3. august 2007

UKA 2007/44

 

Siunnersuummut oqaaseqaatit


Oqaaseqaatit nalinginnaasut

1. Aallarniut

Peqqussutissatut siunnersuutip inissialiortiternermut tapersiissuteqartarneq pillugu Inatsisartut peqqussutaat nr. 1, 9. april 1992-imeersoq taarsissavaa. Peqqussut atuuttoq atuutilernerminiit tallimariarluni allanngortinneqartarsimavoq, kingullermik 2005-imi allanngortinneqarsimalluni.

Inissiat inissialiortiternermut tapersiissuteqartarneq pillugu Inatsisartut peqqussutaanni atuuttumi pineqartut ulluinnarni amerlanertigut "BSU-mit taarsigassarsilluni illulianik" taaneqartarput, tamatumani peqqussummi atuuttumi kapitali 3 (kommunit inissiaataannut attartortittakkanut tapiissutit), kapitali 4 (akiliutinut tapiissutitalimmik taarsigassarsiarititat) imaluunniit kapitali 5 (nammineq illuliornissamut taarsigassarsiarititat) naapertorlugit inissiamut tapiissuteqartoqarsimanera taarsigassarsititsisoqarsimaneraluunniit apeqqutaatinnagu. Allat inissiat taamaallaat peqqussummi atuuttumi kapitali 4 naapertorlugu taarsigassarsititsivigineqarsimasut ulluinnarni BSU-mit taarsigassarsilluni illuliatut taasarpaat, aammalu inissiat peqqussummi atuuttumi kapitali 2 naapertorlugu taarsigassarsititsivigineqarsimasut kommunip inissiaataannik attartortittakkanik, inissiallu peqqussummi atuuttumi kapitali 5 naapertorlugu taarsigassarsititsivigineqarsimasut nammineq illulianik taaneqartarlutik.

Taamatut taaguutinik paatsiveerusimaartarneq peqqussummi matumani ersarissaaviginiarneqarpoq, tassalu taaguut "BSU-mit taarsigassarsilluni illuliaq", oqaatsip sumut tunnganeranut ulluinnarni paasinnittarnerit assigiinngitsut eqqarsaatigalugit atorneqanngilaq. Tassunga taarsiullugu taaguutit eqqornerusut, tassalu "kommunip inissiaatai attartortittakkat", "kommunip illuutai ataatsimoorussat", "inissiat" aamma "illut sanaqataaffiusut" atorneqarput, tamatumani siunnersuummi kapitalit suut pineqarnersut apeqqutaalluni.

Peqqussutissatut siunnersuut inissialiortiternermut tapersiissuteqartarneq pillugu Inatsisartut peqqussutaannut atuuttumut, kingusinnerusukkut allannguuteqartinneqartarsimasumut naleqqiullugu annertuumik najoqqutassatigut taamatullu piumasarineqartutigut iluarsaanneqarpoq, Naalakkersuisut ineqarnermut anguniagaannut tamakkiisumut naleqquttunngorsarneqarluni.

2. Peqqussutissatut siunnersuutip pingaarnersai

Peqqussutissatut siunnersuummi kapitali 1 siunnersuummi aalajangersakkat malillugit taarsigassarsititsisarnermut tapiissuteqartarnermullu aalajangersakkanik nalinginnaasunik imaqarpoq.

Peqqussutissatut siunnersuummi kapitali 2 kommunit inissiaataannik attartortittakkanik sananissamut kommuninut Naalakkersuisut tapiissuteqarsinnaanerinut maleruagassanik atuuttunik ingerlatitseqqiineruvoq. Tapiissutit annertussusissaannut killissarititaasut ingerlateqqinneqarput.

Peqqussummi kapitali 3-mi nutaatut kommunit illuutaannut ataatsimoorussanut maleruagassanik atuutsitsisoqalissaaq. Kommunit illunik ataatsimoorussanik, illutut sullivittut tamanut ammasumik, assersuutigalugu atisanik errorsiviusinnaasumik, uffarfiusinnaasumik, pikkorissartitsiviusinnaasumik, sannavittut mikinerusutut atorneqarsinnaasunik, inissiiviusinnaasunik allatullu atorneqarsinnaasunik sananissamut tapiiffigineqarnissamik Naalakkersuisunut qinnuteqarsinnaapput. Illut ataatsimoorussat nunaqarfinnut kiisalu illoqarfinnut mikinerusunut, ineqarnikkut pissutsinik nunaqarfinnut naleqqiullugu allaanerungaanngitsunik atugaqarfiusunut atorneqarnissaat eqqarsaatigineqarpoq.

Tamatuma saniatigut peqqussutissatut siunnersuummi kapitali 4 inissianut, Naalakkersuisunit taarsigassarsititsivigineqarsimasunut maleruagassanik imaqarpoq. Maleruagassat siornatigut kapitali 4 malillugu taarsigassarsiatut taagorneqartunut tunngasut annertuumik iluarsaanneqarput. 1990-ikkulli aallartinneranni inissianut kapitali 4 nutaaq malillugu taarsigassarsititsisoqarsimanngilaq, nammineerluni illuliassanut tapiiffigineqarnissaq taarsigassarsisumut aningaasaqarnikkut iluanaarnarnerulersimammat. Taamaattumik aaqqissuussineq, Naalakkersuisut inissianik nutaanik sanaartornissamut taarsigassarsititsisinnaanerannik periarfissiisoq taanna maanna atorunnaarsinneqarpoq.

Kiisalu peqqussutissatut siunnersuummi kapitali 5, illunut sanaqataaffiusunut tunngasoq, maanna nammineerluni illuliassanut aaqqissuussinermut atuuttumut taartigitinneqarpoq. Tassani ilaatigut taarsigassarsisup nammineerluni aningaasaliissutissaasa annertussusissaat pillugu maleruagassanik nutaanik siunnersuuteqartoqarpoq. Peqqussutissatut siunnersuut malillugu sanaqataasussap isertitai nammineerluni aningaasaliissutissaanut apeqqutaatinneqassapput, taamaalilluni sanaqataasussaq isertitaqqortunerusoq sanaqataasussanit isertitakinnerusunit akiliinerusalissalluni.

Tamatuma saniatigut aaqqissuussinerit marluusut taakku assigiinngissutaat annertooq tassaavoq, sanaqataasussap illumik sanaqataaffiusumik sananerminut atatillugu najukkami sanasumit ilitsersorneqarnissamut ikiorneqarnissamullu tapiissutinik qinnuteqarsinnaalernera. Taamaalilluni illuliat iluatsittumik naammassisartut amerlingaatsiarnissaat naatsorsuutigineqarpoq, taamatullu illut sanaqataaffiusussat maannamut naleqqiullugu pilertornerusumik sananeqarsinnaanissaat naatsorsuutigineqarluni.

Ataatsimut isigalugu maleruagassat atuuttut ingerlateqqinneqartussat annertuumik iluarsaanneqarput.

3. Pisortanut aningaasaqarnikkut allaffissornikkullu sunniutissat

Sulisartut nuttarsinnaanerinut taamaalillunilu inuiaqatigiit ineriartornerannut inissaaleqinerup akornutaannginnissaa pingaaruteqarpoq. Naalakkersuisut ineqarneq pillugu anguniakkaminni pissutsit pingasut makku pingaartippaat:

Ineqarneq pillugu anguniakkat siuliani taaneqartut anguneqassappata assigiinngitsunik isertitalinnut innuttasunullu assigiinngitsunut tamanut assigiinngisitaartumik naleqqussakkanik inissianik neqerooruteqartoqarsinnaanngorlugu ineqarnerup ineriartornissaa ilusilersorneqartariaqarpoq. Innuttaasut atugarissaarnerit piginneqatigiilluni inissianik imaluunniit inissianik nammineq pigisanik imminnut pilersorsinnaanerat annertusarneqassaaq. Tamanna inuiaqatigiinni ileqqaakkanik amerlanerulersitsissaaq, pisortat inissiaataannik attartortittakkanik ilaqutariinnut, nammineerlutik inissianik pisinissamut isumalluutissaqanngitsunut pissarsiffiussalluni aammalu inissianut nutaanut aningaasaliinissamut isumalluutissat amerlisinneqarnissaat qulakkeerneqassalluni.

Aammattaaq aningaasaqarnikkut siuariartorfiusuni naammattunik inissaqartitsinissaq qularnaarneqassaaq, taamaalilluni sulisussat nuttarsinnaanerat inissaaleqinermik akimmisaartinneqannginniassammat.

Siunnersuutip Nunap Karsianut aningaasaqarnikkut nammakkiinissaa naatsorsuutigineqanngilaq, peqqussutit siornatigut atuuttuusimasut naapertorlugit taarsigassarsiarititaareersut piffissami taarsigassarsiat suliarineqarnerini akilerneqarnerinilu IST-imut sunniuteqareersimammata.

3.1 Kommunit inissiaataannut attartortittakkanut tapiissutit, siunnersuummi kapitali 2

Naalakkersuisooqatigiit 2007-imiit 2009-mut ukiut pingasut ingerlanerini inissiat 1.000-it sananeqarnissaannik 2006-imi anguniagassatut siunniussaat eqqarsaatigalugu, illoqarfinni anginerusuni, realkredit-imit taarsigassarsinikkut aningaasalersuinissamik periarfissaqarfiusuni kommunit inissiaataannik attartortittakkanik sanaartornernut Naalakkersuisut tapiissuteqartarnerisa salliutinneqannginnerat ingerlaannassaaq.

Tassani pineqarput Qaqortoq, Nuuk, Sisimiut aamma Ilulissat, siunissami annertunertigut illuliortiternernut aningaasalersuineq pillugu Inatsisartut peqqussutaanni aamma piginneqatigiilluni inissiat pillugit Inatsisartut peqqussutaanni maleruagassat malillugit inissialiortiternermik isumaginnittariaqartut. Anguniakkap taassuma 2002-mili kommuninut nalunaarutigineqarsimasup ingerlateqqinneqarnissaa tassani pineqarpoq.

Tassalu aningaasat kommunit inissiaataannut attartortittakkanut Naalakkersuisut atugassaat pingaarnersiuinermi siullerpaatut illoqarfiit sinnerinut tutsinneqartassapput. Siuliani taaneqartoq illoqarfinni anginerusuni sisamani taakkunani inissianut attartortittakkanut aningaasaleeqataanissamut neriorsuuteqartoqartannginnissaanik kinguneqartariaqanngilaq, aammattaaq tak. takussutissiaq 1 matuma kingulianiittoq, tassanilu allassimavoq 2004-mi aamma 2005-imi kommunip inissiaataanik attartortittakkanik 129-nik sananermut tapiissuteqartoqarnissaanik neriorsuuteqartoqarsimasoq, taakkunanngalu inissiat 52-it illoqarfinnut Qaqortumut, Sisimiunut ilulissanullu aningaasaleeqataanissamik neriorsuuteqarfigineqarsimasut.

Takussutissiaq 1: Naalakkersuisut kommunit inissiaataanut attartortittakkanut 2004-mi aamma 2005-imi tapiissutaat

Peqqussutissatut siunnersuummi maleruagassat atuuttut ingerlateqqinneqarput, taamaalilluni kommunit inissiaataannik attartortittakkanik sanaartornermut tapiissutit kommunimut tunniunneqartussat inissiani kommunip sanaassatut kissaatigisaani inigisap annertussusaa kvadratmeterit amerlassusaat tunngavigalugit naatsorsorneqartarlutik.

Taamaalilluni Naalakkersuisut tapiissutissaannut sanaartugassani aalajangersimasuni suliariumannittussarsiuussinerup inernera apeqqutaajunnaarsinneqarpoq. Taamaalilluni kommuni sanatitsisutut suliariumannittussarsiuussinerup kingunitsianngua sanaartugassamik aallartitsisinnaavoq.

Takussutissiaq 2: Kvadratmeterimut tapiissutit

Takussutissiaq 2-mi kommunip ataatsip tapiissutissat qanoq amerlatigisut kommunip inissiaataanik attartortittakkamik sananermini pissarsiarisinnaanerai takutinneqarpoq.

3.2 Inissiamut taarsigassarsianik isumakkeerineq, allanngortitsineq aamma taarsigassarsiat allanik taarserlugit taarsigassarsititsineq, siunnersuummi kapitali 4

Naalakkersuisut inissianut taarsigassarsiarititaasa akilersorneqartarneranni maannamut misilittagaasimasut iluatsitsiviuallaarsimanngillat. Akiitsut akilinngitsuukkat qaffakkiartorujussuarsimapput, pingaartumillu 1986-imiit 1996-imut inissialiortiternermut tapersiissuteqartarneq naapertorlugu inissianik Naalakkersuisunit taarsigassarsititsivigineqarsimasunik piginnittut akiitsui akilinngitsuukkat ataatsimut isigalugu qaffariarujussuarsimapput. Piffissami akiitsut akilinngitsuukkat pileriartuaarsimanerat takussutissiaq 3-mi takuneqarsinnaavoq.

Takussutissiaq 3: 1986-imiit 1996-imut inissiani Naalakkersuisunit taarsigassarsititsiviusimasuni akiitsut akilinngitsuukkat

Aaqqissuussinerit ataqatigiisinneqartut ingerlateqqinneqarnerannut tunngaviusoq pingaarneq, tassalu inissianik Naalakkersuisunit taarsigassarsititsiviusimasunik piginnittut taarsigassarsianik isumakkeerfigineqarnissamut, allanngortitsinissamut imaluunniit taarsigassarsiat allanik taarserlugit taarsigassarsinissamut qinnuteqarnissamut periarfissaqartinneqarnerat, inissianut taarsigassarsianik akilersuisarnermi misilittagaasunik siuliani taaneqartunik tunngaveqartutut isigineqassaaq.

1998-imi akiitsut akilinngitsuukkat amerleriarujussuarneri tunngavigalugit inissiani Naalakkersuisunit taarsigassarsititsiviusimasuni taarsigassarsisimasut tamarmik, isertitat annertussusaat apeqqutaatinnagu akiitsunik akilinngitsuugaasimasinnaasunik taarsigassarsiatut nutaatut allanngortitsinissamut periarfissinneqarput. Taarsigassarsiat allanik taarserlugit taarsigassarsinermi akiitsut sinneri piffissamilu aalajangersimasumi akiliutissat akilinngitsuukkat ilaatinneqarput, tassunga taarsigassarsiatoqaasunut pillaammik ernialiussat, akitsuutit il.il. ilaatinneqarlutik.

Taarsigassarsisimasorpassuit taarsigassarsiatik allanik taarserlugit taarsigassarsinissaminnut periarfissaq atorsimagaluaraat, tamatuma iluaqutaanera killeqarsimavoq. Akiitsut akilinngitsuukkat taarsigassarsiat allanik taarserlugit taarsigassarsinerit kinguneriisaannik soorunami apparput, kisiannili taarsigassarsiallit aningaasaqarnerat allannguuteqanngilaq, aammalu inunnut ataasiakkaanut iliuusissatut pilersaarutinik, taarsigassarsialik akilinngitsuukkaminik akiitsoqaqqilerpat atuutilersussamik suliaqartoqarani.

2001-imi upernaakkut ataatsimiinnermi aammalu 2004-mi ukiakkut ataatsimiinnermi pissutsit, inissianik Naalakkersuisunit taarsigassarsititsivigineqarsimasunik piginnittut atugaat oqaluuserineqarput, tassanilu Inatsisartut aaqqiissutissatut siunnersuummik, ilaqutariinni aningaasakillionerpaani inissianut taarsigassarsiat ilaqutariit aningaasaqarnikkut piginnaasaannut naleqqussaanissamut iluaqutaasussamik suliaqartoqarnissaa akuersissutigaat.

Kiisalu Inatsisartut Kukkunersiuinermut Ataatsimiititaliaat, Inatsisartut Aningaasaqarnermut Ataatsimiititaliaat Inatsisartullu Attaveqaqatigiinnermut Ineqarnermullu Ataatsimiititaliaat ineqarnermi akiitsut akilinngitsuukkat ajornartorsiutigineqarnerisa piaartumik aaqqiiffigineqarnissaannik Naalakkersuisunut inassuteqarput innersuussillutillu.

Peqqussutissatut siunnersuut manna misilittakkanik siuliani taaneqartunik aammalu taarsigassarsiallit inigisaminnut Naalakkersuisunut akiitsullit tamatumalu peqatigisaanik akilersuutiminnik kinguaattooruteqarsimasut maannamut periarfissaannik tunngaveqarpoq. Peqqussutissatut siunnersuummi inissianik piginnittunut periarfissat assigiinngitsut pingasut siunnerfigineqarput:

Inissianik Naalakkersuisunit taarsigassarsiaqarfiusunik pigisaqartut, ukiuni akileraaruteqarfiusuni kingullerni marlunni inoqutigiinni 128.000 koruunit inorlugit akileraaruteqaataasussanik isertitaqartarsimasut, akiliutit akiligassanngortinneqartut akiitsullu sinnerisa isumakkeerinniffigineqarnissaannik qinnuteqarsinnaapput.

Inissianik Naalakkersuisunit taarsigassarsititsivigineqarsimasunik piginnittut, ukiuni akileraaruteqarfiusuni marlunni kingullerni inoqutigiinni ukiumut 180.000 koruunit inorlugit akileraaruteqaataasussanik isertitaqarsimasut akiliutit akiligassanngortinneqarsimasut akiitsullu sinnerisa taarsigassarsiatut erniaqanngitsutut akilersugassaanngitsutullu allanngortinneqarnissaannik, tamatumalu kingorna piffissap taarsersuiffiusup sinneruttup ingerlanerani nalikillisikkiartuaartinneqarnissaannik qinnuteqarsinnaapput.

Inissiamik piginnittup assersuutigalugu akiitsui 300.000 koruuninik sinneqarpata, piffissallu akilersuiffiusussap sinnera ukiunik aqqaneq marlunnik sivisussuseqarpat, taarsigassarsiat ukiuni tulliuttuni aqqaneq marlunni ukiumut 25.000 koruuninik nalikillilerneqartassapput, tamatumalu kingorna akiitsut 0 koruuninngussallutik.

Periarfissat pingajuat taarsigassarsialinnut, ukiuni akileraaruteqarfiusuni marlunni kingullerni inoqutigiinni ukiumut 180.000 koruuninik amerlanerusunilluunniit akileraaruteqaataasussanik isertitaqartarsimasunut tunngatinneqarpoq. Taakku taarsigassarsiamik allanik taarserneqarlutik taarsigassarsitinneqarnissaminnik qinnuteqarsinnaapput, taamaalillunilu nutaatut akilersuinermi nammagassat taarsigassarsianillu akilersuinissaq aningaasaqarnermut maannakkut atugaannut naleqqussarneqartalissaaq.

Peqqussutissatut siunnersuutip akuerineqarneratigut inissianik piginnittut taarsigassarsiallillu aningaasakilliortut periarfissaat takussutissiaq 4-mi nassuiarneqartutut isikkoqalissapput:

Takussutissiaq 4: Taarsigassarsianik isumakkeerineq, allanngortitsineq imaluunniit taarsigassarsiat allanik taarserlugit taarsigassarsineq

Inoqutigiinni ukiumut isertitat akileraaruteqaataasussat

Taarsigassarsialimmut aaqqiissutissatut periarfissaq
128.000 koruunit tikillugit Taarsigassarsialik akiligassanik akiligassanngortinneqartunik akiitsullu sinnerinik tamakkiisumik isumakkeerfigineqarnissamik qinnuteqarsinnaavoq.
180.000 koruunit inorlugit Taarsigassarsialik akiliutinik akiligassanngortinneqartunik akiitsullu sinnerinik taarsigassarsianut erniaqanngitsunut akilersugassaanngitsunullu, piffissap taarsersuiffiusup sinnerata ingerlanerani nalikillisikkiartuaarneqartussanut allanngortitsinissamik qinnuteqarsinnaavoq.
180.000 koruunit amerlanerusulluunniit Taarsigassarsialik akiliutit akiligassanngortinneqartut akiitsullu sinneri allanik taarserlugit taarsigassarsiatut nutaatut, taarsigassarsiallit ataasiakkaat taarsigassarsianik ernialersuisinnaanerannut akilersuutinullu akilersuisinnaassusiannut naleqqussarneqartumik taarsigassarsitinneqarnissamik qinnuteqarsinnaavoq.

Naalakkersuisut ineqarnermut taarsigassarsianit pisassaat tamakkiisut 2005-ip naanerani 754 millioner koruuninik amerlassuseqarput, taakkunanngalu 130 millioner koruunit missaat, tassalu Naalakkersuisut ineqarnermut taarsigassarsianit pisassaasa tamakkiisut 17 procenterpiaat akiitsunut akilinngitsuukkanut tunngasuupput. Akiitsut akilinngitsuukkat annilaarnartumik qaffasittutut isikkoqaraluartut, akiitsut akilinngitsuukkat 1996-imi 100 millioner koruuninik amerlassuseqareersimammata eqqaamaneqassaaq.

Akiitsut akilinngitsuukkat amerlanersaasa akilerneqarsinnaannginnerat qularnanngilaq, tamannalu taarsigassarsiallit ataasiakkaat akiliisinnaassuseqannginnerannik peqquteqarpoq. Tamanna taarsigassarsialinnut pingaartumillu inuiaqatigiinnut ajornartorsiutaavoq.

Naatsorsukkat 2002-meersut takutippaat, taarsigassarsialinnit 23 procentit sinnilaarlugit ukiumut inoqutigiinni akileraaruteqaataasussanik 128.000 koruunit inorlugit isertitaqartartut, kiisalu 38 procentingajaat ukiumut inoqutigiinni akileraaruteqaataasussanik 180.000 koruunit inorlugit isertitaqartartut, kiisalu 62 procentit sinnilaarlugit ukiumut inoqutigiinni akileraaruteqaataasussanik 280.000 koruunit inorlugit isertitaqartartut.

Naatsorsukkat 2002-meersut aningaasaqarnermik suliassaqarfimmi akiliisinnaassutsimik naliliisarnermut tunngaviusunut nalinginnaasunut sanilliukkaanni, taarsigassarsiallit 62 procentii sinnerlugit niuernermut piumasaqaatit nalinginnaasut tunngavigalugit taarsigassarsisinnaassanngikkaluarput, isertitatik tunngavigalugit ineqarnermut taarsigassarsianut erniat akilersuutillu akilersorsinnaanaviannginnamikkit. Taamaalilluni taarsigassarsialinnit taamaallaat 38 procentit niuernermut piumasaqaatit nalinginnaasut tunngavigalugit taarsigassarsisinnaassagaluarput.

Takussutissiaq 5: 2003-miit 31. december 2006-imut ineqarnermut taarsigassarsianik isumakkeerinerit allangortitsinerillu amerlassusaat

Takussutissiaq 5-imi takuneqarsinnaasutut Naalakkersuisut 2003-p aallartinneraniit 31. december 2006-imut akiitsunik katillugit 141,1 millioner koruuninik naleqartunik isumakkeerinissamut allanngortitsinissamulluunniit taarsigassarsialinnut 721-nut akuersissuteqarsimapput.

3.3 Illuliassat sanaqataaffiusut nammineerluni illuliassanut taartigineqarnissaat, siunnersuummi kapitali 5

Matuma kinguliani takussutissiaq 6-imi takuneqarsinnaasutut 1990-imiit 2003-mut nammineerluni illuliassanut taarsigassarsinissamut qinnuteqartut 1.118-it Naalakkersuisut akuerisimavaat. Nammineerluni illuliassanit piffissami tassani tunniunneqartunit 191-it, imaluunniit 17 procenterpiaat 1. marts 2004-mi suli sananeqarsimanngillat.

Tamatumunnga tunngatillugu oqaatigineqassaaq, 2003-imi Inatsisartut aningaasanut inatsisaata kingusissukkut akuerineqarnera peqqutigalugu 2003-mi nammineerluni illuliassanik tunniussisoqarsimanngimmat. Taamaattumik 1990-imiit 2002-mut nammineerluni illuliassat tunniunneqartut sanaartorneqartullu matumani pineqartut eqqorneruvoq.

Nammineerluni illuliassat agguaqatigiissillugu 550.000 koruuninik naleqartarmata, nammineerluni illuliassat sananeqanngitsut 191-it nalingisa katinnerat 105 millioner koruuniuvoq.

Takussutissiaq 6: 1990 – 2003-imi nammineerluni illuliat

Oqaaseqaatit: Naatsorsukkat 1. marts 2004-meersuupput.

Naalakkersuisut kisitsisit siuliani taaneqartut tunngavigalugit A/S Inissiaatileqatigiiffik INI suleqatigalugu suliniummik immikkut aallartitaqarput, tamatumanilu siunertaavoq nammineerluni illuliassat sananeqanngitsut siunissami ikilisinneqarnissaat.

Suliniuteqarnerup kingunerisaanik 2004-mi Panbo Huse A/S suleqatigalugu Kullorsuarmi illuliassat sanaqataaffiusut tallimat misiligutaasumik sananeqarlutik aallartinneqarput.

2005-imi aamma illut sanaqataaffiusut Kullorsuarmi sisamat, Nuussuarmi arfinillit, sermiligaami tallimat aamma Tiniteqilaami tallimat sananeqarput. Tamaginni Panbo Huse A/S suleqatigineqarpoq. Illut sanaqataaffiusut 25-t taakku pilertortumik sanaartorneqarput, tamatumalu kingorna ilaqutariit iserterlutik.

2004-mi aamma 2005-imi tamakkiisumik naliliinerup takutippaa, illut sanaqataaffiusut sananeqartussanngoraangata taarsigassarsiallit sanaqataasunik ikiorserneqarnissaat aamma ilitsersuisartunit ikiorserneqarnissaat pingaaruteqartoq.

