UKA2007/49

 

Allannguutissatut siunnersuut:

 

Siunnersuut: Unammilleqatigiinneq pillugu Inatsisartut inatsisaat nr. xx af xx 2007-imeersoq

Aappassaarinninneermut Naalakkersuisunit saqqummiunneqartoq.

§ 12-mut

1. Imm. 2 imatut oqaasertaqassaaq:
"Imm. 2. Tapiissutit imaassimappata peqqussuteqartoqarsinnaavoq:
1) toqqaannartumik toqqaannanngitsumilluunniit unammilleqatigiinnerup equtinnissaanik siunertaqarpat imaluunniit kinguneqarpat aamma
2) pisortat aqutsinerat naapertorlugu inatsisinik unioqqutitsineruppat. "

§ 13-imut

2. Imm. 2 imatut oqaasertaqassaaq:
"Imm. 2. Kommunit Unammilleqatigiinnermik Nakkutilliisoqarfianit sioqqutsisumik neriorsuummik piniarnissamik pisussaaffeqarnerat pillugu naalakkersuisut, Unammilleqatigiinnermut Ataatsimiititaliamiit oqaaseqaammik pissarsiniareernikkut, malittarisassiussapput kiisalu malittarisassiussallutik kommunini nakkutilliisoqarfiit Unammilleqatigiinnermik Nakkutilliisoqarfiullu akornanni suleqatigiinnissap aaqqissuuneqarnissaannik."

§ 15-imut

3. Imm. 1 imatut oqaasertaqassaaq:
"Pisortat ingerlatsinerat pillugu paasitinneqarsinnaatitaaneq pillugu inatsisartut inatsisaat inatsit manna malillugu sulianut atuutinngilaq, taamaallaalli atuullutik suliat malittarisassat aalajangersarnerannut tunngasut ukua malillugit: § 2, imm. 7, § 4, imm. 2, § 7, imm. 6, § 8, imm. 2, 2. pkt, § 9, 2. pkt., § 10, imm. 1, § 11, imm. 6, § 12, imm. 4, 2. pkt., aamma imm. 6, 2. pkt., § 13, imm. 2, § 14, imm.2, § 17, imm. 3 aamma § 25, imm. 3. Taamaattoq pisortat ingerlatsinerat pillugu paasitinneqarsinnaatitaaneq pillugu inatsisartut inatsisaanni § 4, imm. 2 aamma § 6 Inatsisartut inatsisaat manna malillugu sulianut atorneqassaaq. 1. aamma 2. pkt. aamma atuutissapput paasissutissat Inatsisartut inatsisaat manna atorlugu paasissutissat pissarsiarineqartut aqutsisoqarfimmut allamut tunniunneqarsimatillugit. "

§ 17-imut

4. Imm. 1 imatut oqaasertaqassaaq:
"§ 17. Unammilleqatigiinnermut Ataatsimiititaliap nakkutigaa Inatsisartut inatsisaata matuma Inatsisartullu inatsisaat malillugit maleruagassiat malinneqarnissaat, taamaattorli takukkit § 2, imm. 4,1.pkt. aamma § 12, imm. 3, 1. pkt. Unammilleqatigiinnermut Ataatsimiititaliap suliaq nammineerluni, nalunaaruteqareernikkut imaluunniit naammagittaalliortoqarneratigut, suliarisinnaavaa. Unammilleqatigiinnermut Ataatsimiititaliap aalajangissavaa suliap misissornissaanut aalajangiiffiginissaanulluunniit naammattumik patsisissaqarnersoq, tamatumani ilanngullugu suliap suliarinera unitsikkallarneqassanersoq unitsinneqavissanersorluunniit. Aamma Unammilleqatigiinnermut Ataatsimiititaliaq aalajangersinnaavoq suliassaq suliariniarnagu suliffeqarfiit § 20 malillugu siusinnerusukkut neriorsuereersimappata."

5. Imm. 2-mi aamma 3-mi "ataatsimiititaliaq" imatut allanngortinneqarpoq: "Unammilleqatigiinnermut Ataatsimiititaliami".

§ 18-imut

6. Imm. 1,oqaaseqatigiit pingajuanni, "Ataatsimiititaliami" imatut allanngortinneqassaaq: "Unammilleqatigiinnermut Ataatsimiititaliaq".

