22. oktobari 2007 UKA 2007/33
UKA 2007/34
Aningaasarsianit akileraarutit pillugit Inatsisartut inatsisaata Allanngortinneqarneranik Inatsisartut inatsisissaattut siunnersuut.
(Aappariit ataatsimut akileraartussaatitaanerannik atorunnaarsitsineq, aammalu selskabit piginneqatigiissut iluminni nuutsinerinut akeqartitsinermut, aamma selskabit imminnut pigisut aningasanik attartortarnerinut CFC-mik akileraarusiineq pillugit malittarisassanik atuutilersitsineq)
(UKA 2007/33)aamma
Akileraaruserinermik ingerlatsineq pillugu Inatsisartut inatsisaata allanngortinneqarnissaanik siunnersuut.
(Aappariinnik ataatsimut akileraarusersuinerup atorunnaarnera naqeriikkamillu namminneerlunilu nalunaarusiorneq)
(UKA 2007/34)pillugu
Inatsisartut Akileraartarnermut Akitsuusiisarnermullu Ataatsimiititaliaata
ISUMALIUTISSIISSUTAA
Siunnersuutip aappassaaneerneqarnerani saqummiunneqartoq
Inatsisartut Akileraartarnermut Akitsuusiisarnermullu Ataatsimiititaliaat suliarinninnermini u-kuninnga inuttaqarpoq:
Inatsisartunut ilaasortaq Kristian Jeremiassen, Atassut (siulittaasoq)
Inatsisartunut ilaasortaq Juliane Henningsen, Inuit Ataqatigiit
Inatsisartunut ilaasortaq Lene Knüppel, Demokraatit
Inatsisartunut ilaasortaq Ole Thorleifsen, Siumut (sinniisussaq)
Inatsisartunut ilaasortaq Ruth Heilmann, Siumut (sinniisussaq)Inatsisartut Akileraartarnermut Akitsuusiisarnermullu Ataatsimiititaliaata UPA 2007-imi siunnersuutinik siullermeerineq tunngavigalugu siunnersuutit inatsisissatullu siunnersuutinut nassuiaatit, tusarniaanermillu atortussat pissarsiarineqartut misissuataarpai.
Tusarniaaneq.
Siunnersuutit piffissami apriilip 30-annit 2007 juunip sisamaanut 2007 ataatsimut tusarniaassutitut nassiunneqarput, akissutillu allanneqarnerinut oqaatsit atorlugit tusarniaanermut akissutit nuutinneri Akileraartarnermut Akitsuusiisarnermullu Ataatsimiititaliamit tiguneqarlutik. Tusarniaanermit akissutit inatsisissatut siunnersuutinut nassuiaatit nalinginnaasut atorlugit Naalakkersuisunit oqaaseqarfigineqarput.
Siunnersuutit Inatsisartunit siullermeerneqarnerat.
Aningaasarsianit akileraarutit pillugit Inatsisartut inatsisaata allanngortinneqarneranik Inatsisartut inatsisaattut siunnersuut (UKA 2007/33) Inatsisartunit siullermeerneqarmat partiit Siumut Atassullu apeqqusiinatik tapersiipput, partiillu sinneri assigiinngitsunik apeqquteqarlutik nalorninerminnik nalunaaruteqarlutik.
Akileraaruserinermik ingerlatsineq pillugu allanngortinneqarnissaanik siunnersuut (2007/34) Inatsisartunit siullermeerneqarmat partiit Siumut Demokraatillu apeqqusiinatik tapersiipput, Kattusseqatigiilli Partiiat itigartinneqaqqullugu inassuteqarluni. Partii Atassut arlalinnik apeqquteqarpoq nalorninerminilluunniit nalunaaruteqarluni.
Aningaasaqarnermut Nunanullu Allanut Naalakkersuisoq oktobarip 12-iat 2007 allagaqarluni siunnersuutip siullermeerneqarnerani apeqqutitut saqqummiunneqartunut itisiliilluni akissummik nassitsivoq. Naalakkersuisunut ilaasortap allagaa isumaliutissiissummut matumunnga ilanngussaq 1-tut ilanngunneqarpoq.
Kukkunersiuisoqarfik Deloitte tusarniaanermut akissumminik ulloq juunip sisamaat 2007-meersumik oqaatigalugit saqqummiussamik itisiliissasut Akileraartarnermut Akitsuusiisarnermullu Ataatsimiititaliamit qinnuigineqarput. Ulloq oktobarip 20-at 2007 tusarniaalluni ataatsimiinnermi ataatsimiititaliap kissaataa naammassineqarpoq. Deloittemit tusarniaanermut akissutaasimasoq kiisalu tusarniaalluni ataatsimiinnermit allakkiaq isumaliutissiissummut matumunnga ilanngussaq 5-tut 6-tullu ilanngunneqarput.
Akileraartarnermut Akitsuusiisarnermullu Ataatsimiititaliamit isumaliutigineqartut.