Tunumi 2005-imi sanaqataasut takutitsilluarnerpaapput, tassalu illup toqqavissaa illutassaalu ullut sisamaannaat atorlugit napparpaat. Tamatuma kingorna atortussat sialummut, anorimut, nittaallanut apummullu illersorniarlugit illussamut matoriikkamut eqqussuunneqarsinnaalerput, sanataqataasullu illu inaarsarlugu aallartissinnaalerpaat.

Nunap karsiata illuliassanut sanaqataaffiusunut aningaasartuutissaat Nunap karsiata nammineerluni illuliassanut aningaasartuutaanit qaffasinnerunissaat naatsorsuutigineqarpoq, sanaqataasunik ikiorteqarnermut ilitsersorneqartarnermullu aningaasartuutissat qaffannerat peqqutigalugu. Inatsisartut ukiumoortumik aningaasanut inatsisaanni aningaasaliissutissat 2007-imi allannguuteqartinneqannginnissaat siunnerfigineqassappat, naliliineq malillugu illut sanaqataaffiusut aningaasaliiffigineqartut amerlassusaasa appariaateqarnerinik tamanna kinguneqassaaq, tamannalu Naalakkersuisut sanaqataasussanut taarsigassarsiarititaasa isertitat apeqqutaatillugit assigiinngisitaartumik annertussusilerneqartalernerisigut aaqqiivigineqarsinnaassagunarpoq. Kiisalu illut sanaqataaffiusut naammassineqartartut amerlanerulerpata isumalluutinik atorluaanerup pitsaanerulernissaa naatsorsuutigineqarpoq.

Taarsigassarsititsisarnermi aaqqissuussineq, taarsigassarsiallit ataasiakkaat pisariaqartitaannut annertunerusumik naleqqussagaasoq siuarsarniarlugu, sanaqataaffiusunik illuliortiternermik aaqqissuussinermut Naalakkersuisut taarsigassarsiaritittagaannut isertitat apeqqutaatinneqartalerput.

Takussutissiaq 7-imi taarsigassarsinissamik qinnuteqartup ukiumut isertitai Naalakkersuisut taarsigassarsiarititassaannut taarsigassarsinissamillu qinnuteqartup nammineerluni akiligassaanut qanoq sunniuteqartassanersut procentinngorlugu takutinneqarpoq.

Takussutissiaq 7: Taarsigassarsinissamik qinnuteqartup isertitai, Naalakkersuisut taarsigassarsiarititassaat aamma taarsigassarsinissamik qinnuteqartup aningaasalersuinissamut nammineerluni akiligassai

Sanaqataasarnermik aaqqissuussineq siunnersuutigineqartoq taarsigassarsiallip illuliortiternernut aningaasalersuisarneq pillugu Inatsisartut peqqussutaanni maleruagassat malillugit inissianik sanaartornermut aningaasalersuinissamut periarfissaqarnera peqatigalugu ingerlasussaavoq, taamaattumillu isertitanut agguataarisarnissap siuliani siunnersuutigineqartup kingunerisaanik, inuit 345.000 koruunit sinnerlugit ukiumut isertitaqartartut sanaqataasarnermik aaqqissuussinermik atuinnginnissaat naatsorsuutigineqarpoq.

Qinnuteqartoq ukiumut 345.000 koruunit sinnerlugit isertitaqarsimaguni, sanaqataasarnermik aaqqissuussineq malillugu 35%-inik erniaqanngitsunik akilersugassaanngitsunillu, ukiuni 33-ni nalikillisikkiartuaarneqartussanik taarsigassarsitinneqassaaq, akerlianillu illuliortiternernut aningaasalersuisarnermut aaqqissuussineq malillugu qinnuteqartoq pisortanit 40 procentinik taarsigassarsitinneqarsinnaassalluni. Taarsigassarsiat illuliortiternernut aningaasalersuisarneq pillugu Inatsisartut peqqussutaat atuuttoq naapertorlugu ukiuni 20-ni erniaqartinneqanngillat akilersugassaanatillu, tamatumalu kingorna taarsigassarsiat ernialersorneqalissapput ukiunilu 15-ini angeqqatigiinnik aningaasartalerlugit akilersorneqartussaallutik.

3.4 Ineqarnermut Attaveqarnermullu Pisortaqarfik aamma A/S Inissiaatileqatigiiffik INI

Peqqussutissatut siunnersuutip atuutsinneqalernera Ineqarnermut Attaveqarnermullu Pisortaqarfimmi aamma A/S Inissiaatileqatigiiffik INI-imi allaffissornikkut oqiliallaataangaatsiartussatut nalilerneqarpoq, taamatullu siunissami akiliutinik akiligassanngortinneqartunik akiliisitsiniartarnerup allaffissornikkut suliariuminarnerulernissaa naatsorsuutigineqarluni.

2001-imi ukiakkut A/S Inissiaatileqatigiiffik INI-p 2000-imi piffissani akiliiffissani akiligassiissutigineqartut naatsorsuiffigai. Naatsorsuinermi paasineqarpoq

2002-mi paasissutissat pissarsiarineqartut tunngavigalugit imatut takussutissiortoqarsinnaavoq:

2004-mi decembarimi A/S Inissiaatileqatigiiffik INI Ineqarnermut Attaveqarnermullu Pisortaqarfimmut paasissutissiivoq, inissianik piginnittut Naalakkersuisunut taarsigassarsiaqartut 1.880-it taarsigassarsiaminnik sumiginnaasimasut, tamatumalu kingunerisaanik taarsigassarsiallit 1.880-it taarsigassarsiaat tamakkerlutik akiligassanngortinneqarsimasut. Taarsigassarsiallit tamarmik pingajorarterutaat akilinngitsuukkaminnik akiitsoqarnerat imminermini toqqissisimananngilaq. Tamannalu aamma allaffissornikkut toqqissisimanartuunani.

2004-mi ukiakkut ataatsimiinnermi Nunap Karsiata 2003-mut naatsorsuutaasa imm. 11-tut suliarineqartut aappassaanneerneqarnerannut Naalakkersuisut akissuteqaamminni oqaatigisaattut, akiliutinik akiligassanngortitanik akiitsullu sinnerinik pinngitsaaliilluni akiliisitsiniarneq avissaartuuffiusunik nassataqarpoq.

Ilaqutariinik inissiamit Naalakkersuisunit taarsigassarsititsivigineqarsimasumit anisitsinermi inisseeqqinnissamik pisussaaffiliisumik malittarisassiuussisoqarsimanngikkaluartoq, Kalaallit Nunaanni Politimesteri Kalaallit Nunaanni eqqartuussisaaseq pillugu inatsimmi kap. 7-imi § 18-imi aalajangersagaq malillugu aalajangersimasumik suleriaaseqalersimavoq, taannalu malillugu "Eqqartuussummik naammassisitsiniaasartup anisitsinissamik piumasaqaat itigartissinnaavaa, akiitsulik imaluunniit akiitsullip inoqutai tamatumuunakkut inissaarutissappata, aammalu pissutsit allat suliap naammassinissaanut akerliuppata". Politimesterip suleriaasia Inatsisinik atuutsitsinermut ministeriaqarfimmit akuerisaavoq, tamannalu kingullermik allakkatigut 19. december 2003-meersutigut nalunaarutigineqarpoq.

Nunaqarfinni arlaqartuni illoqarfinnilu ataasiakkaani inisseeqqinnissamut periarfissaqanngilaq. Ajornerpaamik pisoqartillugu tamatuma nassatarisaanik taarsigassarsialik akilinngitsuukkaminik akiitsoqarnini peqqutigalugu inissiamut anisitaaffigisaminut inisseqqinneqartariaqartarpoq. Tamanna akiliisitsiniartarnermut anguniakkamik nukillaarsaataavoq, tamatumalu peqatigisaanik taarsigassarsialinnut pisussaaffimminnik naammassinnittartunut mamiatsannartutut sunniuteqarsinnaalluni.

Matuma kinguliani takussutissiami akilinngitsuukkanik akiitsullit amerlassusaat aammalu peqqussummi atuuttumi kapitali 4 naapertorlugu ineqarnermut taarsigassarsianut akiitsut akilinngitsuukkat tamakkiisut takussutissiorneqarput, tassanilu peqqussummi atuuttumi kapitali 5 naapertorlugu nammineerluni illuliassanut taarsigassarsisimasut ilaatinneqanngillat. Tamatuma peqatigisaanik taarsigassarsialinnit qanoq amerlatigisut eqqartuussivitsigut akiliisinniarneqartut takuneqarsinnaapput.

Takussutissiaq 8: Kapitali 4 naapertorlugu taarsigassarsianut akilinngitsuukkanik akiitsullit aamma eqqartuussivitsigut akiliisinniarneqartut amerlassusaat

Illoqarfik / Nunaqarfik

Taars. akilinngitsuukkanik akiitsullit

Akiitsut akilinngitsuukkat 1.000 kr.-inngorlugit

Eqqartuussivinnut suliakkiissutigineqartut
Nanortalik

107

5.175

34
Aappilattoq

15

1.247

9
Narsarmijit

6

529

3
Tasiusaq

3

181

2
Ammassivik

4

158

3
Alluitsup Paa

35

2.043

20
Qaqortoq

50

2.324

7
Saarloq

5

339

3
Eqalugaarsuit

5

153

0
Qassimiut

2

146

0
Narsaq

82

3.875

35
Upernaviarsuk

1

9

0
Igaliku

3

97

1
Qassiarsuk

7

408

3
Paamiut

42

1.013

3
Arsuk

22

1.419

6
Nuuk

26

1.250

10
Qeqertarsuatsiaat

18

605

8
Kapisillit

0

0

0
Maniitsoq

40

1.498

13
Atammik

8

820

2
Napasoq

9

717

4
Kangaamiut

6

914

7
Sisimiut

100

4.038

21
Itilleq

8

355

2
Sarfannguaq

1

6

0
Kangerlussuaq

2

29

0
Kangaatsiaq

44

2.810

13
Iginniarfik

1

1

0
Ikerasaarsuk

2

365

0
Attu

12

916

4
Niaqornaarsuk

7

226

4
Aasiaat

102

3.493

26
Kitsissuarsuit

4

14

0
Attu

5

108

1
Qasigiannguit

65

1.261

21
Ikamiut

6

56

1
Ilulissat

93

1.331

5
Saqqaq

11

70

0
Ilimanaq

2

32

0
Qeqertarsuaq

85

2.594

15
Kangerluk

2

208

2
Uummannaq

142

8.055

38
Niaqornat

2

8

1
Qaarsut

4

48

2
Ikerasak

19

558

7
Saattut

9

418

5
Ukkusissat

13

968

3
Illorsuit

3

50

0
Nuugaatsiaq

1

13

0
Upernavik

129

4.935

21
Upernavik Kuj.

7

265

1
Kangersuatsiaq

8

734

2
Aappilattoq

6

354

3
Tasiusaq

10

353

2
Nuussuaq

5

39

0
Kullorsuaq

8

63

1
Naajaat

2

10

0
Innaarsuit

10

332

2
Qaanaaq

49

3.276

7
Savissivik

2

18

0
Siorapaluk

2

18

0
Moriusaq

3

310

0
Qeqertat

0

0

0
Tasiilaq

79

2.321

13
Sermiligaaq

10

721

2
Isortoq

2

81

0
Kulusuk

16

671

3
Tiniteqilaaq

9

436

0
Kuummiut

22

1.404

3
Ittoqqortoormiit

37

2.573

23
Ittaajimmiit

3

191

3
Katillugit

1.660

72.056

430

Tassani taarsigassarsiat 1.660-it, katillugit 51 mio. koruunit sinnilaarlugit akilinngitsuukkanik akiitsoqarfiusut pineqarput.

Peqqussutissatut siunnersuut pissutsit nassuiarneqartut saniatigut pisortanut aningaasaqarnikkut allaffissornikkullu sunniuteqartussatut naatsorsuutigineqanngilaq.

4. Inuussutissarsiornermut aningaasaqarnikkut allaffissornikkullu sunniutissat

Peqqussutissatut siunnersuut illuliassat sanaqataaffiusut sanaartorneqarnerinut atatillugu ilinniarsimasunik sulisussarsiornerup annertusinissaata naatsorsuutigineqarnerata saniatigut inuussutissarsiornermut aningaasaqarnikkut allaffissornikkullu sunniuteqarnissaa naatsorsuutigineqanngilaq.

5. Innuttaasunut aningaasaqarnikkut allaffissornikkullu sunniutissat

Peqqussutissatut siunnersuut sanaqataasunut, ukiumut akileraaruteqaataasussanik 180.000 koruunit sinnerlugit isertitaqartartunut aningaasaqarnikkut sunniuteqarnissaa naatsorsuutigineqarpoq, peqqussutissatut siunnersuut malillugu taarsigassarsiarititassanut inoqutigiit ukiumut isertitaat akileraaruteqaataasussat apeqqutaasartussaammata.

Peqqussutissatut siunnersuutip innuttaasunut allaffissornikkut sunniuteqarnissaa naatsorsuutigineqanngilaq.

6. Avatangiisinut pinngortitamullu sunniutissat

Peqqussutissatut siunnersuut avatangiisinut pinngortitamulluunniit sunniuteqartussatut naliliiffigineqanngilaq.

7. Sunniutaasinnaasut allat annertuut

Peqqussutissatut siunnersuut sunniutissanik allanik annertuunik nassataqartussatut naliliiffigineqanngilaq.

8. Pissutsit Naalagaaffeqatigiinnermut namminersulernissamullu tunngasut

Peqqussutissatut siunnersuut Naalagaaffeqatigiinnermut imaluunniit namminersulerniarluni sulianut sunniuteqartussatut naliliiffigineqanngilaq.

9. Oqartussaasunut kattuffinnullu il.il. tusarniaaneq

Peqqussutissatut siunnersuummut missingiuut Aningaasaqarnermut Pisortaqarfimmut, Akileraartarnermut Pisortaqarfimmut, Inuussutissarsiornermut Pisortaqarfimmut, A/S Inissiaatileqatigiiffik INI-mut, Iserit A/S-imut, KANUKOKA-mut, KANUNUPE-mut aamma SIK-mut tusarniaassutigineqarpoq.

Aningaasaqarnermut Pisortaqarfik, Akileraartarnermut Pisortaqarfik, Inuussutissarsiornermut Pisortaqarfik, A/S Inissiaatileqatigiiffik INI aamma KANUKOKA tusarniaanermi akissuteqarput.

Teknikkikkut kukkunerit, kiisalu oqaatsitigut kukkunerit amigaatillu, tusarniaaffigineqartut maluginiaqqusaat iluarsineqarput. Taakkununnga tunngatillugu sukumiinerusumik nassuiaateqarnissaq pisariaqanngilaq.

Kisiannili missingiuutip najoqqutassartamigut imaanut tunngatillugu tusarniaaffigineqartut eqqumaffigeqqusaat matuma kinguliani pingaarnersiorlugit issuarneqarput oqaaseqarfigineqarlutillu. Siunnersuutip tulleriaarneqarnera malillugu tusarniaanermi akissutit oqaaseqarfigineqarnissaat Ineqarnermut Attaveqarnermullu Pisortaqarfimmiit naleqqunnerpaatut isumaqarfigineqarpoq.

Siunnersuut ataatsimut isigalugu

A/S Inissiaatileqatigiiffik INI-mit "BSU-mit taarsigassarsilluni illuliaq" qanoq isumaqarnersoq ersernerluttutut isumaqarfigineqarpoq. Oqaaseqaatini nalinginnaasuni imm. 1-ip ataani tamanna nassuiaateqarfigineqarpoq.

Siunnersuummi § 1-imut

A/S Inissiaatileqatigiiffik INI isumaqarpoq, illunik sanaqataaffiusunik alliliisarnissaq aalajangersakkamut ilaatinneqartariaqartoq. Ineqarnermut Attaveqarnermullu Naalakkersuisoqarfiup illunik sanaqataaffiusunik alliliinissamut taarsigassarsititsisarnissaq kissaatiginngilaa, taamaattumillu aalajangersakkap oqaasertaliornera allanngortinneqanngilaq.

Siunnersuummi § 6-imut (siunnersuummi tusarniaassutigineqartumi § 4)

A/S Inissiaatileqatigiiffik INI-miit aalajangersakkamut "Naalakkersuisut allamik aalajangiisimatinnagit" ilanngunneqarnissaa kissaatigineqarpoq. Ineqarnermut Attaveqarnermullu Naalakkersuisoqarfik oqaasertassatut toqqarneqareersup allanngortinneqannginnissaanik aalajangiivoq, aalajangersakkakkut sanaartornerup aallartinnginnerani peqqussutissatut siunnersuut manna malillugu Naalakkersuisut taarsigassarsititsissanersut tapiissuteqassanersulluunniit pillugu Naalakkersuisut suliaqarnerisa aalajangiinissaasalu naammassineqartarnissaa qulakkeerneqartussaammat.

Siunnersuummi §§ 13, imm. 3-mut aamma 14, imm. 1, nr. 1-imut (siunnersuummi tusarniaassutigineqartumi §§ 10, imm. 3 aamma 11, imm. 1, nr. 1)

A/S Inissiaatileqatigiiffik INI-miit Naalakkersuisut qinnuigineqarput, inigisap annertussusissaasa minnerpaaffissaasa annertusineqarnissaat, taamaalillunilu inissiat ullutsinnut naleqqunnerusumik atorneqarnissaasa qulakkeerneqarnissaa eqqarsaatigeqqullugu. Assersuutigalugu inissiap minnerpaaffissaa 20 kvadratmeterimut aalajangernagu 25 kvadratmeterimut aalajangerneqartariaqarpoq. Ineqarnermut Attaveqarnermullu Naalakkersuisoqarfimmiit annertussusissanut killiliussaareersut attatiinnarnissaat aalajangiusimaannarneqarpoq. Kommunit ilinniartunut inissianik, pisarneq malillugu mikisunnguusartunik sanaartornissamut tapiiffigineqarnissamik periarfissaqarnissaat tamatumunnga tunngavigineqarpoq. Ilinniartunut inissiani ini ataasiinnaasarpoq, taamaattullu initut mikisumik igaffittalittut, immaqalu aamma sinittarfittut atorneqartarput, taakkulu saniatigut inissiaq uffarfeqartarpoq.

Siunnersuummi § 20-mut (siunnersuummi tusarniaassutigineqartumi § 16, imm. 2)

KANUKOKA isumaqarpoq, pilersaarusiorneq tapiissutinut ilaanersoq erseqqissarneqartariaqartoq. Aalajangersagaq allanngortinneqarpoq, taamaalillunilu suut tapiissutinut ilaanersut erseqqissumik allassimalerpoq. Illut qanoq ittut kommunit illuutaattut ataatsimoorussatut tapiiffigineqartassanersut pillugit Naalakkersuisut maleruagassiorsinnaareermata, pilersaarusiornissaq pisariaaruttussaavoq.

Siunnersuummi § 29-mut (siunnersuummi tusarniaassutigineqartumi § 25)

KANUKOKA isumaqarpoq, erniat ukiut ataasiakkaarlugit iluarsineqartarnissaat naleqqunnerpaassasoq. Naalakkersuisut taarsigassarsiat aalajangersimasumik erniaqartinneqarnissaat kissaatigaat, taamaattumillu aalajangersakkap oqaasertai allanngortinneqanngillat.

Siunnersuummi § 31-mut (siunnersuummi tusarniaassutigineqartumi § 27)

A/S Inissiaatileqatigiiffik INI-mit uparuarneqarpoq, Kalaallit Nunaanni eqqartuussisaaseq pillugu inatsimmi akiliisitsiniartartut akileeqqusissutinut akitsuutinik akiliisitsiniarnissamut erseqqissumik tunngavissinneqarsimanngitsut, taamaattumillu siunnersuutigineqarpoq aalajangersakkami oqaaseqaatigiinnilu akiliisitsiniartartut akileeqqusissutinut akitsuutinik akiliisitsiniarsinnaanerat erseqqissarneqassasoq. Aalajangersagaq imm. 2-mik ilaneqarpoq, tassanilu akileeqqusissutinut akitsuutit akiligassatut taarsigassarsianut ilaasutut isigineqartussaasut allassimavoq. Aalajangersakkamut oqaaseqaatini taassuma atuutilernera ilaatigut akileeqqusissutinut akitsuutit akiitsunut akilinngitsuukkanut ilanngullugu akiliisitsiniartartunit akilersinneqartussaanera nassuiarneqarpoq.

Siunnersuummi tusarniaassutigineqartumi § 28

A/S Inissiaatileqatigiiffiup najugaqartussaatitaanerup maannamit allaanerusumik nassuiarneqarnissaa pisariaqartutut isigaa, taarsigassarsiallit ilaat piffissap ilaani suliffissaqarumallutik sumiiffimmi allami najugaqarnissartik toqqartarmassuk. Siunnersuummi tusarniaassutigineqartumi § 28-mi najugaqartussaatitaaneq peerneqarpoq. Tassunga taarsiullugu siunnersuummi § 35-mi nr. 6-imi maleruagassamik ilanngussisoqarpoq, taannalu malillugu Naalakkersuisunit taarsigassarsiarititat taarsigassarsiallip Naalakkersuisunit akuerineqaqqaarani inissiamit nuunnerani imaluunniit inissiamik allamut attartortitsinerani akiligassanngortinneqartassapput. Oqaaseqaatini taarsigassarsiallip inissiamit nuunnerani allamulluunniit attartortitsinerani Naalakkersuisut qaqugukkut akuersissuteqartarnissaat nassuiarneqarpoq.

Siunnersuummi § 38-mut (siunnersuummi tusarniaassutigineqartumi § 34)

A/S Inissiaatileqatigiiffik INI isumaqarpoq, Naalakkersuisut inissiamik inisseeqqiffissatut atuisarnissamut inatsisitigut tunngavissaqartariaqartut. Tamanna tunngavigalugu aalajangersagaq allanngortinneqarpoq.

A/S Inissiaatileqatigiiffik INI-mit Naalakkersuisut qinnuigineqarput, illuliortiternernut aningaasalersuisarneq pillugu Inatsisartut peqqussutaanni maleruagassanik atuinikkut Naalakkersuisut inissiamik tunisisassanersut eqqarsaatigeqqullugu. Naalakkersuisuniit tamanna soqutigineqanngilaq, illuliortiternernut aningaasalersuisarneq pillugu Inatsisartut peqqussutaat naapertorlugu taarsigassarsititsisarnissaq, tamatumalu peqatigisaanik peqqussut manna naapertorlugu taarsigassarsititsisarnissaq Naalakkersuisut kissaatiginngimmassuk.

KANUKOKA isumaqarpoq, inissiaq siunertaasumut atorneqaannarsinnaajunnaartillugu isaterneqartassasoq, tak. nunaminertanik atuinissamut inatsit. Ineqarnermut Attaveqarnermullu Naalakkersuisoqarfik isumaqanngilaq, siunnersuummi § 38, imm. 3 nunaminertanik atuinissamut inatsimmut naapertuutinngitsoq.

Siunnersuummi § 45-mut (siunnersuummi tusarniaassutigineqartumi § 41)

KANUKOKA isumaqarpoq, tapiissuteqartarnermi aningaasassarititaasut 100.000 koruuniniit minnerpaamik marloriaammut, soorlu 250.000 koruuninut qaffanneqartariaqartut. Ineqarnermut Attaveqarnermullu Naalakkersuisoqarfik tamatumunnga isumaqataanngilaq. Tassani tapiissutit pineqarput, taarsigassarsiarititassat pineqaratik. Kiisalu taarsigassarsiallip inissiami najukkamini iluarsaassinissaq, alliliinissaq nutarterinissarluunniit nammineq aningaasalersorniarnerlugu nammineerluni aalajangertussaavaa.

Siunnersuummi § 46-mut (siunnersuummi tusarniaassutigineqartumi § 42)

KANUKOKA isumaqarpoq, nutaanik taarsigassarsinissamut ukiunut tallimanut killiliussamit allanngortiterinerit, nutarterinerit assigisaallu pisortani oqartussaasunit peqqussutigineqartut inassutigineqartullu peerneqartariaqartut. Ineqarnermut Attaveqarnermullu Naalakkersuisoqarfik tamatumunnga isumaqataanngilaq. Pisortat oqartussaasut atortulersuutinik aalajangersimasunik peqqussuteqartut, soorlu kommuni inissiap kuuffeqarfimmut attavilerneqarnissaanik peqqussuteqartoq, peqqussuteqarnerminut atatillugu tamatumunnga aningaasanik illuartitsisinnaasariaqarpoq.

Siunnersuummi § 56-imut (siunnersuummi tusarniaassutigineqartumi § 46, imm. 2.)

KANUKOKA-mit oqaatsip nunaminertamik inniminniisarnerup nunaminertat pillugit nalunaarummi ilaannginnera erseqqissaatigineqarpoq, taamaattumillu oqaatsip taassuma peqqussutikkut ersarissarneqarnissaa KANUKOKA-p inassutigaa. Oqaaseq aalajangersakkamut oqaaseqaatini erseqqissaavigineqarpoq.

 

Peqqussutissatut siunnersuummi aalajangersakkanut ataasiakkaanut oqaaseqaatit


§ 1-imut

Aalajangersagaq nutaajuvoq, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 1-imut taartaalluni. Aalajangersakkami nr. 1 oqaasertamigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi nr. 1-ip assigaa, kiisalu aalajangersakkami nr. 2 nutaajulluni. Aalajangersakkami nr. 3 aamma 4 najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi nr. 2-p assigaa. Inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi nr. 3 atorunnaarpoq.

Nr. 1-imut

Aalajangersakkami nr. 1 naapertorlugu peqqussutissatut siunnersuut kommunit inissianik attartortittakkanik sanaartornerannut Namminersornerullutik Oqartussat tapiissuteqartarnerannut atorneqassaaq. Kommunit inissianik attartortittakkanik sananerminni illunik ilaqutariinnut ataatsinut inissianik illunillu affarleriinnik, illunik uiguleriinnik, illunik uigulukuttunik inissiarsuarnilluunniit sanaartussanerlutik nammineerlutik aalajangersinnaavaat. Taarsigassarsititsisoqarani tapiissuteqartoqartassaaq, tassalu aningaasat taakku Namminersornerullutik Oqartussanut akilersorneqassanngillat.

