11. november 2007 UKA 2007/12
UPA 2007/50
Tusagassiuisarnermi akisussaassuseqarneq pillugu Inatsisartut inatsisissaattut siunnersuut
pillugu
Inatsisartut Kultureqarnermut Ilinniartitaanermullu Ataatsimiititaliaata
ILASSUTITUT ISUMALIUTISSIISSUTAA
Inatsisissatut siunnersuutip pingajussaaneernerani saqqummiunneqartoq
Inatsisartut Kultureqarnermut Ilinniartitaanermullu Ataatsimiititaliaat suliarinninnermini ukuninnga inuttaqarpoq:
Inatsisartunut ilaasortaq Kristian Jeremiassen, Atassut, siulittaasoq
Inatsisartunut ilaasortaq Ruth Heilmann, Siumut, siulittaasup tullia
Inatsisartunut ilaasortaq Doris Jakobsen, Siumut
Inatsisartunut ilaasortaq Juliane Henningsen , Inuit Ataqatigiit
Inatsisartunut ilaasortaq Lene Knüppel, Demokraatit
Inatsisartunut ilaasortaq Otto Jeremiassen, Siumut (sinniisussaq)
Inatsisartunut ilaasortaq Johan Lund Olsen, Inuit Ataqatigiit (sinniisussaq)
UPA 2007-imi siullermeerinerup kingorna Inatsisartut Kultureqarnermut Ilinniartitaanermullu Ataatsimiititaliaat inatsisissatut siunnersuummut isumaliutissiissuteqarpoq.Inatsisissatut siunnersuutip aappassaaneerneqarnissaanut Naalakkersuisut allannguutissatut siunnersuummik Tusagassiuisarneq pillugu Aalajangersaasarfimmi siulittaasup inatsisilerituujunissaanik imaqartumik saqqummiussipput. Kiisalu Tusagassiuisarneq pillugu Aalajangersaasarfiup allatut katitigaanissaa ataatsimiititaliap isumaliutissiissummini siunnersuutigaa. Ataatsimiititaliap isummernera Naalakkersuisunit isumaqatigineqanngilaq Naalakkersuisullu tassunga allannguutissatut siunnersuummik saqqummiussaqanngillat. Pineqaatissiissutissanut aalajangersakkanik aalajangersaanissamut Naalakkersuisut oqartussaassuseqarnerat pillugu Inatsisartunut ilaasortaq Anthon Naalakkersuisunut apeqquteqarpoq. Inatsisissatut siunnersuutip aappassaaneerneqarnerata kingorna tassunga Naalakkersuisut akissuteqaataat ataatsimiititaliamit tiguneqarpoq, taannalu ilanngussaq 1-itut ilanngunneqarpoq.
Naalakkersuisut oqaaseqaataat aammalu Inatsisartunut ilaasortamut akissutaat ataatsimiititaliami amerlanerussuteqartut Siumup, Atassutip Inuit Ataqatigiillu tusaatissatut tiguaat. Tamanna tunngavigalugu Naalakkersuisut isumaqatigineqartut aammalu allamik oqaaseqaatissaqartoqanngitsoq amerlanerussuteqartunit oqaatigineqassaaq.
Tamanna tunngavigalugu Naalakkersuisut allannguutissatut siunnersuutaat akuersissutigineqassasoq ataatsimiititaliami amerlanerussuteqartut inassutigaat.
Tamatuma saniatigut allannguutissatut siunnersuutip akuersissutigineqarnerata kingorna inatsisissatut siunnersuut iluserilikkamisut iluseqarluni akuersissutigineqassasoq ataatsimiititaliami amerlanerussuteqartut inassutigaat.
Ataatsimiititaliami ikinnerussuteqartut Demokraatit Naalakkersuisut akissuteqaataat naammaginartinngilaat, taamaattumillu Tusagassiuisarneq pillugu Aalajangersaasarfimmi Landsdommerip siulittaasuunissaanik aammalu ataatsimiititaliap katitigaanerata allanngortinneqartariaqarneranik isummiussatik siusinnerusukkut saqqummiunneqartut aalajangiusimallugit.
Kiisalu isumaqarlutik oqartussaassuseq pillugu apeqqutit Inatsisinik Atortitsinermut Ministereqarfimmit akineqarnissaasa tungaannut inatsisissatut siunnersuutip pingajussaaneerneqarnissaa kinguartinneqartariaqartoq.
Tamanna tunngavigalugu Naalakkersuisut allannguutissatut siunnersuutaat taamatullu inatsisissatut siunnersuut itigartitsissutigineqassasut ataatsimiititaliami ikinnerussuteqartut inassutigaat.
Taama oqaaseqarluni Inatsisartut Kultureqarnermut Ilinniartitaanermullu Ataatsimiititaliaata inatsisissatut siunnersuut pingajussaaniigassanngortippaa.
Kristian Jeremiassen
SiulittaasoqRuth Heilmann
Siulittaasup tullia
Otto JeremiassenJohan Lund Olsen
Lene Knüppel