10. august 2007

UKA 2007/41

 

Inatsisissamut oqaaseqaatit

Oqaaseqaatit nalinginnaasut

1. Aallaqqaasiut:

Naalakkersuisut 1993-imi Nunalerineq pillugu Siunnersuisoqatigiit pilersippaat Siunnersuisoqatigiit nunalerinermut tunngasutigut Naalakkersuisunut siunnersortaanissaat siunertaralugu.

Nunalerineq pillugu Siunnersuisoqatigiit maannakkut suliassarisaat Naalakkersuisunit akuerisaasoq naapertorlugu makkuninnga suliassaqartitaapput:

• Kalaallit Nunaanni nunalerinerup aqunneqarnerata iluani suliniutit nutaat pillugit Naalakkersuisunut oqaaseqaateqartassallutik.

• Nunalerinermut tunngatillugu nammineq suliniutigalugu Naalakkersuisut suliniutissanik nutaanik siunnersuuteqarnissamut imaluunniit inatsisit atuuttut allanngortinnissaanik siunnersuuteqaqqullugit inattarlugit.

• Nunalerinermi aningaasarsiornikkut ineriartorneq malinnaaffigissallugu paasissutissat katersorneratigut suliarineratigullu.

• Inuussutissarsiornerup tamakkiisup aningaasarsiornikkut pitsaasumik ineriartornissaa siuarsarumallugu siunnersuuteqartassalluni.

• Aningaasanut inatsimmi nunalerinermut tapiissutaasartut agguarneqarnissaannut atorneqarnissaannullu siunnersuuteqassalluni.

• Nunalerineq pillugu Siunnersuisoqatigiit suliaannut missingersuutit naatsorsuutillu Naalakkersuisut akuerisassaattut inassutigisassallugit.

• Nunalerinermut Siunnersorteqarfik aqutsisuuffigissallugu.

• Nunalerinermut politikki pingaarnerusoq sukkulluunniit atuuttoq naapertorlugu Nunalerinermut Siunnersorteqarfiup suliassani tulleriiaarneri nakkutigalugu.

• Upernaviarsummi misileraavimmut pisortaassalluni. Nunalerineq pillugu Siunnersuisoqatigiit misileraarnermut siunnersuisunik suleqatigiissitaliorsinnaapput misileraaviup suliniutaasa suliarinerannut akuerineqarneranullu siunnersuisussamik.

• Nunalerinermut politikki pingaarnerusoq sukkulluunniit atuuttoq naapertorlugu Upernaviarsummi misileraaviup suliassani tulleriiaarneri nakkutigissallugu.

Suliassat qulaani taaneqartut inatsisip allanngortinneqarneratigut pisariaqalerpoq nutarterneqarnissaannik. Nunalerinermut Siunnersorteqarfimmut Upernaviarsummilu misileraavimmut missingersuutit naatsorsuutillu Nunalerineq pillugu Siunnersuisoqatigiit missingersuutaanni naatsorsuutaannilu ilaapput. Nunalerineq pillugu Siunnersuisoqatigiit missingersuutit naatsorsuutillu Naalakkersuisunit akuerisassatut inassutigisarpaat.

Tassalu Nunalerineq pillugu Siunnersuisoqatigiinnut suliassarititat aqqutigalugit apeqqutinut nunalerinermut tunngasunut Naalakkersuisunut siunnersuisuuinnanngillat, aammali tamatuma saniatigut suliassat allaaserineqartut isumagisarlugit.

Nunalerinermut Siunnersuisoqatigiit suleriaasianni Naalakkersuisunit akuerineqartumi Naalakkersuisut aamma Nunalerineq pillugu Siunnersuisoqatigiit pisussaatippaat Siunnersorteqarfik Upernaviarsummilu misileraavik aqussagaat pisinnaatitaaffigalugulu pisussaaffigalugu nakkutigissallugu suliffeqarfiit taakkua sulissasut aningaasallu Landskassimit tapiissutaanerusut nunalerinikkut politikkimut pingaarnerusumut tunngatillugu naapertuuttumik atussallugit.

Tassalu Nunalernineq pillugu Siunnersuisoqatigiinnut aalajangiinnissamut aningaasaliissutinullu oqartussaaneq isumagisassanngortinneqarsimavoq tamannali inatsisikkut pisimanani. Tassalu inatsisitigut inissisimaneq tamanna maanna nunalerineq pillugu inatsisip allannguutissaatigut matumuuna allanngortinniarneqartoq.

