15. oktober 2007

UKA 2007/47 UKA 2007/48

 

Imermik pilersuineq pillugu Inatsisartut peqqussutissaattut siunnersuut

aamma

Nukimmik pilersuineq pillugu Inatsisartut peqqussutaata allannguutaa pillugu Inatsisartut peqqussutissaattut siunnersuut.
(attavilersinnermut akiliisitsinermut tunngavik)

pillugit

Inatsisartut Inuussutissarsiornermut Ataatsimiititaliaata

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq.

Inatsisartut Inuussutissarsiornermut Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Ruth Heilmann, Siumut (siulittaasoq)
Inatsisartunut ilaasortaq Emilie Olsen, Atassut (siulitaasup tullia)
Inatsisartunut ilaasortaq Vittus Mikaelsen, Siumut
Inatsisartunut ilaasortaq Esmar Bergstrøm, Inuit Ataqatigiit
Inatsisartunut ilaasortaq Jens B. Frederiksen, Demokraatit

UKA 2007-imi siunnersuutinik siullermeerineq tunngavigalugu peqqussutissatut siunnersuutit, taakkulu nassuiaatitaatt Inatsisartut Inuussutissarsiornermut Ataatsimiititaliaata misissuataarpai. Imermik pilersuineq pillugu peqqussummut (UKA 2007/47) allannguutissatut siunnersuummik ilusiliinikkut aaqqiinernik annikinnerusumik imalimmik siunnersuutip aappassaaneerneqarneranut Naalakkersuisut saqqummiussilersaartut ataatsimiititaliap maluginiarpaa. Allannguutissatut siunnersuut taanna apeqqutaatillugu ataatsimiititaliaq isumaliutissiissummini matumani pineqartumi isummerpoq.

Tusarniaaneq.

Siunnersuutit piffissami 2. maj – 5. juni 2007-imi tusarniaassutigineqarput. Tusarniaanermit akissutit nuutinnerat kiisalu tuarniaaneq pillugu akissuteqaatinut allakkiat Inuussutissarsiornermut Pisortaqarfimmit suliarineqartut Inuussutissarsiornermut Ataatsimiititaliap tiguai. Piffissamut tusarniaaffiusumut, tusarniarfigisassanik toqqaanermut tusarniaanermilluunniit akissutinut tiguneqartunut Ataatsimiititaliaq oqaaseqaatissaqanngilaq.

Siunnersuutit Inatsisartunit siullermeerneqarnera.

Siunnersuutit taakku marluk Inatsisartuni siullermeerneqarmata Inatsisartuni partiinit tamanit tikilluaqquneqarput, Kattusseqatigiilli Partiiat nukimmik pilersuineq pillugu peqqussummut allannguutissatut siunnersuummut (UKA 2007/48) akuersaanngilaq. Siullermeerinermi arlalinnik apeqquteqartoqarpoq, kiisalu Inuussutissarsiornermut, Suliffeqarnermut Inuussutissarsiutinullu Ilinniartitaanernut Naalakkersuisumut itisiliissutaasunik apeqquteqarniarluni Inuussutissarsiornermullu Ataatsimiititaliaq ulloq 1. oktober 2007-imi aalajangerpoq. Ataatsimiititaliap apeqqutai Naalakkersuisunullu ilaasortap akissuteqaataa 10. oktober 2007-imeersoq isumaliutissiissummut matumunnga ilanngussaq 1-itut 2-tullu ilanngunneqarput.

Siunnersuutit imarisaat.

Nunami maani imermik pilersuinermut tunngasut, tassunga ilanngullugit pilersuisussaatitaaneq, pilersuinerup isumannaatsuunissaa, imermik pilersuisut namminersortut il.il. kiisalu imermik pilersuivinnik pilersitsinermut ingerlatsinermullu aningaasartuutit UKA 2007/47-mi nutaamik maleruagassiorneqarput. Aqutsivimmi nunap innuttaanut attaveqarnermullu qitiusumik pingaarutilimmi malittarisassat peqqussutikkut ataatsimoortinneqarput nutarterneqarlutillu. Tamanna Inatsisartut Inuussutissarsiornermut Ataatsimiititaliaannit tikilluaqquneqarpoq.

Suliffeqarfiit piginnaasatigut annertusisitsinermikkut il.il. Nukissiorfiit sanaartornernut nutaanik aningaasartuuteqartikkunikkit attaviligaanermut akileeqataassutinik akileeqquneqarsinnaanerannik UKA 2007/48 inatsisitigut tunngavissaqalersitsivoq. Aalajangersagaq taamaattoq aamma UKA2007/47-mi ilaatinneqarpoq.

Inuussutissarsiornermut Ataatsimiititaliap isumaliutai.

Innaallagissamut imermullu tunngasuni attaviligaanermut akileeqataassutip atuutsinneqalernera Inatsisartut Inuussutissarsiornermut Ataatsimiititaliaata matuma kinguliani oqaaseqarfigissavaa, tamatumanilu isumaliutissiissummut matumunnga ilanngussat innersuussutigissallugit.

