9. novembari 2007 UKA 2007/41
Uunga
allannguutissatut siunnersuut
Siunnersuut: Nunalerineq pillugu Inatsisartut inatsisaata nr. 5, 2. maaji 1996-imeersup allanngortinneqarneranik Inatsisartut inatsisissaattut siunnersuut pillugu
Inatsisartut inatsisaat nr. xx, xx 2007-imeersoq.Inatsisartut Aalisarnermut, Piniarnermut Nunalerinermullu Ataatsimiititaliaanit pingajussaaneerinermut saqqummiunneqartoq.
§ 1-imut
1. Nr. 1-imi § 14a, imm. 1-ip kingorna ilanngunneqassaaq:
"Imm. 2. Nunalerineq pillugu Siunnersuisoqatigiit sapinngisamik Islandimiut nunalerinermut ilisimatusarfiannit taaseqataasinnaanani peqataasartumut atatinneqassaaq. Nunalerineq pillugu Siunnersuisoqatigiit pisariaqartitsineq malillugu avataanit immikkut ilisimasalinnik ikiorneqartassaaq, tassunga ilanngullugu Kalaallit Nunaaneersuunngitsumik immikkut ilisimasalinnik nunanit allaneersunik."Imm. 2 taamaalilluni imm. 3-nngorpoq.
Nalinginnaasumik nassuiaatit
Inatsisartut inatsisaata allanngortinneqarneranik inatsisartut inatsisissaattut nr. 5, 2. maaji 1996-imeersumut Naalakkersuisut siunnersuutaat siunnersuummut nalinginnaasumik nassuiaatit naapertorlugit "Siunnersuummi Nunalerineq pillugu Siunnersuisoqatigiit atuunnera oqartussaaffiilu inatsisitigut aalajangersassallugit" siunertaraa.
Siunertamut tassunga naapertuuttumik allannguutissatut siunnersuut matumani pineqartoq aalajangersakkanik Nunalerineq pillugu Siunnersuisoqatigiinnut taaseqataasinnaanani peqataasartumik toqqaasarneq pillugu maleruagassiussaaq kiisalu Nunalerineq pillugu Siunnersuisoqatigiit avataanit immikkut ilisimasalinnit ikiorneqarsinnaanngorlugu.
Allannguutissatut siunnersuut imatut aalajangerneqassaaq, Nunalerineq pillugu Siunnersuisoqatigiit sapinngisamik Islandimiut nunalerinermut ilisimatusarfianit taaseqataasinnaanani peqataasartumut atatinneqassalluni kiisalu Nunalerineq pillugu Siunnersuisoqatigiit pisariaqartitsineq malillugu avataanit immikkut ilisimasalinnik ikiorneqartassaaq, tassunga ilanngullugu nunani allani immikkut ilisimasalinnit.
Misilittakkat naleqquttut Kalaallit Nunaata avataanit pissarsiarineqartut atorneqarnerisigut iluaqutissarsinissaq tamatuma siunertaraa.
Aningaasatigut allaffissornikkullu kingunerisassat
Nunalerineq pillugu Siunnersuisoqatigiit suleriaaseq atugaat atorlugu oqartussaasunik, suliniaqatigiiffinnik, suliffeqarfinnik immikkullu ilisimasalinnik taaseqataasinnaanani peqataasitsisarnissaq periarfissaalissasoq Naalakkersuisut paasissutissiissutigaat.
Allannguutissatut siunnersuutikkut periarfissaq tamanna mattunneqarpoq, immikkummi ilisimasalinnik siunertamut tunngatillugu pilersitaagallartumit Nunalerineq pillugu Siunnersuisoqatigiit killeqanngitsumik ikiorneqarnissamut pisinnaatitaalissammata.
Allannguutissatut siunnersuut tunngaviatigut isigalugu aningaasartuutit amerlisinnagit sipaaruteqarnissaq kingunerisinnaassagunarpaa.
