9. August 2007

EM 2007/46

 

Peqqussutissatut siunnersuummut oqaaseqaatit


Oqaaseqaatit nalinginnaasut

1. Aallaqqaasiut

Siunnersuutip Namminersornerullutik Oqartussat kommunillu inissiaataasa attartortittakkat pigisatut inissianngortissinnaanerat pillugu Inatsisartut peqqussutaat atuuttoq taarsissavaa. Siunnersuut suliassaqarfimmi suliani misilittagaasut naapertorlugit naleqqussagaavoq, taamatullu aalajangersakkat arlallit peerneqarput, tamatumunnga taarsiullugu inatsisinut allanut ilanngunneqarlutik. Assersuutigalugu piginnittut peqatigiiffiinut maleruagassanut tamanna atuuppoq.

Siunnersuummi Namminersornerullutik Oqartussat kommunillu inissiaataannik attartortittakkanik inissiatut imaluunniit illutut nammineq pigisatut tigusisarnermi periusissaq nassuiarneqarpoq, taamatullu Namminersornerullutik Oqartussanit kommuninillu taarsigassarsinissamut periarfissat, taarsigassarsiat inissiap qularnaveeqqusiunneratigut qularnaarneqarsinnaanerannut nassuiaatitallit nassuiaatigineqarlutik. Qinnuteqartup tungaaniit isigalugu siunnersuummi maleruagassat qasukkarneqarnerupput, taarsigassarsinissamut atugassarititaasut pitsaanerulersinneqarlutik. Matumani aallarniutigalugu erseqqissaatigineqassaaq, akit nikingassutaannut qularnaveeqqusiissut siornatigumut naleqqiullugu allaanerusunik imaqalermat. Tamanna pillugu siunnersuummi aalajangersakkanut attuumassutilinnut oqaaseqaatit sukumiinerusumik innersuussutigineqarput.

Siunnersuummi siunertarineqarpoq inuit amerlanerusut imminnut inissianik pilersorsinnaalernissaat.

2. Peqqussutissatut siunnersuutip pingaarnersai

Pineqartumut inatsit maanna atuuttuusoq inatsisitigut assigiinngitsunik inissisimanernik nassataqartarpoq, tamatumani apeqqutaalluni inissiat attartortittakkat agguataarneqartut tiguneqartullu Namminersornerullutik Oqartussanit imaluunniit kommunimit pineqarnersut. Inatsit maanna atuuttoq malillugu kommunit inissiaataanni attartortittakkani attartortut inissiarsuarni inissiat attartukkatik tigusinnaavaat, inissiaateqarfimmi pineqartumi inissiani attartortittakkani attartortut tigusinissamik kissaateqartut amerlassusaat apeqqutaatinnagit. Namminersornerullutik Oqartussat inissiaataanni attartortittakkani attartortut taamatut periarfissaqanngillat, tassanimi inissiaateqarfimmi inissianik attartortittakkanik attartortut minnerpaamik 75%-iisa isumaqataanissaat piumasarineqarpoq.

Tamatuma saniatigut paasinarsisimavoq inatsimmi aalajangersakkat arlaqartut aaqqissuussinermi siunertaasumut pingaarnermut naleqqiullugu naammassimanngitsut, naleqqussimanatik imaluunniit pisariaqarsimanatik. Taakku siunnersuummi erseqqissaaffigineqarput imaluunniit peerneqarlutik.

Siunnersuummi Namminersornerullutik Oqartussat kommunillu inissiaataannik attartortittakkanik tigusinissamut ataatsimoortunik maleruagassaqalerpoq. Tamatuma saniatigut arlalitsigut oqaatsitigut allannguisoqarpoq erseqqissaasoqarlunilu.

Inissianik piginnittunut nutaanut atugassarititaasut pitsaanerulersinneqarnissaannik kissaateqarnerup ilaatut taarsigassarsinissamut atugassarititaasut pisortanit taarsigassarsiarititanut attuumassuteqartut pitsannguuteqartinneqangaatsiarput. Namminersornerullutik Oqartussat kommunillu taarsigassarsiarititaat erniaqartitaannginnissaannut akilersugassaannginnissaannullu piffissaliussaq ukiunik 15-iniit 20-inut sivitsorneqarpoq, taamatullu taarsigassarsiat taakku piffissaq akilersorneqarfissaat ukiunik 10-iniit 15-inut allanngortinneqarluni.

Tunisinermut akiusup aalajangersarneqartarneranut atatillugu teknikkikkut aningaasaqarnikkullu naliliisarnerup atorneqartarnera atorunnaarsinneqarpoq. Siunnersuummi niuernermi naligititaasoq malillugu tunisinermut akiusoq tamatigut aalajangersarneqartalissaaq. Tassunga ilanngullugu inissiaateqarfinni pingasunik amerlanerusunilluunniit attartortittakkanik inissiartaqartuni attartortut tunisinermi akiusumut akikillisaavigineqartalernissaat periarfissinneqarpoq. Akikillisaanermi attartortup piffissami qanoq sivisutigisumi attartortuusimanera apeqqutaatinneqarpoq. Attartortunut illuni ilaqutariinnut ataatsinut inissiani aamma illuni affarleriinni najugaqartunut tunisinermi akiusumut akikillisaasoqartassanngilaq, illut taakkua tamatigut niuernermi naligititaasoq malillugu tunineqartartussaammata.

Siunnersuummi akit nikingassutaannut qularnaveeqqusiissut suli iluanaarniapilunnissamut illersuutitut atorneqarpoq. Kisiannili akit nikingassutaannut qularnaveeqqusiissut siornatigumut naleqqiullugu allaanerusumik imaqalerpoq. Taamaalilluni akit nikingassutaannut qularnaveeqqusiissut teknikkikkut aningaasaqarnikkullu naliliinerup aamma niuernermik naliliinerup assigiinngissutaata annertoqqataanik qularnaveeqqusiissutaasarunnaarpoq. Tamannattaaq teknikkikkut aningaasaqarnikkullu naliliisarnerup siunnersuummit peerneqarnerata kinguneraa. Kisiannili akit nikingassutaannut qularnaveeqqusiissut tunisinermi akiusup niuernermilu naligititaasup assigiinngissutaat tunngavigalugu aalajangerneqartalissaaq. Assigiinngissut taanna taamaallat attartortup qanoq sivisutigisumik attartortuusimanera apeqqutaalluni tunisinermut akigititaasumut akikillisaavigineqarpat pilersinnaavoq.

3. Pisortanut aningaasaqarnikkut allaffissornikkullu sunniutissat

Nunap karsiata kommunillu aningaasanik, inissianik piginnittunngortussanut taarsigassarsiarititassanik amerlanerusunik atugassiisalernissaat naatsorsuutigineqarpoq, tamannalu ilaatigut inissiani attartortittakkani tunineqartuni aserfallatsaaliuisussaatitaanerup peerneqarneratigut, ilaatigullu tunisinermi akiusut 60%-iinik, tigusinermut atatillugu pisisumit akilerneqartussanik iluanaaruteqarnikkut illuatungilerneqartussaavoq. Taamaattumik ilanngaatissat ilanngaatigereerlugit siunnersuutip Nunap Karsianut kommuninulluunniit artukkiinissaa naatsorsuutigineqanngilaq.

Allaffissornerup annertunerulernissaa naatsorsuutigineqarpoq, tassami siunnersuummi tigusinermut atatillugu periaasissatut nassuiaatigineqartumi Naalakkersuisut kommunalbestyrelsilu tigusinermut atatillugu suliassanik pisussaaffinnillu arlalinnik suliakkerneqartartussanngorput. Taamaattorli suliassat pisussaaffiillu arlallit pineqarput qinnuteqaatip siulliup tiguneranut atatillugu ataasiaannarluni suliarineqartussat. Tassani ilaatigut inissianut nammineq pigisanut immikkoortunut agguataarinissaq, piginnittut peqatigiiffiannik pilersitsinissaq, kiisalu piginnittut peqatigiiffiata malittarisassaanik suliaqarnissaq eqqarsaatigineqarpoq.

2002-miit 1. marts 2007 tungaanut Namminersornerullutik Oqartussat inissiaataannik attartortumiit piginnittumut periaaseq malillugu tigusinerit katillugit 80-it naammassineqarsimapput. Tigusinerit taakku 80-iusut kommuninut 10-nut agguagaapput. Sulili Namminersornerullutik Oqartussat inissiarsuaataannik tigusinernik naammassinnittoqarsimanngilaq, taamaallaat ilaqutariinnut ataatsinut illunik illunillu affarleriinnik tigusisoqartarsimalluni.

Takussutissiaq 1: Akit nikingassutaannut qularnaveeqqusiissut
Akit nikingas. qularn.1000 koruuninngorlugu

Illuutit amerlassusai

Qularn. aning.katillugit

Qularn. aning. agguaqatigiis.
0

25

 0

 0
1-100

12

712.537

59.378
101-200

8

986.883

123.360
201-300

7

1.662.248

237.464
301-400

3

1.074.289

358.096
401-500

1

478.944

478.944
501-600

7

4.010.559

572.937
601-700

4

2.533.527

633.382
701-800

6

4.464.026

744.004
801-900

2

1.786.469

893.235
901-1000

0

- 

- 
1001-1100

0

- 

- 
1101-1200

2

2.226.055

1.113.028
1201-1300

2

2.444.207

1.222.104
1301-1400

1

1.318.337

1.318.337

80

23.698.081

295.101

 

 

 

 

 

 

 

 

 

 

 

 

Najoqqutarisaq: 2002-miit 1.3.2007-imut allannguinerit.

Inissiat nammineq pigisat 80-it niuernermi nalingannit tamakkiisunit 69,9 millioner koruuniusunit 23,7 millioner koruunit akit nikingassutaannut qularnaveeqqusiissutitut uninngatinneqarput, tassalu 34%-erpianik annertussuseqarlutik. Akit nikingassutaannut qularnaveqqusiissutit maannakkutut ukiumut 1/10-inik nalikillineqartassapput.

Akit nikingassutaannut qularnaveeqqusiissut iluanaarniapilunnissamut illersuutitut atuutsinneqalersimavoq. Ukiuni tallimani aaqqissuussinerup atuuffigisaani akit nikingassutaannut qularnaveeqqusiissutip akilerneqarneranik kinguneqartumik ataasiinnarmik niueruteqartoqarsimavoq.

Siunnersuutip atuutilerneratigut Namminersornerullutik Oqartussat kommunillu inissiaataasa attartortittakkat ataasiakkaarlugit tiguneqarsinnaalernerannut periarfissamik ammaassisoqassaaq, taannalu ataasiakkaarlugit tulleriiaaraluni tigooqqaanermik taagorneqarpoq. Inissiaateqarfimmi pingasunik amerlanerusunilluunniit attartortittakkanik inissiartaqartuni inissianik attartortut nammineq pigisanik pisinermi qanoq annertutigisumik akit nikingassutaannut qularnaveeqqusiisoqartassanersoq siumoortumik nalileruminaappoq. Siunnersuummi niuernermi naligititaasoq tunisinermi akitut atorneqarnissaa toqqarneqarpoq, taamaalillunilu siunissami akit nikingassutaannut qularnaveeqqusiissut taamaallaat pisisup ukiut qassit attartortuusimanera malillugu tunisinermut akimut appaaffigineqarnerani nalunaarsorneqartalissaaq. Akit nikingassutaannut qularnaveeqqusiissummik naatsorsueriiaatsip nutaap pisortat allaffissornerulernerannik kinguneqarnissaa naatsorsuutigineqanngilaq.

4. Inuussutissarsiornermi aningaasaqarnikkut allaffissornikkullu sunniutissat

Siunnersuutip inuussutissarsiornermut sunniuteqarnissaa naatsorsuutigineqanngilaq.

5. Avatangiisinut pinngortitamullu sunniutissat

Siunnersuutip avatangiisinut pinngortitamullu sunniuteqarnissaa naatsorsuutigineqanngilaq.

6. Innuttaasunut allaffissornikkut sunniutissat

Siunnersuutip innuttaasunut allaffissornikkut nammagassanik nassataqarnissaa naatsorsuutigineqanngilaq.

7. Sunniutaasinnaasut annertuut allat

Siunnersuutip allanik sunniuteqarnissaa naatsorsuutigineqanngilaq.

8. Pissutsit naalagaaffeqatigiinnermut namminersulernissamullu tunngasut

Siunnersuutip naalagaaffeqatigiinnermut namminersulernissamullu sunniuteqarnissaa naatsorsuutigineqanngilaq.

9. Oqartussaasunut kattuffinnullu tusarniaaneq il.il.

Peqqussutissatut siunnersuummut missiliuut 7. juni 2006-imiit 7. juli 2006-imut tusarniaassutigineqarpoq. Tamatuma kingorna tunisinermi akiusup aalajangersarneqartarneranut tunngatillugu annertuumik siunnersuut allanngortinneqarpoq, taamaattumik siunnersuut 29. september 2006-imiit 10. oktober 2006-imut tusarniaassutigeqqinneqarluni. Siunnersuut Aningaasaqarnermut Pisortaqarfimmut, Sulisoqarnermut Pisortaqarfimmut, Inuussutissarsiornermut Pisortaqarfimmut, KANUKOKA-mut, Kalaallit Nunaanni Sulisitsisut Peqatigiiffiannut, Grønlandsbanken-imut, Sparbank Vest Grønland-imut, SIK-mut aamma A/S Inissiaatileqatigiiffik INI-mut tusarniaassutigineqarluni nassiunneqarpoq. Tusarniaanerit marluusut taakku makkuninnga pissutissaqalersitsipput:

Sparbank Vest tusarniaanermi akissuteqanngilaq.

Inuussutissarsiornermut Pisortaqarfik, Sulisoqarnermut Pisortaqarfik aamma GrønlandsBanken siunnersuummut oqaaseqaatissaqarsimanngillat, taamaallaalli suliniutit namminersorluni inissianik niueruteqarnermut iluaqutaasussatut isigineqarsinnaasutut nersualaarlugit.

Ataatsimut isigalugu taaneqassaaq, tusarniaaffigineqartut arlallit siunnersuummi aalajangersakkat marlussuit tusarniaanermi akissuteqarnissamut piffissarititaasup nallernerani inissianik attartortitsisarneq pillugu inatsimmut naapertuutinnginnerat erseqqissaatigimmassuk. Tamatumunnga tunngatillugu oqaatigineqassaaq, siunnersuutip taassuma akuersissutigineqarnerani attartortitsisarneq pillugu inatsit allannguuteqareersimammat, taamaalillunilu maleruagassat marluusut taakku akunnerminni naapertuutilersimallutik.

