2. januar 2007

UPA2007/22

 

Peqqussutissatut siunnersuummut oqaaseqaatit

Oqaaseqaatit nalinginnaasut

1. Aallaqqaasiut
Inissiat nammineq pigisat pillugit Inatsisartut peqqussutissaattut siunnersuut piginnittut peqatigiiffiinut maleruagassanut tunngaviusunut aalajangersakkanik imaqarpoq.

Suliassaqarfik taanna siusinnerusukkut tamanut atugassanik maleruagassiuunneqarsimanngilaq, inissiat nammineq pigisat aatsaat ukiuni kingulliunerusuni Kalaallit Nunaanni ineqariaatsitut nalinginnaaleriartorsimammat, maannamullu inissiat pineqartut pingaartumik tassaasarsimammata illut affarleriit, inissialiortiternermut tapersiissuteqartarneq pillugu Inatsisartut peqqussutaanni maleruagassat naapertorlugit tapiiffigineqarlutik sananeqartartut. Inissiat nammineq pigisat suli amerliartorput, tamannalu inissianik niueruteqarnerup namminersortunngorsarneqarnerata annertusiartorneranik, kiisalu ilaqutariinnut arlalinnut inissianik nutaanik namminerisamik pigineqartunik sanaartornerup annertusiartorneranik peqquteqarpoq. Inissiat nammineq pigisat amerliartornerat ilutigalugu suliassaqarfiup tamatuma inatsisiliuunneqarnissaa pissusissamisuuginnartumik pisariaqartinneqalersimavoq.

Inatsisartut 2006-imi upernaakkut ataatsimiinneranni aalajangiiffigisassatut siunnersuutip, oqaluuserisassani nr. 53-ip oqallisigineqarneranut atatillugu inissiat nammineq pigisat pillugit Inatsisartut peqqussutaannik pisariaqartitsineq oqaluuserineqarpoq. Ineqarnermut Attaveqarnermullu Naalakkersuisup tamatumunnga atatillugu ilisimatitsissutigaa inissiat nammineq pigisat pillugit Inatsisartut peqqussutissaattut siunnersuutip suliarineqarnera aallartereersoq, aammalu siunnersuut 2007-imi upernaakkut ataatsimiinnermut saqqummiunneqarsinnaalerluni naammassineqarnissaa naatsorsuutigineqartoq.

Peqqussutissatut siunnersuut pigineqartoq paasiuminartorlu, malittarisassanut tunngavissanik kiisalu torersaarnissamut malittarisassanut tunngavissanik inissiat nammineq pigisat inatsisiliuunneqarnissaanut pisariaqartitsinermut naammaginartumik aaqqiissutaasinnaasutut oqaatigisariaqarpoq.

Maannamut piginnittut akornanni pissutsit piginnittut peqatigiiffii piginnittut peqatigiiffianni malittarisassanik aalajangersaasimatillugit nalunaarsuisimatillugillu, kiisalu torersaarnissamut malittarisassanik aalajangersaasimatillugit piginnittut peqatigiiffiisa malittarisassaat aqqutigalugit malittarisassiuunneqartarsimapput. Pissutsit piginnittut peqatigiiffiini malittarisassat avataaniittut, kiisalu torersaarnissamut malittarisassat avataanniittut peqatigiiffinnut malittarisassat nalinginnaasut tunngavigalugit malittarisassiuunneqartarsimapput.

Siunnersuummi malittarisassat saniatigut siunnersuut malillugu piginnittut peqatigiiffii piginnittut peqatigiiffiisa malittarisassai aqqutigalugit malittarisassiuunneqartassapput. Siunnersuummut ilanngussaq 1 piginnittut peqatigiiffiinut marluk sinnerlugit inissiartaqartunut malittarisassanik tunngaviusunik imaqarpoq, taannalu ataatsimut isigalugu piginnittut peqatigiiffiinut ataasiakkaanut malittarisassanik aalajangersaasimanngitsunut nalunaarsuisimanngitsunullu atuuppoq. Kiisalu siunnersuummut ilanngussaq 2 illuni affarleriinni piginnittut peqatigiiffiinut malittarisassanik tunngaviusunik, piginnittut peqatigiiffiata malittarisassanut tunngavissat atuunnissaat kissaatigineqarpat piginnittut peqatigiiffiannit akuersissutigineqarsinnaasunik nalunaarsorneqarsinnaasunillu imaqarpoq.

