23. oktober 2007 UKA2007/37
Allannguutissatut siunnersuut
uunga
Siunnersuut: Ilisimatusarfik pillugu Inatsisartut inatsisissaat nr. xx, xx.x-imeersoq
Aappassaaneerinermi Naalakkersuisunit saqqummiunneqartoq.
§ 11-mut1. Imm. 2 imatut oqaasertalerneqassaaq:
"Imm. 2. Naalakkersuisut toqqartassavaat avataanit ilaasortat Ilisimatusarfiup pituttuisuunngitsumik innersuussuteqarneratigut. Ilaasortat toqqarneqartassapput inuttut piginnaasaqarnerat tunngavigalugu ukiuni 4-ni ilaasortaasussanngortillugit. Toqqaanermi pingaartinneqassapput suliamut inuttullu pisinnaasat aamma suliffinnik kiisalu ilisimatusarnikkut ilinniartitaanikkullu avatangiiserisanik inerisaanermik misilittakkat, ajornanngippat nunarsuarmut tamarmut sammisut. Toqqagaaqqittoqarsinnaavoq."
§ 12-imut2. Imm. 3 imatut oqaasertalerneqassaaq:
"Imm. 3. Rektori aamma rektorip tullersortaa minnerpaamik kandidatitut ilinniarsimasuussapput Ilisimatusarfiup ilinniagassatut sammisaasa arlaanni aamma Kalaallit Nunaanni pissutsinik ilisimasaqassapput ilinniartitaanermullu pissutsinik paasisimasaqassallutik. Aammattaaq rektori ilisimatusarnermik ilinniatitaanermillu sammisaqarfinnik aqutsinermik inerisaanermillu misilittagaqassaaq."
§ 19-imut3. Aalajangersagaq imatut oqaasertalerneqassaaq:
"§ 19. Institutimi aqutsisoq aqutsisuuffissaminut naapertuuttumik ilinniagartuujussaaq, ilinniagassami ilinniarsimasamini, ilinniartitsinermillu misilittagaqassalluni."
Inatsisissatut siunnersuummut oqaaseqaatit
Oqaaseqaatit nalinginnaasut
Allannguutissatut siunnersuut allannguutinik Inatsisartut Kultureqarnermut Atuartitaanermullu Ataatsimiititaliaata siunnersuutip aappassaaneerneqarneranut atatillugu isumaliutissiissutaani tunngavilerneqartunik allannguutinik imaqarpoq. Partiini amerlanerussuteqartut Siumumeersut, Atassummeersut Inuit Ataqatigiinneersullu inatsisissatut siunnersuummi anguniarneqartut taperserpaat.
Ilisimatusarfiup siulersuisuisa katitigaanerat Kultureqarnermut Atuartitaanermullu Ataatsimiititaliap eqqummaariffigisimavaa. Universitetsråd-imut maanna qullerpaamik aqutsivittut atuuttumut siulersuisut taartaanissaannik Naalakkersuisut siunnersuuteqarnerat Ataatsimiititaliap isumaqatigaa. Naalakkersuisut siulersuisunut ilaasortanik avataaneersunik toqqaasarnissaasa Ilisimatusarfimmit pituttuisuunngitsumik innerssuussut aallaavigalugu pisarnissaat Ataatsimiititaliap ilanngullugu pingaartuutippaa. Tamanna tunngavigalugu Naalakkersuisut ataatsimiititaliap isumaqatigiittup kissaataa naapertorlugu allannguutissatut siunnersuummik ilanngussipput.
Ataatsimiititaliami amerlanerussuteqartut Siumumeersut, Atassummeersut Inuit Ataqatigiinneersullu rektorip aamma rektorip tullersortaata minnerpaamik Ilisimatusarfimmi fagini ilinniartitsissutigineqartuni kandidatitut ilinniarsimassuunissaa pillugu allannguutissatut siunnersuummik saqqummiussipput. Amerlarnerussuteqartut pineqartut aamma institutimi aqutsisup aqutsisussaaffimminut naapertuuttumik ilinniagartuujunissaa pillugu allannguutissatut siunnersuummik saqqummiussipput.
Allannguutissatut siunnersuut pisortanut namminersorlutilluunniit inuussutissarsiortunut aningaasatigut allaffissornikkullu kinguneqaateqassanngilaq.
Aalajangersakkanut ataasiakkaanut oqaaseqaatit
nr. 1-mutAalajangersakkamik allanngortitsinerup nr. 1-mik ilanngussineq kinguneraa, tamatumalu kingornatigut Naalakkersuisut Ilisimatusarfimmit pituttuisuunngitsumik innersuussuteqarneq aallaavigalugu siulersuisunut ilaasortanik avataaneersunik toqqaasassapput.
Siulersuisunut ilaasortanik avataaneersumik pituttuisuunngitsumik innersuussuteqarneq ima paasineqassaaq Naalakkersuisut sukkulluunniit Ilisimatusarfimmit innersuussutigineqanngitsunik siulersuisuni ilaasortanik toqqaasinnaasut.
nr. 2-mutRektorip akuerisaasumik ilisimatusartuunginnissaa, taamaattorli rektorip rektorillu tullersortaata Ilisimatusarfiup fagiini minnerpaamik kandidatiunissaat aammalu Kalaallit Nunaanni pissutsinut ilisimasaqartuullunilu ilinniartitaanermi tunngasunik ilisimasaqarnissaa allannguutissatut sinnersuutigineqartup kinguneraa.
Rektorip rektorillu tulliata minnerpaamik Ilisimatusarfiup fagiisa ilaanni kandidatiunissaat qulakkeerniarlugu allannguutissatut siunnersuusiortoqarpoq. Rektoritut rektorillu tullersortaanik akuerisaasumik ilisimatusartuunngitsunik, taamaattorli kandidatitut naleqquttumik ilinniagaqartunik, ilinniartitsinermullu tunngasuni ilisimasaqarlutillu ilisimatusarnermi ilinniartitsinermullu tunngasuni aqutsinermik ineriartortitsinermillu misilittagalinnik toqqaaniarnermi mattussinnginnissaq anguniarlugu aalajangersagaq manna ilanngunneqarpoq.
nr. 3-mutInstitutini maanna pisortaasut pisortanngorumaartussallu fagiminnut naapertuuttumik ilinniagartuujunissaat institutinilu aqutsisut fagiminni ilinniartitsinermik misilittagaqarnissaasa qulakkeerneqarnissaa allannguutissatut siunnersuutip kingunerissavaa.
Aammattaaq atorfinissutaasinnaasunik ilinniarfinni aqutsisut kiisalu institutini pioreersuni maanna aqutsisut institutini pisortatut atuutiinnarsinnaanerannut mattunneqannginnissaat allannguutissatut siunnersuutigineqartup qulakkiissavaa.