Aningaasaqarnermut Pisortaqarfik tusarniaassummut akissuteqaammini akit nikingassutaannut qularnaveeqqusiisarnermi piffissap atuuffissaasup allannguuteqarnerata, kiisalu pisortanit taarsigassarsiat akilersorneqannginnissaannut piffissarititaasup allannguuteqarnerata sunniutissaanik naatsorsuisarnermut assersuusiortoqarnissaanik ujartuivoq. Tamanna tunngavigalugu siunnersuummi aalajangersakkanut attuumassutilinnut oqaaseqaatinik ilanngussisoqarpoq.

Aammattaaq Aningaasaqarnermut Pisortaqarfimmit pisinermut akiusup niuernermi akiusumit aalajangerneqartarnissaa, kisiannili aamma attartortup ukiut attartorfigisai tunngavigalugit akiusumut procentinngorlugit akikillisaasiisoqartarnissaa oqaaseqarfigineqarpoq. Piffissaq attartorfiusoq sivitsoriartortillugu pisinermut akiusumut akikillisaatissaq annertusiartortussaavoq. Aningaasaqarnermut Pisortaqarfimmiit uparuarneqarpoq inatsit niuernermut akiusunut naatsorsuutigineqartunut sunniutissanik pitsaanngitsunik imaqarmat, tamatumalu kingunerisinnaasaatut attartortut inissiamik attartuinnarnissamut kaammattorneqartussaapput, sapinngisamik akiusumut annertunerpaamik akikillisaasiiffigineqarnissaq iluaqutissatut isumaqarfigissagamikku, tassalu ukiut 21-it tikillugit inissiamik attartuinnarsinnaassallutik.

Oqaaseqaatigineqartut allannguinissamut tunngaviliinngillat, sunniutissaq eqqortumik nassuiarneqartoq naalakkersuisuni suleqatigiinnissamik isumaqatigiissutaasoq eqqarsaatigalugu ilanngunneqarsimammat, tassanilu allassimavoq attartortut, ukiorpassuarni Namminersornerullutik Oqartussat kommunilluunniit inissiaataanni attartortittakkani attartortuusimasut eqqarsaatigineqassasut. Siunnersuummi § 11, imm. 2-mut oqaaseqaatini assersuusiarineqartut malillugit innuttaasunit amerlasuut annertuunik iluaqutissarsitinneqarnissaat pineqarpoq. Aningaasaqarnermut Pisortaqarfiup tusarniaanermut akissuteqaammini oqaatigisaatut sunniutissanut niuernermi akiusunut naatsorsuutigisat apeqqutaasussaapput. Tamatuma ineriartornissaa siunissami ungasinnerusumiippoq, taamaattumillu attartortut aalajangersimasut salliutinneqarnissaat eqqarsaatigalugu sunniutissap pitsaanngitsumik isumaqarnissaa naatsorsuutigineqartariaqarani.

Aningaasaqarnermut Pisortaqarfik tusarniaanermi akissuteqaammini inissianik attartortittakkanik tunisinermi akigititassatut siunnersuutigineqartut inissianik niueruteqarnermut qanoq sunniuteqartussatut naatsorsuutigineqarsinnaanersut pillugit naliliinissamik ujartuivoq, tassunga ilaallutik attartortut piginneqatigiilluni inissianut, inissianut nammineq pigisanut aamma illunut nammineq pigisanut aningaasalersueqataanissaannut naatsorsuutigisat.

Tamatumunnga tunngatillugu oqaatigineqassaaq, tunisinermut akiusumik aalajangersaasarnermi periaatsip inissianik niueruteqarnermi akinut aalajangersaasarnernut allanut sunniuteqarnissaa naatsorsuutigineqanngimmat, tunisinermi akiusoq niuernermi akiusunik naliliisarneq naapertorlugu aalajangersarneqartartussaammat.

Piginneqatigiilluni inissianut, siunnersuutip matuma avataaniittunut tunngatillugu, piginneqatigiilluni inissiaateqariaatsip inissianik nammineq pigisanik pissarsisarnermi tapertatut qinigassatulluunniit allatut atorneqaannarnissaa naatsorsuutigineqarpoq. Ineqariaatsit aningaasalersueriaatsillu assigiinngitsut marluk matumani pineqarput, taamaattumillu siunnersuutip piginneqatigiilluni inissianik niueruteqarnerup ineriartorneranut sunniuteqarnissaa naatsorsuutigineqanngilaq.

Akit nikingassutaannut qularnaveeqqusiisarnermut tunngatillugu Aningaasaqarnermut Pisortaqarfiup qupp. 2-mi oqaaseqaatit tamakkiisut uparuarpai, tassanilu allassimavoq piffissaq qilersorsimaffiusoq sivisuallaarpat, tamanna suliffeqarnerup assigisaasalu piareersarneqartarnerannut sunniuteqarnerlussinnaasoq.

Siunnersuutip oqaasertaliorneqarnera allanngortinneqanngilaq, Naalakkersuisut misilittagaat malillugit piffissap qilersorsimaffiusup sivisunera suliffeqarnerup piareersarneqartarneranut sunniuteqarluarsinnaammat.

Aningaasaqarnermut Pisortaqarfik tusarniaanermi akissuteqaammini inissianik illunilluunniit tigusinermi ilaqutariit qaammammut ineqarnermut aningaasartuutissaannut sunniutissat naatsorsorneqartarnerannut assersuutinik ujartuivoq.

Naalakkersuisut isumaat malillugu tamatumunnga assersuutissanik aalajangersimasunik takussutissiortoqassappat tamanna paatsiveerutsitsinermik eqqunngitsumillu paasissutissiinermik pilersitsiinnassaaq, tunisinermut akiusumut, taamaalillunilu taarsigassarsianut akilersuutissanut pissutsit nalorninartut arlaliusussaammata, taakkunanngalu nunami sumiiffinni assigiinngitsuni niuernermik naliliinerit assigiinngitsut kiisalu erniat ineriartornerat tamakkiisoq oqaatigineqarsinnaapput.

KANUKOKA-p tusarniaanermut akissuteqaammini oqaatigaa siunnersuut tunngaviusumik inatsimmi § 82-imut akerliusoq, siunnersuut aalajangersakkanik kommunit namminneerlutik aqutsinerannut unioqqutitsisunik imaqarmat. Tusarniaanermut akissuteqaammi siunnersuummi § 5 innersuunneqarpoq, taannalu malillugu kommunalbestyrelsi pisussaavoq qinnuteqaammik tigusitillutik inissiaatiminnik tunisinissamut suliniutissanik aallartitsissallutik. KANUKOKA-miit oqaatigineqarpoq kommunit namminneerlutik aqutsinerat taamaallaat Inatsisartut inatsisaat aqqutigalugu kalluarneqarsinnaasoq, tassanilu Inatsisartut peqqussutaat atorneqarsinnaanngitsoq.

Tamatumunnga tunngatillugu oqaatigineqassaaq, Inatsisartut inatsisaasa aamma Inatsisartut peqqussutaasa akornanni assigiinngisitsisoqanngimmat. Taaguutit taakku immikkoortinneqartarnerannut suliassaqarfiup naalagaaffimmit tapiiffigineqarluni imaluunniit tapiiffigineqarani Kalaallit Nunaannut nuunneqarsimanera tunngavigineqartarpoq. Tamanna Namminersornerullutik Oqartussat pillugit inatsimmut nr. 577-imut, 29. novembari 1978-imeersumut oqaaseqaatini aamma allassimavoq. Kiisalu oqaaseqaatini allassimasut malillugit inissianik pilersuineq, inissialiortiternermut tapersiissuteqartarneq, inissianik attartortitsisarneq il.il. pillugit inatsit nr. 944, 23. december 1986-imeersoq naapertorlugu Namminersornerullutik Oqartussat ineqarneq naalagaaffimmit tapiiffigineqarluni tigusimagaa. Tamatuma kingorna maleruagassiarineqartut Inatsisartut peqqussutaattut taaguuserneqarput, taakkulu tunngaviusumik inatsimmi § 82 naapertorlugu "inatsisip" nalingai.

Siuliani ataqatigiisitsinerit nassatarisaannik siunnersuummi oqaasertaliunneqartut allanngortinneqanngillat.

SIK-miit oqaatigineqarpoq, inissianik attartukkanik inissiatut illutulluunniit nammineq pigisatut tigusinissamik qinnuteqaatit suliarineqartarneri sivisunerpaaffilerlugit aalajangersakkamik ilanngussisoqartariaqaraluartoq. SIK-miit qaammatit pingasut siunnersuutigineqarput.

SIK-p siunnersuutaa tunngavilersorluagaavoq, siunnersuutillu suliarineqarneranut atatillugu aammattaaq taamatut piffissamik aalajangersaasoqassanersoq sukumiisumik isumaliutigineqarsimalluni. Kisiannili taamatut piffissaliinissaq allaffissornikkut ajornartorsiortitsilersinnaasutut naliliiffigineqarpoq, sullissinermi ilaatigut pissutsit avataaneersut apeqqutaasartussaammata. Assersuutigalugu piginnittut peqatigiiffianni malittarisassiornermut atatillugu eqqartuussissuserisumik suleqataasoqartillugu. Pissutsit taamaattut peqqutaallutik allaffissornermi piffissap sullissiviusup sivisunerpaaffissaa malinneqarsinnaassanngilaq.

SIK-miit aamma oqaatigineqarpoq, siunnersuummi namminerisamik piginnittut peqatigiiffii ineqarnikkut nammaqatigiinnissamut akisussaaffeqartitaanngitsut, inissiaateqarfimmi inissiat Namminersornerullutik Oqartussat kommunalbestyrelsilluunniit pigisaat attartorneqanngitsut annerpaamik neqerooruteqartumut tunineqartussaammata. Tamatumunnga tunngatillugu oqaatigineqassaaq, siunnersuummi inuit amerlanerusut inissianik nammineq pigisassaminnik imminnut pilersorsinnaanissaat aammalu inissiani namminneq pigisaminni ileqqaagaqarsinnaanissaat eqqarsaatigineqartuni pingaarnerpaammat. Taamaattumik ineqarnikkut nammaqatigiinnissaq tamatumunnga naleqqiullugu tunulliunneqarpoq, tassungalu tunngatillugu aamma oqaatigineqassaaq, maanna attartortuusut inissiaateqarfimmi attartortuuinnarnissartik kissaatigigunikku attartuinnarsinnaammata.

Tamatuma saniatigut SIK-miit siunnersuummi § 4, imm. 2 naapertorlugu aningaaseriviup qularnaveeqqusiissutaata akilerneqartarnissaanut assersuutissanik aalajangersimasunik kissaateqartoqarpoq. Oqaaseqaatini oqaatigineqartutut tamatumani pisut ataasiakkaat naliliiffigineqartarnissaat pineqarpoq. Aalajangersakkami siunertaasoq pingaarneq tassaammat saaffiginnissutit pimoorussaanngitsut immikkoortinneqartarnissaat, tassanissaaq aalajangersakkamut oqaaseqaatit takukkit, pissutsit qanoq ittut ilanngunneqartussatut pineqarnersut tamakkiisumik taakkartorneqarsinnaanngillat. Taamaattumik siunnersuutip oqaasertaliornera allanngortinneqanngilaq.

Kiisalu aamma SIK-miit oqaatigineqarpoq, qinnuteqartoq pisuni tamaginni aningaasartuutissanut, Naalakkersuisunit imaluunniit kommunalbestyrelsimit aningaaserivimmik qularnaveeqqusiititsinikkut matussuserneqartussanut uppernarsaatinik piumasaqarsinnaasariaqartut. Siunnersuummi § 4, imm. 2-mut oqaaseqaatini allassimavoq, pisut ilaanni akit, avataaniit siunnersortit sullissinernut assingusunut akigitissinnaasaat tapertarissallugit pisariaqarsinnaasoq. Tamatumunnga tunngatillugu oqaatigineqassaaq, Naalakkersuisut imaluunniit kommunalbestyrelsi pisut amerlanersaanni isumalluutissat killeqarnerat peqqutigalugu tamatigut soorlu malittarisassiornerit avataaniit siunnersortinut isumagitittariaqartassagaat.

SIK-miit oqaatigineqarpoq akit nikingassutaannut qularnaveeqqusiissutip nalikillisikkiartuaartinneqarneranut siunnersuummi § 13, imm. 3 naapertorlugu piffissaliussaq siunnersuummi taaneqartutut ukiunut tallimanut aalajangernagu ukiunut pingasunut apparteqqinneqartariaqartoq. Tamatumunnga tunngatillugu oqaatigineqassaaq peqqussummi pineqartumi ukiuni qulini nalikillisitsiartuaarnissamut piffissaliussaq siunnersuummi matumani ukiunut tallimanut appartinneqarmat. Tamatumunnga suliffeqarnermi nuttarnerup annertusitinniarneqarnera peqqutaavoq, taamaalilluni suliffiit inissiallu maannakkutut annertutigisumik imminnut attuumatinneqarunnaassallutik.

Kisiannili piffissaq nalikillisitsiartuaarfiusoq ukiunut pingasunut appartinneqassappat, aamma iluanaarniapilunnissaq atuutilersussatut naliliiffigineqartoq eqqarsaatigineqarpoq. Taamaattumik siunnersuutip oqaasertaliornera allanngortinneqanngilaq.

A/S Inissiaatileqatigiiffik INI-mit oqaatigineqarpoq, siunnersuut tigusinermut atatillugu suliatigut kingunerisassat iliuusissallu pillugit aalajangersakkanik imaqartariaqartoq. Taanna tunngavilersugaalluartoq malunnarpoq, tamannalu tunngavigalugu siunnersuummut § 5, imm. 2 ilanngunneqarpoq, taannalu malillugu Naalakkersuisut inissianik attartortittakkanik agguataarisarnermut sukumiinerusunik maleruagassiorsinnaapput, tassunga ilaatigut nalunaarsuinissamut tunngassuteqartut ilaatinneqarlutik.

