22. marts 2007

UPA 2007/30
UPA 2007/33

 

Aningaasarsianit akileraarutit pillugit Inatsisartut inatsisaannut allannguutissatut siunnersuut
(Ullut 60-it pillugit maleruagassap allanngortinneqarnera, akileraarutit pillugit nassuiaammik tunniussinissamut akiliinissamullu il.il. piffissaliunneqartut)

kiisalu

Sulisoqarnermut akitsuut pillugu Inatsisartut inatsisaata Allanngortinneqarneranik Inatsisartut inatsisissaattut siunnersuut
(Sulisoqarnermut akitsuummik nalunaarutinik tunniussinissamut akiliuteqarnikkullu isumannaarinissamut piffissaliunneqartunut allannguutit)

pillugit

Inatsisartut Akileraartarnermut Akitsuusiisarnermullu Ataatsimiititaliaata

ISUMALIUTISSIISSUTAA


Aappassaaneerinermi saqqummiunneqartoq


Inatsisartut Akileraartarnermut Akitsuusiisarnermullu Ataatsimiititaliaat suliarinninnermini ukuninnga inuttaqarpoq:


Inatsisartunut ilaasortaq Emilie Olsen, Atassut (siulittaasoq)
Inatsisartunut ilaasortaq Jens Lars Fleischer, Siumut
Inatsisartunut ilaasortaq Palle Christiansen, Demokraatit
Inatsisartunut ilaasortaq Olga P. Berthelsen, Inuit Ataqatigiit (sinniisussaq)
Inatsisartunut ilaasortaq Doris Jakobsen, Siumut (sinniisussaq)


UPA 2007-imi siunnersuutit siullermeerneqarneranni inatsisissatut siunnersuutit nassuiaataat kiisalu tusarniaanermit akissutinik pissarsiat ilanngullugit Inatsisartut Akileraartarnermut Akitsuusiisarnermullu Ataatsimiititaliaata misissuataarpai. Siunnersuutillu siullermeerneqareermata Aningaasaqarnermut Nunanullu Allanut Naalakkersuisumit allakkat 15. marsi 2007-imeersut pissarsiarineqarput. Allakkat taakku isumaliutissiissummut matumunnga Ilanngussaq 1-itut ilanngunneqarput.

Inatsisissatut siunnersuutit siunertaat.
Aningaasarsianit isertitat pillugit inatsisip allanngortinneqarnissaanik inatsisissatut siunnersuut iluarsiinernik assigiinngisitaartunik imatut siunertalinnik imaqarpoq:

Sulisoqarnermut akitsuummut tunngatillugu siunnersuutip sulisoqarnermut akitsuutinik sulisitsisut nalunaaruteqartarnerat akiliisarnerallu pillugit piffissaliussanik siuartitsissaaq. Tamanna aningaasarsianit akileraarusiisarnermut inatsimmi piffissaliussanik taamatuttaaq sukaterinermut atasutut isigineqassaaq.

Inatsisissatut siunnersuutit tusarniaassutigineqarnerat.
Inatsisissatut siunnersuutit marluusut ulloq 11. decembari 2006-imiit ulloq 15. januaari 2007-imut ataatsimoortillugit Akileraartarnermut Pisortaqarfimmit tusarniaassutigineqarput. Tusarniaanermut piffissaliussatut tusarniaavigineqartussatullu toqqakkat tusarniaanermilluunniit akissutisianut Akileraartarnermut Akitsuusiisarnermullu Ataatsimiititaliaq oqaaseqaateqan-ngilaq. Tusarniaanermi angusanut tunngatillugu inatsisissatut siunnersuutinut nalinginnaasumik nassuiaatit innersuunneqarsinnaapput.

Inatsisissatut siunnersuutit Inatsisartunit siullermeerneqarnerat.
Inatsisissatut siunnersuutit marluusut siullermeerneqarneranni Inatsisartunit partiinit tamanit taperserneqarput, sulisoqarnermulli akitsuut pillugu inatsimmik allannguinissatut inassutigineqartoq Esmar Bergstrømimit attaviitsuusumit itigartinneqassasoq inassutigineqarluni.

Sulinermut atasumik nunatsinniinnermut atatillugu aningaasarsiat pillugit inatsimmik atornerluisoqartarnera ilisimatitsissutigineqarsimammat Atassutip oqaaseqartuata ernummatigigini oqaatigaa, taakkumi Kalaallit Nunaanni akileraartussaatitaaneq pinngitsoorumallugu ullunit 60-init piaaraluni sivikinnerutinneqartarsimammata. Taamatut inatsimmik unioqqutitsinerup annertussusia kiisalu piffissami matumani isertitassaraluatut annaasanik pissarsiniarsinnaanermut periarfissat itisilerlugit nassuiarneqassasut ujartorneqarpoq.

Akileraarutit assigiinngitsut sullivinnit nalunaarutigineqarnissaannut akilerneqarnissaannullu piffissaliussanik sukaterineq eqqarsarnartoqartikkini Inuit Ataqatigiit oqaaseqartuatattaaq oqaatigaa, sulliviimmi mikinerit ingammik eqqarsaatigalugit akiliisinnaassuseqarnerat oqimaannerulissasoq aarleqqutigineqarmat. Sulliviit nutaamik aallartittut kommunillu akiliisinnaassuseqarnerat sulisoqarnermut akitsuutip allanngortinneqarnissaanik itigartitsinerminut ilaatigut tunngavigigini attaviitsup Esmar Bergstrømip oqaatigaa.