Nr. 2-mut

Kiisalu kommunit aamma kommunit illuutaannik ataatsimoorussanik sanaartornissamut tapiiffigineqarsinnaapput, tak. aalajangersakkami nr. 2. Taarsigassarsititsisoqarani tapiissuteqartoqartassaaq, tassalu aningaasat taakku Namminersornerullutik Oqartussanut akilersorneqassanngillat.

Nr. 3-mut

Peqqussutissatut siunnersuummi nr. 3 inissianik, Namminersornerullutik Oqartussanit taarsigassarsititsiviusimasunik pigisaqalernissamut, alliliinissamut pitsanngorsaanissamullu tapiiffigineqarnissamut taarsigassarsitinneqarnissamulluunniit periarfissiivoq. Kisianni nutaatut inuit, inissianik nutaanik sananissamut taarsigassarsitinneqarsinnaajunnaarput, tassanili illut sanaqataaffiusut pineqanngillat.

Nr. 4-mut

Kiisalu peqqussutissatut siunnersuummi nr. 4 illunik sanaqataaffiusunik pigisaqalernissamut tapiiffigineqarnissamik taarsigassarsitinneqarnissamilluunniit periarfissiivoq. Illunut sanaqataaffiusunut nassuiaatit sukumiinerusut pillugit siunnersuummi § 48-mut nassuiaatit innersuussutigineqarput.


§ 2-mut

Imm. 1 nutaajuvoq, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 2, imm. 2-p immikkoortuanut siullermut, § 10, imm. 4-p immikkoortuanut siullermut, § 10, imm. 5-ip immikkoortuanut siullermut, kiisalu § 21b, imm. 1-ip immikkoortuanut siullermut aammalu § 21b, imm. 3-p immikkoortuanut siullermut taartaalluni, kiisalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 2, imm. 2-mi immikkoortup tullia pingajuallu atorunnaarput.

Imm. 2 nutaajuvoq, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi, § 10a, imm. 1-p immikkoortuanut siullermut aamma § 10a, imm. 4-p immikkoortuanut siullermut, kiisalu § 21a, imm. 2-p immikkoortuanut siullermut aamma § 21a, imm. 3-p immikkoortuanut siullermut taartaalluni, kiisalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 21a, imm. 1 atorunnaarpoq.

Imm. 3 nutaajuvoq.

Imm. 1-imut

Siunnersuummi imm. 1-ip atuutilerneratigut peqqussutissatut siunnersuut naapertorlugu tapiiffigineqarnissamut taarsigassarsinissamullu qinnuteqaatit qanorluunniit ittut allakkatigut Naalakkersuisunut nassiunneqartassapput. Piffissap qanoq ilinerani qinnuteqaatip tunniunneqartarnissaanut piumasaqaateqartoqanngilaq, taamaattumillu tunniussisarneq ingerlaavartumik ingerlanneqassaaq. Tassanili illunik sanaqataaffiusunik sananissamut qinnuteqaatit pineqanngillat, qinnuteqaatit kingusinnerpaamik decembarip ulluisa aallaqqaataanni tiguneqarsimanissaat piumasarineqarmat, tamatumunngalu sanaqataaffiusumik illuliassat ukiukkut nassiunneqarnissaminnut piareersarneqartarnerat, taamaalillutillu upernaakkut sumiiffimmut nassiunneqarsinnaanissaat, aammalu upernaap aasalluunniit ingerlanerani sananeqarsinnaanissaat peqqutaavoq. Tassalu illumik sanaqataasussap ukiup tulliani illuliassamik sanaqataaffiusussamik sananissamut taarsigassarsitinneqarnissani kissaatigiguniuk, qinnuteqaat kingusinnerpaamik decembarip ulluisa aallaqqaataanni Naalakkersuisunut nassiutissavaa.

Qinnuteqaat Naalakkersuisunut nassiunneqassaaq, tamannalu Naalakkersuisoqarfiup inissialiortiternermut, ataatsimoorussanik illuliortiternermut, illuliassanut il.il. tapersiissuteqartarneq pillugu Inatsisartut peqqussutaannik akisussaasuusup suliassamik isumaginnittussaaneranik paasineqassaaq.

Imm. 2-mut

Siunnersuummi imm. 2, akiliutit akiligassanngortinneqartut, akiitsut akilinngitsuukkat, akileeqqusinermut akitsuutit akiitsullu sinnerisa isumakkeerneqarnissaannik imaluunniit allanngortinneqarnissaannik qinnuteqaatinut tunngasuuvoq.

Akiliutit akiligassanngortinneqarsimasut tassaapput, taarsigassarsiallip Namminersornerullutik Oqartussanut taarsigassarsiaminut akilersuutissai akiligassanngortinneqarsimasut, tassanilu pineqarpoq piffissaq Naalakkersuisut taarsigassarsianut akileeqqusiffiat, piffissarlu eqqorlugu akiliinissamut ullussarititaq kingulleq suli nallerneqarsimanngitsoq. Tassalu akiliutit akiligassanngortinneqartut piffissami pineqartumi akiliinissamut taarsigassarsiallip pisussaaffeqarneranut ersiutaapput. Piffissaq eqqorlugu akiliiffissamut ullussarititaasoq qaangerneqarpat, akiliutit akiligassanngortinneqartut tassaalissapput akiitsut akilinngitsuukkat.

Akiitsut sinneri tassaapput, taarsigassarsiallip Namminersornerullutik Oqartussanit taarsigassarsiaanit akiitsut suli akiligassanngortinneqarsimanngitsut.

Imm. 3-mut

Aalajangersakkami imm. 3 tapiiffigineqartup imaluunniit taarsigassarsiallip Naalakkersuisunit tunngavissaqanngitsumik pissarsiarisimasaminik utertitsinissamik pisussaaffeqarneranut tunngasuuvoq. Utertitsinissamut piumasaqaat piffissami qinnuteqarfiusumi, taamatullu piffissami taarsigassarsiat atuuffigisaani tamarmiusumi atuutsinneqarsinnaavoq. Aningaasat tapiiffigineqartumut taarsigassarsisumulluunniit tunngavissaqanngitsumik Naalakkersuisut tunniussimasaat, Naalakkersuisunit uterteqquneqarsinnaapput. Tapiiffigineqartoq imaluunniit taarsigassarsitinneqartoq assersuutigalugu isertitat inoqutigiinniluunniit inuit amerlassusaat pillugit paasissutissanik eqqunngitsunik tunniussisimasinnaavoq.


§ 3-mut

Aalajangersagaq nutaajuvoq, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi, § 4, imm. 1-mut taartaalluni, kiisalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 4, imm. 2 atorunnaarpoq.

Qinnuteqartup inissiamik imaluunniit sanaartukkamik sananissamut, pigisaqalernissamut, alliliinissamut imaluunniit pitsanngorsaanissamut aningaasalersuinissamut aningaasartuutissanut tamakkiisunut aningaasartuutit suut ilanngussinnaanerai aalajangersakkami aalajangersarneqarpoq. Aningaasartuutit aalajangersakkami taagorneqartut assersuutigalugu aningaaserivimmit taarsigassarsianik pilersitsinermut aningaasartuutinut, eqqartuussissuserisumut akiliutinut, illunik tuniniaasartumut akiliutinut, naqissusiinermut qularnaveeqqusiussaqarluni taarsigassarsititsinermi allagartap nalunaarsorneqarneranut aningaasartuutinut, sanaartukkamik nakkutilliinermut aningaasartuutinut, kiisalu aningaasartuutinut sanaartornermut attuumassuteqartunut allanut tunngasuupput. Aningaasartuutissat attuumassuteqartut tamarmik ilanngunneqarnissaat qinnuteqartup akisussaaffigaa.


§ 4-mut

Aalajangersagaq nutaajuvoq.

Aalajangersakkami inissiami inigisap annertussusaa qanoq naatsorsorneqassanersoq aalajangersarneqarpoq. Inigisap annertussusaanik naatsorsuinerup eqqortumik pinissaa pingaaruteqarpoq, tamanna assersuutigalugu Naalakkersuisut kommunit inissiaataannik attartortittakkanik sanaartornermut tapiissutaasa annertussusissaannut, aammalu Naalakkersuisut taarsigassarsiat allanik taarserlugit taarsigassarsititsinerini taarsigassarsiallip qaammammut akiliutissaasa minnerpaaffissaasa annertussusissaannut pingaaruteqarmat. Aalajangersakkami inissiami inissiap annertussusaa qanoq iliorluni naatsorsorneqassanersoq sukumiisumik nassuiarneqarpoq. Naqqup ataani, inimi quleriiaani ataatsimi nalinginnaasuni, qaliani ininilu ataatsimoorussani inissiap annertussusaa immikkoortiterlugu nassuiaatigineqarpoq.


§ 5-imut

Aalajangersagaq nutaajuvoq, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 3-mut najoqqutassatigut allannguuteqarluni assingusuulluni.

Aalajangersakkami sanaartornermut pilersaarusiornermullu inatsimmut allamut naleqqiussilluni malittarisassiortoqarpoq, tassanilu siunertaavoq sanaartukkanut, sanaartornermut pilersaarusiornermullu inatsimmut atuuttumut naapertuutinngitsunut Naalakkersuisut taapiissuteqartannginnissaasa taarsigassarsititsisannginnissaasalu qulakkeerneqarnissaa. Sanaartugaq sanaartornermut pilersaarusiornermullu inatsimmut atuuttumut naapertuussimanngippat Naalakkersuisut sananermut, alliliinermut pitsanngorsaanernulluunniit taarsigassarsititsissanngillat. Tassani pingaartumik taarsigassarsiallip illuliornermut malittarisassanik aamma nunaminertanik atuinermut pilersaarusiornermullu Inatsisartut peqqussutaanik malinninnissaa eqqarsaatigineqarpoq.


§ 6-imut

Aalajangersagaq nutaajuvoq, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 7, imm. 4-mut taartaalluni.

Inissianut sanaartukkanullu, suliarinnittussamut isumaqatigiissusiorfioreersunut imaluunniit Naalakkersuisut suliamik aallartitsinnginneranni aallartinneqareersunut naammassineqareersunulluunniit taarsigassarsinissamik tapiiffigineqarnissamilluunniit qinnuteqaatinut Naalakkersuisut itigartitsisarnissaat aalajangersakkami qulakkeerniarneqarpoq.

Kisiannili Naalakkersuisut tapiissuteqarnissaat taarsigassarsititsinissaalluunniit sioqqullugu qinuteqartup sanaartukkap isikkussaa, inissisimaffissaa aningaasassaqarneralu misissuiffiginiarlugu siunnersortimut isumaqatigiissusiorsimanissaa aalajangersakkami ajornartinneqanngilaq.


§ 7-imut

Aalajangersagaq nutaajuvoq.

Aalajangersakkap atuutilerneratigut inissianik sanaartukkanilluunniit, inuussutissarsiutinik ingerlatsiviusunik ingerlatsiviusussanillu sananissamut, pigisaqalernissamut, alliliinissamut pitsanngorsaanissamulluunniit taarsigassarsititsisoqarsinnaajunnaarpoq. Inuussutissarsiornermi pineqarpoq inissiat sanaartukkalluunniit suliffeqarfittut inuussutissarsiornermik ingerlatsivittut atorneqartut. Taamaattumillu inuussutissarsiutit inissiamit sanaartukkamilluunniit tamakkiisumik taassumaluunniit ilaanit ingerlanneqartut tungavimmikkut taarsigassarsinissamut itigartitsivigineqartassapput. Taamaakkaluartoq inissiap annersaa najugaqarfittut atorneqarpat, inissiamit inuussutissarsiutinik namminersortunik annikinnerusunik ingerlatsisinnaaneq akuerisaavoq. Tikeraanut angerlarsimaffiit imaluunniit tikeraanut sinittarfiit, motel-it, cabin-it, akunnittarfiit assigisaallu najugaqarfiit avataaniittutut isigineqarput.

Inissiap annersaa najugaqarfittut atorneqartutut isigineqarnersoq pisuni ataasiakkaani Naalakkersuisut naliliisassapput. Pingaarnertut inissiami ini ataaseq sinnerlugu inuussutissarsiutinut namminersortunut atuisoqassanngilaq, assersuutigalugu ini ataasiinnaq nutserinermut atorneqarsinnaalluni. Ataatsimut isigalugu inissiami inuussutissarsiutit namminersortut annikinnerusut inissiap ilaannamininnguanit ingerlanneqarsinnaapput. Inuussutissarsiutinut namminersortunut allanut assersuutitut kukkunersiuisarfiit pilerisaarusiortarfiillu minnerit, illumiit sullitanut attaveqarfiunerusartut, namminersortumik ulluunerani paaqqinnittarneq imaluunniit isikkanik passussisarfiit taaneqarsinnaapput.


§ 8-mut

Aalajangersagaq nutaajuvoq, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 6-imut taartaalluni.

Aalajangersakkami taarsigassarsialik tapiiffigineqartorluunniit peqqussutissatut siunnersuut manna malillugu taarsigassarsitinneqarnermini tapiiffigineqarnerminiluunniit minnerpaamik inissiamik sanaartukkamilluunniit ikuallattoornissamut anorersuarneranilu ajoqusernissamut sillimmasiinissamik pisussaaffilerneqarpoq. Taamaalilluni taarsigassarsiallip tapiiffigineqartulluunniit annertunerusumut matussusiisinnaasumik sillimmasiissanerluni nammineq aalajangersinnaavaa.

Taarsigassarsiallip tapiiffigineqartulluunniit minnerpaamik ikuallattoornissamut anorersuarneranilu ajoqusernissamut matussusiisinnaasumik sillimmasiinissaanut piumasaqaateqarneq, taarsigassarsititsisup tapiiffiginnittulluunniit inissiamik sanaartukkamilluunniit qularnaveeqqusiussaqarnissamik soqutigisaqarneranik aallaaveqarpoq. Ikuallattoornissamut anorersuarneraniluunniit ajoqusernissamut sillimmasiinissami pigisami aalaakkaasumi ikuallattoornissamut anorersuarneranilu ajoqusernissamut sillimmasiissutigineqartartoq nalinginnaasoq eqqarsaatigineqarpoq.


§ 9-mut

Aalajangersagaq nutaajuvoq, aammalu inatsisitigut inissisimaneq, allaffissornermi suleriaatsitut atuutilereersimasoq erseqqissarniarlugu ilanngunneqarluni.

Aalajangersakkap atuutilerneratigut peqqussutissatut siunnersuut naapertorlugu qinnuteqartup tapiiffigineqarnissamut taarsigassarsitinneqarnissamullu neriorsuummik pissarsinissaq pisinnaatitaaffigilerpaa, taamaattumillu Naalakkersuisut akuersisimatinnagit tapiiffigineqarnissamut taarsigassarsinissamulluunniit neriorsuummik tunniussinissaq pisinnaanngilaq.


§ 10-mut

Aalajangersagaq nutaajuvoq, aammalu ilaatigut inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 10, imm. 6-imut, § 10a, imm. 6-imut aamma § 21a, imm. 4-mut, kommunit inissiaataannut attartortittakkanut tapiisarneq pillugu Namminersornerullutik Oqartussat nalunaarutaannut nr. 10-mut, 22. marts 1994-imeersumut aamma nammineerluni illuliat pillugit Ineqarnermut Attaveqarnermullu Pisortaqarfiup kaajallaasitaanut nr. 6-6-imut, 10. marts 1986-imeersumut taartaalluni.

Imm. 1-imut

Aalajangersakkami Naalakkersuisut qinnuteqaatinik suliaqartarnermut maleruagassiorsinnaanerat tunngavilerneqarpoq. Paasissutissanut ilassutissanik piniartarnermi assersuutigalugu qinnuteqartup najugaatut inuit allattorsimaffianni nalunaarsukkanik imaluunniit qinnuteqartup ukiumut isertitai akileraaruteqaataasussat pillugit paasissutissanik Naalakkersuisut piniarsinnaanerat pineqarpoq. Kiisalu immersugassanik qinnuteqarfissanik assigiissaakkanik sananissaq naleqquttutut Naalakkersuisut isumaqarfigisinnaavaat, imaluunniit qinnuteqaammi pissutsit assigiinngitsut suut tulleriiaarinermi pingaartinneqassanersut pillugit Naalakkersuisut kissaateqarsinnaapput, taakkununnga ilaallutik assersuutigalugu sumiiffinni pisortat inissiaataannik inoqanngitsuni peqartuni illunik sanaqataaffiusunik tunniussinissamut itigartitsisarnissaq, imaluunniit inunnut inissiamik pisortanit aningaasaleeqataaffiusumik allamik peqareersunut illumik sanaqataaffiusumik tunniussinissamut itigartitsisarnissaq.

Imm. 2-mut

Aalajangersakkap atuutilerneratigut namminersortut ingerlatsinermut inatsisit tunngavigalugit suliassanut aalajangiinissaat isumaqatigiissutigineqanngippat, Naalakkersuisut suliassanik aaqqiiniarnissaq pillugu assersuutigalugu A/S Inissiaatileqatigiiffik INI-mut, aningaaserivinnut, kommuninut suliffeqarfinnulluunniit isumaqatigiissuteqarsinnaapput.

Assersuutigalugu isumaqatigiissut taarsigassarsianik aqutsinermut, taarsigassarsianik akiliisitsiniarnermut, akiliutinik akiligassanngortinneqartunik isumakkeerinermut allanngortitsinermullu, taarsigassarsiat allanik taarserlugit taarsigassarsititsinermut, taarsigassarsianik inaarinermut nalimmassaanermut il.il. atatillugu sullissinernut suliassallu piareersarnerinut tunngasinnaavoq. Namminersornerullutik Oqartussat pisassaannik akiliisitsiniarneq Akileraartarnermut Pisortaqarfimmit, pisortanut akiitsut akilinngitsuukkat akilersinniarneqartarneri pillugit Inatsisartut inatsisaannut pisortaqarfittut akisussaasuusumit isumagineqartassaaq. Inatsisartut inatsisaanni pissarsiassat ilaatigut peqqussutissatut siunnersuut manna tunngavigalugu pilersimasut pineqarput.


§ 11-mut

Aalajangersagaq nutaajuvoq, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 9, imm. 4-mut taartaalluni. Naalakkersuisut kapitali II naapertorlugu illulianik naliliisarneq pillugu Ineqarnermut Attaveqarnermullu Pisortaqarfiup kaajallaasitaata nr. 13.001-p, 17. august 1987-imeersup akuerineqarnissaanut piginnaatitsissut atorsimavaat. Kapitali II naapertorlugu illuliat inissianut peqqussutissatut siunnersuummi kapitali 4-mi pineqartunut assingusuupput. Kaajallaasitaq atuutsinneqarpoq, aammalu inissiap teknikkikkut aningaasaqarnikkullu naliliiffigineqarneranut naatsorsuinermut tunngasuulluni.

Aalajangersakkami inissiamik, peqqussutissatut siunnersuut manna tunngavigalugu sananeqarsimasumik imaluunniit inissialiortiternermut tapersiissuteqartarneq pillugu Inatsisartut peqqussutaat siusinnerusukkut atuuttuusimasoq tunngavigalugu sananeqarsimasumik taarsigassarsialimmiit Naalakkersuisut tigusinerannut atatillugu, inissiap naliliiffigineqarnissaanut kiisalu tunisinermut akiusup aalajangersarneqarnissaanut maleruagassanik aalajangersaanissamut Naalakkersuisut piginnaatinneqarput. Piginnaatitsissut assersuutigalugu niuernikkut akiusoq, teknikkikkut aningaasaqarnikkullu naligititaasoq naligititaasorluunniit alla atorlugu inissiaq Naalakkersuisut tunissaneraat aalajangiiniarnermut atorneqarsinnaavoq, tassungalu inissiap akeqanngitsumik tunniunneqarsinnaanera ilaavoq.

Suleriaatsit, Ineqarnermut Attaveqarnermullu Pisortaqarfiup kaajallaasitaanni nr. 13.011-mi, 17. august 1987-imeersumi aalajangersarneqartut tunngavigalugit teknikkikkut aningaasaqarnikkullu naligititaasoq naatsorsorneqassaaq. Teknikkikkut aningaasaqarnikkullu naliliisarnermi pingaarnertut inissiap inissisimaffia allatigullu alianaassutsikkut naligisinnaasaa eqqarsaatiginagu inissiap sanaqqinneqarnerata nalinga naatsorsorneqartarpoq.


§ 12-imut

Aalajangersagaq nutaajuvoq, ilaatigullu kommunit inissiaataannut attartortittakkanut tapiisarneq pillugu Namminersornerullutik Oqartussat kaajallaasitaannut nr. 10-mut, 22. marts 1994-imeersumut taartaalluni.

Aalajangersakkami tapiissutinik taarsigassarsiarititanillu tunniussisarnermut maleruagassiorsinnaanermut Naalakkersuisut piginnaatinneqarput. Assersuutigalugu tapiissutit taarsigassarsiarititallu ataatsikkut tunniuneqassanersut Naalakkersuisut aalajangersinnaavaat, tassunga ilaallutik sanaartornerup nalaani naafferartumik tapiisarneq taarsigassarsitsisarnerlu. Naafferartumik piffissap ingerlanerani tunniunneqartartut aalajangersimasunik procentilerneqarsinnaapput, imaluunniit sanaartornerup ingerlanera malillugu assigiinngitsunik aningaasartaqartinneqarsinnaallutik. Aamma tapiissutit akilerneqartarnerat suliap ingerlanera malillugu tunniunneqartassanersut Naalakkersuisut aalajangersinnaavaat, taamaalillunilu suliassanut suli naammassineqanngitsunut tapiissuteqartoqartassanngilaq.


§ 13-imut

Aalajangersagaq nutaajuvoq, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 7, imm. 1-imut aamma 2-mut najoqqutassatigut allannguuteqarluni assingusuulluni.

Imm. 1-imut

Aalajangersakkami kommunit inissiaataannik attartortittakkanik sanaartornermut Naalakkersuisut kommuninut tapiissuteqarsinnaanerat tunngavissinneqarpoq. Tapiissuteqarnissamut piumasarineqarpoq, kommunit inissianik sanaartortut angissusissatut piumasaqaatinik, aalajangersakkami aalajangersarneqartunik naammassinnissimanissaat. Tassani Nuup Kommuneanut tapiissutit aamma nunami kommunit sinnerinut tapiissutit immikkoortinneqarput.

Imm. 2-mut

Aalajangersakkami aningaasat qanoq amerlatigisut kommunit inissiaataannut attartortittakkanut tapiissutigineqartassanersut aalajangersarneqarpoq.

Tapiissutit annertussusaat inissiat annertussusaasa qaffakkiartornerat malillugit ikilisikkiartuaarneqartassapput, taamaalillunilu inissiap annertussusaani kvadratmeterit siulliit kvadratmeterinut kingullernut naleqqiullugu akisunerusarnerat sillimaffigineqarpoq. Tamatumunnga peqatigitillugu atortulersuutit tunngaviusut inissiani mikinerusuni inissianut anginerusunut naleqqiullugu akisunerusarput. Assersuutigalugu pingaaruteqarpoq igaffimmut uffarfimmulluunniit aningaasartuutissat 100.000 koruuniusut 60 imaluunniit 110 kvadratmeterinut agguarneqarsinnaanersut.

Inissianut assigiinngitsunut annertussusilinnut tapiissutit annertussusissaat matuma kinguliani takussutissiami takutinneqarput.

Imm. 3-mut

Tapiissutissat kvadratmeterimut annertussusissaat aalajangersimasuuvoq, taamaattumillu inissiat annertussusaanni kvadratmeterit siulliit kvadratmeterinut kingullernut naleqqiullugit akisunerunerat eqqarsaatigineqanngilaq.

Tamatuma Nuummi kommunip inissiaataanik attartortittakkanik kommunip sanaartorneranut ilanngunneqarsimannginneranut peqqutaasoq tassaavoq, amerlanerpaat piginneqatigiilluni inissianik imaluunniit inissianik illunilluunniit nammineq pigisanik sanaartornissaannik pisinissaannilluunniit Naalakkersuisut anguniagaqarnerat. Nuummut tapiissutit nunami kommunit sinnerinut tapiissutaasartunit naleqqiullugu ikilisinneqarnerisigut, illoqarfimmi ajornannginnerusumik inuinnaat piginneqatigiilluni inissianik aamma inissianik illunillu nammineq pigisanik sanaartornissamut realkredit-imit taarsigassarsinissaannik periarfissaqarfiusumi Naalakkersuisut anguniagaat ersarinnerulersinneqarpoq. Inuinnarmut Nuummi najugaqartumut inissiamik nammineq pigisassamik sananissamut realkredit-imit taarsigassarsinissaq inunnut illoqarfinni allani najugaqartunut naleqqiullugu ajornannginneruvoq, tassanissaaq assersuutigalugu Qaqortoq, Sisimiut Ilulissallu pineqarput. Naalakkersuisut kvadratmeterimut ataatsimut 7.700 koruuninik tapiissuteqartarneranni aamma aningaasat taamatupajaaq amerlassuseqartut atorlugit piginneqatigiilluni inissianik inissianillu nammineq pigisanik, kvadratmeterimut 5.000 koruuninik aamma kvadratmeterimut 2.700 koruuninik Naalakkersuisunit taarsigassarsititsivigineqarsinnaasunik sanaaartornermut Naalakkersuisut taarsigassarsititsisinnaanerat takussutissiorneqarpoq.