Kalaallit Nunaanni Sulisitsisut Peqatigiiffiannit oqaatigineqarpoq, siunnersuummi § 9, nr. 2 assigiisitsinissaq eqqarsaatigalugu eqqarsarnartoqartoq. Oqaaseqaateqarneq tunngavigalugu aalajangersagaq siunnersuummit peerneqarpoq, taamaalillunilu inissiaateqarfimmi inissianit attartortittakkanit Namminersornerullutik Oqartussanit imaluunniit kommunimit pigineqartunit nuuttoqarnera peqqutigalugu attartukkat inueruttut niuernermi piumasaqaatit tunngavigalugit annerusumik akiliiniarlutik neqerooruteqartunut tunineqarsinnaasassapput, attartortunut inissiamik attartortittakkamik inissiatut nammineq pigisatut tigusinissamik kissaateqarnerminnik nalunaaruteqartunut tunineqaratik. Aaqqiissutissaq taanna aamma aaqqissuussinerup aqunneqarneranut oqilisaataassaaq.

Kalaallit Nunaanni Sulisitsisut Peqatigiiffiannit siunnersuummi § 11, imm. 2-p oqaasertaliornera isornartorsiorneqarpoq, taassumami atuutilerneratigut innuttaasut ataasiakkaat inissianik najukkaminnik inissiatut imaluunniit illutut nammineq pigisatut tigusinerminni aningaasaqarnikkut iluanaaruteqangaatsiarsinnaalissapput. Kalaallit Nunaanni Sulisitsisut Peqatigiiffiannit oqaatigineqartut malillugit aalajangersagaq assigiisitsinissamut tunngavissanut nalinginnaasunut, kiisalu Naalakkersuisut innuttaasut annertunerusumik ileqqaagaqartinneqartarnissaannik politikkikkut anguniagaattut nalunaarutigineqartunut akerliuvoq.

Siunnersuummi § 11, imm. 2-mi aalajangersakkap oqaasertaliorneqarnera allanngortinneqanngilaq, siunertarineqartut ilaannik, aammattaaq naalakkersuinikkut suleqatigiinnissamut isumaqatigiissummi allassimasunik ersersitsimmat. Naalakkersuisuniit Kalaallit Nunaanni Sulisitsisut Peqatigiiffiannit isummersuutit isumaqatigineqanngillat, siunnersuummi § 11, imm. 2-mut oqaaseqaatigisaminni assersuutigisaat aaqqissuussinerup innuttaasut ilarpassuinut iluaqutissartaqarnissaanik takutitsimmata.

Peqqussutissatut siunnersuut tusarniaanermi akissuteqaatit qulaani taaneqartut ilanngullugit Inatsisartut 2007-imi upernaakkut ataatsimiinneranni immikkoortoq 23-itut saqqummiunneqarpoq.

Inatsisartut 2007-mi upernaakkut ataatsimiinneranni tusagassiuutitigut aammalu politikkikkut attartortumiit piginnittumut aaqqissuussineq atuuttoq kiisalu peqqussutissatut siunnersuut saqqummiunneqartoq pillugit oqallittoqarpoq.

Oqallinnerup kingunerisaanik Naalakkersuisut 24. april 2007 ataatsimiinnerminni aalajangerput peqqussutissatut siunnersuut saqqummiunneqartoq tunuartinniarlugu tassungalu taarsiullugu nutaamik peqqussutissatut siunnersuusiorniarlutik.

Peqqussutissatut siunnersuut nutaaq 9. maj 2007-imiit 20. juni 2007-imut Aningaasaqarnermut Pisortaqarfimmut, Sulisoqarnermut Pisortaqarfimmut, Inuussutissarsiornermut Pisortaqarfimmut, KANUKOKA-mut, Kalaallit Nunaanni Sulisitsisut Peqatigiiffiannut, Ilik-mut, Nusuka-mut, Grønlandsbanken-imut, Sparbank-imut, SIK-mut aamma A/S Inissiaatileqatigiiffik INI-mut tusarniaassutigineqarpoq. Tusarniaanermi akissuteqaatit makkuninnga pissutissaqalersitsipput:

Aningaasaqarnermut Pisortaqarfik, Inuussutissarsiornermut Pisortaqarfik, Kalaallit Nunaanni Sulisitsisut peqatigiiffiat, Grønlandsbanken, Iserit A/S aamma SIK tusarniaanermut akissuteqarput.

Kalaallit Nunaanni Sulisitsisut Peqatigiiffiat aamma Grønlandsbanken siunnersuutip najoqqutassatigut imarisaanut oqaaseqaatissaqarsimanngillat.

Inuussutissarsiornermut Pisortaqarfimmit inissiat nammineq pigisat amerlinissaannik suliniuteqartoqarnera, kiisalu teknikkikkut aningaasaqarnikkullu naliliisarnerup peerneqarnera iluarisimaarneqarpoq.

Siunnersuutip najoqqutassatigut imarisaanut tunngatillugu tusarniaanermi akissutit tiguneqartut annertunersaat matuma kinguliani issuarneqarput oqaaseqarfigineqarlutillu. Siunnersuutip immikkoortuisa tulleriinneri malillugit tusarniaanermi akissutinut oqaaseqaateqarnissani Ineqarnermut Attaveqarnermullu Pisortaqarfiup naleqqunnerpaatissimavaa.

Siunnersuummi § 1-imut

Illuummik piginnittup illuummi attartortittakkanik inissiartaqartumi najugaqartut ikinnerpaaffissaattut aalajangigaasut, inissianik attartukkaminnik inissiatut nammineq pigisatut tigusinissamik kissaateqarsimanngippata, illuummik piginnittup inissiat attartortittakkat inissiatut nammineq pigisatut tiguneqarsinnaannginnissaanik aalajangiinissamut periarfissaqartinneqarnissaa Iserit A/S-ip tusarniaanermut akissuteqaammini ujartorpaa.

Peqqussutissatut siunnersuummi inuit amerlanerusut inissianik imminnut pilersorsinnaalernissaat siunertarineqarpoq, taamaattumillu illuummik piginnittup attartortup inissiamik attartortittakkamik najukkaminik tigusinissamik qinnuteqaataanut, attartortut amerlanerusut taamatut kissaateqannginnerat tunngavigiinnarlugu itigartitsisarnissaa kissaatiginanngilaq. Siunnersuummi § 1, imm. 2-mut oqaaseqaatit erseqqissarneqarput.

Siunnersuummi § 3-mut

SIK isumaqarpoq, peqqussutissatut siunnersuut aamma pisortanut, Namminersornerullutik Oqartussani kommuniniluunniit atorfeqartinneqarnerminnut atatillugu ineqartinneqartunut tamanut atuutsinneqartariaqartoq. Taakku attartortitsinermut piumasaqaatit nalinginnaasut tunngavigalugit sulisunut inissiamut innersuunneqartarnerat, taamaattumillu attartortutut allatut pisinnaatitaaffeqartinneqartariaqarnerat SIK-p tamatumunnga tunngavilersuutigaa. SIK-p tamatumunnga atatillugu pisortat taakku, inissianik attartortitsisarneq pillugu Inatsisartut peqqussutaanni § 21-mi maleruagassat malillugit sulisunut inissianik najukkaminnik inissiatut nalinginnaasutut tigusinissamut pisinnaatitaaffeqarnerat innersuussutigaa.

Tamatumunnga tunngatillugu erseqqissaatigineqassaaq, allaffinni pisortat akissaateqarfik 36 qaffasinnerusorluunniit malillugu akissaasersorneqarlutik Namminersornerullutik Oqartussani atorfinitsinneqartut, Namminersornerullutik Oqartussani atorfeqartinneqartut, inissiamut innersuunneqarnissamut pisinnaatitaaffeqartut allat assigalugit inissiamut innersuunneqarnissamut pisinnaatitaaffeqarmata, taamaattumillu siunnersuummi aalajangersakkat aamma allaffinni pisortanut inissaritinneqartunut atorneqartarlutik. Immikkoortortani pisortat, akissaateqarfik 37 qaffasinnerusorluunniit malillugu akissaasersorneqartut, Namminersornerullutik Oqartussani atorfeqartinneqartut, pisortanut inissianut innersuunneqarsinnaapput, imaluunniit sulisut allat assigalugit sulisunut inissianut innersuunneqarsinnaallutik, tamatumanili sulisunut allanut sanilliullutik inissiamik ataatsimik initaqarnerusumik tunineqarnissaq pisinnaatitaaffigiinnarpaat. Immikkoortortami pisortat pisortanut inissiamut innersuunneqarsimappata, inissianik attartortitsisarneq pillugu peqqussummi § 21-mi maleruagassat naapertorlugit pisortanut inissiamik inissiatut attartortittakkatut nalinginnaasutut tigusisinnaanngillat, taamatuttaarlu siunnersuut manna tamatumunnga atorneqarsinnaanngilaq. Kisiannili immikkoortortami pisortat sulisunut allanut inissiamut, inissialli initaat ataatsimik amerlaneruinnartumut innersuunneqarsimappata, siunnersuummi aalajangersakkat aamma immikkoortortami pisortanut inissianut taakkununnga atuutissapput. Aammattaaq inissiat siunertanut aalajangersimasunut immikkoortitaasut inissianik attartortitsisarneq pillugu Inatsisartut peqqussutaanni § 21-mi maleruagassat malillugit inissiatut attartortittakkatut nalinginnaasutut tiguneqarsinnaanngillat, taamatuttaarlu siunnersuut manna inissianut taakkununnga atorneqarsinnaanani.

Tamanna tunngavigalugu naapertuutinngitsumik assigiinngisitsisoqanngitsoq takuneqarsinnaavoq.

Siunnersuummi § 4-mut

Iserit A/S-imit qinnuteqartup tunisinissamut akiusumut pisortanit taarsigassarsititsivigineqanngitsumut akiliisinnaassuseqarneranut aningaaseriviup neriorsuutaanik qinnuteqartup saqqummiussisarnissaa eqqumiiginartinneqarpoq, piffissami qinnuteqarfiusumi tassani qinnuteqartup, tunisisussap aningaaseriviulluunniit tunisinissamut akiusoq ilisimanavianngimmassuk.

Iserit A/S-ip aalajangersimasumik aningaasartalimmik qularnaveeqqusiisoqartarnissaanik piumasaqaammik aalajangersimasumik atuutsitsisoqalernissaa orniginartippaa.

Tamatumunnga tunngatillugu oqaatigineqassaaq aningaaseriviup neriorsuuteqarneratigut, qinnuteqartup aningaaserivik atukkani peqatigalugu qinnuteqartup inissiamik attartukkaminik illutut inissiatulluunniit nammineq pigisatut tigusinissamut akissaqarnerata ilisimaneqareertarnissaa siunertarineqarmat. Taamaattumik aalajangersimasumik aningaasartalimmik qularnaveeqqusiisarnissaq pisariaqanngitsutut naliliiffigineqarpoq, tassani qinnuteqartup inissiamik attartukkaminik illutut inissiatulluunniit nammineq pigisatut tigusinissamut aningaasaqarnikkut periarfissaqarnerata tamakkiisumik naliliiffigineqarnissaa kisimi kissaatigineqarmat.

Iserit A/S-imiit qinnuteqartup inissiamik attartukkaminik inissiatut illutulluunniit nammineq pigisatut tigusiniartilluni attartornermut isumaqatigiissummik malinnissimanissaanut piumasaqaateqartoqarnissaa ujartorneqarpoq.

Tamatumunnga tunngatillugu oqaatigineqassaaq, inissianik attartortitsinermut Inatsisartut peqqussutaanni attartortitsisup attartortumut, attartornermut isumaqatigiissummik malinnissimanngitsumut pineqaatissiisarnissaa maleruagassiorneqareermat.

SIK-miit oqaatigineqarpoq, piffissaq sullissiviusoq, soorlu qaammatinut pingasunut killilerlugu maleruagassamik ilanngussisoqartariaqartoq.

Tamatumunnga tunngatillugu oqaatigineqassaaq, piffissaq killilerneqassappat tamanna allaffissornikkut ajornartorsiulernermik kinguneqarsinnaammat, piffissap sullissiviusup sivisussusissaanut ilaatigut avataani sullissisut, assersuutigalugu piginnittut peqatigiiffianni malittarisassiornermut atatillugu eqqartuussissuserisut suliakkerneqartut apeqqutaasussaammata. Taamaattumik aalajangersakkami piffissap sullissiviusup sivisussusissaanik ilaatitsisoqanngilaq.

SIK aningaaserivimmit qularnaveeqqusiisoqarneranut tunngatillugu aningaaserivik aningaaserivimmit qularnaveeqqusiinermut atatillugu aningaasartuutinut, Naalakkersuisunit kommunalbestyrelsimilluunniit matussuserneqartussanut uppernarsaatinik piumasaqarsinnaanersoq pillugu sukumiinerusunik paasissutissinneqarnissaminik kissaateqarpoq.

Tamatumunnga tunngatillugu oqaatigineqassaaq, tamatumani qinnuteqartup aningaasalersuutissanut pisortanit taarsigassarsiaanngitsunut aningaasalersuisinnaaneranut aningaaseriviup nalunaarutaa pisussaaffiliinngitsoq pineqarmat. Tassani aningaaserivimmit qularnaveeqqusiinermut aningaasartuutit, Naalakkersuisunit kommunalbestyrelsimillu matuneqartussat suut pineqarnersut erseqqinngilaq, taamaattumillu apeqqutip tamatumunnga tunngasortaa oqaaseqaatit uku aqqutigalugit akineqanngilaq.

Siunnersuummi § 5-imut

Aningaasaqarnermut Pisortaqarfik Namminersornerullutik Oqartussat kommuniluunniit inissiarsuarmi annertunerusumik iluarsaassiniartillugit attartortut qanoq inissisimasarnissaannut maleruagassanik ujartuivoq.

Peqqussutissatut siunnersuutip atuutilerneratigut Naalakkersuisut kommunalbestyrelsilluunniit illuutip attartortittakkanik inissiartaqartup inissianut nammineq pigisanut immikkoortiterneqarnissaanut piareersaatit isumagisassavaat, kiisalu piginnittut peqatigiiffiinik pilersitsiniarnermut aamma piginnittut peqatigiiffiini malittarisassiornermut ikiuuttassallutik. Piginnittut peqatigiiffiisa malittarisassaanni aserfallatsaaliuinissamut illuartitsisarnernut tunngassuteqartut malittarisassiuunneqartassapput, taamaattumillu tamanna aamma siunnersuummi § 5-imi malittarisassiuunneqarnissaa Naalakkersuisoqarfimmiit naleqqussorineqanngilaq.

Siunnersuummi § 6-imut

Iserit A/S-imiit najoqqutassat qinnuteqartumut nassiunneqartut aamma illuummi attartortittakkanik inissiartalimmi attartortunut allanut nassiunneqartarnissaat naleqqunnerpaatut isumaqarfigineqarpoq, taamaaliornikkut najoqqutassat tunngaviusut assigiittassammata. Taamaalilluni attartortut tamarmik ataatsikkut inissiamik attartukkaminnik inissiatut nammineq pigisatut tigusinissamik neqeroorfigineqartassapput.

