1. februar 2007 UPA 2007/48
Nalinginnaasumik nassuiaatit
1. Aallaqqaasiut
Siunnersuut Danmarkimi efterskolimiinnermut tapiissutisitsisarnermut tunngavimmut taakkulu tunniunneqartarnerannut siunertamut erseqqissaaniarneruvoq.Tunngavik taanna atuarneqarsinnaavoq meeqqat atuarfiat pillugu Inatsisartut peqqussutaanni nr. 1-imi 6. juni 1997-imeersumi § 11-mi. Taanna aallaavigalugu suli annertunerusumik erseqqissaasoqarpoq Danmarkimi efterskolemiinnermut tapiissutisiat pillugit Namminersornerullutik Oqartussat nalunaarutaanni nr. 26-imi 15. januar 2004-imeersumi.
Meeqqat atuarfiat pillugu Inatsisartut peqqussutaat nr. 1, 6. juni 1997-imeersoq atorunnaarsinneqarpoq meeqqat atuarfiat pillugu Inatsisartut peqqussutaatigut nr. 8-kkut 21. maj 2002-meersutigut. § 46. imm. 4 naapertorlugu peqqussummi 1997-imeersumi § 11 atuutsiinnarpoq peqqussummi 2002-meersumi meeqqat atuarfiat taamaallaat pineqarmat. Danmarkimi efterskolimiittarneq Kalaallit Nunaanni meeqqat atuarfiannut ilaatinneqanngilaq.
Danmarkimi efterskolimiinnissamut qinnuteqaatit itigartitsissutaanerat pillugu naammagittaalliutinik marlunnik Inatsisartut Ombudsmandiat 2004-mi aasakkut tigusaqarpoq. Tassunga tunngatillugu Ombudsmandi isumaqarpoq efterskolimiinnermut tapiissutisinissamut inatsisitigut tunngaviusoq erseqqippallaanngitsuusoq. Suliaq taanna Inatsisartut Ombudsmandiata 2005-imut Nalunaarutaani atuarneqarsinnaavoq. Ombudsmandimi suliarineqartoq taassuma allagaatigut 11796-kkut 11. juli 2006-imeersutigut inaarlugu naammassineqarpoq.
Ombudsmandi isumaqarpoq § 11, imm. 1-mi oqaasertaliussat imatut paasisariaqartut tapiissut inatsisitigut pituttorsimasumik aningaasartuutaasoq imaalillugu qinnuteqaateqartut piukkunnaatillit tamarmik tapiissutisiaqartitaanissaminnut piginnaatitaasut. Aammattaaq Ombudsmandip tikkuarpaa kontomut pingaarnermut 40.10.12-imut aningaasaliisarnikkut tunngavissat peqqussummiikkunnaarsimammata.
2. Siunnersuummi immikkoortut pingaarnerit
Naalakkersuisut maannamut isumaqartuarsimapput efterskolemiinnermut tapiissutisiat pillugit nalunaarummi § 1, imm. 1 tapiissutit aningaasaliissutitigut pituttorsimasumik tapiissutaanissaannut naammaginartumik inatsisitigut tunngavissaasoq, tassa aningaasat Inatsisartut aningaasanut inatsisaanni kontomi pingaarnermi 40.10.12-mi illuartinneqartut sinnerlugit tapiissutisisoqartitsisoqassanngitsoq. 2007-imi aningaasaliissutit 7.368 tkr-iupput.Siunnersuutip massuma ombudsmandip tikkuagaa iluarsivaa peqqussummi § 11, imm. 1-imi aningaasanut inatsimmi aningaasaliussanut innersuussutip ilanngunneratigut.
Aammattaaq Naalakkersuisut matumani kontomi pingaarnermi 40.10.12-imi aammalu nalunaarummi § 3, nr. 3-mi aningaasaliinissamut tunngavissaasuni najoqqutassat inatsisitigut tunngavissatut naammaginartuunnerat tunngavigaat. Inatsisartut 2007-imi aningaasanut inatsisaanni aningaasaliinissamut tunngavissani 2004-misut ittuni imatut allassimasoqarpoq:
"Danmarkimi efterskolimiinnissamut tapiissutit ilinniartitaanerup qaffasissusia tamakkiisoq nukittorsaaviginiarlugu suliniutit arlaliusut ilagaat, tassunga ilaalluni atuartut ingerlaqqiffiusumik ilinniarnissamut ilisimasatigut oqaatsitigullu piginnaasaannik nukittorsaanissaq. Namminersornerullutik Oqartussat Danmarkimi efterskolimiinnermut aningaasaliissutaat atuartumut ilinniartitaanikkut ingerlaqqinnissamut inuttut ilisimasatigullu naammaginartumik piginnaaneqaratik 11. klassimiit anisunut neqeroorutitut atuutsinneqalerput."
