1. august 2007 UKA 2007/34
Inatsisissatut siunnersuummut nassuiaatit
Nalinginnaasumik nassuiaatit
1. Inatsisissarut siunnersuutip tunuliaqutaaNaalakkersuisut isumaqarput aappariit inooqatigiit ataatsimoortumik akileraarusigaasarnerata atorunnaarsinneqarnissaanut piffissanngortoq. Siunnersuummi § 1, nr. 1, (Inatsisartut inatsisaanni § 10-mi allannguineq) tamatuma toqqartumik kinguneraa. Siunnersuut aappariit inooqatigiit ataatsimoortumik akileraaruserneqartarnerata atorunnaarsinneqarnissaannut tunngasumik allannguinissamik siunnersuummut, aningaasarsianit akileraarutit pillugit inatsisaata allanngortinnissaanik inatsimmi, aamma 2007-imi ukiamut ataatsimiinnermi saqqummiunneqartumut (UKA 2007/xx) atatillugu isigineqassaaq.
Inatsisartut 2006-imi ukiakkut ataatsimiinneranni akileraaruserinermik ingerlatsineq pillugu Inatsisartut inatsisaata allanngortinneqarnissaanik siunnersuutip (UKA 2006/29) suliarineqarnerani Naalakkersuisut nalunaarutigaat akileraartartut ilaasa nammineerlutik nalunaaruteqartannginnissaannut, taarsiullugulu akileraaruserivik akileraarusiinermik pineqartunut nassitsisarnissaanut periarfissat misissorniarlugit. Inatsisartuni partiit arlaqartut taamatut isumaliuteqarnermik iluarinnillutik oqaaseqarput.
Allannguinerit § 1, nr. 2-miit 7-imut siunnersuutigineqartut misissuinernit kingunerisimavaat.
2. Inatsisissatut siunnersuutip immikkoortui pingaarnerit
Siunnersuut UKA 2006/29-ip oqaluuserineqarnerani oqaatigineqartutut annertussuseqanngilaq, tassami kikkut tamarmik nammineerluni nalunaarummik akileraarusigaanermillu aalajangiinernik suli tigusaqartartussaammata.
Ullumikkumit allaanerussutaasumik nammineerluni nalunaaruteqarfissat akissarsiat il.il. pillugit paasissutissanik akileraaruseriviup pigisaanik imaqareertassapput. Tamatumuunakkut amerlasuut pingaartumik akissarsiaqartuusut paasissutissat naqinneqarsimasut eqqortuunersut tamakkiisuunersullu misissuiinnartartussaassallutik. Taamaattoqartillugulu akileraartartut allamik iliuuseqartariaqassanngillat kingusinnerusukkullu akileraarusiinermik aalajangiinermik tigusaqassallutik.
Paasissutissiissutit eqqunngippata paasissutissanilluunniit amigaateqarpat, akileraartartup nammineerluni nalunaarfissaq paasissutissanik eqqortunik amigaataasunilluunniit immersussavaa akileraaruserivillu tamakku pillugit ilisimatillugu kingusinnerpaamik ukiumi pineqartumi 1. maj nallertinnagu.
Naqeriikkanik nammineerluni nalunaarutit iluaqutissartaa paasissutissat akileraaruseriviup nammineerluni nalunaarusianut paasissutissat eqqortut ilanngussinnaasaat amerliartortillugit annertusiartussaaq. Taamaattumik siunnersuutigineqarpoq Naalakkersuisut sulisitsisut, kommunit, Namminersornerullutik Oqartussat, sulisut soqutigisaqaqatigiiffii, sulisitsisut peqatigiiffii, aningaaseriviit il.il. ukiut tamaasa paasissutissanik assigiinngitsunik akileraaruserivimmut nalunaaruteqartarnissaat pillugu malittarisassanik aalajangersaasinnaanermut pisinnaatitaaffilerneqassasut. Tamatumanilu tamatigut pineqarlutik paasissutissat iluaqutaasumik nammineerluni nalunaarummi naqeriikkami ilaatinneqarsinnaasut.
Paasissutissat ilaannut tunngatillugu siunnersuutigineqarpoq nalunaaruteqarnissamut pisussaaffik kommuninuinnaq Namminersornerullutik Oqartussanullu taamaallaat atuutsinneqassasut, assersuutigalugu § 33 a, imm. 1-imut siunnersuut naapertorlugu. Tamannalu patsiseqarpoq inuussutissarsiuteqartut ilaannut paasissutissat pineqartut pillugit nalunaaruteqarnissamut pisussaaffiup, paasissutissat nalunaarutigineqarnerata iluaqutissartaanut naleqqutinngitsumik nanertuutaasunik nassataqarnissaat. Kommunit Namminersornerullutik Oqartussallu naatsorsuutinut periuserisaat tamatumunnga atatillugu ima inaarsagaatigisimasutut isigineqarput, nalunaaruteqarnissamut pisussaafeqarnerup iluaqutissartaasunut naleqqutinngitsumik kinguneqarnissaat ilimagineqarani. Inuussutissarsiutinik ingerlataqartut paasissutissanik tamakkuninnga nalunaaruteqarnissamut pisussaaffilerneqanngikkaluartut, akileraaruseriviup suliffeqarfiit paasissutissanik pineqartunik akileraarusiinissami atugassanik, Inatsisartut inatsisaanni paasissutissanik il.il. pissarsisinnaaneq pillugu kapitali 14-imi malittarisassat malillugit piumaffigisinnaavai.