7. Imm. 1, oqaaseqatigiit sisamaanni, "ataatsimiititaliamilu" imatut allanngortinneqassaaq: "Unammilleqatigiinnermut Ataatsimiititaliamilu".

8. Imm. 1, oqaaseqatigiit arfernganni, "Ataatsimiititaliap" imatut allanngortinneqassaaq: "Unammilleqatigiinnermut Ataatsimiititaliap".

§ 23-imut

9. Imm. 4-mi "Unammilleqatigiinnermut Ataatsimiititaliap" imatut allanngortinneqassaaq: "Unammilleqatiginnermut Nakkutilliisoqarfiup".

§ 26-imut

10. Imm. 2, oqaaseqatigiinni siullerni, "§ 2, imm. 1" kingorna ikkunneqassaaq: "aamma 6".

11. Imm. 2, oqaaseqatigiinnerni siullerni, "35"-ip siornatigut ikkunneqassaaq: "§ ".

§ 35-imut

12. Paragraffi imatut oqaasertaqassaaq:
"Inatsisartut inatsisaat 1. marts 2008-mi atuutilissaaq. Taamaattorli § 17, imm. 3 aamma § 18 atuutilissapput 1. december 2007. Inatsisartut inatsisaata atuutilerneratigut Unammilleqatigiinneq pillugu inatsit nr. 28, 30. oktober 1992-imeersoq atorunnaassaaq
Imm. 2 Unammilleqatigiinneq pillugu Inatsisartut inatsisaat nr. 28, 30. oktober 1992-imeersoq suliat malillugu naammassineqarsimanngitsut Inatsisartut inatsisaata atuutilerneraniit atorunnaassapput. Tamannali atuutinngilaq naammagittaalliuutinut kiisalu sulianut eqqartuussivimmiittunut tunngatillugu.
Imm. 3. Unammilleqatigiinnermik killiliisumik isumaqatigiissutit, akuersissutit periutsillu ataatsimut aaqqissukkat Inatsisartut inatsisaata atulernerata nalaani atuuttut aammalu § 6, imm.1 malillugu inerteqqutaasut 1. september 2008 tikitsinnagu § 8 malillugu suneqannginnissaq siunertaralugu nalunaarutigineqarsimagunik Unammilleqatigiinnermut Ataatsimiititaliap aalajangiinerata kingornatigut qaammatit pingasut tikillugit ataannassapput Unammilleqatigiinnermut Ataatsimiititaliaq itigartitsigaluarpalluunniit. Qaammatinik pingasunik piffissaliineq Unammilleqatigiinnermut Ataatsimiititaliap sivitsorsinnaavaa."

 

Siunnersuummut oqaaseqaatit

Oqaaseqaatit nalinginnaasut

Allannguutissatut siunnersuut Naalakkersuisut nammineq suliniuteqarnerisigut saqqummiunneqarpoq.

Piareersarluni sulinermi Naalakkersuisut siunniussaat tassaasimavoq allannguutissatut siunnersuummi takuneqarsinnaasunik allannguutinik aallaqqaammut siunnersuut imaqassasoq.

Allannguutissatut siunnersuummi aalajangersakkat ilai aallaqqaammut siunnersuummiittut assigai. Aalajangersakkat taakku pillugit inatsisip oqaasertaasa allaqqinneranut siunertaq tassaavoq aalajangersakkamut oqaaseqaatini teknikikkut ataasiakkaanik iluarsiinissaq kiisalu nutsernerani kukkunerit.

Allannguutissatut siunnersuut inatsisip teknikikkut kukkunersiorneqarsimavoq.

Allannguutissatut siunnersuut allaffissornikkut kinguneqassanngilaq.

Allannguutissatut siunnersuut aningaasaqarnikkut kinguneqassanngilaq.

 

Siunnersuummi aalajangersakkanut ataasiakkaanut oqaaseqaatit

Nr. 1-imut

Allannguut teknikimut tunngasuuvoq, oqaaseqaatinik taamaallaat iluarsiinerusoq, kiisalu nutsernerani kukkunerit.

