23. oktober 2007 UKA 2007/33
Allannguutissatut siunnersuut
uunga
Aningaasarsianit akileraarutit pillugit Inatsisartut inatsisaata allanngortinneqarneranik Inatsisartut inatsisissaattut siunnersuut
Aappassaaneerneqarnissaanut Naalakkersuisunit saqqummiussaq.
§ 1-imut
1. Nr. 2 –p ataani siunnersuutigineqartoq § 4 e -mi imm. 1-ip kingornanut nutaatut ilanngunneqassaaq:
"Imm. 2. Katissimalluni aappaqartoq aapparisaminillu inooqateqartoq ukiup isertitaqarfiusup naanerani § 20 naapertorlugu akileraarutaasussaanngitsunik B-nik isertitaqarnissamut periarfissamik iluaquteqarsinnaasimanngippat, iluaqutigineqanngitsortai aappaasup B-nik isertitaanit ilanngaatissatut nuunneqassapput. Taamaattorli akileraaruteqaataasussaangitsut nuutat aapparisap B-nik isertitaanut amigartooruteqaataasinnaanngillat."
Nalinginnaasumik nassuiaatit
Soorlu ilaatigut inatsisissatut siunnersutip saqqummiunneqarnerani oqaatigineqartoq, aappariinnik ataatsimoortumik akileraarusiisarnerup atorunnaarnera, aappariit akiliutigisaat ataatsimut isigalugit, aningaasarsianit akileraarutinut aappariit annertunerusumik akiliinissaannik kinguneqassanngilaq. Taamaammat inummut ilanngaat, aalajangersimasumik ilanngaat aammalu akileraaruteqaataasussaanngitsunik B-mik isertitat iluaqutigineqanngitsut aapparisamut nuunneqarsinnaanissaat periarfissinneqarpoq.
Siunnersuutip misissorneqarnerani ajuusaarnartumik malugineqarpoq, B-mik isertitat akileraarutaasussaanngitsut iluaqutigineqanngitsut pillugit aalajangersagaq matuma qulaani pineqartoq teknikkikkut kukkunikkut inatsisissatut siunnersuummi peerneqartoorsimavoq.
Aalajangersakkanut ataasiakkaanut nassuiaatit
Aappariit inooqatigiissut akileraartarnermi atugarisaasa ajornerulersinnaanerat pinngitsoortinniarlugu siunnersuutigineqarpoq, ukiumi aningaasarsiorfiusumi pineqartumi aappariit arlaata B-mik isertitat akileraaruteqaataasussaanngitsut tamakkiisumik iluaqutigisimanngippagit, iluaqutigineqanngitsortai aappariinni aappaasup isertitaanit ilanngaatissanngorlugit nuunneqarsinnaassasut, aappaasup tamatumani pineqartup B-mik akileraaruteqaataasussaanngitsunik isertitaasa akileraaruteqaataasussaanngitsut amerlassusissaat sinnersimappatigit. Ilanngaatissatulli nuunneqartut atorlugit B-mik isertitat amigartooruteqaataasinnaanngillat.