26. marts 2007

UPA 2007/22

 

Inissiat nammineq pigisat pillugit Inatsisartut peqqussutissaattut siunnersuut

pillugu

Inatsisartut Attaveqaqatigiinnermut Ineqarnermullu Ataatsimiititaliaata

ISUMALIUTISSIISSUTAA

siunnersuutip aappassaaneerneqarnerani saqqummiunneqartoq

Inatsisartut Attaveqaqatigiinnermut Ineqarnermullu Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Godmand Rasmussen, Atassut, siulittaasoq
Inatsisartunut ilaasortaq Olga P. Berthelsen, Inuit Ataqatigiit, siulittaasup tullia
Inatsisartunut ilaasortaq Palle Christiansen, Demokraatit
Inatsisartunut ilaasortaq Agnethe Davidsen, Siumut
Inatsisartunut ilaasortaq Jørgen Wæver Johansen, Siumut

Inissiat nammineq pigisat pillugit Inatsisartut peqqussutissaattut siunnersuut UPA 2007-imi siullermeerneqareermat Inatsisartut Attaveqaqatigiinnermut Ineqarnermullu Ataatsimiititaliaannit nassuiaatitai ilanngullugit misissorneqarpoq.

Tusarniaanermut akissutit
Siunnersuutip matumani pineqartup ataatsimiititaliami suliarineqarnissaanut atugassatut tusarniaanermi akissutit nuutinneri ataatsimiititaliap piniarpai. Tusarniaanermut akissutit ataatsimiititaliap oqaaseqarnissaanik pissutissaqalersitsinngillat.

Siunnersuutip imarisai
Piginnittut peqatigiiffiinut tunngaviusumik aalajangersakkat pillugit maleruagassat siunnersuutikkut aalajangersarneqarput. Siunnersuut malittarisassanut tunngavissanik kiisalu torersaanissamut malittarisassanik tapertaqartinneqarpoq.

Naalakkersuisut siunnersuutitut saqqummiussaatigut anguniarneqartut ataatsimiititaliap iluarisimaarpai.

Inatsisartulli ataatsimiittarfianni siullermeerinermi ataatsimiititaliami Inuit Ataqatigiit ilaasortaatitaata oqariartuutai tunngavigalugit apeqqutit uku paasinarsisinneqarnissaat kissaatigineqarpoq:

1. Utoqqarnut inissiat, innarluutilinnut inissiat kiisalu inuusuttunut inissiat siunissami nammineq pigisatut inissiaatigineqalersinnaanerat Naalakkersuisunit isumaliutigineqarsimava?
2. Inissianik piginnittut peqatigiiffianni ilaasortat arlaannaalluunniit inissiamit ataatsimit amerlanerusumit pigisaqannginnissaa qulakkeerniarlugu periarfissat qanoq ittut Naalakkersuisut isumaliutigisimaneraat paasissutissiissutigineqassasoq kissaatigineqarpoq. Taamatut aaqqiinermi Naalakkersuisut suut iluaqutaasinnaasutut ajoqutaasinnaasutullu isigaat?
3. Namminersornerullutik Oqartussat inissiaataanni piginnittut peqatigiiffinngortinneqarsimasumi attartortutut najugaqaannartut assersuutigalugu ineqarnermut tapiissutinik pissarsisinnaanissamut periarfissaqaannassanersut paasissutissiissutigineqassasoq kissaatigineqarpoq kiisalu attartortut nammineq inigisaminnik piginnittut peqatigiiffianni pisinissamut periarfissaqanngitsut qanoq piginnaatitaaffeqarnissaat pillugu nalinginnaasumik nassuiaat kissaatigineqarpoq.

Qulaani taaneqartut pillugit sukumiisumik nassuiaammik aappassaaneerinissamut akissuteqaamminni Naalakkersuisunit saqqummiussinissaat ataatsimiititaliamit qinnutigineqassaaq.

Qulaani taaneqartut pillugit tamakkiisumik nassuiaammik Naalakkersuisut aappassaanerinissamut saqqummiussinissaat tunngavissaatillugu peqqussutissatut siunnersuummut saqqummiunneqartumut tapersiinini ataatsimiititaliap isumaqatigiittup oqaatigissavaa.

Tamanna tunngavigalugu ataatsimiititaliap isumaqatigiittup siunnersuut Inatsisartunit akuersissutigineqarnissaa inassutigaa.

Taama oqaaseqaateqarluni Inatsisartut Attaveqaqatigiinnermut Ineqarnermullu Ataatsimiititaliaata siunnersuut aappassaaniigassanngortippaa.

 

	Godmand Rasmussen, siulittaasoq
Olga P. Berthelsen, siulittaasup tullia		Jørgen Wæver Johansen
Agnethe Davidsen		Palle Christiansen