19. oktober 2007

UKA 2007/32

 

Pappiaqqanik nalilinnik naqissusiinermi akitsuut pillugu Inatsisartut inatsisaata allanngortinneqarneranik Inatsisartut inatsisaattut siunnersuut.
(Naqissusiinermut akitsuuserneqannginnissaq)

pillugu

Inatsisartut Akileraartarnermut Akitsuusiisarnermullu Ataatsimiititaliaa

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

Inatsisartut Akileraartarnermut Akitsuusiisarnermullu Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Kristian Jeremiassen, Atassut (siulittaasoq)
Inatsisartunut ilaasortaq Juliane Henningsen, Inuit Ataqatigiit
Inatsisartunut ilaasortaq Lene Knüppel, Demokraatit
Inatsisartunut ilaasortaq Ole Thorleifsen, Siumut (sinniisussaq)
Inatsisartunut ilaasortaq Ruth Heilmann, Siumut (sinniisussaq)

UPA 2007-imi siunnersuummik siullermeerinninneq tunngavigalugu inatsisissatut siunnersuut, inatsisissamut nassuiaatit tusarniaanermilu atortut Inatsisartut Akileraartarnermut Akitsuusiisarnermullu Ataatsimiititaliaata misissuataarpai.

Tusarniaaneq.

Siunnersuut piffissami 15. marsi – 16. apriili 2007-imi tusarniaassutigineqarluni nassiunneqarpoq, tamannalu sivikippallaarsorineqarsinnaavoq. Oqaatsit akissuteqarnermi atorneqaqqaartut atorlugit tusarniaanermit akissutit Akileraartarnermut Akitsuusiisarnermullu Ataatsimiititaliamit tiguneqarput. Tusarniaanermit akissutit inatsimmut nassuiaatini nalinginnaasuni Naalakkersuisunit oqaaseqaateqarfigineqarput.

Siunnersuutip Inatsisartuni siullermeerneqarnera.

Inatsisartut siullermeerinninneranni inatsisissatut siunnersuut Inatsisartuni partiinit tamanit ilassilluarneqarpoq. Aningaasaateqarfimmut atugassarititaasut unammilleqatigiinnermut kipusoortitsisinnaasutut isigineqarsinnaappata Nunat Avannarliit Killiit Aningaasaateqarfianni Kalaallit Nunaata peqataaginnarnissaanut nalornissuteqarnini Kalaallit Nunaanni Sulisitsisut Peqatigiiffianit tusarniaanermut akissutaanut tapiliullugu Atassutip nalunaarutigaa. Pappiaqqanik nalilinnik naqissusiinermi akitsuut pillugit inatsisip arlaleriarlugu allanngortinneqareersimanera Kattusseqatigiit Partiiata ilaatigut uparuarpaa.

Aningaasanut Nunanullu Allanut Naalakkersuisoq apeqqutinut siunnersuutip siullermeerneqarnerani saqqummiunneqartunut, pingaartumik inuussutissarsiutigalugu angallatinut qularnaveeqqusiisarneq pisassarisallu kiisalu Nunat Avannarliit Killiit Aningaasaateqarfianni Kalaallit Nunaata peqataanera pillugit akissuteqaammik itisiliissutaasumik allakkatigut 11. oktobari 2007-imeersutigut saqqummiussaqarpoq. Naalakkersuisunut ilaasortap allagai isumaliutissiissummut matumunnga ilanngussaq 1-itut ilanngunneqarput.

Akileraartarnermut Akitsuusiisarnermullu Ataatsimiititaliap isumaliutai.

Nunat Avannarliit Killiit Aningaasaateqarfiannik taarsigassarsinissamik isumaqatigiissutit akitsuuserneqannginnissaannut tunngatillugu Akileraartarnermut Akitsuusiisarnermullu Ataatsimiititaliap aallarniutigalugu oqaatigissavaa nunat tamalaat akornanni isumaqatigiissut ersarissoq aqqutigalugu Kalaallit Nunaat tamatumunnga pisussaaffilerneqarsimmat. Aammattaaq inatsit tamatumuunakkut periaatsinik allannguinissamik nassataqassanngitsoq, inatsisitigulli inissisimanermik atuuttumik erseqqissaataaginnassasoq ataatsimiititaliap eqqaasitsissutigissavaa.