Unammilleqatigiinnermut Ataatsimiititaliap § 12, imm. 2 malillugu peqqussuteqarsinnaaneranut piumasaavoq, siullertut tapiissummi pineqartumi toqqaannartumik toqqaannangitsumilluunnit siunertarineqartoq kingunerisinnaagaaluunniit unammilleqatigiinnerup equtinneqarnera. Aappaattut piumasaavoq tapiissut pisortat aqutsinerat naapertorlugu inatsisinik unioqqutitsinerunersoq. Piumasaasut marluusut tamarmik naammassineqarsimassapput.

Unammilleqatigiinnermut Ataatsimiititaliap nr. 1 malillugu nalilertussaava unammilleqatigiinnermik equtitsisumik pisortat tapiissuteqarnersut, kisiannili tapiissut pisortat aqutsinerat naapertorlugu inatsisinik eqqortitsinersoq nr. 2 malillugu naliliisussaallutik naalakkersuisut, imaluuniit kommunip nakkutilliisoqarfia, tak. § 12, imm. 3. Naalakkersuisut naliliinerat pineqartumi naalakkersuisunut ilaasortamit suliarineqassaaq.

Tapiissut § 12, imm. 2-mut ilaappat Unammilleqatigiinnermut Ataatsimiititaliap aamma soorlu Unammilleqatigiinnermik Nakkutilliisoqarfiup tapiissutip unitsinneqarnissaa peqqussutigisinnaavaat. § 12, imm. 2, nr. 1 malillugu piumasaasoq kisimi naammassineqarsimappat Unammilleqatigiinnermut Ataatsimiititaliaq peqqussuteqarsinnaanngilaq. Taarsiullugu Unammilleqatigiinnermut Ataatsimiititaliaq siunnersuummi § 2, imm. 5-imi periarfissaq atorlugu naalakkersuisunut tunngavilersorneqarsimasumik oqaaseqaateqarsinnaavoq aamma tapiissutip kingunerisaanik unammilleqatigiinnermik ajoqutaasumik sunniutaasinnaasut uparuarlugit.

§ 12, imm. 2, nr. 1. Unammilleqatigiinnermut Ataatsimiititaliap § 12, imm. 1 malillugu peqqussuteqarsinnaaneranut piumasaq naammassineqartussaq siulleq tassaassaaq tapiissutigineqartuni siunertaasoq kingunerissagaalluunniit kalaallit niuerfianni ilaaniluunniit unammilleqatigiinnerup equtinneqarnera.

Pisortat tapiissutaanni pineqartumi siunertaassaaq kingunerissalluguluunniit unammilleqatigiinnerup equtinneqarnissaa. Tamatuma kinguneraa tapiissut unammilleqatigiinnermik equtitsivissoq aamma tapiissut unammilleqatigiinnerup equtinnissaannaanik siunertaqartoq ilaassammata. Allatut oqaatigalugu piumasaanngilaq kalaallit niuerfianni ilaaniluunniit tapiissutip kinguneranik unammilleqatigiinnerup equtitaaneri malugineqavissimanersut.

Unammilleqatigiinnermut Ataatsimiititaliap nalileruniuk tapiissummi siunertaasoq kingunerissaneraaluunniit kalaallit niuerfianni ilaanniluunniit unammilleqatigiinnermik equtitsinissaq, Unammilleqatigiinnermut Ataatsimiititaliap kisiisa nalilissanngilai imaaliinnaq siunertaasut imaluunniit tapiissutip imaaliinnaq kingunissai, aammali pisortat tapiissutaanni toqqaannanngitsumik unammilleqatigiinnermik equtitsineq siunertaanersoq toqqaannangitsumilluunniit kinguneqassanersoq.

Tapiissutit unammilleqatigiinnermik equtitsisut:

Paasinnittaaseq danskit periaasiannit isumataajuvoq, taanna malillugu piumasaasut ilagalugu pisortaqarfik inatsisit uniorlugit tapiissuteqartoq, tapiissutip unammilleqatigiinnermi piumasaasut equtikkai equteratarsinnaagaaluunniit. Tassalu naammappoq tapiissut patsisaalluni unammilleqatigiinni equtinneqaratarsinnaasoq. Taamaalilluni paasinnittaaseq inatsimmut siunnersuummi § 6-imit allaaneruvoq, tassanimi unammilleqatigiinnermik killiliineq inerteqqutaammat. Taamaatumik tapiissuteqariaatsip unammilleqatigiinneq equtissinnaavaa unammilleqatigiinneq killilerneqartutut oqaatigineqarsinnaatinnagu.