Taamatut nalunaaruteqarnissamut pisussaaffiit, nalunaaruteqarnissamut pisussaafeqartuusut edb-mik atortuisa il.il. nalunaaruteqartarnerni suliassanik naammassinnissinnaalernissaannik ilimaginninneq naapertorlugu atuutsinneqalernissaat Naalakkersuisut naatsorsuutigaat. Naalakkersuisut ilimagaat tamanna 2008-p naanerani pisinnaassasoq, taamaammallu 2008-mut nammineerluni nalunaaruteqarnermut paasissutissat, siunnersuummi imaritinneqartut tamakkiisumik ilaalernissaat naatsorsuutigineqqarpoq, paasissutissalli 2007-imut nammineerluni nalunaarummi naqeriikkatut ilaatinneqartut ikinnerussallutik.
3. Aningaasat tungaasigut allaffissornikkullu pisortanut sunniutissai
Nalunaaruteqarnissamut pisussaaffiit nutaat kommunit Namminersornerlutik Oqartussallu edb-mik atortuinik naleqqussaanermut annertunerusumik aningaasartuutinik 300.000 koruuninik nassataqarnissaat ilimagineqarpoq. Namminersornerullutik Oqartussat edb-mik atortuinut tunngatillugu naatsorsuutigineqarpoq tamakkua aningaasaliissutaareersut iluanni aningaasartuutigineqassasut.
Paasissutissat nalunaarutigineqartut amerleriarnerisa nukippaalussuit sipaaruteqaatigitissavaat ullumikkut minnerunngitsumik akissarsiaqartunik akileraarusiinernut atorneqartartut. Taarsiullugu nukiit sipaarneqartut tamakkua sulisitsisut allallu nalunaaruteqarnissamut pisussaaffeqartut, nalunaarutaasa eqqortuunerannik tamakkiisuunerannillu qulakkeerinissamut atorneqarnissaat naatsorsuutigineqarpoq.
Allannguinerup ataatsimut isigalugu akileraarusersuinermik suliani pitsaanerulersitsinermik angusaqaataanissaa ilimagineqarpoq.
4. Aningaasaqarnikkut allaffissornikkullu inuussutissarsiuteqartuusunut sunniutissai
Siunnersuut inuussutissarsiutinik ingerlatsisunut nalunaaruteqarnissamut pisussaaffiit nutaat edb-nut allaffissornermullu 200.000 koruunitut amerlassuseqartunik annertunerusumik aningaasartuutinik nassataqarnissaa naatsorsuutigineqarpoq.
5. Avatangiisinut pinngortitamullu sunniutissai
Siunnersuut pinngortitamut avatangiisinullu sunniuteqarnissaa ilimagineqanngilaq.
6. Allaffissornikkut innuttaasunut sunniutissai
Siunnersuut pingaartumik akissarsiaqartunut, siunissami nammineerluni nalunaarusiami paasissutissiissutit naqeriikkat eqqortuunersut tamakkiisuunersullu taamaallaat misissuiinnartussanut, oqilisaataassaaq.
7. Naalagaaffeqatigiinnermut namminersulivinnissamullu tunngatillugu
Siunnersuut naalagaaffeqatigiinnermut namminersulivinnermulluunniit toqqaannartumik attuumassuteqanngilaq.
Siunnersuulli pisortat akileraaruserinermik ingerlatsineranni pisariillisaanermik, naammassisaqarnerulersinnaanermik pitsaanerulersitsinissamillu siunertaqarpoq tamatumuunalu namminersornermut tunngavissanik patajaallisaasuussalluni.
8. Pisortanit soqutigisaqaqatigiiffinnillu tusarniaaneq
Siunnersuut pisortaqarfinnut tamanut, KANUKOKA-mut, Kalaallit Nunaanni Sulisitsisut Peqatigiiffiannut (GA), ILIK-mut. Nunaqavissut Suliffiutillit Kattuffiannut (NUSUKA), Sulinermik Inuussutissarsiuteqartut Kattuffiannut (SIK), Atorfillit Kattuffiannut (AK), KNAPK-mut, Savaatillit Peqatigiit Suleqatigiisunut (SPS), Deloitte-mut aammalu Grønlands Revisionskontor-imut tusarniassutigineqarsimavoq.
Tusarniaanermi akissutit SIK-mit, KANUKOKA-mit, ILIK-mit, Deloitte-mit, Grønlands Revisionskontor-imit, AK-mit, NUSUKA-mit, Ineqarnermut Attaveqarnermullu Pisortaqarfimmit, Inuussutissarsiornermut Pisortaqarfimmit, Peqqissutsimut Pisortaqarfimmit, Aatsisatassanut Ikummatissanullu Pisortaqarfimmit, Ilaquttariinnermut Pisortaqarfimmit KIIP-imiillut tiguneqarsimapput.
Akissutisiat allannguuteqartitsinissanut tunngavissiisimanngillat.
Tusarniaanermut akissuteqaatit Akileraartarnermi akitsuusiisarnermilu ataatsimiititaliamut ingerlatitaapput.
