22. marts 2007

UPA 2007/29

 

Imigassat ethanolimik akullit Kalaallit Nunaanni sananeqarsimasut akitsuutaat pillugit Inatsisartut inatsisaata allanngortinnissaanut inatsisartut inatsisissaattut siunnersuut

pillugu

Inatsisartut Akileraartarnermut Akitsuusiisarnermullu Ataatsimiititaliaata

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

Inatsisartut Akileraartarnermut Akitsuusiisarnermullu Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Emilie Olsen, Atassut (siulittaasoq)
Inatsisartunut ilaasortaq Jens Lars Fleischer, Siumut
Inatsisartunut ilaasortaq Palle Christiansen, Demokraatit
Inatsisartunut ilaasortaq Olga P. Berthelsen, Inuit Ataqatigiit (sinniisussaq
Inatsisartunut ilaasortaq Doris Jakobsen, Siumut (sinniisussaq)

UPA 2007-imi siunnersuutip siullermeerneqarnerani inatsisissatut siunnersuut nassuiaatai ilanngullugit Inatsisartut Akileraartarnermut Akitsuusiisarnermullu Ataatsimiititaliaata misissuataarpai.

Inatsisissatut siunnersuutip siunertaa
Inatsisip kinguneqaatissaanut iluarsiinerit teknikimut tunngassuteqarnerusut siunnersuutikkut anguniarneqarsimapput. Akileraartarnermik aqutsinerup qitiusumut inissinneqarneranut atatillugu UPA 2006-imi Inatsisartut akuerisaannik tunngavilimmik nutaamik inatsisiliornerup allannguutit pisariaqalersissimavai.

Inatsisissatut siunnersuutip tusarniaassutigineqarnera.
Siunnersuutip teknikimut taamaallaat tunngasuunera eqqarsaatigalugu tusarniaanermik ingerlatsisoqassanngitsoq Naalakkersuisut toqqarsimavaat. Pisoq tunngavigalugu inatsisissamik tusarniaannginnissaq Akileraartarnermut Akitsuusiisarnermullu Ataatsimiititaliap akuerisinnaavaa.

Inatsisissatut siunnersuutip Inatsisartunit siullermeerneqarnera.
Inatsisissatut siunnersuut siullermeerneqarnermini partiit oqaaseqartuinit tamanit nangaassutitaqanngitsumik taperserneqarpoq.

Akileraartarnermut Akitsuusiisarnermullu Ataatsimiititaliap isumaliutersuutai.
Siunnersuut innuttanut suliffinnut pisortanulluunniit akileraarutitigut allannguutinik allatigulluunniit pisarissersuinermik kinguneqassanngitsoq Akileraartarnermut Akitsuusiisarnermullu Ataatsimiititaliap paasivaa. Ethanolimut akitsuutip akilerneqarnissaanut piffissaliussaq Naalakkersuisullu nakkutilliinikkut iliuusissanut maleruagassanik aalajangersaasinnaanerat pillugu siunnersuut iluaqutaasunik erseqqissaanissamik nassataqartussaavoq.

Tamanna tunngavigalugu siunnersuutip Inatsisartunit siullermeerneqarneranisulli inatsisissatut siunnersuut taperserneqartariaqartoq Akileraartarnermut Akitsuusiisarnermullu Ataatsimiititaliaq isumaqarpoq.

Akileraartarnermut Akitsuusiisarnermullu Ataatsimiititaliap inassuteqaataa.

Akileraartarnermut Akitsuusiisarnermullu Ataatsimiititaliap isumaqatigiittup siuliani oqaatigisani tunngavigalugit inatsisissatut siunnersuut saqqummiunneqarnermisut Inatsisartut aappassaaneerinerminni akuersissutigissagaat inassutigaa.

Taamatut oqaaseqarluni Inatsisartut Akileraartarnermut Akitsuusiisarnermullu Ataatsimiititaliaata siunnersuut Inatsisartunut aappassaaniigassanngortippaa.

 

	Emilie Olsen Siulittaasoq
Doris Jakobsen		Olga P. Berthelsen
Palle Christiansen		Jens Lars Fleischer