14. april 2007

UPA2007/39

 

Atuisartunut pisisartunullu siunnersuisartoqatigiit, tuniniaasarneq, nalunaaqutsersuisarneq, akit aamma atuisartunut pisisartunullu maalaaruteqartarfittut ataatsimiititaliat pillugit Inatsisartut inatsisaata allanngortinneqarnera pillugu Inatsisartut inatsisaattut siunnersuut.

pillugu

Inatsisartut Inuussutissarsiornermut Ataatsimiititaliaata

ISUMALIUTISSIISSUTAA

siunnersuutip aappassaaneerneqarnerani saqqummiunneqartoq

Inatsisartut Inuussutissarsiornermut Ataatsimiititaliaat suliarinninnermini makkuninnga inuttaqarpoq:

Inatsisartunut ilaasortaq Ruth Heilmann, Siumut, siulittaasoq
Inatsisartunut ilaasortaq Ane Hansen, Inuit Ataqatigiit, siulittaasup tullia
Inatsisartunut ilaasortaq Jens-Lars Fleischer, Siumut
Inatsisartunut ilaasortaq Thomas Kristensen, Atassut
Inatsisartunut ilaasortaq Marie Fleischer, Demokraatit

 

Siullermeerinerup kingorna siunnersuut Inatsisartut Inuussutissarsiornermut Ataatsimiititaliaata misissuataarsimavaa.

Aallaqqaasiut
UKA 2006-imi ullormut oqaluuserisassani immikkoortoq 139-mi siunnersuutigineqarpoq Inatsisartut aalajangissagaat Naalakkersuisut peqquneqassasut, Atuisartunut pisisartunullu siunnersuisooqatigiit, tuniniaasarneq, nalunaaqutsersuisarneq, akit aamma atuisartunut pisisartunullu maalaaruteqartarfittut ataatsimiititaliat pillugit inatsisartut inatsisaata allanngortinneqarnissaanik, tassuunakkut inatsisartut inatsisaani § 24 malillugu niuertut nalunaaruteqartarnissaannik peqquneqartalernissaannik akit iluanaaruteqartarnerlu pillugit misissuisarnissanut atugassanik nalunaaruteqartussaatitaanerannik, sumiginnaasullu imaluuniit eqqunngitsunik nalunaaruteqartut akiliisinneqartalernissaannik imaqartumik.

Aalajangiiffigisassatut siunnersuut Inatsisartut Inuussutissarsiornermut Ataatsimiititaliaannit misissorneqarpoq, taakkulu isumaliutissiissummik saqqummiussillutik, tassanilu ataatsimiititaliap isumaqatigiittup siunnersuut Inatsisartunit akuerineqassasoq inassutigalugu.

Siunnersuutip imarisaa
Naalakkersuisut siunnersuummut nassuiaatini allapput, allannguutissatut siunnersuuteqarnermi siunertaasoq akinik misissuititsinermut atatillugu suliffeqarfiit paasissutissanik tunniussinissamut pisussaaffilernissaannut inatsisitigut tunngavissiinissaq kiisalu paasissutissanik tunniussinissamik pisussaaffik naammassineqanngippat akiliisitsinissamut inatsisitigut tunngavissiinissaq.

Tamannalu Inuussutissarsiornermut Ataatsimiititaliap isumaliutissiissummigut Inatsisartunut inassuteqaataanut naapertuuppoq.

Aammattaaq matumani siunnersuutigineqarpoq atuisartunut pisisartunullu siunnersuisartoqatigiit iluanaarutinik misissuinissamut periarfissaqarnerat peerneqassasoq, paasissutissat tamakku atuisartunut attuumassuteqartutut nalilerneqanngimmata.

Tusarniaanermit akissutit
Siunnersuutip saqqummiunneqannginnerani KANUKOKA-mut, Kalaallit Nunaanni Atuisartut Siunnersuisoqatigiivisa Ataatsimut Allattoqarfiannut Unammilleqatigiinnermullu Ataatsimiititaliamut, NUSUKA-mut, Kalaallit Nunaanni Sulisitsisut Peqatigiiffiannut ILIK-mullu tusarniaassutigineqarsimasoq Naalakkersuisut ilisimatitsissutigaat. Taakku tusarniaassummut tamarmik akissuteqarput. Tusarniaanermit akissutit inatsisissatut siunnersuummut attuumassuteqartortaat ilanngunneqartut Naalakkersuisunit ilisimatitsissutigineqarpoq.