Aalajangersakkanut ataasiakkaanut nassuiaatit
§ 1-imutNr. 1-imut
Allannguutissatut siunnersuutip nassataraa aappariinnut nammineerluni naluaarusiat marluk, maannamutut ataasinnaanngitsoq, siunissami suliarineqartalernissaat.
Akileraaruserivik aapparisap aapparisimasalluunniit saaffiginninneratigut akileraartussaatitaasup nammineq aapparisaataluunniit ukiumi isertitaqarfiusumi aappariiffigisaanni inooqatigiiffigisimasaannilu nammineerlutik nalunaarutaannut aammalu isertitamikkut akileraarusigaanerannut tunngasunik paasissutissanik tunniussisinnaavoq. "Aapparisaq"-mik oqarnermi tamatumunnga atatilllugu nalunaarsugaasumik inooqatigisaq aamma pineqarpoq.
Aappariit amerlasuut annertunerusumik annikinnerusumilluunniit aningaasaqarnikkut ataatsimoorussamik ingerlaaseqartarput, assersuutigalugu ineqarnermut aningaasanik atornermi aappariit tamarmik akiliisussaasarlutik taamaattumilu ernianut aningaasartuutit ilanngaatiginissaat akunnerminni avittarlugit. Taamaammat akileraarusigaasussanik isertitat eqqortumik naatsorsorneqarnissaat siunertaralugu aappaasuumut pisariaqarsinnaasarpoq aapparisap nammineerluni nalunaarutaanut isertitaanullu paasissutissat pissarsiarinissaat.
Paasissutissanik pisinnaanermi paasissutissat nammineerluni nalunaarummi akileraarusigaanermilu paasissutissat takuneqarsinnaasut tamarmik pineqarput, aappariit aappariinnermi immikkut pigisaqartuusinnaanerat apeqqutaatinnagu. Aalajangersakkami erseqqissarneqarpoq akileraaruseriviup taamatut pisoqartillugu paasissutissanik ingerlatitseqqiinera nipangiussisussaatitaanermik unioqqutitsinerunngitsoq.
Nr. 2-mut
Nammineerluni nalunaarutinik tunniussinissamut piffissarititaasoq akileraaruseriviup nammineerluni nalunaarutinik naqeriikkanik nassiussisalernerata kingunerisaanik siunnersuutigineqarpoq 1. martsimiit 1. majimut allanngortinneqassasoq.
Nammineerluni nalunaarsuusiamik tunniussivissap kinguartinneqarnera, akileraaruseriviup naqeriikkanik nalunaarsuusiamik martsip qaammataani nassitsisarnissaanik ilimaginninnerup kinguneraa. Tamannalu peqquteqarpoq akileraaruseriviup sulisitsisut allallu nammineerluni nalunaarsukkat nassiunneqannginneranni eqqortunik nalunaaruteqartarnissaasa qulakkeerniarneqarneranik. Taamaasilluni allaffissornikkut suliassat annertuut nammineerluni nalunaarsukkanik nassitsinissaq sioqqullugu suliarineqartassapput, taamaammallu akileraarusersuinermut piffissap sivikillineqarnera (1. maj-imiit 31. augustimut) akileraarusersuinerup pitsaassuseqarnikkut ajornerulerneranik kinguneqassanngilaq.
Nr. 3-mut
Siunnersuutigineqarpoq nammineerlutik nalunaarutinik tunniussisussaatitaasut nammineerluni nalunaarummik naqeriikkamik tigusaqartut, nammineerluni nalunaarsukkanik nassitsinngissinnaasut, nammineerluni nalunaarsukkani naqeriigaasumi paasissutissat eqqortuuppata tamakkiisuullutillu.
Nammineerluni nalunaarsuusiami naqeriigaasumi paasissutissat eqqortuunngippata tamakkiisunngippataluunniit, nammineerluni nalunaarsuusiornissamut pisussaaffeqartoq nammineerluni nalunaarsuusiamik immersuissaaq kingusinnerpaamillu 1. maj nallertinnagu nassiussilluni. Nammineerluni nalunaarsuusiornissamut pisussaaffeqartoq paasissutissanik eqqortunik tamakiisuusunillu nammineerluni nalunaarsuinngippat, isertitanit akileraarutit inatsimmi § 19, imm. 1-imi malittarisassat malillugit qaffaavigineqassapput.
Nr. 4-mut
Siunnersuutip nassataraa, kinaluunniit aningaasarsianit akileraarutit pillugit Inatsisartut inatsisaanni § 75, imm. 1-imi 2-milu taagorneqartunik isertitanik tunniussaqarsimasoq (A-mik isertitat), Naalakkersuisut erseqqinnerusumik aalajangersagaat malillugit tamakkiisumik ilaannaasumilluunniit akiliuteqaataanngitsunik ajunngitsorsiat, soorlu nerisaqarnerup najugaqarnerup, ineqarnerup, akunninnerup, angalanerup, biilimik, angallammik oqarasuaammik atuinerup, nalinginik nalunaarutiginnissasoq.
Taamaasilluni akileraarutinik ilanngaassinissamut pisussaaffeqartup aningaasarsiaqartunut tamakkiisumik ilaannaasumilluunniit akeqanngisumik ajunngitsorsiarititat nalingi naatsorsorlugillu nalunaarutigissavai.
