22. marts 2007

UPA2007/32

 

Pisortanut akiitsut akilersinniarneqartarnerat Pinaveersaartinneqarnissaallu pillugit Inatsisartut inatsisaannut allannguutissatut inatsisartut inatsisissaattut siunnersuut
(atuuffianik allannguineq)

pillugu

Inatsisartut Akileraartarnermut Akitsuusiisarnermullu Ataatsimiititaliaata

ISUMALIUTISSIISSUTAA


Siunnersuutip aappaassaaneerneqarnerani saqqummiunneqartoq


Inatsisartut Akileraartarnermut Akitsuusiisarnermullu Ataatsimiititaliaat suliarinninnermini ukuninnga inuttaqarpoq:


Inatsisartunut ilaasortaq Emilie Olsen, Atassut (siulittaasoq)
Inatsisartunut ilaasortaq Jens Lars Fleischer, Siumut
Inatsisartunut ilaasortaq Palle Christiansen, Demokraatit
Inatsisartunut ilaasortaq Olga P. Berthelsen, Inuit Ataqatigiit (sinniisussaq)
Inatsisartunut ilaasortaq Doris Jakobsen, Siumut (sinniisussaq)


UPA 2007-imi siunnersuutip siullermeerneqarnerani inatsisissatut siunnersuummut nassuiaatit kiisalu tusarniaanermit akissutitut pissarsiarineqartut ilanngullugit Inatsisartut Akileraartarnermut Akitsuusiisarnermullu Ataatsimiititaliaata misissuataarpai. Siunnersuullu siullermeerneqareersoq Aningaasaqarnermut Nunanullu Allanut Naalakkersuisumit allakkat 15. marsi 2007-imeersut pissarsiarineqarput. Allakkat taakku isumaliutissiissummut matumunnga Ilanngussaq 1-itut ilanngunneqarput.

Inatsisissatut siunnersuutip siunertai.
Siunnmersuutip inatsisip atuuffia ima kingunilimmik annertusissavaa, akiitsut inatsisinik tulliini taaneqartunik tunngavilimmik pilersimasut periutsit pisariillisakkat atorlugit siunissami akilersinniarneqarsinnaalissallutik:

Tamatuma saniatigut inatsisit allannguuteqartut atorunnaarsinneqartullu kinguneratut teknikikkut iluarsiinerit isumagineqassapput.

Inatsisissatut siunnersuutip tusarniaassutigineqarnera.
Piffissami ulloq 30. oktobari 2006-imiit ulloq 29. novembari 2006-imut inatsisissatut siunnersuutit Akileraartarnermut Pisortaqarfimmit tusarniaassutigineqarput. Tusarniaavigineqartutut toqqarneqartut tusarniaanermilluunniit akissutinik pissarsiat Akileraartarnermut Akitsuusiisarnermullu Ataatsimiititaliamit oqaaseqarfigineqanngillat. Tusarniaanermi akissutit inatsisinut nassuiaatit naapertorlugit allannguuteqartinneqarnissaat pissutissaqarsimanngilaq.

Inatsisartut inatsisissatut siunnersuummik siullermeerinerat.
Inatsisissatut siunnersuut siullermeerinermi Inatsisartuni partiinit tamanit taperserneqarpoq. Meeqqanulli ileqqaakkat pillugit inatsit aallaavigalugu pisassat akiligassanngorsimasut akilersinniarneqarnerinut aningaasanut killigititat pillugit Siumumit oqaaseqartoq saqqummiussinermini ujartuivoq.

Akileraartarnermut Akitsuusiisarnermullu Ataatsimiititaliap isumaliutersuutai.
Pisortanut akiitsut akilersinniarneqartarnerat pinaveersaartinneqarnissaallu pillugit Inatsisartut inatsisaat pisariitsumik periuseqarluni pisortat pisassaannik akiliisitsiniarnerup ajornarunnaarsinneqarneranik imalinnik maleruagassartaqarpoq. Tamanna pisortanik nammineerlutik pisassalinnit pisariaqalissappat pitsaanerusumik inissisimatitsisussaavoq, tamannalu pisortanut aningaasartuuterpassuaqarnissamik allaffissornikkullu pisarissersornissamik pinngitsoortitsisussaavoq.

Iluaqutissat taakku eqqartuussisarnermut inatsisip nalinginnaasumik aalajangersagartaasa malitsigisaatut innuttaasumut taamatut illersuutaannginnermikkut illua-tungiliisuusussaapput. Pisortat pisassamaataannut innuttaasoq pissutissalimmik uparuaatissaqarpat pisut aallaavigalugit piginnaatitaanerup qulakkeerneqarneranik annaasaqarnermik kinguneqarsinnaavoq. Minnerunngitsumik pinngitsaaliissummik akiliisitsiniarnerup atorunnaarsinnerataluunniit kingunerisaatut taakku peqqissaartumik naliliivigineqarnersut, nalorninerusinnaasorlu innuttaasumut iluaqutaatinneqarnersoq innuttaasup uparuaatigisinnaasaanut aqutsinikkut qanoq isummertoqassanersoq ilaatigut apeqqutaassaaq.