Akerlianik tapiissut aallaqqaatitut unammilleqatigiinnermik equtitsisutut isigineqassanngilaq piumasaasut takulertoruminartut, arlaannaalluunniit illersuinerunngitsut immikkoortsiterisuunngitsullu tunngavigalugit neqeroorutaaguni.

§ 12, imm. 2, nr. 2. § 12, imm. 1 malillugu peqqussuteqarnissamut piumasaavortaaq pisortat tapiissutaat unammilleqatigiinnermik equtitsisoq pisortat aqutsinerat naapertorlugu inatsisinik unioqqutitsinerusoq. Pisortat aqutsinerannut tunngavissaqarneranik naliliisuussapput naalakkersuisut, suliariaatsimilu naalakkersuisoq pineqartoq imaluunniit kommunimi nakkutilliisoqarfik, tak. § 12, imm. 3.

"Pisortat aqutsinerat".

Oqariaaseq "pisortat aqutsinerat" inatsimmut siunnersuummi § 2, imm. 2 naapertorlugu paasineqassaaq. Tamanna imatut paasisariaqarpoq paasinnittaatsimut ilaasut inatsisartut inatsisaat, inatsisartut peqqussutaat, nalunaarutit, missingersuusiornermut malittarisassat nalinginnaasut, uppernarsaatitut allakkiat aamma kommunit pisinnaatitaaffiata iluani aalajangikkat kommunillu malittarisassiaat. Kommunalbestyrelsit aalajangigaannut naligititaapput kommunit ataatsimoorfianni siulersuisut aalajangigaat, tak. Kommunit inuussutissarsiutini il.il. aningaasaliinermikkut inuussutissarsiutinik ineriartortitseqataanissaminnut periarfissaat pillugit Inatsisartut inatsisissaat.

Nr. 2-mut

Kommunit Unammilleqatigiinnermik Nakkutilliisoqarfianit sioqqutsisumik neriorsuummik piniarnissamik pisussaaffeqarnerat pillugu naalakkersuisut malittarisassiornissaat sioqqullugu Naalakkersuisut Unammilleqatigiinnermut Ataatsimiititaliamiit oqaaseqaammik pissarsiniarnissaat naleqquttutut nalilerneqarpoq.

Nr. 3-mut

Allannguut teknikimut tunngasuuvoq, oqaaseqaatini taamaallaat iluarsiinerusoq aammalu nutserinermi kukkunerni.

Unammilleqatigiinneq pillugu Inatsisartut inatsisaanni atuuttumi tamanut ammasuuneq pasinartuutitsinerlu tunngaviupput pingaarnerit. Inerteqquteqarnermik tunngaveqarnerup atulersinneranut atatillugu tunngaviit taakku marluk atorunnaarsinnissaat siunnersuutigineqarpoq, tamanna unammilleqatigiinnermut inatsisip pingaarnertut siunertaata anguneqarnissaanut sakkutut pingaaruteqartutut isigineqarmat.

Siunnersuutip kinguneraa paasinartuutitsinerup tunngaviunerata atorunnaarsinnera. Imm. 1-imi siunnersuutigineqarpoq unammilleqatigiinneq pillugu inatsimmi suliassat nalinginnaasumik tamanut sqqummiunneqartassanngitsut Pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaat malillugu. Taamaattoq unammilleqatigiinneq pillugu inatsit malillugu suliassat aalajangerneqartarnerat pillugu suliassat tamanut saqqummiunneqartassasut, tassani Naalakkersusisut Unammilleqatigiinnermut Ataatsimiititaliaq oqaaseqartittassavaat, imaluunniit Unammilleqatigiinnermut Ataatsimiititaliaq nammineq malittarisassiussalluni. Malittarisassaq taanna malillugu paasitinneqarsinnaatitaanermut inatsit taamaallaat atorneqassaaq unammilleqatigiinneq pillugu inatsit malillugu suliassat aalajangersagaliuuffigineranni.

