23. oktober 2007

UKA 2007/44

 

Uunga

allannguutissatut siunnersuut

Inissialiornermut, illunut ataatsimoorussanut, illuliassanut il.il. tapersiissuteqartarneq pillugu Inatsisartut peqqussutaat nr. xx, af dd. mm 2007-imeersoq

Naalakkersuisunit aappassaanneerinissamut saqqummiunneqartoq.

 

§ 13-imut

1. § 13, imm. 1, imatut oqaasertalerneqassaaq:
"Naalakkersuisut kommunit inissiaataannik attartortittakkanik sanaartornermut kommuninut imm. 2-mi nr. 1-imiit 3-mut aalajangersarneqartunut tapiissuteqarsinnaapput."

2. § 13, imm. 3 atorunnaarpoq tamatumalu kingorna imm. 4 imm. 3-nngorpoq.

§ 39-mut

3. § 39 sioqqullugu qulequtaq imatut oqaasertalerneqassaaq:

"Taarsigassarsianik allanngortitsineq aamma isumakkeerineq"

4. § 39, imm. 1 imatut oqaasertalerneqassaaq:
"Taarsigassarsiallit, ukiuni akileraaruteqarfiusuni kingullerni marlunni inoqutigiinni akileraaruteqaataasussanik 180.000 koruunit inorlugit isertitaqarsimasut, imaluunniit taarsigassarsiallit, piffissaq manna tikillugu isertitai apeqqutaatinnagit siunissami qaninnermi ukiumi akileraaruteqarfiusussami inoqutigiinni akileraaruteqaataasussanik 180.000 koruunit inorlugit isertitaqartussatut naatsorsuutigineqartut, akiliutissaat akiligassanngortinneqartut, akiitsui akilinngitsuukkat, akileeqqusinermut akitsuutit akiligassaat akiitsuisalu sinneri Naalakkersuisut allanngortissinnaavaat. Taarsigassarsiallip akiliisinnaajunnaarnerani, akiliisarnermik unitsitsinerani, isumaqatigiissutit uniorlugit iliuuseqarnerani, akiliisinnaannginnini pissutigalugu unitsitsinerani, taarsigassarsisoq tammaaneqartoq toqusimasutut isigineqarneranik eqqartuussisutigut aalajangiinermi, piginnittut nikinneranni kiisalu inissiaq isaterneqartussanngorpat taarsigassarsiat erniaqanngitsut akilersugassaanngitsullu akiligassanngortinneqassapput."

§ 40-mut

5. § 40 imatut oqaasertalerneqassaaq:
"§ 40. Taarsigassarsiallit, ukiuni akileraaruteqarfiusuni kingullerni marlunni inoqutigiinni akileraaruteqaataasussanik 180.000 koruunit inorlugit isertitaqarsimasut, aammalu taarsigassarsianut akiligassaarussimasut, taamaallaalli taarsigassarsianut akiitsunik akilinngitsuugaqarsimasut, akiitsui angeqqatigiimmik aningaasartalerlugit qaammatinut 60-inut Naalakkersuisut nalikilliartuaartissavaat."

§ 41-mut

6. § 41 imatut oqaasertalerneqassaaq:
"§ 41. Taarsigassarsiat § 39 naapertorlugu akiligassanngortinneqarsimappata, qinnuteqartoqarneratigut taarsigassarsiallip taarsigassarsiaasa ilaat, piginnittut nikinneranni isertitanit matussuserneqarsinnaanngitsut Naalakkersuisut isumakkeerinnissutigissavaat.
Imm. 2. Qinnuteqaammik naliliiniarnermi pingaartumik qinnuteqartup pisuussutai inuussutissarsiorsinnaanermullu piginnaasassaatut naatsorsuutigineqartoq, tunisinermi pissutsit, tassunga ilanngullugu tunisinermi aki pitsaanerpaaq anguneqarsimanersoq, eqqarsaatigineqassapput.
Imm. 3. Naalakkersuisut imm. 2 naapertorlugu qinnuteqaatit sananeqartarnerannut, suliarineqartarnerannut naliliiffigineqartarnerannullu sukumiinerusunik maleruagassiorsinnaapput, tassunga ilaallutik isumakkeerinissamut isertitatigut pisuussutinillu pigisaqarnikkut piumasaqaatit suut naammassineqarsimassanersut, kiisalu tunisinissap naliliiffigineqarnerani pissutsit suut ilaatinneqassanersut."

