24. oktober 2007

UKA 2007/49

 

Unammilleqatigiinneq pillugu inatsisissatut siunnersuut

pillugu

Inatsisartut Inuussutissarsiornermut Ataatsimiititaliaata

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

Inatsisartut Inuussutissarsiornermut Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Emilie Olsen, Atassut (siulittaasup tullia)
Inatsisartunut ilaasortaq Vittus Mikaelsen, Siumut
Inatsisartunut ilaasortaq Esmar Bergstrøm, Inuit Ataqatigiit
Inatsisartunut ilaasortaq Doris Jakobsen, Siumut (sinniisussaq)
Inatsisartunut ilaasortaq Lene Knüppel, Demokraatit (sinniisussaq)

Siunnersuutip UKA 2007-imi siullermeerneqarnera tunngavigalugu inatsisissatut siunnersuut, inatsimmut nassuiaatit tusarniaanermillu atortut Inatsisartut Inuussutissarsiornermut Ataatsimiititaliaata misissorpai. Siunnersuutip aappassaaneerneqarnissaanut ilusiliinikkut annikinnerusumik iluarsiinertalimmik allannguutissatut siunnersuummik Naalakkersuisut saqqummiussilersaartut ataatsimiititaliap maluginiarpaa. Allannguutissatut siunnersuut taanna apeqqutaatillugu isumaliutissiissummi matumani isummersuutini ataatsimiititaliap saqqummiuppai.

Tusarniaaneq.

Siunnersuut piffissami 2007-imi 24. aprilimit 15. majimut tusarniaassutigineqarpoq. Tusarniaanermit akissutit kiisalu tusarniaaneq pillugu allakkiap Inuussutissarsiornermut Pisortaqarfimmit suliarineqartup nuutinneri Inuussutissarsiornermut Ataatsimiititaliap tiguai.

Suliffeqarfik unnammillertuusoq Sparbanken pinnagu Grønlandsbankip tusarniarnissaa Naalakkersuisut toqqarsimammassuk Inatsisartut Inuussutissarsiornermut Ataatsimiititaliaata tupigusuutigaa.

Aammattaaq inatsisissatut siunnersuummik isummernissaminnut tusarniaaffigineqartut naammattumik piffissaqartinneqarsimanngitsut Inuussutissarsiornermut Ataatsimiititaliaq isumaqarpoq. Tusarniaanermi piffissaliunneqartoq sapaatip akunnerinit tallimanit sivikinnerusariaqanngilaq, pingaartumik KANUKOKA tusarniarneqartunut ilaatigullu. Kattuffiup aalajangiiniartarnera eqqarsaatigalugu allamik aalajangersimasumik isumaqatigiissuteqartoqartinnagu tusarniaanermi piffissaliunneqartut sapaatip akunnerinit tallimanit sivikinnerussanngitsut KANUKOKA-p Namminersornerullutik Oqartussanut arlaleriarluni siusinnerusukkut erseqqissaatigisimavaa.

Matumani inatsit pingaarneq pisariusoq inuussutissarsiornermut annertuumik pingaarutilik pineqarpoq, taamaattumillu tusarniaanermut piffissaliussaq sivikillisinnagu tusarniaaffigineqartut sivisunerusumik piffissalerneqarsimasariaqaraluarput.

Tusarniaanermut sivikinnerusumik piffissaliisoqarsimatillugu nalinginnaasumik nassuiaatini immikkoortup "Pisortaqarfiit kattuuffiillu il.il. tusarniaavigineqarnerat" ataani periuserisatik tamakkiisumik Naalakkersuisut tunngavilersortassagaat Inuussutissarsiornermut Ataatsimiititaliap naatsorsuutigaa. Tamannali pisimanngilaq.

Nassuiaatigineqartut tunngavigalugit inatsisissamik piareersaalluni suliaqarneq amigaateqartoq Inuussutissarsiornermut Ataatsimiititaliaq isumaqarpoq.

Siunnersuutip Inatsisartunit siullermeerneqarnera.

Inatsisartuni siullermeerinermi siunnersuut partiimit Siumumit maannangaaq ilassilluarneqarpoq, partiilli oqaaseqartartuisa sinneri allannguutissanik akissuteqaatinilluunniit itisilikkanik kissaatigineqarlutik.