Imm. 4-mut

Aalajangersakkakkut Naalakkersuisut tapiissutaasa minnerpaaffissaat annerpaaffissaallu aalajangersarneqarput. Aalajangersakkap atuutilerneratigut inissianut 20 kvadratmeterit inorlugit annertussuseqartunut Naalakkersuisut taarsigassarsititsisinnaajunnaarput. Kiisalu inissiat annertussusaannut annerpaamik 110 kvadratmeterinut Naalakkersuisut tapiissuteqarsinnaapput, tamatumani inissiaq anginerugaluarpalluunniit.

Inissiap annertussusaata 20 kvadratmeterinik minnerpaaffilerneqarneranut kommunit ilinniartunut inissianik sanaartornermut tapiiffigineqarnissamut periarfissaqarnerat peqqutaatinneqarpoq. Ilinniartunut inissiaq ataatsimik initaqarpoq, initut atorneqarnermi saniatigut mikisumik igaffittaqartoq, kiisalu sinittarfittaqarsinnaalluni, taakkulu saniatigut inissiaq uffarfittaqarpoq.


§ 14-imut

Aalajangersagaq nutaajuvoq, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 7, imm. 3-mut taartaalluni.

Imm. 1-imut

Aalajangersakkami inissiami attartortittakkami init amerlassusissaannut, kiisalu kvadratmeterinngorlugit angissusissaannut piumasaqaatit aalajangersarneqarput. Assersuutigalugu inissiaq pingasunik initalik minnerpaamik 60 kvadratmeteriussaaq annerpaamillu 85 kvadratmeteriussalluni.

Inatsisartut 2002-mi upernaakkut ataatsimiinneranni aalajangiiffigisassatut siunnersuutip nr. 94-ip: "Pisortat inissiaataasa attartortittakkat, inissiat Namminersornerullutik Oqartussat sulisuinut naatsorsuussat nalinginnaasumillu attartortittakkat ilanngullugit, angissusilerneqarnissaanni oqartussaassutsip Inatsisartunut tunniunneqarnissaanik aalajangiiffigisassatut siunnersuut", suliarineqarnerani oqallinneq tunngavigalugu angissusissanut killissarititat ilanngunneqaqqaarput. Aalajangiiffigisassatut siunnersuutip kingunerisaanik 2003-mi Inatsisartut upernaakkut ataatsimiinnerminni inissianik tapersiissuteqartarneq pillugu Inatsisartut peqqussutaannut allannguut, inissialiortiternermut tapersiissuteqartarneq pillugu Inatsisartut peqqussutaanik allannguineq pillugu Inatsisartut peqqussutaat nr. 4, 15. april 2003-meersoq akueraat, tassanilu piumasaqaatitut saqqummiunneqartut akuersissutigineqarput. Taamaattumik kvadratmeterinut killiliinermi, assersuutigalugu inissianik marlunnik angisoorsuarnik initalinnik, Nunap Karsianit ilaannaasumik aningaasalersorneqartunik sananissap pinngitsoortinneqarnissaanik Inatsisartut kissaateqarnerat tunngavigineqarpoq, aningaasat taakku atorlugit inissianik, assersuutigalugu pingasunik sisamanilluunniit initalinnik inissianik marlunnik angisuunik initalinniit, ilaqutariinnik annerusunik inissaqartitsinissamut naleqqunnerusunik sanasoqarsinnaammat.

Inigisap annertussusissaa inissianik attartortitsisarneq pillugu Inatsisartut peqqussutaanni aalajangersakkani sukkulluunniit atuuttuni inigisap annertussusissaannik naatsorsuisarnertulli naatsorsorneqassaaq.

Inissiaq marlunnik initalik tassaavoq, inissiaq ataatsimik sinittarfeqarlunilu ataatsimik inilik. Inissiaq pingasunik initalik tassaavoq, inissiaq ataatsimik inilik marlunnillu sinittarfilik. Inissiaq sisamanik initalik tassaavoq, inissiaq ataatsimik inilik pingasunillu sinittarfilik. Aamma inissiaq igaffittaqassaaq imaluunniit ammaannartumik igaffeeraqassalluni, kiisalu perusuersartarfeqarsinnaalluni uffarfeqarsinnaalluniluunniit. Igaffik inilu inimi ataatsimuussappata, taanna initut ataatsitut naatsorsuunneqassaaq. Tassalu inissiami marlunnik initalimmi inip aappaa sinittarfiusinaavoq aappaalu iniusinnaalluni igaffittalik. Taakku saniatigut perusuersartarfik uffarfilluunniit ilaassaaq.

Imm. 2-mut

Aalajangersakkap atuutilerneratigut inissiaq marlunnik amerlanerusunilluunniit initaqarpat, inissiap ilusilersorneqarnissaanut piumasaqaatit ilapput. Tassani inissiami init minnerpaamik 9 kvadratmeteriunissaat piumasarineqarpoq. Igaffiup imaluunniit inip minnerpaamik 9 kvadratmeterinik annertussuseqartinneratigut piumasarineqartoq naammassineqarsinnaanngilaq. Inissiami ineeqqamik ataatsimik, soorlu sinittarfimmik meeqqanulluunniit sinittarfimmik peqassaaq.

Imm. 3-mut

Aalajangersagaq imm. 1-imi aamma 2-mi piumasaqaatinik aalajangersarneqarsimasunik uniuisinnaanermut immikkut ittumik Naalakkersuisut akuersissuteqarsinnaanerannik imaqarpoq. Immikkut ittumik akuersissuteqartarnermi kommunip piumasaqaatinik uniuinissamut tunngavilersuutaanik nalilersuineq tunngavigineqassaaq. Immikkut ittumik akuersissuteqartarnermi kommunit inissiaataat attartortittakkat, kommunit inissiaataattut attartortittakkatut nalinginnaasutut, taamatullu kommunit sulisunut, soorlu distriktimi nakorsanut, kommunaldirektørinut, suliffeqarfinni pisortanut, inissiaataattut inissisimanerat eqqarsaatigineqassaaq. Kommuni immikkut ittumik akuerineqarnissamut itigartitaagaluaruni, kommunip Namminersornerullutik Oqartussanit tapiissutitaqanngiinnartumik inissiamik attartortittakkamik sananissaa akornusersimaneqanngilaq.


§ 15-imut

Aalajangersagaq oqaasertamigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 8-mut assingusuuvoq.

Aalajangersakkami kommunit inissiaataannik attartortittakkanik, Naalakkersuisunit tapiiffigineqarlutik sananeqartussanik sanaartornermut sukumiinerusunik maleruagassiornissamut Naalakkersuisut piginnaatinneqarput. Piginnaatitsissut kommunit inissiaataannut attartortittakkanut tapiissuteqartarneq pillugu Namminersornerullutik Oqartussat nalunaarutaani nr. 10-mi, 22. marts 1994-imeersumi atorneqarpoq.

Aalajangersagaq taanna malillugu Naalakkersuisut akinut piumasaqaatinik aalajangersaasinnaapput, tassunga aningaasartuutit, kommunit inissiaataasa attartortittakkat akiinut tamakkiisunut ilaasussat ilaatinneqarlutik. Kiisalu Naalakkersuisut suliassamut maleruagassanik aalajangersaasinnaapput, tassunga sanaartugassat tamakkiisumik imaluunniit immikkoortiterlugit suliakkiissutigineqassanersut ilaallutik. Tamatuma saniatigut Naalakkersuisut inissianik sanaartornissamut pilersaarusiortarneq pillugu maleruagassiorsinnaapput, tassunga pilersaarusiornerup nalaani kommunip inissiaataanik attartortittakkanik pisariaqartitsinerup annertusinera uppernarsarniarlugu kommunimi innuttaasut amerliartornerannik missiliuummik kommunip suliaqarnissaa ilaalluni. Naalakkersuisut aamma sanaartugassat aqunneqarnerinut maleruagassiorsinnaapput, tassunga ilaalluni kommuni nammineerluni sanaartukkamik aqutsisuusinnaanersoq, imaluunniit avataaniit sanaartornermut siunnersuisumik aqutsisoqarnissaq piumasaqaataassanersoq.

Kiisalu Naalakkersuisut naatsorsuusiortarnermut maleruagassiorsinnaapput, assersuutigalugu sanaartukkap naammassineraniit piffissap qanoq sivisutigisup qaangiunnerani kommunip naatsorsuutinik inaarutaasunik tunniussinissaa tassani pineqarluni.

Neqeroortitsisarnermut suliariumannittussarsiuussisarnermullu maleruagassanut tunngatillugu suliariumannittussarsiuussisarneq il.il. pillugu Inatsisartut inatsisaat nr. 3, 6. april 1992-imeersoq malinneqassaaq.


§ 16-imut

Imm. 1 nutaajuvoq, aammalu ilaatigut inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 9, imm. 1-imut taartaalluni. Imm. 2 nutaajuvoq.

Imm. 1-imut

Aalajangersakkami kommunit inissiaataasa attartortittakkat, sananeqarnerminni Naalakkersuisunit tapiiffigineqarsimasut tunineqartarnerat allanullu atorneqartarnerat pineqarpoq. Tassani Naalakkersuisut inissiat tunineqarnissaannut aammalu najugaqarfittut atorneqarnerminnit allaanerusumut atorneqarnissaannut akuersissuteqarnissaat piumasaqaatigineqarpoq. Tamatumunnga tunngavilersuutigineqarpoq, inissiat attartortittagassatut atorneqarnissaat piumasaqaatigalugu Naalakkersuisut tapiissuteqarsimanerat.

Imm. 2-mut

Aalajangersagaq pineqaatissiisinnaanermut aalajangersakkamik imaqarpoq. Inissiamik tunisinermi kommunalbestyrelsip aalajangersakkami imm. 1 malissimanngippagu, Namminersornerullutik Oqartussat kommunip inissiaataanik attartortittakkanik tunisinermit pisassaat erngerlutik utertillugit akilerneqartussaapput. Namminersornerullutik Oqartussat tunisinermi pissarsiassaat Namminersornerullutik Oqartussat tapiissuteqarnerminni sanaartornermut naatsorsuutit tunngavigalugit aggorniliisimanerisa annertoqqataanik aggorniliinikkut annertussusilerneqassapput. Tassani kommunip tunisinermini qaffasinnerusumik akeqartitsinermini pissarsiarisimasinnaasai kommunip aningaasartuutigisimasaannit kiisalu inissiap attartortittakkap sananeqarnissaanut Namminersornerullutik Oqartussat tapiissutigisimasaannit amerlanerunersut apeqqutaatinneqassanngilaq. Taamaalillunilu Namminersornerullutik Oqartussat tapiissutigisimasaannik utertitsinikkut pisuunnguallannissamik eqqarsartoqanngilaq.

Namminersornerullutik Oqartussat piumasaqaatimi naammassineqarnissaa naammassitissinnaavaa, kommunip Namminersornerullutik Oqartussanit pissarsiassarisinnasaasa pissarsiariumaagassaasalu suulluunniit ajornaatsumik ilanngaatiginerisigut. Naalakkersuisunik oqarnermi Naalakkersuisut aammalu sullissiviit ingerlatsiviillu allat taassuma ataaniittut pineqarput.


§ 17-imut

Aalajangersagaq nutaajuvoq, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 9, imm. 2-mut aamma 3-mut taartaalluni.

Imm. 1-imut

Kommunit inissiaataannik attartortittakkanik, aalajangersakkami pisuni taaneqartuni Namminersornerullutik Oqartussanit tapersiiffigineqarlutik sananeqarsimasunik tunisinissamut Naalakkersuisut akuersissuteqarsinnaanissaannut aalajangersakkami killiliisoqarpoq.

Aalajangersakkami taamaallaat qanoq pisoqarnerani Naalakkersuisut tunisinissamut akuersissuteqarsinnaanersut maleruagassiorneqarpoq.

Aalajangersakkami kommunip inissiaataanik attartortittakkamik tunisinermi inatsisitigut tunngavissat suut imaluunniit atugassarititaasut suut tunngavigineqassanersut isummerfigineqanngilaq. Kommunalbestyrelsip kommunip inissiaataa attartortittagaq aalajangersakkami nr. 1 naapertorlugu attartortumut tunissappagu, tunisinissaq Namminersornerullutik Oqartussat kommunillu inissiaataannik attartortittakkanik inissiatut illutulluunniit nammineq pigisatut tigusisarneq pillugu Inatsisartut peqqussutaanni maleruagassat malillugit pissaaq. Kommunalbestyrelsip kommunip inissiaataa attartortittagaq inoqanngitsoq aalajangersakkami nr. 2 naapertorlugu tamanut ammasumik tuniniaanikkut annerpaamik neqerooruteqartumut tunissappagu, tunisinissaq isumaqatigiissuteqarsinnaanermut maleruagassat nalinginnaasut malillugit pissaaq.

Imm. 2-mut

Naalakkersuisut tunisinissamik akuersissuteqarsinnaasimappata, tunisinermi iluanaarutit atorneqarnissaannut aalajangersimasunik piumasaqaateqartoqarpoq.

Kommunalbestyrelsip tunisinermi iluanaarutissanit Namminersornerullutik Oqartussat pisassaannik utertitsinissaq aalajangiuppagu, tamanna Namminersornerullutik Oqartussat tapiissuteqarnerminni sanaartornermut naatsorsuutit tunngavigalugit aggorniliisimanerisa annertoqqataanik aggorniliinikkut pissaaq. Tassani kommunip tunisinermini qaffasinnerusumik akeqartitsinermini pissarsiarisimasinnaasai kommunip aningaasartuutigisimasaannit kiisalu Namminersornerullutik Oqartussat inissiap sananeqarnissaanut tapiissutigisimasaannit amerlanerunersut apeqqutaatinneqassanngilaq. Taamaalillunilu Namminersornerullutik Oqartussat tapiissutigisimasaannik utertitsinikkut pisuunnguallannissamik eqqarsartoqanngilaq.

Tunisinermi pissarsiat sanaartorfissagissaanissamut atorniarlugit Kommunalbestyrelsip aalajangiuppagu, aningaasat sanaartorfissagissaarnermut pingaarnermut imaluunniit sumiiffiup iluani sanaartorfissagissaanermut atorneqarsinnaapput. Kiisalu kommunalbestyrelsip tunisinermi pissarsiassat nutaanik sanaartornermut atorsinnaavai, soorlu illuliortiternernut aningaasalersuineq pillugu Inatsisartut peqqussutaat malillugu inissialianut imaluunniit piginneqatigiilluni inissialiortiternermut, kommunilluunniit inissiaataanik attartortittakkanik kommunip aningaasalersugaanik sanaartornermut. Pissarsiassat nutaanik sanaartornermut imaluunniit sanaartorfissagissaanermut atorniarlugit kommunip aalajangiuppagu, siuliani isummersuutit atuutsinneqassapput, tassalu Namminersornerullutik Oqartussat sanaartornermut tapiissutigisimasaasa aggornilerneqarsimanerisa annertoqqataanik piffissami pineqartumi tunisinermut akiusumit agguilluni kommuni immikkoortitsissaaq.

Namminersornerullutik Oqartussat tapiissutaat Inatsisartut aningaasanut inatsisaat tunngavigalugu oqartussaasunit pingasuniit aningaasaliiffigineqartunut (Naalagaaffiup, Namminersornerullutik Oqartussat kommunalbestyrelsillu tamarmik pingajorarterutinik aningaasaliiffigisaattut), Inatsisartut aningaasanut inatsisaat tunngavigalugu 40/60-imik sanaartukkanut (Namminersornerullutik Oqartussat 40 procentinik aamma kommunalbestyrelsit 60 procentinik aningaasaliiffigisaattut), inissialiortiternermut tapersiissuteqartarneq pillugu Inatsisartut peqqussutaat nr. 1, 9. april 1992-imeersoq, kingusinnerusukkut allannguuteqartinneqartoq tunngavigalugu 60/40-mik sanaartukkanut (Namminersornernerullutik Oqartussat 60 procentinik aamma kommunalbestyrelsit 40 procentinik aningaasaliiffigisaattut), Inatsisartut aningaasaqarnermut inatsisaat tunngavigalugu 80/20-mik sanaartukkanut (Namminersornernerullutik Oqartussat 80 procentinik aamma kommunalbestyrelsit 20 procentinik aningaasaliiffigisaattut) imaluunnit inissialiortiternermut tapersiissuteqartarneq pillugu Inatsisartut peqqussutaat nr. 1, 9. april 1992-imeersoq, kingusinnerusukkut allannguuteqartinneqartoq tunngavigalugu kvadratmeterimut tapiiffigineqartunut tapiissutaasimasinnaapput.


§ 18-imut

Aalajangersagaq nutaajuvoq.

Imm. 1-imut

Aalajangersakkami kommunit illuutaannik ataatsimoorussanik sananissamut Naalakkersuisut kommuninut tapiinissamut periarfissaqarnerat tunngavilerneqarpoq. Naalakkersuisut taamaallaat tapiissuteqartussaammata kommuni sanatitsisuussaaq, taamaattumillu nunaminertamik tunineqarnissamut sanaartornerullu aallartinnissaanut akuersissutinik, kiisalu pisortanit oqartussaasunit allanit akuersissutinik piniarnissaq akisussaaffigalugu.

Imm. 2-mut

Naalakkersuisut maleruagassiaat assersuutigalugu ilusilersorneqarsinnaapput, sulineq aningaasaqarnerlu eqqarsaatigalugit illunik ataatsimoorussanik assigiissaakkanik ikittuinnarnik, atuinissamut periarfissanik pisariaqartitsinerit assigiinngitsut eqqarsaatigalugit qanorluunniit ilusilersorneqarsinnaasunik sanasarnissaq Naalakkersuisut qinersinnaallugu.

Imm. 3-mut

Sumiiffinni sorlerni kommunit illuutaannik ataatsimoorussanik Naalakkersuisunit tapiiffigineqartumik sanaartortoqarsinnaanersoq aalajangersakkami killiliiffigineqarpoq. Illoqarfinni mikinerusuni isorliunerusunilu ineqarnikkut pissutsinik sanilliussinermi illoqarfinni mikinerusuni isorliunerusunilu innuttaasut imermik kuuginnartumik periarfissaqarnersut aammalu sumiiffimmi ataatsimut eqqakkanut kuuffeqarfeqarnersoq pingaartinneqassaaq. Imermik kuuginnartumik aammalu ataatsimut eqqakkanut kuuffeqarfimmik peqarneranik pingaartitsinissamut tunngaviuvoq, illup ataatsimoorussap sumiiffimmi, innuttaasut assersuutigalugu uffarfinnik errorsisarfinnillu atuinissamut periarfissaqarfigisinnaasaattut atorneqarnissaa.


§ 19-imut

Aalajangersagaq nutaajuvoq.

Aalajangersakkami kommunit illuutaat ataatsimoorussat pisortat illuutaattut isigineqarput. Tassanilu isumaasoq tassaavoq illut tamanut ammasuussasut. Kommunit illuutaat ataatsimoorussat siunertanut arlalinnut atorneqarsinnaassapput. Siunertat aalajangersakkami immikkut taaneqartut saniatigut kommunit illuutaasa ataatsimoorussat eqqartuussinermi suliassaq ataasiinnaq suliarineqarniartillugu Kalaallit Nunaanni Eqqartuussivimmit, nakorsaq tikikkaangat nakorsiartitsinermut imaluunniit persuttarneqarsimasunut imigassamillu atornerluisunut ilitsersuisarfittut siunnersuisarfittullu atorneqarallarsinnaanerat eqqarsaatigineqarsinnaavoq.


§ 20-mut

Aalajangersagaq nutaajuvoq.

Imm. 1-imut

Aalajangersakkami tapiissutip imikkoortui nassuiarneqarput. Ataatsimut isigalugu tapiissutit atortussanut sullissinernullu atorneqartussaapput. Tapiissutit tamatigut illuliassanut tamakkiisunut, nalinginnaasumik ilusilersorneqartussanut atortulersorneqartussanullu tungasuussapput. Kiisalu Naalakkersuisut immikkut ittumik atortulersuinissamut, soorlu errorsivinnut tapiissuteqarsinnaapput. Tamatuma saniatigut ataatsimoorussanik illuliornermut atortussanut allanut tapiissutit tunngasuusinnaapput. Assersuutigalugu ilitsersuisartut, amerlanertigut tassaasartut ilinniarsimasut, najukkami ataatsimoorussamik illuliornermi najugaqartunut ilitsersuisuusartut.

Naalakkersuisut tapiissutissanut aningaasaliissuteqarnerminnut atatillugu nalinginnaasumik pilersuisussamut isumaqatigiissusiortarput, taamaalillutillu tassunga akiliinissamut isumaqatigiissuteqartarlutik. Tamatuma saniatigut Naalakkersuisut nalinginnaasumik sanaqataasussatut ikiortissamut ilitsersuisoqarnermullu tapiissuteqartassapput, tamatumalu saniatigut innaallagissamut, imermut kiassarnermullu atortunik ikkussuineq attaviliinerluunniit isumagisassallugu. Pisarnertut inuinnarnut isumaqatigiissuteqartarneq tunngavigalugu kommunalbestyrelsimut akiliilluni sullinneqarnissamik isumaqatigiissuteqartoqarsinnaavoq, naak tamanna peqqussummi taaneqanngikkaluartoq.

Imm. 2-mut

Illu ataatsimoorussaq misiligutaasutut sananeqassappat, Naalakkersuisut tapiissuteqarnissamut imaluunniit immikkut ittumik ikiorsiinissamut aalajangersakkakkut tunngavissinneqarput. Immikkut ittumik ikiorsiinerit illup ataatsimoorussap sananeqarneranut atatillugu qanorluunniit ittuusinnaapput.

Imm. 3-mut

Illunik ataatsimoorussanik, siornatigut sananeqarsimasunik naliliinissamut Naalakkersuisut tapiissuteqarsinnaanerat alajangersakkakkut tunngavissinneqarpoq. Tassani eqqarsaatigineqarput illut sulliviit, peqqussummi atuuttumi maleruagassat atuuttut naapertorlugit sananeqarsimasut, kisiannili aamma siunissami illut ataatsimoorussat, siunnersuummi maleruagassat malillugit sananeqartartussat. Naliliineq tassaasinnaavoq, illup ataatsimoorussap teknikkikkut qanoq issusianik naliliineq, illup ataatsimoorussap atuuffiinik atorneqarfiinillu naliliineq imaluunniit illup sananeqarnerpiaanik naliliineq, tassunga ilitsersuisutut atorneqartup naliliiffigineqarnera ilaalluni.


§ 21-mut

Aalajangersagaq nutaajuvoq.

Imm. 1-imut

Kommunip illuutaanik ataatsimoorussamik, Naalakkersuisut tapiiffigisimasaannik tunisinermut allatullu atuilernermut aalajangersagaq tunngasuuvoq. Tassani illup tunineqarnissaanut imaluunniit siunertamut, illup ataatsimoorussatut atorneqarneranit allaanerusumut atorneqalernissaanut Naalakkersuisut akuersissuteqarnissaat piumasaqaatigineqarpoq. Illup kommunimi illutut ataatsimoorussatut atorneqarnissaa tunngavigalugu Naalakkersuisut tapiissuteqarsimanerat tamatumunnga tunngaviuvoq.

Imm. 2-mut

Aalajangersagaq pineqaatissiisinnaanermut aalajangersakkamik imaqarpoq. Kommunip illuutaanik ataatsimoorussamik tunisinermi kommunalbestyrelsip aalajangersakkami imm. 1 malissimanngippagu, Namminersornerullutik Oqartussat kommunip illuutaanik ataatsimoorussamik tunisinermit pisassaat erngerlutik utertillugit akilerneqassapput. Namminersornerullutik Oqartussat tunisinermi pissarsiassaat Namminersornerullutik Oqartussat tapiissuteqarnerminni sanaartornermut naatsorsuutit tunngavigalugit aggorniliisimanerisa annertoqqataanik aggorniliinikkut annertussusilerneqassapput. Tassani kommunip tunisinermini qaffasinnerusumik akeqartitsinermini pissarsiarisimasinnaasai kommunip aningaasartuutigisimasaannit kiisalu Namminersornerullutik Oqartussat illup ataatsimoorussap sananeqarnissaanut tapiissutigisimasaannit amerlanerunersut apeqqutaatinneqassanngilaq. Taamaalillunilu Namminersornerullutik Oqartussat tapiissutigisimasaannik utertitsinikkut pisuunnguallannissamik eqqarsartoqanngilaq.

Namminersornerullutik Oqartussat piumasaqaatimi naammassineqarnissaa naammassitissinnaavaa, kommunip Namminersornerullutik Oqartussanit pissarsiassarisinnasaasa pissarsiariumaagassaasalu suulluunniit ajornaatsumik ilanngaatiginerisigut. Naalakkersuisunik oqarnermi Naalakkersuisut aammalu sullissiviit ingerlatsiviillu allat taassuma ataaniittut pineqarput.

Imm. 3-mut

Aalajangersakkami kommunip illuutaata ataatsimoorussap ingerlanneqarnerata ilaanik tamakkiisumilluunniit peqatigiiffinnut, inuinnarnut suliffeqarfinnulluunniit kommunalbestyrelsip tunniussisinnaanera pineqarpoq. Ingerlatsineq assersuutigalugu arnat peqatigiinnut, nunagisami eqqaanilu peqatigiiffinnut, takornariartitsisarnermi peqatigiiffinnut imaluunniit takornariartitsisartunut il.il. kommunalbestyrelsip isumagisassanngortissimappagu aalajangersakkap atorneqarnissaa eqqarsaatigineqarpoq.

Imm. 4-mut

Ingerlatsinermut isumaqatigiissut atuutsinneqalinnginnermini Naalakkersuisunit akuerineqassaaq.


§ 22-mut

Aalajangersagaq nutaajuvoq.

