19. oktobari 2007

UKA 2007/60,61

Nioqqutissanik eqqussuinermi akitsuutit pillugit  Inatsisartut inatsisaata allanngortinneqarneranik  Inatsisartut inatsisissaattut siunnersuut
(UKA2007/60)

&

Imigassat ethanolimik akullit Kalaallit Nunaanni sananeqarsimasut akitsuutaat pillugit Inatsisartut inatsisaata allanngortinneqarneranik Inatsisartut inatsisissaattut siunnersuut
(UKA2007/61)

pillugit

Inatsisartut Akileraartarnermut Akitsuusiisarnermullu Ataatsimiititaliaata

aamma

Inatsisartut Aningaasaqarnermut Ataatsimiititaliaata

ISUMALIUTISSIISSUTAAT

siunnersuutit aappassaaneerneqarneranni saqqummiunneqartut

Inatsisartut Akileraartarnermut Akitsuusiisarnermullu Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Kristian Jeremiassen (Atassut), siulittaasoq
Inatsisartunut ilaasortaq Juliane Henningsen (Inuit Ataqatigiit)
Inatsisartunut ilaasortaq Lene Knüppel (Demokraatit)
Inatsisartunut ilaasortaq Ruth Heilmann (Siumut) –Agnethe Davidsenimut sinniisussaq
Inatsisartunut ilaasortaq Ole Thorleifsen (Siumut) – Jens-Lars Fleischerimut sinniisussaq

Inatsisartut Aningaasaqarnermut Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Ruth Heilmann (Siumut), siulittaasuugallartoq
Inatsisartunut ilaasortaq Naja Petersen, (Atassut), siulittaasumut tulliugallartoq – Augusta Salling-imut sinniisussaq
Inatsisartunut ilaasortaq Ane Hansen (Inuit Ataqatigiit), Agathe Fontain-imut sinniisussaq
Inatsisartunut ilaasortaq Palle Christiansen (Demokraatit)
Inatsisartunut ilaasortaq Ole Thorleifsen (Siumut) –Jens-Lars Fleischer-imut sinniisussaq

Inatsisartut Aningaasaqarnermut Ataatsimiititaliaata aamma Akileraartarnermut Akitsuusiisarnermullu Ataatsimiititaliaata UKA 2007-mi siullermeerinermik kingorna siunnersuut nassuiaatai ilanngullugit misissuataarpaat.

Siunnersuutit imarisaat aningaasaqarnikkullu kingunerisassaat

UKA 2007/60-mi tunisassianut tulliini taagorneqartunut eqqussuinermut akitsuutit qaffanneqassasut siunnersuutigineqarpoq:

Sukkut suugaluartulluunniit, imigassat ethanolimik akullit, mineralvandit, sodavandit, limonadit imeruersaatillu kulsyrimik akullit allat, imeruersaatit akusassat tupanillu nioqqusiat arlaqartut.

Siunnersuut ukiumi aningaasaliiviusumi 2008-mi ukiunilu missingersuusiorfiusuni 78 mio. kr. missaannik ukiumut iluanaaruteqarnerussutinik isertitsissutaassasoq naatsorsuutigineqarpoq. Taakkununngalu ilanngutassaapput annikinnerusumik iluanaaruteqarnerussuteqarneq 8 mio. kr.-nut 2007-mi missingerneqartoq.

Annertussutsinut maanna atuuttunut sanilliullugu nioqqutissat kalluarneqartut atugaanerat akitsuutinik qaffaanerup nassatarisaanik 10 pct.-inik appariarnissaat naatsorsuutigalugu iluanaaru-tissatut missingersuutit tunngaveqartinneqarput.

UKA 2007/61-mi siunnersuutigineqarpoq imigassat ethanolimik akullit Kalaallit Nunaanni ni-oqqusiarineqartut akitsuuserneqassasut. Tamatuma saniatigut, mineralvandit, sodavandit, limonadit aamma kulsyrelinnik imeruersaatit allat Kalaallit Nunaannit nioqqusiarineqartut akitsuuserneqassasut siunnersuutigineqarpoq.