Tunisinissamut najoqqutassani, qinnuteqartumut nassiunneqartussani tamakkiisuni qinnuteqartup inissiamik attartukkaminik inissiatut nammineq pigisatut tigusinissamut aalajangernissaanut naammaginartumik tunngavissinneqarnissaa siunertarineqarpoq. Tassanilu attartortitsisup tamanna kissaatigiguniuk, najoqqutassat inissiaqarfimmi attartortut sinnerinut nassiunneqassanersut nammineerluni aalajangigassaraa. Siunnersuummi imm. 3 attartortitsisup minnerpaamik attartortut sinnerinut inissiamik attartortittakkamik tigusisinnaanerannik nalunaaruteqartarnissaatut paasineqassaaq, taamaalilluni inissiaqarfimmi attartortut ilaata inissiamik attartukkaminik inissiatut nammineq tigusisussanngornera ilisimatitsissutigineqartassalluni. Tamanna tunngavigalugu imm. 3-mut oqaaseqaatit erseqqissarneqarput.

Siunnersuummi § 8-mut

Iserit A/S-imiit inissiaqarfimmi attartortup siulliup inissiamik attartukkaminik tigusinerata kingorna inissiaqarfimmi tunisinissamut piumasaqaatinik aalajangersaasoqarnissaa ujartorneqarpoq. Tamatumunnga ilanngullugu illuummik naliliineq qanoq ittoq tunngavigineqassanersoq pillugu, kiisalu attartortup piffissap attartorfigisaata naatsorsorneranut malittarisassanik ersarissunik suliaqartoqarnissaa Iserit A/S-imit kissaatigineqarpoq. Tamatuma peqatigisaanik attartortup neqeroorutaaqqaartoq allanngortinnagu akuersinissaanut sivisunerpaamik ukiumut ataatsimut killiliisoqarnissaa Iserit A/S-ip ujartorpaa.

Siunnersuummi § 11, imm. 1-imi tunisinissamut akiusup aalajangerneqarnerani niuernikkut naligititaasup atorneqartarnissaa allassimareerpoq. Tassanilu piffissami tunisiffiusumi niuernikkut naligititaasoq pineqarpoq, tamannalu aalajangersakkamut oqaaseqaatini erseqqissarneqarpoq.

Iserit A/S-imiit oqaaseqaatit kingunerisaannik siunnersuummi § 11, imm. 2-mut oqaaseqaatit erseqqissarneqarput, taamaalillunilu maanna inissiami attartortittakkami attartortup piffissap attartorfigisaata piffissami attartornermut isumaqatigiissuteqarfiusumiit aallartilluni attartortup inissiamik najukkaminik inissiatut nammineq pigisatut tigusinerata tungaanut naatsorsorneqartarnissaa ersarissumik allassimalerpoq.

Kiisalu siunnersuummi § 11, imm. 3-mut oqaaseqaatit erseqqissarneqarput, taamaalillunilu tunisinerni tamani tunisinermut akiusumut 50.000 koruunit, tunisinermut atatillugu aningaasartuutinut matussutissatut ilaliunneqartarnissaat ersarissumik allassimalerpoq.

Siunnersuummi § 9-mut

SIK-miit aalajangersagaq naapertuutinngitsutut isumaqarfigineqarpoq, SIK-miit isumaqartoqarmat aalajangersagaq inuit, inissiamik namminneq pigisassaminnik pisinissamut akissaqanngitsut periarfissaannut akornutaasoq. Kiisalu SIK-miit inatsisitigut inissisimaneq, inuit kikkulluunniit ineqartinneqarnissamut pisinnaatitaaffeqarnerannut tunngasoq innersuussutigineqarpoq.

Tassani erseqqissarneqassaaq aalajangersagaq taamaallaat inissianut attartortittakkanut inoqanngitsunut atuummat, tassalu attartortuusimasup inissiamik qimatsereerneranut atuulluni. Inissiamik attartortittakkamik inoqanngitsumik tunisinissaq aatsaat pissaaq, Naalakkersuisut kommunalbestyrelsilluunniit inissiap attartortittakkap inissiatut attartortittakkatut atorneqaannarnissaa kissaatiginngipassuk. Naalakkersuisunit inatsisitigut inissisimaneq, kikkulluunniit ineqartinneqarnissamut pisinnaatitaaffeqarnerannut tunngasoq ilisimanngilaat.

Siunnersuummi § 11-mut

Iserit A/S-imit illuni ilaqutariinnut ataatsinut inissiani illunilu affarleriinni attartortut inissiarsuarni attartortutut pisinermut akiusumut akikillisaanneqarnissamut periarfissaqartinneqannginnerat eqqumiiginartinneqarpoq. Iserit A/S isumaqarpoq, suliat eqqarsaatigalugit assigiinngisitsinissamut tunngavissaqanngitsoq. Iserit A/S-ip erseqqissaatigaa aaqqissuussinerup illoqarfinni minnerni nunaqarfinnilu attartortut, aaqqissuussinernik aningaasaqarnikkut iluanaarnarnerpaanik pisariaqartitsinerpaasut eqqortussaassagai. Tamatumunnga peqatigitillugu aaqqissuussineq aqqutigalugu illuutinik piginnittut, illoqarfinni minnerni nunaqarfinnilu illunik ilaqutariinnut ataatsinut inissianik illunillu affarleriinnik pigisaqartut pillarneqartussaapput, taakkunani illut aserfallatsaaliussallugit akisunerusarmata ajornarnerusarlutillu.

Tamatumunnga atatillugu oqaatigineqassaaq, illut ilaqutariinnut ataatsinut inissiat illullu affarleriit ilaqutariinnut arlalinnut inissiarsuarni atuutinngitsutut oqaatigineqarsinnaasumik alianaassutsikkut naleqarmata, taamaattumillu illunik ilaqutariinnut ataatsinut inissianik illunillu affarleriinnik tunisinermut atatillugu akikillisaasiisoqarniarani.

Iserit A/S-imit siunnersuutigineqarpoq, tunisinermut atatillugu aningaasartuutinut akiliutissaq aalajangersimasoq 50.000 koruuniusoq akit ineriartornerat malillugu iluarsineqartassasoq.

Tamatumunnga tunngatillugu oqaatigineqassaaq, akiliutissap aalajangersimasup 50.000 koruuniusup aqukkuminarnera peqqutigalugu allanngortinneqannginnissaa kissaatigineqarmat.

Aningaasaqarnermut Pisortaqarfik isumaqarpoq, pisinermut akiusumut appaatissaq, attartortup attartortuunerata sivisussusaa apeqqutaatillugu procentilerneqartoq pitsaanngitsumik pilerisaarutaasoq, tamatumalu kingunerisaanik attartortup akiusumut appaatissaq annerpaaq anguniarlugu inissiamik attartortuuginnarsinnaasoq. Taamaattumik Aningaasaqarnermut Pisortaqarfik tunisinermut akiusumut akikillisaanissami attartortup inissiamik attartortuunerata sivisussusaata apeqqutaatinneqarnissaanut tunngavissamik ujartuivoq.

Oqaaseqaatit allanguinissamut tunngavissiisimanngillat, iluanaarniarnissamut tunngasut eqqortumik nassuiarneqartut naalakkersuisooqatigiinnissamut isumaqatigiissut eqqarsaatigalugu ilanngunneqarsimammata, tassanilu allassimavoq attartortut Namminersornerullutik Oqartussat kommunilluunniit inissiaataanni attartortittakkani ukiorpassuarni najugaqarsimasut eqqarsaatigineqassasut. Attartortut taakku inissianik attartukkaminnik inissiatut nammineq pigisatut tigusinerminni iluaqutissanik angusaqarsinnaassapput. Siunnersuummi § 11, imm. 2-mut oqaaseqaatini assersuutigineqartut malillugit innuttaasuni amerlasuut kajumissaarneqartussaapput. Kajumissaarutip pitsaasuunnginneranik oqarneq eqqortuunngilaq, tassami niuernikkut akigititaasussatut naatsorsuutigineqartut iluaqutaasussanut apeqqutaasussaapput. Ineriartornissamut siunissaq apeqqutaasussaammat, tamatumani eqqoriaasoqarsinnaanngilaq.

Siunnersuummi § 13-mut

Iserit A/S-imiit siunnersuutigineqarpoq akit nikingassutaannut qularnaveeqqusiissutikkut iluarsaassinermut taarsigassarsinissaq ammaanneqartassasoq.

Tamatumunnga atatillugu erseqqissarneqassaaq, aalajangersakkap maannatut iluseqarluni atuutiinnarnissaa kissaatigineqarmat, akit nikingassutaannut qularnaveeqqusiissut, attartortup inissiamik attartukkamik inissiatut illutulluunniit nammineq pigisatut tigusineranut atatillugu Namminersornerullutik Oqartussanut kommunimulluunniit taarsigassarsiat akilereernerini akilerneqartussatut inissisimanissaa taamaallaat siunertaqarfigineqarmat.

Siunnersuummi § 15-mut

Iserit A/S-imit siunnersuutigineqarpoq Namminersornerullutik Oqartussanit kommunimilluunniit taarsigassarsinermi iluarsaassinermut taarsigassarsinissaq ammaanneqartassasoq.

Tamatumunnga atatillugu erseqqissarneqassaaq, aalajangersakkap maannatut iluseqarluni atuutiinnarnissaa kissaatigineqarmat.

 

Peqqussutissatut siunnersuummi aalajangersakkanut ataasiakkaanut oqaaseqaatit


§ 1-imut

Imm. 1-imut.

Aalajangersakkami siunnersuutip atuuffissai nassuiarneqarput. Imm. 2-mi aamma § 3-mi pineqartussaanngitsutut taaneqartut eqqaassanngikkaanni, Namminersornerullutik Oqartussat kommunillu inissiaataanni attartortittakkani inuk attartortoq pineqartillugu peqqussut tamanut atuuttussaavoq. Taassuma atuutilerneratigut ilaatigut inatsisitigut pisinnaatitaasut pisussaatitaasullu attartortuusimasinnaasut aaqqissuussinermik atuisinnaajunnaassapput.

Aalajangersakkap atuarneqarnerani § 2 ilanngullugu atuarneqassaaq, tassanilu inissiaateqarfimmi attartortittakkami inissiat qaqugukkut inissiatut illutulluunniit nammineq pigisatut tiguneqarsinnaanersut nassuiarneqarpoq. Taamaalilluni peqqussummi aalajangersakkat ilaat inissianut nammineq pigisanut imaluunniit illunut nammineq pigisanut atorneqarsinnaassapput, aalajangersakkallu allat ineqariaatsinut taakkununnga marluusunut atorneqarsinnaassallutik.

Imm. 2-mut

Aalajangersakkami imm. 1 eqikkarneqarpoq, taannalu malillugu Naalakkersuisut kommunalbestyrelsillu iluaqutaasumik inissiaateqarfiit attartortittakkanik inissiartallit arlaat tunineqartussatut kissaatigineqarnersut aalajangersinnaavaat. Tassani tunngavissaq pingaarneq tassaassaaq inissiaateqarfiit attartortittakkanik inissiartallit tamarmik tunngavimmikkut tunineqartussatut kissaatigineqarnerat, tamannalu siunnersuummi anguniakkamut pingaarnermut naapertuuppoq, kisiannili assersuutigalugu inissiaateqarfiit attartortittakkanik inissiartallit, iluarsartuussinissamut isaterinissamulluunniit immikkut pilersaaruteqarfigineqartut pinngitsoorneqarsinnaallutik. Tassani inissiaateqarfinni attartortittaakkanik inissiartalinni inissianik imaluunniit illunik nammineq pigisassatut tigusinissap pineqarnera apeqqutaatinnagu aalajangersagaq atuutissaaq.

Aalajangersakkap atuutilerneratigut attartortup inissiaqarfimmi attartortuni kisiartaalluni inissiamik attartukkaminik inissiatut nammineq pigisatut tiguserusunnini peqqutigiinnarlugu inissiamik attartortittakkamik inissiatut nammineq pigisatut tigusisinnaaneranut periarfissaqarnera killilersorneqanngilaq.


§ 2-mut

Aalajangersakkami Namminersornerullutik Oqartussat kommunillu inissiaataasa attartortittakkat inissiatut nammineq pigisatut tiguneqarsinnaanerat aalajangersarneqarpoq, tassanilu pineqartut tassaapput inissiaateqarfiit attartortittakkanik ataatsimiit amerlanerusunik inissiartaqartut, imaluunniit inissiaateqarfiit attartortittakkamik ataatsimik inissiartaqartut. Taamatut killiliineq peqqussutip atuarneqarnissaanut pingaaruteqartorujussuuvoq, peqqussummi aalajangersakkat ilaat taamaallaat inissianut imaluunniit illunut nammineq pigisanut atorneqarsinnaammata, aalajangersakkallu ilaat ineqariaatsinut taakkununnga marluusunut tamaginnut atorneqarsinnaallutik.

Aalajangersakkami killiliussat atulernerisigut illut ilaqutariinut ataatsinut inissiat kisimik illutut nammineq pigisatut immikkoortinneqarput.

Ineqariaatsit allat tamarmik inissianut nammineq pigisanut inissinneqarput. Tassanilu pineqartut tassaapput illuni affarleriinni, illuni uiguleriinni aamma inissiarsuarni inissiat.


§ 3-mut

Imm. 1-imut

Aalajangersagaq inissiat peqqussummi ilaatinneqanngitsut taagorneqarnerinik imaqarpoq. Inissiat taamaattut immikkut ittumik inissinneqarnissaannik pingaarnertut siunertaqarneq eqqarsaatigalugu peqqussummi ilaatinneqartussaanngitsut ilanngullugit taaneqarput. Inissianik pineqartunik tigusisinnaanermut imaaliallaannaq pisinnaatitaaffiliisoqassappat, tamanna ataasiakkaanut naapertuutinngitsumik iluanaarnaateqarsinnaavoq, kiisalu pisuni allani inissiat aalajangersimasut imaaliallaannarlutik tunineqarsinnaassallutik.

Imm. 2-mut

Naalakkersuisut kommunalbestyrelsilu inissiat najugarineqartut ataasiakkaat, § 3, imm. 1, nr. 5-imi taaneqartut inissiatut illutulluunniit nammineq pigisatut tiguneqaannarsinnaanerat aalajangersinnaavaat.

