21. oktober 2007

UKA 2007/36

 

Kulturikkut eriagisassat eqqissisimatitaanerat pillugu Inatsisartut inatsisissaattut siunnersuut

pillugu

Inatsisartut Kultureqarnermut Ilinniartitaanermullu Ataatsimiititaliaata

ISUMALIUTISSIISSUTAA


Aalajangiiffigisassatut siunnersuutip aappassaaneerneqarnerani saqqummiunneqartoq


Inatsisartut Kultureqarnermut Ilinniartitaanermullu Ataatsimiititaliaat suliarinninnermini makkuninnga inuttaqarpoq:


Inatsisartunut ilaasortaq Kristian Jeremiassen, Atassut, siulittaasoq
Inatsisartunut ilaasortaq Ruth Heilmann, Siumut, siulittaasup tullia
Inatsisartunut ilaasortaq Doris Jakobsen, Siumut
Inatsisartunut ilaasortaq Juliane Henningsen , Inuit Ataqatigiit
Inatsisartunut ilaasortaq Lene Knüppel, Demokraatit


UKA 07-imi ulloq 3. oktober 2007-imi siullermeerinerup kingorna Inatsisartut Kultureqarnermut Ilinniartitaanermullu Ataatsimiititaliaata inatsisissatut siunnersuut misissorpaa.

Siunnersuutip imarisai

Kulturikkut eriagisassat tigussaasut pillugit inatsisip nutarterneqarnissaa inatsisissatut siunnersuutikkut siunertarineqarpoq, taamaalilluni kulturikkut eriagisassat tammatsaaliorneqarnissaasa qanganitsallu eriagisassat pillugit ilisimasanik katersinissap qulakkeerneqarnissaata sallutinneqarnissaat ilutigitillugu assaanissamut sanaartornissanullu periarfissiisoqassalluni.

Tusarniaaneq

Siunnersuut piffissami 23. november 2006-imit 2. januar 2007-imut tusarniaassutigineqarpoq, tamanna juullimut ukiortaamullu atatillugu inuppassuit feeriartarnerat eqqarsaatigalugu sivikinnerpaamik piffissaliinertut isigineqarsinnaalluni. Tusarniaanermit akissutit kalaallisut danskisullu nuutinneri ataatsimiititaliamit tiguneqarput.

Tusarniaanermit akissutini arlalinni makku annermik sammineqarsimasut ataatsimiititaliap maluginiarpaa:

Tusarniaanermi akissutit tunngavigalugit ataatsimiititaliaq Ilaqutariinnermut, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisumut arlalinnik apeqquteqarpoq, taakkununngalu akissutit ataatsimiititaliamit tiguneqarput (ilanngussaq 1 aamma 2).

Ataatsimiititaliap siunnersuummut oqaaseqaatai

Suliassaqarfimmi inatsimmik atuuttumik nutarterinissamik siunertaq inatsisissatut siunnersuusiornermi aallaavigineqartoq Inatsisartuni partiinit tamanit taperserneqarmat Kultureqarnermut Ilinniartitaanermullu Ataatsimiititaliap nuannaarutigaa. Kulturikkut eriagisassaatitsinnik tammatsaaliuinissarput illersuinissarpullu ataatsimiititaliamit assut pingaartinneqarpoq, minnerunngitsumik siunissami kinguaassagut eqqarsaatigalugit.

Aammattaaq Nunatta Katersugaasiviata suliassaqarfimmi suliatigut immikkut ilisimasaqartutut inissisimanissaa aammalu Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfiup naammagittaalliuuteqartarfittut atuunissaa inatsisissatut siunnersuutikkut aalajangersarneqarmat ataatsimiititaliamit pitsaasutut isigineqarpoq. Maltamik isumaqatigiissummik akuersisinnaanitsinnik inatsisissatut siunnersuut kinguneqassaaq, tamannalu Kalaallit Nunaannut immikkut iluaqutissarsiffiusussatut ataatsimiititaliamit isigineqarpoq. Piffissami suliassaqarfiit amerlanerujartuinnartut nunat tamalaat akornanni atuuttussanik aalajangersaavigineqarfianni nunarsuarmioqataavugut, tassungalu ilaavoq inatsisiliorneq.

Aningaasanik amerlanerusunik atugassiisoqanngippat inatsisissatut siunnersuummi anguniakkatut aalajangersakkat eqquutsinneqarsinnaanngitsut Nunatsinni Katersugaasiviit Kattuffiat Nunattalu Katersugaasivia tusarniaanermut akissumminni tikkuaraat ataatsimiititaliap maluginiarpaa. Aningaasaqarnikkut kingunerisassat tamakkiisumik nassuiaavigineqanngitsut tusarniaanermut akissutini arlalinni tikkuarneqarpoq.

Taamaattumik inatsisissatut siunnersuummut nassuiaatini aningaasaqarnikkut kingunerisassat Naalakkersuisut erseqqissumik nassuiaatiginngimmatigit ataatsimiititaliap ajuusaarutigaa. Inatsisissatut siunnersuummi ingerlatassat aningaasalersorneqarnissaannut immikkut atugassiissutigineqartussatut kontomi pingaarnermi 40.14.11-mi, Nunatta Katersugaasivianut Allagaateqarfianullu tunngasumi, aningaasanik immikkoortitsisoqartoq Naalakkersuisut paasissutissiipput, naatsorsuinermili tunngavik nassuiaatiginagu.