Aalajangersakkami kommunip illuutaanik ataatsimoorussamik piginnittussaatitaanerup piffissap qanoq ilinerani Naalakkersuisuniit kommunalbestyrelsimut nuunneqarsinnaanera aalajangersarneqarpoq.

Nalinginnaasumik Naalakkersuisut kommunit illuutissaannut ataatsimoorussamut atortussanik pisinissaq pillugu pilersuisumut isumaqatigiissuteqartarput. Tamatuma kingorna atortussat pilersuisumiit nassiussivissamut attartorneqarnissaat pillugu Naalakkersuisut isumaqatigiissuteqartarput. Tamatuma kingorna kommunip illuutaanik ataatsimoorussamik piginnittussaatitaaneq atuilernissamut akuersissutip tunniunneqarnerata kingorna kommunimut tunniunneqartassaaq.

Aalajangersakkami siunertarineqarpoq illu ataatsimoorussaq naammassineqanngippat, Naalakkersuisut atortunik atuisinnaatitaanerisa qulakkeerneqarnissaa, tassunga piiaasinnaaneq allamullu tunniussisinnaaneq ilaalluni.


§ 23-mut

Aalajangersagaq nutaajuvoq, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 1, nr. 2-p ilaanut taartaalluni.

Tapiiffigineqarsinnaasut taarsigassarsitinneqartussallu inunnut namminersorsinnaatitaasunut killilerneqarnerisigut, inuit namminersorsinnaajunnaarsitaasimasut kiisalu meeqqat 18-it inorlugit ukiullit kapitali manna naapertorlugu tapiiffigineqarnissamik taarsigassarsitinneqarnissamilluunniit qinnuteqarsinnaatitaanngillat, taamatullu pisussaatitaasut pisinnaatitaasullu tapiiffigineqarnissamik taarsigassarsitinneqarnissamilluunniit qinnuteqarsinnaatitaanatik.

Kiisalu tapiiffigineqartoq taarsigassarsitinneqartorluunniit nunami najugaqartutut inuit nalunaarsorsimaffianni nalunaarsorsimassaaq.


§ 24-mut

Aalajangersagaq najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 10, imm. 2-mut assingusuuvoq. Inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 10, imm. 1 atorunnaarsinneqarpoq.

Aalajangersakkami siunertat suut akiliutinut tapiissutitalimmik taarsigassarsititsivigineqarsinnaanersut aalajangersarneqarpoq. Naalakkersuisut inissianik pigisaqalernissamut taarsigassarsititsisinnaapput, kisiannili inissianik sanaartornermut taarsigassarsititsisarunnaarlutik. Kiisalu Naalakkersuisut inissianik alliliinermut pitsanngorsaanermullu taarsigassarsititsisinnaapput. Tassalu kapitalimi inissiat pioreersut, aaqqissuussinermullu ilaareersut pineqarput.

Naalakkersuisut taamaallaat aalajangersagaq naapertorlugu taarsigassarsititsisinnaapput, Inissiamut Namminersornerullutik Oqartussat taarsigassarsititsereersimappata. Tassalu inissianik Namminersornerullutik Oqartussat taarsigassarsititsivigisaannik sananeqarsimasunik, Namminersornerullutik Oqartussat taarsigassarsiarititaat akilersorlugit naammassineqareersimappata, taamaalillutillu atorunnaarsimallutik, pigisaqalernissamut, alliliinermut pitsanngorsaanermullu Naalakkersuisut taarsigassarsititsisinnaanngillat. Inissianik pigisaqalernissamut, alliliinermut imaluunniit pitsanngorsaanermut taarsigassarsiarititanut tunngatillugu inissiat taakku pisortanit taarsigassarsiaqarfiunngillat, taamaattumillu piginnittut immaqalu piginnittunngorumaartussat peqqussutissatut siunnersuummi matumani maleruagassat naapertorlugit Namminersornerullutik Oqartussanit taarsigassarsinissamik qinnuteqarsinnaanatik. Piginnittut taakku assersuutigalugu pitsanngorsaanissamut taarsigassarsinissamik qinnuteqarusussagunik, illuliortiternernut aningaasalersuineq pillugu Inatsisartut peqqussutaat atorsinnaavaat.

"Akiliutinut tapiissutitalinnik taarsigassarsiat" tassaapput taarsigassarsiat, pingaartumik Naalakkersuisunit taarsigassarsiaritinneqarsimasut. Tamatuma kingorna taarsigassarsiallip Naalakkersuisunut taarsigassarsiaminut qaammatikkaartumik akiliutaannut Naalakkersuisut tapiissuteqartarput. Tassalu taarsigassarsialik qaammatikkaartumik akiligassamut aningaasartuutinut tamaginnut akiliisassanngilaq, kisiannili Naalakkersuisut tapiissuteqarfiginngisai akilertassallugit. Oqaatsimi "akiliutinut tapiissutit" aamma pineqarpoq, taarsigassarsiallip qaammatikkaartumik akiliutissanit akiligassani akilersimanngippagit, Naalakkersuisut akiligassanut tapiissutissaminnik akiliisinnaanngitsut. Tamatuma kingunerisaanik taarsigassarsiallip akiligassaanuinnaanngitsoq, kisiannili akiligassanut tamakkiisunut taarsigassarsialik kinguaattooruteqalissaaq.


§ 25-mut

Aalajangersagaq najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 10, imm. 3-p immikkoortuanut siullermut tullermullu aamma § 10, imm. 4-p immikkoortuisa aappaannut assingusuuvoq.

Imm. 1-imut

Naalakkersuisut aalajangersakkami imm. 1 naapertorlugu taarsigassarsiat pioreersut tamaasa allanik taarserlugit ataatsimoortillugit nutaamik taarsigassarsititsisinnaapput. Taarsigassarsiat allanik taarserlugit taarsigassarsititsinermi taarsigassarsiat, Naalakkersuisut inissiap sananeqarneranut taarsigassarsiarititaat, kiisalu inissiamik pigisaqalernermut, alliliinermut imaluunniit pitsanngorsaanermut taarsigassarsiarititaat taarsigassarsianut nutaanut ataatsimoortinneqassapput. Tassani iluanaarutissanik akiliisoqartussaanngimmat, taarsigassarsiat allanik taarserlugit taarsigassarsititsinermi taarsigassarsiallip akiliisinnaassuseqarnissaa piumasarineqanngilaq.

Imm. 2-mut

Aalajangersakkami taarsigassarsiat allanik taarserlugit taarsigassarsiat immikkoortui ataasiakkaat aalajangersarneqarput.

Imm. 3-mut

Akilersuinissamik pilersaarusiornermi taarsigassarsiallip aningaasaqarnerminik paasisimannilernissaanut ikiorserneqarnissaa siunertarineqarpoq. Taamaattumik akilersuinissamik pilersaarummi taarsigassarsiallip qaammammut akiliutissaata annertussusissaat aammalu piffissaq taarsigassarsiat allanik taarserlugit taarsigassarsiarititat akilersorneqarfissaat allassimassapput. Kisiannili taarsigassarsititsinermi piumasaqaatit taarsigassarsinermut isumaqatigiissummi aalajangersarneqassapput.


§ 26-mut

Aalajangersagaq nutaajuvoq. Tamatumanili allaffissornikkut inuit, ukiuni akileraaruteqarfiusuni kingullerni marlunni 180.000 koruunit inorlugit ukiumut inoqutigiinni akileraaruteqaataasussanik isertitaqarsimasut taarsigassarsitinneqartannginnissaat suleriaasiusimavoq.

Aalajangersakkami inuit kikkut, akiliutinut tapiissutitalimmik taarsigassarsitinneqarsinnaanerat aalajangersarneqarpoq.

Akerlianilli aalajangersakkap immikkoortuani siullermi taarsigassarsiallit, ukiuni akileraaruteqarfiusuni kingullerni marlunni 180.000 koruunit inorlugit ukiumut inoqutigiinni akileraaruteqaataasussanik isertitaqarsimasut Naalakkersuisunit taarsigassarsitinneqartannginnissaat allassimavoq.

Taamaalilluni inuit akissaatikitsut, akilersuisinnaalernavianngitsut taarsigassarsitinnerisigut akiitsoqarnerulersinneqarnissaasa pinngitsoortinneqarnissaa tamatumani siunertaavoq.

Aalajangersakkap immikkoortuisa aappaani allassimavoq, inuit siunissami qanittumi inoqutigiinni ukiumut 180.000 koruuninik amelanerusunilluunniit akileraaruteqaataasussanik isertitaqarnissamut periarfissaqartut Naalakkersuisunut taarsigassarsinissamik qinnuteqarsinnaasut. Siunissamik qanittumik oqarnermi pineqarpoq, inuup isertitai ukiumut 180.000 koruunit sinnerlugit amerlassuseqalerlutik qaffaateqartussanngornerannut pisoqareersimasoq. Assersuutigalugu inuk ilinniareerluni atorfinissimasinnaavoq, imaluunniit piffissap ilaani suliffissaaleqereerluni atorfinissimasinnaalluni, akissarsiai qaffassimasinnaallutik, imaluunniit qitornartaarnerminut atatillugu ullormusiaqarluni sulinngiffeqareerluni sulileqqissimasinnaalluni. Siunissami inoqutigiinni isertitat 180.000 koruunit sinnerlugit amerlassuseqalernissaasa kingunerisaanik, aamma inuup taassuma Naalakkersuisunit taarsigassarsiaminut akilersuinissamut periarfissaqalersimanissaa naatsorsuutigineqarpoq.


§ 27-mut

Aalajangersagaq najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 10, imm. 5-imut assingusuuvoq.

Imm. 1-imut

Aalajangersagaq qinnuteqartup inissiamik, Namminersornerullutik Oqartussanit taarsigassarsititsivigineqarsimasumik pigisaqalernissamut, alliliinissamut imaluunniit pitsanngorsaanissamut taarsigassarsitinneqassanersoq imaluunniit taarsigassarsiat allanik taarserlugit taarsigassarsitinneqassanersoq Naalakkersuisut naliliinissaannut malittarisassanik imaqarpoq. Aalajangersakkami tunngavissat taagorneqartut Naalakkersuisut naliliiniarneranni tunngavigineqartussat, qinnuteqartup taarsigassarsiat erniaanut akilersugassartaanullu akiliisinnaanersoq, kiisalu inissiaq Naalakkersuisut taarsigassarsiarititaannut qulakkeerinissamut naammattumik pitsaassuseqarnersoq pillugu ataatsimut paasititsiviussapput.

Imm. 2-mut

Taarsigassarsialik inissiami najukkamini Namminersornerullutik Oqartussanit ataatsimik amerlanerusunilluunniit taarsigassarsiaqareerpat, Naalakkersuisut naliliiniarnerminni aamma taarsigassarsiallip maannamut akiliisinnaassusia akiliinissamullu piumassuseqarnera, kiisalu akiitsut sinnerisa amerlassusaat tunngavigissavaat. Taarsigassarsiallip maannamut akiliinissamut pisussaaffini naammassisimappagit, taarsigassarsialik nutaanik taarsigassarsiteqqinneqarsinnaavoq, taamatullu maannamut taarsigassarsiaasimasut annertuumik appartinneqarsimappata, tamanna taarsigassarsititseqqinnissamut tunngaviusinnaalluni.

Imm. 3-mut

Aalajangersakkami taarsigassarsiallip taarsigassarsiaminut akilersuinissamut periarfissaqarneranik Naalakkersuisut naliliisassasut allassimavoq. Tassalu taarsigassarsialik ukiuni akileraaruteqarfiusuni marlunni kingullerni inoqutigiinni ukiumut 180.000 koruuninik amerlanerusunilluunniit akileraaruteqaataasussanik isertitaqarsimanersoq, imaluunniit siunissami isertitaqartussatut naatsorsuutigineqarnersoq tamatumani naammanngilaq.


§ 28-mut

Aalajangersagaq najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 11-imut assingusuuvoq.

Imm.1-mut

Aalajangersakkap atuutilerneratigut inissianik Namminersornerullutik Oqartussanit taarsigassarsititsivigineqarsimasunik pigisaqalernissamut Naalakkersuisut taarsigassarsiarititaat inissiamik qularnaveeqqusiisussaatitaanermi akilerneqartussatut siullertut tunniunneqartassapput. Kiisalu imm. 1-imi allassimavoq, taarsigassarsiat allanik taarserlugit taarsigassarsiarititat aamma inissiamik qularnaveqqusiisussaatitaanermi akilerneqartussatut siullertut tunniunneqartassasut. Tamatumunnga peqqutaavoq inissiamik Namminersornerullutik Oqartussanit taarsigassarsititsiviusimasumut piginnittumut siornatigut taarsigassarsiaritinneqarsimasut allanik taarserlugit ataatsimoortillugit taarsigassarsiatut nutaatut kattunneqartarmata.

Imm. 2-mut

Aalajangersakkami inissianik Namminersornerullutik Oqartussanit taarsigassarsititsiviusimasunik alliliinissamut pitsanngorsaanissamulluunniit Namminersornerullutik Oqartussat taarsigassarsiarititaasa akilerneqarnissaannut tulleriinnilerlugit inissisimanerat aalajangersarneqarpoq.


§ 29-mut

Aalajangersagaq najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 12, imm. 1-imut, 2-mut, 3-mut aamma 5-imut assingusuuvoq.

Imm. 1-imut

Aalajangersakkami takuneqarsinnaavoq inissianik, Namminersornerullutik Oqartussanit taarsigassarsititsiviusimasunik pigisaqalernissamut taarsigassarsiat ukiumut 6 procentinik erniaqartinneqarlutik akilersorneqassasut. Qaammammut akiliutissat aalajangersarneqarnerini piffissaq akilersuiffiusussaq sivisunerpaamik ukiunik 20-nik sivisussuseqassaaq.

Piffissap taarsersukkanik akilersuiffiusussap aalajangersarneqarnerani qaammammut akiliutissat taarsigassarsiallip akiliisinnaassusianut naleqqussarneqarnissaat Naalakkersuisut pingaartissinnaavaat. Tassani taarsigassarsiallip akiliisinnaassusiata aalajangerneqarnerani ataasiakkaatigut naliliinissaq pineqarpoq. Taarsigassarsiap annertussusaa, taarsigassarsiallip nalilinnik pigisaqarnera kiisalu inissiap pisoqaassusaa niuernikkullu nalinga pingaarutilittut tunngavigineqarsinnaapput.

Imm. 2-mut

Aalajangersakkami allassimavoq, inissianik Namminersornerullutik Oqartussanit taarsigassarsititsivigineqarsimasunik alliliinissamut pitsanngorsaanissamulluunniit taarsigassarsiat ukiumut 6 procentinik erniaqartinneqarlutik akilersorneqassasut. Qaammammut akiliutissat aalajangersarneqarnerini piffissaq akilersuiffiusussaq sivisunerpaamik ukiunik 15-inik sivisussuseqassaaq.

Piffissap taarsersukkanik akilersuiffiusussap aalajangersarneqarnerani Naalakkersuisut qaammammut akiliutissat taarsigassarsiallip akiliisinnaassusianut naleqqussarneqarnissaat pingaartissinnaavaat. Tassani taarsigassarsiallip akiliisinnaassusiata aalajangerneqarnerani ataasiakkaatigut naliliinissaq pineqarpoq. Taarsigassarsiap annertussusaa, taarsigassarsiallip nalilinnik pigisaqarnera kiisalu inissiap pisoqaassusaa niuernikkullu nalinga pingaarutilittut tunngavigineqarsinnaapput.

Imm. 3-mut

Aalajangersakkami allassimavoq taarsigassarsiat allanik taarserlugit taarsigassarsiat ukiumut 6 procentinik erniaqartinneqarlutik akilersorneqassasut. Qaammammut akiliutissat aalajangersarneqarnerini inigisap annertussusaani ukiumut kvadratmeterimut 420 koruunit inorlugit amerlassusilerneqannginnissaat aalajangersarneqarpoq. Inigisap annertussusissaanut tunngatillugu siunnersuummi § 4-mut oqaaseqaatini nassuiaatit sukumiinerusut innersuussutigineqarput.

Ataatsimut isigalugu akiitsut (G) ullut akiliiffissat tulleriit tunngavigalugit akiligassat (y), ernianut akilersuutinullu tunngasuusut, annertoqqatigiikkuutaarlugit akilersorneqassapput (n).

Ullormi akiliiffissami akiitsut atuutilersimappata, aammalu ullormi akiliiffissami tullermi akilersorneqartussanngorpata, akiligassat naatsorsorneqarnissaannut malitassaq tunngavigalugu naatsorsorneqarsinnaapput, aammalu akiitsut akiitsunik naatsorsuisarnermi malitassaq tunngavigalugu naatsorsorneqarsinnaallutik:

G tassaavoq akiitsut atsiorneqarnerminni annertussusaat.

Inissiamik pigisaqalernissamut taarsigassarsianut tunngatillugu n annerpaamik qaammatinik 240-nik, tassalu ukiunik 20-nik sivisussuseqartarpoq, aammalu r ukiumut 6 procentiusarluni (0,06).

Inissianik alliliinissamut pitsanngorsaanissamullu taarsigassarsianut tunngatillugu n annerpaamik qaammatinik 180-inik, tassalu ukiunik 15-inik sivisussuseqartarpoq, aammalu r ukiumut 6 procentiusarluni (0,06).

Taarsigassarsiat allanik taarserlugit taarsigassarsianut tunngatillugu r ukiumut 6 procentiuvoq (0,06), kiisalu akiliutit minnerpaamik ukiumut inissiap annertussusaanut kvadratmeterimut 420 koruuninik aalajangersarneqarluni. Ukiumut inigisap annertussusaanut kvadratmeterimut killiliussat 420 koruuniusut missiliuinikkut aalajangersarneqarput, taakkulu agguaqatigiissillugit pisortat inissiaataanni attartortittakkani ineqarnermut akiliutaasartut amerlaqatigaat. Assersuutigalugu inissiaq 80 kvadratmeterinik annertussuseqarpat, inigisap annertussusaanut kvadratmeterimut 450 koruunit qaammammut 2.800 koruuniupput ( 420 x 80 kvadratmeter : qaammatit 12-it).

Imm. 4-mut

Aalajangersagaq malillugu taarsigassarsialik annertunermik akilersuisinnaavoq. Annertunermik akilersuinerup kingunerisaanik piffissaq taarsigassarsiat akilersorneqarfissaat sinneruttoq sivikillissaaq, taarsigassarsianut akiliutissat allanngortinneqartussaanngimmata. Assersuutigalugu taarsigassarsiallip annertunermik akilersuineratigut Naalakkersuisut akilersuutinut 30 procentinik tapiissuteqartartussaapput, tak. siunnersuummi § 30, imm. 1.


§ 30-mut

Aalajangersagaq najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 12, imm. 4-mut aamma § 13-imut assingusuuvoq.

Imm. 1-imut

Aalajangersakkap atuutilerneratigut akiliutinut 30 procentinik Naalakkersuisut tapiissuteqartassapput, tamatumani taarsigassarsialik nalinginnaasumik akilersuigaluarpat, annertunermik akilersuigaluarpat, imaluunniit taarsigassarsisup akiitsut sinneri tamakkerlugit akileraluarpagit. Tamanna siunnersuummi § 29-mut innersuussutini takuneqarsinnaavoq.

Imm. 2-mut

Aalajangersakkap atuutilerneratigut taarsigassarsiallip meerai 18-it inorlugit ukiullit, angerlarsimaffimmi najugaqartutut inuit nalunaarsorsimaffianni nalunaarsorsimasut apeqqutaatillugit taarsigassarsiallip akiliutaanut Naalakkersuisut tapiissutaat qaffattassapput. Naalakkersuisut annerpaamik meeqqanut arfinilinnut, tassalu 45 procentit nalinginut tapiissuteqartarput. Tapiissutit 30 procentiusut ilanngukkaanni, Naalakkersuisut qaammammut akiliutaasartunut tapiissutaat annerpaamik 75 procentiusinnaapput.

Taarsigassarsialik siunnersuummi § 29, imm. 4 naapertorlugu annertunermik akilersuippat, akilersugai meeqqanut tapiissuteqarfiussanngillat, tak. siunnersuummi § 30, imm. 2, tassungalu siunnersuummi § 29, imm. 4 sanilliunneqassaaq.

Imm. 3-mut

Qitornaq akilersuutinut appaassutaasoq angerlarsimaffimmi najugaqartutut inuit nalunaarsorsimaffianni nalunaarsorsimajunnaarpat taarsigassarsisup Naalakkersuisunut nalunaaruteqarnissamut pisussaaffeqarnera aalajangersakkami malittarisassiuunneqarpoq. Taarsigassarsiallip nalunaartussaatitaaneranut taarsigassarsisup akiligassatigut tunngavissaqanngitsumik meeqqanut appaavigineqarnissamik pisinnaatitaaffeqannginnera, aammalu taarsigassarsiallip meeqqat qanoq amerlatigisut taarsigassarsialimmi najugaqarnerat pillugu nalunaaruteqartussatut qaninnerpaanera tunngaviuvoq.


§ 31-mut

Imm. 1 najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 12, imm. 6-imut assingusuuvoq.

Imm. 1-imut

Aalajangersakkami Naalakkersuisut taarsigassarsianut akilersuutinik akiligassanngortinneqartunik allakkatigut akileeqqusissutinik saqqummiussinissamut pisussaaffeqarnerat aalajangersarneqarpoq. Akileeqqusissummik saqqummiussinermut atatillugu akiitsut akilinngitsuukkat akileeqqusissummut akitsuummik ilaneqassapput, taannalu akileeqqusissummut akitsuut 50 koruuniusoq, akiitsut 1.000 koruuninit amerlanerusut 2 procentiannik ilallugu akiitsunut akilinngitsuukkanut ilanngunneqassaaq.


§ 32-mut

Aalajangersagaq najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 14, imm. 1, nr. 1-imut assingusuuvoq.

Aalajangersakkami atuisinnaatitaanermut killiliinerit suut inissianut atuunnersut maleruagassiuunneqarpoq. Atuisinnaanermut killiliinerit inissiaq Naalakkersuisunit taarsigassarsititsivigineqarsimatillugu atuuttussaapput. Taarsigassarsialik piffissap qanorluunniit ilinerani akiligassanik akiitsut sinnerinik, akiligassanngortinneqartunik akiitsunillu akilinngitsuugaasimasinnaasunik akiliinermigut atuisinnaatitaanermut killiliinernit taaneqartunit imminut pisussaaffeerutsissinnaavoq. Taamatuttaaq taarsigassarsiallip akiliisinnaajunnaarnerani atuisinnaatitaanermut killiliinerit atorneqannginnissaat periarfissinneqarpoq.


§ 33-mut

Imm. 1 najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 15, imm. 1-imut assingusuuvoq. Aalajangersakkami imm. 2 aamma 3 nutaajupput, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 17, imm. 1-imut, 2-mut 3-mullu taartaallutik.

Imm. 1-imut

Amerlanertigut inissiap piffissami pineqartumi niuernikkut akia aammalu Namminersornerullutik Oqartussat taarsigassarsiarititaat annertoqatigiinneq ajorput. Nalinginnaasumik Namminersornerullutik Oqartussat taarsigassarsiarititaat piffissami pineqartumi niuernikkut akigititaasumit annertunerusarput. Tamanna siunersuummi § 32 naapertorlugu qularnaveeqqusiinissamik inerteqquteqarnermut atatillugu aalajangersakkap matuma atulersinneqarneranik kinguneqarpoq, taannalu malillugu Naalakkersuisut pisussaapput, taarsigassarsialik inissiamik Namminersornerullutik Oqartussanut utertitsinissamik kissaateqartillugu inissiamik tigusissallutik. Taarsigassarsiallip inissiaq pigisani aatsaat Namminersornerullutik Oqartussanut utertissinnaavaa, inissiaq suli Namminersornerullutik Oqartussanut taarsigassarsiaqarfiuppat.

Imm. 2-mut

Aalajangersakkami Naalakkersuisut taarsigassarsialimmut aningaasatigut isumannaarneqartussanik naatsorsuinissaannut pisussaaffilerneqarnerat aalajangersarneqarpoq. Ullup naatsorsuusiorfiusup aallartiffia tassaavoq ulloq, Naalakkersuisut inissiamik taarsigassarsisumiit tigusiffiat.

Imm. 3-mut

Aalajangersakkami Naalakkersuisut qanoq iliorlutik aningaasatigut isumannaarneqartussanik naatsorsuisassanersut aalajangersarneqarpoq.

Aningaasatigut isumannaarneqartussanik naatsorsuisarneq maannamut maleruagassanut naleqqiullugu pisariillisaatinik annertuunik imaqarpoq, taakkulu peqqussummi atuuttumi § 15, imm. 1-mi aningaasatigut naatsorsueriaaseq nassuiarneqartoq malillugu naatsorsorneqartussaapput, tak. § 17.

Aningaatigut isumannaarneqartussat naatsorsornerini inissiap teknikkikkut aningaasaqarnikkullu nalinganit Naalakkersuisut piumasaqaataat tamakkiisut matussuserneqarsinnaasut paasinarsisimappat, Naalakkersuisut naatsorsukkat inernerisaat taarsigassarsisumut akilissavaat.


§ 34-mut

Aalajangersagaq najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 15, imm. 2-mut assingusuuvoq.

Imm. 1-imut

Aalajangersakkami taarsigassarsiallip atugassarititaasut suut tunngavigalugit inissiamik tunniussisinnaanera pineqarpoq.