Tamanna tunngavigalugu Inuussutissarsiornermut, Suliffeqarnermut Inuussutissarsiutinullu Ilinniartitaanernut Naalakkersuisoq akissuteqaammik 15. oktober 2007-imeersumik nassiussaqarpoq, taanna isumaliutissiissummut matumani pineqartumut ilanngussaq 1-itut ilanngunneqarpoq. § 2, imm. 6 naapertorlugu pisortat maleruagassiaminnik nalunaarutiginnittussaatitaanerannik apeqqutip Nunatta Eqqartuussivianut suliassanngortinneqarsinnaanissaa qulakkeerniarlugu inatsisip akuersissutigineqannginnerani ilaatigut allannguutissatut siunnersuummik saqqummiussilersaarnini Naalakkersuisunut ilaasortap allakkiamini ilisimasaarutigaa.

Inuussutissarsiornermut Ataatsimiititaliap isumaliutigisai.

Suliffeqarfiit inatsisitigut illersugaanerat inatsisissatut siunnersuutip Inatsisartunit siullermeerneqarnerani apeqquserneqarpoq, inatsisiliornermimi tamanut atuuttussatut ilusilerlugit nalinginnaasumik atorneqartartut inatsisissatut siunnersuummi atorneqarmata, soorlu "niuerfinni salliulluni inissisimanermik atornerluineq" (tak. inatsimmi kapitali 3), soorluttaaq unammilleqatigiinneq pillugu suliassanngortitsinermi uppernarsaanissamut piumasaqaatit qanoq ittut piumasaqaatigineqarnerat nalornissutigineqarsinnaasoq. Aammattaaq inatsimmi oqariaatsit allat, soorlu "kommunit peqatigiillutik", qanoq eqqortumik paasisariaqarnerat apeqquserneqarsimavoq.

Oqariaatsit pineqartut imarisaat atuuffissaasalu siunertarisaat Inuussutissarsiornermut, Suliffeqarnermut Inuussutissarsiutinullu Ilinniartitaanernut Naalakkersuisup allakkamini nassuiaatigai. Nassuiaatit inatsisit qanoq paasineqarnissaannik nassuiaanermi nalinginnaasumik tunngavigineqartartunut naapertuulluartut Inuussutissarsiornermut Ataatsimiititaliamit naammagineqarput.

Inatsisitigut oqariaatsinik tamanut atuuttussatut ilusilikkanik atuineq inatsisit nalornissutigineqarnerannik pilersitsinissaasoq, taamaalillunilu pissusilersorneq inatsisinut naapertuuttuunersoq naapertuuttuunnginnersorluunniit suliffeqarfinnit tamakkiisumik qulakkeerneqarsinnaannginneranik inatsisissatut siunnersuummik siullermeerinermi isumaqartoqarnera Inuussutissarsiornermut Ataatsimiititaliamit ataqqineqarpoq. Ataatsimiititalialli tamanna ernumanartoqartinngilaa, suliffeqarfiimmi pissusilersornerminni suleqateqariaatsiminnilu inatsisit nalorninartullit, niuernikkut periaatsit naammaginartumik ingerlanneqarnersut atorunnaarsinneqarsimanersulluunniit pillugit nalorninermik pilersitsisinnaasut ingalassimaniassagaat naatsorsuutigineqarmat. Naalakkersuisunut ilaasortap itisiliissutaasumik oqaaseqaatai ima paasineqarsinnaapput; aalajangiinikkut akulerunneq annertunerujartortillugu uppernarsaanissamik piumasaqaatit sakkortunerulertarnerannik nalinginnaasumik maleruagassaq aqqutigalugu suliffeqarfiit naammattumik illersugaasut.

Unammilleqatigiinnermut Ataatsimiititaliap nalilersuisinnaatitaanerminik peqqissaartumik ingerlatsisinnaanera aammalu Nunatta Eqqartuussiviani misilinneqassagaluarunik attanneqarsinnaasunik naliliisinnaanera Inuussutissarsiornermut Ataatsimiititaliap tunngaviatigut tatigaa.