Imeruersaatit taamaattut, nunatsinni avataaniluunniit nioqqusiarineqarsimaneri apeqqutaatinna-gu, assigiiaamik akitsuuserneqarnissaasa qulakkeerneqarnissaa inatsisissatut siunnersuutip siunertaraa.

Ukiumi aningaasaliiviusumi 2008-mi ukiunilu missingersuusiorfiusuni 22 mio.kr.-nik siunnersuut Naalakkersuisunut iluanaaruteqarnerussutinik isertitaqaataassasoq naatsorsuutigineqarpoq. 2007-mut iluanaaruteqarnerussutit 1 mio.kr.-inik annikinnerussasut naatsorsuutigineqarpoq.

Annertussutsinut maanna atuuttunut sanilliullugu nioqqutissat kalluarneqartut atugaanerat akitsuutinik qaffaanerup nassatarisaanik annikitsumik appariaateqassasut naatsorsuutigalugu iluanaarutissatut missingersuutit tunngaveqartinneqarput.

Aningaasaqarnikkut ataatsimut kinguneqaatissat

Ataatsimut isigalugu Naalakkersuisut naatsorsuutigaat siunnersuutit taakku marluk 2008-mi ukiunilu missingersuusiorfiusuni katillugit 100 mio.kr.-nik nunatta karsianut iluanaaruteqarnerussutaassasut. Aningaasat taakku konto pingaarneq 24.13.50-mi, Akileraarutitigut Akitsuusiinertigullu sillimmatitut isertitaqarnerussutaasussatut 2008-mut aningaasanut inatsisissatut siunnersuummi saqqummiunneqartumi naatsorsuutigisatut ilanngunneqarput.

Tamatuma saniatigut siunnersuutit 2007-mi 9 mio.kr. pallillugit annertussusilinnik katillugit iluanaarutikinnerussutaasssapput.

Inassuteqaatit

Ataatsimiititaliani ikinnerussutillit, Demokraatineersut, siunnersuutit pillugit ima oqaaseqarumapput:

Demokraatit ilaasortaatitaat siunnersuutit saqqummiunneqartut isumaqatiginngilaat.

Siunnersuutit taaneqartut marluk Inatsisartuni akuersissutigineqarpata akileraarutitigut akitsuuti-tigullu tamakkiisumik inuinnarnut nammatassiinerup annertusineqarnissaa Demokraatit akerleraat. Akileraarutit akitsuutillu maannakkut qaffasissusii naleqquttuupput qaffanneqartariaqaratillu.

Inuiaqatigiit akitsuutinik nutaanik pisussaaffilernerinut taarsiullugu Naalakkersuisut naleqquttunik nuussuisariaqarsimagaluartut missingersuusianillu pitsanngorsaasimasariaqaraluartut, taamaalillutillu isertitassarsiorfissat nutaat pillugit Demokraatit siunnersuutaannik malinnissimassagaluartut Demokraatit isumaqarput.

Akitsuutinik qaffaaneq Naalakkersuisut periarfissatut kingullertut atorsimasariaqarluarpaat, a-kitsuutimmi akitsuutillu qaffannerisigut aningaasanik aqutsineq peqqinnartoq tutsuiginartorlu taarserneqarsinnaanngimmat.

Tamatuma saniatigut eqqussuinermut akitsuutit qaffanneqarnerata annertunersaa inuuiarnikkut pitsaanngitsumik sunniuteqassammat Demokraatinit uparuassallugu pingaartuuvoq. Kalaallit Nunaanni imigassat tupanillu nioqqusiat akii nunarsuarmi akiusut qaffasinnerpaat ilagigaluaraat akitsuutit nammineerlutik annertuutut taasarialimmik atuinermik appartitsisuusimanngillat. Imigassamik tupamillu atuineq piffissami sivikitsumi naatsorsuutigineqarsinnaasutut akitsuutinik qaffaanngikkallarnertulli annertussuseqalerpata inuiaqatigiinni isertitakinnerpaanut ingammik aningaasaqarniarnikkut ajorseriaammik kinguneqassapput.