Imm. 2-mut

Aalajangersakkap atuutilerneratigut tunniussinissamut Naalakkersuisut akuersissuteqartarnerat tunngavissatut aalajangersakkat malillugit pisassaaq. Taamaalilluni Naalakkersuisut tunniussinissamut itigartitsisassapput, inissiamik pisisussaq soorlu inoqutigiinni ukiumut akileraaruteqaataasussanik 128.000 koruunit inorlugit isertitaqartarpat, pigisaqalertussaq taamatut pisoqarneratigut tunniussinerup kingunitsianngua Namminersornerullutik Oqartussanut akiitsuminik isumakkeerfigineqarnissamik imaluunniit allanngortitsinissamik qinnuteqarsinnaammat. Piumasaqaatitigut pisisussaq inissiami Namminersornerullutik Oqartussanut taarsigassarsiaminik akilersuisinnaanersoq pillugu Naalakkersuisut naliliisarnissaat siunnerfigineqarpoq.

Illuatungaani siunnersuummi § 33, imm. 1 naapertorlugu taarsigassarsiallit inissiamik Namminersornerullutik Oqartussanut utertitsisarnerisa aamma siunnersuummi § 36 naapertorlugu Naalakkersuisut inissiamik tigusisarnerisa aammalu illuatungaani siunnersuummi § 34 naapertorlugu piginnittut inissiamik piginnittumut nutaamut tunniussisarnerisa immikkoortinnissaat pingaaruteqarpoq.

§ 34 naapertorlugu tunniussisoqassappat, piginnittuiusoq inissiamik tunisisuusussaavoq. Piginnittuiusup pisinissamillu isumaqatigiissuteqarfigisaata akornanni pissutsit Namminersornerullutik Oqartussanit susassarineqanngillat. Piginnittuiusup ajoqutinut amigaatinullu ersinngitsunut akisussaaffigisinnaasai piginnittuiusup pisinissamillu isumaqatigiissuteqarfiusup akornanni isumaqatigiissummik tunngaveqassapput.

Siunnersuummi § 33, imm. 1 naapertorlugu taarsigassarsisup Namminersornerullutik Oqartussanut utertitsinerani, imaluunniit siunnersuummi § 36, imm. 1 naapertorlugu Naalakkersuisut tigusineranni, Naalakkersuisut ajoqutinut amigaatinullu ersinngitsunut akisussaaffigisinnaasai Naalakkersuisut pisinissamillu isumaqatigiissuteqarfiusup akornanni isumaqatigiissummik tunngaveqassapput. Naalakkersuisut naliliinermikkut ajoqutit amigaatillu Naalakkersuisunut akiligassanngortinneqartut pillugit piginnittuiusumit akilerneqarnissaat piumasaqaatigisinnaavaat.


§ 35-mut

Aalajangersagaq najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 16, imm. 1-imut assingusuuvoq.

Aalajangersakkami qanoq pisoqartillugu Naalakkersuisut taarsigassarsiarititaat akiligassanngortinneqartassanersut allassimavoq.

Nr. 1-imut

Taarsigassarsiallip piffissaq eqqorlugu ernianut akilersuutinullu akiliinnginnerata kingunerisaanik taarsigassarsiat akiligassanngortinneqassapput. Taamaalilluni taarsigassarsialik taarsigassarsiaminut akiliisinnaatinnani akilersuinissamik Naalakkersuisunut isumaqatigiissuteqarnissamut periarfissaarutissaaq.

Kalaallit Nunaani qularnaveeqqusiisarneq pillugu inatsit atuuttoq naapertorlugu, taarsigassarsialik pigisamut aalaakkaasumut qularnaveeqqusiussaqarluni taarsigassarsititsinermi allagartaq malillugu piffissaliussaq naatinnagu ernianut akilersuutinullu akiliisimassaaq, taarsigassarsialik allakkatigut tamatumunnga akileeqqusissutip Naalakkersuisunit kommunalbestyrelsimilluunniit nassiunneqarneraniit imaluunniit saqqummiunneqarneraniit kingusinnerpaamik ullut arfineq marluk qaangiutsinnagit ernianut akilersuutinullu akiliisimappat. Naalakkersuisut imaluunniit kommunalbestyrelsip akileeqqusissutaani piffissaq eqqorlugu akiliiffissaq kingulleq allassimassaaq, tassanilu ersarissumik allassimassaaq, piffissaliussaq qaangiutsinnagu erniat akilersuutillu akilerneqanngippata, aningaasaatit akiligassanngortinneqassasut. Akileeqqusissut akiligassalimmut apuunnissaa anguniarlugu Kalaallit Nunaanni inoqarfiit aamma Kalaallit Nunaata naalagaaffiullu sinnerata akornanni nassiunneqassappat, piffissaq eqqorlugu akiliiffissaq tassaassaaq, akiligassallip akileeqqusissummit tigusineraniit ullut arfineq marluk, tamatumani akileeqqusissut nalunaarasuartaatit atorlugit akiligassalimmut nassiunneqarsimanngippat.

Nr. 2-mut

Taarsigassarsialik pisussaavoq inissiaq illersorsinnaasumik aserfallatsaaliussallugu. Tamanna paasisariaqarpoq taarsigassarsiallip illup ilaanik pisariaqartitsilertarnertut akulikitsigisumik taarsersuisassasoq iluarsaassisassasorlu, assersuutigalugu qalianik igalaanillu ussiitsunik taarsersuilluni iluarsaassilluniluunniit. Kiisalu taarsigassarsiallip inissiaq suliassat tulleriiaarlugit aserfallatsaalissavaa, assersuutigalugu pisariaqartitsilertarnertut akulikitsigisumik illup silataa qalipattassallugu. Naalakkersuisut nr. 2-imik atuutsitsinermini qularnaveeqqusiiffiusunik nakkutilliissapput, tassanilu paasiniarneqartassaaq qularnaveeqqusiussaq pigineqarnersoq aammalu pitsaasumik aserfallatsaalineqarnersoq.

Nr. 3-mut

Inissiaq ikuallattoornissamut anorersuarmillu ajoquserneqarnissamut sillimmaserneqarsimanngippat, tamanna taarsigassarsiat akiligassanngortinneqarnissaannut tunngaviussaaq, inissiami sillimmaserneqarsimanngitsumi ajoqusikkat annertuut Naalakkersuisut qularnaveeqqusiussaannik annertuumik ajorseriartitsisussaammata. Ikuallattoornermi anorersuarneranilu ajoqusikkat taaneqarnerini sillimmasiissut nalinginnaasoq, pigisap aalaakkaasup ikuallattoqarnerani anorersuarneranilu ajoqusernissaanut sillimmasiissutaasoq eqqarsaatigineqarpoq.

Nr. 4-mut

Taarsigassarsialik inissiamik tamakkiisumik imaluunniit taassuma ilaanik isaterippat, tamanna Naalakkersuisut taarsigassarsiarititaasa akiligassanngortinneqarnerannik kinguneqassaaq.

Nr. 5-mut

Taarsigassarsialik inissiamit najukkaminit inuussutissarsiutinik ingerlataqarnersoq Naalakkersuisut naliliiffigisassavaat. Tamatumanissaaq siunnersuummi § 7-imut oqaaseqaatit innersuussutigineqarput.

Nr. 6-imut

Aalajangersakkami allassimavoq, taarsigassarsialik Naalakkersuisut akuersiteqqaarnagit inissiamit najukkaminit nuuppat, imaluunniit inissiamik attartortitsippat Naalakkersuisut taarsigassarsiarititaat akiligassanngortinneqassasut. Tassanilu taarsigassarsiat akiligassanngortinneqassanngippata taarsigassarsiallip piffissami pineqartumi inissiami taarsigassarsivigisamini najugaqarnissaa piumasaqaataavoq.

Taarsigassarsiallip inissiamik pigisaminik piffissami aalajangersimasumi attartortitsinissaanut imaluunniit najukkami inissiat inoqanngitsut amerlanerat peqqutigalugu inissiaq attartortinnagu piffissami aalajangersimasumi inissiamit nuunnissaanut Naalakkersuisut akuersissuteqarsinnaapput. Akuersissuteqartoqarnissaa anguneqarsinnaavoq, pingaartumik illoqarfimmi nunaqarfimmiluunniit taarsigassarsiallip inigisaata inissisimaffigisaani suliffissaqartitsiniarnikkut pissutsit peqqutaallutik taarsigassarsialik suliartorluni piffissami aalajangersimasumi sumiiffimmut allamut nuuttariaqarluni aalajangerpat.

Nr. 7-mut

Taarsigassarsialik inissiaq qularnaveeqqusiullugu taarsigassarsisinnaanngilaq, qularnaveeqqulluunniit Naalakkersuisut taarsigassarsiarititaannut tulliutillugu akilerneqartussatut inissinneqaraluarpat. Inerteqquteqarnermut tunngaviuvoq taarsigassarsiallip inissiamik Naalakkersuisunut, inissiamik tigusinerminni Namminersornerullutik Oqartussat taarsigassarsisullu akornanni aningaasatigut aaqqitassanik naatsorsuisussanut utertitsinissamut periarfissaqarnera.

Nr. 8-mut

Naalakkersuisut qularnaveeqqusiussamik pigisaqartutut inissiap illersorsinnaasumik aserfallatsaalineqarnera taamaalillunilu qularnaveeqqusiissutaasup pigineqarnera qulakkiisallugu pisinnaatitaaffeqarput. Tamanna qulakkeerniarlugu Naalakkersuisut inissiap ilua takusarlugu isersinnaanissaat pisariaqarpoq, taamaattumillu Naalakkersuisut inissiamut iseqquneqanngippata tamanna taarsigassarsiat akiligassanngortinneqarnissaannut tunngavigineqarsinnaalluni.

Nr. 9-mut

Aalajangersagaq Naalakkersuisut alliliinissamut pitsanngorsaanissamulluunniit aningaasalersuutissanik taarsigassarsitsitsineranni inissiap sillimmataasinnaanera qulakkeerniarlugu ikkunneqarpoq. Taarsigassarsiallip alliliinissaq pitsanngorsaanissarluunniit, Naalakkersuisut taarsigassarsititsiffigisaat naammassinngippagu, inissiaq naleqarnerulinngitsoorsinnaavoq, taamaalillunilu Naalakkersuisut inissiamut taarsigassarsititsinerminni qulakkeerinniffigineqanngitsoorsinnaallutik.


§ 36-mut

Imm. 1 najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 16, imm. 2-mut assingusuuvoq. Imm. 2 aamma 3 nutaajupput, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 17, imm. 1-imut, 2-mut aamma 3-mut taartaallutik.

Imm. 1-imut

Siunnersuummi § 35 naapertorlugu periaatsit nassuiarneqartut arlaat atorlugu Naalakkersuisut taarsigassarsiarititaat akiligassanngorsimatillugit, Naalakkersuisut inissiamik tigusisinnaanerat aalajangersakkami maleruagassiuunneqarpoq.

Imm. 2-mut

Aalajangersakkami taarsigassarsialimmut aningaasatigut isumannaarneqartussat naatsorsornissaannut Naalakkersuisut pisussaaffeqarnerat aalajangersarneqarpoq. Ullup naatsorsuiffiusup aallartiffia tassaavoq ulloq taanna Naalakkersuisut inissiamik taarsigassarsisumiit tigusiffiat.

Imm. 3-mut

Aalajangersakkami Naalakkersuisut qanoq iliorlutik aningaasatigut isumannaarneqartussanik naatsorsuisassanersut aalajangersarneqarpoq.

Aningaasatigut isumannaarneqartussanik naatsorsuisarneq maannamut maleruagassanut naleqqiullugu annertuunik pisariillisarneqarpoq, taannalu naapertorlugu peqqussummi atuuttumi § 16, imm. 2-mi aningaasatigut naatsorsueriaaseq nassuiarneqartoq malillugu naatsorsorneqartassapput, tak. § 17.

Aningaasatigut isumannaarneqartussat naatsorsornerini inissiap teknikkikkut aningaasaqarnikkullu nalinganit aningaasat Naalakkersuisut pisassaat tamakkiisut matussuserneqarsinnaasut paasinarsisimappat, naatsorsukkat inernerisaat taarsigassarsisumut Naalakkersuisut akilissavaat.


§ 37-mut

Aalajangersagaq najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 19-imut assingusuuvoq.

Taarsigassarsiallip toqunerani taarsigassarsiallip aapparisaa pinngitsooranilu kingornussisussai taarsigassarsiallip taarsigassarsianut pisinnaatitaaffiinik pisussaaffiinillu tigusinissamik pisinnaatitaasut aalajangersakkami allassimavoq. Tassanilu tunniussinissarpiaq pineqanngilaq, taamaallaallu qularnaveeqqusiussaqarluni taarsigassarsinermut allagartamut taarsigassarsinermullu uppernarsaammut ilassutissamik suliaqartoqaannartussaalluni. Aalajangersakkami taarsigassarsianik tigusisinnaanermut apeqqut kisimi maleruagassiuunneqarpoq. Apeqqutit kingornussisinnaatitaanermut tunngasut aammalu apeqqutit allat pigisamik tigusinissamut atuinissamullu pingaaruteqartut allanik tunngaveqartinneqarlutik maleruagassiorneqartarput.


§ 38-mut

Aalajangersagaq nutaajuvoq.

Imm. 1-imut

Inissiamik taarsigassarsiallip Namminersornerullutik Oqartussanut utertissimasaanik imaluunniit Naalakkersuisut taarsigassarsisumit tigusimasaanik tunisinerminni Naalakkersuisut qanoq iliorsinnaanerat aalajangersakkami oqaatigineqarpoq. Periaatsit aalajangersakkami taakkartorneqartut malillugit Naalakkersuisut inissiamik tunisisarnissaannik aalajangersakkami pisussaaffiliisoqanngilaq. Inissiaq taarsigassarsisumiit Namminersornerullutik Oqartussanut nuunneqarnermini Namminersornerullutik Oqartussanit pigineqalissaaq, taamaattumillu tamatuma kingorna Namminersornerullutik Oqartussat pigisaannut maleruagassat malittarisassallu malillugit Namminersornerullutik Oqartussanit atorneqarsinnaalissalluni. Assersuutigalugu Naalakkersuisut inissiaq inissiatut attartortittakkatut imaluunniit inisseqqiffittut atorsinnaavaat.

Inissianik tunisisarnermi periaatsit aalajangersakkami tulleriiaagaanngitsumik taakkattorneqarput.

Imm. 2-mut

Aalajangersakkami tunisinermut aningaasartuutinik kina akiliisussaanersoq, aammalu tunisinermut aningaasartuutit qanoq ilillutik Naalakkersuisunit taarsigassarsisussap taarsigassarsiassaanut ilanngunneqassanersut aalajangersarneqarpoq.


§ 39-mut

Aalajangersagaq najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 21a, imm. 2-mut assingusuuvoq.

Imm. 1-imut

Aalajangersagaq taarsigassarsiallip inissiami Naalakkersuisunit taarsigassarsianut akiliutinut akiligassanngortunut, akiitsunut akilinngitsuukkanut, akileeqqusissutinut akitsuutinut akiitsullu sinnerinut isumakkeeriffigineqarsinnaaneranut tunngasuuvoq. Aalajangersakkami isertitassatut piumasaqaatit qinerneqarsinnaasut marluk atorneqarput. Isertitassanut piumasaqaatip taarsigassarsiallip inoqutaani siunissami qanittumi isertitassat ukiumut 128.000 koruunit inorlugit annertussuseqalernerinik kinguneqartussamik pisoqareertillugu atorneqarnissaa eqqarsaatigineqarpoq. Assersuutigalugu taarsigassarsialik siusinaartumik pensionisiaqalersimasinnaavoq utoqqalinersiutisiaqalersimasinnaalluniluunniit, taarsigassarsiallip aappani inooqatiniluunniit annaasimasinnaavaa, taamaattumillu taarsigassarsiallip inoqutaani isertitassat siornatigumut naleqqiullugu ataavartussamik appangaatsiartussatut naatsorsuutigisariaqalersimallutik.

Imm. 2-mut

Isertitassanut killiliussanut imm. 1-imi taaneqartunut tunngatillugu taarsigassarsialik 18-it inorlugit ukiulinnik angerlarsimaffimmi najugaqartunik qitornaqarpat, isertitassanut killiliussaq 128.000 koruuniusoq meeqqamut ataatsimut 4.000 koruuninik qaffanneqartassaaq. Tamanna meeqqanut amerlanerpaamik arfinilinnut atuuppoq.

Assersuutigalugu taarsigassarsialik tallimanik angerlarsimaffimmi najugaqartunik qitornaqaruni, taarsigassarsialik ukiumut inoqutigiinni akileraaruteqaataasussanik 148.000 koruunit inorlugit isertitaqartarsimaguni, akiitsumi isumakkeerfigineqarnissaannik qinnuteqarsinnaavoq.


§ 40-mut

Aalajangersagaq najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 10a, imm. 1-3-mut assingusuuvoq.

Imm. 1-imut

Aalajangersagaq taarsigassarsiallip inissiami taarsigassarsianut akiliutit akiligassanngortut, akiitsut akilinngitsuukkat, akileeqqusissutinut akitsuutit akiitsullu sinneri taarsigassarsianut erniaqanngitsunut akilersugassaanngitsunullu, piffissap ingerlanerani nalikilliartuaartussanut allanngortinnissaannut periarfissaqarneranut tunngasuuvoq. Aalajangersakkami isertitassatut piumasaqaatit qinerneqarsinnaasut marluk atorneqarput.

Isertitassanut piumasaqaatip taarsigassarsiallip inoqutaani siunissami qanittumi isertitassat ukiumut 180.000 koruunit inorlugit annertussuseqalernerinik kinguneqartussamik pisoqareertillugu atorneqarnissaa eqqarsaatigineqarpoq. Assersuutigalugu taarsigassarsialik siusinaartumik pensionisiaqalersimasinnaavoq utoqqalinersiutisiaqalersimasinnaalluniluunniit, taarsigassarsiallip aappani inooqatiniluunniit annaasimasinnaavaa, taamaattumillu taarsigassarsiallip inoqutaani isertitassat siornatigumut naleqqiullugu ataavartussamik appangaatsiartussatut naatsorsuutigisariaqalersimallutik.

Imm. 2-mut

Taarsigassarsialik 18-it inorlugit ukiulinnik angerlarsimaffimmi najugaqartunik qitornaqarpat, isertitassanut killiliussaq 180.000 koruuniusoq meeqqamut ataatsimut 4.000 koruuninik qaffanneqartassaaq. Tamanna meeqqanut amerlanerpaamik arfinilinnut atuuppoq.

Assersuutigalugu taarsigassarsialik arfineq marlunnik qitornaqaruni, taarsigassarsialik ukiumut inoqutigiinni akileraaruteqaataasussanik 204.000 koruunit inorlugit isertitaqartarsimaguni, akiitsumi taarsigassarsiatut erniaqanngitsutut akilersugassaanngitsutullu allanngortinneqarnissaannik qinnuteqarsinnaavoq. Tassalu meeqqat arfineq aappassaannut 4.000 koruuninik ilanngaasiisoqassanngilaq.

Imm. 3-mut

Taarsigassarsiallip akiitsui sinneqaratik taamaallaalli akilinngitsuukkanik akiitsoqartillugu, taarsigasarsiallip akiitsuinik allanngortitsisarneq aalajangersakkami pineqarpoq. Taamaattoqartillugu akiitsut ingerlaannartumik taarsigassarsiatut erniaqanngitsutut akilersugassaanngitsutullu, annertoqqatigiinnik aningaasartalerlugit qaammatini 60-ini nalikilliartuaartinneqartussatut allanngortinneqassapput.

Taarsigassarsiallip inissiamik Naalakkersuisunut utertitsisinnaatitaanera aalajangersakkami kalluarneqanngilaq, taarsigassarsiat imaluunniit taarsigassarsiat arlallit taarsigassarsiatut erniaqanngitsutut akilersugassaanngitsullu allanngortinneqaraluartut inissiamut taarsigassarsiat ingerlaannartussaammata.


§ 41-mut

Aalajangersagaq najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 10a, imm. 4-p immikkoortuanut tullermut aamma § 21a, imm. 3-p immikkoortuanut tullermut assingusuuvoq.

Tunngavissat Naalakkersuisut qinnuteqaammik suliarinninnerminni pingaartitassaat aalajangersakkami taaneqarput.

Taarsigassarsiallip nalilinnit pigisai inuussutissarsiorsinnaaneratullu naatsorsuutigisaq kiisalu illup pisoqaassusaa aammalu niuernikkut nalinga Naalakkersuisut pingaartissavaat. Kisiannili qinnuteqartoq akiitsuminik isumakkeerfigineqarsinnaanersoq imaluunniit akiitsui allanngortinneqarsinnaanersut pillugit naliliiniarnermi, akiitsut sinnerisa annertussusaat immikkut pingaarutilittut inissisimanngilaq. Taamaattumik taarsigassarsiat annikitsut annertuullu isumakkeeriffigineqarsinnaapput allanngortinneqarsinnaallutilluunniit.

Aamma aalajangersakkami nr. 1-4-mi tunngavissat allat, Naalakkersuisut qinnuteqaammik suliarinninnerminni pingaartitassaat taaneqarput:

Nr. 1-imut

Inissiaq kuuginnartumik imeqanngippat, kuuffeqanngippat innaallagiaqanngippallu, atortulersuutit taaneqartut pigineqarnerannut sanilliullugu inissiap teknikkikkut aningaasaqarnikkullu nalinga appasinnerusumik aalajangersarneqassaaq. Tamanna piginnittup akiitsuminik isumakkeerfigineqarsinnaaneranut akiitsuisaluunniit allanngortinneqarsinnaanerinut tapertaassaaq.

Nr. 2-mut

Inissiaq iluarsaateqqammersimappat, soorlu nutaanik igalaalerneqarsimappat, nutaamik qalialerneqarsimappat nutaamilluunniit oqorsaqqinneqarsimappat, tamatuma kingunerisaanik inissiap iluarsaanneqannginneranut sanilliullugu inissiap teknikkikkut aningaasaqarnikkullu nalinga qaffasinnerusumik aalajangersarneqassaaq. Tamanna piginnittup akiitsuminik isumakkeerfigineqarsinnaaneranut akiitsuisaluunniit allanngortinneqarsinnaanerinut akerliuvoq.

Nr. 3-mut

Inissiamik piginnittoq akilinngitsuukkaminik akiitsoqarpat, tamatumalu peqatigisaani piginnittoq najukkami pisortat inissiaataannut attartortittakkamut innersuunneqarnissamut periarfissaqarpat, ilaatigut ineqarnermut tapiiffigineqarsinnaalluni, tamanna piginnittup akiitsuminik isumakkeerfigineqarsinnaaneranut akiitsuisaluunniit allanngortinneqarsinnaanerinut akerliuvoq.

Nr. 4-mut

Ataatsimut isigalugu akiitsunik isumakkeerisarneq taamaallaat atorneqartariaqarpoq, inissiaq niuernikkut naleqangippat aammalu taarsigassarsiallip qaammatikkaartumik akiliutiminik akiliisinnaanissaa ilimanaateqanngippat. Piumasaqaatit taakku naammassineqarsimanngippata, akiitsunik allanngortitsisarneq ataatsimut isigalugu atorneqartariaqarpoq. Taarsigassarsialik akiitsunik isumakkeerfigineqarnissamik qinnuteqarnermigut iluanaarniarsimasinnaavoq, taarsigassarsiallip akiitsuminik isumakkeerfigineqarnermigut inissiap nalinga maannarpiaq iluanaarutigisinnaammagu. Akiitsunik allanngortitsinissamik qinnuteqartarnermi iluanaarniarsinnaaneq taanna atuutinngilaq, taarsigassarsiallip inissiap nalinganit iluanaarutigisinnaasani aatsaat akiitsut nunguppata pissarsiarisinnaammagit.

Akiitsunik allanngortitsisarneq taarsigassarsialinnut, illoqarfinni nalinginnaasumik inissiap niuernikkut naleqartutut naatsorsuutigineqarnera peqqutigalugu akiitsunik isumakkeerinissamut itigartitsiviusartuni ataatsimut isigalugu atorneqartariaqarpoq. Illoqarfinni taakkunani taarsigassarsialik, inoqutigiinni ukiumut akileraaruteqaataasussanik, assersuutigalugu 110.000 koruuninik isertitaqartartoq, taarsigassarsialittuulli inoqutigiinni ukiumut akileraaruteqaataasussanik, assersuutigalugu 175.000 koruuninik isertitaqartartutuulli taarsigassarsiaminik allanngortitsisinnaasariaqarpoq.


§ 42-mut

Aalajangersagaq nutaajuvoq, aammalu allaffissornermi suleriaasiusumik aalajangersimasumik inatsisitigut tunngaviliilluni.

Imm. 1-imut

Inissiamut, taarsigassarsiallip pigiunnaariigaanut, aammalu utertitsinermut imaluunniit Naalakkersuisut inissiamik utertitsillutik tigusinerannut atatillugu akiitsut naatsorsorneqareersimappata, akiliutinut akiligassanngortinneqartunut, akiitsunut akilinngitsuukkanut, akileeqqusissutinut akitsuutinut akiitsullu sinnerinut taarsigassarsiallip isumakkeeriffigineqarsinnaaneranut aalajangersagaq tunngasuuvoq. Tassalu aalajangersakkakkut akornusersimaneqanngilaq taarsigassarsiallip inissiami najukkamini, kisiannili taarsigassarsiallip pigiunnaarsimasaani akiligassanut akiligassanngortinneqartunut, akiitsunut akilinngitsuukkanut, akileeqqusissutinut akitsuutinut akiitsullu sinnerinut isumakkeeriffigineqarnissaa. Assersuutigalugu taarsigassarsiallip inissiaq inummut najugaqatigisaminut tunniussimasinnaavaa.