Aamma piginnittut peqatigiiffii torersaarnissamut maleruagassanik, piginnittut peqatigiiffiini ataasiakkaani pissutsinut pisariaqartinneqartunut arlalinnut malittarisassiuussisunut akuersisinnaapput. Piginnittut peqatigiiffianni torersaarnissamut malittarisassanik atuutsitsilersimanngippat, torersaarnissamut malittarisassanut tunngavissat, ilanngussaq 3-mi allanneqartut atuutsinneqassapput.

Peqqussutissatut siunnersuut piginnittut peqatigiiffiata atorunnaarsinneqarnissaa pillugu aalajangersakkanik imaqanngilaq. Tamanna pillugu aalajangersakkat pisariaqartutut naammaginartutulluunniit isigineqanngillat, piginittut peqatigiiffii pilersinneqaraangamik atuutiinnartussanngortarmata, tamatumani piginnittut tamarmik illuutip isaterneqarluni piiarneqarnissaa imaluunniit piginneriaatsimut allamut nuunneqarnissaa pillugu pisariaqartunik suliniuteqarsimanngippata.

2. Peqqussutissatut siunnersuutip pingaarnersai
Peqqussutissatut siunnersuut illuutinut, nammineq pigisanik inissiartaqartunut atorneqassaaq, tassani inissiat nammineq pigisat najugaqarfittut inuussutissarsiornermulluunniit atorneqarnerat apeqqutaatinnagu, aammalu piginnittup inissiami nammineq pigisami najugaqarnera imaluunniit inissiap nammineq pigisap attartortinneqarnera apeqqutaatinnagu. Aammattaaq peqqussutissatut siunnersuut illuutinut, inissianik nammineq pigisanik najugassatut atugassanik inissiartaqartunut atuutissaaq, tamatumani inissiat taakku utoqqarnut inissiatut, innarluutilinnut inissiatut imaluunniit inuusuttunut inissiatut aaqqissuunneqarsimanerat apeqqutaatinnagu. Kiisalu peqqussutissatut siunnersuut illuutinut, pisortat inissiaataattut attartortittakkatut atuussimagaluarlutik inissiatut nammineq pigisatut allanngortinneqarsimasunut, kiisalu illuutinut nammineq pigisanut allanut, inissianik nammineq pigisanik inissiartaqartunut, ilaatigut Naalakkersuisunit imaluunniit kommunalbestyrelsimit aningaasaliiffigineqarlutik sananeqarsimasunut atuutissaaq.

Illuut imaluunniit sanaartugaq, ataaseq sinnerlugu inissiartaqartoq sunaluunniit inissianut nammineq pigisatut taaneqartunut immikkoortiterlugu aggorneqarsinnaavoq. Illuummi sanaartukkamiluunniit inissianut nammineq pigisanut aggorneqartumi inissiat teknikerimit uuttortarneqarsinnaapput, inissiallu tamarmik angissuserpiaat tunngavigalugit nalunaarsorneqarsinnaallutik, kiisalu init ataatsimoorussiffiusut annertussusaat uuttortarneqarsinnaapput nalunaarsorneqarsinnaallutillu. Uuttortaanermut atatillugu piginnittut agguaqatigiisitsinissamik brøkinngorlugu aalajangersaassapput, taannalu naapertorlugu piginnittut pisattanik atortunillu ataatsimoorussanit piginnittussaatitaassapput.

Siunnersuut najugarisassatut illuutinut, taamaallaat Namminersornerullutik Oqartussanit imaluunniit kommunimit pigineqartunut, imaluunniit najugarisassatut illuutinut, piginneqatigiilluni inissiaatillit peqatigiiffiinit pigineqartunut atuutissanngilaq.

Siunnersuutip atuutilerneratigut inissiat nammineq pigisat tamarmik immikkut illutut pigisatut immikkoortutut isigineqalissapput, aammalu piginnittup illuummi piginnittut allat peqatigalugit agguaqatigiisitsineq sukumiinerusumik aalajangersarneqarsimasoq naapertorlugu pisattanut atortunullu ataatsimoorussanut piginnittussatitaalissaaq.

Pissutsit assigiinngitsut, ilaqutariinnut arlalinnut inissianut nammineq pigisanik inissiartaqartunut atuutilersussat eqqarsaatigalugit, piginnittut tamarmik piginnittut peqatigiiffiannut ilaasortaasimappata, tak. peqqussutissatut siunnersuummi § 3, imm. 2, piginnittut peqatigiiffianni ataatsimut susassaqarfiusut qanoq aqunneqarnissaannik aalajangiinissaq, tak. peqqussutissatut siunnersuummi § 6, piginnittut peqatigiiffiannut tutsinneqarnissaa naleqqunnerpaatut isumaqarfigineqarpoq. Tassani erseqqissaatigineqarpoq piginnittut peqatigiiffiannut ilaasortaasut tassaasinnaammata illumi affarleriimmi piginnittut marluk, kiisalu inissiarsuarmi annerusumi piginnittut tamarmik.