Akeqanngitsumik nerisaqarnermut, akeqanngitsumik ineqarnermut, akeqanngitsumik angallateqarnermut il.il. tunngatillugu Naalakkersuisut Inatsisartut inatsisaanni § 21, imm. 3 naapertorlugu ilitsersuutaasumik innersuussutaat aallaavigalugit nalinginik annertussusiliineqarsinnaavoq. Akiliutitaqanngitsumik biileqartitaanermut tunngatillugu aningaasarsianit akileraarutit pillugit inatsisartut inatsisaanni § 19-imi annertussutsit aalajangersakkat atorneqassapput.
Nr. 5-imut
Siunnersuutigineqarpoq sulisitsisut, kommunit, Naamminersornerullutik Oqartussat, suliatigut soqutigisaqaqatigiiffiit, sulisitsisut peqatigiiffii, aningaaseriviit il.il. ukiut tamaasa paasissutissanik assigiinngitsunik akileraaruserivimmut tunniussisarnissaat pillugu arlalinnik malittarisassanik aalajangersaanissamut Naalakkersuisut pisinnaatinneqassasut.
Naalakkersuisut malittarisassatigut nalunaarutinut sinaakkutissat aalajangersarsinnaavaat, tamatumani aamma paasissutissat nalunaarutigineqartussat suut killiliivigalugit, piffissaliinerit aalajangersaavigalugit, sumut qanorlu nalunaarutit tunniunneqassanersut, nalunaaruteqartup kinaaneranut ilisarnaatit paasissutissallu paasissutissiinissamut pisussaaffinnik aqutsisunut pingaaruteqartut.
§ 33 a-mutImm. 1 malillugu Naalakkersuisut nalunaarutikkut kommunit aammalu Namminersornerullutik Oqartussat aalisarnermit, piniarnermit, aallaaniarnermit, savaateqarnermit, eqqumiitsulianik sanalukkanillu tunisassianik tunisanik pisiatik ukiut tamaasa akileraaruserivimmut nalunaarutigisaqqullugit peqqusinnaavaat, tunisanik pisiat pissarsisumut B-mik isertitaappata, imaluunniit angallammik, qimussimik angallammulluunniit allamut, tamatumani assersuutigalugu snescooterinut, aningaasartuutit atorsimasat, attartornermut isumaqatigiissut ingerlatseqatigiiffimmut, peqatigiiffimmut assigisannulluunniit nammineq akileraartussaatitaasumut isumaqatigiissutaanngippat. Naalakkersuisut nalunaarutikkut paasissutissat akileraarusigaasussanik isertitanik naatsorsuinermut attuumassuteqartut suut akileraaruserivimmut nalunaarutigineqartassanersut, nalunaarutinik assigisaannillu naqeriikkanik nalunaarsuinerit suliarineqarnissaannut pingaaruteqartunik tunniussivissamut piffissaliussaq pillugu aalajangersaasinnaapput.
Kalaallit Nunaanni tunisassiorfinnut tunisinerit, aningaasarsianit akileraarutit aamma sulisoqarnermut akitsuut pillugit akiliisitsiniartarneq pillugu nalunaarummi (nr. 28, 1. december 2006-imeersumi) § 7, nr. 10 malillugu, A-mik isertitatut isigineqarput. Akerlianilli Namminersornerullutik Oqartussat kommunillu aalisartunit, piniartunit, eqqumiitsuliortunit allanillu, assersuutigalugu utoqqaat angerlarsimaffiinut, tunissutissatut il.il. pisiaat A-mik isertitaanngillat.
Tunisassiorfinnut tunisat A-mik isertitatut isigineqarnissaannut tunngaviusut, aamma kommunit Namminersornerullutik Oqartussallu tunisanik pisiaat, tunisat aalisartumut, piniartumut, eqqumiitsuliortumut il.il., B-mik isertitaagaangata, nalunaarutigineqarnissaannut pisussaaffiliinermik eqqussinissamut aamma innersuussipput. Pissutsit atuuttuusut malillugit inuussutissarsiummik ingerlatsisut, ilaat naatsorsuusiornerup tungaatigut killilimmik ilisimasaqartut, pineqarput.
Pisartullu aamma takutissimavaat ilaanneeriarlutik attartortitsisut angallatinik, qimussinik assigisaannillu attartortisinermi isertitat allallu taamaattut nammineerluni nalunaarsuinermi ilanngutinngitsoortaraat. Aningaasartuutit kommuunit aammalu Kalaallit Nunaanni Namminersornerullutik Oqartussat naatsorsuutaanni nalunaarsugaammata oqartussaasunut ajornan-ngitsunnguussaaq paasissutissat tamakkua akileraaruserivimmut nalunaarutiginissaat, paasissutissanik nammineerluni nalunaarsuusiamut naqeriikkamut ilangussisussamut.
Naalakkersuisut piumasaqaateqarneranni pisortaqarfiit, ingerlatsiviit, suliffeqarfiit allallu tunisassianik pineqartunik pisiaat pineqartunut ilaasinnaapput.
Ullumikkut annertujaartumik paasissutissanik taamaattunik akileraaruserivimmut ilaatigut tunniussineqartareermat, malittarisassat 2007-imut nammineerluni nalunaarusiornissamut atuutilertussatut pilersinneqarnissaat ilimagineqarpoq.
