23. oktober 2007

UKA 2007/34

 

Allannguutissatut siunnersuut

Uunga:

Akileraaruserinermik ingerlatsineq pillugu Inatsisartut inatsisaata allanngortinneqarneranik Inatsisartut inatsisissaattut siunnersuut

Aappassaaneerneqarnissaanut Naalakkersuisunit saqqummiussaq.

 

§ 1-imut

1. Nr. 7-ip kingornagut normutut nutaatut ilanngunneqassaaq:
"01. § 40, imm. 9, imatut oqaasertalerneqarpoq:
"Imm. 9. Imm. 1-imiit 8-mut akileraarutinik taagorneqartunik taakkualu erniaannik tapiliussanullu akiliinngitsoortoqarnerani annaasat landskarsianit nammanneqassapput."

§ 2-mut

2. Imm. 2-p kingornagut immikkoortutut nutaatut ilanngunneqassaaq:
"Imm. 3. Inatsisartut inatsisaanni § 1, nr. 8, pisassarisanut 31. decembere 2007-ip kingornqatigut akiligassanngortussanut atuuttuuvoq."

 

Siunnersuummut nassuiaatit

Nalinginnaasumik nassuiaatit

Siunnersuutip siunertaraa, akileraarutinik annaasanik Namminersornerullutik Oqartussat kommunillu avitsivigisartagaannik maannakkut aaqqissuussinermut atasumik allaffissornikkut annertuumik suliakkersorneqarnerup killilersimaarniarnissaa.

Siunnersuutip kinguneraa, pisassarisat 1. januar 2008-mi kingusinnerusukkulluunniit akiligassanngortut aallarnerfigalugit, innuttaasut suliffeqarfiilluunniit akileraarutinik akiligassatik akilersinnaanngikkaat paasineqarnerini annaasaqaatit landskarsip karsiata nammatassarissagai. Tamatuma sunniutaa tassaassalluni kommunit aningaasaqarnikkut iluaqutissinneqarnerat Namminersornerullutik Oqartussallu annertoqataanik aningaasanik annaasaqartut. Taamaammat kommunit aningaasatigut iluaqutissinneqarnerat ataatsimoortumik kommuninut tapiissutit ilanngaaviginerisigut illuatungilerniarneqarpoq. Ataatsimoortumik tapiissutit, akiliisitsiniartarnermi suliassat ataatsimuulersinniarneqarnerannut atatillugu, maannakkut KANUKOKA-mik isumaqatiginninniutigineqarneranni ilanngaanissaq sammineqartunut ilaavoq. Tamatumunngalu peqatigitillugu kommuninut akileraarutinik kinguaattoorutit, tassalu kinguaattoorutit 1. januar 2007 sioqqullugu pinngorsimasut Namminersornerullutik Oqartussanit tiguneqarnissaat pillugu sinaakkutissat oqalliserineqarlutik.

Allaffissornermi suliakkersugaanerup killiliivineqarnerata saniatigut siunnersuutip nassataraa kommunit akileraarutinik isertittamik tungaasigut qularnaannerusumik inissisimalernissaat. Maannakkut aaqqissuussinermi suliffimmik kommunimi pingaaruteqarnerusumik akiliisinnaajunnaartoqartillugu kommuni annertuunik annaasaqartariaqartarpoq. Kommunit ilaanni taamatut annaasaqarnerit naatsorsuutini amigartooruteqarnerannik kinguneqarsinnaavoq. Taamatut annaasaqarsinnaaneq siunnersuummi nunap karsianut, taamatut allannguuteqarnermik ajornannginnerusumik nammataqarsinnaasumut, nuunneqarpoq.

 

Aalajangersakkanut ataasiakkaanut nassuiaatit

Nr. 1-imut

Siunnersuutigineqarpoq isertitanit akileraarutinut tunngasutigut annaasaqaatit, tamakkununngalu ernialiussanik tapiissutinillu annaasat, landskarsimit annaasaqaatatinneqassasut.

Siunnersuummi pineqarput § 40, imm. 1-imiit 8-mut taagorneqartut akileraarutit tamarmik, tamatumani aamma nunamut tamarmut, kommunimut, kommuninullu ataatsimoortumik akileraarutinit, iluanaarutisianit akileraarutinit, ingerlatseqatigiiffiit akileraarutaannit il.il. annaasaqaatit.

Nr. 2-mut

Annaasaqaatinik avitsisarnerup allanngortinneqarnera, pisassarisanut 31. december 2007-ip kingornagut akilerneqartussanngortussanit annaasaqaatinut atuutilernissaa siunnersuutigineqarpoq

Taamaasilluni pisassarisat 1. januar 2008 nallertinnagu akilerneqartussanngortussanik agguaassisarneq aallaaviusumik maannakkutut malittarisassat malillugit ingerlaannassaaq.