 

Allannguutissatut siunnersuummut oqaaseqaatit

Oqaaseqaatit nalinginnaasut

Peqqussutissatut siunnersuummut allannguutissatut siunnersuummik saqqummiussinermut Inatsisartut Attaveqaqatigiinnermut Ineqarnermullu Ataatsimiititaliaata inissialiornermut, illunut ataatsimoorussanut, illuliassanut il.il. tapersiissuteqartarneq pillugu Inatsisartut peqqussutissaattut siunnersuummut isumaliutissiissumminni oqaaseqaataat inassuteqaataallu tunngavigineqarput.

Siunnersuut siullermeerinermi saqqummiunneqartoq Namminersornerullutik Oqartussat kommunini inissianik attartortittakkanik sanaartornermut tapiissuteqartarnerannut aalajangersakkanik imaqarpoq, [issuaaneq aallartippoq] "…kingunerisaannik Nuup Kommunea kommuninit allanit tamanit ajornerusumik inissinneqarpoq. Tamanna piginneqatigiilluni imaluunniit nammineq pigisatut inissiamik realkreditimit aningaasalersorneqarneqartumik Nuummi najugallit pissarsisinnaanerat nunatsinni kommuninut allanut sanilliullugu ajornannginnerusoq inatsimmut nassuiaatini tunngavilersuutigineqarpoq.

Tamatumunnga tunngatillugu ataatsimiititaliamit oqaatigineqarpoq, nunatsinni kommunit sinnerinut sanilliullugu piginneqatigiilluni namminerluunniit pigisatut Nuummi inissiamik realkreditimit aningaasalersorneqarneqartumik innuttaasut ilaasa akissallit nunatsinni innuttaasut ilaannit ajornannginnerusumik pissarsisinnaanerat ilimanarsinnaasoq. Tamannali Nuup Kommuniata (initaarnissamut ukiunik 28-nik utaqqiffiusartoq) inissianik nalinginnaasunik pisariaqartitsineranut annerpaajusumut matussuserneqanngitsumulli allannguutaanngilaq.

Tamanna tunngavigalugu Nuummi kommunit inissiaataannik attartortittakkanik sanaartornermut Namminersornerullutik Oqartussat tapiissutaasa kommunini allani kommunit inissiaataannik attartortittakkanik sanaartornermut Namminersornerullutik Oqartussat tapiissutaannit ikinnerunissaat naammaginaranilu naapertuutinngilaq.

Taamaattumik kommunit tamarmik assigiimmik tapiiffigineqarnissaminnut qulakkeerniarlugu Ataatsimiititaliap isumaqatigiissup Naalakkersuisut allannguutissatut siunnersuummik saqqummiussinissaat kaammattuutigissavaat." [Issuaaneq naavoq]

Ataatsimiititaliap oqaaseqaatai inassuteqaataalu Naalakkersuisunit tusaatissatut tiguneqarput, tamatumunngalu atatillugu inissialiornermut, illunut ataatsimoorussanut, illuliassanut il.il. tapersiissuteqartarneq pillugu Inatsisartut peqqussutaannut allannguutissatut siunnersuut manna saqqummiullugu, taannalu malillugu kommunit tamarmik inissiani najugaqarfiit annertussusaanni kvadratmeterimut tapiissutaasartunut tunngatillugu kommunit tamarmik assigiimmik pineqarsinnaalissapput.

Isumaliutissiissummi allassimavoq [Issuaaneq aallartippoq] "Inuit inuiaqatigiinnut akiitsuminnik akiliinissaminnut periarfissaqanngitsut inuiaqatigiinnit immikkut isiginiarneqarnerat pissusissamisoorluinnartutut ataatsimiititaliamit isumaqatigiissumit isigineqarpoq. Tamatumali akiitsunik isumakkeerinikkut pinissaa inuiaqatigiit soqutigisaannut naapertuutinngilaq. Illumi taarsigassarsinikkut pissarsiarineqarsimasoq suli naleqarpoq akiitsut isumakkeernerisigut inuiaqatigiinnik annaaneqartussamik. Illu kingusinnerusukkut tunineqarsinnaasoq paasinarsippat, taarsigassarsisoq akiitsuminik isumakkeerfigineqarsimasoq aningaasanik taarsigassarsisitsisup – tassalu inuiaqatigiit – pissaraluinik pissarsissaaq.