Ataatsimiititaliani ikinnerussutillit, Inuit Ataqatigiinneersut, siunnersuutit pillugit ima oqaaseqarumapput:

Inuit Ataqatigiit Inatsisartut inatsisissaannut siunnersuutit qulequtami taaneqartut ataatsimilluunniit akuerisinnaangilaat makku tunngavigalugit:

• Innuttaasut naligiinnerusumik atugaqalernissaannik anguniakkap innuttaasullu assigiimmik periarfissinneqarnissaannik anguniakkap piviusunngortikkiartuaarnissaanut akileraartarnikkut iluarsaaqqinnerit sakkugissallugit patajaannerpaasutut isumaqarfigigigut.
• Aningaasatigut pissakinnerit pissarissaartullu akornanni qunnersuaq angeqisoq mikinerulersittariaqarpoq, taamaattumik isertitaqqortussuseq najoqqutaralugu akileraartalernissaq siunnersuutigaarput.
• Isumalluutitsinnik uumassusilinnik atuinermut akiliuteqartalernissaq pilersinneqatariaqartoq.
• Akitsuutinut tunngatillugu Inuit Ataqatigiit tungaannit piareersimavugut akitsuutit pinngortitamut avatangiisinullu illersuinissamik siunnerfillit oqaloqataaffigissallugit, taamaattorli taakkua pinngitsooratik innuttaasunut aningaasakillioreersunut eqqornerluissanngitsut. Paatsorneqarsinnaanngitsumik nalunaarutigaarput inuit akornanni inuuniarnikkut assigiinngissitsinerit akuersaarsinnaanatigit, taamaattoqassagaluarpat inuit naligiinngeqisumik atugassaqartinneqarnerat attatiinnarneqassammat.
• Akitsuutit inatsisissatut siunnersuutini taaneqartut inunnik aningaasaqarniarnikkut atugarissaanngitsunik nammakkiinerpaajusarput.
• Innuttaasuni aningaasatigut inissisimanerit naligiissarnissaannut naapertuunnerulersinnissaannullu Inatsisartuni ikinnerussuteqartut kisimik piumassuseqartut.

Taamaammat Ataatsimiititaliani ikinnerussutillit inassutigaat siunnersuutit Inatsisartunit itigar-titsissutigineqassasut.

Ataatsimiititaliani amerlanerussutillit Siumup Atassutillu ilaasortaatitaat, siunnersuutit pillugit oqaaseqarput:

2008-mut aningaasanut inatsisissatut siunnersuummi aningaasaliinissamik pisariaqartitsineq siunnersuutitigut marlutsigut naammassineqarpoq. Tamatuma saniatigut siunnersuutit peqqinnissamut naapertuuttumik siunertaqarput. Taamaalillutillu siunnersuutit tunisassianut peqqinnissamut ajoqutaasunik arlaqartunik atuinermut annikillisitsinermut, soorlu sukkunut imigassamullu, atussallugit naleqquttuupput, tamannalu pitsaasuusoq oqaatigisariaqarluni.

Ataatsimiititaliani amerlanerussutillit tamanna tunngavigalugu inassutigaat siunnersuutit Inatsisartut akuersissutigissagaat.

Taama oqaaseqarlutik ataatsimiititaliat siunnersuutit aappassaaniigassanngortippaat.

 

Inatsisartut Akileraartarnermut Akitsuusiisarnermullu Ataatsimiititaliaannit:		Inatsisartut Aningaasaqarnermut Ataatsimiititaliaannit:
Kristian Jeremiassen (A), Siulittaasoq		Ruth Heilmann (S), Siulittaasuugallartoq
Juliane Henningsen (IA)		Naja Petersen (A)
Lene Knüppel (D)		Palle Christiansen (D)
Ruth Heilmann (S)		Ane Hansen (IA)
Ole Thorleifsen (S)		Ole Thorleifsen (S)