18. oktobari 2007

UKA 2007/44

 

Inissialiornermut, illunut ataatsimoorussanut, illuliassanut il.il. tapersiissuteqartarneq pillugu Inatsisartut peqqussutissaattut siunnersuut

pillugu

Inatsisartut Attaveqaqatigiinnermut Ineqarnermullu Ataatsimiititaliaata

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

Inatsisartut Attaveqaqatigiinnermut Ineqarnermullu Ataatsimiititaliaat suliarinninnermini ukununnga inuttaqarpoq:

Inatsisartunut ilaasortaq Godmand Rasmussen, Atassut, siulittaasoq
Inatsisartunut ilaasortaq Esmar Bergstrøm, Inuit Ataqatigiit
Inatsisartunut ilaasortaq Jørgen Wæver Johansen, Siumut
Inatsisartunut ilaasortaq Vittus Mikaelsen, Siumut
Inatsisartunut ilaasortaq Marie Fleischer, Demokraatit
Inatsisartunut sinniisussaq Simon Olsen, Siumut
Inatsisartunut sinniisussaq Ole Thorleifsen, Siumut
Inatsisartunut sinniisussaq Emilie Olsen, Atassut

Siullermeerinerup kingorna Inatsisartut Attaveqaqatigiinnermut Ineqarnermullu Ataatsimiititaliaata siunnersuut nassuiaatitaalu misissorpai.

1. Siunnersuutip imarisai taakkununngalu ataatsimiititaliap oqaaseqaatai.

Siunnersuummi immikkoortut pingaarnerit Naalakkersuisut saqqummiussissutaanni siunnersuummullu nalinginnaasumik nassuiaatini nassuiarneqarput.

Sanaqataasarnermik aaqqissuussineq

Nammineerluni illuliornermik aaqqissuussinerup manna tikillugu atuuttup sanaqataasarnermik aaqqissuussinermik, illut ilinniarsimasunik ikiorteqarluni saneqartarnissaannik imaqartumik, taarserneqarnera Ataatsimiititaliamit isumaqatigiittumit pitsaasutut isigineqarpoq.

Sanaqatigiilluni illuliassanut tapiissutinut isertitaqassutsip tunngavigineqalernera ataatsimiititaliamit isumaqatigiittumit pitsaasutut isigineqarpoq. Nammineerluni illuliornermik aaqqissuussineq maanna atuuttoq malillugu – isertitat apeqqutaatinnagit – nammineerluni illuliassamik 1 millioninik nalilimmik 50.000 kr.-inik akilerlugu pissarsisoqarsinnaasimavoq. Taamaalilluni nammineerluni illuliamik pissarsinermi aningaasartuutit INI aqqutigalugu inissiamik marlunnik initalimmik attartornermi aningaasartuutinit ukiut marluinnaat ingerlanerini qaangerneqartarput.

Taamaalillutik nammineerlutik illuliortut aningaasarsiarissaartut, assersuutigalugit sanaartortut, tunisassiorfinni aqutsisut niuernermillu ingerlatsisut pisortanit tapiissutit iluaqutigalugit anaanamit kisimiittumit SIK malillugu isertitaqartumit Nuummi INI-p inissiaataanik najugaqartumit annikinneerarsuarmik ineqarnermut akiliuteqarsinnaasimapput.

Aammattaaq sanaqatigiilluni illulianut, nunatsinni sumiugaluartorluunniit sananeqartunut taarsigassarsisitsisoqarsinnaanissaa tapiissuteqartoqarsinnaanissaalu siunnersuutikkut anguniarneqartoq ataatsimiititaliap paasivaa. Tassa aamma soorlu Nuummi.

Kommunit inissiaataannik attartortittakkanik sanaartornermut Namminersornerullutik Oqartussat tapiissutaat

Kommunit inissiaataannik attartortittakkanik sanaartornermut Namminersornerullutik Oqartussat tapiissutaat pillugit siunnersuummi aalajangersakkat kingunerisaannik Nuup Kommunea kommuninit allanit tamanit ajornerusumik inissinneqarpoq. Tamanna piginneqatigiilluni imaluunniit nammineq pigisatut inissiamik realkreditimit aningaasalersorneqarneqartumik Nuummi najugallit pissarsisinnaanerat nunatsinni kommuninut allanut sanilliullugu ajornannginnerusoq inatsimmut nassuiaatini tunngavilersuutigineqarpoq.