Imm. 2-p malitsigaa Naalakkersuisut nalunaarutikkut translatørinut, nutserisunut, oqalutsinut assigisaannullu, assersuutigalugu allaaserinnittartunut ilanngutassiortunullu akissarsisitsisartut tamakkuninnga akileraaruserivimmut nalunaaruteqartarnissaannik pisussaaffiliisinnaanerat, akissarsianik tunniussinermi A-mik akileraarutinik ilanngaassineqanngikkaangat. Naalakkersuisut nalunaarutikkut paasissutissat akileraarusigaasussanik isertitanik naatsorsuinermut attuumassuteqartut suut akileraaruserivimmut nalunaarutigineqartassanersut, nalunaarutinik assigisaannillu naqeriikkanik nalunaarsuinerit suliarineqarnissaannut pingaaruteqartunik tunniussinissamut piffissaliussaq pillugu aalajangersaasinnaapput.
Siunnersuut nutsikkanut akissarsianik tunniussat aallaaviusumik A-nik isertitatut isigineqarnerannut atatillugu isigineqassaaq. Akissarsialli pisut ilaanni tigusaqartumut B-nik isertitaasutut isigineqarsinnaapput. Pisunili ataasiakkaani akiliuteqartumut akissarsisumullu nalileruminaassinnaasarpoq akissarsiat B-nik isertitaasutut isigineqarnissaannut tunngavissaatitaasut atuunnersut. Taamaasilluni akissarsiat tunngavissaqartitsinermit amerlanerusut B-nik isertitatut isigineqarnissaat akissarsiaqartullu akissarsiaminnik naatsorsuinerminni ilanngussinnginnissaat aarlerinarsinnaavoq. Tamakkuninnga akiliinernik nalunaarutiginninnissamut pisussaaffiliineq eqqunneqarpat, akileraarutinik akiliinngitsoornerit pinngitsoortinniarnissaannut periarfissat pitsannguuteqartinneqassapput.
Inuussutissarsiutinik ingerlatsisut, kommunit, Namminersornerullutik Oqartussat allallu, tamatumani assersuutigalugu peqatigiiffiit, akissarsianik taamaattunik akiliisartut, akileraaruserivimmut ukiumoortumik nalunaaruteqartarnissaannik Naalakkersuisut piumaffigisinnaavaat.
Suliffeqarfiit, oqartussaasut assigisaallu amerlasuut nalunaaruteqarnissamut pisussaaffimmit attorneqartussaammata malittarisassat aatsaat 2008-mut nammineerluni nalunaarusiornermut atuutilernissaat naatsorsuutigineqarpoq.
Imm. 3 malillugu Naalakkersuisut nalunaarutikkut nunagisamut akiliunneqarluni angalanernut tapiissutit, tapiissutinik akiliisup atuisullu akornanni atorfinitsitsineqarsimanngikkaluarpalluunniit, akileraaruserivimmut nalunaarutigineqartarnissaat pillugu malittarisassanik aalaja-ngersaasinnaapput. Naalakkersuisut nalunaarutikkut paasissutissat akileraarusigaasussanik isertitanik naatsorsuinermut attuumassuteqartut suut akileraaruserivimmut nalunaarutigineqartassanersut, nalunaarutinik assigisaannillu naqeriikkanik nalunaarsuinerit suliarineqarnissaannut pingaaruteqartunik tunniussivissamut piffissaliussaq pillugu aalajangersaasinnaapput.
Assersuutigalugu Naalakkersuisut sulinngiffeqarnermut aningaasaateqarfinnut assigiinngitsunut ilaasortaminnut tapiissutinik tunniussaminnik nalunaaruteqartarnissaat piumasaqaatigisinnaavaat. Tamatumuuna tapiissutit assigisaallu aningaasarsianit akileraarutit pillugit Inatsisartut inatsisaanni § 34, nr. 15 naapertorlugu akileraarutaassannginnersut akileraaruseriviup nakkutiginnisinnaanissaannut periarfissaqarnera pitsaanerulissaaq. Sulisitsisut allallu nalunaaruteqarnissamut pisussaaffeqartut akiliunneqarluni angalanernik nalunaaruteqarnissamik pisussaaffiat Inatsisartut inatsisaanni § 30, imm. 1, nr. 4 malillugu ingerlaannassaaq.
2007-imut nammineerluni nalunaaruteqarnissamut atuutilertussanik malittarisassap atuutsitsineqalernissaa naatsorsuutigineqarpoq.
Imm. 4-p nassatarisaanik Naalakkersuisut nalunaarutikkut, nassuiaatit kinaassutsimut paasissutissiissutinik, Naalakkersuisut akileraarusiinissamut akileraarutillu naatsorsorneqarnissaannut pisariaqartutut naatsorsuutigisaannik, imaqarnissaat pillugu malittarisassanik aalajangersaasinnaapput. Naalakkersuisut ilaatigut nalunaaruteqarnissamut pisussaaffeqartut GER normumik, CPR normumik assigisaannilluunniit kinaassutsimik qulakkeeerutaasunik nalunaaruteqarnissaannik aalajangersaasinnnnaassapput.
