15. oktober 2007 UKA 2007/60
Inatsisissatut siunnersuummut nassuiaatit
Nalinginnaasumik nassuiaatit1. Inatsisissatut siunnersuutip tunuliaqutaa
Pisortat aningaasartuuteqartitaanerannut piumasaqaatit sakkortusiartorput. Tamatuma kingu-nerisaanik sukkunut, sodavandinut, tupanut imigassanullu akitsuutit qaffanneqassasut siunnersuutigineqarpoq. Naalakkersuisut tamatumani aamma peqqinnissamut imigassamullu tunngatillugu politikki eqqarsaatigaat. Kingulliullugu taaneqartumut tunngatillugu aamma agguataa-rinermut politikki eqqarsaatigineqarluni, imigassanut putumanartukinnerpaajusunut akitsuut annikinnerpaamik qaffattussanngorlugu.
Matumani siunnersuummut peqatigitillugu aamma imigassat ethanolimik akullit Kalaallit Nu-naanni sananeqarsimasut akitsuutaat pillugit Inatsisartut inatsisaata allannguuteqartinnissaa-nik siunnersuut saqqummiunneqassaaq.
Inatsisissatut siunnersuutit taakkua marluk ataatsimoorlutik ukiumut 100 millioner koruuninik isertitaqaataanerunissaat ilimagineqarpoq.
2. Inatsisissatut siunnersuutip immikkoortui pingaarneritSiunnersuutigineqarpoq sukkunut akitsuut 5,31 koruunimiit 6,00 koruunimut qaffanneqassasoq. Akitsuut kingullerpaamik 1987-imi qaffanneqarpoq.
Tamatumunna peqatigitillugu siunnersuutigineqarpoq pineqartuni akitsuutinik akiliuteqartitsisannginermik aaqqissuussineq atorunnaassasoq. Maannakut Nuuk Imeq A/S iffiorfiillu sukkunik nioqqutissanik allanik nioqqutissiornerminni atugaasa akitsuutissaagaluinik akiliisitsisoqartanngilaq. Taakkununnga akiliisitsisoqartannginnermut aaqqissuussinerup nassataraa sukkut eqqunneqartut 1/3-lii kisimik akitsuuser-neqartarnerat. Sukkunik akitsuusiinermi atuinerup peqqinnissaq eqqarsaatigalugu killiliiviginiarneqarnerata tunngavigineqarnera eqqarsatigalugu, Naalakkersuisut isumaqarput sukkunik Nuuk Imeq A/S-ip iffiorfiillu atugaasa akitsuutaannik akiliisitsisoqaqqittalernissaa piffissanngortoq. Akitsuutinik akiliuteqartitsisannginnermik aaqqissuussinerup atorunnaarsinneqarnissaa Nuup Imeq A/S-ip iffiorfiillu nioqqutissanut eqqussaasunut unammillersinnaassuseqarnerannut annikitsuinnarmik sunniu-teqarnissaa ilimagineqarpoq.
Siunnersuutigineqarpoq imigassanut aalakoornartortalinnut akitsuutit immiaaqqanut 14 procentimik, viinninut 22 procentimik imigassanullu kimittuunut 25 procentimik qaffakkiartortunik qaffaaffigineqassasut. Taamatut akitsuutinik allannguinerup nassatarissavaa immiaaqqamut puiaasamut (33 cl) akitsuutip 0,85 koruunimik, viinninut puiaasamut (75 cl) akitsuutip 9 koruunimik imigassamullu kimittuumut puiaasamut (75 cl) akitsuutip 53,85 koruunimik qaffannerat. Imigassanut aalakoornartortalinnut akitsuutit kingullermik 1993-imi qaffanneqarput (1996-imi viinninut akitsuutit annikitsumik allannguiffigineqarlutik).
Aammattaaq imigassanut aalakoornartortalinnut ethanolimik 1,21-2,24 procentimik akoqartunut akitsuut eqqunneqassasoq siunnersuutigineqarpoq. Tamanna nunatsinni sodavandinilianut akitsuusiinissamut siunnersuummut atatillugu isigineqassaaq. Siunnersuutip nassatarissavaa ciderit ilaasa, immiaaqqat kimikitsut assigisaallu annikitsumik ethanolimik akoqartut sodavandinut nunatsinni tunisassiarineqartuut akitsuusiinerup annertoqataanik akitsuuserneqassallutik.
Sodavandinut akitsuut literimut 3,50 koruunimik qaffanneqassasoq siunnersuutigineqarpoq. Qaffaanerup nassatarissavaa sodavandinut nammineq atugassatut eqqunneqartunut akitsuutip literimut 4 koruunimiit literimut 7,50 koruunimut qaffanneqarnera, sodavandininullu Avannaani Tunumiluunniit tuniniaqqitassatut eqqunneqartunut akitsuut literimut 2,25 koruunimiit literimut 5,75 koruunimut qaffanneqarnera. Avannaa Tunulu puiaasaaqqat utertinneqartarnerannik periutsimi ilaanngillat, taamaattumillu taakkunani sodavandinik pilersuineq avataaniit eqqussinikkut pisarluni. Avannaani Tunumilu pisiniarfinni akit nunap sinnerani akinut nikingavallaannginnissaat qulakkeerniarlugu sodavandinut Avannaani Tunumilu tuniniaqqitassatut eqqunneqartunut akitsuut sodavandinut allanut akitsuummit appasinneruvoq.