Akileraartarnermut Akitsuusiisarnermullu Ataatsimiititaliap isumaliutersuutai.
Inatsisissatut siunnersuutit marluusut iluserisatik atorlugit Inatsisartunit tapersiivigineqartariaqartut Akileraartarnermut Akitsuusiisarnermullu Ataatsimiititaliaq isumaqarpoq. Inatsisini atuuttuni iluarsiinerit annikitsut arlallit isumaatujusulli pineqarput. Sulisut avataaneersut akileraartussaatitaanerat pilertortumik atuutilersinneqarsinnaappat akileraartarnikkut iluanaaruteqarniutaajunnaassasoq Ataatsimiititaliamit pingaartumik iluarisimaarpaa. Nunami maani inuussutissarsiornikkut suliniutit inuiaqatigiiusutsinnut iluanaarutaalluarnerulernissaat taamaalilluni qulakkeerneqassaaq.

Akileraartarnikkut iluanaarniarneq manna tikillugu ingerlanneqarsimasoq inatsisit atuuttut iluini pisarsimammat Akileraartarnermut Akitsuusiisarnermullu Ataatsimiititaliap tusaatissatut tiguaa, takukkit Aningaasaqarnermut Nunanullu Allanut Naalakkersuisup ulloq 15. marsi 2007-imi allakkamini itisilerutitut oqaatigisai. Inuinnaat suliffiillu akileraartarnikkut iluanaaruteqarfiunerpaamik angusaqarnissaq siunertaralugu iliuuserisaminnik piareersaasarnerat maleruagassat atuuttut iluini pisarmat Ataatsimiititaliap uparuaavigissanngilaa. Tamanna aamma atuuppoq sullivinnut nunanit allaneerlutik Kalaallit Nunaanni inuussutissarsiornikkut ingerlatalinnut. Maleruagassalli maannakkut siunissamut sukateriffigineqarmata tamatuma peqatigisaanik Ataatsimiititaliap iluarisimaarini oqaatigissavaa, tamannami nunatta aningaasaqarnikkut annertusiartuaartumik ineriartornissaanik kissaateqarnermut naleqqunnerpaajummat.

Akileraarutinik akitsuutinillu assigiinngitsunik sulliviit nalunaaruteqartarnerat akiliisarnerallu pillugu piffissaliussanik sukaterinissaq eqqarsaatigalugu taakkununnga atatillugu nanertuutaanerulersussat akuersarnaartutut isigisariaqartut Ataatsimiititaliaq isumaqarpoq. Sulliviit maannamutut ulluni 30-ni akiligassaminnik uninngatitsisinnaanerinut taarsiullugu siunissami ulluni 20-ni uninngatitsisinnaalissasut tassunga atatillugu Aningaasaqarnermut Nunanullu Allanut Naalakkersuisup erseqqissaatigaa. Akileraarutit A-t sulisoqarnermullu akitsuutip aningaasarsisitsinermut atatillugu akilerneqarnissaat minnerunngitsumik pissusissamisoornerpaassaaq. Taamaammat akileraarutit taakkorpiaat akissarsianit ilanngaatigineqarnissaat sulliviit akiliisinnaassuseqarnikkut piareersimanissaannut tapertatut naleqqunnerpaatut isikkoqanngillat. Ataatsimiititaliamittaaq naggataatigut eqqaamaqquneqassaaq piffissaliussamik sukaterinissaq suliamut tunngasut pissutigalugit siunnersuutigineqarsimammat. Taamaammat ullormik ataasiinnarmilluunniit maannakkut piffissaliussamik qaangiinerup kingunerissavaa kommunit akileraarutinit pisassaat Namminersornerullutik Oqartussat qaammammik ataatsimik kinguaattoorlutik aatsaat utertissinnaammatigit. Taamaammat akileraarutinit utertoorutissat pissusimamisuunngitsumik kinguaattoornerisigut akileraarutinit utertitassat naapertuutinngitsumik kommunit minnerit akiliisinnaassuseqarnerat allannguutikkut pingaartumik illersorneqassasoq naatsorsuutigineqarsinnaavoq.

Akileraartarnermut Akitsuusiisarnermullu Ataatsimiititaliap inassuteqaataa.
Akileraartarnermut Akitsuusiisarnermullu Ataatsimiititaliap isumaqatigiittup siuliani oqaatigisani tunngavigalugit inatsisissatut siunnersuut saqqummiunneqarnermisut Inatsisartut aappassaaneerinerminni akuersissutigissagaat inassutigaa.

Taamatut oqaaseqarluni Inatsisartut Akileraartarnermut Akitsuusiisarnermullu Ataatsimiititaliaata siunnersuut Inatsisartunut aappassaaniigassanngortippaa.

 

Emilie Olsen
Siulittaasoq

Doris Jakobsen
Olga P. Berthelsen

Palle Christiansen
Jens Lars Fleischer

 

Ilanngussaq