Tamatuma saniatigut Naalakkersuisut aalajangersinnaavaat, pissarsisoq, attartortitsisoq, translatøri assigisaallu, akiliutinik pissarsisuusut allallu kinaassutsimut tunngasunik paasissutissiissutit, pineqartup nalunaaruteqarnissamut pisussaaffeqartumut tunniutassaasa, eqqortuunerannik qularnarunnaarsitsinissamut pisussaaffeqartut. Nalorninartoqartillugu eqqortuunerat GER normumut assigisaanulluunniit uppernarsaammik saqqummiussinikkut qularnarunnaarsitsinneqarsinnaavoq.
§ 33 b-mutAalajangersagaq naapertorlugu Naalakkersuisut nalunaarutikkut, kommunit Namminersornerullutik Oqartussallu inuuniarnermut tapiissutit, tapiissutinik pisassaqartuusut sinnerlugit akilersinneqarsimasut, pillugit paasissutissanik akileraaruserivimmut ukiut tamaasa tunniussisarnissaannut malittarisassanik aalajangersaasinnaapput.
Naalakkersuisut ilaatigut paasissutissat suut nalunaarutigineqarnissaat pillugu killilersuisinnaapput, tamatumani aamma akilersuutit annertussusii, akilersuutit akilerneqarsimanersut imaluunniit kinguaattoorutitut nalunaarsugaanersut oqaatigineqassasut. Tamatumalu saniatigut Naalakkersuisut aamma piffissaliinerit, kinaassutsimut ilisarnaatinik paasissutissiissutinut piumasaqaatinut nalunaarutit, sumut qanorlu tunniunneqarnissaat aammalu paasisitsissutit assingusut paasisitsissuteqarnissamut pisussaaffinnik nakkutilliinermut pingaaruteqartunik paasissutissiissutit, aalajangersaaffigisinnaavaat.
Nalunaaruteqarnissamut pisussaaffeqarnermut atatillugu meeqqanut akilersuutit il.il. kiisalu meeravissiartaarnermi tapiissutit tunniunneqartarneri pillugit Inatsisartut peqqussutaat naapertorlugu akilersuutinik akiliisussaatitaasumit akiliisitsiniarnissamut pisortat taartaaneri tamarmik pineqartunut ilaasinnaapput.
2007-imut nammineerluni nalunaaruteqarnissamut atuutilertussanik malittarisassanik atuutsitsineqalernissaa naatsorsuutigineqarpoq
§ 33 c-mutImm. 1-imi siunnersuutigineqarpoq sulisut soqutigisaqaqatigiiffiisa ilaasortamik akiliutaannik tigusimasaminnik akileraaruserivimmut nalunaaruteqartarnissaat pillugu Naalakkersuisut nalunaarutikkut malittarisassanik aalajangersaasinnaassasut.
Naalakkersuisut ilaatigut paasissutissat suut nalunaarutigineqartassanersut killilersuisinnaapput. Tamatumalu saniatigut Naalakkersuisut aamma piffissaliinerit, kinaassutsimut ilisarnaatinik paasissutissiissutinut piumasaqaatit naapertorlugit nalunaarutit sumut qanorlu tunniunneqarnissaat aammalu paasisitsissutit assingusut paasisitsissuteqarnissamut pisussaaffinnik nakkutilliinermut pingaaruteqartunik paasissutissiissutit pillugit malittarisassanik aalajangersaasinnaapput.
Sulisut soqutigisaqaqatigiiffiinik oqarnermi salliutillugit sulisut soqutigisaqaqatigiiffii kattuffiit pineqarput. Tamakkununnga sulisitsisut peqatigiiffii sulisullu soqutigisaqaqatigiiffii, ataatsimoorussanik ataasiakkaanillu akissarsiat sulinermilu atugassarititaasut pillugit isumaqatiginninniuteqartarnissamik isumaqatigiinniarnerniluunniit peqataasarnissamik pingaarnerpaatillugu siunertaqartut ilaatinneqarput.
imm. 1 malillugu nalunaaruteqarnissamut pisussaaffik peqatigiiffinnut akiliutit, minnerunngitsumik akissarsiaqartuusunut akileraartarnermi ilanngaataasinnaasunik aningaasartuutinut annertuumik pingaaruteqarnerannut atatillugu isigineqassaaq. Taamaattumik aningaasartuutit nammineerluni nalunaarusiami naqeriikkami takuneqarsinnaasariaqarlutik.
Peqatigiiffiit edb-nik atortuisa taamatut nalunaaruteqartarnissamik naammassinnissinnaalernissaat eqqarsaatigalugu malittarisassat aatsaat 2008-mut nammineerluni nalunaaruteqarnissamut atuutilernissaat naatsorsuutigineqarpoq.
Imm. 2 naapertorlugu siunnersuutigineqarpoq Naalakkersuisut, peqatigiiffiit allat suliffeqarnermut tunngasuni imm. 1-imi taaneqartunit allaasut ilaasortaminnit akiliutit tigusimasat, aningaasaliisut allat assingusumillu tapersiissuteqartut nalunaarutigisassagaat, malittarisassanik aalajangersaanissaannut pisinnaatinneqassasut.