Innarluutilinnut inissiat tunngaviatigut ilaatinneqannginnerinut peqqutaasoq tassaavoq, Namminersornerullutik Oqartussat kommunillu nalinginnaasumik inissiani taamaattuni atortunut assigiinngitsunut annertuunik aningaasaliissuteqartarmata, aammalu inissiat taamaattut siunissami siunertamut tamatumunnga atorneqaannarsinnaasariaqarmata.

Ingerlaavartumik tunineqartassappata tamanna anguneqarsinnaassanngilaq. Taamaattumillu inissianik nutaanik pisiortortoqartuassappat, inissiallu pisiarineqartut immikkut ittumik ilusilersorneqartassappata, tamanna allaffissornikkut aningaasaqarnikkullu annertuumik sunniuteqartussaavoq.

Taamaattumik assersuutigalugu inissiaq pineqartoq innarluutilinnut inissiatut immikkoortitaagaluarluni immikkut ilusilersugaanngippat naleqqussagaanngippalluunniit aalajangersakkap atorneqarnissaa naatsorsuutigineqarpoq. Tassalu inissiaq pingaartumik inissiamut attartortittakkamut nalinginnaasumut assingusuussaaq, taamaattumillu peqqussummi ilaatinneqartariaqarluni. Assersuutigalugu inissiaq attartortittagaq innarluutilinnut inissiatut immikkoortinneqarsimasinnaavoq, inissiami inini allerni inissisimasuunera pissutigiinnarlugu.


§ 4-mut

Imm. 1-imut

Aalajangersakkami tigusinissamut suliap qanoq iliorluni aallartinneqarnissaa nassuiarneqarpoq. Aalajangersakkami tamanna qinnuteqarnikkut pissasoq, kisiannili tamatuma tunngaviusumik immikkut piumasaqaatitaqannginnera nassuiarneqarpoq.

Tassanili pingaaruteqarpoq qinnuteqartup pisortanit taarsigassarsiarititassat saniatigut aningaasalersuutissanik pissarsinissamut periarfissaqarnera pillugu aningaaserivimmiit uppernarsaatip pisussaaffiliinngitsup qinnuteqaammut ilanngunneqarnissaa. Uppernarsaat ilanngunneqanngippat Naalakkersuisut kommunalbestyrelsiluunniit qinnuteqaammut itigartitsissapput, taamaalillunilu qinnuteqartup qinnuteqaanni uppernarsaammik pineqartumik ilaqartillugu nassiuteqqittariaqassavaa.

Uppernarsaammik ilanngussinissamik piumasaqaateqarneq tunngaveqarpoq tigusinissamik piviusunngortitsiniarluni suliaqalernermi allaffissornikkut suliarujussuit aallartinneqartarnerat. Misilittakkat takutippaat pisinissamut neqeroorut inaarutaasoq atsiugassanngorluni piareeraangat qinnuteqartut arlallit tigusinissamik naammassinnissinnaasanngitsut. Tamanna amerlanertigut qinnuteqartup siusissukkut aningaaserivimmik qinnuteqartup aningaasaqarneranik naliliisitsilluni suliamut ilanngussititsisimannginneranik peqquteqartarpoq. Uppernarsaat pisussaaffiliinngitsoq qinnuteqartup inissiamik najukkaminik inissiatut illutulluunniit nammineq pigisatut tigusinissamut periarfissaqarneranut Naalakkersuisunut kommunalbestyrelsimulluunniit aamma qinnuteqartumut pitsaanerusumik qulakkeerisuusussaavoq.

Siunnersuummi takuneqarsinnaasutut qinnuteqartup aningaaseriviata uppernarsaasiussaa pisussaaffiliinngilaq. Tassani tunisinissamut akiusoq suli aalajangerneqarsimasussaanngilaq, taamaattumillu uppernarsaat taamaallaat qinnuteqartup aningaasaqarneranut tamakkiisumut tunngasuuvoq, qinnuteqartup inissiamik pineqartumik aningaasalersuisinnaaneranut aningaasaqarnikkut periarfissaqarneranut tunngasuunani.


§ 5-imut

Imm. 1-imut

Aalajangersakkami Naalakkersuisut kommunalbestyrelsiluunniit inissiaateqarfimmi inissiat attartortittakkat inissiatut nammineq pigisatut tiguneqarnissaannut piareersarnissamut pisussaaffilerneqarput, tassunga ilaallutik inissianik agguataarinissaq, agguaqatigiisitsinermi kisitsisinik tunngaviusussanik aalajangersaanissaq aamma Kalaallit Nunaanni Eqqartuussivimmi nalunaarsuinissaq.

Inissiaateqarfinni ataaseq sinnerlugu inissiartaqartuni piginnittut peqatigiiffiinik tamatigut pilersitsisoqartussaassaaq kiisalu malittarisassiortoqartussaassalluni. Attartortut arlallit qinnuteqaammik nassiussinissartik sioqqullugu piginnittut peqatigiiffiannik pilersitsisimanngippata, aammalu malittarisassanik aalajangersaasimanngippata, Naalakkersuisut kommunalbestyrelsiluunniit tamatumunnga ikiuutissapput.

Inissiaateqarfimmi attartortittakkanik inissiartaqartuni attartortut tamarmiullutik inissianik attartukkaminnik inissiatut nammineq pigisatut tigusinissaminnik kissaateqarsimanngippata, Namminersornerullutik Oqartussat kommuniluunniit inissianik nammineq pigisanik sinneruttunik piginnittutut ingerlaannarnermik kingunerisaanik piginnittut peqatigiiffiannut ilaasortannguinnassapput.

Imm. 2-mut

Aalajangersakkami Naalakkersuisut inissiaateqarfinni inissianik attartortittakkanik agguataarisarneq pillugu sukumiinerusunik maleruagassiorsinnaanermut tunngavissinneqarput, taakkununnga nalunaarsuisarnermi pissutsit piginnittunullu immikkut piumasaqaatit ilaatinneqarlutik.

Inissiaateqarfinni inissiat attartortittakkat agguataarneqartarnerinut atatillugu agguataarinissap soorlu naliliisartumit, nuna tamakkerlugu inspektørimit imaluunniit illunik tuniniaasartumit isumagineqarnissaanut aalajangiisarnermut aalajangersakkap atorneqarnissaa eqqarsaatigineqarpoq. Nalunaarsuisarnermut atatillugu Naalakkersuisut ataatsimut atortulersuutit illunut allanut atasut imaluunniit biilinut unittarfeqarnermi pissutsit immikkut ittut nalunaarsorneqarsinnaanissaannik kissaateqarnissaat eqqarsaatigineqarsinnaavoq. Kiisalu Naalakkersuisut piginnittunut piumasaqaatinik immikkut ittunik aalajangersaanissamut periarfissaqartinneqassapput, tassanilu aalajangersimasunik periaaseqarluni aputaajaasarneq pillugu piumasaqaatit pineqarsinnaapput.


§ 6-mut

Imm. 1-imut

Aalajangersakkami najoqqutassat qinnuteqartumut nassiunneqartussat taagorneqarput. Najoqqutassat pissarsiariniartarnerat allaffissornermi annertuunik suliassartaqartarmat, qinnuteqaatip tiguneraniit najoqqutassat qinnuteqartumut nassiunneqarnissaannut nalinginnaasumik qaammatialuit ingerlasinnaapput.

Najoqqutassat annertuut nassiunneqartarnerannut siunertaavoq qinnuteqartup Naalakkersuisut imaluunniit kommunalbestyrelsip neqeroorutaanik akuersissanerluni naliliiniarnermini aalajangernissaminut naammattunik tunngavissaqarnissaa.

Inatsisitigut pisussaaffioreersunut naleqqiullugu maanna illumut nassuiaammik immersuisoqartartussanngorpoq. Illumut nassuiaammi illup qanoq innera nassuiarneqassaaq. Nassuiaasiornermi illup pisoqaassusiata, pequsersugaanerata, illup ilaasa qanoq innerisa, atortulersuutaasa uuttuutaasalu uppernarsaaserneqarnissaat siunertarineqarpoq. Paasissutissat taakku attartortup niuernermi akigititassamut sanilliussinnaavai, pisinissamillu aalajangernissamut tunngavigisinnaallugit. Assersuutigalugu illu oqorsaateqarpat tamanna nassuiaammi takuneqarsinnaavoq, kisiannili oqorsaataa qanoq issutiginersoq qanorlu innersoq takuneqarsinnaanani. Teknikkikkut aningaasatigullu naligititaasoq maannamut atorneqartoq qanoq issutsimik nalunaarsuinermut paarlaanneqakkajuttarsimavoq, taamaattuunanilu. Teknikkikkut aningaasatigullu naligititaasoq tassaavoq sanaqqinneqarnerata akia, ajorseriaatit, aserfallatsaaliuisimannginneq nalikilliliissutillu ilanngaatigalugit. Illumut nassuiaat nutaaq tassaavoq pioreersutulli illumi soqarnersoq pillugu paasissutissat. Attartortoq pisussaavoq inissiap pitsaassusaa ilisimaareriissallugu, tassami attartortoq inissiami ineqartooreerami taassumalu pitsaassusaa ilisimariissallugu.

Imm. 2-mut

Najoqqutassat qinnuteqartumut nassiunneqartussat tigusinissamut neqerooruterpiamik ilaqartinneqassapput. Qinnuteqartoq neqeroorutip nassiunneqarneranit qaammatit pingasut iluanni neqeroorummut akuersisimanngippat, Naalakkersuisut imaluunniit kommunalbestyrelsip qinnuteqartup tigusinissamik siunertaqannginneranik naatsorsuuteqarnissaq pisinnaatitaaffigaat. Akissuteqarnissamut killissarititaasut qaammatit pingasut qaangiunneranni Naalakkersuisut imaluunniit kommunalbestyrelsip neqerooruteqarnerminni pisussaaffii atorunnaassapput.

Imm. 3-mut

Aalajangersagaq manna qinnuteqartup saniatigut inissiaateqarfimmi attartortittakkanik inissiartaqartumi attartortut sinnerinut saaffiginnittuuvoq. Attartortut taakku inissiamik tigusiniarlutik suliniummik aallartitsisimannginnamik, najoqqutassat qinnuteqartumut nassiunneqartut amerlaqataannik nassiussivigineqassanngillat. Taamaattorli attartortitsisup najoqqutassat attartortitsisup attartortumut nassiussimasai taakku attartortut sinnerinut nassiutissanerlugit nammineerluni aalajangissavaa, tak. imm. 1, kisiannili attartortitsisup tamanna pisussaaffiginngilaa. Aalajangersakkap atuutilerneratigut attartortut minnerpaamik suliniut ingerlasoq pillugu ilisimatinneqassapput, tassunga ilanngullugu inissiamik attartukkaminnik inissiatut nammineq pigisatut tigusisinnaanerannut periarfissaannik ilisimatinneqassallutik.


§ 7-imut

Imm. 1-imut

Aalajangersakkami attartortut sinneruttut, inissiamik attartukkaminnik inissiatut nammineq pigisatut tigusinissamik kissaateqanngitsut periarfissaat maleruagassiuunneqarput. Tassani aalajangersakkap inissianik attartortitsisarneq pillugu Inatsisartut peqqussutaannut, attartortut sinneruttut pisinnaatitaaffiinik pisussaaffiinillu maleruagassiorfiusumut sukkulluunniit atuuttumut ilanngullugu atuarneqarnissaa pingaaruteqarpoq.

Aalajangersakkami attartortoq illuummi attartortut ingerlaannarnissamik imaluunniit Naalakkersuisut kommunalbestyrelsilluunniit illoqarfimmi najukkami inissiamut attartortittakkamut allamut neqeroorutaanut akuersinissamik qinigassinneqarpoq. Attartortoq kingulliullugu taaneqartumik periarfissaqarnersoq inissianik attartortitsisarneq pillugu Inatsisartut peqqussutaanni tamatumunnga pisinnaatitaaffiliinerit apeqqutaapput. Assersuutigalugu attartortup ineqarnermut akiuliutinik piffissaq eqqorlugu akiliisannginnermigut attartornermut isumaqatigiissut sumiginnarsimappagu, attartortoq illoqarfimmi najukkamini inissiamik attartortittakkamik allamik neqeroorfigineqarsinnaanngilaq. Taamaattorli attartortitsisup pissutsit pingaaruteqanngitsut imaluunniit attartortumit iluarsineqareersimasut pissutiginiarsinnaanngilai.

Imm. 2-mut

Aalajangersagaq imm. 1-imitut inissianik attartortitsisarneq pillugu Inatsisartut peqqussutaannut innersuussummik toqqaannanngitsumik imaqarpoq, taannalu malillugu inissiaateqarfinni Namminersornerullutik Oqartussat kommunilluunniit inissianik pigisaqarfigisaanni ineqarnermut akiliutissat naatsorsorneqartarnerat allassimavoq.

Imm. 3-mut

Aalajangersakkap atuutilerneratigut attartortunit sinneruttut piginnittut peqatigiiffianni, toqqaannanngitsumik ilaaffigilikkaminni torersaarnissamut maleruagassanik ataqqinninnissamut pisussaatinneqalissapput. Aalajangersagaq ilanngunneqarpoq, piginnittut peqatigiiffii malittarisassiaminni torersaarnissamut maleruagassanik inissianik attartortitsisarneq pillugu Inatsisartut peqqussutaanni atuutsinneqartunit sukannernerusunik aalajangersaasinnaammata. Taamatut pisoqartillugu attartortunit sinneruttut maleruagassanut sukannernerusunut akuersaartussaapput, taamaalillutillu attartornermi pissutsinut pisinnaatitaaffiit atukkatik annikinnerulernerat naammagiinnartussaallugu.

Illoqarfinni annerusuni inissiat ilusilersugaanerat, kiisalu attartortumiit piginnittumut aaqqissuussinermi pingaarnertut siunertarineqartut peqqutigalugit aalajangersakkami piginnittut peqatigiiffii, najugaqarfimmi avatangiisinik peqqinnartunik eqqissisimanartunillu pilersitserusuttut tapersersorneqarput. Attartortunit sinneruttut ataasiakkaat amerlanerussuteqartunut akornusersuisarpata, taakku peersinneqarsinnaassapput.


§ 8-mut

Aalajangersakkami attartortut inissiamik attartortittakkamik najukkaminnik inissiatut nammineq pigisatut tigusisinnaanermut periarfissaqarnerannik nalunaarsorneqarsimasut, taamatut periarfissaqarnerminnik piffissamut killiligaanngitsumut atuisinnaanerat aalajangersarneqarpoq. Kisiannili attartortoq inissiamik allamik neqeroorfigineqarnermini akuersisimaguni, inissiap tigunissaanut neqeroorummut akuersinissaminut periarfissani annaassavaa.