Aammalu Unammilleqatigiinnermut Ataatsimiititaliami uppernarsaatinik nalilersuisarnerup missingiikannerluni aammalu ingerlatsinikkut inatsisitigut tunngavigisanut nalinginnaasunut naapertuuttumik pisarnissaa ataatsimiititaliamit akornutissaqarsorineqanngilaq. Inatsiseqarfik matumani pineqartoq uppernarsaanissamik piumasaqaatinik aalajangersimaqqissaartunik, assersuutigalugu inatsisinik unioqqutitsilluni suleqatigiinnissamik isumaqatigiissutit allanngorlugit pigineqarnissaannik piumasaqaammik atuiffigissallugu naleqqutinngilaq, niuernikkummi ingerlatsisut siunertaqapiluttut maleruaqqusanik taamaattunik atorluaanermikkut inatsimmik qanoq ilillutik avaqqutsinissartik paasilertortarmassuk.

Nakkutilliilluni misissuinerit, tak. §§ 22-24, pillugit maleruagassat akissuteqaammini Inuussutissarsiornermut, Suliffeqarnermut Inuussutissarsiutinullu Ilinniartitaanernut Naalakkersuisup nassuiaateqarfigai. Tamanna pillugu maleruagassat ataatsimut isigalugu toqqissisimanartutut Inuussutissarsiornermut Ataatsimiititaliamit isigineqarput, nakkutilliillunimi misissuinerit eqqartuussivimmit akuersissummik pissarsiniaqqaarnikkut politiinillu taamatut misissuinerit ingerlanneqartarnerannik misilittagaqarluartunik suleqateqarnikkut ingerlanneqartarmat. Unnammilleqatigiinnikkut oqartussaasut inuit najuuttut pissutsit pineqaatissiissutaasinnaasut pillugit nassuiaateqaqqullugit piumaffigisinnaanngilaat, paasiniaallunimi misissuinerit taamaattut politiit kisimik ingerlassinnaammatigit. Tamanna aamma atuuppoq pineqartup nammineq piumassutsini naapertorlugu akuerisinnaanngisaanik kaasarfinnik, taskinik il.il. misissuinernut. Eqqartuussissuserisumut allaqatiginnissutit il.il. misissuinermut ilanngunneqarsinnaanngillat uppernarsaatit immikkuullarissuullutik isertuussassaanerat pissutigalugu.

Oqartussaasut niuernermut tunngatillugu isertugaasunik atortussanillu allanik isertugaasunik suliarinnittarnerat eqqarsaatigalugu Unammilleqatigiinnermut Ataatsimiititaliap sulianik ingerlatsinera matoqqasumik isertuussilluinnarlunilu pisarnissaa naalakkersuisunut ilaasortap akissummini qulakkeerpaa. Taama oqarnerup qularnartoqartinnissaanut Inuussutissarsiornermut Ataatsimiititaliaq tunngavissaqanngilaq, tamannami inatsimmi maleruagassanut aamma naapertuummat. Isertuussinissamik piumasaqaatip kingunerissanngilaa Unammilleqatigiinnermut Ataatsimiititaliap ingerlatsinerata allaffissornikkullu periaasiisa tamanut saqqummiunneqarsinnaannginnissaat, tamannami pillugu ilisimatitsissuteqarneq suliffeqarfiit pineqartut niuernermut tunngatillugu isertugaatimik il.il. illersorneqarnissaannik piumasaqaataannik saneqqutsinani pisinnaammat.

Ingerlataq tapiiffigineqartoq inuussutissarsiutaanngippat pisortat sulisartut peatigiiffiinut tapiissutaat inatsimmi aallaaviatigut ilaatinneqanngitsut Inatsisartut Inuussutissarsiornermut Ataatsimiititaliaata maluginiarpaa. Pisortanit tapiissutit, tassa pisortat maleruagassiaat naapertorlugit tapiissutit, unammilleqatigiinnermut equtitsisutut inatsimmilluunniit unioqqutitsisutut isigineqarsinnaanersut siullertut Naalakkersuisunit aammalu kommunini nakkutilliinikkut oqartussaasunit aalajangiiffigineqartarput, taakkulu aalajangiinerat Unammilleqatigiinnermut Ataatsimiititaliamut tamatumalu kingorna pisariaqassappat Nunatta Eqqartuussivianut suliassanngortinneqarsinnaavoq, tak. inatsimmi kapitali 4 aamma 8.

