11. november 2007

UKA 2007/36

 

Kulturikkut eriagisassat eqqissisimatitaanerat pillugu Inatsisartut inatsisissaattut siunnersuut

pillugu

Inatsisartut Kultureqarnermut Ilinniartitaanermullu Ataatsimiititaliaata

ILASSUTITUT ISUMALIUTISSIISSUTAA

Inatsisissatut siunnersuutip aappassaaneerneqarnerani saqqummiunneqartoq

Inatsisartut Kultureqarnermut Ilinniartitaanermullu Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Kristian Jeremiassen, Atassut, siulittaasoq
Inatsisartunut ilaasortaq Ruth Heilmann, Siumut, siulittaasup tullia
Inatsisartunut ilaasortaq Doris Jakobsen, Siumut
Inatsisartunut ilaasortaq Juliane Henningsen , Inuit Ataqatigiit
Inatsisartunut ilaasortaq Lene Knüppel, Demokraatit
Inatsisartunut ilaasortaq Otto Jeremiassen, Siumut (sinniisussaq)
Inatsisartunut ilaasortaq Johan Lund Olsen, Inuit Ataqatigiit (sinniisussaq)

UKA 2007-imi siullermeerinerup kingorna Inatsisartut Kultureqarnermut Ilinniartitaanermullu Ataatsimiititaliaat inatsisissatut siunnersuummut isumaliutissiissuteqarpoq, isumaliutissiissummi ataatsimiititaliap Naalakkersuisut kaammattorpai qanganisarsiornikkut misissuinerit aallaavittut isigalugu Landskarsimit aningaasalersorneqartarnissaannik imaqartumik allannguutissatut siunnersuummik saqqummiusseqqullugit.

Naalakkersuisulli aappassaaneerinissamut akissuteqaataat qanganisarsiornikkut misissuinerit Landskarsimit akilerneqartarnissaasa Naalakkersuisunit isumaqatigineqannginneranik imaqartoq paasigamiuk inatsisissatut siunnersuutip Inatsisartunit aappassaaneerneqarnissaata kinguartinneqarnissaa ataatsimiititaliap Inatsisartut Siulittaasoqarfiannut qinnutigaa. Tamatuma kingorna ataatsimiititaliaq Naalakkersuisunut arlalinnik apeqquteqarpoq. Ataatsimiititaliap apeqqutai Naalakkersuisullu akissutaat ilanngussatut ilanngunneqarput.

Naalakkersuisut akissutaat ataatsimiititaliami amerlanerussuteqartut Siumup, Atassutip Inuit Ataqatigiillu tusaatissatut tiguaat. Tamanna tunngavigalugu Naalakkersuisut isumaqatigineqartut aammalu allamik oqaaseqaatissaqartoqanngitsoq amerlanerussuteqartunit oqaatigineqassaaq.

Tamanna tunngavigalugu inatsisissatut siunnersuut akuersissutigineqassasoq ataatsimiititaliami amerlanerussuteqartut inassutigaat.

Ataatsimiititaliami ikinnerussuteqartut Demokraatit Naalakkersuisut akissuteqaataat naammaginartinngilaat, taamaattumillu qanganisarsiornikkut misissuinerit Landskarsimit akilerneqartarnissaannik isummiussatik siusinnerusukkut saqqummiunneqartut aalajangiusimallugit.

Tamanna tunngavigalugu inatsisissatut siunnersuut itigartinneqassasoq ataatsimiititaliami ikinnerussuteqartut inassutigaat.

Taama oqaaseqarluni Inatsisartut Kultureqarnermut Ilinniartitaanermullu Ataatsimiititaliaata inatsisissatut siunnersuut aappassaaniigassanngortippaa.

 

	Kristian Jeremiassen Siulittaasoq
Ruth Heilmann		Otto Jeremiassen
Johan Lund Olsen		Lene Knüppel

 

Ilanngussaq 1

Ilanngussaq 2