Taamaattumik immitsinnut aperisariaqarpugut inuiaqatigiit pigisaat nalillit tunniussuutiinnartuarnissaannut akissaqarnerluta. Akiitsunut koruuni ataaseq isumakkeerutigigaangatsigu ineqarnermut tunngasuni ajornartorsiutit kinguartitassaanngitsut aaqqiiviginiarnissaannut koruunimik ataatsimik atugassakinnerulertarpugut.

Taamaattumik allannguutissatut siunnersuummik saqqummiusseqqullugit Naalakkersuisut ataatsimiititaliamit kaammattorneqarput, taamaalilluni § 39 aamma 41 malillugit akiitsunik isumakkeerfigineqarnissamut periarfissaq peerneqarluni, akiitsunillu nalikillilerneqartussaanatik taarsigassarsianut erniaqaratillu akilersugassaanngitsunut aammalu illumik allamik piginnittoqalersillugu akilerneqartussanngortussanut allanngortitsinissamut periarfissamik taarserneqarluni.

Taamatut periaaseqarnikkut taarsigassarsialik akiitsunik artukkigaasimasoq akilersuutinik ernianillu akiliissanngilaq – soorlu akiitsunik isumakkeerinermi taamaattoq. Tassa taarsigassarsialik kiassarnermut innaallagissamullu akiliutit eqqaassanngikkaanni ineqarnermut akiliuteqartassanani. Akiitsunilli isumakkeerinerup akerlianik akiitsut piujuassapput, illulu tunineqarpat taakku akilerneqassallutik. Namminersornerullutik Oqartussat illumi qularnaveeqqusiissuteqarmata illu naleqarsimappat Namminersornerullutik Oqartussat aningaasat ilaannik pisassaminnik pissarsissapput.

Tunisinermi pissarsiat akiitsunik matussusiinissamut naammanngippata akiitsut sinneri taarsigassarsiallip akilissavai. Inuit taamatut inissisimasut akiitsuminnik isumakkeerneqarnissaminnut qinnuteqarsinnaasariaqartut Ataatsimiititaliaq isumaqarpoq." [Issuaaneq naavoq]

Naalakkersuisuniit ataatsimiititaliap oqaaseqaatai tamakkiisumik taperserneqarput, tamatumunngalu atatillugu inissialiornermut, illunut ataatsimoorussanut, illuliassanut il.il. tapersiissuteqartarneq pillugu Inatsisartut peqqussutaannut allannguutissatut siunnersuut manna saqqummiullugu.

Allannguutissatut siunnersuutip inatsisinut teknikkimut tunngasortai misissuiffigineqareerput.

Peqqussutissatut siunnersuutip allaffissornikkut sunniutissai

Allannguutissatut siunnersuut peqqussutissatut siunnersuummut naleqqiullugu allaffissornikkut nammagassanik annertunerusunik kinguneqassanngilaq.

Peqqussutissatut siunnersuutip aningaasaqarnikkut sunniutissai.

Allannguutissatut siunnersuut peqqussutissatut siunnersuummut naleqqiullugu aningaasaqarnikkut sunniuteqartussaavoq, tassalu inissianik attartortittakkanik sanaartornermi Nuup Kommuneanut tapiissuteqartarnermi kommuninut allanut tapiissutaasartut amerlaqataannik qaffasinnerusunillu tapiissuteqartoqartalissaaq.

 

Peqqussutissatut siunnersuummi aalajangersakkanut ataasiakkaanut oqaaseqaatit

Nr. 1-imut

Aalajangersagaq inissialiortiternermut tapersiissuteqartarneq pillugu Inatsisartut peqqussutaanni nr. 1-mi 9. april 1992-imeersumi, kingusinnerusukkut allannguuteqartinneqartumi § 7, imm. 1-imut aamma 2-mut najoqqutassatigut allannguuteqarluni assingusuuvoq.

