25. januar 2007 UPA 2007/33
Inatsisissatut siunnersuummut nassuiaatit
Nalinginnaasumik nassuiaatit1. Inatsisissatut siunnersuummut tunuliaqutaasoq
2006-imi ukiakkut ataatsimmiinnermi inatsisissanut siunnersuutinik pingasunik saqqummiussinermi (Akileraaruserinermik ingerlatsineq pillugu Inatsisartut inatsisissaannut siunnersuut UKA 2006/29, Aningaasarsianit akileraarutit pillugit Inatsisartut Inatsisissaannut siunnersuut UJA 2006/30 aamma Inatsisartut akitsuutit il.il. pillugit inatsisaasa ilaasa allanngortinnerat pillugu UKA 2006/30) naatsorsuutigineqarsimavoq sulisitsisut akileraarutinut A-nut atatillugu nalunaaruteqartarnerat taakkunanngalu akiliuteqarnermikkut isumannaarisarnerat, akileraaruserinermik ingerlatsineq pillugu Inatsisartut inatsisissaattut siunnersummut, UKA 2006/29-imut nalinginnaasumik nassuiaatini "Aningaasaqarnikkut allaffissornikkullu inuussutissarsiuteqartunut sunniutaasut" pillugit immikkoortoq naapertorlugu, siuartinneqassasut.Sulisitsisut sulisoqarnermut akitsuut pillugu paasissutiissiinerat akileraarutinik A-nik unerartitat pillugit paasissutissiinermi immersugassaq atortagaq aamma atorlugu pissaaq, taamatullu aamma akitsuutinik isumannaarineq akileraarutit A-nik akiliuteqarnikkut isumannaarneqarneranut atatillugu pissalluni. Taamaammat siunertaaqqaarsimagaluarpoq sulisoqarnermut akitsuut pillugu Inatsisartut inatsisissaattut siunnersuutip ukiakkut ataatsimiinnermi (UKA 2006/9) appassaaneerutaasumik suliarineqarnerani paasissutissanik tunniussisarnerup taakkunanngalu akiliuteqarnikkut isumannaarisarnerup siuartinneqarnissaannik allannguutissamik siunnersuummik saqqummiussineqassasoq. Tamannali assut ajuusaarnartumik kukkunikkut pinngitsoorpoq.
Matumani siunnersuut aningaasarsianit akileraarutit pillugit Inatsisartut inatsisaannut allan-nguutissatut Inatsisartut inatsisissaattut siunnersuummut atatillugu isigineqassaaq.
2. Inatsisissatut siunnersuutip imarisai
Siunnersuutigineqarpoq sulisoqarnermut akitsuut pillugu paasissutissanik tunniussisarnerup aammalu taakkunannga isumannaarisarnermut piffissaliunneqartup siuartinneqarnissaa.Paasissutissanik tunniussisarneq
Sulisitsisup sulisut akissarsiaasa allagartaannik sanareernermini, sulisitsisup paasissutissanik sulisoqarnermut akitsuut pillugu nassuiaammik sananermut atorneqartussanik pigisaqareertarput.
Taamaammat suliffeqarfiup suliat aaqqissuunnissaannut periarfissaqarnissaa naleqquttumik sianigalugu paasissutissanik taamaattunik tunniussinissap siuartinnissaa akornutissaqanngilaq.
Paasissutissanik maannamumiit siusinnerusumik tigusaqarneq akileraaruseriffimmut annertuumik iluaqutaassaaq, tamatumuuna akileraaruseriffik paasissutissiissutinik pineqartunik amerlaqisunik pissarsiarineqartartunik nalunaarsuinermik suliarinninnermillu sulianik aaqqissuussinissamut pitsaanerujussuarmik periarfissaqalissammat.
Ataatsimut isiginnilluni Naalakkersuisut naliliipput, sulisoqarnermut akitsuut pillugu paasissutissanik tunniussisarnermut piffissarititaasumik siuartitsinerup sulisitsisumut pitsaaqutai ajoqutissaasunit annertuumik amerlanerussasut, paasissutissanillu tunniussinissamut piffissaliunneqartup sulisitsisut il.il. naammaginartumik asattuukkai.
Akiliuteqarnikkut isumannaarinninnissamut piffissaliussat
Akiliinissamut piffissaliussap siuartinneqarnissaa pillugu siunnersuut aningaasarsianit akileraarutit pillugit Inatsisartut inatsisaata allanngortinneqarnissaanut siunnersuummut attuumassuteqarpoq, tassuunatigummi akileraarutit A-nik kiisalu iluanaarutisianit atuisinnaanermullu akiliutinit akileraarutinik akiliiffissaq siuartinniarneqarmat kingusinnerpaamikqaammammi akiliiffissap ulluisa 20-anni pisussanngorlugu.
Sulisoqarnermut akitsuut akileraarutinut A-nut qanittumik atasuummat sulisitsisumut eqqaamajuminarnerussaaq sulisoqarnermut akitsuutip akilernissaanut isumannaarinissamut piffissaliussaq ataasiinnaappat. Taamaattumik akiliuteqarnikkut isumannaarinissamut piffissaliunneqartoq ataasinnaappat ilimagineqarsinnaavoq akiliuteqartitsinikkut isumannaarinissamut piffissaliunneqartumik qaangiisarnerit tamatumanilu ernialiisarnerit ikinnerulernissaat ilimagineqarsinnaavoq.