2. Siunnersuummi pingaarnerusut:

Siunnersuummi pingaarneruvoq Nunalerineq pillugu Siunnersuisoqatigiit atuunnera oqartussaaffiilu inatsisitigut aalajangersassallugit. Siunnersuut aqqutigalugu Naalakkersuisut maleruagassanik aalajangiisinnaalissapput Nunalerineq pillugu Siunnersuisoqatigiit suliassanik isumaginnittunngortillugit pisussaaffilerneqarnissaannut, taassuma ilagalugu maleruagassanik aalajangiissallutik Nunalerineq pillugu Siunnersuisoqatigiit ingerlatsinikkut aalajangiisinnaanermik nakkutilliinissamillu piginnaatineqarnissaat.

Nunalerineq pillugu Siunnersuisoqatigiit nunalerineq pillugu Naalakkersuisunut siunnersuisuupput, kisiannili taamaalillutik piginnaatinneqalerlutik Nunalerinermut Siunnersorteqarfimmi Upernaviarsummilu misileraavimmi sulisunik atorfinititsinernik soraarsitsinernillu aalajangiisinnaanngorlutik.

Taamatut nalinginnaasumik oqartussaanermik ingerlatsisarnerup saneqqunneqarnera Naalakkersuisunit nalilerneqarpoq nunalerinermut sullissinermut pitsaanerpaajusoq.

Naalakkersuisut Nunalerineq pillugu Siunnersuisoqatigiit piginnaaneqarnerat suliassanillu avitsinerat imaalissaaq, Naalakkersuisut ukiumoortumik aningaasanut inatsisini nunalerinermut tapiissutissanik siunnersuusiortassasut. Naalakkersuisut nunalerinermut tunngasunik inatsisissanik nutaanik siunnersuusiussapput, maleruagassanullu atuuttunut allannguutissanik siunnersuusiussallutik.

Nunalerineq pillugu Siunnersuisoqatigiit qulaani pineqartut pillugit tusarniaavigineqartassaaq.

Nunalerineq pillugu Siunnersuisoqatigiit Namminersornerulluk Oqartussat ataanni pisortat suliffiutaannut ilaavoq taamatullu nalinginnaasumik ingerlatsinermi maleruagassat malittussaallugit, missingersuusiornermi naatsorsuusiornermilu maleruagassat, taamatullu atorfinititsisarnermi soraarsitsisarnermilu maleruagassat piumasaqaataasullu Namminersornerullutik Oqartussat ataanni atuuttut malillugit pisassallutik.

Nunalerineq pillugu Siunnersuisoqatigiit pisussaatitaassapput ukiut tamaasa missingersuusiussallutik kukkunersiukkanillu naatsorsuutinik suliaqassallutik Naalakkersuisunut akuerineqartussanngorlugit nassiunneqartussanik. Naalakkersuisut Nunalerineq pillugu Siunnersuisoqatigiit taassumalu ataani atorfeqarfiit nakkutigisassaraat.

Nunalerineq pillugu Siunnersuisoqatigiit suliassanik suliaqarnerat Naalakkersuisut sinnerlugit pissaaq. Taamaalillutik Naalakkersuisut pisinnaatitaapput pisussaatitaallutillu suliassat inatsisit atuuttut malillugit nalinginnaasumillu pisortanit ingerlatsinermi allaffissornermilu tunngaviusartut malillugit suliarineqarnersut nakkutigissallugit.

Naalakkersuit pisariaqartillugu Nunalerineq pillugu Siunersuisoqatigiinnut nakkutilliisassapput. Nunalerineq pillugu Siunnersuisoqatigiit nakkutilliivigineqarneranni, Naalakkersuisut suliat aalajangersimasut pillugit nalunaarusianik piumasaqarsinnaapput, missingersuutillu malittarineqarnersut nakkutilliivigissavaat. Naalakkersuisuttaaq Nunalerineq pillugu Siunnersuisoqatigiit aaqqissuunneqarnerminni ilinniagaqarsimanermik tunngavilimmik ingerlatsinermik aalajangiisinnaanermik piginnaasaqarnersoq nakkutigissallugu, aammalu qulakkiissallugu illersorneqarsinnaasumik naatsorsuuserisoqarnersoq nalunaarsuiffeqarnersorlu.

Nunalerineq pillugu Siunnersuisoqatigiit pisussaatitaapput Naalakkersuisut nakkutilliinerminnut atatillugu piumasaannik paasissutissanik nalunaaruteqassallutik. Paasissutissat piumasarineqartut Naalakkersuisut tigunngikkunikkit, taava Naalakkersuisut pisariaqartitsineq naapertorlugu pisussaaffeqarput Nunalerineq pillugu Siunnersuisoqatigiinnut piginnaatitsineq utertissallugu (maleruagassat aalajangerneqartut atorunnaarsillugit), taamaalilluni suliassat Naalakkersuisunit suliarineqalissallutik.