Aalajangersakkami kommunit inissiaataannik attartortittakkanik sanaartornermut Naalakkersuisut kommuninut tapiissuteqarsinnaanerat tunngavissinneqarpoq. Tapiissuteqarnissamut piumasarineqarpoq kommunit inissianik sanaartortut angissusissatut piumasaqaatinik, aalajangersakkami aalajangersarneqartunik naammassinnissimanissaat. Tassalu tapiissutit annertussusissaannik aalajangersaasarnermi kommunit assigiinngitsut akornanni immikkoortitsisoqanngilaq. Kommuni tapiiffigineqarsinnaanersoq aalajangiinermi aningaasaliissutissat Inatsisartut aningaasaqarnermut inatsisaanni immikkoortinneqarsimasut pisoqarneri tamaasa pingaarnersiorneqartassapput.

Nr. 2-mut

Nuup Kommuneanut aamma nunami kommuninut allanut tapiissutaasartut annertussutsimikkut assigiinngitsunik aalajangersarneqarnerisa peerneqarnerisigut aalajangersakkami imm. 3 peerneqarpoq, tamatumalu malitsigisaanik imm. 4 imm. 3-nngorpoq.

Nr. 3-mut

§§ 39-41-mi allannguinerup malitsigisaanik immikkoortumut qulequtaq allanngortinneqarpoq. Allannguutissat taakku allannguutissatut siunnersuummi nr. 4-6-imut oqaaseqaatini nassuiarneqarput.

Nr. 4-mut

Aalajangersagaq nutaajuvoq, kisiannili inissialiortiternermut tapersiissuteqartarneq pillugu Inatsisartut peqqussutaanni nr. 1-mi 9. april 1992-imeersumi, kingusinnerusukkut allannguuteqartinneqartumi § 21a, imm. 2 tunngavigineqarpoq tassungalu taartaalluni.

Taarsigassarsiallip inissiami Naalakkersuisunit taarsigassarsiaanut akiliutinik akiligassanngortunik, akiitsunik akilinngitsuukkanik, akileeqqusissutinut akitsuutinik akiitsullu sinnerinik allanngortitsisinnaaneranut aalajangersagaq tunngasuuvoq. Aalajangersakkami isertitassatut piumasaqaatit qinerneqarsinnaasut marluk atorneqarput. Taarsigassarsiallip inoqutaani siunissami qanittumi isertitassat ukiumut 180.000 koruunit inorlugit annertussuseqalernerinik kinguneqartussamik pisoqareertillugu isertitassanut piumasaqaatip atorneqarnissaa eqqarsaatigineqarpoq. Assersuutigalugu taarsigassarsialik siusinaartumik pensionisiaqalersimasinnaavoq utoqqalinersiutisiaqalersimasinnaalluniluunniit, taarsigassarsiallip aappani inooqatiniluunniit annaasimasinnaavaa, taamaattumillu taarsigassarsiallip inoqutaani isertitassat siornatigumut naleqqiullugu ataavartussamik appangaatsiartussatut naatsorsuutigisariaqalersimallutik. Taarsigassarsiat uninngasut uninngatikkallagaassapput ernialersorneqartaratik aammalu akilersuutit akilerneqartussaanatik.

Aalajangersagaq aamma akiligassanngortitsisarnissamut aalajangersagaavoq. Taarsigassarsialik tammarsimappat tamanna eqqartuussivitsigut aalajangiiffigineqartariaqarpoq, tassanilu taarsigassarsiallip tammarsimanera, taamaalillunilu tammarsimasut pillugit inatsimmi, kingusinnerusukkut allannguuteqartinneqartumi § 5 naapertorlugu toqusimasutut naatsorsuutigineqarnera aalajangiiffigineqassaaq. Nalinginnaasumik tammarsimasut, kingullermik suli inuusutut ilisimaneqarnerminniit ukiut tallimat qaangiunnerini toqusimasutut nalunaarutigineqartarput, tak. tammarsimasut pillugit inatsisip nalunaarutigineqarnera nr. 766, 4. august 2005-imeersoq.