Aalajangersakkap atuutilerneratigut attartortut sinneruttut kissaatigippassuk Naalakkersuisut kommunalbestyrelsilu tunisinissamik isumaqatigiissuteqarnissamik pisussaatitaalissapput.

Tunisinissamut atugassarititaasut sukumiinerusut siunnersuummi aalajangersakkani allani malittarisassiuunneqarput, tassunga ilanngullugu tunisinermut akiusoq siunnersuummi § 11 malillugu aalajangerneqassalluni.


§ 9-mut

Imm. 1-imut

Aalajangersakkami pineqarput ilaatigut attartortup inissiamik najukkaminik nalinginnaasumik qimatsinera ilaatigullu attartortunit sinneruttup inissiamut allamut nuunnissamik Naalakkersuisut imaluunniit kommunalbestyrelsip neqeroorutaanik akuersaarnera.

Naalakkersuisut imaluunniit kommunalbestyrelsip inissiat attartortittakkat inoqanngitsut inissiatut attartortittakkatut atorneqaannarnissaat kissaatiginngikkunikku tunisinnaavaat.

Naalakkersuisut imaluunniit kommunalbestyrelsip piginnittutut inissiap attartortittakkap qanoq atorneqarnissaa aalajangersinnaavaat. Inissiaq inoqanngitsoq tamanut ammasumik tuniniarneqassappat assersuutigalugu aviisini allagarsiinikkut qaffasinnerpaamik akiliiumasumut tuniniaasoqarsinnaavoq. Tunisineq aamma inissiaq attartortittagaq illunik tuniniaasartoq niuernermi akiusumik aalajangiisussaasoq aqqutigalugu tamanut ammasumik pisinnaavoq. Pisisup tunisinermut atatillugu aningaasartuutit tamaasa akilissavai.

Imm. 2-mut

Tamanut ammasumik tuniniaaneq siunnersuummi § 11-mi pineqartunut ilaanngitsoq naqissuserniarlugu aalajangersagaq ikkunneqarpoq, tunisinermi akiusoq imm. 1 naapertorlugu aalajangersarneqartussaammat. Qanoq sivisutigisumik attartortuusimaneq tunngavigalugu tunisinermi akiusumut akikillisaasoqassanngitsoq pissusissamisoorpoq, inissiaq attartortittagaq inoqanngimmat.


§ 10-mut

Imm. 1-imut

Aalajangersakkami inissiaateqarfiit attartortittakkanik inissiartallit illutut nammineq pigisatut tiguneqartussat kisimik pineqarput. Naalakkersuisut imaluunniit kommunalbestyrelsi illumik nammineq pigisassatut tigusinissamik qinnuteqaatip akuerineqarnerani suut qinnuteqartumut nassiunneqassanersut aalajangersakkami aalajangersarneqarpoq.

Najoqqutassat nassiunneqartarnerannut siunertaavoq qinnuteqartup Naalakkersuisut imaluunniit kommunalbestyrelsip neqeroorutaanik akuersissanerluni naliliiniarnermini aalajangernissaminut naammattunik tunngavissaqarnissaa.

Inatsisitigut pisussaaffioreersunut naleqqiullugu maanna illumut nassuiaatit immersorneqartartussanngorput. Illumut nassuiaat illup qanoq inneranut nassuiaataasussaavoq. Nassuiaasiornermi ilaatigut illup pisoqaassusaanut, pisatsersugaaneranut, illup ilaata qanoq inneranut, atortulersuutinut uuttuutinullu uppernarsaasiinissaq siunertarineqarpoq. Paasissutissat taakku attartortup niuernermi akigititaasumut sanilliussinermut atorsinnaavai, pisinissamillu aalajangernissamut tunngavigisinnaallugit. Assersuutigalugu illu oqorsaaserneqarsimasoq nassuiaammi takuneqarsinnaavoq, oqorsaataali qanoq issutiginersut qanorlu innersut takuneqarsinnaanngilaq. Teknikkikkut aningaasatigullu naligititaasoq maannamut atorneqartoq qanoq issutsimik nalunaarsuinermut paarlanneqakkajuttarsimavoq, taamaattuunanilu. Teknikkikkut aningaasatigullu naligititaasoq tassaavoq sanaqqinneqarnerata akia, ajorseriaatit, aserfallatsaaliuisimannginneq nalikilliliissutillu ilanngaatigalugit. Illumut nassuiaat nutaaq tassaavoq pioreersutulli illumi soqarnersoq pillugu paasissutissat. Attartortoq pisussaavoq inissiap pitsaassusaa ilisimaarissallugu, tassami attartortoq inissiami ineqartooreerami tassumalu pitsaassusaa ilisimareriissallugu.

Imm. 2-mut

Najoqqutassat qinnuteqartumut nassiunneqartussat tigusinissamut neqerooruterpiamik ilaqartinneqassapput. Qinnuteqartoq neqeroorutip nassiunneqarneranit qaammatit pingasut iluanni neqeroorummut akuersisimanngippat, Naalakkersuisut imaluunniit kommunalbestyrelsip qinnuteqartup tigusinissamik siunertaqannginneranik naatsorsuuteqarnissaq pisinnaatitaaffigaat. Akissuteqarnissamut killissarititaasut qaammatit pingasut qaangiunneranni Naalakkersuisut imaluunniit kommunalbestyrelsip neqerooruteqarnerminni pisussaaffii atorunnaassapput.


§ 11-imut

Imm. 1-imut

Aalajangersagaq nutaajuvoq, aammalu attartortumiit piginnittumut aaqqissuussineq pillugu Inatsisartut peqqussutaannut atuuttumut naleqqiullugu tunisinermi akimik aalajangersaariaatsimut nutaamut takussutissiaalluni. Tunisinermut akimik naatsorsueriaatsimi nutaami 2006-imi Inatsisartut ukiakkut ataatsimiinneranni aalajangiiffigisassatut siunnersuutip nr. 87-ip suliarineqarneranut atatillugu oqallinneq tungavigineqarpoq. Inissiamut attartortittakkamut tunisinermi akigititaasoq tamatuma kingorna tamatigut niuernermi naligititaasumut aalajangerneqartassaaq.

Imm. 2-imut

Ataatsimut isigalugu aalajangersakkap atuutilerneratigut tunisinermi akinik aalajangersaasarnermi attartortup ukiut inissiamik attartorfigisai eqqarsaatigineqartassapput. Aalajangersagaq malillugu tamanna inissiani attartortittakkani inissiaatinik pingasunik amerlanerusunilluunniit attartortittakkanik inissiartalinni taamaallaat atuutissaaq. Attartortup piffissaq attartortuuffigisaa malillugu akikillisaasiisarneq attartortunut, inissianik attartukkaminnik inissiatut nammineq pigisatut tigusinissaannut kajumissaarutitut ilanngunneqarpoq. Procentinngorlugu akikillisaanermi ilanngussaq 2-imi takuneqarsinnaasutut attartortup inissiami pineqartumi qanoq sivisutigisumik attartorsimanera apeqqutaatinneqartassaaq. Piffissaq attartorfiusoq attartornermut isumaqatigiissutip aallartinneraniit attartortup inissiamik attartukkaminik inissiatut nammineq pigisatut tigusinerata tungaanut naatsorsorneqassaaq. Attartortoq inissiami atasuinnarmik ukiut tallimat sinnerlugit najugaqarsimappat aatsaat tunisinermi akiusumut akikillisaasoqartassaaq. Procentinngorlugu akikillisaaneq aningaasartassatut annertussuserititassatut aalajangersakkanik killilerneqarpoq.

Aalajangersakkami imm. 2 aamma ilanngussaq 2 tunngavigalugit assersuusiat uku takussutissatut atorneqarsinnaapput:

1) Ilaqutariinnut arlalinnut inissiani inissiaq pingasunik initalik, 965.000 koruuninik akeqartutut naliliiffigineqartoq.

Attartortoq ukiut 13-it 14-illu akornanni inissiami najugaqarsimavoq, taamaattumillu ilanngussaq 2 naapertorlugu 21%-inik akikillisaavigineqassaaq.

965.000 koruunit 21%-ii 202.650 koruuniupput.

Aalajangersakkami imm. 2, nr. 2-imi takuneqarsinnaasutut inissiap pingasunik initallip akianut akikillisaatissaq annerpaamik 335.000 koruuniusinnaavoq. 965.000 koruunit 21%-iat annertunerpaaffissatut killiliussap iluaniimmat akikillisaatissaq 202.650 koruuniuvoq.

Tunisinermi akiusoq 965.000 kr.
- akikillisaatissaq 202.650 kr.
+ suliamut aningaasartuutit 50.000 kr.
Tunisinermut aki aalajangiunneqartoq 812.350 kr.

Taakkunannga 40%-it imaluunniit 324.940 koruunit ukiuni 20-ni erniaqanngitsutut taarsersugassaanngitsutullu taarsigassarsiaritinneqassapput. 60%-it sinneruttut, tassalu 487.410 koruunit tunisisumut akilerneqassapput.

2) Inissiani uiguleriinni inissiaq sisamanik initalik, 1.175.000 koruuninik akeqartutut naliliiffigineqartoq.

Attartortoq ukiut qulingiluat qulillu akornanni inissiami najugaqarsimavoq, taamaattumillu ilanngussaq 2 naapertorlugu 13%-inik akikillisaavigineqassaaq.

1.175.000 koruunit 13%-ii 152.750 koruuniupput.

Aalajangersakkami imm. 2, nr. 3-imi takuneqarsinnaasutut inissiani uiguleriinni inissiap sisamanik initallip akianut akikillisaatissaq annerpaamik 445.000 koruuniusinnaavoq. 1.175.000 koruunit 13%-ii taakku annerpaaffissatut killiliussat iluanniimmata, akikillisaatissat 152.750 koruuninik annertussuseqassapput.

Tunisinermi akiusoq 1.175.000 kr.
- akikillisaatissaq 152.750 kr.
+ suliamut aningaasartuutit 50.000 kr.
Tunisinermut aki aalajangiunneqartoq 1.072.250 kr.

Taakkunannga 40%-it imaluunniit 428.900 koruunit ukiuni 20-ni erniaqanngitsutut taarsersugassaanngitsutullu taarsigassarsiaritinneqassapput. 60%-it sinneruttut, tassalu 643.350 koruunit tunisisumut akilerneqassapput.

3) Ilaqutariinnut arlalinnut inissiani inissiaq tallimanik initalik, 1.800.000 koruuninik akeqartutut naliliiffigineqartoq.

Attartortoq inissiami ukiut 22-it najugaqarsimavoq, taamaattumik 35%-inik akikillisaavigineqassaaq, takuuk ilanngussaq 2.

1.800.000 koruunit 35%-iat 630.000 koruuniuvoq.

Aalajangersakkami imm. 2, nr. 4-imi takuneqarsinnaasutut inissiap tallimanik initallip akianut akikillisaatissaq annerpaamik 555.000 koruuniusinnaavoq. 1.800.000 koruunit 35%-iisa annerpaaffissatut killiliussat qaangersimammagit, akikillisaatissat 555.000 koruuninik annertussuseqassapput, 630.000 koruuniussanatik.

Tunisinermi akiusoq 1.800.000 kr.
- akikillisaatissaq 555.000 kr.
+ suliamut aningaasartuutit 50.000 kr.
Tunisinermut aki aalajangiunneqartoq 1.295.000 kr.

Taakkunannga 40%-it imaluunniit 518.000 koruunit ukiuni 20-ni erniaqanngitsutut taarsersugassaanngitsutullu taarsigassarsiaritinneqassapput. 60%-it sinneruttut, tassalu 777.000 koruunit tunisisumut akilerneqassapput.

4) Illu ilaqutariinnut ataatsinut inissiaq sisamanik initalik, 1.300.000 koruuninik akeqartutut naliliiffigineqartoq.

Attartortoq ukiut tallimat arfinillillu akornanni inissiami najugaqarsimavoq, kisiannili illu ilaqutariinnut ataatsinut inissiaammat tunisinermi akigititaasumut akikillisaasoqassanngilaq.

Tunisinermi akiusoq 1.300.000 kr.
+ suliamut aningaasartuutit 50.000 kr.
Tunisinermut aki aalajangiunneqartoq 1.350.000 kr.

Taakkunannga 40%-it imaluunniit 540.000 koruunit ukiuni 20-ni erniaqanngitsutut taarsersugassaanngitsutullu taarsigassarsiaritinneqassapput. 60%-it sinneruttut, tassalu 810.000 koruunit tunisisumut akilerneqassapput.

Imm. 3-imut

Attartortup qanoq sivisutigisumik attartorsimanerata naatsorsorneqarnerani, attartortup piffissami ataannartumi attartortitsisup pineqartup inissiaataani attartortittakkami attartorfigisaata tunngavigineqarnissaa aalajangersakkami aalajangersarneqarpoq. Tassalu attartortoq piffissaq tamakkerlugu attartortitsisumut ataatsimut attartortuusimappat, aatsaat piffissaq piffissamut attartortuuffigisamut ilanngunneqassaaq, tassanilu attartortup inissiaq najugaa Namminersornerullutik Oqartussanit imaluunniit kommunimit pigineqassaaq. Attartortoq Namminersornerullutik Oqartussat inissiaataannit attartortittakkamiit kommunip inissiaataanut attartortittakkamut nuussimappat, paarlattuanillu pisimappat, piffissaq piffissamut attartortuuffigisamut ilanngunneqassanngilaq.

Tamatuma peqatigisaanik aamma piffissaq piffissamut attartortup attartortuuffigisaanut ilanngunneqassappat, attartorneq piffissaq tamakkerlugu allannguuteqanngitsumik attartortuuffigineqarsimasoq, attartortup ataannartumik attartortuuffigisaatut paasineqassaaq. Attartorneq sumiiffimmi ataasiinnarmi pisimappat, soorlu Nuummi, attartorneq kipineqarsimassanngilluinnarpoq. Tassalu attartortoq qaammatialunni inissiami attartortittagaanngitsumi najugaqarsimassanngilaq. Sumiiffinni assigiinngitsuni attartornermut atatillugu attartornerup qaammatini pingasuni kipineqarsimanissaa akuerineqarpoq, tamannalu imatut takussutissiorneqarsinnaavoq. Attartortoq illoqarfimmi ataatsimi inissiamik attartortittakkamik attartornerminut isumaqatigiissutini juulip aallaqqaataani taamaatillugu, oktobarip aallaqqaataani illoqarfimmi allami inissiamut attartortittakkamut nuuttussaavoq. Taamatut unikkallarnermut attartortup pequtiminik sumiiffimmut nutaamut nassiussinissamut periarfissaqartinneqarnissaa tunngavigineqarpoq. Taamatuttaaq attartortup sumiiffimmi nuuffigisamini utaqqiisaasumik inissikkallarneqarneranik peqquteqartumik attartornermik kipisigallartarneq akuerineqarpoq. Tassalu utaqqiisaasumik inissikkallarneq tamatigut piffissamut attartortuuffigisamut ilanngunneqartassaaq. Taamaattumik piffissap attartortuuffigisap attartortoq nooqatigisassavaa.