Taamatut aaqqiineq naammaginartutut ataatsimiititaliamit isigineqarpoq, inuussutissarsiutinimi arlalinni tapiissutitigut aaqqissuussinerit suli pinngitsoorneqarsinnaannginnerat nassuerutigineqartariaqarpoq, aningaasalli inuussutissarsiornermik ingerlataqartunut suliffeqarfiulluunniit tapiiffigineqartup unammillertaanut innarleeqqunagit eqqortumik atorneqarnersut toqqissisimanartumik nakkutigineqartariaqarpoq.

Aammattaaq maannamiit pisortat inuussutissarsiornikkut ingerlataannut inatsit aamma atuutsinneqalissasoq naalakkersuisunut ilaasortap akissummini erseqqissarpaa, tamannalu inatsimmut atuuttumut sanilliullugu nutaartaavoq. Pisortat inuussutissarsiornikkut ingerlatsinerminni namminersortumik ingerlatsisunut sanilliullutik unammilleqatigiinnikkut iluaqutissaminnik qulakkeerinninnginnissaat allannguutikkut qulakkeerneqarpoq, tamannalu Inuussutissarsiornermut Ataatsimiititaliamit ilassilluarneqarpoq.

Inatsisip atuutsinneqalerneranut atatillugu unammilleqatigiinnikkut oqartussaasut paasititsiniaanermik anenrtuumik aallartitsilersaarnerat Inuussutissarsiornermut Ataatsimiititaliamit nuannaarutigineqarmat naggasiullugu oqaatigineqassaaq, taamaaliornikkut unammilleqatigiinneq pillugu inatsisip nutaap qanoq kinguneqarnissaa maleruagassallu suut suliffeqarfinnit malinneqassanersut pillugu innuttaasut nunatsinnilu suliffeqarfiit sukumiisumik ilisimatinneqarsinnaaqqullugit. Inatsisip inuussutissarsiornermik ingerlataqartunut malunnaateqartumik kingunerisassai, tassunga ilanngullugit nalunaaruteqarnissamut paasissutissiinissamullu pisussaaffiit, eqqarsaatigalugit taamatut suliniuteqarnissaq pissusissamisoorpoq.

Ataatsimut naliliinerup kingorna unammilleqatigiinneq pillugu inatsisip nutaap nangaanartoqartinnissaanut Inatsisartut Inuussutissarsiornermut Ataatsimiititaliaat tunngavissaqarsorinngilaq. Unammilleqatigiinneq pillugu inatsimmut maanna atuuttumut sanilliullugu allannguut pingaarnerpaaq tassaavoq nakkutilliinermik tunngaveqarnermit inerteqquteqarnermik tunngavimmut ikaarsaariarneq. Allannguutikkut tassuuna unammilleqatigiinneq pillugu inatsit nunani killerni inatsisit taamaaqqataannut nallersuuttunngortinneqarpoq. Tamatuma peqatigisaanik naak sakkortuumik unammillertoqaraluartoq suliffeqarfiit unammillertiminnut naapertuilluartumik nammineq piumassusertik malillugu pissusilersornissamut annertuumik kaujumissuseqalernissaat pilersinneqassaaq.

Inuussutissarsiornermut Ataatsimiititaliap inassuteqaataa.

Siuliani allassimasunik oqaaseqaateqarluni siunnersuut saqqummiunneqarnermisut iluseqartillugu akuersissutigineqassasoq Inuussutissarsiornermut Ataatsimiititaliap isumaqatigiittup inassutigaa.

Taama oqaaseqarluni Inatsisartut Inuussutissarsiornermut Ataatsimiititaliaata siunnersuut Inatsisartunut aappassaaniigassanngortippaa.

 

	Emilie Olsen Siulittaasup tullia
Esmar Bergstrøm		Vittus Mikaelsen
Doris Jakobsen		Lene Knüppel

 

Ilanngussaq