Ilanngussaq 3. "[EJERFORENINGENS NAVN]"-imi torersaarnissamut maleruagassanut tunngaviusut

 

Najugaqartut kikkulluunniit pisussaapput piginnittut peqatigiiffianni torersaarnissamut maleruagassanut tunngaviusut, matuma kinguliani aalajangersakkat aqqutigalugit aalajangersarneqartut malissallugit. Torersaarnissamut maleruagassanut tunngaviusut piginnittut peqatigiiffiini torersaarnissamut maleruagassanik aalajangersaasoqarsimatinnagu atuutissapput.

Piginnittoq kinaluunniit inissiami nammineq pigisami najugaqartunut tamanut akisussaavoq, taakkununngattaaq pulaartit ilaallutik.

Torersaarnissamut maleruagassanik ukuninnga unioqqutitseqattaarneq imaluunniit annertuumik unioqqutitsineq piginnittut peqatigiiffiata naleqquttumik piffissaliilluni piginnittup najugaqartulluunniit allap inissiamit nammineq pigisamit nuunnissaanik peqquneqarneranik kinguneqarsinnaavoq.


Eqqagassat

Eqqagassat siunertamut tamatumunnga atortulersuutaasunut iginneqartassapput. Eqqagassanik majuartarfinnut, majuartarfeqarfinnut, majuartarfiit sangoriaannut imaluunniit eqqaaveqarfiup naqqanut ilisisoqassanngilaq.


Torsuusaasat majuartarfiillu ataatsimoorussat

Najugaqartut inissiap najukkap silataani torsuusaasanik majuartarfeqarfinnillu eqqiluisaartitsinermi suleqataassaaq. Tamanna piginnittut peqatigiiffianni isumaqatigiissutigineqarpat sikkilit, aneerussiviit, kiilkit pigisallu allat majuartarfinnut, majuartarfiit sangoriaannut torsuusaasanullu inissinneqassanngillat. Taamaattorli qimaaffissiatut aqqutit matooqqusaanngillat.


Antennit

Piginnittut peqatigiiffianni silami antennilersortoqarsinnaanersoq tamannalu qanoq annertutigisumik pisinnaanersoq aalajangerneqassaaq.


Uumasuutit

Piginnittut peqatigiiffianni uumasuuteqartoqarsinnaanersoq tamannalu qanoq annertutigisumik pisinnaanersoq aalajangerneqassaaq.


Sakkut, nipilersorneq il.il.

Sakkut nipiliortut, nipiliorluni nuannannerit aammalu radiumik, fjernsynimik, cd-mik nipilersuutinillu atuinerit sanilinut ajoqutaasumik atoqqusaanngillat.


Pequusiviit

Imerpalasut ikuallajasut, soorlu benziinat, petroleumit, terpentiinat lakkillu pequusivinni ininilu assigisaanni uninngasuutigineqaqqusaanngillat.


Allagartalersuineq

Piginnittut peqatigiiffianni matuni allagartalersuutit saniatigut allagartalersuisoqarsinnaanersoq tamannalu qanoq annertutigisumik pisinnaanersoq aalajangerneqassaaq.