinitsitsiniarnerinnarmut ukiut marluk atorneqarsimapput. Taamaammat ikaarsaariarneq sivisussaqisoq naatsorsuutigisariaqarpoq.

Tamatuma nassatarisaanik inatsisip atuuttuulersinnissaanut ikaarsaariarnermullu tunngatillugu aalajangersakkat §§ 31 – 33-miittut allanngortinneqarput. Taakkununnga oqaaseqaatit innersuunneqarput. Atorfinissutaasinnaasumik bachelorinngorniarnerit maanna ilinniartitaanerit aaqqissugaaneri suliarereerpaat, suliami ilinniarnerup ilisimatusarnikkullu tunngavilikkamik ilinniarnerup akuleriiffigisaat. Taamaammat suli ukiut 5 – 6-it ilinniartitaanerit taakkua aallartinnissaannut utaqqeqqinnissaq pisariaqanngilaq.

a. Ingerlatsinikkut inissisimaneq

Siunnersuummi tusarniaassutigineqartumi siunnersuutaavoq Ilisimatusarfik KNR-tulli tassaassasoq "suliffeqarfik pisortat pigisaat namminersortoq", tassuunakkut ersersikkumallugu Ilisimatusarfik Namminersornerullutik Oqartussat ataanni suliffeqarfinnut allanut naleqqiulluni aningaasaqarnikkut allaffissornikkullu annertunerusumik nammineersinnaatitaasoq. Aningaasaqarnermut Pisortaqarfiup malugeqquaa Pinngortitaleriffik aamma Naatsorsueqqissaartarfik taamatut nammineersinnaatitaareersut, taamaammallu siunnersuut pisariaqanngikkaluartoq. Sulisitsisut Peqatigiiffiata aamma Deloitte-p oqaaseq ersernerlunnerarpaat, Ilisimatusarfiullu innersuuppaa imminut pigisuusariaqaraluarnini, soorlu Danmarkimi universitetit siulersuiso-qaleramik taama inissittut.

Siunnersuut naqqinneqarpoq Ilisimatusarfik Pinngortitaleriffittut Naatsorsueqqissaartarfittullu inissisimalersillugu.

b. Ilinniartitaanerit

Ilisimatusarfik isumaqarpoq "suliamut sammisumik ilinniakkat atorfinissutaasinnaasumik ili-simatusarnermillu tunngaveqartumik universitetimi ilinniaganngortinnerat, tassaasoq Kalaallit Nunaanni ingerlaqqiffiusumik ilinniakkanik periarfissaqarluartumik aaqqiineq".

Rektoreqatigiit aamma Ilisimatusarnermut Ministeeriaqarfiup tikkuarpaat Danmarkimi universitetit atorfinissutaasinnaasumik bachelorinngorniarnermik ilinniartitsineq ajormata, ilinniakkat taakku allaanerusumik sannaqarmata. Taamaalilluni atorfinissutaasinnaasumik bachelorinngorniarneq ilinniartitsisutut, peqqisasaasutut il.il. ilinniakkaniit ingerlaqqinneruvoq. Danmarkimi atorfinissutaasinnaasumik bachelorinngorniarnerit ingerlaqqiffiusumik ilinniak-kanut qitiusuni (CVU-ni) ingerlanneqartarput, ilisimatusarnermullu "attuumassuteqarlutik" ilisimatusarnermik "tunngaveqaratik". Ilisimatusarnermut Ministeeriaqarfiup malugeqquaa atorfinissutaasinnaasumik bachelorit kandidatinngorniarluni ilinniarfinni ilinnialernissaq inatsisitigoortumik pisinnaatitaaffiginngimmassuk, pissusissamisuuginnartumillu ilinniaqqiffiusinnaasut tassaammata diplomitaarniarluni masterinngorniarluniluunniit ilinniarnerit. Rektoreqatigiit erseqqissarpaat "ilinniartut Kalaallit Nunaanni atorfinissutaasinnaasumik bacheloritut ilinniarsimasut atorfinissutaasinnaasumik bacheloritut ilinniarsimasut allat assigalugit Danmarkimi universitetini tamani kandidatitut ilinnialernissamut ingerlaannaq isersinnaatitaanngimmata.".

Aammattaaq Ilisimatusarnermut Ministeeriaqarfiup malugeqquaa, taaguutit assigiinngitsut atorneqarnerisigut ilinniartunut ajornakusuulersinnaammat aaqqissuussinerit akimorlugit ilinniareersimasat akueritinnissaat, taamatuttaaq ilinniartunut ajornakusoorsinnaammat suliffittaarnissaq imaluunniit akuersissummik pisaarnissaq, annermik fagit imarisaat assigiinngippata. Aammattaaq Ilisimatusarnermut Ministeeriaqarfiup malugeqquaa, taaguutit assigiinngitsut atorneqarnerisigut ilinniartut akornanni eqqunngitsumik isumalluartitsisoqalersinnaasoq, aaqqissuussinerit akimorlugit ilinniakkat akuerineqarsinnaanerannut tunngatillugu. DM – ilinniagartuut kattuffiat isumaqarpoq ilinniagartuutut bacheloritut kandidatitullu ilinniakkat nunarsuaq tamakkerlugu akuerisaanissaat ajornakusuulersinnaasoq, ilinniartitaanerit taakkua ilusiligaanermikkut imarisamikkullu assigiinngissutaat ersarinngippat.

Rektoreqatigiit malugeqquaat taaguutit MVU (akunnattumik sivisussusilimmik ingerlaqqiffiusumik ilinniakkat) aamma LVU (sivisuumik ingerlaqqiffiusumik ilinniakkat) Danmarkimi taagutigitinneqartuniit allaanerusumik atorneqartut. Rektoreqatigiit isumaqarput Naalagaaffeqatigiinnerup iluani assigiinngitsunik killiffeqartitsineq siunertamut naapertuuttuunngitsoq, tamatumalu nassuiarniarnerata ajornakusuulersinnaanera mianersoqqussutigalugu.

Atorfinissutaasinnaasumik bachelorinngorniarnerup ilisimatusarnermik tunngavilernissaa, Ilisimatusarfik pillugu inatsisip 2006-imi Inatsisartut ukiakkut ataatsimiinneranni allanngortinneratigut akuerisaareersoq (Inatsisartut inatsisaat nr. 17, 20. november 2006-imeersoq) suli oqaaseqaateqarfigineqartarlunilu nalornissutaavoq.

Ilisimatusarnermut Ministeeriaqarfiup nassuiaatigaa ilisimatusarnermik tunngaveqarneq Danmarkimi tassaatinneqarmat ilinniagaq ilinniagartuutut atuagarsornikkullu ilinniarnerusoq suliamullu sammisuunngitsoq. Rektoreqatigiit isumaqarput inatsisissatut siunnersuummi "naammaginartumik qularnaarneqanngitsoq, atorfinissutaasinnaasumik bacheloritut ilinniakkat ilumut ilisimatusarnermik tunngaveqalernissaat" aamma isumaqarput "ilinniartitsisut ilisimatuullu ilisimatusarnermik tunngaveqartumik ilinniartitsinermik ingerlatsinissaminnut naammattumik ilinniagallit naammaginartumillu amerlassusillit atorfinitsinneqarnissaat qularnaarneqarsimanngitsoq".

Ilisimatusarfik isumaqarpoq "atorfinissutaasinnaasumik bachelorinngornianik ilinniakkani nutaani ilisimatusarnikkut piareersimaneq pilersittariaqartoq, ilinniakkat taakkua taaguutaannaanngitsumik aammali piviusumik ilisimatusarnermik tunngaviligaassappata, maannamullu Ilisimatusarfimmi ilinniakkat naleqqatigalugit Ilisimatusarfimmut ilaalissappata". Aammattaaq Ilisimatusarfik isumaqarpoq, qulaani immikkoortoq 3-mut oqaaseqaatit naapertorlugit ilisimatusarnermut aningaasaliussat aningaasaliissutit tamarmiusut 16%-iinnarissappatigik tamanna "Danmarkimi universitetini nalinginnaasumut naleqqiullugu malunaatilimmik appasin-nerussasoq" aamma Ilisimatusarfiup "sakkortunerpaamik inassutigisinnaanngilaa, 16%-imik aningaasaliineq Ilisimatusarfimmi nutaami ilisimatusarnerup aningaasalersornissaanut ataavartumik anguniagassanngortinneqarnissaa.".

DM – ilinniagartuut kattuffiata aamma IMAK-kip uparuarpaat ilisimatusarnikkut tunngaviliinerup taama qarsupitsigisumik allaaserineqarnera, tassami suliamik ilinniakkat kisimik isummerfigineqarmata. Danmarkimi suliamik ilinniakkat ilisimatusarnermik tunngaveqartuunngillat, akerlianillu ilisimatusarnermut attuumassuteqartuullutik, taamaanneratalu universitetini nalinginnaasumik ilinniagartuutut atuagarsorluni ilinniagaasartut suliamullu samminerusumik ilinniakkat immikkoortippai.

TI-p maluginiarpaa, atorfinissutaasinnaasumik bachelorinngorniarnerit takorloorneqanngimmata tassaassasut ilinniagartuutut atuagarsorluniluunniit ilinniarnerit, ilisimatusarnermilli tun-ngaviliineq isumaqarmat, ilisimatuut suliamillu ingerlatsisut akornanni toqqaannartumik attaveqatigiittoqalissasoq – tamanut iluaqutaasussamik.

Aningaasaqarnermut Pisortaqarfiup maluginiarpai suliamik ilinniakkat ilisimatusarnermik tunngaveqartunngortinnerini aningaasartuutissatut ilimagisaasut, tassami tamanna ilinniartitsisut ilisimatuujunngitsut pikkorissartinnerinut aningaasartuutinik nassataqartussaammat. Aningaasarnermut Pisortaqarfik isumaqarpoq, tamanna tassaasoq "ilinniartitaanermut aningaasaliussanik siunertamut naleqqutinngitsumik tulleriiaarineq".

Aningaasaqarnermut Pisortaqarfik tusarniaassutinut akissummini aperivoq, suliamik ilinniakkat qaffariarnissaannik inatsisissatut siunnersuutip nassatarissaneraa ilinniartut immikkut akuerisaallutik ilinnialersartut amerleriarnerat. Tassunga tunngatillugu oqaatigineqassaaq, inatsisissatut siunnersuutip Ilisimatusarfimmi ilinnialernissamut piumasaqaatit allanngortinngimmagit, aammalu suliamik ilinniakkamiit atorfinissutaasinnaasumik bachelorinngorniarnermut allannguineq tassatuaammat ilinniakkat ilisimatusarnermik tunngaveqalersillugit ilinniakkanik pitsanngorsaaneq.

Atorfinissutaasinnaasumik bachelorinngorniartarnermut tunngatillugu pingaartuuvoq ilinniakkat taakkua ikerinnarmut unissutaannginnissaat, Kalaallit Nunaanniinnaq atorneqassinnaallutik, Kalaallit Nunaatalu avataani universitetini kandidatinngorniarnissamut ingerlaqqissutaasinnaanatik. Taamaammat siunnersuutip siunertarerpiarpaa bacheloritut gradi nunarsuaq tamakkerlugu akuerisaasoq ingerlaqqiffiusumik ilinniarnissamut periarfissaqartitsinerussasoq. Taamaammat ilinniakkap aaqqissugaanerata imarisai, taaguut kisimi pinnani, tassaassapput ingerlaqqinnissamut tunngaviusussat. Taamaammat siunnersuummi § 3, imm. 4 piumasaqar-poq, ilinniakkat ima sannaqassasut, ingerlaqqiffiusumik ilinniarnissamut periarfissiillutik.

Ilisimatusarnermik tunngaviliinermut tunngatillugu qulaani immikkoortoq 2 b innersuunneqarpoq. Taamaattoq eqqaaneqassaaq ilisimatuut pikkorissaanikkut ilinniartinneqarneq ajormata, kisiannili ukiuni pingasuni ph.d.-tut ilinniartitaanikkut, imaluunniit suliamut tunngatillugu naliliisartut aqqutigalugit, pineqartup ilisimatusarnikkut allakkiaminik saqqummersitsisimanera tunuliaqutaralugu aalajangersimasumillu nalileereernikkut, pineqartoq ilisimatuutut atorfimmi ivertinneqartussatut inassutigineqarsimappat.

Peqqissutsimut Pisortaqarfiup pitsaassutsimik inerisaanissaq pillugu malittarisassat ilassilluarpai, tak. inatsisissatut siunnersuummi § 7, imm. 1, kisiannili pisariaqarsoralugu siunnersuummi ilanngunnissaa ilinniakkat sulilernissamut akuerineqarnissamik piumasaqaatitaqarfiusut, akuersisartullu isumaqatigiissuteqarfigisariaqartut taakkunanngalu akuerineqarlutik. Tamanna pillugu siunnersuummi § 7, imm. 2-mut oqaaseqaatit allanngortinneqarput.

Aatsitassaqarnermut Pisortaqarfiup pingaartippaa, aatsitassalerinerup iluani inuiaqatigiinnut tunngasumik teknikkikkullu ilisimatusarneq ilinniartitaanerlu Ilisimatusarfiup ilisimatusagaanut ilinniartitsissutaanullu ilaalissanngitsut.

Ilisimatusarnermut Ministeeriaqarfiup eqqaavaa, ph.d.-tut gradi Danmarkimi ataqqinaatitut tunniunneqarsinnaanngimmat, tak. siunnersuummi § 5, imm. 3. Rektoreqatigiit siunnersuutigaat Ilisimatusarfik ilinnialersussanik ilitsersuinermut periarfissinneqassasoq, tak. siunnersuummi § 8, tamanna allanit isumagineqanngippat. Aalajangersakkap oqaasertalerneratigut maanna tamanna ajornarunnaarpoq.

c. Ilisimatusarfiup qullersai

Ilisimatusarfik, DM- ilinniagartuut kattuffiat aamma IMAK isumaqarput ajuusaarnartuusoq, Ilisimatusarfiup siunnersuisoqatigiivii (universitetsrådi) atorunnaarsinneqassappata, siunnersuullu naapertorlugu Ilisimatusarfiup qullersai tassaalerlutik siulersuisut, ilaasortat avataaneersut amerlanerussuteqarfigisaat – Danmarkimi universitetini aqutseriaaseq assigilerlugu. IMAK aamma Sulisitsisut Peqatigiiffiat isumaqarput, tamanna ernumanarsinnaasoq politik-kikkut ilisimatusarnikkullu kiffaanngissuseqartuunissap qularnaarnissaanut naleqqiullugu. DM-ip tamatuma nassatarisaanik inassutigaa, inatsisissatut siunnersuut akuersissutigineqas-sasoq Kalaallit Nunaanni pissutsit immikkut ittut ataqqillugit.

Ilisimatusarfik akissummini allappoq: "Ilisimatusarfik isumaqartuarpoq qinersisarnermik tunngaveqartumik qinigaallutik pisortaasut Ilisimatusarfimmi atorfilinnut ilinniartunullu naleqqiullugit immikkut demokratiskiusumik atuuttuulersimmagit, aqutsinermi ilusiliussaq Danmarkimi ilusiliussaasup assinga tassaasoq Ilisimatusarfiup siunissami suliassaanut naleqqiullugu sakkussaq pitsaanerpaaq.". Ilisimatusarfik aammattaaq isumaqarpoq ilisimatuut siulersuisuni ikippallaartut.

