28. april 2007

UPA 2007/41

 

Utoqqalinermi pensionisiat pillugit Inatsisartut aalajangiiffigisassaattut siunnersuut

pillugu

Inatsisartut Ilaqutariinnermut Ataatsimiititaliaata

ILASSUTITUT ISUMALIUTISSIISSUTAA


Siunnersuutip aappassaaneerneqarnerani saqqummiunneqartoq


Inatsisartut Ilaqutariinnermut Ataatsimiititaliaat suliarinninnermini ukuninnga inuttaqarpoq:


Inatsisartunut ilaasortaq Olga P. Berthelsen, Inuit Ataqatigiit (siulittaasoq)
Inatsisartunut ilaasortaq Emilie Olsen, Atassut (siulittaasup tullia)
Inatsisartunut ilaasortaq Agnethe Davidsen, Siumut
Inatsisartunut ilaasortaq Ruth Heilmann, Siumut
Inatsisartunut ilaasortaq Astrid Fleischer Rex, Demokraatit


Naalakkersuisut allannguutissatut siunnersuutaat Ilaqutariinnermut Ataatsimiititaliamit sukumiilluinnartumik misissorneqarpoq.


Allannguutissatut siunnersuummut oqaaseqaatit
Ilaqutariinnermut Ataatsimiititaliap kaammattuineratigut allannguutissatut siunnersuummik ima nassataqartumik Naalakkersuisut allannguutissatut siunnersuummik saqqummiussimmata Ilaqutariinnermut Ataatsimiititaliamit iluarisimaarneqarpoq:

Tapit aningaasanut atugassiissutinut tunngasut taakkulu naatsorsorneqartarnerat pillugit erseqqinnerusunik maleruagassiornissamut Naalakkersuisut allannguutissatut siunnersuutikkut aammattaaq piginnaatinneqarput. Erseqqinnerusunik maleruagassiornissamut Naalakkersuisunut piginnaatitsissutip kommunit tapinik aningaasanut atugassiissutinut tunngasunik tunniussinissamut periarfissaannut ajornerulersitsissanngitsoq Ilaqutariinnermut Ataatsimiititaliamit erseqqissarneqassaaq. Ilaqutariinnermut Ataatsimiititaliap paasinninnera malillugu kommuninit tapiissutit aningaasanut atugassiissutinut tunngasut tassaapput utoqqalinermi pensionisialinnut aningaasatigut atugasiissutissatut kommuninit aalajangersarneqartartussatut.

Allannguutissatut siunnersuummi § 01, imm. 3-mi piginnaatitsissut kommunit akornanni utoqqalinermi pensionisiallit atugaasa sanilliussissutiginissaanni tunngavissaasinnaavoq pingaarutilik, tamannalu utoqqalinermi pensionisiallit atugaat pillugit iliuusissanik aalajangersimasunik pitsanngorsaataasussanik Inatsisartut Naalakkersuisullu ingerlaavartumik saqqummiussisinnaanerannut periarfissiivoq.

Aaningaasanik aalajangersimasunik atugassiissutinik kommunit atuisarnerat pillugu Inatsisartut Ombudsmandiata siusinnerusukkut uparuaanera Naalakkersuisut allannguutissatut siunnersuutaatigut malinneqarpoq.

Allannguutissatut siunnersuutip kingunerisassai
Allannguutissatut siunnersuummik ilusiliisimaneq naapertorlugu tapinik aningaasanut atugassiissutinut tunngasunik kommuni tunniussissanersoq kommunit nammineerluinnarlutik qinigassaraat.

Taamattorli Naalakkersuisut pensionisiaqarnermut siunnersuutigeqqaagaat inummut tapinik kommunit tunniussinissamut periarfissaasa killilerneqarneratigut ilaannakuusumik aningaasalersorneqartoq paasineqarpoq. Tamanna aappassaaneerinninnissamut Naalakkersuisut akissuteqaataanni Naalakkersuisullu inatsisissatut allannguutissatut siunnersuutaannut inatsimmut nassuiaatini erseqqissumik takuneqarsinnaavoq.