Aappariit ataatsimut akileraartussaatitaanerannik atorunnaarsitsineq pillugu Akileraartarnermut akitsuusiisarnermullu Ataatsimiititaliaq oqaaseqarpoq, Naligiissitaanermut Siunnersuisoqatigiinnit saaffiginnissut tunngavigalugu ataatsimiititaliap 2006-mi kissaat saqqummiussaa Naalakkersuisut malikkaat. Naligiissitaanermut Siunnersuisoqatigiinnit saaffiginnissut, Akileraartarnermut Akitsuusiisarnermullu Ataatsimiititaliamit tamatuma malitsigisaanik Naalakkersuisunut apeqqutit kiisalu Aningaasaqarnermut Nunanullu Allanut Naalakkersuisumit akissutitut allagaq isumaliutissiissummut matumunnga ilanngussaq 2-tut, 3-tut 4-tullu nassiunneqarput.
Aappariit ataatsimut akileraartussaatitaanerannik atorunnaarsitsineq allat tamaasa allanngortinnagit innuttanut pisortanullu annikitsumik aqutsinikkut pisarissersuutaalaassasoq ilumoorpoq. Arnalli amerlasuut paasineqarluarsinnaasumik aningaasaqarnikkut inersimasuunngitsutut aappaminnut maliguutiinnartussatut inatsiseqarnikkut ajoqusigaasimasutut misigisimasarmata ataatsimiititaliap ilisimaaraa. Ullumikkut arnat ilaqutariinnik pilersuinermi annertuumik isumaginneqataanerat qaqutigoortuunngimmat qanga arnanik isiginneriaatsimut inatsiseqarneq ersiutaasoq naleqqukkunnaarsimavoq.
Isertitat pigisallu akisuut aalajangersimasut akileraartarnikkut inatsisitigut immikkoortiterneqarnissaat inatsisip allannguutaata pisariaqalersissammagu aammattaaq ilumoorpoq, taakkulu siunissami nuliaasumut taamatullu uiusumut naatsorsuunneqassallutik. Taamatut immikkoortiterineq ataasiaannartumik pisussaasoq aappariit akornanni pisut ilaanni isumaqatigiinnginnermik pilersitsisinnaammat ilumuunnginnerarneqarsinnaanngilaq, tamannalumi aamma Inatsisartut suliarinninneranni tikkuarneqarluni. Peqqutaagajuttoq tassaassaaq uiusup nassuerutigiumassanngimmagu arnap pigisani isertitallu nammineerluni oqartussaaffigigai. Aappariit akornanni inatsimmut allannguut taamaattoq eqqisseqatigiinnginnermut patsisaassappat ajuusaarnartorujussuussagaluartoq, tunngavilersuutip tamatuma erseqqissaannarpaa inatsimmut allannguutigititassatut siunnersuutigineqartoq pingaartuusoq. Taamaalilluni aningaasarsianit akileraartarneq pillugu inatsit inuiaqatigiinni arnartatta inatsisitigut aningaasaqarnikkulluunniit aappaminnik isumalluuteqartutut isigineqartuarnissaannik paatsuuisitsisuujuaannartariaqanngilaq.
Ataatsimut akileraarusigaanerup atorunnaarsinneqarneratigut aningaasaqarnikkut pitsaanngitsumik kinguneqaatinik innuttat misigisaqarnissamut aarleqquteqarsinnaanerat pillugu Aningaasaqarnermut Nunanullu Allanut Naalakkersuisoq tamatuma pinnginnissaa qulakkeerumallugu allannguutissatut siunnersuuteqarnissaq allakkamini ilimasaarutigaa.
Tamanna tunngavigalugu aappariit ataatsimut akileraaruserneqartarnerisa atorunnaarsinneqarnissaanik siunnersuut Akileraartarnermut Akitsuusiisarnermullu Ataatsimiititaliap ilassilluarpaa, neriuutigalugulu ilaqutariinni, taamatullu inuiaqatigiit ataatsimut isigalugit, tamanna naligiissitaaneq pillugu pitsaasumik oqaloqatigiinnermut sunniuteqaqataassasoq. Ataatsimiititaliamittaaq iluarisimaarneqarpoq aningaasarsianik nammineerluni nalunaaruteqarnermi naqeriikkanik atuutilersitsinissamut inatsisissatut siunnersuut periarfissiissammat, taamatullu pisariillisaaneq aningaasarsianik nammineerluni nalunaaruteqarnerit amerlinerinik taarteqarumaarmat.
Nuussinermut akeqartitsineq, CFC-mik akileraarusiisarneq annikitsumillu aningaasannguisarnermut maleruagassat pillugit Akileraartarnermut Akitsuusiisarnermullu Ataatsimiititaliap iluarisimaarlugu maluginiarpaa nunani tamalaani inatsiseqarnermut tunngasumi tamatumani pisariusumut Kalaallit Nunaat malinnaasinnaalissammat.
