7. november 2007

UKA 2007/12 UPA 2007/50

 

Allannguutissatut siunnersuut

Siunnersuut: Tusagassiuisarnermi akisussaassuseqarneq pillugu Inatsisartut inatsissaat nr. xx xx-imeersoq

Aappassaaneerneqarnissaanut Naalakkersuisunit saqqummiussaq.

 

§ 41-mut

1. Imm. 1. oqaaseqatigiit aappaat imatut oqaasertalerneqassaaq:
"Naalakkersuisut siulittaasoq inatsisilerituujusussaq toqqassavaat.".

§ 50-imut

2. Aalajangersagaq imatut oqaasertalerneqassaaq:
"§ 50. Tusagassiuutit pillugit aalajangiisartut aalajangigaat allaffissornikkut oqartussaasumut allamut suliassanngortinneqarsinnaanngilaq.".

§ 52-imut

3. Aalajangersagaq imatut oqaasertalerneqassaaq:
"§ 52. Tusagassiuutit pillugit aalajangiisartut isumaqatiginninniarfigereerlugit taakku suleriaasissaat Naalakkersuisut aalajangersassavaat.
Stk. 2. Tusagassiuutit pillugit aalajangiisartut allatseqarfimmit ikiorserneqassapput.
Stk. 3. Tusagassiuutit pillugit aalajangiisartut sulinerannut tunngatillugu, tassani ilanngullugu allatseqarfimmut aningaasartuutit Namminersornerullutik Oqartussanit akilerneqassapput."

§§ 55-imut aamma 56-imut

4. § 55 –imi aamma § 56 –imi allanngortinneqassaaq "1. juli 2007" imaalillugu: "1. januar 2008".

 

Oqaaseqaatit

Nr. 1-imut

Allannguisoqassaaq qulakkeerniarlugu Tusagassiuutit pillugit aalajangiisartut ataatsimut isigalugit inatsisilerinermik immikkut ittumik paasisimasaqarnissaat, ilaatigut tamanna pissutaaqataassalluni Tusagassiuutit pillugit aalajangiisartut kiffaanngissuseqartuaannarnissaat. Allannguineq imatut paasineqassaaq Tusagassiuutit pillugit aalajangiisartut siulittaasuannut piumasaqaatit ullumikkut piumasaqaataasutut iinnassasut.

Nr. 2-mut

Allannguisoqarpoq siunertaralugu Tusagassiuutit pillugit aalajangiisartunut tunngatillugu Inatsisartut Ombudsmandiata oqartussaanera pillugu nangaassutit nalornissutillu piiarniarlugit.

Ullumikkut Tusagassiuutit pillugit aalajangiisartunut aammalu Radio tv-lu pillugit aalajangiisartunut atuuttut assigalugit, Radiukkut tv-kkullu aallakaatitsisarneq pillugu Inatsisartut peqqussutaani atuuttumi § 47 naapertorlugu, siunnersuutigineqarpoq, Tusagassiuutit pillugit aalajangiisartut aalajangigaat allaffisornikkut oqartussaasunut allanut suliassanngortinneqarsinnaassanngitsut. Akerlianilli akissuteqaatitut tusagassiisarnermilu ileqqorissaarneq pillugu suliani aalajangiisartut missiliuutigisimasaat eqqartuussivinnut suliassanngortinneqarsinnaapput, tunngaviatigut takuuk inatsisini tunngaviusuni § 63. Akornutissaqartinneqanngilaq naammagittaalliuutinik Tusagassiuutit pillugit aalajangiisartunut saqqummiussisoqartarnissaa aammalu tamatumunnga peqatigitillugu eqqartuussivinnut suliassanngortitsisoqarsinnaanera. Tusagassiorfik pineqartoq pillugu aalajangigaq eqqartuussivinnut suliassanngortinneqaraangat, tamanna kinguartinneqarsinnaassanngilaq, aalajangiineq innuttaasunit akerlilerneqarsinnaasarani imaluunniit akissutip tamanut ammasumik tusarliunnissaanut pisussaaffik akerlilerneqarsinnaasarani.

Nr. 3-mut

Allannguutissatut siunnersuut malillugu Tusagassiuutit pillugit aalajangiisartut sulineranni aningaasartuutit pisarnertut Naalakkersuisunit akilerneqartassapput. Tassa allannguutissatut siunnersuut aqqutigalugu inatsisitigut tunngavissatut siunnersuut Naalakkersuisut tusagassiorfinnik Tusagassiuutit pillugit aalajangiisartunut aningaasartuutinik akiliisussanngortitsisinnaanerat atorunnaassaaq.

Allannguutissatut siunnersuut malittarisassanut atuuttunut tunngatillugu aningaasaqarnikkut allaffissornikkullu kinguneqassanngilaq.

Imm. 1

Aalajangersagaq oqaatsinik erseqqissaatitaqarpoq, tassa erseqqissisinneqassammat, Naalakkersuisut siunissami Tusagassiuutit pillugit aalajangiisartut isumaqatiginninniarfigereerlugit taakku suleriaasissaat malittarisassiuuttalissammassuk.

Imm. 2 aamma 3

Aalajangersakkami oqaatigineqarpoq Tusagassiuutit pillugit aalajangiisartut sulinerannut, tassani ilanngullugu aalajangiisartut allattoqarfiannut aningaasartuutit Namminersornerullutik Oqartussaniinnaq akilerneqartassasut.

Nr. 4-mut

Inatsisissatut siunnersuutip oqaluuserineqarnerata inatsisartut ataatsimiinneri arlallit aqqusaarsimammagit ullup atuutilerfissaata allanngortinnissaa pisariaqalersimavoq.