Sodavandinut akitsuut 1988-imi kingullermik qaffanneqarpoq.
Sodavandinut akitsuutip qaffanneqarnerata kingunerisaanik siunnersuutigineqarpoq imeruersaatiliassat imeruersaatinut automatitigut assigisaanniluunniit automatitigut imeruersaasiassatut eqqunneqartut eqqunneqarnerannut akitsuut literimut 17,50 koruunimik qaffanneqassasoq.
Imeruersaasiassanut akitsuut 1989-imi eqqunneqarneraniilli qaffanneqarsimanngilaq.
Soorlu matumunnga peqatigitillugu imigassat ethanolimik akullit Kalaallit Nunaanni sanane-qarsimasut akitsuutaat pillugit Inatsisartut inatsisaannut allannguutissatut siunnersuummi (UKA 2007/61) saqqummiunneqartumi atuarneqarsinnaasoq aamma Naalakkersuisut siunnersuutigaat sodavandinut nunatsinni sananeqartunut akitsuut literimut 3,50 kr. eqqunneqassasoq.
Siunnersuutigineqarpoq tupanut akitsuutit 17-18 procentimik qaffaaffigineqassasut. Akitsuu-tinik allannguinerit tamakkua kingunerissavaat sikaritsinut poortanut (20-nik imalinnut) akit-suut 6,80 koruuninik qaffannissaat. Tupanut akitsuutit kingullermik 2003-mi qaffaaffigineqar-put.
3. Aningaasat tungaasigut allaffissornikkullu pisortanut sunniutissaiSiunnersuut allaffissornikkut annertunerusumik pisortanut sunniutissaqanngilaq.
Nioqqutissat assigiinngitsut arlaqartut eqqussuinermut akitsuutaannik qaffaanissanik siunnersuut 2006-imi atuinertut atuineqassappat nunap karsia 2008-mi 87 mio. koruunit missiliorlugit amerlanerusunik isertitaqassaaq. 2007-imi amerlanerusunik isertitassat 8 mio. koruuninut mis-singiunneqarput. Tamatuma saniatigut aamma Pilersuisoq A/S-imi (qitiusumik peqqumaasi-vik), annertunerusumik isertitat pissarsiarineqassapput, siusinnerusukkut akitsuutinik qaffaa-sarnerni pisarsimasutut sikaritsit akii inatsisip akuersissutigineqarneraniit qaffanneqassappata. Tamatumani iluanaarutit nunatta karsianut nakkartinniarneqassapput.
Akitsuutinilli qaffaaneq annertunngitsumik annikinnerusumik atuilernermik kinguneqassasoq ilimagineqarpoq, taamaattumillu isertitassatut naatsorsuutigineqartut tamakkerlugit isertinnissaat ilimagineqarani. Taamaattumik taamatut atuinikinnerulernissaq isertitat amerlassusiisigut qanoq kinguneqarnissaa oqaatiginiarnissaa ajornakusoorpoq, naatsorsuutigineqarporli atuinikinnerulernerup amerlanerusunik isertitassat 10 procentip missigisaanik appariaateqartitsineq nassatariumaaraa, (atuinerup amerlassutsitigut 1,5-ip 2 procentillu akornani atuinnikinneruler-nermi) taamaasilluni amerlanerusunik isertitassat katillugit 78 mio. koruunit missaanniissasut naatsorsuutigineqarluni.
4. Aningaasaqarnikkut allaffissornikkullu inuussutissarsiuteqartuusunut sunniutissaiSiunnersuut allaffissornikkut annertunerusumik sunniuteqassanngilaq.
Qaffaatit atuisunut/tunisinermi akinut ingerlateqqinneqarsinnaatillugit siunnersuut inuussutissarsiuteqartunut aningaasatigut sunniuteqassanngilaq.
5. Avatangiisinut pinngortitamullu sunniutissaiSiunnersuut pinngortitamut avatangiisinullu sunniuteqanngitsutut nalilerneqarpoq.
6. Allaffissornikkut innuttaasunut sunniutissaiSiunnersuut allaffissornikkut innuttaasunut sunniuteqanngilaq.
7. Naalagaaffeqatigiinnermut namminersulernissamullu tunngatilluguSiunnersuut naalagaaffeqatigiinnermut namminersulernissamulluunniit attuumassuteqanngilaq.