3. Aningaasatigut allaffissornikkullu pisortanut kingunissai:

Aningaasatigut allaffissornikkullu pisortanut kinguneqassanngilaq.

4. Inuussutissarsiutinik ingerlatsisunut aningaasatigut allaffissornikkullu kingunissai:

Inuussutissarsiutinik ingerlatsisunut aningaasatigut allaffissornikkullu kinguneqassanngilaq.

5. Avatangiisinut pinngortitamullu kingunissai:

Avatangiisinut pinngortitamullu kinguneqarnissaa ilimagineqanngilaq.

6. Innuttaasunut allaffissornikkut kingunissai:

Aningaasatigut allaffissornikkullu innuttaasunut kinguneqassanngilaq.

7. Naalagaaffeqatigiinnermut namminersornermullu tunngasut:

Soqanngilaq.

8. Pisortaqarfiit kaatuffiillu il.il tusarniaaviginerat:

Siunnersuut kommuninut nunalerinermilu kattuffinnut tusarniaassutigineqarsimavoq kattuffinnillu kalluarneqartunit tigulluarneqarluni.

 

Inatsisissatut siunnersuummi aalajangersakkanut ataasiakkaanut oqaaseqaatit

§ 1-imut

§ 14 a-mut.

Imm. 1-imut.

Naalakkersuisut Nunalerineq pillugu Siunnersuisoqatigiinnik pilersitsissapput ilaasortaralugit siulittaasoq Naalakkersuisunit toqqagaq, Ilaasortat marluk Savaatillit Peqatigiit Suleqatigiissut toqqagaat, ilaasortat pingasut kommuninit nunalerisoqartunit toqqakkat, ilaasortaq ataaseq Nunalerineq pillugu Siunnersuisoqatigiit suliffeqarfiutaanni sulisut sinniisaat, ilaasortaq ataaseq Neqi A/S-imit toqqagaq, ilaasortaq ataaseq Fødevareministerie-mit toqqagaq ilaasortarlu ataaseq Pinngortitaleriffimmit inassuteqaat tunngavigalugu Naalakkersuisunit toqqagaq. Fødevareministerie-p Nunalerineq pillugu Siunnersuisoqatigiinnut ilaasortamik toqqaanissaminnut peqataarusullutik nalunaarutigaa.

Ullumikkut nunalerinermik inuussutissarsiuteqarnerup annersaa Narsap, Qaqortup Nanortallillu kommuniiniimmata, taakku kommunit tamarmik ataatsimik Nunalerineq pillugu Siunnersuisoqatigiinni ilaasortaatitaqarput. 2009-mi kommunit kattussuunneqarpata piffimmit tassannga ilaasortanit toqqaasarneq ullumi toqaasarnertut issaaq. Paamiut Nuullu kommuuniini ataasiakkaanik nunaatileqarpoq. Nunaatillit taakkunaniittut Savaatillit Peqatigiit Suleqatigiissut aqqutigalugu Nunalerineq pillugu Siunnersuisoqatigiinni sunniuteqarniarsinnaapput.

Siunnersuut Nunalerineq pillugu Siunnersuisoqatigiinnit ullumikut atuuttunit allaanerungaanngilaq. Siunnersuummili siunnersuutigineqanngilaq Islandske Landboforening sinniiseqassasoq. Naalakkersuisut isumaqarput kattuffimmit taassuminnga paasissutissat pisariaqarnerat malillugu piniarneqarsinnaasut.

Imm. 2-mut.

Naalakkersuisut Nunalerineq pillugu Siunnersuisoqatigiit sulinerannut malittarisassiussapput.

Nunalerineq pillugu Siunnersuisoqatigiit Namminersornerullutik Oqartussat missingersuusiornermut, naatsorsuusiornermut naatsorsuutinillu saqqummiussinissamut maleruagassaat qaqugukkulluunniit atuuttut malissavaat. Nunalerineq pillugu Siunnersuisoqatigiit ukiut tamaasa Naalakkersuisunut, Naalakkersuisut piffissaliussaata iluani, missingersuutissatut siunnersuummik ukiumut aningaasaliiffiusussamut tulliuttumut tunngasumik tunniussisassapput.

Immikkut piumasaqaataavoq Nunalerineq pillugu Siunnersuisoqatigiit Nunalerinermut Siunnersorteqarfimmut Upernaviarsummilu misileraavimmut suliarineqartussanik ingerlatsinermullu missingersuutinik Naalakkersuisunut nassiussissasut. Taamatuttaaq piumasaqaataavoq, Nunalerineq pillugu Siunnersuisoqatigiit suliffeqarfiit ataaniittut suleqatigalugit ukiut tamaasa ukiumut nalunaarummik saqqummiussaqartassasut, nunalerneq pillugu politikkimut pingaarnermut naleqqiullu sunik suliaqarsimanernik angusanillu oqaluttuartumik.