Kiisalu inatsisissatut siunnersuut inuussutissarsiornermik ingerlataqartunut aningaasaqarnikkut annertunerusumik kinguneqassannginnerarlugu Naalakkersuisut naliliinerat atatsimiititaliamit isumaqatigineqanngilaq. Ukiuni makkunani aatsaat taamak annertutigisumik nunatsinni sanaartortoqarpoq, inuussutissarsiornermillu ingerlatsisunut namminersortunut sinaakkutissat pitsaanerpaat sanarfineqassasut Naalakkersuisut namminneq ersarissumik oqariartuutigaat. Tamanna tunngavigalugu inuussutissarsiornermik ingerlataqartunik tapersersuinissamik Naalakkersuisut ersarissumik oqariartuutaata aammalu qanganisarsiornikkut misissuinernik qaammatit 18-it angullugit sivisussuseqarsinnaasunik sanaartortitsisut namminersortut namminneq akiliisarnissaannik inatsisissatut siunnersuummi piumasaqaatip akornanni imminut ataqatigiinngittoqartoq ataatsimiititaliaq isumaqarpoq.

Tassunga atatillugu uparuaatit siuliani taaneqartut siunnersuutip Inatsisartut ataatsimiittarfianni siullermeerneqarnerani Ilaqutariinnermut, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisumit taperserneqartut ataatsimiititaliap maluginiarpaa. Qanganisarsiornikkut misissuinerit ingerlanneqarnissaannut qaammatinik 18-inik § 10, imm. 2-mi killiliineq sivisunerpaaffissatut aalajangersarneqartoq aammalu nunatsinni silap pissusaa eqqarsaatigalugu taamak killiliisoqartoq Naalakkersuisunut ilaasortap pingaarnertut erseqqissarpaa. Misissuineq qaammatinik 18-inik pinngitsoorani sivisussuseqartariaqanngilaq, Nunattali Katersugaasivia inatsisissatut siunnersuutikkut taamak periarfissinneqarpoq.

Naalakkersuisunut ilaasortap oqaaseqaatai ataatsimiititaliami amerlanerussuteqartut Siumumeersut, Atassummeersut Inuit Ataqatigiinneersullu tusaatissatut tiguaat.

Sanaartortitsisut eqqarsaatigalugit piffissaliunneqartup qaammatinit 18-init qaammatinut 12-inut sivikillineqarnissaa ikinnerussuteqartut Demokraatit kissaatigigaluarpaa.

Sanaartortitsisut qanganisarsiornikkut misissuinernik namminneq akiliisarnissaasa inatsisissatut siunnersuummi maanna allanneqarsimanera eqqarsaatigalugu assaanernik annikinnernik aningaasalersuinissamut aningaasalersueqataanissamulluunniit aningaasanut inatsimmi aningaasanik immikkoortitsisoqartoq Naalakkersuisunut ilaasortap tikkuarpaa. Aammattaaq qangarnisarsiornikkut misissuinernut aningaasartuutit kikkunnit akilerneqartarnissaat pillugu apeqqummik erseqqissaaneq pineqartoq Naalakkersuisunut ilaasortap erseqqissaatigaa. Naalakkersuisunut ilaasortap isumaa malillugu annertunerusumik sanaartortoq aamma tassaasariaqarpoq qanganisarsiornikkut misissuinernut aningaasartuutinik aamma akiliisussaq.

Ataatsimiititaliap isumaqatigiittup Naalakkersuisunut ilaasortaq tamatumani isumaqatiginngilaa isumaqarlunilu qanganisarsiornikkut misissuinerit tamaasa aallaavittut isigalugu Landskarsimit akilerneqartariaqartut. Eriagisassanik tammatsaaliuineq qanganisarsiornikkullu misissuinerit nunatsinni maanna siunissamilu innuttaasunit tamanit attuumassuteqarfigineqarlutik nunatsinni inuiaat ataatsimut susassaqarfigimmatigit ataatsimiititaliap tamatumani tunngavilersuutigaa, taamaattumillu taakku aamma Landskarsimit aningaasalersorneqartariaqartutut isigalugit. Kommunilli sanaartortitsisullu namminersortut qanganisarsiornikkut misissuinernik namminneq aningaasalersuerusuttut taamaaliornissaminnut periarfissinneqarnissaat ataatsimiititaliamit ammaffigineqarpoq.

Taamaattumillu aallaavittut isigalugu qanganisarsiornikkut misissuinernik tamanik Landskarsip aningaasalersuisarnissaanik tamatumalu peqatigisaanik kommunit sanaartortitsisullu namminersortut tamanna pitsaaqutissaqartutut isigigunikku qanganisarsiornikkut misissuinernik namminneq aningaasalersuisinnaanerat ilanngullugu imaqartumik allannguutissatut siunnersuummik Naalakkersuisut saqqummiusseqqullugit ataatsimiititaliamit isumaqatigiittumit kaammattorneqarput.

Ataatsimiititaliap inassuteqaatai

Siuliani allassimasunik oqaaseqarluni ataatsimiititaliap kaammattuutaanut naapertuuttumik Naalakkersuisut allannguutissatut siunnersuummik saqqummiussereerpata siunnersuut iluserilikkamisut iluseqartoq akuersissutigineqassasoq ataatsimiititaliap isumaqatigiittup inassutigaa.

Taama oqaaseqarluni Inatsisartut Kultureqarnermut Ilinniartitaanermullu Ataatsimiititaliaata siunnersuut aappassaaniigassanngortippaa.

 

Kristian Jeremiassen
Siulittaasoq
 

Ruth Heilmann
Siulittaasup tullia

  

Doris Jakobsen
 

Juliane Henningsen

  

Lene Knüppel