23. april 2007

UPA 2007/41

 

Allannguutissatut siunnersuut

 

Uunga siunnersuut: Utoqqalinermi pensionisiat pillugit Inatsisartut peqqussutaat nr. xx, xx 2007-imeersoq

Aappassaaneerinermi Naalakkersuisunit saqqummiunneqartoq.

 

Paragraffi nutaaq

1. § 13-ip kingorna paragraffimik nutaamik ilanngussisoqassaaq:

"Tapit aningaasanut atugassiissutinut tunngasut

§ 01. Utoqqalinermi pensionisiatut aningaasat atugassiissutit kommunemit aalajangersarneqarsimasut minnerpaaffii tunngavigalugit akiligassat aalajangersimasut akilerneqareeraangata kommunalbestyrelsip tapit aningaasanut atugassiissutinut tunngasut tunniussinnaavai.
Imm. 2. Tapit aningaasanut atugassiissutinut tunngasut utoqqalinermi pensionisialinnut Kalaallit Nunaata avataani aalajangersimasumik najugalinnut tunniunneqarsinnaanngillat.
Imm. 3. Tapit aningaasanut atugassiissutit pillugit malittarisassanik Naalakkersuisut aalajangersaasinnaapput, tassunga ilanngullugit aningaasanik atugassiissutit naatsorsorneqartarnerat."

§15-imut

2. § 15, imm. 1, imm.1. imatut oqaasertalerneqassaaq:
"Inuit Kalaallit Nunaanni najugallit utoqqalinermi pensionisianut, meeqqanut tapinut, tapinut aningaasanut atugassiissutinut tunngasunut kiisalu inummut tapinut qinnuteqaatitik kommunemut najugaqarfigisaminnut nassiutissavaat."

§ 18-imut

3. § 18 imatut oqaasertalerneqassaaq:
" § 18. Utoqqalinermi pensionisiallip aningaasaqarnerminik aqutsisinnaannginnera kommunalbestyrelsimit missiliorneqarpat, utoqqalinermi pensionisianik tunniuttakkanik aqutsinissaq pillugu aalajangiisoqarsinnaavoq, tassunga ilanngullugit meeqqanut tapit, tapit aningaasanut atugassiissutinut tunngasut inummullu tapit."

§ 22-mut

4. § 22, imm. 2, imm. 1 imatut oqaasertalerneqassaaq:
"Tapit aningaasanut atugassiissutinut tunngasut kiisalu inummut tapit kommunemit aningaasartuutigineqartassapput."

 

Peqqussutissatut siunnersuummut oqaaseqaatit

Oqaaseqaatit nalinginnaasut

1. Aallarniut
Allannguutissatut siunnersuutip imarai allannguutit siunnersuutip Inatsisartuni siullermeerutaasumik oqallisigineqarnerata kingorna pingaarnerusutigut Ilaqutariinnermut Ataatsimiititaliap isumaliutissiissutaanit tunngavilersorneqartut. Ilaqutariinnermut Ataatsimiititaliami ilaasortat isumaqatigiillutik inassutigaat inummut tapiissutinut tunngatillugu kommunet periarfissaqarnerulersinneqassasut, siunnersuutigineqaqqaartumit periarfissaqarnerulersinneqarlutik.

Tamanna tunuliaqutigalugu siunnersuutigineqarpoq tapit aningaasanut atugassiissutinut tunngasut ilassutitut atuutilersinneqassasut.

Siunnersuummi siullermi saqqummiunneqartumi inummut tapit aatsaat tunniunneqarsinnaapput utoqqalinermi pensionisialinnut immikkut ittumik ajornartoortunut imaluunniit aningaasatigut pissaaleqisoqalernissaa ilimaginaateqarsinnaappat.

Aalajangersagaq taanna pigiinnarneqassaaq, kisianni kommunip aningaasanut atugassiissutinut aalajangersagai tunngavigalugit aningaasanut atugassiissutinut tapinik tunniussinissamut siunnersuutikkut kommunit periarfissinneqarput.

2. Siunnersuutip pingaarnerusortai
Siunnersuummi kommune periarfissinneqarpoq utoqqalinermi pensionisiatut aningaasat atugassiissutit kommunemit aalajangersarneqarsimasut minnerpaaffii tunngavigalugit akiligassat aalajangersimasut akilerneqareeraangata kommunemit tapit aningaasanut atugassiissutinut tunngasut tunniunneqarsinnaalersillugit. Imaappoq kommunep aningaasat atugassiissutit angissusissaat aalajangersarsinnaalissavai, utoqqalinermi pensionisialinnut tamanut akiligassat aalajangersimasut akilerneqareeraangata atugassiissutaasussat.