Aningaasaqarnermut Pisortaqarfik, TI, Peqqissutsimut Pisortaqarfik aamma Inerisaavik siulersuisoqarluni ilusiliinermik tapersiipput, tassami tamanna ilinniartitaanerup inuiaqatigiinnut ammarnissaanik tunngaviusumik isummernermut naapertuuttuuvoq.

Sulisitsisut Peqatigiiffiata malugeqquaa, siulersuisut atorfillit pisinnaasaasa inerisarnissaannut atorneqarnissaannullu akisussaanissaat siunertamut naapertuuttuungitsoq. Aningaasaqarnermut Pisortaqarfik isumaqanngilaq, siulersuisut suliassarissagaat, Ilisimatusarfiup aaqqissugaanera pillugu tunaartarisassaliornissaq, nalinginnaasuummat tamatuma ulluinnarni aqutsisunut isumagissanngortinneqartanera.

Naak pissutsit pineqartut tassaagaluartut siulersuisut pilersaarusiornikkut inerisaanermut atatillugu akisussaaffiisa ilaat, siunnersuummi § 9 tassungalu oqaaseqaatit ersarissarneqarput.

KANUKOKA kaammattuivoq Naalakkersuisut inerisaanissamik isumaqatigiissuteqarfigineqassasut, akerlianilli siunnersuummi § 9, imm. 5-imi aalajangerneqarluni angusassat pillugit Naalakkersuisut isumaqatigiissuteqarfigineqassasut.

Siulersuisut katitigaanerannut atatillugu KANUKOKA-p eqqaavaa, siulersuisunut ilaasortat avataaneersut ilinniagartuutut ilisimatusarnermik ilinniartitaanermillu suliamut tunngasutigut inuttullu ilisimasaqartuunissaat ersarinnerusumik oqaasertalertariaqaraluartoq. Immikkoortu-mut tassunga tunngatillugu KANUKOKA-p oqaaseqaatai § 11, imm. 2-mut ilanngunneqarput.

d. Rektoreqarfimmut

Siunnersuummi tusarniaassutigineqartumi rektorip tullersortaa ilisimatuujusariaqanngilaq. Tamatumunnga tunuliaqutaavoq maanna suliamik ilinniarfinni pisortaasut rektorimut tullersortinngorsinnaanissaat periarfissikkumaneqarmat. Ilisimatusarfiup, Rektoreqatigiit Aningaasaqarnermullu Pisortaqarfiup kaammattuutigaat rektorip tullersortaata ilisimatuujunissaa, rektorip tullersortaa rektorimut taartaasartussaammat. Tamatuma nassatarisaanik siunnersuummi § 12, imm. 3 allanngortinneqarpoq.

e. Ilinniagartuut Siunnersuisoqatigiiffiat

Ilisimatusarfiup eqqortumik malugeqquaa siunnersuisoqatigiiffimmi ilisimatusartut amerlanerussuteqanngimmata siunnersuisoqatigiinnilu suliassat pingaartortaanni qaffasissumik ilinnia-gaqarnermut tunngasunik immikkut ilisimasaqarnissaq pisariaqartoq. Taamaattumik siunnersuut imaalillugu allanngortinneqarpoq ilaasortat ilisimatuujusut kisimik suliani qaffasissumik ilinniagaqarnikkut naliliinermut tunngasuni taasisinnaatitaalersillugit. § 16, imm. 1 nassuiaati-talik innersuussutigineqarpoq.

KANUKOKA-p siunnersuutigaa aqutsisut tassaassasut rektori, rektorip tullersortaa, institutini aqutsisut Ilisimatusarfiullu pisortaa, tassaanatik ilinniagartuut siunnersuisoqatigiiffiat, tamatumunngalu atatillugu tikkuartorpaa institutini aqutsisut institutini isumaasunik saqqummiisinnaassasut, kiisalu institutini aqutsisut tamarmik sulinermi peqataasariaqartut, siunnersuummi ilinniagartuut siunnersuisoqatigiiffiannut institutini aqutsisunik marlunnik toqqaanissamut taarsiullugu. Peqqissutsimut Pisortaqarfiup ilinniagartuut siunnersuisoqatigiiffiannut tunngatillugu tikkuartorpaa ilinniartut tassani sinniisuutitaqarnissaat naapertuutinngitsoq, taakku pisinnaasariaqartut piginngimmatigik.

Naalakkersuisut isumaqarput ilinniagartuut siunnersuisoqatigiiffiat pingaaruteqartuusoq kiisalu Ilisimatusarfimmi soqutigisat, taakkununnga ilanngullugit ilinniartut, teknikkimik allaffissornermillu suliallit atuartitsisullu, tamarmik tusarneqarnissaannik qularnaarisuusoq, tak. § 11, imm. 1.

f. Institutit

Inatsisissatut siunnersuummi tusarniaassutigineqartumi institutini aqutsisut tullersortaat insti-tutimi aqutsisoq peqatigalugu tassaatinneqarput institutimi aqutsisut. Institutimi aqutsisut tamarmiullutik ilisimatusarfigisimasaminni ilisimatusarnermik akuerisaasumik misilittagaqassapput. Aammattaaq rektori institutimi aqutsisup tullersortaanik atorfinitsitsisinnaatitaavoq. Ilisimatusarfiup, Aningaasaqarnermut Pisortaqarfiup Rektoreqatigiillu uparuarpaat rektorip tullersortaa pillugu nassuiaatit assigalugit tamanna maanna malittarisassanit kiisalu danskit universitet pillugu inatsisaannit sanioqqutsinerusoq, kiisalu tamanna Ilisimatusarfiup qaffasissumik ilinniarfittut tatiginassusianik ilisimatusarnermullu aningaasaliiumasussarsiorsinnaane-ranik sakkukillisaataassasoq.

DM – ilinniagartuut kattuffiata tikkuartorpaa institutini aqutsisut tamarmik immikkut ilisimatusarnikkut akuerisaasumik misilittagaqartariaqartut. Aammattaaq rektorip institutimi aqutsisut tullersortaannik atorfinitsitsisinnaatitaanera pisariaqanngitsumik pappialarsornertut isigaa, institutimi aqutsisoq taamaaliorsinnaasutut inissinneqassappat eqqornerutillugu.

Peqqissutsimut Pisortaqarfiup qulaaniit aqunneqartumik ingerlatsinissaq, ilaatigut rektorip institutini atorfinitsitsisinnaatitaaffigisassaa, mianersorfigeqquaa.

Siunnersuutigineqartumi aaqqissuussinerup annertuallaarnera pillugu akerliliinerit oqaaseqaatillu tusaaniarneqarput. Institutini aqutsisup tullersortaa peerneqarpoq, kiisalu siunnersuummi § 19 naapertorlugu institutimi aqutsisoq ilisimatuujussalluni. Institutimi aqutsisut tassaassapput institutimi aqutsisoq immikkoortortanilu pisortat, taamaalilluni atorfinissutaasinnaasumik bacheloritut ilinniartitaanerit institutinik aqutsisuni aammalu siulersuisuni ilinniagartuullu si-unnersuisoqatigiiffianni inissaqartinneqartuarput.

Institutimi aqutsisup rektorimit toqqarneqarnissaa TI-mit naammagisimaarneqarpoq.

Inerisaavimmit oqaatigineqarpoq Inerisaavimmi siunnersortit sulisullu allaffissornermik suliallit allat institutimi siunnersuisoqatigiinnik ataatsimoortitsinermi eqqarsaatigineqanngitsut. Inatsisissatut siunnersuummi § 21, imm. 4-mi tamanna eqqarsaatigineqarpoq, tamatumani teknikkikkut allaffissornermillu suliallit sinniisaat marluk angullugit institutini siunnersuisoqatigiinni ilaasortaasinnaallutik. Aammattaaq Inerisaaviup eqqaavaa Atuarfik pillugu Inatsi-sartut peqqussutaanni nr. 31-mi suliassat taagorneqartut Inerisaaviup suli suliarisariaqassagai.

TI-mit kissaatigineqarpoq tusagassiortunngorniarneq Tusagassiornermut Institutimiissasoq. Ilinniarfissuarmit kissaatigineqarpoq ilinniartitsisutut ilinniartitaaneq Ilinniartitsisussanik ilin-niartitsinermut Institutimiittariaqartoq imaluunniit Inerisaavik peqatigalugu Ilinniartitsisussanik ilinniartitsinermut, Ilikkariartortarnermut Ilinniaatsinullu Institutimiilluni.

Peqqissutsimut Pisortaqarfiup kissaatigaa peqqissaanermik ilinniarfik immikkut institutimut inissinneqassasoq, taamatullu uparuarlugu peqqissaanermik ilinniarfiup peqqinnissaqarfimmik suleqateqarluni ineriartortuarsinnaanissaa, kiisalu ilinniarnerup akuerisaanissaq anguniarlugu piumasarineqartunik eqquutitsisunik qaffasissuseqarnissaa pisariaqartuusoq. Ilisimatusarfik ullumikkut peqqissaanermik sammisamut ilisimatusarnermik tunngaveqarluni atuartitsinissamik malinninniarluni ilisimatusarnikkut piginnaasariaqakkanik peqanngimmat nukissat taakku Kalaallit Nunaata avataanit pissarsiarineqartariaqarput.

g. Immikkoortortat

Ilisimatusarfik isumaqarpoq immikkoortortani pisortat "suliassatigut pisinnaasatigullu kiggi-guffiusumik ersernerluttumillu inissisimalissasut". Siunnersuummi § 24-mi oqaasertaliussat allanngortinneqarput immikkoortortanilu pisortat maanna institutini aqutsisunut ilaalerlutik.

h. Pitsanngorsaanermi pitsaassusermillu siuarsaanermut siunnersuisoqatigiit

Ilisimatusarfiup, TI-p, Inerisaaviup, Peqqissutsimut Pisortaqarfiup aamma Tusagassiortut Pe-qatigiiffiata assersuutigalugu Ilisimatusarfimmi ilinniartunik ilisimatusartunillu atorfinitsitsisartunik ingerlaavartumik isumassarsisitsisarnermut peqataasinnaasunik pitsanngorsaanermi pitsaassutsimillu inerisaanermut siunnersuisoqatigiinnik pilersitsinissamut periarfissaq naammagisimaarpaat. Tamatuma saniatigut Ilisimatusarfiup kissaatigaa pitsanngorsaanermi pitsaassutsimillu inerisaanermut siunnersuisoqatigiinnik pilersitsinissaq pinngitsoorani pisussanngortinneqassasoq.

Sulisitsisut Peqatigiiffiata kaammattuutigaa inuussutissarsiornermik ingerlatsisut ilisimatusarfimmiillu naammassisunik atorfinitsitsisartut sinniisuutitaqarnissaat qularnaarneqassasoq. Naalakkersuisut malugeqquaat sinniisuutitaqarneq tamanna pitsanngorsaanermi pitsaassutsimillu inerisaanermut siunnersuisoqatigiit aqqutigalugit pisinnaasoq.

i. Piginnaatitaanerit pissutsillu allat

Tusarniaanermut akissutini tamatumunnga oqaaseqaateqartoqanngilaq.

j. Aningaasaqarnermut allaffissornermullu tunngasut

DM – ilinniagartuut kattuffiata malugeqquaa katigutsitsinerit akikitsuinnaasanngitsut, sunneqatigiinnerillu aatsaat ukiuni arlalinni suleqatigeereernikkut takuneqarsinnaalersartut.

Aningaasaqarnermut Pisortaqarfiup "siunnersuutip kingunerisassaasa allaaserineqarnerat naammaginartinngilaa" tamatumanilu innersuussutigalugu nassuiaatini sunneqatigiiffiusussatut naatsorsuutigineqartut naatsorsoqqinneqarnerat allaaserineqarnerallu ilanngunneqartariaqartut. Tassunga ilanngullugu fagit sorliit ilinniakkat akimorlugit ilinniartitsissutigineqarsinnaanerat. Aningaasaqarnermut Pisortaqarfiup naatsorsuutigaa maanna atuartitsisuusut piffissaq sivisunerusoq ilisimatusarnermut atussagaat, taamaattumillu atuartitsisut ilisimatusartullu amerlanerusut atorfinitsinneqartariaqartut. Tamatumunnga tunngatillugu imm. b-mi ilisimatusarneq pillugu tusarniaanermut akissutinut nassuiaatit innersuussutigineqarput.

Sipaarniutit ingerlatanik allaffissornikkut ataatsimoortitsinermi naatsorsuutigineqartut piviu-sunngortinneqarsinnaanerat Aningaasaqarnermut Pisortaqarfiup qularaa tamatumalu paasi-niarneqarnissaa ujartorlugu. Aningaasaqarnermut Pisortaqarfiup "naatsorsuutigaa siulersuisunut akissarsiaritinneqarsinnaasut annertussusissaat aalajangersarneqarsimassasut kiisalu assersuutigalugu nuunnermut illuutinillu nutaanik aserfallatsaaliinermut aningaasartuutit assigalugit siulersuisunut aningaasartuutinut allanut peqatigitillugit Namminersornerullutik Oqartussanut aningaasaqarnikkut kingunerisassanut ilanngunneqarsimassasut.".

Kiisalu Aningaasaqarnermut Pisortaqarfimmit uparuarneqarpoq "pissutsit suli paasineqanngitsut, taakkununnga ilanngullugit Ilimmarfiup Ilisimatusarfiullu akornanni allaffissornermut tunngasut inatsisissatut siunnersuutip Naalakkersuisunut Inatsisartunullu saqqummiunneqannginnerani paasineqartariaqartut.".

Ilisimatusarfiup tusarniaanermut akissutimini malugeqquaa qaffasissutsini tamani aqutsisunik sulisoqarluni siulersuisoqarnermut ikaarsaariarneq akissarsianut toqqortat amerlineqarnissaannik nassataqassasoq. "Naammassisartut amerlanerulernissaannut kiisalu ilisimatusarnerulernermut aningaasat allaffissornermik atuartitsinermillu pisariillisaanermeersuunisaasa naatsorsuutigineqarnerat". Ilisimatusarfiup qularnartoqartippaa. Ilisimatusarfik isumaqarpoq tamanna sinaakkusiussanik annertusaanani pisinnaanngitsoq. Aammattaaq Ilisimatusarfimmit oqaatigineqarpoq "ataatsimut allaffeqarneq sunneqatigiinnermik pilersitsisussaq Ilimmarfimmik piler-sitsinissaq pillugu inatsisartut aalajangiinerannut tunngaviusoq (2001) pilersinneqarsimanngitsoq." Ataatsimoortitsinerup qaninnerusoq eqqarsaatigalugu aningaasartuuteqarnerussutaanissaa kiisalu allaffissornikkut ataatsimoortitsinermi sunneqatigiinnerit aatsaat ungasinnerusoq eqqarsaatigalugu anguneqarsinnaasut Ilisimatusarfimmit naatsorsuutigineqarpoq. Ilisimatusarfiup DM-isuulli uparuarpaa ataatsimoortitsinerit qaqutiguinnaq aningaasartuutinik sipaarutaasartut. Kiisalu Ilisimatusarfimmit uparuarneqarpoq "ilisimatusarfeqarfiup tamarmiusup ingerlanerani ingerlalluarnissamut tunngaviusoq tassaasoq inuit allaffissornermik ilinni-arsimasut allaffissornermik isumaginninnissaat, taamaalilluni sulisut ilisimatusarnermik suliallit sapinngisamik atuartitsinermik ilisimatusarnermillu aallutaqarniassammata.". Ilisimatusarfiup oqaaseqaataanut tunngatillugu imm. 3. aningaasaqarnikkut allaffissornikkullu pisortanut kingunerisassat, innersuussutigineqarpoq.