Ataatsimut tamaat isigalugu tamanut ammasuunissamik atuutitsinnginnissamik aalajangersagaqarneq nassuiarneqarpoq, suliffeqarfimmut pineqartumut annertuumik aningaasatigut ajunaarsinnaanera aamma tamanut takusassiinikkut imaluuniit tunniussinikkut suliffeqarfiit allat unammilleqatigiinikkut pisariaqanngitsumik iluaqusiinikkut.

Aalajangersagaq qallunaat maannakkut atuuttumi unammilleqatigiinnermut inatsisaat nr. 384, 10. juni 1997-imeersumi kingusinnerusukkut allannguutitalimmi taamaaqataanik aalajangersakkanik aallaavigineqarpoq. Aalajangersakkap nassuiarnissaanut nunatsinni eqqartuussivitsigut periaatsit naammassanngippata qallunaat inatsisaanni § 13-i malillugu periuseq nassuiaanermut atorneqarsinnaavoq, taamaattorli Kalaallit Nunaanni pissutsit eqqarsaatigalugit.

Siunnersuutigineqarpoq suliffeqarfiit suliamut pineqartumut ilaanngikkaluarlutik imminnut tunngasunik paasissutissinneqarsinnaanissaat. Pisortat aqutsinerat pillugu Inatsisartut inatsisaani § 4, imm. 2 malillugu naminermut tunngasunik periarfissap tunngaviunera (egen access), sulianut tamanut unammilleqatigiinneq pillugu Inatsisartut inatsisaat malillugu aalajangiiffigineqartussanut atuuppoq.

Pisortat ingerlatsinerat pillugu paasitinneqarsinnaatitaaneq pillugu inatsisartut inatsisaanni § 6-i aamma atuuttuusoq pillugu ilanngussinermi oqaasiinnakkut paasissutissiinernik pisortatut oqartussat allataqarnissamik pisussaaffeqarnerat suliani aamma unammilleqatigiinneq pillugu inatsisartut inatsisaat malillugu aalajangiiffigineqarsimasuni atuuttoq erseqqissarneqarpoq.

Aamma siunnersuutigineqarpoq paasissutissat Unammilleqatigiinermut Ataatsimiititaliap unammilleqatigiineq pillugu Inatsisartut inatsisaat malillugu pissarsiai aqutsisoqarfimmullu allamut ingerlateqqinneqartut paasitinneqarsinnaatitaaneq pillugu pisortat aqutsinerat pillugu Inatsisartut inatsisaat malillugu aalajangikkanik ilisimasaqarnissap ataaniissanngitsut.

Nr. 4-mut

Allannguut teknikimut tunngasuuvoq, oqaaseqaatinik taamaallaat iluarsiinerusoq.

§ 17, imm. 1 malillugu Unammilleqatigiinnermut Ataatsimiititaliap Inatsisartut inatsisaata matuma taannalu malillugu aalajangersakkat eqqortumik atortinnissaat nakkutigissavaa, taamaattoq tak. § 2, imm. 4.1.pkt aamma § 12, imm. 3, 1.pkt. taakkunani takuneqarsinnaalluni unammilleqatigiinnermik killiliineq pisortat aqutsinerata il.il. toqqaannartumik pisariaqartumillu kingunerineraat pillugu aalajangiisussaasoq naalakkersuisut, suleriaatsimilu naalakkersuisunut ilaasortaq aqutsinermut tamatumunnga akisussaavoq.