Imm. 4-imut

Tigusinermut atatillugu aningaasartuutinut tamanut, tassunga ilaallutik inissiap nalilersorneqarneranut, siunnersuinermut, eqqartuussissuserisumut aamma naqissusiinermut akitsuummut aningaasartuutinut matussutissatut attartortoq aalajangersimasumik 50.000 koruuninik akiliuteqassaaq. Aningaasat taakku agguataarinermut tigusinermullu atatillugu aningaasartuutiviusunut atanngillat. 50.000 koruunit taakku attartortup inissiamik attartukkaminik qaqugukkut inissiatut nammineq pigisatut tigusinissaminik aalajangernera apeqqutaatinnagu attartortumit akilerneqassapput. Taamaalilluni aningaasartaliussat tassaapput aningaasartat aalajangersimasut, tunisinernut tamanut atatillugu tunisinermi akiusumut ilaliunneqartussat.


§ 12-imut

Aalajangersakkap atuutilerneratigut inissiamut niuernermi naligititaasussap nalilerneqarnissaanut suliassamik ilisimasalimmut sumulluunniit attuumassuteqanngitsumut Namminersornerullutik Oqartussat imaluunniit kommuni naliliisitsisartussaapput. Suliassamik ilisimasalik sumulluunniit attuumassuteqanngitsoq illunik tuniniaasartuusariaqanngilaq, kisiannili najukkani niuernermut tunngassuteqartunik ilisimasaqassallunilu paasisimasaqassalluni. Suliassamik ilisimasalik sumulluunniit attuumassuteqanngitsoq assersuutigalugu tassaasinnaavoq sillimmasiisitsisartoq, eqqartuussissuserisoq, revisori, entreprenøri, aningaaserivimmi siunnersorti imaluunniit alla suliassamik ilisimasalik najukkami niuernermut tunngassuteqartunik ilisimasaqarlunilu paasisimasalik.


§ 13-imut

Imm. 1-imut

Aalajangersagaq aatsaat attartortup inissiami nammineq pigisassami attartortutut ukiut attartorfigisai tunngavigalugit tunisinermut akiusumut akikillisaaffigineqassappat atorneqassaaq. Tassalu akit nikingassutaannut qularnaveeqqusiissutip isumaa attartortumiit piginnittumut aaqqissuussineq pillugu Inatsisartut peqqussutaanni atuuttumut naleqqiullugu siunnersuummi matumani allaaneruvoq. Siunnersuut malillugu Namminersornerullutik Oqartussat imaluunniit kommuni inissiamut nammineq pigisamut akit nikingassutaannut qularnaveeqqusiissummik nalunaarsuititsissapput, taassumalu pisinermut akiusumut aningaasatigut appaatissat, attartortup ukiut attartorfigisai tunngavigalugit akikililiissutigineqartussat, annertoqqatigissavaa.

Inissiap nammineq pigisap tuniaarneratigut pisisup iluanaarniapilunnissaa pinngitsoorniarlugu aalajangersagaq ikkunneqarpoq.

Akit nikingassutaannut qularnaveeqqusiissutip annertussusissaa 50.000 koruuninut minnerpaaffissalerneqarpoq. Tamanna kinguneqassaaq Namminersornerullutik Oqartussat imaluunniit kommuni 50.000 koruuninit mikinerusumik akit nikingassutaannut qularnaveeqqusiissusiissanngitsut, tamanna iluanaarniapilunnissamik pinngitsuuiniarnermi pisariaqanngimmat.

Imm. 2-mut

Aalajangersagaq akit nikingassutaannut qularnaveeqqusiissutip akilerneqarnissaanut akilerneqartussat tulleriiaarneqarneranni inissisimaneranut taaneqartumut ingerlatsiviup misissuisarnissaanut ilitsersuutaavoq. Akit nikingassutaannut qularnaveeqqusiissut inissiap qularnaveeqqusiunneratigut, qularnaveeqqusiisarneq pillugu Kalaallit Nunaannut inatsit naapertorlugu nalunaarsorneqartumik qularnaarneqartassaaq. Tamanna qularnaveeqqusiissutitut uppernarsaatip akilerneqarnissaanut akilerneqartussat tulleriiaarneqarneranni inissisimaneranik nikisitsinissamik piumasaqaammik qularnaveeqqusiissummi ilanngussinikkut pissaaq, tassani allanneqassalluni qularnaveeqqusiissutip siunnersuummi § 14, imm. 1 naapertorlugu taarsigassarsianut qularnaveeqqusiissutaasup, kiisalu pisinermut akiusup sinneranik aningaasalersuinissamut taarsigassarsianut qularnaveeqqusiissutip, akilerneqarnissaat akilerneqartussat tulleriiaarneqarneranni inissisimanera nikitsinneqassasoq. Tassungattaaq qularnaveeqqusiisarneq aamma qularnaveeqqusiisarnermut maleruagassat nalinginnaasut pillugit Kalaallit Nunaannut inatsit atuuppoq.

Inatsisitigut qularnaveeqqusiisussaatitaanermi akilerneqartussat tulleriiaarneranni inissiisarneq assersuusiat makku atorlugit takussutissiarineqarsinnaavoq:

Ilaqutariinnut arlalinnut inissiani inissiaq pingasunik initalik 965.000 koruuninut nalilerneqarpoq.

Attartortoq inissiami ukiut 13-it aamma 14-it akornanni najugaqarsimavoq, taamaammallu ilanngussaq 2 naapertorlugu 21%-imik akikillisaasoqarpoq. 965.000 koruunit 21%-iat 202.650 koruuniuvoq.

Aalajangersakkami imm. 2, nr. 2-imi takuneqarsinnaavoq inissiamut pingasunik initalimmut akikillisaatissaq annerpaamik 335.000 koruuniusinnaasoq.

Tunisinermi akiusoq 965.000 kr.
- akikillisaatissaq 202.650 kr.
+ suliamut aningaasartuutit 50.000 kr.
Tunisinermut aki aalajangiunneqartoq 812.350 kr.

Taakkunannga 40%-it imaluunniit 324.940 koruunit ukiuni 20-ni erniaqanngitsutut taarsersugassaanngitsutullu taarsigassarsiaritinneqassapput. 60%-it sinneruttut, tassalu 487.410 koruunit tunisisumut akilerneqassapput.

Inatsisitigut qularnaveeqqusiisussaatitaanermi akilerneqartussanik tulleriiaarinermi inissiisarneq malillugu imatut tulleriiaarisoqassaaq:

Akilerneqartussatut siullertut inissisimasoq: tunisinermi akiusup 60%-ia pisisumit aningaasalersorneqartoq (487.410 koruuninik annertussuseqartoq).

Akilerneqartussatut siulliup tulliatut inissisimasoq: tunisinermi akiusup 40%-ia Namminersornerullutik Oqartussanit imaluunniit kommunimit ukiuni 20-ni erniaqanngitsutut taarsersugassaanngitsutullu taarsigassarsiaritinneqartoq (324.940 koruuninik annertussuseqartoq).

Akilerneqartussatut pingajutut inissisimasoq: akit nikingassutaannut qularnaveeqqusiissut tunisinermi akiusumut akikillisaataasutut annertussuseqartoq (tunisereernerup kingorna ukiumi siullermi 202.650 koruuninik, tunisereernerup kingorna ukiup aappaani 182.385 koruuninik, tunisereernerup kingorna ukiut pingajuanni 162.120 koruuninik il.il. annertussuseqartoq).

Akit nikingassutaannut qularnaveeqqusiissut ukiut 10-it ingerlaneranni ukiut tamaasa 1/10-imik nalikilliartuaartinneqassaaq, tassa imaappoq akit nikingassutaannut qularnaveeqqusiissut ukiumut 20.265 koruuninik nalikillilerneqartassaaq.

Imm. 3-mut

Aalajangersakkami Namminersornerullutik Oqartussat imaluunniit kommunip akit nikingassutaannut qularnaveeqqusiissutaasa ukiut qulit ingerlanerini nalikillisikkiartuaarneqartarnissaat aalajangersarneqarpoq. Taamaattumik piginnittup inissiaq tiguneraniit siusinnerpaamik ukiut qulit qaangiunnerini inissiaq nammineq pigisani akit nikingassutaannut qularnaveeqqusiissummut tunngatillugu Namminersornerullutik Oqartussanut imaluunniit kommunimut aningaasaqarnikkut pisussaaffeqarfiunngitsumik niuernermi piumasaqaatinik tunngaveqarluni tunisinnaavaa.

Taamaalilluni aalajangersakkakkut pisisup pisinerminit ukiut 10-it qaangiutsinnagit inissiaq tunissagaluarpagu aningaasatigut iluanaarniarsinnaaneq periarfissaajunnaarsinneqarpoq.

Imm. 4-mut

Akit nikingassutaannut qularnaveeqqusiissut taamaallaat iluanaarniapilunnissamut illersutitut atuutsinneqalerpoq, taamaalilluni pisisoq inissiamik tigusinermi kingorna piffissap sivikitsup qaangiunnerani inissiamik nammineq pigisaminik tunisinermini iluanaalertornissaa pinngitsoortinniarneqarluni. Taamaattumik piginnittut nikinnerini akit nikingassutaannut qularnaveeqqusiissut malillugu pingaarnertut aningaasat tamatigut akiligassanngortinneqartassapput.

Tamatumunngali pinngitsuuiffiusussatut pingaarutilittut aalajangersarneqarpoq, toqusoqartillugu piginnittut nikinneranni, tassalu pisortatigoortumik taamatullu namminerisamik testamentiliorfiusumik testamentiliorfiunngitsumillu kingornussinermi akit nikingassutaannut qularnaveeqqusiissut akilerneqassanngitsoq. Tassalu inissiaq nammineq pigisaq aningaasat akiligassanngortinneqanngikkaluarlutik kikkunnulluunniit testamentiliorneqarsinnaavoq.

Aalajangersakkap matuma saniatigut aappaasoq qimagaasoq kingornussassat suliarineqanngikkaluartut inissiami najugaqaannarsinnaavoq, kingornussassat suliarineqanngitsut najugaqaannarneq piginnittut nikinnerattut isigineqanngimmat. Kisianni aappaasup qimagaasup piginnittup toqunerata kingunitsianngua inissiaq nammineq pigisaq allamut tunissappagu akit nikingassutaannut qularnaveeqqusiissut akiligassanngortinneqassaaq, pisoq taanna piginnittup toquneranut atatillugu allamut tunisinertut isigineqanngimmat.

Akit nikingassutaannut qularnaveeqqusiissutip akilerneqartarnerani ilaatinneqanngitsoq annertooq tassaavoq, averusernermut avinnermulluunniit atatillugu aappariit imaluunniit aappariittut nalunaarsorsimasut akornanni piginnittut nikinnerat. Taamatut pisoqartillugu tamanna iluanaarniapilunnissamut tunngavigineqarsinnaanngilaq, taamaattumillu tamanna toqusoqartillugu piginnittut nikinnerannut nallersuunneqarsinnaalluni.

Imm. 5-imut

Aalajangersakkami akit nikingassutaannut qularnaveeqqusiissutinik isumakkeerisinnaaneq pillugu maleruagassanik Naalakkersuisut aalajangersaasinnaanissaannik piginnaatinneqarput. Aalajangersagaq ilanngunneqarpoq, assersuutigalugu nunami najukkamilu pissutsit inissiamut tunngassuteqartut peqqutaallutik inissiamik piginnittup ukiunik 10-inik piffissaqartinneqarnissaata atuutsiinnarnissaat naapertuutinngissinnaammat. Assersuutigalugu inissiaq nammineq pigisaq nunaqarfimmi pigisanik aalaakkaasunik niuerfiukulanngitsumi inissisimappat piginnaatitsissutip atortinneqarsinnaanera eqqarsaatigineqarpoq.

Tamatigut piginnaatitsissut taamaallaat atorneqarsinnaassaaq iluanaarniapilunnissamut illersuutissaq tamatumuuna sanngiillisinneqanngippat.


§ 14-imut

Imm. 1-imut

Aalajangersakkami pisortat taarsigassarsititsisarnermut aaqqissuussinerat, attartortup Namminersornerullutik Oqartussat kommunillu inissiaataannik attartortittakkamik inissiatut illutulluunniit nammineq pigisatut tigusineranut atatillugu neqeroorutigineqartartoq nassuiarneqarpoq. Attartortup inissiamik attartukkaminik inissiatut imaluunniit illutut nammineq pigisatut tigusissaguni peqqussutissatut siunnersuummi matumani piumasaqaatit naammassisinnaagunigit taarsigassarsinissamik aaqqissuussinermik atuisinnaatitaavoq, tamannali piumasaqaataanngilaq. Taarsigassarsinissamut aningaasatigut annerpaaffissatut killiliisoqanngilaq. Taarsigassarsiassap annertussusissaanik naatsorsuinermi tunisinermut akiusoq inaarutaasoq tunngavigineqassaaq. Tassalu tunisinermut akiusoq akikillisaatitaqassappat taakku peereernerini 40%-it aatsaat naatsorsorneqassapput.

Namminersornerullutik Oqartussat imaluunniit kommuni toqqaannartumik toqqaannanngitsumilluunniit tunisinermut akiusup sinneranut aningaasalersueqataassanngillat.

Imm. 2-mut

Aalajangersakkami akilersuinermut atugassarititaasut, Namminersornerullutik Oqartussanit imaluunniit kommunimit taarsigassarsianut attuumassuteqartut nassuiarneqarput. Taarsigassarsiat ukiuni 20-ni ernialersugaassanngillat akilersugassanngussanatillu, tamatumalu kingorna ukiuni 15-ini annertoqqatigiinnik aningaasartalerlugit, ukiumut Nationalbankip erniarititaa 3%-imik ilallugu erniaqartillugit akilersorneqassapput.