Attaviligaanermut akileeqataassummut nutaamut atatillugu siunnersuutit inuussutissarsiornermik ingerlataqartunut aningaasalersuinikkut qanoq annertutigisumik nammakkiissanersut annertuumik nalornissutigineqartoq ataatsimiititaliap maluginiarpaa. Inatsisissatut peqqussutissatullu siunnersuutip suliarineqarnerani inuussutissarsiornermik ingerlataqartunut aningaasaqarnikkut allaffissornikkullu kingunerisassanik naatsorsorsuinissaminnut tamannalu pillugu inatsimmut nassuiaatini aalajangersimasumik paasissutissiinissaminnut Naalakkersuisut pisussaatitaapput. Aalajangersimasumik naatsorsuisoqarsinnaanngippat misilittakkat, assersuutigalugu sanaartornermi aningaasartuutit ukiut arlallit ingerlanerini suliassaqarfimmi tassani agguaqatigiissillugu atorneqarsimasut tunngavigalugit missingiisoqassaaq.

Qanoq annertutigisumik aningaasartuuteqarnissaq naatsorsuutigineqarnersoq aammalu suliassaqarfimmi ukiuni siuliini suut aningaasartuutaasimanersut pillugit paasissutissanik Inuussutissarsiornermut Ataatsimiititaliaq pissarsisinnaasimanngilaq. Inatsisissatut siunnersuutip inuussutissarsiornermik ingerlataqartunut aningaasaqarnikkut kingunerisassaasa maanna pisutut ersernerlutsigisumik paasissutsissiissutigineqartarnerat qaqutigoorluinnartoq Inuussutissarsiornermut Ataatsimiititaliaq isumaqarpoq. Attaviligaanermut akileeqataassutissap ukiuni aggersuni annertussusissaa pillugu ataatsimiititaliamut ilisimatitsissuteqartaqqullugu Inuussutissarsiornermut, Suliffeqarnermut Inuussutissarsiutinullu Naalakkersuisoq kaammattorneqarpoq.

Immikkut akuerineqarnissamik periarfissaqartitsinani naatsorsuinermi periaaseq assigiiaartuussasoq Naalakkersuisut oqaatigigaat Inuussutissarsiornermut Ataatsimiititaliap aamma paasivaa. Aningaasartuutinik naatsorsuinermut periaatsip inaarutaasup illuatungeriit susassaqartut, tassunga ilanngullugu aalisakkanik suliffissuit, peqatigalugit atsaat qaammatini aggersuni aalajangiiffigineqarnissaa pissutigalugu attaviligaanermut akileeqataassutip naatsorsorneqarnerani aningaasartuutit sorliit ilanngunneqassanersut suli aalajangerneqanngilaq.

Paasissutissiissutigineqartut malillugit attaviligaanermut akileeqataassutissatut akileeqqusissutip pilersuinermi attaveqaatinut attaviligaanermut aningaasartuutinit tamarmiusunit annikinnerunissaa naatsorsuutigineqarpoq. Innaallagissamik imermillu pilersorneqarnissaminnik kissaateqarnertik attaviligaanermut akileeqataassummik akiliuteqarfigissanerlugu kiisalu taamaattoqassappat akileeqataassutip qanoq annertugiginissaanik suliffeqarfiit siumoortumik paasissutissinneqassapput.

Naalakkersuisunit isumaliuutigineqartut maanna tunngavissatut pigineqartut tunngavigalugit Inuussutissarsiornermut Ataatsimiititaliap akuersaarsinnaavai, kaammattuutigaluguli siunnersuutip aappassaaneerneqarnissaanut attaviligaanermut aningaasartuutit procentiat qanoq annertutigisoq attaviligaanermut akileeqataassutitut akileqqulersaarnerlugu Inuussutissarsiornermut, Suliffeqarnermut Inuussutissarsiutinullu Ilinniartitaanernut Naalakkersuisup ersarissumik paasissutissiissutigissagaa. Tassunga atatillugu aningaasartuutinik naatsorsuinermut periaasissaq pillugu inuussutissarsiornermik ingerlataqartunik isumaqatiginninniarnissaq Naalakkersuisunut isumagisassanngortinneqartariaqartoq ataatsimiititaliaq isumaqarpoq, aningaasartuutilli ilaat procenti qanoq annertutigisoq attaviligaanermut akileeqataassutitut inuussutissarsiornermik ingerlataqartunit akileqquneqassanersoq pillugu apeqqummi Inatsisartut peqataatinneqartariaqarlutik.

Inuussutissarsiornermut Ataatsimiiititaliap inassuteqaataa.

Siuliani oqaatigisani tunngavigalugit siunnersuut ilusimisut iluseqartillugu Inatsisartut aappassaaneerinninnerminni akuersissutigissagaat Inuussutissarsiornermut Ataatsimiititaliap isumaqatigiittup inassutigaa.

Taama oqaaseqarluni Inatsisartut Aningaasaqarnermut Ataatsimiititaliaata siunnersuut Inatsisartunut aappassaaniigassanngortippaa.

 

	Ruth Heilmann Siulittaasoq
Emilie Olsen		Vittus Mikaelsen
Esmar Bergstrøm		Jens B. Frederiksen

 

Ilanngussaq 1

Ilanngussaq 2