12. oktober 2007

UKA 07/15 (UKA 07/102)

 

Aalisarnermik piniarnermillu inuussutissarsiutillit inuussutissarsiornerannik siuarsaaneq pillugu Inatsisartut peqqussutaat nr. 10, 20. november 2006-imeersup allanngortinneqarneranik Inatsisartut peqqussutissaattut siunnersuut
(Siumup Inatsisartunut ilaasortaatitai)

pillugu

Inatsisartut Aalisarnermut, Piniarnermut Nunalerinermullu Ataatsimiititaliaata

ISUMALIUTISSIISSUTAA

Peqqussutissatut siunnersuutip aappassaaneerneqarnerani saqqummiunneqartoq

Inatsisartut Aalisarnermut, Piniarnermut Nunalerinermullu Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Lars - Emil Johansen, Siumut siulittaasoq
Inatsisartunut ilaasortaq Godmand Rasmussen, Atassut (Augusta Sallingimut sinniisussaq)
Inatsisartunut ilaasortaq Otto Jeremiassen, Siumut (Jens Lars Fleischerimut sinniisussaq)
Inatsisartunut ilaasortaq Ane Hansen, Inuit Ataqatigiit
Inatsisartunut ilaasortaq Jens B. Frederiksen, Demokraatit

UPA 07-imi siullermeerinerup kingorna Inatsisartut Aalisarnermut, Piniarnermut Nunalerinermullu Ataatsimiititaliaata peqqussutissatut siunnersuut nassuiaatitaalu misissorpai.

Siunnersuutip imarisai

Inatsisitigut inissisimanerup allanngortinneqarnissaa, taamaalillunilu inuussutissarsiutigalugu umiatsiaaqqamik pisinissamut taarsigassarsisussat ukiuannut qummut killigititap ukiumut soraarninngorfimmut nalinginnaasumut naapertuuttunngortinneqarnissaa, Inatsisartut peqqussutissaattut siunnersuutikkut matunani pineqartukkut siunnersuuteqartut kissaatigaat.

Siunnersuutip UPA 2007-imi siullermeerneqarnerani partiit isummersuutaat

Inuussutissarsiutigalugu umiatsiaaqqamik pisinissamut taarsigassarsisussat ukiuisa ukiumut soraarninngorfimmut nalinginnaasumut naapertuuttunngortinneqarnissaanik Siumup Inatsisartunut ilaasortaatitaasa siunnersuutaannut Naalakkersuisut tunngaviusumik tapersersuinerat Siumup nuannaarutigaa.

Pensionisiaqalernermut nalinginnaasumik ukiorititat 63-iniit 65-inut allanngortinneqarnissaannik Inatsisartut aalajangiinerat Inuit Ataqatigiit tikkuarpaat. Tamatuma aalisarnermik piniarnermillu inuussutissarsiutillit inuussutissarsiornerannik siuarsaaneq pillugu peqqussummi ersersinneqarnissaa pissusissamisoortutut isigineqarpoq. Aammattaaq aappassaaneerinissaq sioqqullugu siunnersuummik sukumiisumik naliliinissaq oqaluuserinninnissarlu Inuit Ataqatigiinnit pisariaqartutut isigineqarpoq, tamatumunnga atatillugu aningaasaliissutit inuussutissarsiutinik siuarsaanermut immikkoortinneqartut peqqussummi siunertarisamut naapertuunnersut misissorneqartariaqarlutik.

Siunnersuut matumani pineqartoq Inatsisartunit akuersissutigineqassappat inuussutissarsiutigalugu aalisartut piniartullu hundredelikkaat aningaasanut inatsimmi aningaasaliissutigineqartut iluini umiatsiaaqqanik qulinik qinnuteqarnissamut periarfissaqareersut qinnuteqarsinnaasunik hundredelikkaanik arlalinnik amerlissasut Atassutip oqaatigaa. Umiatsiaaqqanut atortussanulluunniit nutaanut taarsigassarsisitsisoqassatillugu aalisartut pinartullu inuusuttut salliutinneqartariaqartut Atassut isumaqarpoq. Taamaattumik tusarniaanissaq siunertaralugu siunnersuutip kinguartinneqarnissaanut pissutsit arlallit tunngaviliisut Atassut isumaqarpoq.