§ 15-imut

Namminersornerullutik Oqartussat imaluunniit kommunip taarsigassarsiarititai inissiap imaluunniit illup nammineq pigisap, qularnaveeqqusiisarneq pillugu Kalaallit Nunaannut inatsit naapertorlugu nalunaarsorneqartup qularnaveqqusiunneratigut qularnaarneqassapput. Aalajangersakkami oqaatigineqarpoq taarsigassarsiat tunniunneqannginnerini ingerlatsivimmiit misissorneqassasoq Namminersornerullutik Oqartussat imaluunniit kommunip qularnaveqqusiissutaata akilerneqarnissaa taaneqartumut inissinneqarsimanersoq. Tamanna ajornartorsiorfiusussaassanngilaq, Namminersornerullutik Oqartussat imaluunniit kommuni tigusinissaq sioqqullugu piginnittuussammata, taamaalillutillu piffissami tassani inissiaateqarfimmut qularnaveeqqusiissutinik nalunaarsuisinnaasuni kisiartaassallutik. Tamatuma kingorna qularnaveeqqusiinermi uppernarsaammut, qinnuteqartup aningaasalersuutissat sinnerinik taarsigassarsiarisinnaasaanut tunngatillugu, akilerneqartussat tulleriiaarneqarneranni inissisimanerup nikisinneqarnissaanik piumasaqaat ilanngunneqassaaq. Tassungattaaq qularnaveeqqusiisarneq aamma qularnaveeqqusiisarnermut maleruagassat nalinginnaasut pillugit Kalaallit Nunaannut inatsit atuuppoq.


§ 16-imut

Imm. 1-imut

Aalajangersakkami piginnittut nikinneranni qularnaveeqqusiissutitut uppernarsaat naapertorlugu aningaasaatit akiligassanngortinneqarnissaat aallaavigineqarpoq. Tamatumunnga pinngitsuuineq pingaarutilik tassaavoq qularnaveeqqusiissutitut uppernarsaammi atugassarititaasunik allanik aalajangersaasoqarsimasinnaanera.

Pinngitsuuineq alla pingaarutilik tassaavoq inuinnaat akornanni piginnittut nikinneranni aammalu Namminersornerullutik Oqartussat imaluunniit kommunip qularnaveeqqusiussaanni qularnaveeqqut qularnaveeqqusiissutip nalingata 90%-ata iluanniippat, aningaasaatit akiligassanngortinneqassanngitsut. Taamatut pisoqarsinnaavoq, tassami pisisoq nutaaq pisinerminut aningaasalersuiniarluni nutaanik taarsigassarsisimatillugu, Namminersornerullutik Oqartussat kommunillu taarsigassarsiarititaasa akilerneqarnissaasa inissisimanerat nikittarpoq.

Namminersornerullutik Oqartussat kommuniluunniit taarsigassarsiarititaminnik sukkulluunniit qularnaarisimanissaat qulakkiivinniarlugu qularnaveeqqusiissutip tunisinermut akiusup 90%-iisa iluanniitinneqarnissaat aalajangerneqarpoq. Tassani tunisinermut akiusup inissiap illulluunniit nammineq pigisap niuernermi nalinganut ersiutaanissaa naatsorsuutigineqarpoq.

Assersuutigalugu attartortup inissiaq attartukkani 1.000.000 koruuninik akilerlugu inissiatut nammineq pigisatut tigusimappagu, tassunga aningaasalersuutit imatut isikkoqarsinnaapput:

400.000 koruuninik Namminersornerullutik Oqartussanit imaluunniit kommunimiit taarsigassarsititsisoqarpoq, 400.000 koruunillu realkredittimit taarsigassarsinikkut aningaasalersorneqarput, kiisalu 200.000 koruunit aningaaserivimmit taarsigassaarsiaapput, taakkulu pigisanik aningaaserivimmut qularnaveeqqusiissuteqarnikkut qulakkeerneqarput.

Ukiut marluk qaangiunnerini illu 1.400.000 koruunilerlugu tunineqarpat Namminersornerullutik Oqartussat kommunilluunniit qularnaveeqqusiissutaata akilerneqarnissaata inissisimanera qularnaveeqqusiissutip 1.260.000 koruunit (tunisinermut akiusut 90%-ia) iluaniiginnartinnerani kingusinnerusumut inissinneqassanngilaq. Taamaakkaluartoq qularnaarisimaneq kingusinnerusumut inissinneqassagaluarpat qularnaveeqqusiinermut uppernarsaat malillugu aningaasaatit tamakkiisumik akiligassanngortinneqassapput.

Imm. 2-mut

Aalajangersagaq ingerlatsivimmut ilitsersuutitut paasineqassaaq, akilerneqartussanik tulleriinnilersuinermi aalajangersakkatut paasineqarani. Piginnittut nikinneranni Namminersornerullutik Oqartussat kommunilluunniit taarsigassarsiarititaat akiligassanngortinneqanngippata, pisisoq nutaaq atugassarititaasut allanngortinnagit taarsigassarsianik ingerlatitseqqinnissamik pisinnaatitaaffilerneqassaaq. Akiitsullit nikinneranni qularnaveeqqusiissutitut uppernarsaammut tapertaliussassamik kiisalu akiitsunik tigusinermut nalunaarummik sanasoqassaaq. Kiisalu taarsigassarsiat allat piginnittut nikinnerannut atatillugu taarsigassarsiarineqartariaqartut taarsigassarsiarineqarneranni, Namminersornerullutik Oqartussat kommunillu qularnaveeqqusiussaqarlutik taarsigassarsiarititaasa akilerneqarnissaasa akilerneqartussat tulleriiaarneranni inissisimanera nikisinneqassaaq. Tassani nikisitsineq qularnaveeqqusiinermut uppernarsaammut nalunaarneqassaaq. Tassungattaaq qularnaveeqqusiisarneq aamma qularnaveeqqusiisarnermut maleruagassat nalinginnaasut pillugit Kalaallit Nunaannut inatsit atuuppoq.

Imm. 3-mut

Aalajangersakkami qularnaveeqqusiinermut uppernarsaat malillugu aningaasaatinik tamatigut akiligassanngortitsisarnermi pissutsit marluk taaneqarput.

Nr. 1-imut

Taarsigassarsisup qularnaveeqqusiinermi uppernarsaat malillugu taarsigassarsinermut atugassarititaasut sumiginnarsimappagit, taarsigassarsiat tamatigut akiligassanngortinneqartassapput. Tassani assersuutigalugu taarsigassarsisup ernianut akilersuutinullu piffissaq eqqorlugu akiliisimannginnera eqqarsaatigineqarpoq. Tassalu taarsigassarsisoq taarsigassarsiaminut akilersuutiminut akiliisinnaanngikkuni Namminersornerullutik Oqartussanut imaluunniit kommunimut akilersuinissamik isumaqatigiissuteqarsinnaassanngilaq. Taamatut akiligassanngortitsisarneq tigusinermiit siusinnerpaamik ukiut 20-t qaangiunnerini pisartussanngussaaq, Namminersornerullutik Oqartussanut imaluunniit kommunimut taarsigassarsiat ukiuni 20-ni erniaqartinneqartussaanngimmata akilersorneqartussaanatillu.

Tamatuma saniatigut assersuutigalugu taarsigassarsisup inissiamik illuummilluunniit nammineq pigisaminik illersorsinnaasumik aserfallatsaaliuinissamut pisussaaffeqarnera eqqarsaatigineqarpoq. Taarsigassarsisoq illup sananeqaataasa ilaannik pisariaqartitsilernermi taarsersuisussaavoq iluarsaassisussaallunilu, assersuutigalugu qaliaq ussiitsoq imaluunniit igalaat ussiitsut taarsersortussaavai iluarsaattussaallugilluunniit. Kiisalu taarsigassarsisoq tulleriaaraluni aserfallatsaaliuisussaavoq, soorlu illup silataa pisariaqalerneratigut qalipattartussaallugu. Naalakkersuisut kommunalbestyrelsillu qularnaveeqqusiiffigisanut nakkutilliinermikkut aalajangersagaq atuutsissavaat.

Nr. 2-mut

Nr. 2 naapertorlugu inissiamik attartortittakkamik nammineq pigisamik attartortitsinermi akigititaasoq taarsigassarsisup aningaasartuutit malillugit attartortitsinermut aningaasartuutaanit qaffasineruppat, nutaatut tamanna akiliisussanngornermut tunngaviussaaq. Tassalu taarsigassarsisimasoq attartortitsinermini annerpaamik aningaasartuutit, inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi aalajangersarneqartut tunngavigalugit ineqarnermut akiliuteqartitsisinnaassaaq.

Inissianik nammineq pigisanik attartortitsisarneq pillugu maleruagassat inissianik attartortitsisarneq pillugu Inatsisartut peqqussutaanni allanngortinneqarpata, peqqussummi matumani innersuussutaasut inissianik attartortitsisarneq pillugu Inatsisartut peqqussutaanni inissianik nammineq pigisanik attartortitsisarnermi akiliutip naatsorsorneqartarneranut maleruagassanut sukkulluunniit atuuttunut innersuussutitut paasineqassapput.

Inissianik attartortitsisarneq pillugu Inatsisartut peqqussutaanni ineqarnermut akiliummik aalajangersaasarnermi pineqaatissiisinnaanermut aalajangersakkanik immikkut ittunik atuutsitsinissaq pisariaqartutut isumaqarfigineqarpoq, siunnersuummi matumani Namminersornerullutik Oqartussat kommunilu taarsigassarsititsisutut ineqarnermut akiliutip inissianik attartortitsisarneq pillugu Inatsisartut peqqussutaanni ineqarnermut akiliutit aalajangersarneqartarnerannut maleruagassat unioqqutinneqarnerat uparuarsinnaammassuk. Inissianik attartortitsisarneq pillugu Inatsisartut peqqussutaanni attartortoq ineqarnermut akiliutip ineqarnermut akiliutinik aalajangersaasarneq pillugu maleruagassat uniorlugit aalajangersarneqarsimanerannik uparuaasinnaavoq.

Kiisalu Namminersornerullutik Oqartussat kommunilu taarsigassarsititsisutut taarsigassarsisumut attartortitsisumullu, inissianik attartortitsisarneq pillugu Inatsisartut peqqussutaat naapertorlugu annertunerungaatsiartumik akeqartitsilluni inissiamik pigisaminik attartortitsisumut, pineqaatissiisinnaanissaat kissaatiginarpoq.

Naalakkersuisut kommunalbestyrelsilluunniit taarsigasarsisup inissianik attartortitsisarneq pillugu Inatsisartut peqqussutaanni ineqarnermut akiliutinik aalajangersaasarnermut aalajangersakkat uniorlugit inissiamik illuummilluunniit nammineq pigisaminik attartortitsineranik paasisaqartarneranni aalajangersagaq atuutsinneqarsinnaavoq.

Aalajangersakkami Naalakkersuisut kommunalbestyrelsilluunniit tigusillattaarlutik misissuisarnissamut aammalu kaammattorneqaratik attartornermut isumaqatigiissutinik uppernarsaatinilluunniit allanik tunniussisoqarnissaanik qinnuteqarsinnaanissaannut isumalluutinik atuinissaat siunnerfigineqanngilaq. Kisiannili Naalakkersuisut kommunalbestyrelsiluunniit soorunami attartortumit saaffiginnilluni inatsisit uniorlugit attartortitsisoqarneranik ilisimatitsisumit attartornermut isumaqatigiissutip assilineranik, kontop nikerarneranut takussutissianik allanillu tunineqarnissaminnik piumasaqarsinnaassapput. Taamatut pisoqartillugu uppernarsaatinik tunniussinermi attartortup isumaqataasarnissaa naatsorsuutigineqarpoq.


§ 17-imut

Imm. 1-imut

Peqqussut 1. januar 2008-imi atuutilissaaq.

Atuutsitsilernissamut aalajangersakkap atuutilerneratigut qinnuteqaatit peqqussutissatut siunnersuutip atuutilerneqarnerata kingorna taamaallaat tiguneqartut peqqussutissatut siunnersuummi matumani maleruagassat malillugit suliarineqartassapput. Naalakkersuisuni imaluunniit kommunalbestyrelsimi qinnuteqaatip allakkatut isertinneqarnerani ulluliussaq tamatumunnga atatillugu aalajangiisuutinneqartassaaq.

Qinnuteqartut ilaannut qinnuteqaatip Namminersornerullutik Oqartussat kommunillu inissiaataasa attartortittakkat pigisatut inissianngortissinnaanerat pillugu Inatsisartut peqqussutaat nr. 5, 21. maj 2002-meersoq kingusinnerusukkut allannguuteqartinneqartoq naapertorlugu suliarineqarnissaa pitsaanerpaajusussaavoq, qinnuteqartulli ilaannut qinnuteqaatit peqqussutissatut siunnersuummi matumani aalajangersakkat naapertorlugit suliarineqarnissaat pitsaanerpaasussaalluni.

Qinnuteqaatit peqqussutissatut siunnersuutip matuma atuutilernerani naammassillugit suliarineqarsimanngitsut utertinneqarsinnaapput. Tamatuma kingorna qinnuteqaammik nutaamik nassiussisoqarsinnaavoq, taannalu peqqussutissatut siunnersuummi matumani maleruagassat naapertorlugit suliarineqassaaq.

Qinnuteqaatip naammassillugu suliarineqarsimaneranut pisinissamut pisussaaffiliisumik isumaqatigiissuteqartoqarsimanera apeqqutaassaaq. Siumoortumik pisinissamut isumaqatigiissusioqqaarani piginnittuunermut uppernarsaammik atsiuineq atuuttussaatinneqassaaq, tamatumani piginnittuunermut uppernarsaammi piumasaqaatini tamanna aalajangersimasumik isummerfigineqarsimanngippat.

Imm. 2-mut

Aalajangersakkami oqaatigineqarpoq pineqartumut peqqussut atuuttuusimasoq atorunnaarsinneqassasoq.

Nalunaarutilli atorunnaarsinneqartup imaata annersaa siunnersuummi § 3-mi oqaasertaliorneqarpoq.

Imm. 3-mut

Aalajangersakkami erseqqissarneqarpoq Namminersornerullutik Oqartussat kommunillu inissiaataannik attartortittakkanik teknikkikkut aningaasaqarnikkullu naliliisarneq pillugu nalunaarut nr. 9, 12. maj 2003-meersoq atuutiinnassasoq. Nalunaarut taanna aamma pineqartunut allanut arlalinnut pingaaruteqarmat, taassuma atorunnaarsinneqarnissaa naapertuutinngilaq.