15. oktober 2007

UKA 2007/61

 

Inatsisissatut siunnersuummut nassuiaatit

Nalinginnaasumik nassuiaatit

1. Inatsisissatut siunnersuummut tunuliaqutaasoq

Pisortat aningaasartuuteqartitaanerannut piumasaqaatit sakkortusiartorput. Tamatuma ki-ngunerisaanik sodavandinut nunami maani sanaarineqartunut akitsuut 3,50 kr. siunnersuutigineqarpoq. Tamatumunnga atatillugu peqqinnissamut tunngasut Naalakkersuisut aamma eqqarsaatigaat.

Aammattaaq siunnersuutigineqarpoq imigassanut ethanolimik akoqartunut akitsuutit, imigassanut ethanolimik akoqartunik eqqussuinermi akitsuutit annertoqataannik qaffanneqassasut. Tamatumuuna aalakornartunut politikki pingaartinneqarluni.

Matumani siunnersuummut peqatigitillugu aamma nioqqutissanik eqqussuinermi akitsuutit pillugit Inatsisartut inatsisaata allannguutissaannik siunnersuutit saqqummiunneqassapput.

Inatsisissatut siunnersuutit taakku marluk katillugit ukiumut 100 millioner koruuninik isertitsissutaanerunissaat ilimagineqarpoq.

2. inatsisissatut siunnersuutip immikkoortui pingaarnerit

Siunnersuutigineqarpoq sodavandinut maani nunatsinni sananeqartunut akitsuusiineq eqqunneqassasoq. Akitsuut literimut 3,50 koruuniussaaq sodavandinut Danmarkimiit, Savalimmiuniit nunanilluunniit allaniit eqqunneqartunut akitsuutip annertoqataa.

Aammalu siunnersuutigineqarluni imigassat ethanolimik akullit Kalaallit Nunaanni sanane-qarsimasut akitsuutaat, imigassat ethanolimik akullit eqqunneqarnerannut akitsuutit qaffase-qataannut, qaffanneqassasut. Aammattaaq imigassanut ethanolimik akulinnut 1,21-2,24 volumenprocentimik ethanolimik akulinnut akitsuusiineq nutaaq eqqunneqassasoq siunnersuutigineqarpoq. Tamanna maani nunatsinni sodavandilianut akitsuusiinissamut siunnersuummut atatillugu isigineqassaaq. Siunnersuutip nassatarissavaa ciderit ilaasa, immiaaqqat kimikitsut assigisaallu annikitsumik ethanolimik akoqartut sodavandinut maani nunatsinni tunisassiarineqartunut akitsuusiinerup annertoqataanik akitsuuserneqarnissaat.

Akitsuutit 22 millioner koruuninik annertunerusumik isertitaqarnerunissamik nassataqarnissaat missiliuutigineqarpoq.

3. Aningaasaqarnikkut allaffissornikkullu pisortanut sunniutissai

Siunnersuut Namminersornerullutik Oqartussat nakkutilliinermik suliassaqarnerannik annikinnerusumik annertusisitsissaaq. Naatsorsuutigineqanngilaq siunnersuutip nassatarisaanik suliassamut tamatumunnga nukinnik annertunerusumik atuinissaq.

Sodavandinut maani nunatsinni sananeqartunut literimut 3,50 koruunimik akitsuut, 2006-imi sodavandinik il.il. atuinertut atuineqassappat/tunisineqassappat, 25 mio. koruunit missigisaannik isertitsissaaq. Ilimagineqarporli atuineq/atuinermik allannguineq akitsuutip qaffanneqar-neratigut annertunngitsumik annikilleriaateqassasoq, taamaattumillu isertitassat 22 mio. ko-ruunit missaanniinnissaat ilimagineqarluni. Aammalu nioqqutissanik eqqussuinermi akitsuutit pillugit Inatsisartut inatsisaannut allannguutissatut siunnersuummut nassuiaatit takukkit. 2007-imut isertitaqarnerussutissat 1 mio. Koruunit missaanniissangatinneqarput.

4. Aningaasaqarnikkut allaffissornikkullu inuussutissartiuteqartuusunut sunniutissai

Siunnersuutip nassatarissavaa, sodavandiliortut sodavandinut maani nunatsinni sananeqartu-nut akitsuummik naatsorsuillutillu akiliisarnissaat. Naatsorsuineq ullumikkut immiaaqqiorner-mut atatillugu najoqqutassat assigalugit pisassaaq. Taamaattumik allaffissornikkut inuussutissarsiuteqartuusunut sunniutissaata annikitsuinnaanissaa naatsorsuutigineqarpoq.