3. Aningaasaqarnikkut allaffissornikkullu pisortanut sunniutissai
Siunnersuut allaffissornikkut aningaasaqarnikkulluunnit pisortanut annertunerusumik sunniuteqartussasut naatsorsuutigineqanngilaq.
4. Aningaasaqarnikkut allaffissornikkullu inuussutissarsiuteqartuusunut sunniutissai
Sulisitsisut sulisoqarnermut akitsuut pillugu paasissutissanik tunniussisarnerata siuartinneqarnera aammalu isumannaarinissamut piffissaliunneqartup ullut qulit missigisaannik siuartinnera, sulisitsisut akiliisinnaassuseqarnerannut 5 procentimik erniaqartitsineqartillugu ukiumut 50.000 koruunit missaanniittunik nammagassiissuteqartussatut missiliuutigineqarpoq.
5. Avatangiisinut pinngortitamullu sunniutissai
Siunnersuut avatangiisinut pinngortitamulluunniit tunngasutigut sunniuteqartussaanngilaq.
6. Innuttaasunut allaffissornikkut sunniutissai
Siunnersuut innuttaasunut allaffissornikkut sunniuteqartussaanngilaq.
7. Nalagaaffeqatigiinnermut namminersulivinnermulluunniit tunngasut
Siunnersuut naalagaaffeqatigiinnermut namminersulivinnermulluunniit attuumassuteqanngilaq.
8. Pisortanit soqutigisaqaqatigiiffinnillu tusarniaaneq
Siunnersuut KANUKOKA-mut, Kalaallit Nunaanni Sulisitsisut Peqatigiiffiannut (GA), ILIK-mut. Nunaqavissut Suliffiutillit Kattuffiannut (NUSUKA), Sulinermik Inuussutissarsiuteqartut Kattuffiannut (SIK), KNAPK-mut, Aningaasaqarnermut Pisortaqarfimmut, Sulisoqarnermut Pisortaqarfimmut, Selsakbinut allattoqarfimmut, Inuussutissarsiutinullu Pisortaqarfimmut tusarniassutigineqarsimavoq.Tusarniaanermut akissutit Akileraartarnermut Akitsuusiisarnermullu Ataatsimiititalimut ingerlatinneqarput.
Tusarniaanermi akissutit allannguuteqartitsinissamut tunngavissiinngillat.
Aalajangersakkanut ataasiakkaanut nassuiaatit
§ 1-imut
nr. 1-imut
Siunnersuutigineqarpoq qaammammi pineqartumi akissarsiat akitsuusigassat katinnerinut taakkunanngalu akitsuummut tunngatillugu nalunaarummik tunniussinissamut ulloq kingulleq piffissaliunneqartoq qaammammi tulliusumi ullut qulingannut aalajangersarneqassasoq. Qaammammi nalunaarfissami ullut qulingat arfininngorneruppat, sapaataappat nalliuttuuppalluunniit, nalunaarummik tunniussinissamut piffissaliunneqartoq ulluinnaasumut tullermut kinguartinneqassaaq. Taamaasilluni ulloq nalunaaruteqarfissaq siuartinneqarpoq, taanna ullumikkut piffissap akitsuusiiffissap qaangiunneranit qaammammi ulluinnarmi kingullermi piffissaliunneqaraluarmat.
Akitsuummik akiliuteqartussaatitaasoq akileraaruseriffimmiit nalunaaruteqarnissamut allattuiffissanik nassinneqarumaarpoq.
nr. 2-mut
Siunnersuutigineqarpoq sulisoqarnermut akitsuummik piffissaagallartillugu akiliiffissatut kingullertut piffissaliunneqartoq qaammammi akiliiffissaasumi ulluinnarnit kingullerpaamiit 20-nianut siartinneqassasoq. Qaammammi akiligassanik isumannaariffiusussami ullut 20-at arfininngoruneruppat, sapaataappat nalliuttuuppalluunniit akiliinissamut piffissaliunneqartoq ulluinnaasumut tullermut kinguartinneqassaaq. Taamaasilluni ulloq akiliiffissaq kingulleq siuartinneqarpoq, taanna ullumikkut qaammammi ulluinnarmi kingullermi piffissaliunneqaraluarmat.
Piffissaagallartillugu akiliuteqartoqanngippat, suliffeqarfik akitsuummik akiliuteqartussaatitaasoq qaammatip aallartinneri tamaasa 1 procentimik ernianik akiliuteqartinneqartassaaq, taamaattorli minnerpaamik 500 koruuninik, qaammatip akiligassanngorfiata aallaqqaataaniit, takuuk akileraaruserinermik ingerlatsineq pillugu Inatsisartut inatsisaanni § 43.
Assersuutigalugu suliffeqarfiup akitsuummik akiliuteqartussaatitaasup aatsaat akitsuut januaarimut attuumasutilik ullormi 15. martsimi akilerpagu, suliffeqarfik qaammatinut februaarimut aamma martsimut ernianik akiligassiissuteqarfigineqassaaq. Erniat akiitsuusut qaammammik kingumoortumik immikkut akilersinniarneqartassapput. Erniat landskarsip pisassarivai.
§ 2-mutSiunnersuutigineqarpoq Inatsisartut inatsisaat 1. januar 2008 atuutilissasoq.