Nunarsuarmi ukiuni kingullerni ineriartornerup nassatarisimavaa nunat akornanni killeqarfiit apeqqutaatinnagit suliffeqarfiit sukkasuumik aningaasanik nuussisinnaalernerat. Nunarsuarmi erniat appasissumik inissisimanerisa kingunerisimavaa iluanaarniutitut pissusilimmik inuussutissarsiornikkut ingerlatanut sukkasuumik aningaasarpapiluunersuarnik aningaasaliisoqarsinnaalersimammat, amerlasuutigut nunani ataasiakkaani akileraartarnikkut inatsiseqarnerup assigiinngissuteqarnerata anguniagaqarfiulluinnartumik atorneqarneratigut. Taamatut ineriartortoqarnera nunarsuarmi naalagaaffiit aningaasaqarniarnerat pisortallu aningaasaataat taamatut kissaatiginanngitsumik kingunerisat annertusiartortumik oqimaatsorsiortippaat, taamaaliartuaarnerlu nunani tamalaani inatsiseqarnikkut ataqatigiissaakkamik iliuuseqarnikkut taamaallaat pinngitsoorneqarsinnaavoq.
Maleruagassat nutaat akuersissutiginerisigut Kalaallit Nunaat taamatut suleqatigiinnermi naligiissitatut inissisimalissaaq.
Nunani assigiinngitsuni akileraarutinut tunngatillugu inatsiseqarnerit nunanit tamalaanit aningaasaliisussarsiornikkut unammilleqatigiittoqarmat tamatumunnga ilanngullugu nassuerutigisariaqarpoq. Nunani tamalaani ingerlatseqatigiiffinnit aalajangiisuusumik sunniutilinnut nunatsinni akileraarusiisarnermut maleruagassat sakkortuutut isumaqarfigineqarpata nunatta aningaasaliivissaqqissutut nittarsaanneqarnissaanik namminersornerullutik oqartussat kissaataat illua tungilerneqassaaq. Aatsitassanik iluaquteqarniarnerit tunisassiornerillu nukissiuutinik annertuumik atuiffiusut annertuunik pilersaarusiugassat aningaasaliivigineqartariaqartullu pilersinneqarnissaat tamatuma ilaatigut aporfisseratarsinnaavaa.
Annikitsumik aningaasannguisarnermut maleruagassat (UKA 2007/33) nunanut allanut sanilliussigaanni sakkortuginarsinnaasut tassunga atatillugu ataatsimiititaliaq paasisaqarpoq, namminerisamik aningaasaatinut tunngatillugu taarsigassarsisitsinermut annertussuseq 2:1-mut angissusia qaangerneqarpat akileraarutitigut kinguneqaatit killup tungaanut sunniutissammata. Nunani allani taarsigassarsinissamut annertussutsitut akuerisaasoq sallaannerulluni assersuutigalugu annertussuseq 3:1-uvoq, 4:1-ulluniluunniit, taamaalillunilu suliffeqarfiit aningaasaqarnikkut naammineernerullutik iliuuseqarsinnaanerat annertunerulluni.
Tunngavittut saqqummiussaq tunngavigalugu Naalakkersuisut taarsigassarsisitsinermi annertussusissatut siunnersuutigisaat 2:1 Akileraartarnermut Akitsuusiisarnermullu Ataatsimiititaliamit isumaqatigalugu toqqarneqarpoq, Naalakkersuisulli kaammattorlugit nunani allani tamatumunnga atuuttunik maleruagassanut maleruagassaq taanna sanilliullugu Naalakkersuisut sukumiisumik ingerlaavartumillu misissuiffigisassagaat, Ilanngussamilu 6-mi taaneqartutut maleruagassanut allanut sanilliullugu maleruagassamut ajornartorsiutit annikillisinniarlugit anguniagaqarfiusumik aaqqissutissarsiniarlutik Naalakkersuisut suliaqassasut ataatsimiititaliap ilanngullugu kaammattorpai. Piffissaq naleqquttoq atorlugu tassunga tunngasumik Naalakkersuisut erseqqinnerusumik isumaliutersuutaat Akileraartarnermut Akitsuusiisarnermullu Ataatsimiititaliamit tusarumaneqarput.
Akileraartarnermut Akitsuusiisarnermullu Ataatsimiititaliap inassuteqaataa.
Akileraartarnermut Akitsuusiisarnermullu Ataatsimiititaliaq isumaqatigiittoq siuliani oqaaseqaatini tunngavigalugit inassuteqarpoq Naalakkersuisut allannguutitut siunnersuuteqarnissamik ilimasaarutaanni takuneqarsinnaasutut allannguutinik ilallugu siunnersuut aappassaanerinermi saqqummiunneqartoq Inatsisartut akuersissutigissagaat.
Taama oqaaseqarluni Inatsisartut Akileraartarnermut Akitsuusiisarnermullu Ataatsimiititaliaata siunnersuut aappassaaniigassanngortippaa.
Kristian Jeremiassen
SiulittaasoqOle Thorleifsen
Ruth Heilmann
Juliane Henningsen
Lene Knüppel