Tusarniaanermut akissutit nuutinnerinik Ataatsimiititaliap siunnersuummik matuminnga suliarinnninnermini atugassaminik Aataatsimiititaliaq pissarsisimavoq. Tusarniaanermut akissutissiamut peqqissaarunneqartumut Ataatsimiititaliamut aamma nassiunneqartumut Ataatsimiititaliaq qujavoq.

Ataatsimiititaliap suliarinninnera
Siunnersuummi akinik misissuinermut tunngasortai Ataatsimiititaliap nuannaarutigai. Iluanaarutaasartut pillugit misissuisarnerit inatsimmit tassannga peerneqartussatut siunnersuutigineqarnissaat Ataatsimiititaliap naatsorsuutigineqarsimanngikkaluarpaa apeqquserlugulugu. Naalakkersuisut saqqummiussissumminni allapput tunitsiviusartuni ersarinnerulersitsineq tamatigut annertunerusumik unammilleqatigiilersitsineq ajortoq, taamaattumik iluanaarutaasartut pillugit misissuisarnissat aalajangersakkamit peerneqarnissaat siunnersuutigineqartoq. Aammattaaq unammilleqatigiinnermut inatsisip massakkut nalilersorneqarnerani tamanna aamma isiginiarneqarumaartoq Naalakkersuisut allapput. Nutaamik unammilleqatigiinnermut inatsisiliortoqarneratigut unammilleqatigiittarnerit annertusarneqarnissaat Naalakkersuisut anguniarpaat, tamannalu atuisartunit isigalugu akitigut pitsaasumik sunniuteqassaaq.

Tassunga atatillugu iluanaarutaasartunut inatsimmik nunatsinni qaqugu atuutsitsisoqalissanersoq Siumup apeqqutigaa. Taamatut inatsisiliortoqarnissaanut siusinnerusukkut suliniuteqartoqarsimavoq piviusunngortinneqanngitsumik, taamaattumillu suliassaqarfimmi tassani inatsisiliornissamut piffissanngortoq Siumut isumaqarpoq.

Unammilleqatigiinnermut inatsisip allanngortinneqarnissaanut pissutsit iluanaarutaasartunut attuumassutillit maanna nalilersorneqarnerat pillugu nalunaaruteqartoqarsimasoq Inuit Ataqatigiit oqaatigaat. Pissutsit iluanaarutaasartunut attuumassutillit pillugit paasissutissiisarnissamut malittarisassiortoqarnissaa Inuit Ataqatigiit naatsorsuutigaat, taakku atuisartunut tusartinneqarnissaat naleqquttuummat.

Iluanaarutaasartut pillugit misissuisarnissanut aalajangersakkap peerniarneqarnera Atassutip eqqarsarnartoqartippaa isumaqarlunilu siunissami misissuisarnissat taamaallaat akinut atuutissanersut peqqissaartumik nalilerneqartariaqartoq misissorneqartariaqartorlu.

Iluanaarutaasartut pillugit atuisartunut tusartinneqartarnissaat tulluartuusorineqannginnera pissutigalugu iluanaarutaasartunut tunngasut aalajangersakkamit peerneqarlutik § 24-p Naalakkersuisunit allanngortinniarneqarnera Demokraatit kisiartaallutik isumaqatigaat.

Iluanaarutaasartut pillugit misissuisarnissat peerneqarnissaannik Naalakkersuisut siunnersuutaannut qulaani taaneqartumut partiit ataasiakkaat oqaaseqaataannut Naalakkersuisut isumaat Ataatsimiititaliamit ujartorneqarpoq.

Tamanna tunngavigalugu siunnersuut Inatsisartunit akuersissutigineqassasoq ataatsimiititaliap isumaqatigiittup inassutigaa.

Taama oqaaseqarluni Inatsisartut Inuussutissarsiornermut Ataatsimiititaliaata siunnersuut aappassaaniigassanngortippaa.

 

 

	Ruth Heilmann, Siumut, siulittaasoq
Ane Hansen, Inuit Ataqatigiit siulittaasup tullia		Jens-Lars Fleischer, Siumut
Thomas Kristensen, Atassut		Marie Fleischer, Demokraatit