Pensionisiat aaqqiissuuteqqinneqarnerani kommunit aningaasartuuteqarnerunermut taarsiivigineqarnissaat, kommunilli isertitaqarnerussutaat sipaarutaallu Namminersornerullutik Oqartussat kommuninut ataatsimoortumik tapiissutaanni ilanngaatigineqartassasut aningaasaqarnikkut kingunerisassat naatsorsorneqarneranni taamaalilluni naatsorsuutigineqarpoq.

Naalakkersuisut allannguutissatut siunnersuutaat Ilaqutariinnermut Ataatsimiititaliap kaammattuuteqarneratigut saqqumiunneqartup tapit aningaasanut atugassiissutinut tunngasut tunngavigalugit tapiissuteqartarnermut periaatsiminnik ingerlatitsiinnarnissamut kommunip periarfissippai. Taamaattumik Namminersornerullutik Oqartussat kommuninut ataatsimoortumik tapiissutaanni ilanngaatigineqarsinnaasunik tapini taakkunani sipaaruteqartoqassanngilaq.

Aningaasanut Nunanullu Allanut Naalakkersuisoq ataatsimiititaliamut makkuninnga paasissutissiivoq:

Inuttut tapinut sipaarutit atorunnaarpata Namminersornerullutik Oqartussat 2007-imi aningaasartuutaat 5 mio. kr.-inik qaffassapput, taakku 2007-imut Aningaasanut inatsimmi sillimmatinut immikkoortinneqartunut naapertuupput. Namminersornerullutik Oqartussat 2007-imi aningaasartuutaat taamaalillutik sillimmatit immikkoortinneqartut iluini akilerneqarsinnaanissaat naatsorsuutigineqarpoq. Taamaattorli naatsorsuinernut atatillugu nalornissuteqaroqarpoq, apeqqullu KANUKOKA-mik isumaqatigiinniutigineqassaaq. Kiisalu pensionisianut sillimmatinit kommuninut ataatsimoortumik tapiissutinut nuussineq Aningaasaqarnermut Ataatsimiititaliamit akuersissutigineqassaaq.

Inuttut tapinut sipaarutit atorunnaarnerisa kingunerisaanik 2008-mit siumullu 2007-imut Aningaasanut inatsisissatut Siunnersuummi pensionisianut sillimmatit immikkoortinneqartut ukiumoortumik 10 mio. Kr.-inik akitsuut matussusersinnaanngilaat.

KANUKOKA-mik qaninnerusumik suleqateqarnissamik pisariaqartitsineq
Alannguutissatut siunnersuummi § 01. imm. 3-mi piginnaatitsissummik Naalakkersuisut atuinialersaassappata Naalakkersuisut KANUKOKA-mik isumasioqateqassasut Ilaqutariinnermut Ataatsimiititaliaq isumaqarpoq. Tamanna tusarniaanissamut nalinginnaasumik pisussaaffimmut ilassutitut pisussaaffimmut ilaatinneqassasoq ataatsimiititaliap kissaatigaa.

Ilaqutariinnermut Naalakkersuisoqarfiup KANUKOKA-llu akornanni qanimut oqaloqatigiittarneq pisariaqartoq Ilaqutariinnermut Ataatsimiititaliaq isumaqarpoq, taamaalilluni siunnersuutip kingunerisinnaasai naatsorsuutigineqariinngitsutut naapertuutinngitsullu sapinngisamik piaartumik qanimullu suleqatigiinnikkut sulissutigineqarsinnaaqqullugit.

Inassuteqaat
Siuliani allassimasutut siunnersuummik, taassumalu aningaasatigut kingunerisassaanik paasinnilluni allannguutissatut siunnersuutip maanna ilusimisut iluseqartup akuersissutigineqarnissaa Ilaqutariinnermut Ataatsimiititaliap inassutigaa.

 

Olga P. Berthelsen
Siulittaasoq

Emilie Olsen
Agnethe Davidsen

Ruth Heilmann
Astrid Fleischer Rex