Akitsuut atuisunut/tunisinermi akinut ingerlateqqinneqarsinnaatillugu inuussutissarsiuteqartunut nalinginnaasunik aningaasatigut sunniuteqassanngilaq. Annikinnerusumik atuinerup nassatarissavaa suliffeqarfinnut sodavandiliortunut annikinnerusumik tunisaqarneq, tamannalu suliffinnik annaasaqarnermik kinguneqara-tarsinnaassalluni.

5. Avatangiisinut pinngortitamullu sunniutissai

Siunnersuut pinngortitamut avatangiisinullu sunniuteqanngitsutut nalilerneqarpoq.

6. Allaffissornikkut innuttaasunut sunniutissai:

Siunnersuut allaffissornikkut innuttaasunut sunniuteqanngilaq.

7. Naalagaaffeqatigiinnermut namminersulernissamullu tunngatillugu

Siunnersuut naalagaaffeqatigiinnermut namminersulernermulluunniit attuumassuteqanngilaq.

8. Pisortanit soqutigisaqaqatigiiffinnillu tusarniaaneq

Akitsuutinik annaasaqarsinnaanissaq pinngitsoortinniarlugu siunnersuut tusarniaassutigineqanngilaq.

 

Inatsisissatut siunnersuummi aalajangersakkanut ataasiakkaanut nassuiaatit

§ 1-imut

Nr. 1-imut

Sodavandinut Kalaallit Nunaanni sanaarineqartunut akitsuummik eqqussinissamik siunnersuutip kingunerisaanik siunnersuutigineqarpoq inatsisip taaguutaa allanngortinneqassasoq.

Nr. 2-mut

Imigassanut ethanolimik akulinnik maani nunatsinni sananeqartunut akitsuutit annertussusii, imigassanik ethanolimik akulinnik eqqussuinermi akitsuutitut annertutigilersillugit qaffannissaat siunnersuutigineqarpoq.

Aammattaaq siunnersuutigineqarpoq imigassanut ethanolimik akulinnut 1,21-2,24-p akornanni volumenprocenteqartunut akitsuut literimut 3,50 koruuniussaaq. Siunnersuummi ciderinik tunisassiat ilaat, immiaaqqat kimikitsut assigisaallu imigassat ethanolimik akoqartut, sodavandit assigisaasalu nunami maani sananeqartut akitsuutaattut annertutigisumik akitsuuserneqassapput.

Nr. 3-mut

Siunnersuutigineqarpoq mineralvandinut, sodavandinut, limonadenut allanullu kulsyremik akoqartunut, imeruersaatinut ethanolimik akoqanngitsunut, aningaasarsiutigalugu nunami maani sananeqartunut literimut 3,50 koruunimik akitsuummik akiliineqartassasoq.

Mineralvandit, sodavandit limonadillu saniatigut akitsuusiinermi ilaatigut paarnat naatitallu isseri, mostit assigisaallu, imaaliinnarlugit imerneqarsinnaasut kulsyremillu akusaasut, assersuutigalugu iibilit, pærit, appelsinat viinnequtillu isseri, aammalu paarnat sukkuinik naatitallu isserinik imaaliinnarlugit imerneqarsinnaasutut imeruersaatiliat, kulsyremik akusat, aamma pineqarput.

Imigassat qaffasinerpaamik 1,20 volumenprocentimik ethanolimik akullit ethanolimik akulittut isigineqanngillat (aalakoornartortaqanngitsut).

Sodavandit assigisaallu inuussutissarsiutigalugu sanaajusutut isigineqarput, tuniniaqqinnissaannik siunertaqarluni sanaajuppata. Tamatumunnga atatillugu tuniniaaqqinneq pisiniarfinnut, amerlasuukkaarlugit nioqqutigeqqitassanngorlugit imaluunniit atuisumut toqqaannartumik tunisaanerat apeqqutaanngilaq. Taamatuttaaq sodavandi assigisaaluunniit aallaqqaataaniit, imerpallagassanilluuniit assigisaanillu aallaaveqarluni, sananeqarnersoq pingaaruteqanngilaq.

 

§ 2-mut

Siunnersuutigineqarpoq inatsit 22. oktober 2007-imi atuutilissasoq.

Tamatumuuna inatsit, nioqqutissanik eqqussuinermi akitsuutit pillugit Inatsisartut inatsisaata allanngortinneqarnissaanik siunnersuummit ullunik pingasunik kingusinnerusumik atuutilissaaq. Imigassanik Kalaallit Nunaanni tunisassiortut tamatumuuna sapaatip akunnerata naanera akitsuutinut naatsorsuutiminnik akitsuutinut nutaanut allannguinissaminnut periarfissinneqassapput. Eqqussukkanik akitsuutinut tunngatillugu akitsuutinut naatsorsuutinik taamatut suliaqartoqarneq ajorpoq.

Taamaasilluni inatsit nioqqutissanut, inatsisip atuutilernerata nalaani atorneqarsinnaalersunut, atuutissaaq.