Inatsisissatut siunnersuut tusarniaassutigineqarmat Ilisimatusarfimmut aningaasaliissutit ta-piissutitut aningaasaliissutineersuunerat kiisalu Ilisimatusarfiup sanaartukkanik nalilinnik nalikilliliinissamut periarfissinneqarnissaa allassimavoq. Tamatumani Ilisimatusarfiup sanaartukkanik nalilinnik sunik peqarnera IMAK-kip apeqquserpaa. Inatsisissatut siunnersuummi matumani qulaani allassimasut allanngortinneqarput, taamaalilluni aningaasaliissutit suunerat erseqqissarneqarani, kiisalu Ilisimatusarfik Namminersornerullutik Oqartussat missingersuutit, naatsorsuuserineq naatsorsuusiornerlu pillugit malittarisassaannik malinnittussanngorlugu.

Ilinniarfiit ataatsimoortinneqarneranni ikaarsaariarnermi aaqqissuussinerit sorliit atuutissanersut DM-ip – ilinniagartuut kattuffiata aamma IMAK-kip ujartorpaat. Aammattaaq sulisut inatsisitigut inissisimanerisa allaaserineqarnissaat kaammattuutigineqarpoq. Tamatuma erseqqissarneqarnissaa kiisalu atorfinnik pilersinneqaqqammersunik inissiinissaq pillugu isumaqatigiinniartoqarnissaata maluginiaqquneqarnissaa Aningaasaqarnermut Pisortaqarfiup taamatuttaaq kissaatigaa.

Nassuiaatit § 33-mut ilanngunneqarput, tassani § 33, imm. 4-mi aalajangersarneqarluni suliamik ilinniarfinni aamma Inerisaavimmi maanna atorfillit akissarsiatigut atorfinitsitaanikkullu atugassarititaasut atuinnartussagaat.

Tusarniaareernerup kingorna, taamaattorli tusarniaanermut akissutit innarlernagit siunnersuummi § 29 allanngortinneqarpoq, Ilimmarfiup Ilisimatusarfimmut allaffissornikkut suliassanik tamanik suliarinnissinnaanissaanut taarsiullugu Ilisimatusarfik Ilimmarfimmi suliffeqarfiit sinnerinut allaffissornikkut suliassanik isumaginnissinnaanngorlugu.

 

 

Aalajangersakkanut ataasiakkaanut oqaaseqaatit

§ 1-imut

Aalajangersakkap Ilisimatusarfiup siunertaa suliassaalu pingaarnerit erseqqissarpai, tassaasut ilisimatusarnermik ingerlatsineq ilisimatusarnerlu, tamannalu tunuliaqutaralugu ilinniartitsineq, tassuunakkullu suliaqarfigisamigut inerikkiartornermik pilersitsinissaq. Ilisimatusarfik tassaassaaq suliaqarfimmi iluanni nunarsuaq tamakkerlugu ilisimatusarnikkut ingerlatsiviit ilaat akuerisaasoq, pisinnaasanilu inerisassallugit universitetit ilisimatusarnermillu ingerlatal-lit allat suleqatiginerisigut.

Imm. 1-imut

Ilisimatusarnermik tunngaveqartumik ilinniartitaanerit ima paasisariaqarput, Ilisimatusarfiup ilinniartitsinerinut aallaaviullutillu atorneqassasut sulianut ataasiakkaanut tunngatillugu ilisimatusarnerit, Ilisimatusarfimmi ilisimatusarnermillu ingerlatsivinni naapertuuttuni allani ingerlanneqartut. Nunarsuaq tamakkerlugu killiffik qaffasinnerpaaq isumaqarpoq Ilisimatusarfiup ilisimatuut ph.d-tut allagartartaarnissamik neqeroorfigiinnarnagit, aammali ilisimartusarnermik doktorinngussutaasinnaasumik neqeroorfigissagai.

Imm. 2-mut

Ilisimatusarfik - maanna pissusiusutut – suut ilisimatusarfigineqarnissaannik nammineq aalajangiinissaminut kiffaanngissuseqarpoq. Ilisimatusarfiup qularnaassavaa ilisimatusarneq tamatigut arlaannaannulluunniit pituttugaassanngimmat, nammineertuussammat aamma arlariinnik sammiveqarluni qimerluuisuussammat.

Ilisimatusarnissamut periusissanillu toqqaanissamut kiffaanngissuseqarneq pisariaqarpoq ilinniartitaanerit ilisimatusarnikkut tunngaveqartut pitsaassusaat attatiinnarneqarlunilu inerisarneqassappat, tassunga ilaallutik atorfinissutaasinnaasumik bachelorinngorniarnerit, tassuunakkut ilisimatuut Ilisimatusarfimmilu iliniartitsisut allat suleqatigiinnerat iluaqutigineqassammat. Ilisimatusarnissamut kiffaanngissuseqarnerup aammattaaq nassataraa tunngaviusumik ilisimatusarnermik ingerlatsinissaq, Ilisimatusarfimmi ilinniakkat iluanni ingerlattakkat tam-mattaalineqarlutillu inerisartuarneqaqqullugit.

Naalakkersuisut Ilisimatusarfik maannatut immikkut nassuiakkanik ilisimatusarnermut, paasiniaanermut ilinniartitsinermullu tunngasutigut suliakkersinnaavaat, Ilisimatusarfik isumasiorsinnarlugu. Ilisimatusarfik pillugu Inatsisartut inatsisaanni maanna atuuttumi § 2, imm. 2-mut oqaaseqaatini allassimavoq, Naalakkersuisut Ilisimatusarfik suliakkersinnaagaat, Ilisimatusarfimmi ilisimatusarnikkut ilinniartitsinikkullu ingerlassanut naleqqiullugu pilersaarusiornermut paasiniaanermullu tunngasunik. Pilersaarusiorneq ilisimatusarnikkut ilinniartitsinikkullu suliassanut ilaammat, immikkut taaneqarnissaa pisariaqanngilaq. Paasiniaallunili suliassanut tunngatillugu allaavoq, suliassanummi taamaattunut Naalakkersuisut Ilisimatusarfimmi immikkut ilisimasaqassuseq atorsinnaasariaqarpaat, Kalaallit Nunaata avataanut suliakkiissutiginngikkaluarlugu. Ilisimatusarnissamut periutsinillu toqqaanissamut kiffaanngissuseqarneq suliani taamaattuni aammattaaq atuuppoq.

Naalakkersuisut Ilisimatusarfik allatigut suliakkersinnaassanngilaat, tamatigullumi piumasaqaataavoq suliassat pineqartut aningaasaliiffigineqarsimanissaat, suliassat suliarinerat suliassanik allanik aningaasaqarnermut inatsisikkut aningaasaliiffigineqartunik inangeeqqunagu.

Imm. 3-mut.

Aalajangersakkami Ilisimatusarfiup inuiaqatigiinnut pisussaaffeqarnera erseqqissarneqarpoq. Inuiaqatigiittut avatangiiserisatut eqqarsaatigineqarput Kalaallit Nunaanni avataanilu suliffeqarfiit ilisimasaqarfiusut allat aamma pisortatigoortumik namminersortumillu kattuffiit. Ilisimatusarfik tassaavoq Kalaallit Nunaanni suliffeqarfik ilisimasaqarnikkut kulturikkullu qitiusutut pingaaruteqartoq, taamaattutullu avatangiisiminut ammasuusariaqartoq. Ilisimatusar-nermigut, inerisaanermigut ilinniartitsinermigullu Ilisimatusarfik Kalaallit Nunaanni ineriartornermut immikkut tunniussaqartuuvoq, taamatullu Issittumi tamarmi. Tassunga atatillugu pingaartuuvoq Ilisimatusarfiup ilisimatuuisa ilinniartitsisuisalu angusaminnik ingerlatitseqqittarnissaat aamma nunatsinni nunarsuarlu tamakkerlugu pissutsit tamakkua pillugit oqallinnermut peqataanissaat.

§ 2-mut

Imm. 1-imut

Aalajangersakkami ilinniakkat Ilisimatusarfiup neqeroorutigisinnaasai sivisussusii malillugit nalunaarsorneqarput. Aalajangersakkami isummerfigineqanngilaq suliaqarfiit suut iluini ilinniakkat neqeroorutigineqarsinnaassanersut, kisianni § 4, imm. 1-imi ersippoq, suliaqarfiit nutaat ilanngunnissaat Ilisimatusarfiup oqaaseqaateqartereerneratigut Naalakkersuisunit akuerineqartariaqartut. Maanna fagiusut oqaaseqaatini nalinginnaasuni, imm. 2 f, Institutit, ataanni eqqaaneqarput.

Ilinniartitaanerit tamarmik ilisimatusarnermik tunngaveqarput, tak. § 1, imm. 1, ilinnialissa-gaannilu minnerpaamik GU-mi tassungaluunniit sanilliunneqarsinnaasumi ilinniarsimasariaqarpoq.

Ilinniartitaanerit tamarmik European Credit Transfer System (ECTS) naapertorlugu nalilersugaassapput, taanna tassaavoq Europami ingerlaqqiffiusumik ilinniartitaanernut uuttuut, nunat assigiinngitsut ilinniakkat assigiinngitsut iluini ilisimalikkat ilinniakkallu sivisussusaannut sa-nilliussinermut atorsinnaasaat. 60 ECTS pointit assigaat ukioq naallugu piffissaq tamaat ilinniarneq (ilinniartup ukioq ataaseq suliassai). Ilisimatusarfiup ilinniartitsineri Kalaallit Nunaata avataani akuerineqarsinnaassappata aaqqissuussineq taanna malittariaqarpoq. Aaqqiissuussineq piffissaq tamaat ilinniakkanut aamma piffissap ilaannaa ilinniakkanut atorsinnaavoq, ilinniartut ilinniakkap naammassinissaanut ilimagisaasumik akunnernik qassinik atuinissaannut uuttuutaagami, kisiannili qanoq sivisutigisumik ilinniartuunissaanut uuttuutaanani.

Nr. 1

Akunnattumik sivisussusilimmik ingerlaqqiffiusumik ilinniartitaanerit ukuupput:

a) Ilisimatusarfimmi nalinginnaasumik bacheloritut ilinniarnerit, soorlu ingerlatsinermik. Ilinniartitaanerit ukiunik 3-nik sivisussuseqartussatut naatsorsuussaapput. Bacheloritut ilinniarnerit bachelorinngorniarluni suliamik inaarneqassapput (bachelorprojekt). Ilinniartut bacheloritut angusereerunik kandidatitut masteritulluunniit ilinniarlutik ingerlaqqissinnaapput.

b) Atorfinissutaasinnaasumik bachelorinngorniarnerit, aalajangersimasumik suliaqarluni atorfininnissamik siunertaqartut. Ilinniartitaanerit taakku maannamut suliamik ilinniarfinniikkaluarput, kisianni Inatsisartut inatsisaat nr. 17, 20. november 2006-imeersoq aqqutigalugu Ilisimatusarfiup ataaniilerlutik. Inatsisissatut siunnersuutip atuuttuulerneratigut ilinniartitaanerit makkua pineqarput: Ilinniartitsisoq, isumaginninnermi siunnersorti, peqqissaasoq aamma tusagassiortoq. Ilinniarneq ukiunik 3-4-nik sivisussuseqarpoq. Ilinniarnerit bacheloritut suliamik inaarneqartarput.

c) Diplomitaarniarluni ilinniarnerit annermik suliamut sammisumik ilinniarsimasut ingerlaqqiffiusumik ilinniarnerisut isigineqassapput. Piffissap ilaani ilinniarnerummata, tak. imm. 4, ilinniarneq nalinginnaasumik minnerpaamik ukiunut marlunnut siammaanneqartassaaq. Ilinniartitaanerit taakku aalajangersimasumik qulequtsiilluni suliaqarnermik inaarneqartassapput.

Nr. 2

Ingerlaqqiffiusumik ilinniartitaanerni ilinnialissagaanni bacheloritut ilinniarnerup nalinganik ilinniagaqarnissaq piumasaqaataavoq. Ukuuppullu:

a) Ilisimatusarfimmi ilinniartakkat nalinginnaasut iluanni kandidatitut ilinniarnerit, assersuutigalugu ingerlatsinerup iluani. Ilinniarnerit ukiunik marlunnik sivisussusiligaapput kandidatitullu immikkut allagaqarnermik (speciale) inaarneqartarlutik.

b) Masteritut ilinniarnerit suliamut sammisumik ilinniarsimasut nalinginnaasumillu bachelorinngorniarsimasut ingerlaqqiffiusumik ilinniarnerisut isigineqassapput. Piffissap ilaani ilinniarnerummata, tak. imm. 4, ilinniarneq nalinginnaasumik minnerpaamik ukiunut marlunnut siammaanneqartassaaq. Ilinniartitaanerit taakku immikkut allagaqarnermissaaq (speciale) inaarneqassapput.

Nr. 3

Maannamutut Ilisimatusarfiup ilisimatuutut ilinniartitaaneq nunarsuaq tamakkerlugu akuerisaasoq ph.d.-tut allagartartaarutaasussaq neqeroorutigisinnaavaa. Ilinniarneq Ilisimatusarfimmi atorfinitsitaanermik ilaqartinneqarsinnaavoq, aammali allanit aningaasalersorneqarsinnaal-luni, taamaalillunilu ilinniartup suliffimmut, inuutissarsiummut suliamulluunniit atuumassuteqarluni ilisimatuutut ilinniarnini ingerlassinnaallugu. Assersuutigalugu aalajangersakkap periarfissippaa ph.d-nngorniarnerup inuutissarsiummut tunngasup eqqunneqarnissaa. Ilinniarneq ilisimatuutut nalunaarusiamik inaarneqartarpoq.

Imm. 2-mut

Aalajangersagaq naapertorlugu Naalakkersuisut immikkut pisoqartillugu ECTS-pointit imm. 1-imi taaneqartut sanioqqunnissaat akuerisinnaavaat. Aalajangersagaq pissutsit immikkut ittut atuutsillugit atorneqartartussatut takorloorneqarpoq. Assersuutigalugu upperisalerinermik (teologi) bacheloritut ilinniarneq Danmarkimi universitetini kandidatitut ilinnialissutaasinnaanngimmat, hebrairisut, griikerisut latiinerisullu oqaatsit ilinniartitsissutaanngimmata. Oqaatsit taakkua ilinniartitsissutaassappata ilinniarneq sivitsortariaqassaaq, taamaalillunilu ECTS-pointit qaffattariaqassallutik. Aalajangersagaq taamaaliornissamut periarfissaqartitsivoq.

§ 3-mut

Imm. 1-imut

Aalajangersakkami aalajangiunneqarpoq ilisimatusarfinni ilinniakkat nalinginnaasut aamma ilisimatuutut ilinniarneq tassaammata piffissaq tamaat ilinniarnerit, diplomitaarniarlunilu masteritullu ilinniarnerit piffissap ilaa ilinniarnerusut.

Imm. 2-mut aamma 3-mut

Ilisimatusarfimmi ilinniartitaanerit amerlanernit naammassineqarsinnaanissaat periarfissikkumallugu, piffissaq tamaat ilinniarnerit piffissap ilaani neqeroorutigineqarsinnaanissaat ammaanneqarpoq. Inuit ilaannaasa ilinniarneq tamaat peqataaffigissallugu pisariaqartittarmassuk imaluunniit periarfissaqarfigisarmassuk, fagit pikkorissarnerilluunniit ataasiakkaat – peqataasut namminneq sulisitsisuisaluunniit pisariaqartitaasa – neqeroorutigineqarsinnaanissaat ammaanneqarpoq. Ilisimatuutut ilinniarneq amerlanertigut inunnut ataasiakkaanut tunngasuusar-mat periarfissaq pineqartoq tassunga atatinneqanngilaq.