Kiisalu aalajangersagaq piginnittut nikinnerannut nassuiaatinik imaqarpoq. Piginnittut nikinneri tamarmik akiligassallit nikinnerattut paasineqassapput, tassunga ilaallutik niuernikkut imaluunniit akeqanngitsumik tunniussinerit, taamatullu piginneqataasumut, aappaasumut, aapparisatut nalunaarsorneqarsimasumut, kingornussisussanut inooqatigisamulluunniit tunniussinerit ikaarsaartitsinerilluunniit piginnittut nikinnerattut isigineqarlutik.

Isertitassanut killiliussanut § 39, imm. 1-imi taaneqartunut tunngatillugu, § 39, imm. 2 malillugu taarsigassarsialik 18-it inorlugit ukiulinnik angerlarsimaffimmi najugaqartunik qitornaqarpat, isertitassanut killiliussat 180.000 koruuniusut meeqqamut ataatsimut 4.000 koruuninik qaffanneqartassapput. Tamanna meeqqanut amerlanerpaamik arfinilinnut atuuppoq.

Assersuutigalugu taarsigassarsialik tallimanik angerlarsimaffimmi najugaqartunik qitornaqaruni, taarsigassarsialik ukiumut inoqutigiinni akileraaruteqaataasussanik 200.000 koruunit inorlugit isertitaqartarsimaguni, akiitsumi allanngortinneqarnissaannik qinnuteqarsinnaavoq.

Nr. 5-imut

Taarsigassarsiallip akiitsui sinneqaratik taamaallaalli akilinngitsuukkanik akiitsoqartillugu, taarsigasarsiallip akiitsuinik allanngortitsisarneq aalajangersakkami pineqarpoq. Taamaattoqartillugu akiitsut ingerlaannartumik taarsigassarsiatut erniaqanngitsutut akilersugassaanngitsutullu, annertoqqatigiinnik aningaasartalerlugit qaammatini 60-ini nalikilliartuaartinneqartussatut allanngortinneqassapput.

Taarsigassarsiallip inissiamik Naalakkersuisunut utertitsisinnaatitaanera aalajangersakkami kalluarneqanngilaq, taarsigassarsiat imaluunniit taarsigassarsiat arlallit taarsigassarsiatut erniaqanngitsutut akilersugassaanngitsullu allanngortinneqaraluartut inissiamut taarsigassarsiat ingerlaannartussaammata.

Nr. 6-imut

Aalajangersagaq nutaajuvoq.

§ 41, imm. 1-imut

§ 39, imm. 1 naapertorlugu taarsigassarsiat uninngatinneqartut illu taarsigassarsialimmit pigineqartillugu ernialersugassaanngillat akilersugassaanatillu. Taarsigassarsiat akiligassanngortinneqarnissaannut piumasaqaat atuutilerpat, taarsigassarsiallip taarsigassarsiat ernialersugassaanngitsut akilersugassaanngitsullu ataasiaannaartumik aningaasanngorlugillu utertillugit akilissavai.

Niuernermi qilersorsimanngitsumi pigisanik aalaakkaasunik niueruteqarnermi pigisat nalingi, pigisat sumi inissisimanerat apeqqutaalluni akii allanngorartorujussuusinnaammata tamanna ilumoorpoq. Taamaattumik assersuutigalugu illut type 67/12-t, Godmand-imik imaluunniit Salomon-imik taaguuteqartut, illut Nanortalimmi, Nuummi, Sisimiuni Qaanaamiluunniit inissisimanersut apeqqutaalluni niuernikkut niuerutigineqarnerminniluunniit akii assigiinngitsorujussuusussaapput. Kisiannili assigiissutaat tassaavoq tamangajammik sananeqarnerminni akii assigiimmata, tassalu teknikkikkut aningaasaqarnikkullu naligititaasut assigiillutik.