Naalakkersuisut ilaatigut paasissutissat suut nalunaarutigineqartassanersut killilersuisinnaapput. Tamatumalu saniatigut aamma piffissaliinerit, kinaassutsimut ilisarnaatinik paasissutissiissutinut piumasaqaatinut nalunaarutit sumut qanorlu tunniunneqarnissaat aammalu paasisitsissutit assingusut paasisitsissuteqarnissamut pisussaaffinnik nakkutilliinermut pingaaruteqartunik paasissutissiissutit pillugit, Naalakkersuisut aalajangersaasinnaapput.
Suliffeqarnermut tunngasuni peqatigiiffinnik suliffeqarfinnillu allanik oqarnermi, peqatigiiffiit sulisullu kattuffii, suliumajunnaarnerni ikiorsiissutaasussatut siunertaqartumik aningaasaateqarunik, peqatigiiffiit akissarsiat sulinermillu atugassarititaasut pillugit isumaqatigiinniartanngikkaluartut tamakkunanilu peqataasanngikkaluartut ataqatigiissaarinatilluunniit, pineqartunut ilaatinneqarput. Kiisalu aamma peqatigiiffiit allat, ilaasortat suliatigut, aningaasatigut soqutigisaannik isumaginnittuusut, isumaqatigiissutinik isumaqatiginninniuteqartanngikkaluartut suliumajunnaarnissamulluunniit aningaasaateqarfeqanngikkaluartut pineqartunut ilaapput. Suliani assigiinngitsuni peqatigiiffiit, inuussutissarsiornermi soqutigisaqaqatigiiffiit, niuertut peqatigiiffii, niuernermi peqatigiiffiit nunaannarmiullu peqatigiiffii il.il. pineqarput.
Imm 2-mi nalunaaruteqarnissamut pisussaaffik peqatigiiffinnut akiliutit, minnerunngitsumik akissarsiaqartuusunut akileraartarnermi ilanngaataasinnaasunik aningaasartuutinut annertuumik pingaaruteqarnerannut atatillugu isigineqassaaq. Taamaattumik aningaasartuutit nammineerluni nalunaarusiami naqeriikkami takuneqarsinnaasariaqarlutik.
Peqatigiiffiit edb-nik atortuisa taamatut nalunaaruteqartarnissamik naammassinnissinnaalernissaat eqqarsaatigalugu malittarisassat aatsaat 2008-mut nammineerluni nalunaaruteqarnissamut atuutilernissaat naatsorsuutigineqarpoq.
Imm. 3 naapertorlugu Naalakkersuisut imm. 1-imi sulisut peqatigiiffiisa ilaasortanut nalunaaruteqarsimaneq pillugu ilisimatitsisarnissaat pillugu malittarisassanik aalajangersaasinnaapput. Naalakkersuisut tamatumiuuna, ilaassortanut ataasiakkaanut ilisimatitsineqassanersoq aalajangersinnaavaat, taamaatoqassappallu qanoq annertutigisumik ilisimatitsineqassanersoq. Tamatumani eqqarsaatigineqarpoq sulisut peqatigiiffiisa ilaat nunami maani peqatigiiffiun-nginnerat, taamaattumillu peqatigiiffiit paasissutissanik nalunaaruteqarnissamik nunami maani peqatigiiffittulli piumaffigineqarsinnaanatik.
§ 33 d-mutSiunnersuutigineqarpoq Namminersornerullutik Oqartussat ikiorsiissutitut ilinniagaqarnersiutit ukiup siuliani tunniunneqartunut paasissutissiissutinik ukiut tamaasa akileraaruserivimmut nalunaaruteqartarnissaannut Naalakkersuisut nalunaarutikkut malittarisassanik aalajangersaasinnaassasut.
Naalakkersuisut nalunaarutikkut ilaatigut paasissutissat suut nalunaarutigineqarnissaat pillugu killilersuisinnaapput. Naalakkersuisut aamma piffissaliinerit, kinaassutsimut ilisarnaatinik paasissutissiissutinut piumasaqaatinut nalunaarutit sumut qanorlu tunniunneqarnissaat aammalu paasisitsissutit assingusut, paasisitsissuteqarnissamut pisussaaffinnik nakkutilliinermut pingaaruteqartunik paasissutissiissutit, aalajangersaaffigisinnaavaat.
Nalunaaruteqarnissamut pisussaaffimmi ilinniagaqarnermut tapiissutit sulisitsisunut akissarsianut aningaasartuutinut tapiissutitut, meqqanut tapitut immikkulluunniit ittumik tunniunneqartut pineqartunut ilaanngillat.
Ilinniagaqarnersiutit ilinniagaqartut ilarparujussuinut isertitat amerlanerpaartarisarpaat, taamaammallu tapiissutit 2007-imiit atuutilersumik nammineerluni nalunaarusiami naqeriikkami takuneqarsinnaasuusariaqarput.
Imm. 2 naapertorlugu Naalakkersuisut Namminersornerullutik Oqartussat ilinniagaqartut nalunaaruteqarnermik ilisimatinneqartarnissaannut malittarisassanik aalajangersaasinnaapput. Naalakkersuisut tamatumuunakkut aalajangersinnaavaaat ilinniagaqartuusunut ataasiakkaanut ilisimatitsineqartassanersoq taamaassappallu qanoq tamanna pisassanersoq. Naalakkersuisut assersuutigalugu ilinniagaqartuusunik ilisimatitsinissamut pisussaaffik eqqutinngitsoorsinnaavaat, ilinniagaqartuusoq nittartagaq aqqutigalugu paasissutissanik tamakkuninnga pissarsisinnaappat.