Nunalerineq pillugu Siunnersuisoqatigiinni ilaasortat Inatsisartuni Naalakkersuisunilu il. il. ilaasortat aningaasarsiaqartitaanerat il. il. pillugit Inatsisartut inatsisissaat malillugu Namminersornerullutik Oqartussat sinnerlugit sulisinneqartut inatsisartunut ilaasortaanngitsunut akissarsiaritinneqartartut malillugit akissarsisinneqartassapput.

§ 14 b-mut.

Nunalerineq pillugu Siunnersuisoqatigiit nunalerineq pillugu apeqqutinut Naalakkersuisunut siunnersuisuupput. Pisortaqarfik nunalerinermik akisussaasuusoq ullumikkusut Nunalerineq pillugu Siunnersuisoqatigiinnut allatseqartitsisassapput.

Allatseqartitsinermi suliassat ilagaat Nunalerineq pillugu Siunnersuisoqatigiit ataatsimiinnissaannik piareersaaneq, oqaluuserisassanik suliaqarneq, Nunalerineq pillugu Siunnersuisoqatigiit ulluinnarnilu aqutsisut ataatsimiinnerannik imaqarniliorneq, aammalu Nunalerineq pillugu Siunnersuisoqatigiit aalajangigaannik naammassinninneq.

§ 14 c-mut.

Imm. 1-imut.

Naalakkersuisut malittarisassanik aalajangiisinnaapput, Nunalerineq pillugu Siunnersuisoqatigiit siulittaasuata imaluunniit ataatsimiitsitaliap ataaniittup piginnaatitaanissaanik sulianik nalornigisassaanngitsunik aalajangiisinnaanngortillugit, imaluunniit Nunalerineq pillugu Siunnersuisoqatigiinni suliat assigiiaat aalajangiivigineqartarnerat naapertorlugu aalajangiisinnaanngortillugit.

Naalakkersuisut Nunalerineq pillugu Siunnersuisoqatigiit Naalakkersuisut sinnerlugit aalajangiisarnissaannut maleruagassanik aalajangiisinnaapput. Tassaasinnaapput suliassanut aalajangersimasunut Naalakkersuisut pisinnaatitsinerat. Aamma Naalakkersuisut Nunalerineq pillugu Siunnersuisoqatigiit peqqusinnaavaat soorlu aningaasat inatsisaanni aningaasaliissutinut killingisa iluanni misileeqqullugit ilisimatusaqqullugilluunniit kiisalu siunertanut tamakkununnga avataaniit aningaasaliisussarsioqqullugit.

Imm. 2-mut.

Naalakkersuisut maleruagassanik aalajangiisinnaapput Nunalerineq pillugu Siunnersuisoqatigiit piginnaatilerlugit Nunalerinermut siunnersorteqarfimmi aamma Upernaviarsummi misileraavimmi aqutsinissamut ingerlatsinissamullu, Nunalerineq pillugu Siunnersuisoqatigiinnik Nunalerinermut siunnersorteqarfimmi aamma Upernaviarsummi misileraavimmi atorfinitsitsinernut, toqqaanernut soraarsisitsinernullu piginnatitsisumik. Nunalerineq pillugu Siunnersuisoqatigiit, Naalakkersuisut piffissaliussaata iluani, ukiut tamaasa ukiumut aningaasarsiorfiusumut tulliuttumut missingersuutinik Naalakkersuisunut siunnersuuteqartassapput. Siunnersuummi missingersuusiorneqarsimassapput isertitassatut naatsorsuutit, ingerlatsinermi aningaasartuutit aammalu sanaartornissamut aningaasartuutit.

§ 14 d-mut.

Aalajangersakkat Naalakkersuisunut maalaarutigineqarsinnaasut, allakkatigut nalunaarutigineqarunik maalaarsinnaanermi sumut maalaarsinnaanermut, qanorlu maalaarsinnaamut ilitsersuummik imaqassapput. Tamannali atuutinngilaq aalajangikkap pineqartoq isumaqatigilluinnarpagu.

Aalajangikkat inatsisit malillugit piffissap aalajangersimasup iluani eqqartuussivinnut taamaallaat tunniunneqarsinnaappata, tamanna pillugu paasissutissanik ilaqartinneqassapput.

§ 2-mut.

Siunnersuutigineqarpoq Inatsisartut inatsisaat 1. december 2007-imi atuutilissasoq.