25. januar 2007

UPA 2007/29

 

Inatsisissatut siunnersuummut nassuiaatit

Nalinginnaasumik nassuiaatit

1. Inatsisissatut siunnersuutip tunuliaqutaa
Inatsisartut 2006-imi ukiakkut ataatsimiinneranni akitsuutit il.il. pillugit Inatsisartut inatsisaasa ilaannut allannguutissatut Inatsartut inatsisissaattut siunnersuut nr. 14, 2. november 2006-imeersoq akuersissutigineqarpoq. Inatsit akileraaruserinermik ingerlatsineq pillugu Inatsisartut inatsisaannut nr. 11, 2. november 2006-imeersumut peqatigitillugu akuersissutigineqartumut malitseqartitsineruvoq, tassalu akitsuutit akiliisitsiniartarnerlu pillugit inatsisinut malitseqartitsinikkut allannguutaasunik arlaqartunik imaqarluni.

Ajuusaarnartumik kukkunikkut imigassat ethanolimik akullit Kalaallit Nunaanni sananeqarsimasut akitsuutaat pillugit Inatsisartut inatsisaannut malitseqartitsinikkut allannguutit inatsisissatut siunnersuummi matuma qulaani taaneqartumi ilanngunneqarsimanngillat.

2. Inatsisissatut siunnersuutip imarisai
Siunnersuutigineqarpoq akileraaruserinermik ingerlatsineq pillugu inatsisip sunniutai imigassat ethanolimik akullit Kalaallit Nunaanni sananeqarsimasut akitsuutaat pillugit Inatsisartut inatsisaannut ilanngunneqassasut, soorlu tamanna aamma akitsuutit pillugit inatsisini allani pisimasoq.

3. Aningaasaqarnikkut allaffissornikkullu pisortanut sunniutissai
Siunnersuut aningaasaqarnikkut allaffissornikkulluunniit pisortanut annertunerusumik sunniuteqartussaasutut naatsorsuutigineqanngilaq.

4. Aningaasaqarnikkut allaffissornikkullu inuussutissarsiuteqartuusunut sunniutissai
Siunnersuut aningaasaqarnikkut allaffissornikkulluunniit inuussutissarsiuteqartuusunut sunniuteqartussaasutut isikkoqanngilaq.

5. Avatangiisinut pinngortitamullu sunniutissai
Siunnersuut avatangiisinut pinngortitamulluunniit tunngasutigut sunniuteqartussaanngilaq.

6. Innuttaasunut allaffissornikkut sunniutissai
Siunnersuut innuttaasunut allaffissornikkut sunniuteqartussaanngilaq.

7. Nalagaaffeqatigiinnermut namminersulivinnermulluunniit tunngasut
Siunnersuut naalagaaffeqatigiinnermut namminersulivinnermulluunniit attuumassuteqanngilaq.

8. Pisortanit soqutigisaqaqatigiiffinnillu tusarniaaneq
Siunnersuut tusarniaassutigineqanngilaq, akileraaruserinermik ingerlatsineq pillugu Inatsisartut inatsisaata sunniutaasa ilanngunneqarnerat kisimi pineqarmata.

 

 

Aalajangersakkanut ataasiakkaanut nassuiaatit

§ 1-imut

nr. 1-imut

Siunnersuutigineqarpoq inatsimmi sumi tamani "Akileraartarnermut Pisortaqarfik" "akileraaruseriffik"-mik taarserneqassasoq.

nr. 2-mut

Siunnersuutigineqarpoq inatsimmi § 4, imm. 2-mi, § 14, imm. 1-imut innersuussineq, akileraaruserinermik ingerlatsineq pillugu Inatsisartut inatsisaanni § 58, imm. 4-mut innersuussinermik taarserneqassasoq, § 14, imm. 1 atoruunnaarsinneqarmat, takuuk siunnersuummi nr. 6 naapertorlugu.

nr. 3-mut

Siunnersuutigineqarpoq § 8, imm. 3, aamma § 9, imm. 3, atorunnaassasut, taakkunani aqutsinerit pineqartut, akileraaruserinermik ingerlatsineq pillugu inatsimmi § 59, imm. 1-imi aamma § 68-imi ilaatinneqarmata.

nr. 4-mut

Akileraarutit akitsuutillu pillugit inatsiseqartitsinermi nalinginnaasumik ulloq akiligassat akilerneqartussanngorfiat aalajangerneqartarpoq piffissaagallartillugulu akileraarutinik akitsuutinillu akiliiffisaq kingulleq aalajangersarneqarpoq, soorlu assersuutigalugu akileraaruserinermik ingerlatsineq pillugu Inatsisartut inatsisaanni § 24, imm. 3-mi aamma sulisoqarnermut akitsuut pillugu inatsimmi § 5-imi. Tamatumunnga naleqquttumik siunnersuutigineqarpoq imigassat ethanolimik akullit Kalaallit Nunaanni sananeqarsimasut akitsuutaat pillugit Inatsisartut inatsisaat malillugu akitsuutit, piffissap akitsuusiiffiusup naanerani qaammatip tulliusup aallaqqaataanut aalajangerneqassasoq. Piffissaagallartillugu akitsuutinik akiliiffissaq kingulleq allanngortinnagu atuutsiinnarneqarnissaa siunnersuutigineqarpoq.

