10. april 2007

UPA 2007/48

 

Meeqqat atuarfiat pillugu Inatsisartut peqqussutaata allanngortinneqarnera pillugu Inatsisartut peqqussutissaattut siunnersuut

pillugu

Inatsisartut Kultureqarnermut Ilinniartitaanermullu Ataatsimiititaliaata

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

Inatsisartut Kultureqarnermut Ilinniartitaanermullu Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Juliane Henningsen, Inuit Ataqatigiit, siulittaasoq
Inatsisartunut ilaasortaq Kristian Jeremiassen, Atassut, siulittaasup tullia
Inatsisartunut ilaasortaq Jens B. Frederiksen, Demokraatit
Inatsisartunut ilaasortaq Ruth Heilmann, Siumut
Inatsisartunut ilaasortaq Doris Jakobsen, Siumut

Kultureqarnermut ilinniartitaanermullu Ataatsimiititaliap UPA 2007-imi siullermeerinninnerup kingorna inatsisissatut siunnersuut misissuataarpaa makkuninngalu oqaaseqaateqarniarluni:

Siunnersuutip imarisaa
Inatsisartut Ombudsmandiata inassutaa tunngavigalugu Danmarkimi efterskolertarnermi tapiissutissatut tunngavigineqartut siunnersuut una atorlugu Naalakkersuisut ersarissarniarsimavaat. 2005:75-imut Ombudsmandip Nalunaarutaa innersuussutigineqarpoq.

Pineqartumi suliassaqarfiit killiliisuusinnaasut efterskolenut aningaasaliissutit aningaasanut inatsimmi aningaasaliissutigineqarnerisigut paatsuugassaanngitsumik siunnersuummi aalajangiunneqarsimapput. Taamaaliornikkut efterskolernermut tapiissutit inatsisitigut pituttuisumik aningaasartuutaanerat missingersuutit pillugit inatsimmi peerneqarpoq.

Peqatigisaanik efterskolernissamut tapiissutinik qinnuteqarnermi qinnuteqartup ilinnialernissaminut periarfissaasa pitsanngoriaateqarsinnaanerat pingaartillugu naliliisoqartarnissaa peqqussummi aalajangersarneqarpoq. Tamatumunnga atatillugu suliami naliliiniarnermi tunngavilersuutit allat eqqarsaatigalugit aalajangersagaq mattussinngitsoq ataatsimiititaliap oqaatigissavaa.

Tusarniaanermi akissutisiat
Tusarniaanermi akissutigineqartut nuutinnerinik ataatsimiititaliaq pissarsiniarsimavoq. Tusarniaanermi akissutigineqartut ataatsimiititaliamit oqaaseqarfigineqarnissaat pisariaqarsimanngilaq.

Tamatuma saniatigut Ombudsmandip oqaaseqaatai qanoq annertutigisumik inatsisissatut siunnersuummi eqqarsaatigineqarsimanersut nalilerneqarnissaat siunertaralugu Ombudsmandip inaarutaasumik allakkiaa 11796, 11. juli 2006-imeersoq ataatsimiititaliap pissarsiarisimavaa. Ombudsmandip inassutaa inatsisissatut siunnersuummi sapinngisamik annertunerpaamik isiginiarneqarsimasoq ataatsimiititaliap nalilerpaa. Allakkiaq isumaliutissiissummut matumunnga ilanngunneqarpoq.

Siunnersuummik ataatsimiititaliap suliarinninnera
Inatsisartuni siunnersuummik siullermeerinerup kingorna tamakkiisumik tapersiisoqartoq Kultureqarnermut Ilinniartitaanermullu Ataatsimiititaliap maluginiarpaa.

Siunnersuut teknikkikkut sukumiilluinnartutut isumaqarfigineqarmat ataatsimiititaliamit annertunerusumik oqaaseqarnissaq pisariaqartinneqanngilaq.

Ataatsimiititaliap inassuteqaataa
Qulaani taaneqartut paasilluarlugit siunnersuutip akuerineqarnissaa ataatsimiititaliap isumaqatigiittup inassutigaa.

Taama oqaaseqarluni Inatsisartut kultureqarnermut Ilinniartitaanermullu Ataatsimiititaliaata siunnersuut aappassaaniigassanngortippaa.

 

	Juliane Henningsen, siulittaasoq
Kristian Jeremiassen, siulittaasup tullia		Ruth Heilmann
Doris Jakobsen		Jens B. Frederiksen

 

Ilanngussaq