Imm. 4-mut

Aalajangersakkap assigaa Ilisimatusarfik pillugu Inatsisartut inatsisaanni maannamut atuuttumi § 3 a. Siunertarineqarpoq assigiiaarnerusumik allaaserinninnissaq aamma annertunerusumik ataqatigiissaarinissaq – nunap iluani nunarsuarlu tamakkerlugu. Tassuunakkut Kalaallit Nunaanni ingerlaqqiffiusumik ilinniarfinni ilinniartut nooriarsinnaanerat aamma ilinniakkat, fagit piffissamillu sivikillisaanneqarsinnaanerup akuerineqarnissaannut periarfissat annertusissapput.

Aalajangersakkap erseqqissarpaa ilinniartitaanerit nunarsuaq tamakkerlugu ilinniartitaanerit naleqqatigissagaat. Ilinniartitaanerit iluanni ilinniakkat naleqqussarnissaat pisariaqartinneqarpoq, nunani allani ilinniakkanut assingusunut naapertuuttunngorlugit piffissamik ilinniarfimmik sivikillisaanneqarsinnaaneq, ingerlaqqiffiusumik ilinniarfissat nunarsuarlu tamakkerlugu akuerisaaneq anguneqarsinnaaqqullugit.

§ 4-mut

Imm. 1-imut

Naalakkersuisut maannamut Ilisimatusarfiup inassuteqareerneratigut aalajangertarpaat, ilinniartitaanerit suut neqeroorutaassanersut. Siunnersuutigineqarpoq Naalakkersuisut taamaallaat ilinniartitaanerit nutaat, suliaqarfinni nutaaniissinnaasut, akuerisassagaat. Taamaalilluni aalajangersakkap Ilisimatusarfik periarfissippaa fageqarfimminik annertusaanissaanut, taamaalillunilu Issittumi ilisimatusarnikkut ilinniartitaanerullu iluani annertunerusumik qitiulersinnaalluni. Fageqarfiit nutaat aammattaaq ilisimatusarnermut ilinniartitaanermullu attuumassuteqassapput.

Imm. 2-mut

Inatsisartut inatsisanni maannamut atuuttumi Naalakkersuisut ilinniartitaanernik nutaanik akuersisartuujutigalutik, akuersissumminnik atorunnaarsitsisinnaapput, ilinniagaq pisariaarukkaangat imaluunniit pitsaassutsimik piumasaqaatinik naammassinnissinnaajunnaaraangat. Pisariaqartitsinermik pitsaassutsimillu naliliineq pisassaaq ilinniartitaanerup naliliiffiginera tunuliaqutaralugu.

Imm. 3-mut

Pingaarnerusutigut malittarisassaavoq Ilisimatusarfiup nammineq aalajangissagaa aningaasaqarnermut, illoqarnermut sulisoqarnermullu sinaakkutigisat iluanni qassinik ilinniartoqassanersoq. Taamaattoq aalajangersakkap Naalakkersuisut periarfissippai ilinniartuusinnaasunik killiliinissamut, tamannalu aningaasaqarnikkut pissutsinik imaluunniit pisariaqartitsinerup pitsaassutsillu nalilerneranik peqquteqassaaq. Taamaalilluni killiliineq ilinniakkap unitsivinneranut taarsiullugu periarfissaasinnaavoq, tak. imm. 2.

Imm. 4-mut

Aalajangersakkami eqqarsaatigineqarput pissutsit immikkut ittut, ilinniartitaanerit ilisimatusarnermik tunngaveqartut nalinginnaasumik piumasaqaatitarisaannik eqquutitsisinnaajunnaarfiusut, Ilisimatusarfiullu pissutsinik aaqqiiniarluni iliuuseqarfiginngisai, soorlu nammineerluni nalilersuinermigut. Tamatumani patsisaasinnaapput Naalakkersuisunut ilinniarnerit arlaat pillugu arlaleriarluni naammagittaalliutit imaluunniit isornartorsiuinerit. Naalakkersuisut universitetit allat imaluunniit nalileeriaatsinik pineqartunik immikkut ilisimasallit qinnuigisinnaavai nalileeqqullugit.

§ 5-imut

Imm. 1-imut.

Aalajangersakkami aalajangersarneqarpoq Ilisimatusarfiup ilinniagartuutut allagartat suut (gradit) tunniussinnaanerai, § 2, imm. 1-imi taaneqartunik ilinniartitaanernik angusisunut.

Imm. 2-mut

Aalajangersakkap Ilisimatusarfik pisinnaatippaa "joint degrees"-inik taaneqartartunik universiteti alla peqatigalugu tunniussinissaanut. Joint degree-mik tunniussisoqassappat piumasaavoq universitetilu alla pisussaaffeqarfiusumik isumaqatigiissuteqarsimanissaq, qanoq pisoqaraangat "joint degree"-p tunniunneqarsinnaanera pillugu. Tamatumani piumasaassaaq ilinniarnerup ilaa universitetimi allami tassani pisimassasoq, ilinniakkallu aaqqissuunnera ataatsimoorullugu suliarineqassasoq imaluunniit universitetip allap ilisimatusarnissamut periarfissat Ilisimatusarfimmut atorneqarsinnaasunngortissagai.

Siunnersuutigineqarpoq Naalakkersuisut joint degrees pillugit isumaqatigiissutit akuersissutigisassagaat. Joint degrees danskit universitetit pillugit inatsisaanniinngillat, kisiannili ministerip universitetinut akisussaasup akuerisartussaavaa ilinniakkat ilaat nunani allani universitetini ingerlanneqarsinnaanerat, taakkununnga ilaalluni Ilisimatusarfik. Ilimagineqarpoq akuersissutit taamaattut pissarsiarinissaat ajornannginnerussasoq, Kalaallit Nunaanni Naalakkersuisut assingusumik akuersisussaatitaappata.

Eqqarsaataanngilaq joint drgrees-inut akuersissutit nalinginnaasumik atuuttussatut akuersissutigineqarsinnaassasut. Joint degrees pillugit isumaqatigiissutit § 6-imi malittarisassat naapertorlugit suliaassapput, rektorimillu akuerineqassallutik, tak. § 13, imm. 6 taakkununngalu oqaaseqaatit.

Aalajangersagaq assersuutigalugu peqqissaasutut ilinniarnermi atorneqarsinnaavoq. Ilisimatusarfik ilisimatusarnermut tunngatillugu pisariaqartunik nammineerluni pigisaqanngilaq, kisianni Syddansk Universiteti – peqqissaanermik ilinniarfiup suleqatigeriigaa - isumaqatigiissuteqarfigalugu ilinniarneq ilisimatusarnermut tunngasunik imaqartinneqalersinnaavoq, taamaalilluni ilinnigaqartuutut ilinniakkamit piumasaqaataasut piviusunngortinneqarsinnaalissallutik, ilutigisaanillu ilinniagaq peqqissaasutut akuerisaanermik inaarneqarsinnaalissaluni. Aammattaaq § 17, imm. 3 tassungalu oqaaseqaatit innersuunneqarput.

Imm. 3-mut

Naak Ilisimatusarfik doktorinngussutaasinnaasunik (dr.) ilisimatusarsinnaagaluartoq piumasaqaataanngilaq Ilisimatusarfik taamatut allagartartaartitsissasoq. Tamatuma nassataanik imm. 2-mi ersippoq ataqqinaammik doktorinngortitsineq ph.d.-tut tunniunneqassasoq. Ilisimatusarfimmi ilinniagartuut siunnersuisoqatigiiffiat ataqqinaammik doktorinngortitsisinnaavoq, tak. § 1, imm. 1, nr. 5.

§ 6-imut

Imm. 1-imut

Aalajangersakkap Ilisimatusarfik periarfissippaa universitetit Kalaallit Nunaata avataaniittut peqatigalugit ilinniartitsinernik ingerlatsinissaanut. Tamanna pillugu isumaqatigiissummut ilaasinnaapput joint degree-mik tunniussinissaq pillugu aalajangersakkat, tak. § 5, imm. 2 tassungalu oqaaseqaatit, kisianni aalajangersakkamut annertunerusut ilaapput, taakkununnga ilaallutik ataatsimoorluni ilisimatusarnissamik isumaqatigiissutinut tunngasut.

Danskit universitetii assiginagit Ilisimatusarfik atorfinissutaasinnaasumik bachelorinngortitsisinnaammat aammattaaq periarfissaavoq taamatut ilinniarfinnik isumaqateqarsinnaaneq, soorlu danskit ilinniakkanut ingerlaqqiffiusunut qitiusumik ilinniarfiinik (CVU). Tassuunakkut ilinniakkat Ilisimatusarfiup neqeroorutigisinnaangisaraluisa neqeroorutiginissaat periarfissaqalissaaq.

Isumaqatigiissutigineqarsinnaapput ilaatigut Ilisimatusarfimmi ilinniartut Kalaallit Nunaata avataani ilinniarnissaat, aammali Kalaallit Nunaata avataani ilinniartut ilinniakkamik ilaannik Ilisimatusarfimmi ingerlatsinissaat periarfissaqalissaaq.

§ 7-imut

Imm. 1-imut

Inatsisartut inatsisaanni maanna atuuttumi §§ 18 aamma 19 naapertorlugit nalunaarutit arlaqartut Ilisimatusarfimmut tunngasut suliarineqarnikuupput. Ilisimatusarfiup anginerulernissaata kingunerisaanik aamma Ilisimatusarfiup suliaminut tunngasutigut nammineernerulernissaanik kissaateqarnerup nassatarisaanik, susassaqarfiit taamaallaat atorfeqartunut ilinniartunullu tunngasut amerlanerusut iluanni, Ilisimatusarfik nammineerluni malittarisassiorsinnaalissaaq. Taamaammat Naalakkersuisut pisinnaatitaaffiat killilerneqarpoq ilinniartut atorfillillu inatsisitigut pisinnaatitaanerinut tunngasutigut aalajangersaanissamut. Taamaammat naatsorsuutigineqarpoq Naalakkersuisut nalunaarusiussasut aamma qulequttat, assersuutigalugu soraarummeertarneq soraarummeernermilu nalileeqataasarneq, pitsaassutsimik inerisaaneq, ilinnialersinnaanermut malittarisassat nalinginnaasut (piffissamik sivikillisaanneqarsinnaanermut malittarisassat), naammagittaalliuuteqarnissamut malittarisassat aamma ilinniartitsisut pisortallu atorfeqarnerisa ilusaat pillugit malittarisassat suliarissagaat.

Pitsaassutsimik inerisaanissaq pillugu maannamut malittarisassaqarnikuunngilaq. Siunnersuutigineqarpoq Naalakkersuisut pitsaassutsimik inerisaanissaq pillugu malittarisassiussasut. Tamatumani pineqarpoq Ilisimatusarfik ingerlaavartumik aaqqissuussaasumillu ilinniakkanik ilinniartitsinermillu nalilersuisassasoq. Nalilersuineq universitetinit allanit suliffeqarfinnilluunniit arlaannaannulluunniit attuumassuteqanngitsunit – ilinniarfinnik assingusunik naliliisarnermik misilittagalinnit - isumagineqarsinnaavoq. Naliliinerit nunarsuaq tamakkerlugu akuerisaasunik tunngaveqarluni pisassaaq, inernerilu Ilisimatusarfimmit malitseqartinneqartassallutik. Aammattaaq pisinnaatitsissut takorloorneqarpoq atorneqassasoq, Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfik naliliinerup inernerinik ilisimatinneqartarnissaa pillugu malittarisassiornermut, taamatullu naliliinerit tunuliaqutaralugit suliniutit aallartinneqartut kalerriutigineqartarnissaat pillugu.

Imm. 2-mut

Siunnersuutigineqarpoq ilinniakkat ataasiakkaat aaqqissugaaneri Ilisimatusarfimmit suliarineqartassasut. Ilinniagartuut siunnersuisoqatigiiffiata ilinniakkat aaqqissugaaneri akuerisassavaat. Suliamik aalajangersimasumik suliaqalissagaanni akuerineqaqqaarnissaq piumasaappat - soorlu peqqissaasutut sulinissamut - ilinniakkamik aaqqissuussinerit akuersissuteqarnissamut oqartussaasumit aammattaaq akuerineqartassapput. Ilinniakkap aaqqissuussaaneri tamanut ammasuussapput.

§ 8-mut

Aalajangersakkami erseqqissarneqarpoq, ilinniartunik ilitsersuinermik neqeroornissaq Ilisimatusarfiup suliassaasa ilagigaat, ilinniartut piffissaq tamaat piffissalluunniit ilaannaa ilinniatuu-nerat apeqqutaatinnagu. Ilinniartunik ilitsersuineq ikerinnakkut unittarnermik killiliiniarluni suliniutit ilagaat. Aalajangersakkap Ilisimatusarfik ilinnialerumaartussanik ilitsersuinissamut pisussaaffilinngilaa, aammali taamaaliornissaa akornusernagu.

Ilinniartunut immikkut pingaaruteqarpoq Kalaallit Nunaata avataani ilinniarnissamut periarfissanik ilisimasaqarluarnissaq, taamaammat immikkut erseqqissarneqarpoq tamanna ilinniartunik ilitsersuinermut ilaassasoq, tassunga ilaallutik ilinniareersimasanik nuussisinnaanermut aamma ilinniartuunersiaqarsinnaanermut tunngasut. Ilinniarnerup ukiuani kingullermi suliffissaqarniarnermut tunngatillgu ilitsersuineq annerusumik pingaartinneqassaaq.

§ 9-mut

Aalajangersakkami erseqqissarneqarput siulersuisut qullersaasutut suliassaat. Tamatumani naatsorsuutigineqarpoq siulersuisut ingerlatseqatigiiffinnisut inissisimassasut, Ilisimatusarfiulli pisortatigoortumik suliffeqarfiuneranut naleqqussakkamik.

Imm. 1-imut

Ilisimatusarfik Namminersornerullutik Oqartussat ataanni suliffeqarfiummat, siulersuisut taakkununnga akisussaapput, kisianni siulersuisut aamma soqutiginnitsit allat soqutigisaasa isumaginissaannut akisussaapput. Siulersuisut akisussaaffigaat Ilisimatusarfiup aaqqissugaanermigut inerikkiartornissaa aamma Ilisimatusarfiup ima aaqqissugaanissaa, aningaasaliunneqartut sunniuteqarluarnerpaamik atorneqarnissaat anguneqarluni, aamma akisussaaffigaat atorfeqartut piginnaasaasa atorluarneqarnissaat pitsaanerpaamillu inerisarneqarnissaat.

Universitetini nalinginnaasutut suli isumaavoq, ilisimatusarneq ilinniartitaanerlu institutini arlalinni ingerlanneqassasut. Institutinut ersarissumik agguaaneq ilinniakkallu taakkununnga agguaannerat Ilisimatusarfiup ulluinnarni aqutsisuisa suliassaraat, kisianni agguaassineq siulersuisut pingaarnerusutigut inerisaanissamik pilersaarutaannut naapertuuttuussaaq.

Imm. 2-mut

Siulersuisut aningaasatigut missingersuummi pingaarnerusutigut agguaassinissaq akisussaaffigaat. Tassani pineqarput ataatsimoorussamik aningaasartuutit tamarmik, inerisaanermut aningaasartuutit insititutinullu ataasiakkaanut agguaassinissaq. Missingersuut akuerineqareeruni Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmut nassiunneqassaaq. Kukkunersiunissaq Naalakkersuisullu akuersinissaat pillugit aalajangersakkat § 28-miipput.