Islandimi nunalerinermut ilisimatusarfimmit taaseqataasinnaanani peqataasartumik toqqaanissaq kiisalu Nunalerineq pillugu Siunnersuisoqatigiit nunanit allanit immikkut ilisimasalinnik atuisinnaanerannut oqaluttaanernut/nutserinernut, kiisalu angalanernut aningaasartuutinut, ullormusianut akissarsianullu il.il. nassataqarsinnaasoq ilimagineqassaaq.
Aningaasartuutit taamaattut sukkulluunniit aningaasaliissuteqarnermi killiliussatut aalajangikkat iluini Nunalerineq pillugu Siunnersuisoqatigiinnit akilerneqarsinnaassapput.
Allannguutissatut siunnersuutip Nunalerineq pillugu Siunnersuisoqatigiit suleriaasiata misissoqqinnissaa pisariaqalersissinnaavaa. Allaffissornikkut sulisunik atuisinnaaneq pingaartuunngitsutut missingerneqarpoq (annerpaamik nal. ak. 10 nutserineq ilanngullugu).
Aalajangersakkanut ataasiakkaanut nassuiaatit
Nr. 1-imut
Aalajangersakkakkut Nunalerineq pillugu Siunnersuisoqatigiit sapinngisamik Islandimiut nunalerinermut ilisimatusarfianit taaseqataasinnaanani peqataasumut atatinneqassaaq.
Taaseqataasinnaanani peqataatinneqartoq Nunalerineq pillugu Siunnersuisoqatigiit ataatsimiinnerini peqataasassaaq, taasisinnaatitaananili. Nunalerineq pillugu Siunnersuisoqatigiinnit illersorneqarsinnaassappat, taaseqataasinnaanani peqataatinneqartoq ataatsimiinnerni oqarasuaatikkut telemiluunniit ataatsimeersuarnerni atortut atorlugit ataatsimiinnernut peqataasinnaassasoq naatsorsuutigineqassaaq.
Nunalerineq pillugu Siunnersuisoqatigiit ataatsimiinnerini Islandimi nunalerinermut ilisimatusarfik sulisuiluunniit Namminersornerullutik Oqartussat peqataaqqullugit peqqusinnaanngilaa. Islandimi nunalerinermut ilisimatusarfik isumaqataappat taaseqataasinnaanani peqataatitaqarsinnaaneq aatsaat taamaalilluni pisinnaassaaq.
Nunalerineq pillugu Siunnersuisoqatigiit pisariaqartitsineq malillugu immikkut ilisimasalinnik ikiortissinnaassasoq aammattaaq siunnersuutigineqarpoq, tassunga ilanngullugu nunani allani immikkut ilisimasalinnit. Nunalerineq pillugu Siunnersuisoqatigiit ataatsimiinnermi ataatsimi arlalinniluunniit immikkut ilisimasallit peqataanissaat saaffiginnissutigisinnaavaat, oqarasuaatikkuusinnaavoq imaluunniit telemi ataatsimeersuarnermut atortut atorlugit pisinnaalluni. Nunalerineq pillugu Siunnersuisoqatigiit aamma avataanit immikkut ilisimasallit allakkatigut naliliinernut, nassuiaatinut assigisaannulluunniit siunnersuisoqatigiit ikiortisigissallugit saaffigisinnaavaat.
Avataanit immikkut ilisimasallit sorliit qassilluunniit Nunalerineq pillugu Siunnersuisoqatigiinnit ikiortiserineqarsinnaasut pillugit aalajangersagaq killiliinngilaq. Avataanit immikkut ilisimasallit taamaallaat Nunalerineq pillugu Siunnersuisoqatigiinnit siunertarineqartunut tunngatillugu pilersitaagallartumut taamaallaat tunngatinneqarsinnaapput. Islandimi nunalerinermut ilisimatusafimmit aallartitaq ataaseq taamaallaat Nunalerineq pillugu Siunnersuisoqatigiinnut taaseqataasinnaanani peqataatitatut aalajangersimasumik atorneqarsinnaavoq.
Nunalerineq pillugu Siunnersuisoqatigiinnit immikkut ilisimasalinnit ikiorneqarnermut il.il. aningaasartuutit taamaattut sukkulluunniit aningaasaliissuteqarnermi killiliussatut aalajangikkat iluini akilerneqarsinnaapput.