Atuartup ilinnialernissamut periarfissani pitsaanerulersinniarlugit Danmarkimi efterskolimiinnermut siunertarineqarmat tamatuma peqqussummi § 11-imi imm. 2-mut ilanngunneqarnissaa siunnersuutigineqarpoq. Taamaalilluni peqqussummi oqaasertaliussat, nalunaarummi oqaasertaliussat aammalu Inatsisartut aningaasanut inatsisaata akornanni ataqatigiissitsisoqalerpoq.
Allaffitsigut aqutsinikkut suliaasartut allannguuteqartinniarneqanngimmata aammalu tamatuma pisariaqarneranik ombudsmandini tikkuagaqanngimmat, nalunaarutip allannguuteqartinnginnissaa siunnersuutigineqarpoq.
3. Aningaasaqarnikkut allaffissornikkullu pisortanut kingunerisassat:
Siunnersuutigineqartoq allaffissornikkut aningaasaqarnikkullu pisortanut kinguneqarnavian-ngilaq.
4. Aningaasaqarnikkut allaffissornikkullu namminersortunut il.il. kingunerisassat
Siunersuutigineqartoq allaffissornikkut anigaasaqarnikkullu namminersortunut il.il. kinguneqarnavianngilaq.
5. Avatangiisitigut pinngortitatigullu kingunerisassat
Siunnersuutigineqartoq avatangiisitigut pinngortitatigullu kinguneqarnavianngilaq.
6. Allaffissornikkut innuttaasunut kingunerisassat
Siunnersuutigineqartoq allaffissornikkut innuttaasunut kinguneqarnavianngilaq.
7. Naalagaaffeqatigiinnermut aammalu namminersornermut tunngasut
Siunnersuutigineqartoq naalagaaffeqatigiinnermut aammalu namminersornermut kinguneqarnavianngilaq.
8. Oqartussaasut kattuffiillu tusarniaaffigineqarnerat
Siunnersuut piffissami 30. oktober – 21. november 2006-imi ukununnga tusarniaassutigineqarpoq:KANUKOKA
Aningaasaqarnermut Pisortaqarfik
Suliffeqarnermut Inuussutissarsiutitigullu Ilinniartitaanernut Pisortaqarfik
Oqaatsinik Pikkorissarfik
Undervisningsministeriet
Tusarniaanermit akissutit pingasut tiguneqarput. Akissutigineqartut arlaannaalluunniit siunnersuutip imaanut oqaaseqaatissaqanngilaq.
Peqqussutissatut siunnersuummi aalajangersakkanut ataasiakkaanut oqaaseqaatit
§ 1-imut
Nr. 1-imut
Peqqussummi namminermi oqaasertaliussani nalunaarutaannarmiinnaanngitsumi siunnersuutigineqartumi erseqqissarneqarpoq aningaasartuut (Tapiissutinut aningaasaliissut) aningaasaliissutitigut pituttorsimasoq pineqarmat, aningaasat atugassiissutaasut inatsisartut ukiumoortumik aningaasanut inatsisaanni akuersissutaasut saniatigut tapiissutisisoqarsinnaajunnaarsillugu. Qinnuteqaateqartut ataasiakkaat qinnuteqaataasa imaluunniit qinnuteqaateqartut ataasiakkaat tapiissuteqarfiginissaannut naatsorsuinermut tunngavissat suliarinissaannut allannguuteqartitsinissaq siunertarineqanngilaq, soorlu maannamut konto pingaarnermi 40.10.12-mi allassimasussatut.
Nr. 2-mut
Peqqussummi namminermi oqaasertaliussani – nalunaarutaannarmiinnaanngitsumi aammalu aningaasanut inatsimmi kontomut oqaaseqaataannaanngitsuni - siunnersuutigineqartumi erseqqissarneqarpoq tapiissutisitsinissamut tunngaviusumik najoqqutassaq.
§ 2-mut
Siunnersuut innersuussutigineqarpoq.
Allannguutissatut siunersuummut oqaasertaliussat massakkut ilanngunneqartut
Allannguutit uingasumik allannertaqarput
§ 11. Naalakkersuisut Danmarkimi efterskolimiinnermut atasumik aningaasartuutinut tapiissuteqarsinnaapput. Tapiissutit tamarmiusut Inatsisartut aningaasanut inatsisaanni ukiut tamaasa annertussusilerneqartassapput.
Stk. 2. Naalakkersuisut tapiissuteqarnissamut malittarisassanik aalajangersaassapput. Tapiissutisitsinermi qinnuteqaateqartup ilinniakkamik aallartitsinissamut periarfissaminik pitsaanerulersitsissimanissaa pingaartinneqartassaaq.