Imm. 3-mut

Pineqarput Ilisimatusarfiup malittarisassai. Malittarisassat ilaatigut imarivaat siulersuisut sulinerat, rektori, rektorip tullersortaa, Ilisimatusarfiup pisortaa, ilinniagartuut siunnersuisoqatigiiffiat, institutit immikoortortaqarfiillu pillugit aalajangersakkat. Aammattaaq imarivai qinersinernut ingerlanneqartussanut aningaasaqarnermullu tunngasut. Aammattaaq Ilisimatusarfiup malittarisassaasigut isummerfigineqarsinnaapput ulluinnarni ingerlatsisussanik ulluinnarnilu ingerlatsinermi maleruagassanik pilersitsisoqassanersoq.

Ilisimatusarfiup malittarisassai aatsaat aalajangiunneqarsinnaapput, siulersuisut toqqarneqareerpata siulittaasumillu qinersisoqareerpat. Tamatuma tungaanut malittarisassaagallartussat suliarineqassapput, suliassat Ilisimatusarfiup malittarisassaasa aalajangiunneqarnissaannut utaqqisinnaanngitsut, tassunga ilanngullugu siulersuisussanik toqqaaneq, isumagineqarsinnaaqqullugit.

Imm. 4-mut

Siulersuisut atorfinitsitsinermi akissarsiaqartitsinermilu malittarisassat Namminersornerullutik Oqartussanut atuuttut imaluunniit Naalakkersuillu isumaqatigiissutaasut malissavaat.

Imm. 5-imut

Siunnersuutigineqarpoq siulersuisut Naalakkersuisunut angusaqarnissaq pillugu isumaqatigiissusiornissamut periarfissaqassasut, tamanna kissaatigineqarpat Ilisimatusarfiullu sunniuteqarluarnissaanut peqataasinnaappat. Angusaqarnissamik isumaqatigiissummi allaaserineqarsinnaapput takorluukkat, oqariartuutigiumasat, pingaartitatigut tunngaviit, iliuusissatigut anguniakkat suliniuteqarfissallu. Piffissamut naammaannartumut ukiullu sisamat sinnernagit tunngatillugu suliaasariaqarpoq. Suliniuteqarfissani assigiinngitsuni anguniagassat immikkuualunnerusutigullu anguniagassat aalajangersarneqarsinnaapput aamma naliliinissamut kiisalu ilisimatusarfinnik ilinniarfinnillu allanik suleqateqarnermi pilersaarutit aalajangersarneqassallutik. Ilinniartut amerlassusissaannut, naammassisartut amerlassusissaannut ikerinnakkullu unittartut amerlassusissaannut tunngasutigut anguniagassaliortoqarsinnaavoq taamatullu nunarsuaq tamakkerlugu suliamut tunngatillugu atuagassiani saqqummersitassat qassiunissaat anguniagassatut siunniunneqarsinnaalluni. Angusaqarnissamik isumaqatigiissut aningaasaliinernut tunngaviusinnaavoq.

Imm. 6-imut

Aalajangersakkap nassataraa siulersuisut atorfeqartitat allat atorfinitsinnissaat soraarsinnissaalluunniit imaluunniit ilinniartunik anisitsineq aalajangiiffigisinnaanngimassuk. Aammattaaq siulersuisut maalaaruteqarnerup aalajangiiffiginera allanngortissinnaanngilaat, kisiannili maalaaruteqarnermi Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfiup aalajangiinera malitseqartittussaallugu.

Imm. 7-imut

Aalajangersakkap Naalakkersuisut siulersuisunik tunuaqqusinissamut periarfissippai, tassuunakkut siulersuisut nutaat ivertinneqarsinnaaqqullugit. Taamaaliortoqarsinnaavoq siulersuisut inatsisinik unioqqutitsinernik aaqqeeqquneqaraluanertik maleruanngippassuk.

§ 10-mut

Imm. 1-imut

Aalajangersakkami siulersuisuni ilaasortat ataatsimoortumik pisinnaasaqarfigisassaat aalajangersarneqarput. Aammattaaq siulersuisut Ilisimatusarfiup ineriartornissaanut akuerisaanissaanullu peqataasinnaasariaqarput, nunarsuaq tamakkerlugu ilinniartitaanerup ilisimatusarnerullu silarsuaanik ilisimasaqarnertik iluaqutigalugu.

Imm. 2-mut

Aalajangersakkap siunertaraa atorfeqartut, ilinniartut inuiaqatigiillu Ilisimatusarfiup ingerlatsinera siulersuisullu suliaat pillugit paasisaqarnissaat. Ilisimatusarfiup malittarisassaani ta-manna pillugu erseqqinnerusumik aalajangersaasoqassasoq siunertaavoq. Ilisimatusarfiup malittarisassaani ingerlatsineq pillugu inatsisitigut aalajangersakkat sanioqqullugit malittarisassiortoqarsinnaanngilaq. Ammasuunissamut killigitinneqarput ingerlatsinermi ammasuunissamik inatsimmi malittarisassani aalajangersakkat aamma inunnut tunngatillugu suliassani asattuussinissaq, isumaqatigiinniarnernut tunngasut aamma iluarsartuussinikkut suleqatigiinnissaq pillugu isumaqatigiinniarnernut tunngasut.

§ 11-mut

Imm.1-imut

Naatsorsuutaavoq ilaasortat avataaneersut siulersuisuni aalajangiisinnaassuseqarlutik inissisimassasut. Ilaasortat 11-unissaannik siunnersuuteqarnermut ilaatigut pissutaavoq pisarissersornartumik siulersuisoqarnissaq pinngitsoorumaneqarmat, ilaatigullu qularnaarumaneqarmat ilinniartut naammaginartumik peqataatitaqarnissaat kiisalu Ilisimatusarfimmi qangaaniilli ilinniagaasartut atorfinninnissamullu sammisumik bachelorinngorniartarnerit nutaat oqimaaqatigiissinnissaat.

"Avataaneersut" ima paasisariaqarpoq, ilaasortat Ilisimatusarfimmi atorfeqartuunngitsut ilinniartutulluunniit allatsissimanngitsut. Sammivinnit assigiinngitsuneersuussapput, soorlu universitetinit ilinniarfinnilluunniit assingusunit allanit, kulturikkut inuunermit, pisortat ingerlataannit aamma namminersortunit, taamaalillunilu ilaasortat Kalaallit Nunaanni avataaniilu najugaqartuullutik. Ilaasortat avataaneersut suliffinnik aqutsinermik misilittagaqartuussapput, tassunga ilanngullugu pilersaarusiornermik aningaasaqarnermullu tunngasunik paasisimasaqarneq.

Imm. 2-mut

Naalakkersuisut siulersuisunut ilaasortanngortitsinerat eqqarsaatigineqarpoq Kalaallit Nunaanni inuutissarsiornermut kattuffiit, Ilisimatusarfik aamma Danmarkimi Rektorkollegia isumasioqqaarsinnarlugit pisassasoq, tassuunakkut Kalaallit Nunaanni inuutissarsiornermik ingerlatsisut suliffinnik aqutsineq pillugu misilittagaat kiisalu Danmarkimi universitetini siulersuisoqarnermik misilittakkat atorluarumallugit.

Toqqaanermi pingaartinneqassapput suliamut tunngasutigut inuttullu piginnaasat aamma suliffinnik kiisalu ilisimatusarnikkut ilinniartitaanermilu avatangiisinik inerisaanermit misilittakkat, ajornanngippat nunarsuaq tamakkerlugu sulinermeersuusinnaasut.

Siulersuisunut ilaasortat qanoq akulikitsigisumik qinigaaqqissinnaaneri killilerneqanngilaq, kisiannili Ilisimatusarfiup malittarisassaani killissaq aalajangersarneqarsinnaavoq. Ilaasortaq qinigaaffimmi ingerlanerani peqataasinnaajunnaarpat, Naalakkersuisut isumasiuisinnarlutik taartissaanik toqqaassapput.

Imm. 3-mut

Siunnersuutigineqarpoq atorfeqartitat akornannit ilaasortaatitaasut toqqaannartumik qinersinikkut toqqarneqartassasut, soorlu maanna universitetsrådimut ilaasortat aamma taama qinigaasartut. Eqimattakkaat tamarmik sinniisoqarnissaat qularnaarumallugu siunnersuutigineqarpoq qinerseqatigiittartussat tallimat pilersinneqassasut. Taamaaliornikkut qularnaarneqassaaq qangaaniilli universitetini ilinniakkat aamma atorfinissutaasinnaasumik bachelorinngorniarnerit ilisimatuut/ilinniartitsisut ilinniartullu akornannit peqataatitaqarnissaat. Ilisimatusarfiup malittarisassaani aalajangerneqarsinnaavoq ph.d.-nngorniat ilinniartitsisuujutigisut qinersisussanut sorlernut ilaassanersut. Qinersisussat taakku aammattaaq ilinniagartuut siunnersuisoqatigiivinut qinersinermi atorneqassapput, tak. § 15, imm. 2.

Imm. 4-mut

Pingaartuuvoq atorfeqartitat sinniisuutitaasa Ilisimatusarfimmi suliat ineriartornerlu pillugit annertuumiik ilisimasaqarlutillu soqutigisaqartuunissaat, taamaammat siunnersuutigineqarpoq qinersisinnaatitaaneq qinigaasinnaatitaanerlu eqimattanut taakkununnga killilerneqassasoq. Pisariillisaanissaq pissutigalugu siunnersuutigineqarpoq taakkua tassaassasut Ilisimatusarfimmi minnerpaamik ukiup affaata nalinganik sivisussusilimmik atorfeqartitat.

Imm. 5-imut

Siulersuisunut ilaasortat atorfillit ingerlatseqatigiiffinni sulisut toqqagaattut siulersuisunut ilaasortatulli illersugaapput, tamannalu ima paasisariaqarpoq soraarsitsisarneq pillugu isumaqatigiissutit tatigisaallutik sinniisinut tunngatillugu isumaqatigiissummi atorfinitsinneqarnerminnut tunngaviusumi atuuttut ataanniittut.

Imm. 6-imut

Siulersuisuni siulittaasup avataaneersuunissaanik piumasaqarnikkut siulittaasullu taasinerata taasinerni aalajangiisussaatinneratigut siulersuisunut ilaasortat avataaneersut aalajangiisinnaassuseqartumik sunniuteqarnissaat anguniarneqarpoq, demokrati naapertorlugu tunngavigisassat, siulersuisut sulinerannik aqutsisuusussat saneqqutaanngikkaluarlugit.

Imm. 7-imut

Ilisimatusarfiup malittarisassaani siulersuisut sulinerat erseqqinnerusumik aalajangersaaffigineqassaaq, ilanngullugit ulluinnarni ingerlatsisussanik pilersitsisoqassanersoq aamma ingerlatsinermi maleruagassat suliarineqassanersut. Aammattaaq siulersuisussanik qinersisarneq pillugu malittarisassat aalajangersarneqassapput, tak. imm. 3.

§ 12-imut

Imm.1-imut

Siulersuisut rektorip sulineranut pingaarnerusutigut sinaakkusiissapput, rektorillu taakkua suliarinissaat siulersuisunut akisussaaffigai. Aqutsisutut allatut isigineqarput rektorip tullersortaa, ilisimatusarfiup pisortaa institutillu pisortaat. Rektorip suliassani inunnut taakkununnga suliassanngortissinnaavai aqutsinermi periutsit nalinginnaasut naapertorlugit.

Imm. 2-mut

Rektorip rektorillu tullersortaata ulluinnarni suliassat suliassallu immikut ittut avinnissaat isumaqatigiissutigisinnaavaat. Suliassat aalajangersimasumik agguaannerat pillugu siulersuisut ilisimatinneqartariaqarput. Aammattaaq ersippoq rektorip tullersortaata rektorip peqannginnerani taassuma pisinnaatitaaffii tigummissagai. "Rektoreqarfiup" atorneqarnerata takutippaa rektorip tullersortaatalu qanimut suleqatigiinnissaat ilimagisaasoq.

Imm. 3-mut

Rektorip akuerineqarsimalluni ilisimatuujunissaanik piumasaqaat universitetit silarsuaanni nalinginnaasumik atuuppoq, Ilisimatusarfiullu pimoorussamik piginnaasaqarluarlunilu Issittumi ilisimatusarnermik ilinniartitsinermillu ingerlatsiviuneranik nunarsuaq tamakkerlugu tusaamaneqarnerata attatiinnarneqarnissaanut ikorfartueqataasuulluni. Aammattaaq pingaartuuvoq rektorip ingerlaqqiffiusunik ilinniartitaanernik aqutsinermik pisariaqartumik misilittagaqartuunissaa aamma Ilisimatusarfiup inuiaqatigiillu imminnut ataqatigiinnerinik ilisimasaqartuunissaa.

§ 13-imut

Imm. 1-imut

Aalajangersakkami rektorip pisinnaatitaaffiinut sinaakkutissat aalajangersarneqarput. Pingaaruteqartut ataasiakkaat taagornerisa saniatigut aalajangersarneqarpoq rektori tassaammat Ilisimatusarfimmik pisussaaffiliisinnaasoq, aamma rektori atsiorsinnaatitaasoq, § 9-mi siulersuisut pisinnaatitaaffii pillugit aalajangersakkat eqqaassanngikkaanni. Rektorip atsiorsinnaatitaanini allamut ingerlateqqissinnaavaa.

Imm. 2 aamma 3-mut

Siunnersuutaavoq rektorip tullersortimi aamma Ilisimatusarfiup pisortaata atorfinitsinnissaat soraarsinnissaallu siulersuisunut inassuteqaatigisassagaa. Siulersuisut tassaapput rektorip tullersortaanik Ilisimatusarfiullu pisortaanik atorfinitsitsisartut soraarsitsisartullu, tak. § 9, imm. 4. Aammattaaq siunnersuutaavoq rektorip institutini aqutsisut immikoortortaqarfiillu pisortaat atorfinitsillugillu soraarsittassagai.

Atorfinitsitsinermi soraarsitsinermilu rektorip malittarisassat Namminersornerullutik Oqartussat ataanni atorfeqartunut atuuttut maleruassavai, ataasiakkaatigut atorfinitsinerup atugassarititaasut allat malillugit pinissaa isumaqatigiissutigineqarsimanngikkaangat. Atorfinitsitsinermi periutsit qularnaassavaat atorfinitsitat suliamut aqutsinermullu tunngasutigut pisariaqartunik pisinnaasaqartuunerat.

Imm. 4-mut

Naatsorsuutit siulersuisunut nassiunneqannginnerini rektorimit atsiorneqassapput, tak. § 9, imm. 2. Rektorip ukiup naatsorsuiffiusup ingerlanerani missingersersuutit naatsorsuutillu killiffiat pillugu siulersuisut ilisimatittassavai, siulersuisut tunaartarisassiaat naapertorlugit.

Imm. 5-imut

Ilinniartunut pineqaatissiissutit tassaasinnaapput mianersoqqussutit aamma anisitaagallarnerit anisitaanerilluunniit, soorlu Inatsisartut inatsisaanni maannamut atuuttumi aamma taamaattoqartoq. Ilinniartup Ilisimatusarfiup avataani pissusilersorneq takutitaa, soorlu suliffimmik misiliinerup nalaani, pissusilersornerup pineqartup nalilersuiffigereerneratigut ilinniarnermut tunngassuteqartunik kinguneqartinneqarsinnaavoq.

