1. maj 2007

UPA 2007/41

 

Utoqqalinermi pensionisiat pillugit Inatsisartut peqqussutissaattut siunnersuut

pillugu

Ilaqutariinnermut Ataatsimiititaliap

ILASSUTITUT ISUMALIUTISSIISSUTAA

Siunnersuutip pingajussaaneerneqarnerani saqqummiunneqartoq

Inatsisartut Ilaqutariinnermut Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Olga P. Berthelsen, Inuit Ataqatigiit, siulittaasoq
Inatsisartunut ilaasortaq Emilie Olsen, Atassut, siulittaasup tullia
Inatsisartunut ilaasortaq Ruth Heilmann, Siumut
Inatsisartunut ilaasortaq Agnethe Davidsen, Siumut
Inatsisartunut ilaasortaq Astrid Fleischer Rex, Demokraatit

Ilaqutariinnermut Ataatsimiititaliap oqaaseqaatai
Tusarniaanermit akissuteqaatit siunnersuutillu aningaasatigut kingunerisassai pillugit Kattusseqatigiit Partiianit aappassaaneerinermi oqaaseqaatit kingunerisaannik siunnersuut pingajussaaneerinissaq sioqqullugu Ilaqutariinnermut Ataatsimiititaliamit suliarisassanngorteqqinneqarpoq.

Siunnersuutip suliarineranut atatillugu tusarniaanermut akissuteqaatitut tiguneqartut ataatsimiititaliamit misissoqqissaarneqarneqarlutillu nalilersoqqissaarneqarsimasut Ilaqutariinnermut Ataatsimiititaliamit oqaatigineqassaaq, tamannalu ataatsimiititaliap aappassaaneerinissamut isumaliutissiissutaani nassuiaatigineqarpoq. Tamatuma saniatigut Ilaqutariinnermut Ataatsimiititaliaq KANUKOKA-mik immikkullu ilisimasalinnik KAKUKOKA-meersunik ataatsimeeqateqarpoq, soorluttaaq Ilaqutariinnermut Inatsisinillu Atortitsinermut Naalakkersuisoq taamatullu Aningaasanut Nunanullu Allanut Naalakkersuisoq isumasioqatigalugit ataatsimeeqatigineqarsimasut. Taamaattumik illuatungeriit siunnersuummut isummiussaat pillugit ilisimatinneqarluarsimalluni Ilaqutariinnermut Ataatsimiititaliaq isumaqarpoq. Ilaqutariinnermut Ataatsimiititaliaq tassunga atasumik allamik oqaaseqaatissaqanngilaq.

Tapinik aningaasanut atugassiissutinut tunngasunik atuissanerlutik kommunit namminneq aalajangigassaraat. Siunnersuutip ilusiligaanera naapertorlugu inummut tapinik pissarsisinneqarsinnaanermut periarfissat naliliiffigineqarnissaanik utoqqalinermi pensionisialik kinaluunniit piumasaqaateqarsinnaavoq.

Naalakkersuinikkut anguniakkat siunnersuuteqarnermi tunuliaqutaasut siunnersuutikkut maleqqissaarneqartut Ilaqutariinnermut Ataatsimiititaliaq isumaqarpoq. Siunnersuut maannatut iluseqartillugu utoqqalinermi pensionisiallit atugaannik suli pitsanngorsaaqqinnissamik imalimmik, tamatumalu peqatigisaanik ukiumut 63 mio. kr.-inik, siunnersuutip maannatut iluseqartup kingunerisaanik 2008-mit aningaasartuutigineqartussat qanoq aningaasalersorneqarnissaat pillugu nassuiaammik imalimmik siunnersuuteqarnissamut Kattusseqatigiit Partiiat mattunneqanngilaq, soorlu tamanna Ilaqutariinnermut Ataatsimiititaliap partiinut siusinnerusukkut kaammattuutigaa.

Siunertaanngitsumik naapertuutinngitsumillu sunniutaasinnaasut pilertortumik iluarsiivigineqarsinnaaqqullugit siunnersuutip sunniutaanik Ilaqutariinnermut Inatsisinillu Atortitsinermut Naalakkersuisup qanimut malinnaaffiginninnissaa Ilaqutariinnermut Ataatsimiititaliap qinnutigaa.

Inassuteqaat
Siuliani allassimasunik oqaaseqaateqarluni siunnersuut maana ilusimisut iluseqartoq akuersissutigineqassasoq Ilaqutariinnermut Ataatsimiititaliamit inassutigineqarpoq.

 

	Olga P. Berthelsen Siulittaasoq
Emilie Olsen		Agnethe Davidsen
Ruth Heilmann		Astrid Fleischer Rex