§ 17, imm. 1, pkt 3-mi oqaasiliorneratigut "Unammilleqatigiinnermut Ataatsimiititaliap aalajangissavaa suliaq misissussallugu aalajangiiffigissalluguluunniit naammattumik patsisissaqarnersoq" erseqqissarneqarpoq naammagittaalliuut pinnngitsoorani suliarissallugu pisussaaffiunngitsoq. Tassalu Unammilleqatigiinnermut Ataatsimiititaliap, Unammilleqatigiinnermut Ataatsimiititaliap suliassaasa tulleriiaarnerat tunngavigalugu, aalajangersinnaavaa naammagittaalliuutit pingaaruteqannginnerusut suliariumanagit. Tassalu Unammilleqatigiinnermut Ataatsimiititaliaq suliat suliariumannginniissaannut annertuumik pisinnaatitaavoq. Tassalu Unammilleqatigiinnermut Ataatsimiititaliap suliap suliarineqarnerani sukkulluunniit naammagittaalliortup naammagittaaliuutai tamaasa ilaannaaluunniit suliariumanngissinnaavai. Tassalu pingaaruteqarpoq eqqumaffigissallugu assigiinngissuteqarsinnaammat naammagittaalliuutip isumaa aallaavigalugu pisortat nukissaat qanoq annertutigisut suliamut atorumaneqarnersut, inatsisillu malinneqarnissaanut pisortat soqutigisaat aallaavigalugu, kingumoortumik siumoortumillu, nukiit atugassat suut naapertuuttuunersut.

Tassalu Unammilleqatigiinnermut Ataatsimiititaliap aalajangersinnaavaa suliamut aalajangiiumanani. Soorlu taamaattoqarsinnaavoq suliassaq Unammilleqatigiinnermut Ataatsimiititaliamut saqqummiunneqarpat, paasinarsippallu Unammilleqatigiinnermut Ataatsimiititaliaq aatsaat aalajangiisinnaasoq suli nukinnik atuiffiunerusumik misissuinerit aallartereertinnagit. Tamanna pingaaruteqarpoq Unammilleqatigiinnermut Ataatsimiititaliap aamma Unammilleqatigiinermik Nakkutilliisut nukiisa sapinngisamik pitsaasumik atornissaannut naapertuuttumillu tulleriiaarinissamut.

Aamma naapertuuttuunngilaq Unammilleqatigiinnermut Ataatsimiititaliap nukiit atussappagit suliap suliareqqinnissaanut suliffeqarfiup neriorsuineratigut Unammilleqatigiinnermut Ataatsimiititaliap akuerisaatigut naammasseriikkamut. Taamaattumik Unammilleqatigiinnermut Ataatsimiititaliap suliaq suliffeqarfiit kalluarneqartut § 20 malillugu neriorsuuteqarneratigut inerneqarsimasoq suliariumanngissinnaavaa. Suliffeqarfiup allap niuerfimmiittup aalajangiineq taanna naammaginngikkuniuk taarsiullugu eqqartuussisunut nalinginnaasunut suliassanngortittariaqarpaa.

Kisianni § 8 malillugu ilaanngitsoortitaanerit kiisalu § 9 aamma §11, imm. 4 malillugit akuliutinnginnissami nalunaarutit pillugit Unammilleqatigiinnermut Ataatsimiititaliaq suliaq suliarissallugu aalajangiiffigissallugulu pisussaatitaavoq

Pisortat aqutsinerat imaluunniit tapiissuteqartarnerat unammilleqatigiinnermut ajoqusiilluni sunniuteqartillugu Unammilleqatigiinnermut Ataatsimiititaliaq tunngavilersorneqartumik Naalakkersuisunut oqaaseqaateqarsinnaapput, siunnersuummi § 2, imm. 5 naap.

Kiisalu Unammilleqatigiinnermut Ataatsimiititaliaq pisinnaatitaavoq allaffissornikkut maleruagassiat pillugit Naalakkersuisunut oqaaseqaateqarnissamut.

Nr. 5-imut

Allannguut teknikimut tunngasuuvoq.

Nr. 6-imut

Allannguut teknikimut tunngasuuvoq.

Nr. 7-mut

Allannguut teknikimut tunngasuuvoq.

Nr. 8-mut

Allannguut teknikimut tunngasuuvoq.

Nr. 9-mut

Allannguutissatut siunnersuutip kingunerissavaa imm. 1-3-mi piffissaliussat sivitsorneqarsinnaanerinut piginnaatitaaneq Unammilleqatigiinnermut Ataatsimiititaliamiit Unammilleqatigiinnermut Nakkutilliisoqarfimmut allanngortinneqarnera.