Imm. 2-mut

Aalajangersagaq inissiamut, taarsigassarsiallip pigiunnarsimasaanut tunngasuuvoq, tassanilu tunngavissat taarsigassarsiallip akiliutinut akiligassanngortinneqartunut, akiitsunut akilinngitsuukkanut, akileeqqusissutinut akitsuutinut akiitsullu sinnerinut isumakkeeriffigineqarnissaanik Naalakkersuisut naliliiniarnerminni pingaartitassaat taaneqarput. Ataatsimut isigalugu Naalakkersuisut taarsigassarsialik, inissiamik piginnittuuginnarnerminut naleqqiullugu taarsigassarsiat tunngavigalugit nalilinnik iluanaarutaasinnaasunik piginnittuujunnaarsimappat isumakkeerfigineqarsinnaanersoq ajornannginnerusumik naliliiffigisalissavaat.


§ 43-mut

Aalajangersagaq oqaasertamigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 10a, imm. 5-imut assingusuuvoq.

Aalajangersagaq akiligassanngortitsisarnissamut aalajangersagaavoq. Taarsigassarsialik tammarsimappat tamanna eqqartuussivitsigut aalajangiiffigineqartariaqarpoq, tassanilu taarsigassarsiallip tammarsimanera, taamaalillunilu tammarsimasut pillugit inatsimmi, kingusinnerusukkut allannguuteqartinneqartumi § 5 naapertorlugu toqusimasutut naatsorsuutigineqarnera aalajangiiffigineqassaaq. Nalinginnaasumik tammarsimasut, kingullermik suli inuusutut ilisimaneqarnerminniit ukiut tallimat qaangiunnerini toqusimasutut nalunaarutigineqartarput, tak. tammarsimasut pillugit inatsisip nalunaarutigineqarnera nr. 766, 4. august 2005-imeersoq.

Aalajangersagaq piginnittut nikinnerannut nassuiaatinik imaqarpoq.


§ 44-mut

Aalajangersagaq nutaajuvoq, aammalu maannamut allaffissornikkut suleriaasiusumik ersersitsiviunani.

Imm. 1-imut

Aalajangersakkap atuutilerneratigut taarsigassarsiallit, aningaasaqarnikkut annertuumik ajornartorsiuteqartut inissiamut tunngatillugu Naalakkersuisunut taarsigassarsiaminnut akilersuutinut akiliisarnerminnik kinguartitsigallarsinnaapput, tamatumani taarsigassarsiallit akiliutinut akiligassanngortinneqartunut, akiitsunut akilinngitsuukkanut, akileeqqusinermut akitsuutinut akiitsullu sinnerinut isumakkeeriffigineqarnissamik imaluunniit allanngortitsinissamik piumasaqaatinik naammassinnissimanngippata. Aalajangersagaq ilaatigut inissianik, Naalakkersuisunit taarsigassarsititsiviusimasunik piginnittut amerlanerusut qaammatikkaartumik akiliutissanik akilersuinerminnik unitsitsivinnissaat pinngitsoorniarlugu ikkunneqarpoq, ilaatigullu Namminersornerullutik Oqartussat inissianik pinngitsaaliissummik arsaarinninnissaat, taamaalillutillu ilaqutariinnik allamut inisseqqitassanngorlugit anisitsisarnissaat pinngitsoorniarlugu ikkunneqarluni.

Akiliisarnermik kinguartitsigallartarnermik aaqqissuussineq immaqa taarsigassarsiallit kingusinnerusukkut Naalakkersuisunit taarsigassarsiaminnut qaammatikkaartumik akiliisarnerminnik ingerlatitseqqinnissaannut ikiorsiissutaasinnaavoq.

Akiliisarnermik kinguartitsigallartarnermik aaqqissuussineq taarsigassarsiallip atuinermut, tassalu innaallagissamut, imermut kiassarnermullu aningaasartuutinut akiliisannginnissaanik tungaviliinngilaq.

Imm. 2-mut

Aalajangersagaq malillugu Naalakkersuisut akiliisarnermik kinguartitsigallarsinnaapput, nr. 1-imi imaluunniit 2-mi piumasaqaatit naammassineqarsimappata.

Aalajangersakkami nr. 1-imut tunngatillugu taarsigassarsiallip akilersuutiminik akiliisarnermik aallartitseqqissinnaanissaa annertuumik qulakkeerneqassaaq. Assersuutigalugu taarsigassarsialik napparsimasinnaavoq, ukiup ataatsip iluani aaqqinnissaa ilimanaateqarluni.

Aalajangersakkami nr. 2-mut tunngatillugu taarsigassarsiallip sivisunerpaamik ukiut marluk ingerlanerini akiitsuminik isumakkeerinniffigineqarnissamut allanngortitsinissamullu piumasaqaatinik naammassinnissinnaalernissaa annertuumik qularnaateqassanngilaq.

Imm. 3-mut

Taarsigassarsiallip akiliisarnerminik kinguartitsigallarnissaa Naalakkersuisunit akuerineqassanersoq Naalakkersuisut naliliiniarneranni, taarsigassarsiallip kingusinnerusukkut akilersuinerminik aallartitseqqissinnaanissaanut tamakkiisumik takussutissiisussatut pisut pingaartinneqartussat siunertaqarput.


§ 45-mut

Aalajangersagaq najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 21b, imm. 1-ip immikkortuanut siullermut aamma imm. 2-mut assingusuuvoq.

Imm. 1-imut

Aalajangersakkap atuutilerneratigut Naalakkersuisut inissianik, inunnit ukiuni akileraaruteqarfiusuni kingullerni marlunni inoqutigiinni ukiumut 180.000 koruunit inorlugit akileraaruteqaataasussanik isertitaqarsimasunit pigineqartunik iluarsaassinissamut, alliliinissamut pitsanngorsaanissamulluunniit annerpaamik 100.000 koruuninik tapiissuteqarsinnaapput.

Aaqqissuussinerup aamma siunissamut sammisuunissaa qulakkeerniarlugu, Naalakkersuisut inunnut, inoqutigiinni isertitat maanna qanoq annertussuseqarnerat apeqqutaatinnagu siunissami qanittumi inoqutigiinni ukiumut 180.000 koruunit inorlugit isertitaqartussatut naatsorsuutigineqartunut taarsigassarsititsisinnaalissapput. Siunissap qanittup oqaatigineqarnerani eqqarsaatigineqarpoq inuup inoqutaani siunissami qanittumi isertitassat ukiumut 180.000 koruunit inorlugit annertussuseqalernerinik kinguneqartussamik pisoqareersimasoq. Assersuutigalugu taarsigassarsialik siusinaartumik pensionisiaqalersimasinnaavoq utoqqalinersiutisiaqalersimasinnaalluniluunniit, taarsigassarsiallip aappani inooqatiniluunniit annaasimasinnaavaa, taamaattumillu taarsigassarsiallip inoqutaani isertitassat siornatigumut naleqqiullugu ataavartussamik appangaatsiartussatut naatsorsuutigisariaqalersimallutik.

Imm. 2-mut

Tapiissutinik pissarsinissamut piumasaqaataavoq, maanna piginnittuusut taarsigassarsiaqartuullutik inissiaq Namminersornerullutik Oqartussanit taarsigassarsiaqarfiusoq taarsigassarsiaqarfiusimalluniluunniit. Aalajangersakkami siunertaavoq, aammattaaq akissaatikinnerusut inissiamik najukkaminnik aserfallatsaaliuinissamut, kiisalu inissiamik najukkaminnik alliliinissamut periarfissaqartinneqarnissaat. Inuilli ukiuni akileraaruteqarfiusuni kingullerni marlunni inoqutigiinni ukiumut akileraaruteqaataasussanik 180.000 koruuninik amerlanerusunilluunniit isertitaqarsimasut, siunnersuummi § 24 naapertorlugu inissiami najukkaminni alliliinissamut pitsanngorsaanissamulluunniit qinnuteqarnissamut periarfissaqarput.

Inissiat, Naalakkersuisunit taarsigassarsiaqarfiujunnaarsimasut, aammalu Naalakkersuisunit taarsigassarsiaqarfiunnginnerminni tunineqarsimasut aaqqissuussinerup avataaniipput. Tamatumunnga tunngaviuvoq, inissiat niuerutigineqarnerminni pisortanit taarsigassarsiaqarfiunnginnera.

Imm. 3-mut

Aalajangersagaq malillugu isertitassanut killiliussat meeqqamut ataatsimut, 18-it inorlugit ukiulimmut angerlarsimaffimmi najugaqartutut inuit allattorsimaffianni nalunaarsorsimasumut ataatsimut 4.000 koruuninik qaffanneqartassapput. Tamannali meeqqanut amerlanerpaamik arfinilinnut atuutissaaq.


§ 46-mut

Aalajangersagaq najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 21b, imm. 1-ip immikoortuanut tullermut, imm. 3-mut aamma 4-mut assingusuuvoq.

Imm. 1-imut

Naalakkersuisunit tapiissutinik ataasiarluni arlaleriarluniluunniit pissarsereersimagaanni, tapiissutinik qinnuteqarsinnaanermut piffissamik aalajangersakkami killiliisoqarpoq.

Piffissaq qinnuteqarfiusoq tassaavoq piffissaq Naalakkersuisut qinnuteqaammik tigusiffiat allakkanillu isertutut nalunaarsuiffiat.

Imm. 2-mut

Aalajangersakkami Naalakkersuisut tapiissutinik qinnuteqaammik naliliiniarneranni tunngavissat aalajangersarneqarput.

Aalajangersakkami illoqarfinni anginerusuni, realkredittimit aningaaserivinnilluunniit taarsigassarsinissamut periarfissaqarfiusuni inissianik piginnittut aaqqissuussinermik atuisinnaanissaat siunertarineqanngilaq. Tamatumunnga tunngaviusoq tassaavoq, inissiaq Naalakkersuisunit taarsigassarsiaqarfiusoq amerlanertigut akiitsut saniatigut naleqartarmat, taannalu Naalakkersuisut taarsigassarsiarititaat akilerneqaraluarpata atorneqarsinnaalertussaavoq taarsigassarsianullu qularnaveeqqusiunneqarsinnaalertussaalluni. Tassalu tassani inissianik Naalakkersuisunut taarsigassarsiaqarfiusunut piginnittut tamarmik piffissami pineqartumi imaluunniit siunissami 180.000 koruunit inorlugit isertitaqartussat Nunap Karsianiit tapiissutinik tapersiiffigineqarsinnaanissaat siunertarineqanngilaq.

Imm. 3-mut

Aalajangersagaq Naalakkersuisunut piginnaatitsisarnissamik aalajangersagaavoq. Suliassat suut tapiiffigineqarsinnaanissaannut tunngatillugu pingaartumik suliassat, inissiap pitsaassusaanik allanngutsaaliutaasut aammalu illup maanna qanoq issusianut atorneqarneranullu naapertuuttut eqqarsaatigineqarput.


§ 47-mut

Aalajangersagaq nutaajuvoq, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 1, nr. 2-p ilaanut taartaalluni.

Tapiissuteqarfiusussat taarsigassarsitinneqartussallu inunnut namminersorsinnaassuseqartunut killilerneqarnerisigut, inuit namminersorsinnaajunnaarsinneqarsimasut kiisalu meeqqat 18-it inorlugit ukiullit kapitali manna naapertorlugu tapiiffigineqarnissamik taarsigassarsitinneqarnissamilluunniit qinnuteqarsinnaatitaanngillat, taamatullu pisussaatitaasut piginnaatitaasullu tapiiffigineqarnissamik taarsigassarsitinneqarnissamilluunniit qinnuteqarsinnaatitaanatik.

Kiisalu tapiiffigineqartut taarsigassarsitinneqartulluunniit nunami najugaqartutut inuit nalunaarsorsimaffianni nalunaarsorsimassapput.


§ 48-mut

Aalajangersagaq nutaajuvoq, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 22, imm. 1-3-mut taartaalluni.

Imm. 1-imut

Aalajangersagaq malillugu Naalakkersuisut illunik sanaqataaffiusunik pigisaqalernissamut taarsigassarsititsisinnaapput. Illu sanaqataaffiusoq tassaavoq, illu aalajangersimasumik suussusilik katiteriaannartut aammalu sumiiffimmi sananeqartussatut tunniunneqarsinnaasoq. Peqqussutissatut siunnersuutip atuutilerneratigut illunik sanaqataaffiusunik aaqqissuussineq, nammineerluni illulianut aaqqissuussinermut atuuttumut taartaasussaq atuutsinneqalissaaq. Illup sanaqataaffiusup aammalu nammineerluni illuliassap assigiinngissutaat illutarpiassaanut atortussanut tungasuunngilaq. Assigiinngissutaali illumik sananermiippoq. Illu sanaqataaffiusoq avataaniit ikiorserneqarluni sananeqartassaaq, aaqqissuussinerli maanna atuuttoq nammineerluni illuliassat amerlanertigut ikiorteqarani sananeqartarput, tamatumalu nassatarisaanik sananermut atortussat akuttunngitsumik asiutinneqartarput, nammineerluni illuliortup illumik naammassinnissimannginnera peqqutigalugu.

Aalajangersakkami nunap aggornerinut killilersuutinik aalajangersaasoqanngilaq, taamaattumillu illumik sanaqataaffiusumik kissaateqarluni taarsigassarsiniarluni qinnuteqartoq sumiluunniit najugaqaraluarpat, tassalu nunaqarfimmiikkaluarpat illoqarfimmiikkaluarpalluunniit Naalakkersuisut taarsigassarsititsisinnaapput.

Imm. 2-mut

Aalajangersagaq malillugu Naalakkersuisut inissiamik pioreersumik, Naalakkersuisunit taarsigassarsititsivigineqareersimasumik pigisaqalernissamut taarsigassarsititsisinnaapput. Aalajangersakkami § 38, imm. 1, nr. 2-mut innersuussinerup kingunerisaanik atuiffiusussat tassaalerput illut, siornatigut taarsigassarsiffiusimasut Naalakkersuisunut utertinneqarsimasut imaluunniit taarsigassarsiallit taarsigassarsiaminnik sumiginnaasimanerat peqqutigalugu Naalakkersuisut tigusimasaat. Tassalu atuiffiusinnaasut tassaapput illut inoqanngitsut, Namminersornerullutik Oqartussanit pigineqartut.

Imm. 3-mut

Aalajangersagaq malillugu Naalakkersuisut nammineerluni illulianik naammassineqanngitsunik pioreersunik pigisaqalernissamut taarsigassarsititsisinnaapput. Atuiffiusussat tassaapput nammineerluni illuliat naammassineqanngitsut, peqqussut atuuttoq malillugu Naalakkersuisut taarsigassarsititsivigisimasaat. Tamatuma kingunerisaanik nammineerluni illuliat Naalakkersuisunit tiguneqarsimapput, taamaalillunilu taarsigassarsisuusimasup illu naammassisimanngimmagu Naalakkersuisunit pigineqalersimalluni.

Imm. 4-mut

Naalakkersuisut illuliassat sanaqataaffiusussat aalajangersimasut suut taarsigassarsititsivigineqartassanersut aalajangereerunikku, Naalakkersuisut suliassanut aningaasaqarnermullu tunngassuteqartut eqqarsaatigalugit nammineerluni illuliassat assigiissaakkat ikittuinnaat, atuinissamut periarfissanik pisariaqartitat assigiinngitsut eqqarsaatigalugit qanorluunniit ilusilersorneqarsinnaasut toqqassavaat. Naalakkersuisut ilusilersuinissamut atuinissamut periarfissanut piumasaqaatinik aalajangersaasimagunik, illut sanaqataaffiusut suut taarsigassarsivigitinneqartassanersut pillugu aalajangernerminni maleruagassat taakku malissavaat.


§ 49-mut

Aalajangersagaq nutaajuvoq, aammalu Naalakkersuisut taarsigassarsiarititaasa sumut tunnganissaannut nassuiaaffiulluni.

Imm. 1-imut

Aalajangersagaq malillugu Naalakkersuisut taarsigassarsiarititassaat tamatigut illuliassanut sanaqataaffiusussanut, sumiiffimmut tunniunneqartussanut tunngasuupput. Naalakkersuisut illunik aalajangersimasunik atortussiortartumut, illuliassanut sanaqaaffiusussanut atortussanik pisinissamut nassiussinissamullu isumaqatigiissuteqartarput. Pisinissamut isumaqatigiissut aningaasartuutissallu allat, soorlu assartuinermut tunngasut, aningaasartuutissanik uppernarsarneqarsimasunik tamakkiisunik aalajangiiniarnermi tunngavigineqartarput. Taamaalilluni Naalakkersuisut atortussanik pisinermut umiarsuakkullu nassiussinermut uppernarsaatissanik pissarsinermikkut aningaasartuutissat tamakkiisut uppernarsartussaavaat.

Imm. 2-mut

Aalajangersagaq malillugu Naalakkersuisut taarsigassarsiarititaat tamatigut illumi pioreersumi atortussanut ilassutaasussanut, inissiaq najugaqarfigineqarsinnaasunngorlugu suliarineqarnissaanut pisariaqartunut tamatigut atorneqartartussaapput. Atortussat sumiiffimmut tunniunneqassapput. Atortussanik ilassutissanik pisinissamut isumaqatigiissut, kiisalu assersuutigalugu assartuinissamut aningaasartuutit ilassutissaat aningaasartuutinik uppernarsarneqarsimasunik tamakkiisunik aalajangersaaniarnermut tunngavigineqassapput. Taamaalilluni Naalakkersuisut atortussanik pisinermut umiarsuakkullu nassiussinermut uppernarsaatissanik pissarsinermikkut aningaasartuutit tamakkiisut uppernarsartussaavaat. Tamatuma saniatigut Naalakkersuisut nammineerluni illuliamik pioreersumik tigusinermut akiusussamik aalajangersaasussaapput.

Imm. 3-mut

Aalajangersagaq malillugu Naalakkersuisut nammineq illuliamut pioreersumut naammassineqanngitsumut taarsigassarsiarititaat, inissiap najugaqarfigineqarsinnaasunngorlugu suliarineqarnissaanut atortussanut ilassutaasussanut pisariaqartunut atorneqartussaapput. Atortussat sumiiffimmut tunniunneqassapput. Atortussanik ilassutissanik pisinissamut isumaqatigiissut, kiisalu assersuutigalugu assartuinissamut aningaasartuutit ilassutissaat aningaasartuutinik uppernarsarneqarsimasunik tamakkiisunik aalajangersaaniarnermut tunngavigineqassapput. Taamaalilluni Naalakkersuisut atortussanik pisinermut umiarsuakkullu nassiussinermut uppernarsaatissanik pissarsinermikkut aningaasartuutit tamakkiisut uppernarsartussaavaat. Tamatuma saniatigut Naalakkersuisut nammineerluni illuliamik pioreersumik tigusinermut akiusussamik aalajangersaasussaapput.

Imm. 4-mut

Aalajangersakkami atortussanut ataatsimoorussanut ilassutissat, Naalakkersuisut taarsigassarsititsivigisinnaasaat arlallit malittarisassiuunneqarput. Assersuutigalugu Naalakkersuisut sanaqataasussatut ikiortimut aningaasartuutissanut taarsigassarsititsisinnaapput, taamaalillunilu Naalakkersuisut sanasunik, taarsigassarsiallip illumik sanaqataaffiusumik sananerani ikiuuttussanik atugassiisussaapput.


§ 50-imut

Aalajangersagaq nutaajuvoq, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 24-mut taartaalluni.

Imm. 1-imut

Aalajangersagaq naapertorlugu taarsigassarsialik Namminersornerullutik Oqartussanit taarsigassarsiaminut erniaanut akilersuutitaannullu akiliisassanngilaq.

Imm. 2-mut

Aalajangersakkap atuutilerneratigut taarsigassarsiat piffissap aalajangersimasup iluani akuttoqatigiinnik akilersorneqartassapput.


§ 51-imut

Aalajangersagaq nutaajuvoq, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 24, imm. 1-imut taartaalluni.

Imm. 1-imut

Aalajangersakkap atuutilerneratigut qinnuteqartup inoqutaani isertitat Naalakkersuisut illumut sanaqataaffiusumut taarsigassarsititsisinnaanerannut aalajangiisuussapput.

Imm. 2-mut, 3-mut aamma 4-mut

Aalajangersakkami imm. 2-mi, 3-mi aamma 4-mi qinnuteqartup inoqutaani isertitat tungavigalugit Naalakkersuisut taarsigassarsiarititassaasa annertussusissaat nassuiarneqarput.

Qinnuteqartup inoqutaani isertitat akileraaruteqaataasussat 180.000 koruuniuppata taakkuluunniit inorlugit amerlassuseqarpata, Naalakkersuisut aningaasartuutissat uppernarsarneqarsimasut 95 procentiinik taarsigassarsititsissapput. Qinnuteqartup inoqutaani isertitat akileraaruteqaataasussat 450.000 koruuninit amerlaneruppata, assersuutigalugu 451.000 koruuniuppata, Naalakkersuisut taarsigassarsititsisinnaanngillat. Inoqutigiinni isertitat akileraaruteqaataasussat 15.000 koruuninik qaffanneri tamaasa, Naalakkersuisut taarsigassarsiarititassaat 5 procentpointinik appartinneqartassapput. Periaaseq takussutissiami matuma kingulianiittumi takussutissiorneqarpoq.


§ 52-imut

Aalajangersagaq nutaajuvoq, aammalu qinnuteqartup inoqutaani isertitat akileraaruteqaataasussat kapitali 5-imi nassuiarneqartutut paasineqartussat nassuiarneqarput.

Imm. 1-imut

Aalajangersakkami isertitat akileraaruteqaataasussat naatsorsornerini qinnuteqartoq illumut sanaqataaffiusussamut taarsigassarsitinneqassappat, qinnuteqartup siunissami inoqutigisassai pingaartinneqassapput. Taamaalilluni inissiami, qinnuteqartup maanna najugaani inoqutigiit isertitai pingaartinneqassanngillat.

Tamatumunnga tunngaviuvoq illumi kinguaariit arlallit najugaqatigiittarnerat, taamaattumillu inissiami qinnuteqartup maannakkut najugaani inoqutigiit isertitaat akileraaruteqaataasussat qinnuteqartumut, taassuma aappaanut, qatanngutaanut, angajoqqaavinut, angajoqqaavisa angajoqqaavinut, qitornaanut il.il. tunngasinnaallutik. Taakkulu tassaasinnaapput inuit illumut sanaqataaffiusumut nuuttussaanngitsut.

Illumi sanaqataaffiusumi inoqutigiittut immaqa nooqataasussat isertitaat akileraaruteqaataasussat ilusissaat Naalakkersuisut qinnuteqartup taarsigassarsitinneqarsinnaaneranik naliliiniarneranni tunngavigineqassaaq. Qinnuteqartup inoqutissaatut aappaasoq, inooqataasoq, qitornat angerlarsimaffimmi najugaqartut kiisalu inuit, inooqataasutut isigineqarsinnaanngikkaluarlutik qinnuteqartup inoqutigisassai allat naatsorsuutigineqartarput.

Taamaattumik inoqutigiinni isertitat tassaapput qinnuteqartup, taassuma aappaata inooqataataluunniit aammalu meeqqat angerlarsimaffimmi najugaqartut, tamatumani meeqqat 18-it inorlugit qaangerlugilluunniit ukioqarnersut apeqqutaatinnagu, aammalu inuit, inooqataasutut isigineqarsinnaanngikkaluarlutik qinnuteqartup inoqutigisassaasa isertitassaat akileraaruteqaataasussat tamakkiisut.

Imm. 2-mut

Aalajangersagaq qinnuteqartup piffissami qinnuteqarfiusumi inoqutissamisut nalunaarutigisaasa inoqutigiinnit, illumut sanaqataaffiusumut nuuttussanit ikinnerunnginnissaat qulakkeerniarlugu ikkunneqarpoq. Naalakkersuisut taarsigassarsiarititassaat qinnuteqartup illumut sanaqataaffiusumut iserternerani inoqutigiit nooqataasussatut naatsorsuutigineqartut amerlassusissaat tunngavigalugit naatsorsorneqassapput. Taamaattumik piffissami iserterfiusumi inoqutigiit nalunaarutigineqartunit amerlaneruppata, tamanna tunngavigalugu Naalakkersuisut taarsigassarsiarititassaasa amerlassusissaat aaqqinneqassapput.


§ 53-imut

Aalajangersagaq nutaajuvoq, aammalu inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 23-mut taartaalluni.

Imm. 1-imut

Taarsigassarsiallip nammineerluni aningaasalersuinissamut taarsigassarsiarisimasinnaasai, kiisalu taarsigassarsiallip sanaartorfissagissaanermut akitsuutinut pisortallu innaallagissamut, imermut kuuffinnullu attaviliinissamut piumasaqaataannut uppernarsarneqarsimasunut taarsigassarsiarisimasinnaasai illu sanaqataaffiusoq qularnaveeqqusiullugu taarsigassarsiaritinneqassapput, taannalu qularnaveeqqusiisarneq pillugu Kalaallit Nunaannut inatsit naapertorlugu nalunaarsorneqassaaq.

Imm. 2-mut

Naalakkersuisut illumut sanaqataaffiusumut taarsigassarsiarititaat illumik sanaqataaffiusumik qularnaveeqqusiisinnaatitaanermi taarsigassarsiallip nammineerluni aningaasalersuinissamut taarsigassarsiarisimasinnaasaanut, kiisalu taarsigassarsiallip sanaartorfissagissaanermut akitsuutinut pisortallu innaallagissamut, imermut kuuffinnullu attaviliinissamut piumasaqaataannut uppernarsarneqarsimasunut taarsigassarsiarisimasinnaasaannut tulliutillugu akilerneqartussatut akilerneqarnissaat sallinngoriartuaartussanngorlugu tunniunneqassapput.

Pisortat taarsigassarsiarititaat illup sanaqataaffiusup qularnaveeqqusiunneqarneratigut qularnaveeqqusiisarneq pillugu Kalaallit Nunaannut inatsit naapertorlugu nalunaarsorneqartumik taarsigassarsiaritinneqassapput. Pisortat taarsigassarsiarititaat illu sanaqataaffiusoq qularnaveeqqusiullugu taarsigassarsiaritinneqartillugit, pisortat taarsigassarsiaasa akilerneqarnissaasa tulleriinnilersuinermi inissisimaffiat aalajangersakkami aalajangersarneqarpoq. Kiisalu qularnaveeqqusiisarneq pillugu Kalaallit Nunaannut inatsit aamma qularnaveeqqusiisarnermut maleruagassat nalinginnaasut atuutsinneqarput.