Nr. 6-imut aamma 7-imut
Siunnersuutigineqarpoq aningaaseriviit, qularnaveeqqusiilluni aningaasanik atorniartarfiit, aningaasaliissuteqarnernik ingerlatsiviit, pisortani karsit, pappiaqqanik aningaasanik nalilinninnut centralit, aningaasaliinernut peqatigiiffiit, aningaasanik nalilinnik nioqquteqartut allallu, assersuutigalugu eqqartuussissuserisut, ukiut tamaasaa uninngasuutit, erniat, pissarsiat allallu pillugit akileraaruserivimmut nalunaaruteqartarnissaat pillugu Naalakkersuisut nalunaarutikkut malittarisassanik aalajangersaasinnaassasut.
Naalakkersuisut ilaatigut paasissutissat suut nalunaarutigineqartassanersut killiliisinnaapput, piffissaliinernik aalajangersaasinnaallutik, sumut qanorli nalunaarutit paasissutissallu nalunaaruteqarnissamut pisussaaffinnik nakkutilliinermut pingaaruteqartut tunniunneqassanersut.
Aalajangersagaq akileraaruserinermik ingerlatsineq pillugu Inatsisartut inatsisaanni §§ 35-mik aamma 38-mik atuuttuusunik tunngaveqarpoq, aningaasaliisarnernulli tunngatillugu ineriartorneq eqqarsaatigalugu aalajangersagaq pitsanngoriaateqatsiarsimalluni. Ilaatigut erseqqissaatigineqarluni aningaasaliissuteqarnermut peqatigiiffiit il.il. nalunaaruteqarnissamut pisussaaffeqarnermi ilaatinneqartut, taamatullu erseqqissarneqarluni pappiaqqat aningaasanik nalillit sorliit nalunaarutigineqartassanersut.
Nalunaaruteqarnissamut pisussaaffeqarneq aktianik, anpartinik, obligationenik, tammarnaveqqusiinermut allagartanik, aningaasaliissuteqarnermut uppernarsaatinik, naafferartumik akilersukkanut allagartanik pappiaqqanilluunniit nalilinnik allanik, assersuutigalugu aningaassaliissuteqarnermut isumaqatigiissutinik allanik, paaqqutassatut isumagisassatulluunnit tigusisartunut, imaluunniit tamakkuninnga kaaviiaartitsinermik ingerlataqartut taamaaliornermiluunniit akunnermiliuttunut tamanut atuuppoq.
Aalajangersakkap imarisaasa ilai aningaasarsianit akileraarutit pillugit paasissutissanik akileraaruserivimmut nalunaaruteqartarneq pillugu Namminersornerullutik Oqartussat nalunaarutaat nr. 26-imi, 1. december 2006-imeersumi §§ 4-kkut aamma 8-miit 11-mut oqaatigineqarput.
Paasissutissat arlaqartut, aalajangersagaq pineqartoq naapertorlugu nalunaarutigineqartut, nammineerluni nalunaarummi naqeriigaasumi takuneqarsinnaassanngillat, paasissutissat ilaat akileraartussaatitaasup pisuussutinik pigisaqarneranut taamaallaat tunngasuummata. Paasissutissat allat, assersuutigalugu ernianut tunngasut, 2007-imiit atuutilersumik nammineerluni nalunaarummi naqeriikkami ilanngunneqartalissapput.
Imm. 2 malillugu nalunaarummi nassuaatit kinaassutsimut paasissutissiissutinik, Naalakkersuisut akileraarusiinermut akileraarutillu naatsorsorneqarnerannut pisariaqartutut naliliiffigisaannik, imaqarnissaannik malittarisassamik Naalakkersuisut aalajangersaasinnaapput. Naalakkersuisut ilaatigut nalunaaruteqarnissamut pisussaaffeqartut GER normumik, CPR normumik assigisaannilluunniit kinaassutsimik qularnaarisumik takutitsisuusumik tunniussissasut aalajangersinnaassavaat.
Tamatuma saniatigut Naalakkersuisut aalajangersinnaavaat, piginnittoq, tuniniaasoq, taarsigassarsisoq, taarsigassarsisitsisoq il.il. kinaassutsimut paasissutissat pineqartut nalunaaruteqarnissamik pisussaaffeqartunut tunniunneqartut eqqortuunerisa qularnarunnaarsinnissaannut pisussaaffeqartut. Nalorninartoqartillugu eqqortuunerat qularnarunnaarsinneqarsinnaavoq assersuutigalugu GER normumut assigisaanuluunniit uppernarsaammik takutitsinikkut.
Inatsisartut inatsisaanni § 38 atorfissaarutissammat siunnersuutigineqarpoq tassani aalajangersagaq atorunnaarsinneqassasoq.
§ 2-mutSiunnersuutigineqarpoq Inatsisartut inatsisaat 1. december 2007-imi atuutilissasoq, siunnersuummili § 1, nr. 1, 1. januar 2008-imi atuutilerluni, tassa imaappoq aningaasarsiat akileraaruserneqartarnerat pillugu inatsimmi ataatsimoortumik akileraarusigaasarnerup atorunnaarsinneqarneranut peqatigitillugu.