Siunnersuutip nassataraa pisoqalisoortitsinnginnissamut piffissaliussap, piffissap akitsuusiiffiusup tullerisaanik qaammatip aallaqqaataaniit, naatsorsorneqarnissaa, piffissaliineq malittarisassat atuuttuusut malillugit qaammatip pineqartup 15-nianiit naatsorsorneqartarluni.

nr. 5-imut

Akileraaruserinermik ingerlatsineq pillugu inatsimmi § 43, imm. 1-ip akileraarutinut akitsuutinullu tunngasutigut erniat annertussusiat aqutaraa. Tamanna tunuliaqutaralugu siunnersuutigineqarpoq imigassat ethanolimik akullit Kalaallit Nunaanni sananeqarsimasut akitsuutaat pillugit Inatsisartut inatsisaanni § 10, imm. 2-mi erniat pillugit aalajangersagaq atorunnaassasoq.

nr. 6-imut

Inatsimmi § 13, imm. 2 aamma 3, § 14 aamma § 15 naatsorsuutinik nakkutilliinermut, missiliuussineq tunngavigalugu annertussusiliinermut pisortanilu oqartussaasunit paasissutissanik pisarnermut tunngasuupput. Tamakkunatigut aqutsineq maanna akileraaruserinermik ingerlatsineq pillugu inatsimmi immikkoortoq 5-imiilerpoq, taamaattumillu aalajangersakkap taaneqartup atorunnaarnissaa siunnersuutigineqarpoq.

nr. 7-imut

Siunnersuutigineqarpoq Naalakkersuisut nalunaarutikkut nakkutilliinermi iliuusissat pillugit malittarisassanik aalajangersaanissamut pisinnaatinneqassasut. Malittarisassat assersuutigalugu uuttuinermi atortut suut atorneqarnissaannut sanaqqaarnerullu sumut killinnerani uuttuutit ivertinneqassanerannut tunngasuusinnaapput. Inillu atorneqartut qanoq aaqqissugaanissaannut tunngasumik tamatumani soorlu nioqqutissat akitsuusikkat akitsuusigaanngitsullu immikkoortillugit inissaqartinneqarnissaannut tunngasunik malittarisassanik aamma aalajangersaaneqarsinnaavoq. Naalakkersuisullu nakkutilliinermi iliuusissanut tunngasunik tamatumunnga assingusunik malittarisassanik allanik aalajangersaasinnaassapput, assersuutigalugu misissugassanik tigusinermut misissuinermullu tunngasunik, taamatut iliuutsit akitsuutinik eqqortumik naatsorsuinerup qulakkeerneqarnissaanik siunertaqartillugit.

nr. 8-mut

Inatsimmi § 17 aamma § 18-ip atorunnaarnissaat siunnersuutigineqarpoq akileraaruserinermik ingerlatsineq pillugu Inatsisartut inatsisaanni, pingaartumik tassani §§-ini 70-imiit 76-imut, aqutsinermik taarserneqarlutik.

§ 17 Akileraartarnermut Pisortaqarfiup inatsit naapertorlugu aalajangiisinnaanermut Naalakkersuisut piginnaatitsisinnaanerannik, ilaatigullu Naalakkersuisut aalajangiinerit pillugit naammagittaaliuuteqarsinnaanermut malittarisassanik aalajangersaasinnaanerannut piginnaatitsinermik imaqarpoq. § 18-imi aalajangiinerit qanoq ittut Skatterådimut naammagittaalliuutigineqarsinnaanerat, aammalu Skatterådip aalajangiinerinik Kalaallit Nunaata eqqartuussivianut suliassiissuteqarnissamut piffissaliussaq, aalajangersaavigineqarput.

Skatterådip akitsuutinut tunngasunik suliani aalajangiisinnaanermut pisinnaatitaanerata annertusineqarneratigut, imigassat ethanolimik akullit Kalaallit Nunaanni sananeqarsimasut akitsuutaat pillugit Inatsisartut inatsisaat naapertorlugu aalajangiinerit pillugit naammagittaalliuuteqarsinnaanermut immikkut malittarisassat ingerlateqqinnissaannut tunngavissaarutissaaq.

nr. 9-mut

Siunnersuut § 14-ip atorunnaarnerata nassataraa, takuuk siunnersuummi nr. 6.

§ 2-mut

Inatsisartut inatsisaat 1. juli 2007-imi atuutilerpoq.