Imm. 6-imut

Siulersuisut ulluinnarnilu aqutsisut suliassanik agguaassisarnerisa nalinginnaasup nassataraa, ulluinnarni aqutsisut isumaqatigiissutinik pisussaaffeqarfiusunik akuersisarnerat, illuutit pillugit iliuutsit eqqaassanngikkaanni, tamannalu siunnersuummi saqqummiussami pisariaqalissanngilaq. Aalajangersagaq malillugu siulersuisut suliassat taamaattut pillugit oqaaseqaateqartarumanissaat akornutissaqartinneqanngilaq. Aalajangersakkamut ilaapput suleqatigiinnerit suulluunniit, taakkununnga ilaallutik suliniutinik aningaasalersueqatigiinnerit, ilinniarnerit ilisimatusarnerilluunniit pillugit ataatsimoorussamik isumaqatigiissutit, assersuutigalugu peqqinnissalerinerup iluani aamma peqqissaanerup iluani ilisimatusarnerit. Suleqatigiinnissamik isumaqatigiissutit inatsisitigut pituttuisuussapput. Rektorip aqutsinermi periutsit nalinginnaasut naapertorlugit suleqatigiinnissamik isumaqatigiinniarsinnaanini allamut tunniussinnaavaa.

Imm. 7-imut

Pisinnaatitsissut taamaallaat atorneqartussatut takorloorneqarpoq, ilinniagartuut siunnersuisoqatigiiffiata suliakkiissutaasut suliarisinnaanngikkaangatigik, tak. § 14.

§ 14-imut

Imm. 1-imut

Siulersuisut ilaatigut maannamut Ilisimatusarfimmi siunnersuisooqatigiiusimasunit allaanerusunik suliassaqarmata, allatullu katitigaallutik, ilinniagartuutut kiffaanngissuseqarnissap qularnaarneqarnissaa anguniarlugu isumaginnittussanik pilersitsinissaq pisariaqarpoq. Taamaammat siunnersuutigineqarpoq ilinniagartuut siunnersuisoqatigiiffiannik pilersitsisoqassasoq.

Ilinniagaqartuut siunnersuisoqatigiiffiat ilaatigut allaffissornikkut suliassaqarpoq, ilaatigullu ilinniagartuutut suliassaqarluni, immikkut ilisimasaqarfiusariaqartunik. Taamaammat siunnersuutigineqarpoq ilinniagartuut siunnersuisoqatigiiffiat suliamut tunngasutigut ilisimasalinnik ataatsimiititaliussasut. Ataatsimiititaliat taakku ilaatigut adjunktitut lektoritullu ilisimatusarnissamik pisussaaffilittut atorfinitsitassat nalilersortassavaat ("ilisimatuunik nalilersuineq"), ilaatigullu ilisimatuutut sulianik ph.d.-tut allagartartaarnissamut tunngaviusussanik naliliisassallutik, taamatullu gradimik tunniussisassallutik. Ilinniagartuutut gradit allat institutini siunnersuisoqatigiinnit tunniunneqartassapput, tak. § 20, imm. 3.

Ilinniagartuut siunnersuisoqatigiiffiat aningaasatigut missingersuutit pillugit – taakkua rektorimit siulersuisunut akuerisassatut nassiunneqannginnerini - oqaaseqaateqarsinnaapput. Tassuunakkut isumagineqassaaq atorfillit aningaasat agguaanneqarnissaannut oqartussaaqataanissaat. Tamannattaaq atuuppoq Ilisimatusarfiup inerikkiartorneranut pilersaarusiorneranullu ilinniagartuutut sulianut attuumassuteqartunut soorlu ilisimatusarnermut aamma ilinniartitaanernut.

Ilinniagartuut siunnersuisoqatigiiffiata ilinniakkat aaqqissugaanerinik akuersisarnissaannik siunnersuuteqarnikkut qularnaarneqassaaq ilinniakkat aaqqissugaanerisa ataqatigiissarnissaat, aamma sunneqatigiinnerup - inatsisissatut siunnersuutip tunuliaqutarisaanut ilaasup - pilersinnissaa.

Imm. 2-mut

Aalajangersakkami aalajangersarneqarpoq ilinniagartuut siunnersuisoqatigiiffiata ilinniagaqartuutut pissutsit imm. 1-imi eqqaaneqartut saniatigut namminneq pingaartutut isigisaminni oqaaseqarsinnaatitaanerat. Siunnersuisoqatigiit taassuma assinganik sulianik rektorip ilinniagartuut siunnersuisoqatigiiffiata isummerfigisassaattut saqqummiussaanik oqallisiginninnissamut pisussaaffeqarput. Aalajangersagaq sulianut ilinniagartuussutsikkut apeqqutinut tunngasunut killiligaavoq, tassami aqutsinermut allaffissornermullu tunngatillugu apeqqutit aqutsisunit siulersuisunillu suliarineqassapput.

§ 15-imut

Ilinniagartuut siunnersuisoqatigiiffiat katitigaassaaq illuatungaani pisortat illuatungaanilu atorfillit ilinniartullu naammaginartumik oqimaaqatigiissillugit. Qangaaniilli ilisimatusarfinni ilinniagaasartut atorfininnissamullu sammisumik bachelorinngorniarnerit nutaajusut peqataatitaqarnissaat pillugu aalajangersakkatigut qularnaarneqarpoq, ilinniakkat tamarmik isumaasa tusarneqarnissaat.

Ilinniagartuut siunnersusioqatigiiffiata suliassaasa ilinniagartuutut suliassaannaannginnerat sulisullu tamarmik assigiiaartumik ilisimatinneqartarnissaat eqqarsaatigalugit, siunnersuutigineqarpoq teknikkikkut allaffissornikkullu sulisut malinnaasussamik peqataatitaqassasut, tassa imaappoq ilaasortaq taarseqataasinnaanngitsoq.

Ilinniagartuut siunnersuisoqatigiiffiata katigigaanerata atorfeqartut ilinniartullu siulersuisuni ilaasortaatitaasa katitigaanerat assigaa, naak inuit taakkua ataatsikoortarnissaat anguniagaanngikkaluartoq. Taamaammat qinersisussanut immikkoortiterineq siulersuisunik qinersinermi immikkoortiterinertut ippoq, tak. § 11, imm. 3 aamma 4.

§ 16-imut

Imm. 1-imut

§ 15, imm. 1-imut oqaaseqaatini eqqaaneqartutut, ilinniagartuut siunnersuisoqatigiiffiat ilisimatuutut akuerineqarsinnaassuseq, ilinniagartuutut suliamut tunngasunik ilisimasaqartuunissaq pillugu naliliinissamik suliassaqarpoq. Taamaammat siunnersuutigineqarpoq ilinniagartuut siunnersuisoqatigiffianni ilaasortat ilisimatuujusut kisimik, suliassat immikkoortumi eqqaaneqartut aalajangiiffiginerini peqataasassasut. Tassuunakkut pinngitsoorneqassaaq ilinniagartuut siunnersuisoqatigiiffianni ilisimatuut, apeqqutini taamaattuni taasisoqartillugu ikinnerussuteqalersinnaanerat.

Imm. 2-mut

Ilisimatusarfiup nammineernerulernissaanik kissaateqarnerup nassatarisaanik taamaallaat qinerseriaatsit, qinigaasinnaassuseqarneq taasisinnaatitaanerlu pillugit inatsisissatut siunnersuummi pingaarnerusutigut aalajangersaasoqarpoq. Ilinniagartuut siunnersuisoqatigiiffiat pillugu pissutsinut allanut tunngasut tamarmik, taakkununnga ilaallutik qinersinernik ingerlatsinerit piffissarlu qinigaaffik, Ilisimatusarfiup malittarisassaani allassimassapput.

§ 17-imut

Imm. 1-imut

Universitetini ileqquusutut ilinniartitsineq ilisimatusarnerlu institutini pisarpoq. Institutit qassiussanerat aamma suliaqarfiit ilinniakkallu suut institutini ataasiakkaaniissanersut rektorimit aalajangerneqassaaq, taassumalu aalajanginnginnermini suliassaq ilinniagartuut siunnersuisoqatigiiffiannit oqaaseqaateqarfigiteqqaassavaa siulersuisullu ilisimatillugit.

Imm. 2-mut

Suliamut tunngasut ilisimatusarnerullu imminnut ataqatigiinnissaat institutikkaarinermi tunngaviuvoq. Taamaammat kissaatigineqanngilaq imaluunniit piumasaqaataanani, institutit tamarmik assigiinnissaat angeqqatigiinnissaalluunniit. Tassuunakkut immikkoortut ataasiakkaat immikkut issusaat ileqquilu maleruarneqarsinnaapput, tamanna suliamut tunngasutigut peqqutissaqarpat.

Taamaattoq atorfininnisamut sammisumik bacheloritut ilinniarnerni ilinniartitaanerup ilisimatusarnerullu akuleriisinnissaat pitsaassusaasalu qaffassarnissaat siunertaralugu, ilinniartitaanerit suliamut tunngasutigut ilisimatusarnikkullu imminnut attuumassuteqartut institutimi ataatsimi inissittariaqarput. Taamaammat aallaavittut institutip ataatsip nalinginnaasumik universitetini bacheloritut kandidatitullu ilinniartarnerit aamma atorfinissutaasinnaasumik bachelorinngorniartarnerit tamaasa ilaatittariaqarpai. Taamaattoq ulluinnarni pissutsit allatut aaqqiinissaq pisariaqalersissinnaavaat.

Imm. 3-mut

Siunnersuutikkut ilinniakkap institutit ilusiligaanerisa avataanniitinneqarsinnaanera ammaanneqarpoq, Ilisimatusarfik taassuma iluani pisariaqartumik ilisimatusarnikkut pisinnaasaqanngippat. Taamatut isumaqatigiissut rektorimit akuerineqartussaavoq, tak. § 13, imm. 6. Siunnersuummi § 14, imm. 1-ip nassataraa, ilinniagartuut siunnersuisoqatigiiffiat oqaaseqartussaatitaammat. Isumaqatigiissummut ilaasinnaapput "joint degrees"-inik tunniussineq, tak. § 6.

Assersuutigalugu peqqissaasutut ilinniartitsineq Ilisimatusarfimmi immikkoortunut allanut suliamut tunngasutigut ilisimatusarnikkulluunniit attuumassuteqanngilaq. Taamaammat pisariaqarpoq universitetitimik taamatut pisinnaasalimmik, isumaqatigiissusiorusuttumillu isumaqatigiissuteqarnissaq, ilinniakkap pitsaassusaa aamma ilinniakkaminnik naammassinnittut peqqissaasutut akuerisaanissaat qularnaarumallugu. Syddansk Universitet suleqatigineqareerpoq, tamannalu ingerlaannassappat pissusissamisuuginnassaaq.

§ 18-imut

Imm. 1-imut

Siunnersuutigineqarpoq institutit pisortaat rektorimit atorfinitsinneqartassasut. Ileqquusut malillugit institutit pisortaat institutimi atorfilinnit ilinniartunillu toqqagaasarnikuupput, soorlu Inatsisartut inatsisaanni maannamut atuuttumi aamma taamaattoq. Danmarkimi universitetit pillugit inatsit nutaaq malillugu aammattaaq institutit pisortaasa toqqaanikkut atorfinitsitaasarnerat eqqunneqarpoq.

Imm. 2-mut

Siammaassinerup ilaatut aamma institutit ataasiakkaat atorfinninnisamut sammisumik bacheloritut ilinniarfiillu katigunnermik kingorna, nalinginnaasumik anginerulernissaasa nassatarisaannik aalajangersimasumik atorfillit piffissallu ilaani atorfillit atorfinitsittarnerat soraarsittarnerallu institutimi pisortanut inissinneqarpoq. Naatsorsuutigineqarpoq institutip pisortaata immikkoortortaqarfinni pisortat Ilisimatusarfiullu allaffeqarfia sulisussarsiorneq, atorfinitsitsineq soraarsitsinerlu pillugit suleqatigisassagai.

Imm. 3-mut

Institutip pisortaata akisussaaffigai institutip ulluinnarni aqunneqarnera, tassunga ilaallutik suliassat pilersaarusiorlugillu agguaannerat. Institutip pisortaata institutip ilisimatusarnera, ilinniartitsinera, aningaasatigut missingersuutai sulisoqarnerlu akisussaaffigai. Institutip pisortaata atorfillit allat ilinniartullu pineqartutigut suleqatigissavai, ilaatigut institutip siunnersuisoqatigiivini.

Imm. 4-mut

Siunnersuummi annermik ilisimatuut eqqarsaatigineqarput. Institutip pisortaata – pisortatut pisinnaatitaanini tunuliaqutaralugu – suleqataasut ataasiakkaat aalajangersimasunik suliakkerssinnaavai ilisimatusarnissamut kiffaanngissuseqarneq ataqqillugu, pingaarnerusutigullu sinaakkusiussat akuerisaasut iluanni.

§ 19-imut

Institutip pisortaa ilisimatusarnermik misilittagaqassaaq, soorluttaaq tamanna maannamut institutini pisortanit piumasaqaataasoq, sulilu Kalaallit Nunaata avataani universitetini nalinginnaasoq.

§ 20-mut

Aalajangersakkami institutini siunnersuisoqatigiit suliassaat aalajangersarneqarput. Inatsisartut inatsisaanni maannamut atuuttumi institutini siunnersuisoqatigiit taaneqartarput ilinniarnermut ataatsimiititalianik. Institutini siunnersuisoqatigiit ilinniarnermut ataatsimiititaliat suliassaat isumagisassavaat, kisiannili institutit atorfinissutaasinnaasumik bacheloritut ilinniarfiit Ilisimatusarfimmut ilaalernerat pissutigalugu anginerulersussaammata, institutini siunnersuisoqatigiit nutaat suliassaat amerlanerulissapput. Tassuunakkut ilinniagartuut siunnersuisoqatigiiffiat ulluinnarni suliassatigut oqilisaanneqassapput, ilutigisaanillu institutini siunnersuisoqatigiit piviusunik suliassaqalissallutik.

Imm. 2-mut

Institutimi siunnersuisoqatigiit institutip aqutsisuinit qulliunerusunillu saqqummiussat oqallisigissasavaat, aammattaarli institutimi siunnersuisoqatigiit namminneerlutik institutip susassaqarfiisa iluanni ilisimatusarnerup ilinniartitsinerullu inerisaaviginissaat pisussaaffigaat.

Imm. 3-mut

Aalajangersakkami pineqarput institutimi siunnersuisoqatigiit aalajangiiffigisinnaasaat. Ilinniakkanut isernissamut angusanillu nuussinissamut (ilinniakkani faginiluunniit allani ilinniarsimanerit akuerisaanerat) nalinginnaasumik malittarisassat nalunaarutikkut aalajangersarneqassapput. Institutimi siunnersuisoqatigiit suliassaraat, aningaasaliissutaasut iluanni – ilinnialerumasut ataasiakkaat nalilersornissaat. Atorfininnisamut sammisumik bacheloritut ilinniartussanik akuersiniarluni nalilersuineq ilinniartunik ilitsersuisunut ilinniartitaanerillu ataasiakkaat pisortaannut suliassanngortinneqarsinnaavoq, kisianni institutini siunnersuisoqatigiit ataasiakkaat aalajangiisussaatitaapput. Aammattaaq institutimi siunnersuisoqatigiit institutip suliaqarfiata iluani ilinniagartuutut gradinik tunniussisarput. Taamaattoq ph.d-tut gradi ilinniagartuut siunnersuisoqatigiivinit tunniunneqartarpoq, tak. § 14, imm. 1, nr. 5.