3. Aningaasaqarnikkut aqutsinikkullu pisortanut kingunissai
Tapinut aningaasartuuteqarnerunissaq siunnersuutip kinguneqarnissaa naatsorsuutigineqarpoq. Qanoq annertutiginissaa oqaatigiuminaappoq, kisianni aningaasanut atugassiissutinut kommunit maannamut suleriaasiat tunngavigigaanni, ukiumut 10 million kr.-it missaaniinnissaat naatsorsuutigineqarpoq.

Aqutsinikkut pisortanut kinguneqartussaanngillat.

4. Aningaasaqarnikkut aqutsinikkullu inuussutissarsiutinik ingerlatsisunut kingussai
Siunnersuut aningaasaqarnikkut aqutsinikkullu inuussutissarsiutinik ingerlatsisunut kinguneqartussaanngilaq.

5. Avatangiisinut pinngortitamullu tunngasutigut kingussai
Naatsorsuutigineqanngilaq siunnersuut avatangiisinut tunngasutigut kinguneqassasoq.

6. Aqutsinermut tunngatillugu innuttaasunut kingunissai
Naatsorsuutigineqanngilaq siunnersuut aqutsinermut tunngatillugu innuttaasunut kinguneqassasoq.

7. Naalagaaffeqatigiinnermut namminersulivinnissamullu tunngasut
Naalagaaffeqatigiinnermut namminersulivinnissamullu tunngatillugu siunnersuut kinguneqartussaanngilaq.

8. Oqartussaasunik kattuffinnillu tusarniaaneq
Siunnersuut Aningaasaqarnermut Pisortaqarfimmut tusarniaassutaavoq, tusarniaanermilu akissuteqaat siunnersuummut ilanngunneqarpoq.

 

Aalajangersakkanut ataasiakkaanut oqaaseqaatit

§ 01-imut tunngatillugu

Imm.1.-imut tunngatillugu

Aalajangersagaq ilanngunneqarpoq qulakkeerniarlugu kommunalbestyrelsip periarfissinneqarnissaa utoqqalinermi pensionisiatut aningaasat atugassiissutit kommunemit aalajangersarneqarsimasut minnerpaaffii tunngavigalugit akiligassat aalajangersimasut akilerneqareeraangata kommunemit tapit aningaasanut atugassiissutinut tunngasut tunniunneqarsinnaalernissaat.

Kommune periarfissinneqarpoq aningaasanik atugassiissutissanik aalajangersaanissamut, utoqqalinermi pensionisialinnut tamanut akiligassat aalajangersimasut akilerneqareeraangata tunniunneqartartussamik, taamalu tapinik pineqartunik peqanngitsunut tunniussisinnaalersillugit. Naalakkersuisut naatsorsueriaatsimi aningaasartuutit sorliit pineqarnersut pillugit malittarisassanik aalajangersaassapput.

Imm. 2-mut tunngatillugu

Aalajangersakkami aalajangersarneqarpoq tapit aningaasanut atugassiissutinut tunngasut utoqqalinermi pensionisialinnut Kalaallit Nunaata avataani aalajangersimasumik najugalinnut tunniunneqartassanngitsut.

Imm. 3-mut tunngatillugu

Aalajangersakkami aalajangersarneqarpoq tapit aningaasanut atugassiissutinut tunngasut pillugit Naalakkersuisut sukumiinerusunik malittarisassiussasut.

Malittarisassat utoqqalinermi pensionisiat pillugit nalunaarummi takuneqarsinnaassapput.

Pissusissamisoortuussaaq aningaasat atugassiissutit qanoq naatsorsorneqartarnissaat pillugit malittarisassanik aalajangersaasoqarnissaa, imaappoq aningaasartuutit sorliit naatsorsuusiornermi ilanngunneqassanersut.

§ 15-imut tunngatillugu

Allannguuteqartitsisoqarpoq aalajangersagaq eqqortunngortinniarlugu. Tapit aningaasanut atugassiissutinut tunngasut aamma kommunemut najugaqarfigisamut qinnutigineqarsinnaassapput.

§ 18-imut tunngatillugu

Allannguuteqartitsisoqarpoq aalajangersagaq eqqortunngortinniarlugu. Tapit aningaasanut atugassiissutinut tunngasut aamma kommunemit aqunneqarsinnaassapput, kommunalbestyrelsimit missingerneqarpat utoqqalinermi pensionisialik aningaasaqarnerminik aqutsisinnaanngitsoq.

 
§ 22-mut tunngatillugu

Allannguuteqartitsisoqarpoq aalajangersagaq eqqortunngortinniarlugu. Tapinut aningaasanut atugassiissutinut tunngasunut aningaasartuutit kommunemit akilerneqartassapput.