Nunatsinni kommunit sinnerinut sanilliullugu piginneqatigiilluni namminerluunniit pigisatut Nuummi inissiamik realkreditimit aningaasalersorneqarneqartumik innuttaasut ilaasa akissallit nunatsinni innuttaasut ilaannit ajornannginnerusumik pissarsisinnaanerat ilimanarsinnaavoq. Tamannali Nuup Kommuniata (initaarnissamut ukiunik 28-nik utaqqiffiusartoq) inissianik nalinginnaasunik pisariaqartitsineranut annerpaajusumut matussuserneqanngitsumulli allannguutaanngilaq.

Tamanna tunngavigalugu Nuummi kommunit inissiaataannik attartortittakkanik sanaartornermut Namminersornerullutik Oqartussat tapiissutaasa kommunini allani kommunit inissiaataannik attartortittakkanik sanaartornermut Namminersornerullutik Oqartussat tapiissutaannit ikinnerunissaat naammaginaranilu naapertuutinngilaq.

Taamaattumik kommunit tapiissutitigut assigiimmik periarfissaqarnissaasa qulakkeerneqarnissaa siunertaralugu Naalakkersuisut allannguutissatut siunnersuummik saqqummiusseqqullugit ataatsimiititaliamit isumaqatigiittumit kaammattorneqarput.

Taamaattumik kommunit tamarmik assigiimmik tapiiffigineqarnissaminnut qulakkeerniarlugu Ataatsimiititaliap isumaqatigiittup Naalakkersuisut allannguutissatut siunnersuummik saqqummiussinissaat kaammattuutigissavaat.

Akiitsunik isumakkeerineq

Akiitsunik isumakkeerisarnermut malittarisassat maanna atuuttut siunnersuummi ingerlateqqinneqarput.

Taamaalilluni § 39-mi aalajangersarneqarpoq taarsigassarsiallit, ukiuni akileraaruteqarfiusuni kingullerni marlunni akileraaruteqaataasussanik 128.000 kr.-it inorlugit isertitaqarsimasut akiitsunut akilinngitsuukkanut akiitsullu sinnerinut isumakkeerfigineqarnissamik qinnuteqarsinnaasut. Isertitanut killiliussaq taaneqartoq 18-it inorlugit ukiulinnut angerlarsimaffimmi najugaqartunut meeqqamut ataatsimut 4.000-inik qaffanneqarpoq.

Aammattaaq taarsigassarsiat piffissami taarsigassarsiat akilersorneqarfissaasa sinnerani taarsigassarsianut ernialersugaanatillu akilersugassaanngitsunut allanngortitsinissamut § 40 periarfissiivoq. Tassalu kigaatsumik isumakkeerfiginninneq illup nalinganik taarsigassarsisumut tunniunneqariartuaartoq.

Inuit inuiaqatigiinnut akiitsuminnik akiliinissaminnut periarfissaqanngitsut inuiaqatigiinnit immikkut isiginiarneqarnerat pissusissamisoorluinnartutut ataatsimiititaliamit isumaqatigiittumit isigineqarpoq. Tamatumali akiitsunik isumakkeerinikkut pinissaa inuiaqatigiit soqutigisaannut naapertuutinngilaq. Illumi taarsigassarsinikkut pissarsiarineqarsimasoq suli naleqarpoq akiitsut isumakkeernerisigut inuiaqatigiinnik annaaneqartussamik. Illu kingusinnerusukkut tunineqarsinnaasoq paasinarsippat, taarsigassarsisoq akiitsuminik isumakkeerfigineqarsimasoq aningaasanik taarsigassarsisitsisup – tassalu inuiaqatigiit – pissaraluinik pissarsissaaq.