Pitsanngorsaanermi pitsaassutsimillu siuarsaanermi siunnersuisoqatigiit institutinut ataasiakkaanut attuumassuteqarmata siunnersuutigineqarpoq instituti siunnersuisoqatigiinnik pilersitsisinnaartitaassasoq, tak. §§ 25 aamma 26.

Imm. 4-mut

Imm. 3-p – aalajangiiffigineqarsinnaasunut tunngassuteqartup, akerlianik imm. 4 institutini siunnersuisoqatigiit innersuussuteqarsinnaatitaanerannut tunngasuuvoq. Innersuussuteqarsinnaatitaanerup assigai pisinnaatitaaffiit rektorimut ilinniagartuullu siunnersuisoqatigiiffianut §§ 13 aamma 14 naapertorlugit tunniunneqarsimasut. Institutimi siunnersuisoqatigiit taamaallaat namminneq institutimi ilinniakkat aaqqissugaaneri pillugit inassuteqarsinnaatitaanerannut pissutaavoq, ilinniakkat aaqqissugaanerisa ataqatigiissarnissaat sunneqatigiinnerullu pilersinnissaa - inatsisissatut siunnersuutip matuma siunertaanut ilaasup – qaffasinnerusumi pisariaqarnerat. Isuma taannattaaq institutimi siunnersuisoqatigiit institutip aaqqissugaanera pillugu taamaallaat inassuteqarsinnaatitaanerannut tunngaviuvoq. Institutimi aaqqissuussineq rektorimit akuerineqassapput, tak. § 13, imm. 1.

Imm. 5-imut

Aalajangersakkap assigaa § 14, imm. 2 – ilinniagartuut siunnersuisoqatigiiffianut tunngasoq.

Imm. 6-imut

Institutini siunnersuisoqatigiit aammattaaq suliassat ilisimatusarnermut tunngasut aalajangiiffigisarmatigik, pingaartuuvoq instituni siunnersuisoqatigiinni aalajangiisarnermi qularnaassallugu, ilaasortat ilisimatuutut tunuliaqutallit suliani taamaattuni taasinerisa pisariaqartumik naleqartinneqarnissaat. Siunnersuutigineqarpoq tamanna Ilisimatusarfiup malittarisassaasigut imaluunniit institutini siunnersuisoqatigiit suleriaasissaanni qularnaarneqassasoq.

§ 21-mut

Siunnersuutigineqarpoq institutini siunnersuisoqatigiit ilinniagartuut siunnersuisoqatigiiffiata inuttaligaanerattut inuttaqartinneqassasut, taakkuali akerliannik ilinniartut ilaasortaatitaat, sulisut ilaasortaatitaannut sanilliullugit, amerlillugit. Tamanna pissusissamisoorpoq, instituti ilinniartut ulluinnarisaannut qaninnerummat ilinniagartuut siunnersuisoqatigiiffianullu naleqqiullugu pissutsit piffisamut sivikinnerusumut tunngassuteqartut suliarisarlugit.

Teknikkikkut allaffissornikkullu suliani atorfeqartut sulisunut allanut naleqqiullugit amerlassusaat assigiinngissinnaaqimmat, pineqartut minnerpaamik marlunnik aallartitaqarsinnaanissaat qularnaartariaqarpoq. Taamaattoq aalajangersagaq ima paasineqassanngilaq, instituti teknikkikkut allaffissornikkullu suliaqartunik pinngitsoorani atorfeqartitaqartariaqartoq – tamanna pisariaqartinneqanngippat.

§ 22-mut

Institutini siunnersuisoqatigiinni ilaasortat atorfeqartullu Inatsisartut inatsisaanni maanna atuuttumi ilinniakkami ataatsimiititalianut qinersisarnermisulli qinerneqartassapput. Qinigaasinnaassuseqarnermut taasisinnaatitaanermullu malittarisassat ilinniagartuut siunnersuisoqatigiiffiannut atuuttut aamma matumani atuupput.

Ilisimatusarfiup malittarisassaasigut aalajangerneqassaaq qinersinerit allatigut qanoq piareersarneqarlutillu ingerlanneqartassanersut, piffissarlu qinigaaffik qanoq sivisutigissanersoq. Institutimi siunnersuisoqatigiinni sulinerup ingerlaavarnissaa qularnaarumallugu iluaqutaassaaq suleqataasut ilaasortaatitaat ilinniartut ilaasortaatitaannit sivisunerusumik ilaasortaasarpata.

§ 23-mut

Nalinginnaasumik universitetini ilinniakkat atorfininnisamullu sammisumik bacheloritut ilinniarnerit tamarmik assigiinngitsunik kulturillit, assigiinngitsunik tunuliaqutalinnik ilinniartitsisullit assigiinngitsunillu anguniagalinnik ilinniartoqartut katigunnerisa nassatarisinnaavaat, institutip immikkoortunut mikinerusunut nammineernerusunullu agguarnissaa naleqqunnerusoq, tassuunakkut pissutsit ilinniartitaanerni ataasiakkaani immikkuullarissutaasut ilinniakkap iluani suliarineqarsinnaaqqullugit naammassineqarsinnaaqqullugillu. Immikkoortortaqarfiit ingerlatsinikkut immikkoortutut takorloorneqarput, tassanilu ilinniartitaanerit allaffissornikkut suliassartaat pilersaarusiornerilu imaluunniit immikkoortortaqarfimmi ilisimatusarnikkut ingerlatitseqqinnikkullu suliassat suliarineqartassasut, kisiannili ataqatigiissaarineq tunngaviusumillu aalajangigassat annertunerusumut sunniuteqartussat institutimi suliarineqartassallutik.

Immikkoortortaqarfiit taamaalillutik takorloorneqarput tassaassasut atorfinissutaasinnaasumik bachelorinngorniarluni ilinniakkat ingerlateqqiffii imaluunniit oqaatsinik atuakkialerinermillu bachelorinngorniarfiit kandidatinngorniarfiillu. Aalajangersagaq aqqutigalugu immikkoortortaqarfiup suliassaasa eqaatsumik katiternissaat periarfissinneqarpoq, tassami immikkoortortaqarfimmut ilaasinnaapput ilisimatusarneq ingerlatitseqqinnerlu imaluunniit ilinniartitsineq imaluunniit taakkua tamaasa.

§ 24-mut

Aalajangersakkami aalajangersarneqarpoq immikkoortortaqarfimmi pisortaq tassaasoq immikkoortortaqarfimmik ulluinnarni aqutsisoq. Atorfinissutaasinnaasumik bachelorinngorniarluni ilinniakkanut tunngatillugu immikkoortortaqarfiit suliassaat maanna ilinniarfioreersuni suliaasunit allaanerungaassanngillat, tassami ilinniartitsinermik pilersaarusiorluni soraarummeersitsinernilu suliassat immikkoortortaqarfimmiissapput. Immikkoortortaqarfinni ilisimatusarnermik ingerlatitseqqinnermillu suliaqarfiusuni ulluinnarni pilersaarusiorneq inatsisini maannamut atuuttuni periutsit maliinnarlugit ingerlassaaq.

Imm. 1-4 suliassat eqqartorneqartut immikkoortortaqarfiup suliassaanut naapertuutissapput. Taamaalilluni immikkoortortaqarfimmi pisortap ilisimatusarnermi ingerlatitseqqinnermillu suliaqarfiusuni pilersaarusiornissamut innersuussuteqassanngilaq, immikkoortortaqarfik ilisimatusarnermut tunngasunik suliaqanngippat.

Immikkoortortaqarfiit arlalinnik ilinniagaqarfiusut imaluunniit arlalinnik sammiveqartut, ilinniarnermik ilitsersuisunik suliassat ilaannik suliaqartartussanik toqqaasinnaapput, taamatullu ilinniartunik ilitsersuineq – minnerpaamik atorfinissutaasinnaasumik bacheloritut ilinniakkani – immikkoortortaqarfimmiissalluni ilinniartunut qanittumik inissisimalluni.

Immikkoortortaqarfimmi pisortaq immikkoortortaqarfiup sulisuinut pisortaavoq, kisiannili atorfinitsitsisinnaaneq institutip pisortaaniippoq, tak. § 18, imm. 2. Aammattaaq immikkoortortaqarfimmi pisortaq suleqatigiiaanik suleqatigiissitalianillu pilersitsisinnaavoq aalajangersimasunik suliaqartussanik imaluunniit suliassat nalinginnaasut immikkulluunniit ittut pillugit oqaaseqaateqartartussanik, tassunga ilaallutik institutip aqutsisui siunnersuisoqatigiivilu.

Pissusissamisuussaaq suliamut sammisumik ilinniarfiit – Ilisimatusarfimmut katigunneqartussatut siunnersuutigineqartut – pisortaat immikkoortortaqarfinni pisortatut ivertinneqassappata.

§ 25-mut

Imm. 1-imut

Aalajangersakkami aalajangiunneqarpoq institutit ataasiakkaat ataanni pitsanngorsaanermi pitsaassutsimillu siuarsaanermut siunnersuisoqatigiinnik pilersitsisoqassasoq, tamanna institutimi siunnersuisoqatigiit naleqquttuusorippassuk. Siunnersuisoqatigiit Kalaallit Nunaata avataani universiteteqarfinnit ilinniarfinnillu aamma Ilisimatusarfiup ilinniartuinik atorfinitsitsisartunit ilisimatusarnermilu angusanik atuisunit ingerlaavartumik isumassarsiornissaq peqataaffigissavaat. Tassuunakkut kissaatitut saqqummiunneqakulasoq piviusunngortinneqassaaq, tassalu Ilisimatusarfiup inuiaqatigiit sinnerinut ammarnissaa.

Imm. 2-mut

Aalajangersakkami aalajangersarneqarput pingaarnerusutigut suliassat. Oqaasertaliinermiippoq siunnersuisoqatigiit namminneerlutik oqallisissaminnik saqqummiisinnaasut, taamatuttaaq ilinniagartuut siunnersuisoqatigiiffiata susassaqarfiillu allat siunnersuisoqatigiit qinnuigisinnaavaat pissutsit naapertuuttut misissoqqullugit.

Imm. 3-mut

Atorfinissutaasinnaasumik bachelorinngorniarluni ilinniakkat ilaat ullumikkut siunnersuisartunik ataatsimiititaliaqareerput inerisaanermut pitsaassutsimullu siunnersuisoqatigiinnut assingusunik. Taamaalilluni ilinniartitsisunngorniat ilinniarfianni ilinniartitsisussanik ilinniartitsinermut siunnersuisoqatigeeqarpoq.

§ 26-mut

Pitsanngorsaanermi pitsaassutsimullu siuarsaanermut siunnersuisoqatigiit inuttaqassapput ilaatigut suliamut, ilisimatusarnermut ilinniartitaanermullu tunngasutigut immikkut ilisimasalinnik, institutip susassaqarfiisa iluanneersunik ilaatigullu ilinniartunik atorfinitsitsisartutut soqutiginnitsinit. Ilinniartunik atorfinitsitsisartutut isigineqarput inuussutissarsiutit imaluunniit suliffeqarfiit ilinniartut soraarummeernermik kingorna nalinginnaasumik atorfiniffigisartagaat. Aammattaaq naatsorsuutaavoq susassaqarfiup iluani ilisimatuunik toqqaasoqassasoq. Taakkua Kalaallit Nunaata avataani universitetineersuusinnaapput imaluunniit ingerlatsivinnit pineqartup iluani ilisimatusarnermik ingerlataqartuneersuusinnaallutik.

Aalajangersakkami taamaallaat isummerfigineqarpoq kikkut siunnersuisoqatigiinni ilaasortassanik toqqaasassanersut, ilaasortassatut inassutigineqartut ataasiakkaat piginnaaneqarfigisassaat isummerfigineqaratik. Tamanna ilaasortat ataasiakkaat isumaqatigiinnerisigut pisassasoq naatsorsuutigineqarpoq.

Ilimanarmat institutit assigiinngitsunik angissuseqarlutillu assigiinngitsunik ilinniartitsisassasut assigiinngitsunillu ilisimatusarnikkut ingerlatitseqqinnermilu suliassaqartassasut, naleqqunnerusutut isigineqarpoq pitsanngorsaanermi pitsaassutsimillu siuarsaanermut siunnersuisoqatigiit ataasiakkaat angissusaat pisariaqartitsinermut naleqqussarneqarsinnaappat. Ersippoq siunnersuisoqatigiit minnerpaamik pingasunik annerpaamillu arfineq-marlunnik ilaasortaqassasut.

§ 27-mut

Imm. 1 aamma 2-mut

Ilisimatusarfik maannamutut ukiumoortumik aningaasaliiffigineqartassaaq, Inatsisartut aningaasaqarnermut inatsisaatigut ingerlatsinermut aningaasaliissutitut annertussusilerneqartunik. Aammattaaq siunnersuutip nassatarissavaa, Ilisimatusarfik Naatsorsueqqissaartarfittut Pinngortitaleriffittullu kiffaanngissuseqassammat. Tassuunakkut Ilisimatusarfik aningaasaqarnikkut maanna inatsisiliornermut naleqqiullugu periarfissaqarnerussaaq, taamaalillunilu Ilisimatusarfik suliniutinut avataaniit aningaasaliiffigineqarnissaminut kiisalu kingornussarsisinnaanissamut tunissutisisinnaanissamullu taakkualu nammineerluni atornissaannut periarfissaqalissalluni.

Aalajangersakkami erseqqissarneqanngilaq aningaasaliissutit sumut atorneqassanersut, tamannami ukiut tamaasa Inatsisartut aalajangiiffigisassavaat. Aningaasaliissutit nalinginnaasumik iluanniissapput ilisimatusarnermut ingerlatitseqqinnermullu, ingerlatsinermut allaffissornermullu aamma ilinniartitaanernut Naalakkersuisut Ilisimatusarfiup ingerlatassaatut kissaatigisaannut imaluunnit Ilisimatusarfiup Naalakkersuisut akuersinerisigut neqeroorutigisaanut aningaasaliissutit, tak. § 4, imm. 1 aamma angusaqarnissamik isumaqatigiissummi, tak. § 9, imm. 5, isumaqatigiissutaajunnartut.

Ilinniartitaanerit misilitsinnerillu Naalakkersuisunut isumaqatigiissutaasimasut ilinniartunut maannatuulli akeqassanngillat. Kisiannili ilinniartitsineq, pikkorissarnerit misilitsinnerillu imm. 4 malillugu ingerlatatut isertitaqaataasussatut neqeroorutaasut peqataasunit akileqquneqarsinnaapput. Aningaasaliissutit annertussusaannut tamakkiisumik ilaannakortumilluunniit aalajangiisuutinneqarsinnaapput ingerlassat aalajangersimasut ingerlanneqarnerat imaluunniit anguniakkat aalajangersimasut anguneqarnerat, angusaqarnissaq pillugu Naalakkersuisut Ilisimatusarfiullu akornanni isumaqatigiissummi aalajangersarneqarsimasussat.

Imm. 3-mut

Aalajangersakkap aalajangerpaa Ilisimatusarfik allanit tapiiffigineqarsinnaasoq, kingornussisinnaasoq tunissutisisinnaasorlu. Ilisimatusarfik tunissutisiaminit aningaasaateqarfiliorsinnaavoq, taamaaliorunilu tunissuteqartup kissaatigisai maleruassallugit. Taamatut kingornussat, tunissutisiat aningaasaateqarfinnillu aningaasaliissutit ukiumoortumik naatsorsuutini immikkoortillugit ilanngunneqassapput.

