20. oktober 2007

UKA 2007/41

 

Nunalerineq pillugu Inatsisartut inatsisaata nr. 5, 2. maj 1996-imeersup allanngortinneqarneranik Inatsisartut inatsisissaattut siunnersuut.

(Nunalerineq pillugu Siunnersuisoqatigiit piginnaatitaanerat katiterneqarnerallu).

pillugu

Inatsisartut Aalisarnermut Piniarnermut, Nunalerinermullu Ataatsimiititaliaata

ISUMALIUTISSIISSUTAA

siunnersuutip aappassaaneerneqarnerani saqqummiunneqartoq

Inatsisartut Aalisarnermut, Piniarnermut Nunalerinermullu Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Lars-Emil Johansen, Siumut, siulittaasoq
Inatsisartunut ilaasortaq Godmand Rasmussen, Atassut (Sinniisussaq)
Inatsisartunut ilaasortaq Ane Hansen, Inuit Ataqatigiit
Inatsisartunut ilaasortaq Per Rosing Petersen, Siumut (Sinniisussaq)
Inatsisartunut ilaasortaq Jens B. Frederiksen, Demokraatit
Inatsisartunut sinniisussaq Ole Thorleifsen, Siumut
Inatsisartunut sinniisussaq Per Rosing Petersen, Siumut

Inatsisartut Aalisarnermut, Piniarnermut Nunalerinermullu Ataatsimiititaliaata ulloq 5. oktobari 2007-imi siullermeerinermi inatsisartut inatsisissaattut siunnersuut misissorpaa. Siunnersuutip siullermeernerani naliginnaasumik Inatsisartuni partiinit tapersersorneqartoq Ataatsimiititaliamit maluginiarneqarpoq.

Siunnersuutip imaa

Nunalerineq pillugu Siunnersuisoqatigiit atuunnera piginnaatitaaneralu siunnersuummi inatsisitigut aalajangerneqarpoq. Aammattaaq Naalakkersuisoq Nunalerineq pillugu Siunnersuisoqatigiit suliassat isumaginissaannut Nunalerineq pillugu Siunnersuisoqatigiit piginnaatitaanerannut tunniussinermut maleruagassanik aalajangiinissaminut piginnaatitaavoq. Tamatuma saniatigut Nunalerineq pillugu Siunnersuisoqatigiinnut Naalakkersuisoq piginnaatitaanernik tunniussinermut maleruagassanik aalajangiinissaminut piginnaatitaavoq, taamaaliornikkut Siunnersuisoqatigiit inatsisitigut ingerlatsinermi aalajangiisinnaallutik ingerlatsinermut maleruagassat inatsisit sinaakkutaasa iluini nakkutilliisinnaallutik.

Tusarniaaneq

Siunnersuut nunalerineq pillugu siunnersuisarfimmut, Pinngortitaleriffimmut, Kanukokamut, Inuussutissarsiornermut Pisortaqarfimmut, Avatangiisimut Pinngortitamullu Pisortaqarfimmut, Aningaasaqarnermut Pisortaqarfimmut Nunanullu Allanut Pisortaqarfimmut tusarniaassutigineqarpoq. Ataatsimiititaliaq piffissamut tusarniaaffigineqartumut oqaaseqaatissaqanngilaq, naammattutut isigineqarmat. Nunalerineq pillugu siunnersuisarfiup oqaaseqaatai siunnersuutip ilusaanut tunnganerusut siunnersuummut ilanngunneqartut Ataatsimiititaliap immikkut maluginiarpaa.

Ataatsimiititaliap siunnersuummik suliarinninnera

Naalakkersuisup Nunalerineq pillugu Siunnersuisoqatigiit ilusilersorneqarnera suliassaasalu inatsisissaannut allannguummi matumani aalajangersarlugulu naleqqussarsimammagu ataatsimiititaliap pitsaasutut isigaa.

Nunalerinermi naalakkersuinermut pilersitsiniarnerit aalajangiisarnerillu siumut isigisut siunnersuutitigut pitsaanerusunik piviusunngortinneqarnissaannut periarfisseeqataassasoq ataatsimiititaliap nalilerpaa. Tamanna tunngavigalugu nunalerinermut immikkoortortaq nukittorsarneqarnissaa siunnersuummi tulluartumik tunngavilerneqartoq Ataatsimiititaliaq isumaqarpoq. 2009-mi kommunit kattussuuppata, Naalakkersuisunit inatsimmut allannguutissatut siunnersuummik saqqummiussisoqassasoq, imaalillugu Nunalerineq pillugu Siunnersuisoqatigiinnut kommunit allartitaat kommunini agguataarnerit malillugit aaqqinneqassasut, ataatsimiititaliap naggataatigut ilimagalugu oqaatigissavaa.

Islandske Landboforeningi Nunalerineq pillugu Siunnersuisoqatigiinni atorfilittut ilaasortaqassasoq kiisalu Nunalerineq pillugu Siunnersuisoqatigiit avataanit immikkut ilisimasalimmik aggersaasinnaassasoq Naalakkersuisut aappassaaneerinermi allannguutissatut siunnersuummik saqqummiussissasut ataatsimiititaliap isumaqatigiittup kaammattussavai.

ataatsimiititaliap isumaqatigiittup siunnersuut ilusiatut akuerisassanngorlugu inassutigaa, Naalakkersuisut allannguutissatut siunnersuummik Ataatsimiititaliap kaammatuineratut saqqummiussissappata.

Ataatsimiititaliap isumaqatigiittup siunnersuut akuerisassanngorlugu inassuteqaatigaa.

Taamatut oqaaseqarluni Inatsisartut Aalisarnermut, Piniarnermut Nunalerinermullu Ataatsimiititaliaata siunnersuut aappassaaniigassanngortippaa.

 

	Lars-Emil Johansen Siulittaasoq
Ane Hansen		Jens B. Frederiksen
Ole Thorleifsen		Godmand Rasmussen