Pisariitsumik periuseqarluni pisortanit pisassamaatit tamakkerlugit akilersinniagassaqqissuunavianngitsut tamanna tunngavigalugu Akileraartarnermut Akitsuusiisarnermullu Ataatsimiititaliaq isumaqarpoq. Aatsaat pisassamaatip piussusia annertussusialu ajornanngikannersumik paasineqarsinnaappat innuttaasoq akuersiseqqaarnagu ingerlatsiviup toqqaannartumik akiliisitsiniarsinnaanera pissusissamisoortutut isumaqarfissaagunarpoq. Pisariitsumik periuseqarneq atorlugu pisassanik nalinginnaasumik akilersinniagassaanngitsunut assersuutitut taaneqarsinnaapput pisortanut isumaqatigiissuteqarluni isumaqatigiissuteqaranilu taarsiissutit.

Akiliisitsiniartarnermut maleruagassat atuuffissaasa aalajangersimasumik allannguutissaattut siunnersuutinut tunngatillugu Akileraartarnermut Akitsuusiisarnermullu Ataatsimiititaliaq inatsisissatut siunnersuutit akuersissutigineqarnissaannut nalornilersitsisinnaasunik paasissutissanik Akileraartarnermut Akitsuusiisarnermullu Ataatsimiititaliaq tigummiaqanngilaq. Inatsisilli ulluinnarni aqutsivigineqarnera Ataatsimiititaliap malittariumallugulu atuuffialu nutaamik pisariaqassappat isumaliutigiumavaa.

Meeqqanut ileqqaakkat pillugit inatsit naapertorlugu pisassamaatinik akiliisitsiniarnermut aningaasanut killigititassat aalajangersarneqarneqarnissaata isumaliutigineqarnissaa pillugu Ataatsimiititaliaq isumaqarpoq, akiitsut aningaasartaasa aningaasat aalajangersimasumik angissusillit qaangerneqarsimanerat pissutigiinnarlugu, aallaavittut isigalugu akiligassalik inatsisitigut immikkut illersortariaqanngitsoq. Maannakkumut taarsiullugu akiliisitsiniarneq akiligassallip akiliisinnaasusia apeqqutaasariaqarpoq. Taamaalilluni akiligassallit, ingerlaavartumik akissarsiarissaartut, akissarsiaanit assersuutigalugu ilanngaasoqarsinnaavoq, pisassamaatip ataatsip pisassamaatilluunniit katillugit angissusii apeqqutaatinnagit, akiligassallit pissakilliornerusut naammaginartumik inuuniuteqarnissaat qulakkeerniarneqassalluni. Pisassamaatip ilaa ataaseq akiliisitsiniartarnermut inatsimmi maleruagassat malillugit akilersinniarneqassanersoq pisassamaatillu sinnera eqqartuussisarnermi inatsimmik maleruagassat malillugit akilersitsiniarneqassanersut akiligassalinnut pisortanulluunniit siunertamut naapertuuttutut isikkoqanngitsoq Ataatsimiititaliap naggataatigut oqaatigissavaa.

Aningaasaqarnermut Nunanullu Allanut Naalakkersuisup ulloq 15. marsi 2007-imi itisilerutitut oqaatigiisai ilanngullugit innersuussutigineqassapput.

Isumaliutersuutit taakku tunngavigalugit Naalakkersuisut siunnersuutigisaattut inatsisissatut siunnersuut akuersissutigineqassasoq Akileraartarnermut Akitsuusiisarnermullu Ataatsimiititaliap taperserpaa.

Akileraartarnermut Akitsuusiisarnermullu Ataatsimiititaliap inassuteqaataa.
Akileraartarnermut Akitsuusiisarnermullu Ataatsimiititaliap isumaqatigiittup qulaani oqaatigisani tunngavigalugit inatsisissatut siunnersuut saqqummiunneqarnermisut Inatsisartut aappassaaneerinerminni akuersissutigissagaat inassutigaa.

Taamatut oqaaseqarluni Inatsisartut Akileraartarnermut Akitsuusiisarnermullu Ataatsimiititaliaata siunnersuut Inatsisartunut aappassaaniigassanngortippaa.

 

Emilie Olsen
Siulittaasoq

Doris Jakobsen
Olga P. Berthelsen

Palle Christiansen
Jens Lars Fleischer