20. april 2007

UPA 2007/42

 

Siusinaartumik pensionisiat pillugit Inatsisartut peqqussutissaattut siunnersuut

pillugit

Inatsisartut Ilaqutariinnermut ataatsimiititaliaata

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

Inatsisartut Ilaqutariinnermut Peqqissutsimullu Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Olga P. Berthelsen, Inuit ataqatigiit, siulittaasoq
Inatsisartunut ilaasortaq Emilie Olsen, Atassut, siulittaasup tullia
Inatsisartunut ilaasortaq Ruth Heilmann, Siumut
Inatsisartunut ilaasortaq Agnethe Davidsen, Siumut
Inatsisartunut ilaasortaq Astrid Fleischer Rex, Demokraatit

Aammattaaq siunnersuummik suliarinninnermi Vittus Mikaelsen sinniisussatut peqataavoq.

Inatsisartut Ilaqutariinnermut Peqqissutsimullu Ataatsimiititaliaata siullermeerinnerup kingorna peqqussutissatut siunnersuut nassuiaatitaalu ulloq 20. marts misissuataarpaa.

Tusarniaanermi akissutit
Siunnersuummi matumani ataatsimiititaliap suliarinninnermini atugassaminik tusarniaanermi akissutigineqartut nuutinnerinik ataatsimiititaliaq pissarsiniarsimavoq.

Tusarniaanermi akissuteqaatit tiguneqartut Ilaqutariinnermut Ataatsimiititaliap qujassutigai.

Ilaqutariinnermut Ataatsimiititaliap siunnersuummut oqaaseqaatai
Siunnersuummi matumani UKA 2006-imeersumi Inatsisartuni aalajangiineq, matumani siusinaartumik soraarnerussutisiat utoqqalinersiallu avissaartinneqarnissaannut tunngasoq Naalakkersuisut malimmassuk Ilaqutariinnermut Ataatsimiititaliap naammagisimaarlugu maluginiarpaa.

Siunnersuut una akuersissutigineqassappat siusinaarlutik soraarnerussutisialinnut malittarisassat atuuttut immikkut malittarisassaqarlutik attatiinnarneqassapput, taamaaliornikkut malittarisassat atuisunut paasiuminarnerullutillu aqukkuminarnerussapput.

Siunnersuummi malittarisassat atuuttut allanngortinneqarnissaat anguniarneqanngilaq. Taamaattorli UPA 2007/41-p utoqqalinersiat pillugit aamma siunnersuummut sanilliullugu siunnersuummi naleqqussaasoqassaaq.

Inuit siusinaartumik soraarnerussutisiaqarsinnaasut, utoqqalinersiaqalersinnaaneq pillugu malittarisassani ukiumikkut naleqqussarneqarnissaat siunnersuutigineqarpoq, taamaaliornikkut inuit 18-it aamma 65-it akornanni ukiullit 2010 aallarnerfigalugu siusinaartumik soraarnerussutisiaqalersinnaaqqullugit, matumani piumasaqaatinik naammassinnissimagunik. Siusinaartumik soraarnerussutisiat pillugit paasissutissanik kommunit Naalakkersuisunut nassitsisarnissaannik utoqqalinersiat pillugit siunnersuut assigalugu siunnersuutigineqartoq erseqqissaataavoq.

Ilaqutariinnermut Ataatsimiititaliap oqaaseqaatai allat
Naalakkersuisut saqqummiussissutaanni makku oqaatigineqartut Ilaqutariinnermut Ataatsimiititaliamit tapersersorneqarput:

Siusinaartumik pensionisiat aningaasartaat allannguuteqartinneqanngillat. Tamanna siusinaartumik pensionisiaqartut ataatsimut isigalugit sulisinnaassuseqarnermik siusinaartumik pensionisialinnut ataasiakkaanut inuiaqatigiinnullu iluaqutaasumik pitsaanerusumillu atorluarniarneqartariaqartumik peqarnerannut ataneqartillugu isigineqassaaq. Taamaalillutik Naalakkersuisut isumaqarput siusinaartumik pensionisiaqartut amerlanersaasa, immaqalu pingaartumik inuusunnersaasa, ilaatigut pikkorissartitsinertigut, suliffitsigut naleqqussagaasutigut, sulianut allanut sungiusarneqarnertigut taakkulu assigisaasigut inuuniarnerminni atukkamik aningaasanik pisartagaqarnikkut pilersugaanerminnit pitsaanerulernerat annertunerusumik misigissagaat.

Inersimasut sapinngisaminnik inuiaqatigiinni suliassarpassuit pingaarutillit ingerlaavartut ilaannik isumaginneqataassasut Ilaqutariinnermut Ataatsimiititaliaq isumaqarpoq. Tamanna utaqqiinnarluni pisortanit pilersorneqarnissaminnngarnit pilerinarneruvoq. Siusinaartumik soraarnerussutisiallit pillugit inatsit sukkanerusumik kajumissuseqalersitsinissamillu imaqarnissaa, inuit ataasiakkaat ilorrisimaarnissaannut inooriaasiinullu sammisoq imartuumullu tapersersuinissaq tunngavissallu nukittorsarneqarnissaat Ilaqutariinnermut Ataatsimiititaliap kissaatigaa.

Tamatumani inuttut aningaasaqarniarnikkullu atukkat eqqarsaatigalugit aammalu pikkorissartarnermi ilinniaqqittarnermilu tunngavigisat nukittorsarneqarnissaannut periarfissaq kiisalu suliffeqarnermi inissaqarluartumik eqaatsumillu tunngavissaqalernissamut atatillugu. Tassunga atatillugu suliffeqarnermik inissaqartitsisumik eqaatsumillu pilersitsinissamut sulisitsisut akisussaaqataanissaat pisariaqartoq Ilaqutariinnermut Ataatsimiititaliap erseqqissassavaa.

Ilaqutariinnermut Ataatsimiititaliap inassuteqaatai
Siusinaartumik soraarnerussutisialinnut atugassarititaasut nukittorsarneqarnissaat siunertaralugu siusinaartumik soraarnerussutisialinnut atugassarititaasut pillugit piaartumik nassuiaammik suliaqartoqassasoq Ilaqutariinnermut Ataatsimiititaliap innersuussutigaa. Taamaaliornikkut pensionit pillugit nalunaarusiaq 2006-imeersoq assigalugu, siusinaartumillu soraarnerussutisialinnut atugassarititaasut pitsaanerulersinniarlugit suliap ingerlateqqinneqarnissaa siunertarineqarpoq.

Ilaqutariinnermut Ataatsimiititaliap siunnersuummut inassuteqaataa

Siunnersuutip taamatut iluseqartillugu akuersissutigineqarnissaa Ilaqutariinnermut Ataatsimiititaliap Inatsisartunut inassutigaa.

Taama naatsumik oqaaseqarluni Inatsisartut Ilaqutariinnermut Ataatsimiititaliaata siunnersuut aappassaaniigassanngortippaa.

 

	Olga P. Berthelsen Siulittaasoq
Emilie Olsen		Ruth Heilmann
Agnethe Davidsen		Astrid Fleischer Rex