8. Pisortanit soqutigisaqaqatigiiffinnillu tusarniaaneqIsertitassanik annaasaqarsinnaanissaq pinngitsoortinniarlugu siunnersuut tusarniaassutigineqarsimanngilaq.
Inatsisissatut siunnersuummi aalajangersakkanut ataasiakkaanut nassuiaatit
§ 1-imutNr. 1-imut
Siunnersuutigineqarpoq sukkunut assigiinngitsunut tamanut akitsuut 69 oorimik qaffanne-qassasoq 6,00 koruuninngorlugu.
Akitsuusiinermi ilaatigut ivigarsuarnik rooanillu, saccharose-mit akuitsumit, ahornimit, allanillu sukkuliat aammalu sirupi glukosellu pineqarput. Aamma tunisassiat allat taagorneqartunut taarsiussatut atorneqartut akitsuuteqartussaassunut ilaapput.
Nr. 2-mut
Imigassanut ethanolimik akoqartunut akitsuut immiaaqqanut 14 procentip missigisaaniit, viinninut 22 procentip missigisaaniit, imigassanut kimittuunut 25 procentip missigisaanut qaffakkiartortumik qaffanneqassasut siunnersuutigineqarpoq.
Aammattaaq nutaajusumik siunnersuutigineqarpoq akitsuusiineq imigassanut ethanolimik akulinnut 1.21-2,24-p akornani volumenprocenteqartut literimut 3,50 koruunimik akitsuuser-neqassasut. Siunnersuummi ciderinik tunisassiat ilaat, immiaaqqat kimikitsut assigisaallu imigassat ethanolimik akoqartut, sodavandinut maani nunatsinni sananeqartunut akitsuutip annertoqataanik akitsuuserneqarput.
Nr. 3-mut
Mineralvandinut, sodavandinut, limonadenut allanullu kulsyrerimik akoqartunut, imeruersaatit ethanolimik akoqanngitsutunut akitsuut literimut 3,50 koruunimik qaffanneqassasoq siunnersuutigineqarpoq literimut 7,50 koruuninngorlugu.
Mineralvandit, sodavandit limonadillu saniatigut akitsuusiinissami ilaatigut paarnat naatitallu isseri, mostit assigisaallu, imaaliinnarlugit imerneqarsinnaasut kulsyremillu akusaasut, assersuutigalugu iibilit, pærit, appelsinat viinnequtillu isseri, aammalu paarnat sukkuinik, naatitat isserinik imeruersaatiliat, kulsuremik akusat, aamma pineqarput.
Imigassat ethanolimik qaffasinnerpaamik 1,20 volumenprocentimik akullit ethanolimik akulittut isigineqanngillat (aalakoornartortaqanngitsut).
Nr- 4-mut
Mineralvandinut, sodavandinut, limonadenut allanullu kusyremik akoqartunut, ethanolimik akoqanngitsunut imeruersaatinut, inuussutissarsiuteqartunit, maanna kommuniusunit Qaanaami, Ittoqqortoormiini imaluunniit Tasiilami tuniniaqqinnissaat siunertaralugu eqqunneqartunut akitsuut literimut 3,50 koruunimik literimut 5,75 koruunimut qaffanneqassasoq siunnersuutigineqarpoq.
Nr. 5-imut
Imerpallarlugit imeruersaasiassanut (sirup) kulsyremik akoqartumik automatitigut assigisaasigullu imeruersaasiornermi atugassanut, tassa imaappoq "postmixanlæg"-ini mineralvandiliassanut, sodavandiliassanut assigisaattulluunniit imeruersaatissanut eqqussinermi akitsuut siunnersuutigineqarpoq imerpallagassamut literimut 17,50 koruuninik qaffanneqassasoq.
Imerpallarlugit imeruersaasiassat, maani nunatsinni sodavandiliornermi il.il. atorneqartartut akitsuuserneqassanngillat, imerpallarlugit imeruersaasiassat imeruersaasiorfiit automatit allallu taamaattut atorlugit kulsyremik akulittut imeruersaasiarinissaat siunertaralugu eqqunneqartutut isigineqanngimmata.
Imerpallarlugit imeruersaasiassat kulsyreqanngitsut (saftit assigisaallu) akitsuusigassanut ilanngillat.
Nr. 6-imiit 9-mut Tobanut assigiinngitsunut tamanut akitsuut 17-18 procentimik qaffanneqarnissaa siunnersuutigineqarpoq.
§ 2-mut
Siunnersuutigineqarpoq inatsit 19. oktober 2007-imiit atuutilissasoq. Nioqqutissat piffissap ta-matuma kingornatigut akitsuuteqarfiusumut eqqunneqartut matumani allannguumi pineqartunut ilaapput. Nioqqutissat Aalborgi aqqusaarlugu umiarsuakkut nassiunneqartussat Aalborgimi nassiussassatut ulloq tunniunneqarfiat akitsuuteqarfiusumut ullormi tassani eqqunneqartutut isigineqassapput.