§ 23 naapertorlugu nakkutilliilluni misissuinernik Unammilleqatigiinnermut Nakkutilliisoqarfik isumaginnittuuvoq.

§ 23, imm. 1-3-mi piffissaliussat naammassineqarnissaannut Unammilleqatigiinnermut Nakkutilliisoqarfik pisussaaffeqarpoq piffissaliussallu sivitsorneqartariaqarnerinut naliliinissamut taamaattumik qaninnersaalluni. Taamaattorli erseqqissarneqassaaq Unammilleqatigiinnermut Nakkutilliisoqarfik taamaallaat immikkut ittumik pisoqartillugu piffissaliussanik sivitsuisinnaammat. Piffissaliussat sivitsorneqarnissaannut isummernissaq, piffissaq nunallu isorartunera eqqarsaatigalugu, Unammilleqatigiinnermut Ataatsimiititaliamut ajornartorsiutinik kinguneqartitsisinnaavoq.

Nr. 10-mut

Allannguutip kinguneraa aqutsinerit aalajangiinerilluunniit nalunaarutigineqartussaaneri pillugit Nunatta Eqqartuussiviani misilinneqarsinnaaneri, § 2, imm. 6 naap. § 2, imm. 6 malillugu aalajangiinerit pisortatut oqartussat Unammilleqatigiinnermut oqartussanut paasissutissanik tunniussisinnaanerinut pingaaruteqarput. Paasissutissat, unammilleqatigiinnermut pingaaruteqartunik aqutsinerit aalajangiinerillu pillugit unammilleqatigiinnermut oqartussat ilisimatinneqarnissaannut qulakkeerinnittut. Allannguutip aamma nalunaaruteqartussaaneq pillugu aalajangernerup aalajangersimasup pisortatut oqartussat naammagittaalliuutigineqarnissaannut periarfissaqalernerat qulakkiissavaa. Siunnersuummi § 2, imm. 6-ip ilanngunneqarnera aamma aalajangiinerit suut Nunatta Eqqartuussivianut suliassanngortinneqarsinnaaneri eqqarsaatigalugit siunnersuummi allatigut aaqqissuussinermut naapertuuppoq.

Nr. 11-mut

Allannguut teknikimut tunngasuuvoq.

Nr. 12-mut

Imm. 1-imut

Imm. 1-imi siunnersuutigineqarpoq Inatsisartut inatsisaat 1. marts 2008-mi atuutilissasoq. Taamaattoq siunnersuutigineqarpoq Unammilleqatigiinnermut Ataatsimiititaliami § 17, imm. 3 aamma § 18 ulloq 1. december 2007 atuutilissasut. Taamaaliornikkut qulakkeerneqassaaq unammilleqatigiinnermut ataatsimiititaliamik nutaamik inatsip atuutilinnginnerani allaffissornikkut malittarisassanik ilassutinik suliaqarnissamut peqataasinnaasumik pilersitsisoqarnissaa. Piffissami 1. december 2007-mit 1. marts 2008-mut unammilleqatigiinnermut ataatsimiititaliaq ullumikkut atuuttoq nutaarlu peqatigiillutik ingerlasinnaassapput.

Piffissami tassani Inatsisartut inatsisaat pillugu pisariaqartumik paasititsiniaanissamut Unammilleqatigiinnermik Nakkutilliisoqarfik periarfissaqarumaarpoq. Piffissami tassani Unammilleqatigiinnermik Nakkutilliisoqarfik aamma § 8, imm. 2, § 9, 2. pkt., § 11, imm. 6 aamma § 12, imm. 6 naapertorlugit nalunaaruteqartarneq pillugu maleruagassanik piareersaasinnaassaaq, peqataanillu nalunaarutinut siunnersuutinik pisariaqartunik sanasoqarsinnaassalluni Naalakkersuisut Unammilleqatigiinnermut Ataatsimiititaliamit oqaaseqaammik piniareernermigut § 2, imm. 7, § 4, imm. 2, § 7, imm. 6, § 10, § 12, imm. 4, § 13, imm. 2 aamma § 14, imm. 2 malillugit atortuulersikkumaagaanik.