Inuussutissarsiutinik siuarsaanermi tapiissuteqartarnermut aningaasaliissutigineqartut ilaasa utertinneqarnissaannik inuiaqatigiit naatsorsuutiginninnerannik tunngaveqarluni tapiissuteqartoqartassasoq Demokraatit isumaqarput. Pensionisiaqalertussaq qaammatialunnguit pensionisiaqalernissani sioqqullugu Landskarsimit tapiiffigineqartumik inuussutissarsiutigalugu umiatsiaaqqamut ESU-mit taarsigassarsissappat, inuiaqatigiit tapiissutinit pissarsiassaat annikitsuaraannaassasoq naatsorsuutigineqarsinnaavoq. Tapiissuteqarnissamut killigititaq maannatut pensionisiaqalernissaq sioqqullugu ukiunut pingasunut aalajangerneqartariaqartoq Demokraatit naliliipput, qaffasissusissap tamatuma siunissami qanoq aalajangersaavigineqarnissaa apeqqutaatinnagu. Siunnersuut itigartitsissutigineqassasoq Demokraatit inassutigaat.

Peqqussitissatut siunnersuutip tusarniaassutiginera

Siunnersuut APNP-mut, Kalaallit Nunaanni Sulisitsisut Peqatigiiffiannut, KNAPK-mut NUSUKA-mullu tusarniaassutigineqarpoq. NUSUKA eqqaassanngikkaanni tusarniaaffigisat peqqussutissatut siunnersuummut oqaaseqaatissaqanngillat. Peqqussutissatut siunnersuut amerlanerusut qinnuteqarsinnaanerannik ammaassammat peqqutissatut siunnersuutip akuersissutigineqarnera amerlanerusunik qinnuteqartoqarneranik kinguneqarsinnaasoq NUSUKA-p oqaatigaa. Namminersornerullutik Oqartussat allaffissornikkut nukissanik killilinnik peqarnerat eqqarsaatigalugu qinnuteqaatit taama amerleriarnerat illersorneqarsinnaasumik isumagisinnaassaneraat peqatigiiffiup isumakuluutigalugu oqaatigaa.

Ataatsimiititaliap siunnersuummik suliarinninnera

Pensionisiaqalernissap ukiorititat tikivillugit inuussutissarsiutigalugu umiatsiaaqqanik pissarsinissamut taarsigassarsiarititat pensionisiaqalernissamut ukiuisa atuutilernissaata Udvalget noterer sig taarsigassarsisitsisinnaanissaq tunngaviatigut tapersersinnaallugu taamani Naalakkersuisuusut siullermeerinermi oqaatigimmassuk ataatsimiititaliap aallarniutigalugu maluginiarpaa. Naalakkersuisulli peqqussutissatut siunnersuutip susassaqartunut tusarniaassutigineqarnissaa pisariaqarsoraat. Tusarniaaneq taanna maanna ingerlanneqareerpoq. Naalakkersuisut piumassuseqarlutik iluatsittumillu tusarniaanerat iluarisimaarlugu ataatsimiititaliap oqaatigissavaa. Tusarniaanermit akissutit isumaliutissiissummut matumunnga ilanngussatut ilanngunneqarput.

NUSUKA-mit isummersuutit oqaaseqarfiginissaat ataatsimiititaliap tunngavissaqarsoraa. Siunnersuut amerlanerit qinnuteqarsinnaanerannik ammaasoq suliassat amerleriarnerat pissutigalugu sulianik suliarinnittarnerup sivisunerulerneranik nassataqarsinnaasoq NUSUKA oqarmat ataatsimiititaliap isumaqatigaa. Tassa aallaavittut isigalugu. Peqqussutissatulli siunnersuut Inatsisartunit akuersissutigineqassaguni aqutsinermi maleruagassatigut tunngaviit nalinginnaasut avaqqunneqarsinnaanngitsullu naapertorlugit aqutsivigineqassaaq. Tamanna najoqqutassat asigiiaartut innuttaasut tamarmik assigiimmik pineqarnissaannik qulakkeerisut malillugit innuttaasut ataasiakkaat qinnuteqaataasa suliarineqarnissaannik qulakkeerissaaq. Tamanna tunngavigalugu NUKUKA-tut isumakuluuteqarnissamut ataatsimiititaliaq tunngavissaqarsorinngilaq. Aammattaaq Naalakkersuisut allaffissornikkut nammakkerneqarnerat naatsorsuutigisamit annertunerujussuussappat allaffissornikkut nukissat pisariaqartut pissarsiarineqarnissaat piffissaalluartillugu Naalakkersuisunit qulakkeerneqassasoq ataatsimiititaliap naatsorsutigaa.

