17. august 2007
26. januar 2007UKA 2007/15
UPA 2007/102
Inatsisissatut siunnersuummut nassuiaatit
Nassuiaatit nalinginnaasut
1. Siunnersuummut tunngaviusut imarisaalu
Aalisarnermik piniarnermillu inuussutissarsiutillit inuussutissarsiornerannik siuarsaaneq pillugu Inatsisartut peqqussutaat atuuttoq naapertorlugu inuussutissarsiutigalugu umiatsiaaqqat nutaamik sanaat pissarsiarinerinut piumasaqaatit erseqqissumik oqaatigineqartut malillugit Naalakkersuisut tapiissuteqarsinnaapput. Inatsisartut peqqussutaata piumasaqaatitut oqaatigisaasa ilagaat qinnuteqaateqartoq 18-it 60-illu akornanni ukioqassasoq.
Peqqussutissatut siunnersuutikkut ugguuna ukiorisat qummut killingat 65-inik ukiulinnut qaffanneqassaaq.
§ 6 – maannakkut oqaasertalerneqarnera § 6 – oqaasertaasa allannguutissai Qinnuteqartoq, inussutissarsiutigalugu nutaamik umiatsiaarartaarniarnermini, § 5 malillugu imaassaaq: 1) 18-it 60-illu akornanni ukioqassalluni, aamma
2) tapiiffigineqarnissamik qinnuteqarnini ukiunik marlunnik sioqqullugu inuussutissarsiutigalugu piniartutut aalisartutulluunniit allagarserneqarsimasussaalluni qinnuteqarnermilu nalaani taama allagaqartaqartussaalluni.
Qinnuteqartoq, inussutissarsiutigalugu nutaamik umiatsiaarartaarniarnermini, § 5 malillugu imaassaaq: 1) 18-it 65-illu akornanni ukioqassalluni, aamma
2) ) tapiiffigineqarnissamik qinnuteqarnini ukiunik marlunnik sioqqullugu inuussutissarsiutigalugu piniartutut aalisartutulluunniit allagarserneqarsimasussaalluni qinnuteqarnermilu nalaani taama allagaqartaqartussaalluni.
Taamaalilluni inuussutissarsiutitut umiatsiaaqqanik pissarsinermi tapiissuteqarnissamut ukiorisat qummut killingat pensionisiaqalernermut nalinginnaasumik ukiorisanut naapertuuttun-ngortinneqarpoq – naatsorsuutigineqarmammi pensionisiat pillugit iluarsartuusseqqissamut atatillugu taanna ukiunit 63-init 65-inut sivitsorneqassasoq.
Taamaalillutik piniartut pensionisiaqalersussatut ukioqangajalersut inuussutissarsiortutut ukiulittut allatulli inuussutissarsiutigalugu umiatsiaaqqamik pissarsinissamut siunnersuutikkut tapiissutinik qinnuteqaateqarsinnaalissapput.
Piniartut utoqqalisut inuussutissarsiutigalugu umiatsiaaqqatik pisoqalillutik nungullarlutillu taarsertariaqalerpata pisortanit ikiorserneqarnissamut ikaarsaarnermikkut inuussutissarsiumminnik piumassuserinngisaminnik unitsitsinnginnissaannut siunnersuut iluaqutaasinnaassasoq neriuutigineqarpoq.
Inatsisartut peqqussutaannut atuuttumut tunngatillugu inatsimmut nassuiaatini inuussutissarsiutigalugu umiatsiaaraq ukiuni 12-ini atorneqarsinnaasoq Aalisarnermut Piniarnermullu Pisortaqarfik missingiisimammat oqaatigineqassaaq. Siunnersuut matumani pineqartoq malillugu qinnuteqaateqartumut 61, 65-illu akornanni ukiulimmut inuussutissarsiutigalugu umiatsiaaqqamut Naalakkersuisut tapiissuteqarnerat pineqaraangat tapiissuteqarfigineqartup inuussutissarsiummik ingerlatsigallartutut ukiut atuuffigisassaatut naatsorsuutigisat qaangerujussuarlugit inuussutissarsiutigalugu umiatsiaaraq taamaalilluni atorneqarallartussaavoq.
Assersuutigaluguli tapiissutisisup pensionisiaqalernerani inuussutissarsiutigalugu umiatsiaaraq pissarsiarineqarnermi kingorna ukiut arfinillit qaangiutinngitsut tunineqarpat, Inatsisartut peqqussutaanni § 10, nr. 3, naapertorlugu, tapiissutit pissarsiarineqarnerannit ukiup aallartinneri tamaasa aqqaneq-marlorarterummik nalikillillugit tapiissutitut tunniunneqartut Naalakkersuisut utertillugit akilerneqaqqusinnaavaat.
Tapiissutisisoq (ass. pensionisiaqalernermut ikaarsaarnerup kingunerisaatut) ukiuni malittuni marlunni inuussutissarsiutigalugu piniartutut aalisartutulluunniit allagartaqanngippat, imaluunniit qaammatini kingullerni aqqaneq-marlunni inuussutissarsiutigalugu umiatsiaaqqamik atuinermigut isertitami amerlanersaannik pissarsisimasutut nalilerneqanngippat aamma tamanna atuutissaaq.