Unammilleqatigiinneq pillugu Inatsisartut inatsisaata nr. 28, 30. oktober 1992-imeersup atorunnaarsitaanera peqatigalugu aalajangersakkat inatsit taanna tunngavigalugu pilersitaasut atorunnaassapput.

Imm. 2-mut

Inatsisartut inatsisaata atuutilerfiani unammilleqatigiinneq pillugu Inatsisartut inatsisaat nr. 28 30. oktober 1992-imeersoq malillugu naammasineqarsimanngitsunik suliaqarpat taakkua atorunnaassapput. „Naammassineqartut"-mik oqarnermi suliat Unammilleqatigiinnermut Ataatsimiititaliamit imaluunniit Unammilleqatigiinnermik Nakkuatilliisoqarfimiit inaarutaasumik aalajangiiffigineqarnikut pineqarput. Tamannali atuutinngilaq sulianut naammagittaaliuut tunngavigalugu suliarineqartunut, tassami suliat taakkua Unammilleqatigiinnermut Ataatsimiititaliamut nutaamut ingerlateqqinneqassammata Inatsisartut inatsisaanilu matumani aalajangersakkat malillugit naammassineqassallutik. Aamma suliat Inatsisartut inatsisaata atuutilernerani Nunatta Eqqartuussiviani imaluunniit Østre Landsretimi ingerlasut unammilleqatigiineq pillugu Inatsisartut inatsisaat nr. 28 30. oktober 1992-imeersoq malillugu inerlugit suliarineqartussaassapput. Kisianni Nunatta Eqqartuussivia aamma Østre Landsret suliamut nalileereernerisigut aalajangerneqarsinnaavoq suliaq ingerlasoq inerlugu suliariumanagu Nunatta Eqqartuussivia aamma Østre Landsret isumaqarunik aalajangiineq inatsisitigut soqutiginaateqanngitsoq

Imm. 3-mut

Siunnersuutigineqarpoq imm. 3-mi, isumaqatigiissutit unammilleqatigiinnermik killiliisut, aalajangikkat aamma periutsit ataqatigiissut Inatsisartut inatsisaata atuutilernerani atuuttut § 6-imilu inerteqqutit pillugit aalajangersakkanut atasut Inatsisartuit inatsisaata atuutilerneraniit qaammatit arfinillit ingerlaneranni suliassanngortinneqarsinnaasut § 8 malillugu pinngitsuutitaanissaq siunertaralugu.

Isumaqatigiissutit, akuersissutit aamma periutsit ataqatigiissut unammilleqatigiinnermik killiliisut § 6-imi inerteqqutinut ilaasut Inatsisartut inatsisaata atuutilerneraniit qaammatit arfinillit ingerlaneranni suliassanngortitaasut sunniutigissavaat atorsinnaassagamik aamma § 29, imm. 1, nr.1 malillugu unioqqutitsinermik pineqaatissiissutaasinnaasumik kinguneqassannginnamik, Unammilleqatigiinnermut Ataatsimiitaliap nutaap § 6 imaluunniit § 8 naapertorlugit qaammatit pingasut qaangiutereernerisigut aalajangeereernissaata tungaanut.

Unammilleqatigiinnermut Ataatsimiititaliaq aalajangiippat isumaqatigiissut § 8 malillugu pinngitsuutitaasinnaasoq, pinngitsuutitaaneq ullormit nalunaarutiginninnermiit atortuulissaaq.

Akerlianik Unammilleqatigiinnermut Ataatsimiititaliaq isumaqarpat § 8, imm. 1 malillugu pinngitsutitsisoqarsinnanngitsoq, tassa isumaqatigiissut, akuersissut imaluunniit periuseq ataqatigiissoq inerteqqutaasut, atorsinnaannginneq § 6, imm. 5-imi pineqartoq atuutilissaaq aalajangiinerup qaammatit pingasut qaangiutereernerisigut.

Isumaqatigiissut unammilleqatigiinnermik killiliisoq aalajangigarluunniit qaammatit arfinillit piffissarititaasut naatinnagit nalunaarutigineqanngikkunik, isumaqatigiissut aalajangigarluunniit atorsinnaajunnaassapput. Aamma inerteqqummik unioqqutitsinermut akileeqqusisoqarsinnaavoq inatsisip atuutilerfianiit.