Taarsigassarsiat akilerneqarnissaannik tulleriinnilersuineq imatut takussutissiorneqarsinnaavoq:

Akiligassat Qularnaveeqqummik pigisaqartoq

1a Qinnuteqartup nammineerluni aningaasalersuutissamisut taarsigassarsiarisimasinnaasai (aningaaserivimmit/realkredittimit)

1b Qinnuteqartup sanaartorfissagissaanermut akitsuutinut pisortallu innaallagissamut, imermut kuuffinnullu attaviliinissamut piumasaqaataannut taarsigassarsiarisimasinnaasai (aningaaserivimmit/realkredittimit)

2 Naalakkersuisut illumut sanaqataaffiusumut taarsigassarsiarititai

1a-mi aamma 1b-mi taarsigassarsiat akilersorneqarneranni Naalakkersuisut taarsigassarsiarititaasa akilerneqarnissaat sallinngoriartuaassaaq.


§ 54-imut

Aalajangersagaq nutaajuvoq.

Imm. 1-imut

Aalajangersagaq Naalakkersuisut misileraalluni sanaartornermut taarsigassarsititsisinnaanerannut, tapiissuteqarsinnaanerannut imaluunniit immikkut ittumik ikiorsiisinnaanerannut tunngasuuvoq. Immikkut ittumik ikiorsiinermi pineqartoq tassaasinnaavoq, illup sanaqataaffiusup sananeqarneranut attuumassutilinnut tamanut ikiorsiisarneq. Misileraalluni sanaartorneq tassaasinnaavoq, illumik sanaqataaffiusumik nutaamik, issittup silaannaani misilerarneqartussamik sananeq.

Imm. 2-mut

Illut sanaqataaffiusut siusinnerusukkut sananeqarsimasut, peqqussut atuuttoq malillugu nammineerluni illulianik taaneqartut naliliiffigineqarnerinut atatillugu Naalakkersuisut taarsigassarsititsisinnaanerannut, tapiissuteqarsinnaanerannut imaluunniit immikkut ittumik ikiorsiisinnaanerannut aalajangersagaq tunngasuuvoq. Immikkut ittumik ikiorsiinermi pineqartoq tassaasinnaavoq, illumik sanaqataaffiusumik naliliinermut attuumassutilinnut tamanut ikiorsiisarneq, assersuutigalugu illu maannamut issittumik silaannalimmi atorsinnaasimanersoq pillugu naliliinermi.


§ 55-imut

Aalajangersagaq nutaajuvoq.

Imm. 1-imut

Aalajangersagaq malillugu Naalakkersuisut kommunimut illumik sanaqataaffiusumik pigisaqalernissamut tapiissuteqarsinnaapput.

Imm. 2-mut

Aalajangersakkami nassuiaatigineqarpoq Naalakkersuisut sunut tapiisinnaanersut. Tapiiffigineqartut tamatigut tassaasarput, illuliassat sanaqataaffiusussat sumiiffimmut tunniunneqartut. Taakku saniatigut tapiissutit allanut tunngasuusinnaapput, soorlu sanaqataasunit ikiorserneqarnermut ilitsersorneqarnermullu aningaasartuutinut. Aningaasartuutissat Naalakkersuisunit tapiiffigineqanngitsut kommunip akilissavai.


§ 56-imut

Aalajangersagaq nutaajuvoq.

Imm. 1-imut

Aalajangersakkami allassimavoq, illumut sanaqataaffiusussamut taarsigassarsinissamik qinnuteqaat kingusinnerpaamik decembarip ulluisa aallaqqaataanni Naalakkersuisunut nassiunneqassasoq. Tamatumunnga tunngaviusoq tassaavoq taarsigassarsinissamik qinnuteqaatip Naalakkersuisunit suliarineqartussaanera, kiisalu illunut sanaqataaffiusunut atortussanik inniminniisoqarnissaanik, poortuisoqarnissaanik aammalu ukiup tulliani upernaap aasalluunniit, illup sanaqataaffiusup sananeqarfissaata ingerlanerani umiarsuakkut nassiussivissamut assartorneqarnissaannik isumaginnittussaanerat. Sumiiffinni arlalinni ukiumut taamaallaat ataasiarluni marloriarluniluunniit umiarsuaqartarpoq, aammalu silap pissusaa peqqutaalluni illut sanaqataaffiusut sananeqarnissaasa aasaanerani ingerlanneqarnissaa pitsaanerpaasarpoq. Naalakkersuisut piffissap qinnuteqarfiusup uniorneqarnissaanik immikkut ittumik akuersissuteqarsinnaanngillat. Assersuutigalugu qinnuteqaat decembarip ulluisa pingajuanni tiguneqarpat, qinnuteqaat toqqorneqassaaq, ukiullu tulliani qinnuteqaatinut takkuttunut allanut ilanngunneqarluni suliarineqassalluni.

Imm. 2-mut

Aalajangersakkap immikkoortuani 2-mi qinnuteqaat sunik ilaqartinneqassanersoq aalajangersarneqarpoq. Paasissutissat taakku ilanngunneqarsimanngippata, qinnuteqartup illumut sanaqataaffiusumut taarsigassarsinissamik qinnuteqaataa qinnuteqaatinut allanut, decembarip ulluisa aallaqqaataat sioqqullugu nassiunneqarsimasunut paasissutissanillu attuumassutilinnik ilaqartinneqartunut ilanngullugu suliarineqarsinnaassanngilaq.

Taarsigassarsinissamik qinnuteqartup nammineerluni aningaasalersuutissaminut uppernarsaataa amerlanertigut tassaasarpoq, taarsigassarsiniarluni qinnuteqartup aningaaserivianiit uppernarsaat naatsoq, tassanilu taarsigassarsinissamik qinnuteqartup aningaasalersuinermi akiligassaminik akiliisinnaanera allassimasarpoq. Nunaminertamik inniminniinermut uppernarsaat kommunimit pissarsiarineqartarpoq, tassanilu kommunip taarsigassarsinissamik qinnuteqartup illumik sanaqataaffiusumik sananissamut nunaminertamik inniminniisimanera uppernarsartarpaa.

Kiisalu imm. 2-mi aalajangersarneqarpoq qinnuteqartoq ukiuni kingullerni tallimani sulisimanngippat Naalakkersuisut taarsigassarsititsisinnaanngitsut. Aalajangersakkami siunertarineqarpoq piffissami sivikitsumi isertitakinnerup, soorlu ilinniarnermik suliffissaaleqinermillu peqquteqartumik, isertitat naatsorsornerinut sunniuteqarujussuarnera peqqutigalugu qinnuteqartup itigartitaanissaata pinngitsoorneqarnissaa. Ukiut tallimat ingerlanerini isertitanik agguaqatigiisitsisarnikkut tamanna pinngitsoorneqarsinnaavoq. Qinnuteqartoq ukiut kingulliit tallimat ingerlanerini sulisimassaaq, qinnuteqartoq ukiuni tallimani kingullerni ingerlaannartumik sulisimappat, imaluunniit qinnuteqartoq ukiut tallimat kingulliit ingerlanerini piffissami ataatsimi arlalinniluunniit sulisimappat.


§ 57-imut

Imm. 1 aamma 2 najoqqutassatigut allannguuteqartinneqarlutik inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 22, imm. 5-imut assingusuupput.

Imm. 1-imut

Aalajangersakkami siunertarineqarpoq taarsigassarsinissamut neriorsuutit tunniunneqartut atorneqarsinnaanerannik atorunnaarsinneqarsinnaanerannillu qulakkeerinissaq. Taarsigassarsinissamut neriorsuutip suliarineqarnerinut peqatigitillugu Naalakkersuisut suliffeqarfimmut, assersuutigalugu illumut sanaqataaffiusumut atortussanik pisinissamik isumaqatigiissuteqassapput. Suliassaq naammassineqanngippat taarsigassarsiassatut aningaasaliissutit Naalakkersuisunut utertinneqarnissaat aammalu siunertanut allanut tulleriiaarinermi atorneqarsinnaanissaat pingaaruteqarpoq.

Imm. 2-mut

Aalajangersakkap atuutilerneratigut Naalakkersuisut pisuni immikkut ittuni imm. 1-imi piffissamut killiliussat taaneqartut uniorneqarnissaannut immikkut ittumik akuersissuteqarsinnaapput. Immikkut ittumik akuersissuteqarsinaanerup pingaartumik illup sananeqarnerata ingerlalluareernerani, kiisalu atuilernissamut akuersissutip suliarineqarnissaata kisimi utaqqisaanerani atorneqarsinnaanera eqqarsaatigineqarpoq. Aalajangersakkami eqqarsaataasoq pingaarneq tassaavoq Naalakkersuisut taarsigassarsiarititaasa atorneqarnissaat, taamaalillunilu sanaartukkap piffissamut pilersaarutaasoq annikitsumik uniorneqaraluartoq naammassineqarnissaa.

Imm. 3-mut

Illumik sanaqataaffiusumik piginittuusinnaatitaanerup piffissap qanoq ilinerani Naalakkersuisuniit taarsigassarsisumut nuunneqartarnissaa aalajangersakkami aalajangersarneqarpoq.

Suleriaaseq malillugu Naalakkersuisut illumut sanaqataaffiusussamut atortussanik pisinissaq pillugu pilersuisumut isumaqatigiissusiortarput. Tamatuma kingorna atortussat pilersuisumiit nassiussivissamut assartorneqarnissaat pillugu Naalakkersuisut isumaqatigiissusiortarput. Illumut sanaqataaffiusumut piginnittuusinnaatitaaneq aatsaat taarsigassarsisumut nuunneqassaaq, qularnaveeqqusiussaqarluni taarsigassarsititsinermi allagartaq nalunaarsorsimasoq uparuagassartaqanngitsoq tiguneqarpat.

Illu sanaqataaffiusussaq sananeqanngitsuussagaluarpat Naalakkersuisut atortussanik atuisinnaanerannik qulakkeerinissaq aalajangersakkami siunertarineqarpoq, tassunga atortussat peerlugit allamut tunniunneqarsinnaanerat ilaalluni.


§ 58-imut

Aalajangersagaq najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 25, imm. 3-mut aamma 4-mut assingusuuvoq.

Atuisinnaatitaanermut killiliinerit suut illunut sanaqataaffiusunut atuunnersut aalajangersakkami maleruagassiuunneqarpoq. Illu sanaqataaffiusoq Naalakkersuisunit taarsigassarsiaqarfiutillugu atuisinnaanermut killiliinerit atuuttussaapput. Taarsigassarsialik piffissap qanorluunniit ilinerani akiitsut sinnerinik akiliinermigut atuisinnaatitaanermut killiliinernit taaneqartunit imminut pisussaaffeerutsissinnaavoq.


§ 59-imut

Aalajangersagaq najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 26-mut assingusuuvoq.

Imm. 1-imut

Aalajangersakkap atuutilerneratigut taarsigassarsiat piginnittut nikinneranni tunngaviusumik akiligassanngortinneqassapput.

Imm. 2-mut

Aalajangersakkami allassimavoq, taarsigassarsiallip aappaa pinngitsooranilu kingornussisussai taarsigassarsiallip toqunerani taarsigassarsiallip taarsigassarsianut pisinnaatitaaffiinik pisussaaffiinillu tigusinissamut pisinnaatinneqartut. Tassanilu suliaq tunniussinerpiatut suliarineqassanngilaq, taamaallaalli qularnaveeqqusiussaqarluni taarsigassarsinissamut uppernarsaammut taarsigassarsinermullu uppernarsaammut pioreersumut ilassuteqartoqassalluni. Aalajangersakkami taamaallaat taarsigassarsianik tigusisinnaanermut apeqqut maleruagassiuunneqarpoq. Kingornussisarnermut inatsisinut tunngasut apeqqutillu allat, illuutip tiguneqarsinnaaneranut atorneqarsinnaaneranullu tunngasut allamik tunngaveqarluni maleruagassiuunneqartarput.


§ 60-imut

Aalajangersagaq najoqqutassatigut allannguuteqartinneqarluni inissialiortiternermut tapersiissuteqartarneq pillugu Inatsisartut peqqussutaanni nr. 1-imi, 9. april 1992-imeersumi, kingusinnerusukkut allannguuteqartinneqartumi § 26, imm. 1-imut assingusuuvoq.

Aalajangersakkami qanoq pisoqartillugu Naalakkersuisut taarsigassarsiarititaat akiligassanngortinneqartassanersut allassimavoq.

Nr. 1-imut

Taarsigassarsialik pisussaavoq illu sanaqataaffiusoq illersorsinnaasumik aserfallatsaaliussallugu. Tamanna isumaqarpoq taarsigassarsialik illup ilaanik pisariaqalerneri tamaasa taarsersuisassasoq iluarsaassisassallunilu, assersuutigalugu qalianik igalaanillu ussiitsunik taarsersuilluni iluarsaassilluniluunniit. Kiisalu taarsigassarsiallip illu sanaqataaffiusoq suliassat tulleriiaarlugit aserfallatsaalissavaa, assersuutigalugu pisariaqalerneri tamaasa illup silataa qalipattassallugu. Naalakkersuisut nr. 1-imik atuutsitsinerminni qularnaveeqqummik pigisaqartutut nakkutilliissapput, tassanilu paasiniarneqartassaaq qularnaveeqqusiussaq pigineqarnersoq aammalu pitsaasumik aserfallatsaalineqarnersoq.

Nr. 2-mut

Illu sanaqataaffiusoq ikuallattoornissamut anorersuarmillu ajoquserneqarnissamut sillimmaserneqarsimanngippat, tamanna taarsigassarsiat akiligassanngornissaannut tunngaviussaaq, illumi sanaqataaffiusumi sillimmaserneqarsimanngitsumi ajoqusikkat annertuut Naalakkersuisunut qularnaveeqqusiussaanik annertuumik ajorseriartitsisussaammata. Taamaalilluni taarsigassarsiallip minnerpaamik ikuallattoornissamut anorersuarmillu ajoqusernissamut matussusiisinnaasumik sillimmasiinissaanut piumasaqaat taarsigassarsititsisup illumut sanaqataaffiusumut qularnaveeqqusiiffigineqarnissamut soqutiginninneranik tunngaveqarpoq. Ikuallattoornermi anorersuarneranilu ajoqusikkat taaneqarnerini sillimmasiissut nalinginnaasoq, pigisap aalaakkaasup ikuallattoqarnerani anorersuarneranilu ajoqusernissaanut sillimmasiissutaasoq eqqarsaatigineqarpoq.

Nr. 3-mut

Tarsigassarsisup illu sanaqataaffiusoq tamaat ilaannaaluunniit isaterpagu, tamanna Naalakkersuisut taarsigassarsiarititaasa akiligassanngortinneqarnerinik nassataqassaaq.

Nr. 4-mut

Naalakkersuisut taarsigassarsiaq illumit sanaqataaffiusumit inuussutissarsiutinik ingerlataqarnersoq pisuni ataasiakkaani naliliiffigissavaat. Aammattaaq siunnersuummi § 7-imut oqaaseqaatit innersuussutigineqarput.

Nr. 5-imut

Aalajangersakkami oqaatigineqarpoq, taarsigassarsialik Naalakkersuisut akuersiteqqaarnagit illumit sanaqataaffiusumit nuuppat imaluunniit illumik sanaqataaffiusumik attartortitsippat, Naalakkersuisut illumik sanaqataaffiusumik pigisaqalernissamut taarsigassarsiarititaat akiligassanngortinneqassasut. Tassalu tunngaviusumik piumasaqaataasoq tassaavoq, taarsigassarsiat akiligassanngortinneqassanngippata piffissami pineqartumi taarsigassarsiallip illumi sanaqataaffiusumi taarsigassarsititsivigineqarsimasumi najugaqarnissaa.

Taarsigassarsiallip illumik sanaqataaffiusumik pigisaminik piffissami aalajangersimasumi attartortitsinissaanut imaluunniit najukkami inissiat inoqanngitsut amerlanerat peqqutigalugu attartortussarsisinnaannginneq pissutigalugu illu attartortinnagu piffissami aalajangersimasumik killilikkami illumit nuunnissaanut Naalakkersuisut akuersissuteqarsinnaapput. Akuersissuteqartoqarnissaa anguneqarsinnaavoq, pingaartumik illoqarfimmi nunaqarfimmiluunniit taarsigassarsiallip illuutaata sanaqataaffiusup inissisimaffigisaani suliffissaqartitsiniarnikkut pissutsit peqqutaallutik taarsigassarsialik suliartorluni piffissami aalajangersimasumi sumiiffimmut allamut nuuttariaqarluni aalajangerpat.

Nr. 6-imut

Naalakkersuisut qularnaveeqqummik pigisaqartutut pisinnaatitaapput, illu sanaqataaffiusoq illersorsinnaasumik aserfallatsaalineqarnersoq aammalu qularnaveeqqusiissutaasoq pigineqarnersoq qulakkiissallugu. Tamanna qulakkeerniarlugu Naalakkersuisut illumut sanaqataaffiusumut takuniaanissaat pisariaqalersinnaavoq, taamaattumillu Naalakkersuisut tunngavissaqartillutik illup sanaqataaffiusup iluanik takuniaallutik iserniarnerminni itigartinneqarpata, tamanna taarsigassarsiat akiligassanngortinneqarnerinut tunngaviussaaq.


§ 61-imut

Aalajangersagaq nutaajuvoq. Inatsisitigut inissisimanermut atuuttumut naleqqiullugu siunnersuut allannguutinik annertuunik imaqarpoq, maannami peqqussutip oqaasertaani Naalakkersuisut illumik sanaqataaffiusumik tigusisinnaanerat toqqaannartumik allassimalerpoq.

Imm. 1-imut

Illumik sanaqataaffiusumik, periaatsit siunnersuummi § 60-imi nassuiarneqartut ilaannik peqquteqartumik Naalakkersuisut taarsigassarsiarititaannik akiligassanngortitsiviusimasumik Naalakkersuisut tigusisinnaanerat aalajangersakkami malittarisassiuunneqarpoq. Illumik sanaqataaffiusumik tigusinermik saniatigut taarsigassarsiallip aningaasatigut ajornartorsiutaanik aaqqiiniarnermut Naalakkersuisut suleqataasinnaanngillat, tamatumunnga ilaalluni illup sanaqataaffiusup allamut tunineqarnissaanut Naalakkersuisut suleqataasinnaanngitsut.

Imm. 2-mut

Taarsigassarsisumut aningaasatigut isumannaarneqartussanik Naalakkersuisut naatsorsuinissamut pisussaaffilerneqarnerat aalajangersakkami aalajangersarneqarpoq. Ulloq naatsorsuutit aallartiffiat tassaavoq ulloq, Naalakkersuisut illumik sanaqataaffiusumik taarsigassarsisumiit tigusiffiat.

Imm. 3-mut

Aalajangersakkami Naalakkersuisut qanoq iliorlugit aningaasatigut isumannaarneqartussanik naatsorsuisassanersut aalajangersarneqarpoq.

Aningaasatigut isumannaarneqartussani takuneqarsinnaappat, illup sanaqataaffiusup teknikkikkut aningaasaqarnikkullu nalingata Naalakkersuisut piumasaqaataat tamaasa matussusersinnaagai, inerneri Naalakkersuisut taarsigassarsisumut akilissavai.


§ 62-imut

Aalajangersagaq nutaajuvoq.

Imm. 1-imut

Aalajangersakkap atuutilerneratigut Naalakkersuisut illunik sanaqataaffiusunik inunnit, ukiuni kingullerni marlunni ukiumut inoqutigiinni 180.000 koruunit inorlugit akileraaruteqaataasussanik isertitaqarsimasunit pigineqartunik iluarsaassinissamut annerpaamik 75.000 koruuninik tapiissuteqarsinnaapput.

Aaqqissuussinerup siunissamut sammisuunissaa qulakkeerniarlugu, aamma Naalakkersuisut inunnut, maanna inoqutigiinni isertitat amerlanerugaluarpataluunniit, siunissami qanittumi ukiumut inoqutigiinni 180.000 koruunit inorlugit akileraaruteqaataasussanik isertitaqartussatut naatsorsuutigineqartunut annerpaamik 75.000 koruuninik tapiissuteqarsinnaanerat atuutissaaq. Siunissap qanittup oqaatigineqarnerani eqqarsaatigineqarpoq inuup inoqutaani siunissami qanittumi isertitassat ukiumut 180.000 koruunit inorlugit annertussuseqalernerinik kinguneqartussamik pisoqareersimasoq. Assersuutigalugu taarsigassarsialik siusinaartumik pensionisiaqalersimasinnaavoq imaluunniit utoqqalinersiaqalersimasinnaalluni, taarsigassarsiallip aappani inooqatiniluunniit annaasimasinnaavaa, taamaattumillu taarsigassarsiallip inoqutaani isertitat siornatigumut naleqqiullutik ataavartussamik ajorseriangaatsiartussatut eqqarsaatigineqarsinnaallutik.

Imm. 2-mut

Tapiissutinik pissarsinissamut illup sanaqataaffiusup, maanna piginnittuusut taarsigassarsisoralugit Naalakkersuisunit taarsigassarsititsiviusup taarsigassarsititsiviusimasulluunniit matumani pineqarnissaa piumasaqaataavoq. Aalajangersakkami siunertaavoq, aammattaaq akissaatikkinnerusut illuminnik sanaqataaffiusunik aserfallatsaaliuinissamut periarfissaqartinneqarnissaat.

Illut sanaqataaffiusut, Naalakkersuisunit taarsigassarsiaqarfiujunnaarsimasut, aammalu Naalakkersuisunit taarsigassarsiaqarfiunnginnerminni tunineqarsimasut aaqqissuussinerup avataaniipput. Tamatumunnga tunngaviuvoq, illup sanaqataaffiusup niuerutigineqarnermini pisortanit taarsigassarsiaqarfiusimannginnera.

Imm. 3-mut

Aalajangersagaq malillugu meeqqamut ataatsimut, 18-it inorlugit ukiulimmut, angerlarsimaffimmi najugaqartutut inuit allattorsimaffianni nalunaarsorsimasumut imm. 1-imi aamma 2-mi isertitassanut killiliussat kr. 4.000-inik qaffanneqartassapput. Tamannali meeqqanut amerlanerpaamik arfinilinnut atuuppoq.


§ 63-imut

Aalajangersagaq nutaajuvoq.

Imm. 1-imut

Taarsigassarsialik ataasiarluni arlaleriarluniluunniit tapiiffigineqareersimatillugu Naalakkersuisunit tapiissutissanik qinnuteqarnissamut piffissamut killiliussat aalajangersakkami aalajangersarneqarput.

Piffissaq qinnuteqarfiusoq tassaavoq, ulloq qinnuteqaatip Naalakkersuinit tiguneqarfia allakkatullu isertutut nalunaarsorneqarfia.

Imm. 2-mut

Aalajangersakkami Naalakkersuisut tapiissuteqarnissamut qinnuteqaammik naliliisarnerannut tunngavissat aalajangersarneqarput, taannalu malillugu iluarsaassinissap annertussusaa, qinnuteqartup pigisaanut nalilinnut aammalu suliassanik nammineerluni suliarinninnissamut piginnaanerisassaatut naatsorsuutigineqartumut, kiisalu inissiap pisoqaassusaanut niuernikkullu nalinganut naleqqiunneqassaaq.

Taamaalillunilu illut sanaqataaffiusut illoqarfinni annerusuni, realkredit-imit aningaaserivimmilluunniit taarsigassarsinissamik periarfissaqarfiusuni aaqqissuussinerup atorneqarnissaa siunertarineqanngilaq. Tamatumunnga tunngaviusoq tassaavoq, illut sanaqataaffiusut amerlanertigut akiitsut saniatigut naleqartarmata, taannalu atorneqarsinnaallunilu taarsigassarsianut qularnaveeqqusiunneqarsinnaalluni. Tassalu tassani illunik sanaqataaffiusunik tamanik piginnittut piffissami pineqartumi imaluunniit siunissami 180.000 koruunit inorlugit isertitaqartussat Nunap Karsianiit tapiissutinik tapersiiffigineqarsinnaanissaat siunertarineqanngilaq.

Imm. 3-mut

Aalajangersakkami imm. 3-mi allassimavoq, illumik sanaqataaffiusumik iluarsaassinissamut tapiiffigineqarnissaq pillugu qinnuteqaatinik aqutsinermut Naalakkersuisut maleruagassiorsinnaasut. Tassani pingaartumik suliassat, illup pitsaassusaanik allanngutsaaliissutaasussat, aammalu illup maanna qanoq issusianut atorsinnaaneranullu naleqqiullugu naapertuuttut eqqarsaatigineqarput.


§ 64-imut

Imm. 1-imut

Aalajangersagaq naapertorlugu peqqussutissatut siunnersuut 1. januar 2008-mi atuutilissaaq.

Imm. 2-mut

Tamatuma peqatigisaanik inissialiortiternermut tapersiissuteqartarneq pillugu Inatsisartut inatsisaat nr. 1, 9. april 1992-imeersoq, kingullermik Inatsisartut inatsisaatigut nr. 3-kkut, 12. maj 2005-imeersukkut allanngortinneqartoq atorunnaarsinneqassaaq.

Imm. 3-mut

Maleruagassat, Inatsisartut peqqussutaat atuuttoq naapertorlugu atuutsinneqarlersimasut attanneqaannarsimasullu atorunnaarsinneqarnissamik tungaanut atuutiinnassasut siunnersuutigineqarpoq.