Nunat Avannarliit Killiit Aningaasaateqarfiata ingerlatsinera unammilleqatigiinnermut kipusoortitsisinnaanerarlugu oqarneq ataatsimiititaliap imaaliinnarlugu isumaqatigisinnaanngilaa. Nunani Avannarlerni Killerni inuussutissarsiornermik tamatigoortumik unammillersinnaassuseqartumillu ineriartortitsinermik siuarsaanissaq aningaasaateqarfiup maleruagassai malillugit siunertaavoq. Tamanna suliniutit suliffeqarfinnut mikinerusunut akunnattumillu angissusilinnut attuumassutillit taakkununngaluunniit iluaqutaasussat ingerlanneqarnissaannut taarsigassarsisitsinikkut tapiissuteqarnikkullu kiisalu qularnaveeqqusiinikkut pissaaq. Tassunga atatillugu Nunani Avannarlerni Killerni kiisalu Nunat Avannarliit Killiit Nunallu Avannarliit akornanni suliffissuaqarnikkut teknikikkullu suleqatigiinnermut aningaasaateqarfik tapeeqataasassaaq.

Aallaaviusutut isigalugu aningaasaateqarfik aningaaserivinni atugassarititaasut malillugit taarsigassarsisitsisarpoq qularnaveeqqusiisarlunilu. Pissutsilli tunngavissaqalersippassuk atugassarititaasut pitsaanerusut atuutsinneqarsinnaapput. Aningaasalersuineq niuernikkut atugassarititaasut nalinginnaasut kisiisa malillugit pissappat inuussutissarsiutinik siuarsaalluni suliniut piviusunngortinneqarsinnaanngitsoq tamatumani pineqarsinnaavoq. Pisuni taamaattuni inuussutissarsiornermik assigiinngisitaarnerusumik pilersitsinissamut aningaasaateqarfik peqataaqataasarpoq, taamaalillunilu inuiaqatigiinnut atuisunullu iluaqutaasumik ungasinnerusoq isigalugu unammillernerup annertunerulerneranik pilersitsisarluni. Aallarnisaasunut nutaaliortunullu tapiissuteqariaatsini allanisulli aallarnisarnermi pitsaanerusumik atugassaqartitsinikkut unammilleqatigiinnermut kipusoortitsisinnaasut akuerineqartarput. Taamaaliortoqartarpoq ungasinnerusoq isigalugu inuussutissarsiornermi aaqqissuussaanikkut unammilleqatigiinnermilu pissutsitigut iluaqutissarsisoqaqqullugu.

Aammattaaq aningaasaateqarfimmi aningaasaatit ilarpassui nunani avannarlerni Danmarkimi, Norgimi, Sverigimi Finlandimilu suleqatigisartakkatsinneersuusut ataatsimiititaliap maluginiarpaa. Akileraarutit akitsuutillu aqqutigalugit nunani avannarlerni killerni inuussutissarsiutinik ineriartortitsinermut aningaasaateqarfiup akileeqataassutaasa landskarsinut ataasiakkaanut toqqaannartumik iluaqutaasussamik ikilisinneqarnissaat nunanit taakkunanit kissaatigineqanngimmat pissusissamisuuinnarpoq.

Pappiaqqanik nalilinnik naqissusiinermi akitsuut pillugit inatsimmik 1987-imiilli arlaleriaqaluni allanngortitsinerit eqqarsaatigalugit akileraartarnermut akitsuusiisarnermullu naalakkersuisoqarfiup suliassaqarfimmi iluani inatsisit ingerlaavartumik iluarsaanneqartarnissaat isumagimmagu Akileraartarnermut Akitsuusiisarnermullu Ataatsimiititaliap iluarisimaarlugu maluginiarpaa. Tamatumali peqatigisaanik allanngortitsinissamik tullianik pisariaqartitsisoqalerpat periarfissaq iluatsillugu pappialanik nalilinnik naqissusiinermi akitsuut pillugit inatsisartut inatsisissaattut siunnersuummik ataatsimoortumik saqqummiussisoqarnissaa ataatsimiititaliamit kissaatiginartinneqarpoq.

Akilaartarnermut Akitsuusiisarnermullu Ataatsimiititaliap inassuteqaataa.

Siuliani allassimasutut oqaaseqaateqarluni Inatsisartut aappassaaneerinerminni siunnersuut saqqummiunneqartoq taama iluseqartillugu akuersissutigissagaat Akileraartarnermut Akitsuusiisarnermullu Ataatsimiititaliap isumaqatigiittup inassutigaa.

Taamatut oqaaseqarluni Akilaartarnermut Akitsuusiisarnermullu Ataatsimiititaliap siunnersuut Inatsisartunut aappassaaniigassanngortippaa.

 

	Kristian Jeremiassen Siulittaasoq
Ole Thorleifsen		Ruth Heilmann
Juliane Henningsen		Lene Knüppel

 

---

Ilanngussaq