Illut assigiit pingasut pisoqaaqatigiit Nanortalimmi, Nuummi imaluunniit Qaanaami neqerooruteqarfigitinneqarlutik tunineqassappata, tunisinermi akiusut 1,6 mio. koruunit sinnerlugit nikerarsinnaapput. Allatut oqaatigalugu Nuummi illu assersuutigalugu 1,7 mio. koruuninik akeqartillugu tunineqarsinnaavoq, kiisalu Qaanaami illu taamaallaat 100.000 koruuninik pissarsissutigineqarsinnaalluni.

Taamaattumik Nuummi tunisisup taarsigassarsiani uninngasut matussusersinnaassagai naatsorsuutigineqarsinnaavoq, kiisalu Qaanaami tunisisup akiitsuisa sinneri, tunisinermi pissarsiaasunit matussuserneqarsinnaanngitsut qaffasingaatsiarsinnaapput. Taamatut pisoqartillugu taarsigassarsialik piumasaqaatit aalajangersimasut ataanni illumi tunineqarsimalersumi, taarsigassarsiallip iluaqutigiunnaagaani akiitsut sinnerisa isumakkeerneqarnissaannik Naalakkersuisunut qinnuteqarsinnaavoq.

§ 41, imm. 2-mut

Aalajangersakkami allassimavoq taarsigassarsialik taarsigassarsiaminut akilersuinissamut periarfissaqarnersoq Naalakkersuisut ataasiakkaatigut naliliisassasut. Tassalu taarsigassarsialik ukiuni akileraaruteqarfiusuni marlunni kingullerni inoqutigiinni ukiumut 180.000 koruuninik amerlanerusunilluunniit akileraaruteqaataasussanik isertitaqarsimanersoq, imaluunniit siunissami isertitaqartussatut naatsorsuutigineqarnersoq tamatumani naammanngilaq.

Taarsigassarsiallip nalilinnit pigisai inuussutissarsiorsinnaaneratullu naatsorsuutigisaq kiisalu illup pisoqaassusaa, qanoq issusia aammalu tunisinermi pissarsissutaanerata nalinga Naalakkersuisut pingaartissavaat. Kisiannili qinnuteqartoq akiitsuminik isumakkeerfigineqarsinnaanersoq naliliiniarnermi, akiitsut sinnerisa annertussusaat immikkut pingaarutilittut inissisimanngilaq. Taamaattumik taarsigassarsiat annikitsut annertuullu isumakkeerinniffigineqarsinnaapput.

Inissiaq kuuginnartumik imeqanngippat, kuuffeqanngippat innaallagiaqanngippallu, atortulersuutit taaneqartut pigineqarnerannut sanilliullugu inissiap nalinga appasinnerusumik aalajangersarneqassaaq.

Inissiaq iluarsaateqqammersimappat, soorlu nutaanik igalaalerneqarsimappat, nutaamik qalialerneqarsimappat nutaamilluunniit oqorsaqqinneqarsimappat, tamatuma kingunerisaanik inissiap iluarsaanneqannginneranut sanilliullugu inissiap nalinga qaffasinnerusumik aalajangersarneqassaaq.

Ataatsimut isigalugu akiitsunik isumakkeerisarneq taamaallaat atorneqartariaqarpoq, inissiaq niuernikkut naleqangippat aammalu taarsigassarsiallip akiitsumi sinnerinik akiliisinnaanissaa ilimanaateqanngippat. Piumasaqaatit taakku naammassineqarsimanngippata, akiitsunik isumakkeerinissaq ataatsimut isigalugu atorneqartariaqanngilaq. Taarsigassarsiallip illu akigissaartumik tuneriarlugu akiitsut sinnerinik isumakkeerfigineqarnissamik qinnuteqarnermigut iluanaarniarsinnaavoq.

§ 41, imm. 3-mut

Qinnuteqaatit sananeqartarnerannut, suliarineqartarnerannut naliliiffigineqartarnerannullu Naalakkersuisut sukumiinerusunik maleruagassiorsinnaanissaannut aalajangersagaq piginnaatitsissutaavoq, tassunga ilaallutik isumakkeerinissamut isertitatigut pisuussutinillu pigisaqarnikkut piumasaqaatit suut naammassineqarsimassanersut, kiisalu tunisinissap naliliiffigineqarnerani pissutsit suut ilaatinneqassanersut.