Akiitsunik isumakkeerfigineqarnissamik qinnuteqaatinik naliliinermi qinnuteqartup aningaasaqarnera sulisinnaassuseqarneralu kisiisa pinnagit aammali illu pisoqaassusia niuernikkullu nalinga ilanngullugit eqqarsaatigineqartassasut § 41-mi aalajangersarneqarpoq. Allatut oqaatigalugu: Illu tunineqarsinnaasutut isigineqarpat akiitsunik isumakkeerinissaq ilimagineqarsinnaanngilaq. Niuernikkulli pissutsit allanngorartarput. Illu ullumikkut niuernikkut annikitsuinnarmik nalilik ukiualuit qaangiuppata niuernikkut nalinga annertuseriarujussuarsinnaavoq.

Inuiaqatigiinni ineqarnermut tunngasut ullumikkut annertuumik ajornartorsiorfiupput. Inissaaleqineq suli annertuvoq, pisortallu inissiaataannik aserfallatsaaliinermi kinguaattoorutit minnerpaamik aamma taama annertutigalutik. Ajornartorsiutit taakku aaqqiivigissagutsigit aningaasartuutigisariaqakkagut annertoqaat.

Taamaattumik immitsinnut aperisariaqarpugut inuiaqatigiit pigisaat nalillit tunniussuutiinnartuarnissaannut akissaqarnerluta. Akiitsunut koruuni ataaseq isumakkeerutigigaangatsigu ineqarnermut tunngasuni ajornartorsiutit kinguartitassaanngitsut aaqqiiviginiarnissaannut koruunimik ataatsimik atugassakinnerulertarpugut.

Taamaattumik allannguutissatut siunnersuummik saqqummiusseqqullugit Naalakkersuisut ataatsimiititaliamit kaammattorneqarput, taamaalilluni § 39 aamma 41 malillugit akiitsunik isumakkeerfigineqarnissamut periarfissaq peerneqarluni, akiitsunillu nalikillilerneqartussaanatik taarsigassarsianut erniaqaratillu akilersugassaanngitsunut aammalu illumik allamik piginnittoqalersillugu akilerneqartussanngortussanut allanngortitsinissamut periarfissamik taarserneqarluni.

Taamatut periaaseqarnikkut taarsigassarsialik akiitsunik artukkigaasimasoq akilersuutinik ernianillu akiliissanngilaq – soorlu akiitsunik isumakkeerinermi taamaattoq. Tassa taarsigassarsialik kiassarnermut innaallagissamullu akiliutit eqqaassanngikkaanni ineqarnermut akiliuteqartassanani. Akiitsunilli isumakkeerinerup akerlianik akiitsut piujuassapput, illulu tunineqarpat taakku akilerneqassallutik. Namminersornerullutik Oqartussat illumi qularnaveeqqusiissuteqarmata illu naleqarsimappat Namminersornerullutik Oqartussat aningaasat ilaannik pisassaminnik pissarsissapput.

Tunisinermi pissarsiat akiitsunik matussusiinissamut naammanngippata akiitsut sinneri taarsigassarsiallip akilissavai. Inuit taamatut inissisimasut akiitsuminnik isumakkeerneqarnissaminnut qinnuteqarsinnaasariaqartut Ataatsimiititaliaq isumaqarpoq.

2. Ataatsimiititaliap inassuteqaataa

Ataatsimiititaliap kaammattuutai naapertorlugit Naalakkersuisut allannguutissatut siunnersuummik saqqummiussereerneranni iluserilikkamisut iluseqarluni siunnersuutip akuersissutigineqarnissaa ataatsimiititaliap isumaqatigiittup inassutigaa.

Taama oqaaseqarluni Inatsisartut Attaveqaqatigiinnermut Ineqarnermullu Ataatsimiititaliaata peqqussutissatut siunnersuut aappassaaniigassanngortippaa.

 

	Jørgen Wæver Jørgen Siulittaasup tullia
Emilie Olsen		Esmar Bergstrøm
Marie Fleischer		Ole Thorleifsen