Qinnuteqartut amerleriaateqarnerisa kingunerisaanik allaffissornikkut nukissanik annertunerusunik atuinissap matussutissaanik siunnersuummut aningaasalersuutissanik siunnersuuteqartut innersuussuteqarsimanngitsoq ataatsimiititaliap oqaatigissavaa.

Piniartunit pensionisiaqaleqqajaasunit qinnuteqaatit amerlingaatsiarnerannik siunnersuutip akuersissutigineqarnera kinguneqassappat, tamanna taarsigassarsitinneqarnissamik piumasaqarnerup 2008-milu aningaasanut inatsisissatut siunnersuummi immikkoortumut aningaasaliissutigineqartut akornanni naapertuutinngitsoqalerneranik kinguneqassaaq. Aningaasaliissutissatut siunnersuutigineqartut iluini inuussutissarsiutigalugu 10-11-it missaanniittunut taarsigassarsisitsisoqarsinnaavoq. Inuussutissarsiutigaluguli piniartup 65-it missaannik ukiullip peqqillunilu aalassarissup inuussutissarsiutigalugu umiatsiaaqqamut taarsigassarsinissamik qinnuteqarnissamut siunnersuutikkut aammaanneqarnera ataatsimiititaliamit ilalernartinneqarpoq. Tamatuma peqatigisaanik suliassaqarfimmi ingerlataq aningaasaliissutitigut aqunneqarnera ingerlaannassasoq ataatsimiititaliap oqaatigissavaa.

Aningaasat suliassaqarfimmut immikkoortinneqartut ataatsimut isigalugu pingaarnersiorneqarneranni ukiorisat apeqqutaatinneqassasut Naalakkersuisut ersersippaat, taamaalillunilu pingaartumik aalisartunut piniartunullu inuusunnerusunut inuussutissarsiornermikkut sivisuumik eqeersimaartumillu ingerlalluartussatut naatsorsuutigineqarsinnaasunut inuussutissarsiutigalugu umiatsiaaqqanik aningaasalersuinermut ikiuisoqartassalluni. Tamatumani aaqqissuussinerup ungasinnerusoq eqqarsaatigalugu suliassaqartitsinikkut sunniutaata annertunerulersinneqarnissaanik kissaateqarneq aallaavigineqarluni. Tassunga atatillugu peqqussummi atuuttumi § 1, imm.1-imi pisussaaffit oqaatigineqartut Naalakkersuisut innersuussutigaat.

Akuersissutiginninnerup kingorna qinnuteqarsinnaasut inunnik 471-it angullugit amerlinissaat naatsorsuutigineqartoq Naalakkersuisut akissuteqaamminni oqaatigaat. Tamatuma saniatigut qinnuteqarsinnaasut Qeqertarsuup Tunuaneersut qanoq amerlatigisinnaanerat naatsorsorneqarsimanngitsoq ilanngunneqassaaq. Aalisarnermik piniarnermillu inuussutissarsiutillit inuussutissarsiornerannik siuarsaaneq pillugu peqqussummi 2006-imi allannguutinut atatillugu kingulliullugit taaneqartunut taarsigassarsisitsisinnaasoqalerpoq.

Ataatsimiititaliap inassuteqaatai

Ataatsimiititaliami amerlanerussuteqartut , Siumumeersut, Atassummeersut Inuit Ataqatigiinneersullu siunnersuut akuersissutigineqassasoq inassutigaat.

Ataatsimiititaliami ikinnerussuteqartut, Demokraatineersut siunnersuut itigartitsissutigineqassasoq inassutigaat.

Taama oqaaseqarluni siulianilu paasinninneq tunngavigalugu Inatsisartut Aalisarnermut, Piniarnermut Nunalerinermullu Ataatsimiititaliaata aappassaaniigassanngortippaa.

 

	Lars Emil Johansen Siulittaasoq
Godmand Rasmussen		Otto Jeremiassen
Ane Hansen		Jens B. Frederiksen