Imm. 4-mut

Immikkut eqqaaneqarpoq Ilisimatusarfik akiliisitsinikkut isertitaqarsinnaasoq. Akiliisitsinikkut isertitat tassaasinnaapput ilinniartitsinermit isertitat, annermik diplomitaarniarluni kandidatitullu ilinniartitsinermeersut, qinnuigineqarluni ilisimatusarnissamik ingerlatsinermeersut, inuutissarsiutinik ingerlatsinermi ph.d-nngortitsiniartarnermik aaqqissuussinermeersut, nunanit allanit ph.d-nngornianeersut imaluunniit suliffeqarfinnit nammineerluniluunniit aningaasalersukkamik ph.d-nngornianeersut.

§ 28-mut

Imm. 1- 3-mut

Aalajangersakkap pingaarnerusutigut Radiukkut TV-kkullu aallakaatitsisarneq pillugu Inatsisartut peqqussutaanni nr. 6, 14. november 2004-meersumi § 37, imm. 1, 2 aamma 4-mi aalajangersakkat assigai. Siunertaavoq aalajangersassallugu Ilisimatusarfik kiffaanngissuseqarneruleraluarluniluunniit aamma tunissutit aningaasaateqarfiillu aqqutigalugit isertitaqarsinnaaleraluarluni, Namminersornerullutik Oqartussat missingersersuutit pillugit maleruaqqusaanni malittarisassat ataanniittuassammat, naatsorsuutillu Namminersornerullutik Oqartussat kukkunersiuisuinit kukkunersiorneqassammata. Aningaasatigut inatsimmi aningaasaliissutit naatsorsuutaat Nunatta Karsiata naatsorsuutaasa ilagaat, taamaammallu inatsisartut nakkutigisassaasa ilagalugit.

Imm. 4-mut

Aalajangersakkap malittarisassat KNR-ip naatsorsuutaasa akuerineqarnissaannut nassiunnissaannullu tunngasut aamma maannamut periusaalersimasut assigai. Ukiumoortumik nalunaarusiornissaq siulersuisut sulinerisa annertunerpaamik ammasuunissaannik kissaateqarnerup ilagaa, tak. siunnersuummi § 10, imm. 2.

§ 29-mut

Ilimmarfik tassaavoq ilisimatusarfeqarfiup ataatsimut taaguutaa, taanna 2007 naatinnagu naammassissasoq ilimagisaavoq. Ilisimatusarfiup ilinniarfiillu saniatigut pilersaarutaavoq Ilimmarfimmiissasut Naatsorsueqqissaartarfik, Groenlandica, Nunatta Toqqorsivia Oqaasileriffillu.

2001-imi Inatsisartut aalajangiineranni piumasaavoq, qitiusumik aqutsisoqarfiliinissaq, tassanilu suliffeqarfiit Ilimmarfimmiittut pisortaat peqataassasut. Aammattaaq piumasaavoq qitiusumik aqutsisoqarfiup ataani allffirssornikkut ingerlatsinikkullu ingerlatsivimmik ataatsimoorussamik pilersitsisoqassasoq, suliffeqarfiit allaffissornikkut, aningaasaqarnikkut ulluinnarnilu suliassanik suliaqartittarsinnaasaannik, assersuutigalugu naatsorsuunerinermik, toqqorsiveqarnermik, kantiinamik ingerlatsinermik, saaffiginnittarfeqarnermik, qarasaasialerinermik aputaajaanermillu ingerlatsisussamik. Ilisimatusarfik Ilimmarfiup illutaanik atuisunit annerpaajusussaammat, siunertamut naapertuuttuuneruvoq, suliffeqarfiit Ilisimatusarfimmik suliassanik pineqartunik suliaqartitsinissamut periarfissiippata, tamanna periarfissaqarlunilu aningaasaqarnikkut iluaqutaappat.

Imm. 2-kkut siunnersuutigineqarpoq illup ingerlanneqarnerani suliassat Ilisimatusarfiup isumagissagai. Siunnersuutigineqarpoq suliassat allat siunnersuummi § 27, imm. 3 naapertorlugu suliatut isertitsissutaasussatut isumagineqassasut. Naapertuuttuussaaq Ilisimatusarfiup suliffeqarfiit ataasiakkaat suliassat taamaattut annertussusissaat akilerneqarnissaallu pillugit isumaqatigiissuteqarfigippagit.

§ 30-mut

Aalajangersakkami pineqarput ilinniartut maalaarnissamut periarfissaat. Maalaarutit tamaasa Ilisimatusarfiup nammineq suliarissavai. Atorfilinnit malaartoqartillugu sulisoqarnermi inatsisit nalinginnaasumik maleruarneqassapput.

Inatsisitigut pisinnaatitaanermut tunngatillugu maalaarutit ilinniartunut nalinginnaasumik tassaasinnaapput ilinnialernissamut tunngasut, soraarummeernissamut tunngatillugu immikkut akuerineqarnissamik itigartitaanerit aamma ilinniartutut inissamik annaasaqarnerit. I praksis vil sådanne sager blive behandlet af direktoratet for uddannelser.

Imm. 4-p imaata isumagaa, maalaarutit ilinniartut imaluunniit sulisut inatsisitigut pisinnaatitaaffiinut tunngassuteqanngitsut, allaffissornikkut oqartussaasunut allanut ingerlatinneqarsinnaanngimmata. Tamanna isumaqarpoq, soraarummeernermi naliliinerit imaluunniit soraarummeernerup ingerlaneranut tunngatillugit maalaarutit Ilisimatusarfiup inaarutaasumik aallajangiiffigineqartassammata.

Siunnersuut Kalaallit Nunaanni ilinniartitaanermik aaqqissuussineq pillugu maalaaruteqarnermi assigiiaartunik malittarisassiuussinissamut periarfissaqartitsivoq.

§ 31-mut

Imm. 1-imut

Siunnersuutigineqarpoq Inatsisartut inatsisaat atuuttuulissasoq 1. august 2008.

Imm. 2-mut

Nalunaarutit, inatsisissatut siunnersuut naapertorlugu atuutsilerneqartussat inatsisissatut siunnersuutip atuutilernerani piareernissaat ilimagineqarsinnaanngimmat, siunnersuutigineqarpoq, nalunaarutit maanna atuuttut atuutiinnarallassasut. Taamaattoq tamatumani pineqanngilaq nalunaarut ataatsimiittartunik qinersinissamut malittarisassanik, Ilisimatusarfiup rektorissaanik tullersortissaanillu qinersisarnermik ilanngussisoq (nr. 7, 2. januar 1990-imeersoq), siunnersuut manna malittarisassanut nutaanut siunnersuutinik imaqarmat, aammalu siunnersuutigineqarmat, qinersisarneq pillugu malittarisassat ersarinnerusut Ilisimatusarfiup malittarisassaasigut aalajangersarneqassasut, suliffeqarfimmut tassungaannaq tunngasuugamik. Taamaammat paasinissaa pissutigalugu nalunaarutip atorunnaarsinnera inatsimmi eqqaassallugu pisariaqarpoq.

Aalajangersakkat atuutiinnartussat makkuupput:

Namminersornerullutik Oqartussat nalunaarutaat nr.4, 2. januar 1990-imeersoq Ilisimatusarfimmi ilinniartitsisut ilisimatuuutullu suleqataasut atorfinitsinneqartarnissat pillugu.

Ilisimatusarfimmi nalileeqataasoqartarnissaa pillugu Namminersornerullutik Oqartussat nalunaarutaat nr. 6, 2. januar 1990-imeersoq.

Ilinniartutut soraarsitaasinnaaneq pillugu Namminersornerullutik Oqartussat nalunaarutaat nr. 8, 2. januar 1990-imeersoq.

Ilinniarfissuarmi ilinniaqqinneq il.il. pillugu Namminersornerullutik Oqartussat nalunaarutaat nr. 23, ulloq 8. juli 1991-imeersoq.

Peqqissaasutut peqqinnissamullu assistentitut ilinniartitaanerit pillugit nalunaarut nr. 36, 27. december 1993-imeersoq.

Ilisimatusarfimmi ilinniagaqarnerit soraarummeertarnerillu pillugit Namminersornerullutik Oqartussat nalunaarutaat nr. 27, 1. september 1995-imeersoq.

Ilinniartitsisussanik ilinniartitsineq katersuutsitaq pillugu Namminersornerullutik Oqartussat nalunaarutaat nr. 19, 31. juli 2000-imeersoq

Isumaginninnermi siunnersortissanik ilinniartitsineq pillugu Namminersornerullutik Oqartussat nalunaarutaat nr. 26, 7. december 2000-imeersoq

Karakteriliisarnermi naleqassutsinik tulleriinnilersuineq allatullu naliliisarneq pillugit Namminersornerullutik Oqartussat nalunaarutaat nr. 14, 9. april 2001-imeersoq.

Tusagassiortunngorniat ilinniartitaanerat pillugu Namminersornerullutik Oqartussat nalunaarutaat nr. 28, 26. juli 2001-imeersoq.

Ph.D-grad pillugu Namminersornerullutik Oqartussat nalunaarutaat nr. 36, 9. oktober 2001-imeersoq.

Ilinniartitsisussanik ilinniartitsineq siammartitaq pillugu Namminersornerullutik Oqartussat nalunaarutaat nr. 8, 24. april 2003-meersoq.

Ilisimatusarfimmi Ilinniaatsinut Institutimi kandidatimut ilinniarnerit pillugit Namminersornerullutik Oqartussat nalunaarutaat nr. 14, 19. maj 2005-imeersoq.

Ilinniaqqittarnerit pillugit Kultureqarnermut Ilinniartitaanermullu Pisortaqarfiup kaajallaasitaa 12/80, 27. marts 1980-imeersoq.

Kalaallit Nunaanni meeqqat atuarfianni ilinniartitsisussanik ilinniartitsisarneq pillugu Kultureqarnermut Ilinniartitaanermullu Pisortaqarfiup kaajallaasitaa 1/85, 10. april 1985-imeersoq.

Ilinniartitsisussatut ilinniartut sungiusarlutik sulisarnerisa ingerlanneqartarnerat pillugu Kultureqarnermut, Ilinniartitaanermut Suliffissaqartitsiniarnermullu Pisortaqarfiup kaajallaasitaa 1/91, 17. januar 1991-imeersoq.

Ilinniartitsisut Danmarks Lærerhøjskole-mi, Ilinniarfissuarmi il.il. pikkorissarnernut peqataaneranni pissutsit tigussaasut pillugit Kultureqarnermut, Ilinniartitaanermut Ilisimatusarnermullu Pisortaqarfiup kaajallaasitaa 3/93, 19. marts 1993-imeersoq.

§ 32-mut

Imm. 1 – 3-mut

Siunnersuutip imarivai aqutsisunut toqqakkanut suleqatigiillu siunnersuisartuinut tunngatillugu ikaarsaariarnermi malittarisassat assigiiaat. Malittarisassat maannamut atuuttut, Ilisimatusarfimmi ataatsimiittartunik qinersinissamut malittarisassanik, Ilisimatusarfiup rektorissaanik tullersortissaanillu qinersisarneq ilanngullugu, Namminersornerullutik Oqartussat nalunaarutaanni nr. 7, 2. januar 1990-imeersumiittut naapertorlugit 2007-imi novemberimi rektorimik qinersisoqassaaq, rektorillu tullersortaa qinerneqassalluni 2008-mi maaji qaammat. Rektori ukiuni pingasuni tullersortaalu ukiumi ataatsimi atuuttussatut qinigassaapput.

Universitetsrådimi studienævnimiluunniit ilinniartut ilaasortaatitaat Ilisimatusarfimmi ilinniartutut allatseqqajunnaarpat, kingoraartissaqanngippallu, ilinniartut ilaasortaatitassaat nutaat qinerneqassapput Ilisimatusarfik pillugu Inatsisartut inatsisaanni nr. 16, 31. oktober 1996-imeersumi maannalu atuuttumi malittarisassat naapertorlugit.

Imm. 4-mut

Siunnersuutip qularnaarpaa, atorfillit allami suliffeqalersut akissarsiatigut atugassarititaasutigullu nikinnginnnissaat, tjenestemanditut, isumaqatigiissutit naapertorlugit nammineerluniluunniit isumaqatigiissutit naapertorlugit atorfeqarnermut tunngasut eqqarsaatigalugit. Ilimagineqarpoq piffissaq suliffik pillugu isumaqatigiittoqassasoq 2007-imi ukiakkut.

§ 33-mut

Imm. 1-mut

Ilaasortat Ilisimatusarfimmeersut aatsaat inatsisip atuutilerneratigut qinerneqarsinnaammata, siunnersuutigineqarpoq siulersuisut kingusinnerpaamik pilersinneqassasut 1. marts 2008. Tamatuma nassatarissavaa rektoritut atorfik 2008-mi inuttalerneqarsinnaassammat, rektorillu tullersortaatut, institutini aqutsisutut immikkoortortaqarfinnilu pisortatut atorfiit rektorip atorfinitsereerneratigut inuttalerneqarsinnaallutik, taamatuttaaq institutinut ilusiliussaq nutaaq aatsaat ukioq ilinniarfiusoq 2008-2009 aallartippat atuutilersinnaassasoq ilimagineqarluni.

Imm. 2-imut

Aalajangersakkap qularnaarpaa Ilisimatusarfiup ingerlaannarsinnaanissaa siulersuisut inissitsiterneqarnissaasa tungaanut. Ilisimatusarfiup siunnersuisartoqatigiivi (universitetsråd) piffissami tassani qinigaasimasut utaqqiisaagallartumik aqutsisuusutut isigineqassapput, taamaammallu Ilisimatusarfiup ingerlanneqarnissaa qularnaarumallugu aalajangigassat pisariaqartut kisiisa aalajangiiffigisinnaasallugit, taakkununnga ilanngullugit suliamut sammisumik ilinniarfiit Inerisaaviullu ilaatilernissaannut tunngatillugu aalajangigassat. Taamaalillutik siunnersuisoqatigiit (universitetsrådi) atorfinitsitsinerit atorfinitsitsinissamilluunniit inassuteqaatit aalajangiiffigisinnaanngilaat angusaqarnissarluunniit pillugu isumaqatigiissusiorsinnaanatik, tak. § 9, imm. 4 aamma 5.

Suliamut sammisumik ilinniarfiit Inerisaaviullu ataatsimooqatigilernissaasa kingunerisaannik siunertamut naapertuuttuuvoq, suliffeqarfiit taakkua pisortaasa universitetsrådimut ilaalernissaat. Suliamut sammisumik ilinniarfiit pineqartut tassaapput Ilinniarfissuaq, Isumaginninnermik Siunnersortinngorniat Ilinniarfiat, Tusagassiornermik Ilinniarfik aamma Peqqissaanermik Ilinniarfik.

Imm. 3-mut

Siunnersuummut peqqutaasut imm. 1-imut peqqutaasut assigaat.

Imm. 4-mut

Suliamut sammisumik ilinniarfiit Inerisaavillu suliffeqarfittut namminersortutut atorunnaassammata suliffeqarfiillu taakkua pillugit inatsisit atorunnaassammata, tak. § 31, imm. 2, siunnersuummi aalajangerneqarpoq, suliffeqarfiit taakkua piffissami ikaarsaariarfiusumi inatsisit atuuttut naapertorlugit iluserisartik attatiinnassagaat, Ilisimatusarfiup nutaamik ilusissaata – instituteqalerluni immikkoortortaqarfeqalerlunilu – 2008-p naanerani inissivinnissaata tungaanut, tak. § 31, imm. 2.