22. marts 2007

UPA 2007/43

 

Naartunermi, erninermi meeravissiartaarnermilu sulinngiffeqartarneq il.il. ullormusiaqartarnerlu pillugit Inatsisartut peqqussutaata allanngortinneqarneranik Inatsisartut peqqussutissaattut siunnersuut

pillugu

Inatsisartut Ilaqutariinnermut Ataatsimiititaliaata

ISUMALIUTISSIISSUTAA

Peqqussutissatut siunnersuutip aappassaaneerneqarnerani saqqummiunneqartoq

Inatsisartut Ilaqutariinnermut Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Olga P. Berthelsen, Inuit Ataqatigiit, siulittaasoq
Inatsisartunut ilaasortaq Emilie Olsen, Atassut, siulittaasup tullia
Inatsisartunut ilaasortaq Ruth Heilmann, Siumut
Inatsisartunut ilaasortaq Agnethe Davidsen, Siumut
Inatsisartunut ilaasortaq Astrid Fleischer Rex, Demokraatit

Inatsisartut Ilaqutariinnermut Ataatsimiititaliaata ulloq 14. marts 2007-imi siullermeerinninnerup kingorna siunnersuut sukumiinerusumik misissuataarpaa.

Ilaqutariinnermut Ataatsimiititaliap siunnersuummut oqaaseqaatai
Ilaqutariinnermut Ataatsimiititaliap siunnersuut tapersersorpaa, tamatuma kingorna Naartunermi, erninermi meeravissiartaarnermilu sulinngiffeqartarneq il.il. ullormusiaqartarnerlu pillugit Inatsisartut peqqussutaat kalaallisut danskisullu oqaatsit atorneqartut assigiilersinneqassallutik.

Naartunermi erninermilu sulinngiffeqartarnerup atorneqartarnera
Sulinngiffeqartarneq pillugu malittarisassat nukittorsarneqarnissaat UPA 2006-imi Inatsisartut akuersissutigaat. Innuttaasut naartunermi erninermilu sulinngiffeqartarnermut malittarisassanik atuinerat pillugu paasissutissanik annertunerusunik Ilaqutariinnermut Ataatsimiititaliap siunnersuummik suliarinninnerminut atatillugu ujartuivoq.

Angajoqaat tamarmiullutik naartunermi erninermilu sulinngiffeqartarnersut qanorlu sivisutigisumik atortarneraat pillugu qulaajarneqarnissaa Ilaqutariinnermut Ataatsimiititaliap pingaartippaa. Suiaassuseq aallaavigalugu ileqqut qanoq atorneqartigaat? Angajoqqaat naartunermi erninermilu sulinngiffeqarumasut suliffeqarniarnikkut pissutsinit ajornartorsiortinneqartarpat? Tamatumani pineqarput suliat, aningaasaqarniarneq, ileqqulluunniit eqqarsaatigalugit akornutit.

Siunnersuut ilusimisut iluseqartoq akuersissutigineqassasoq Ilaqutariinnermut Ataatsimiititaliap isumaqatigiittup inassutigaa.

Taama naatsumik oqaaseqarluni Inatsisartut Ilaqutariinnermut Ataatsimiititaliaata siunnersuut aappassaaniigassanngortippaa.

 

	Olga P. Berthelsen Siulittaasoq
Emilie Olsen Siulittaasup tullia		Ruth Heilmann
Agnethe Davidsen		Astrid Fleischer Rex