2. Pisortanut aningaasaqarniarnikkut allaffissornikkullu kinguneqaatissat
Inuussutissarsiutigalugu umiatsiaaqqamik pissarsinermut Naalakkersuisut tapiiffigisinnaasaat siunnersuut malillugu amerlissapput, tapiissutilli tunniunneqarnissaannut aningaasaqarniarnikkut killiliussanik allannguisuussanani. Siunnersuut taamaalilluni Namminersornerullutik Oqartussanut kinguneqaateqassanngilaq.
Inuussutissarsiutigalugu umiatsiaaqqamik pissarsinermut Naalakkersuisut tapiissuteqarfigisinnaasaasa amerlinissaat tapiissutinik qinnuteqaatinik amerleriartitsisinnaasoq naatsorsuutigineqarsinnaavoq, Inatsisartullu peqqussutaanni § 10 atuuttoq naapertorlugu tapiissutinik utertillugit akilersuinermut tunngatillugu suliassat suliarineqartartut ataatsimut isigalugit amerleriassasut aamma immaqa ilimagineqarsinnaalluni.
Allaffissornikkulli kinguneqaatissat annikitsuinnaassasut naliliisoqarpoq. Inatsisartut peqqussutaata allanngortinneqarnissaanik siunnersuutip kingunerisaatut Aalisarnermut Piniarnermullu Pisortaqarfimmi sulisorisat amerlineqaqqinnissaat pisariaqassasoq taamaalilluni naatsorsuutigineqanngilaq.
Siunnersuut kommuninut aningaasaqarniarnikkut allaffissornikkulluunniit kinguneqaateqassanngilaq.
3. Inuussutissarsiummik ingerlatsisunut aningaasaqarniarnikkut allaffissornikkullu kinguneqaatissat.
Inuussutissarsiutigalugu umiatsiaaqqanik pissarsinermut tapiissutinik qinnuteqaateqartunut ukiorisatigut qummut killiliussaq 60-iniit 65-inut qaffanneqassaaq. Tamatuma saniatigut siunnersuut inuussutissarsiutinik ingerlatsisunut aningaasaqarniarnikkut allaffisoornikkullu kinguneqaateqassasoq naatsorsuutigineqanngilaq.
4. Avatangiisinut pinngortitamullu kinguneqaatissat
Siunnersuut avatangiisinut pinngortitamullu kinguneqaateqaateqassasoq naatsorsuutigineqanngilaq.
5. Innuttanut allaffissornikkut kinguneqaatissat
Siunnersuut innuttanut allaffissornikkut kinguneqaateqassanngilaq.
6. Naalagaaffeqatigiinnermut Namminersornermullu tunngasut
Siunnersuut Naalagaaffeqatigiinnermut namminersornermullu kinguneqaateqassanngilaq.
7. Pisortanut kattuffinnullu tusarniaanissaq
Siunnersuutip saqqummiunneqarnissaa sioqqullugu pisortanut kattuffinnullu il.il. tusarniaaneq ingerlanneqarsimanngilaq. Siunnersuutigineqassaaq siunnersuutip aappassaaneerneqarnissaa 2007-imi ukiakkut ataatsimiinnermut kinguartinneqassasoq, aammalu tamatuma tungaanut siunnersuutip aappassaaneerneqarnissaa sioqqullugu tusarniaanermit akissutigigineqartut Inatsisartut ataatsimiititaliaani suliaqarnermut ilaatinneqarsinnaaqqullugit pisortat kattuffiillu il.il. tusarniaavissatut naleqquttut tusarniaavigeqqullugit Inatsisartut Naalakkersuisut qinnuigissagaat.
Inatsisissatut siunnersuummi aalajangersakkanut ataasiakkaanut nassuiaatit
§ 1-imutInuussutissarsiutigalugu umiatsiaaqqamik pissarsinermut tapiissutinik qinnuteqaateqarnissamut ukiorisanut qummut killigititaq 60-iniit 65-inik ukioqarnermut qaffanneqarnissaa aalajangersakkap kingunerissavaa.
Qinnuteqaateqarnerup nalaani ukiorisassanik piumasaqaat eqquutinneqarsimasssaaq.
Inuussutissarsiutigalugu umiatsiaaqqap nutaatut sanaajunissaanik, minnerpaamik 16 foditut, anginerpaamillu 19 foditut takissuseqarnissaa, kiisalu Kalaallit Nunaanni inuussutissarsiutigalugu umiatsiaaqqatut atorneqarnissamut akuersissutigineqarsimasuunissaanik Inatsisartut peqqussutaata atuuttup piumasaqaatai atuutissapput. Aammattaaq qinnuteqaateqartoq piffissami qinnuteqaateqarnermi nalaani kiisalu tamatuma siorna inuussutissarsiutigalugu piniartutut inuussutissarsiutigaluguluunniit aalisartutut allagartaqarnissaanik piumasaqaat atuutissaaq.
Taamatuttaaq tapiissuteqarnissamut Inatsisartut peqqussutaanni § 3-mi pingaarnertut tunngavissaatitaasut atuutiinnassapput, aamma tapiissutisisinnaatitaasut amerlineqarnerannut tunngatillugu.
§ 2-mutInatsisartut peqqussutaat ull. 1. januar 2008 atuutilissasoq siunnersuutigineqarpoq.
Peqqussutissatut siunnersuutip aappassaaneerneqarnissaa 2007-imi ukiakkut ataatsimiinnermut kinguartinneqassasoq siunnersuutigineqarmat tusarniaanerit kinguneqaatissanillu naliliinerit tamatuma tungaanut nalilersorneqarnissaat atuutilerfissatut piffissaliussap toqqarneqarneranut attuumassuteqarpoq.