Siunnersuummi maleruagassat saniatigut piginnittut peqatigiiffii marluk sinnerlugit nammineq pigisanik inissiartaqartut peqatigiiffiup malittarisassanut tunngavissat ataatsimut atuuttuusut tunngavigalugit maleruagassiorneqassapput, tamatumani piginnittut peqatigiiffiat malittarisassiuussinermigut allanik aalajangersaasimanngippat. Piginnittut peqatigiiffiini marluk sinnerlugit nammineq pigisanik inissiartaqartuni malittarisassanut tunngavissat ilanngussaq 1-imi allassimasut naapertorlugit suliarineqassapput. Piginnittut peqatigiiffiata, illumi affarleriimmi marlunnik nammineq pigisanik inissiartaqartup malittarisassat tunngaviusut atuunnissaat kissaatigippagu, malittarisassat ilanngussaq 2-mi malittarisassanut tunngavissat naapertorlugit suliarineqartut atuuttussanngorlugit akuerisinnaavai nalunaarsorsinnaallugillu.

Illunut affarleriinnut malittarisassanut tunngaviusuni, tak. ilanngussaq 2, malittarisassanut tunngaviusut ilanngussaq 1-imi allanneqartut aallaavigineqarput, kisiannili pissutsit immikkut ittut atuuffigisai allaanerussutigalugit. Assersuutigalugu taaneqarsinnaavoq piginnittut peqatigiiffiini marluinnarnik piginnittoqartuni siulersuisut katitigaanerat pisussaaffiillu pillugit maleruagassat annertuumik paasiuminarsagaammata.

Kiisalu torersaarnissamut malittarisassat, tak. ilanngussaq 3, atuutsinneqartussaapput, tamatumani piginnittut peqatigiiffiat ileqqorissaarnissamut malittarisassanik aalajangersaasimanngippata. Torersaarnissamut malittarisassat piginnittut peqatigiiffiini ataasiakkaani pissutsinut arlalinnut iluaqutaasussanngorlutik maleruagassiuussipput. Torersaarnissamut malittarisassani immikkoortut tamarmik inaarutaasumik atuuttussanik oqaasertalersugaanngillat, kisiannili suliassaqarfiit ilaanni piginnittut peqatigiiffiata isummerfigisariaqagassaannik aaqqiagiinngissutaasinnaasut erseqqissarneqarlutik, soorlu uumasuuteqarnermut tunngasut.

Piginnittut peqatigiiffiata piginnittoq siumut naammaginartumik piffissaliilluni nooqqullugu peqqusinnaavaa, piginnittoq sakkortuumik imaluunniit akulikitsumik piginnittut peqatigiiffiannut imaluunniit piginnittut peqatigiiffianni ilaasortat ilaannut pisussaaffimminik sumiginnaasarsimappat.

3. Pisortanut aningaasaqarnikkut allaffissornikkullu sunniutissat
Peqqussutissatut siunnersuut pisortanut aningaasaqarnikkut allaffissornikkullu sunniuteqartussatut naatsorsuutigineqanngilaq.

4. Inuussutissarsiornermut aningaasaqarnikkut allaffissornikkullu sunniutissat
Peqqussutissatut siunnersuut inuussutissarsiornermut aningaasaqarnikkut allaffissornikkullu sunniuteqartussatut naatsorsuutigineqanngilaq.

5. Innuttaasunut aningaasaqarnikkut allaffissornikkullu sunniutissat
Peqqussutissatut siunnersuut innuttaasunut aningaasaqarnikkut allaffissornikkullu sunniuteqartussatut naatsorsuutigineqanngilaq.

6. Avatangiisinut pinngortitamullu sunniutissat
Peqqussutissatut siunnersuut avatangiisinut taamatulluunniit pinngortitamut sunniuteqartussatut naatsorsuutigineqanngilaq.

7. Sunniutaasinnaasut annertuut allat
Peqqussutissatut siunnersuutip illuutit pioreersut inissianik nammineq pigisanik ataaseq sinnerlugu inissiartaqartut 1. juli 2008-p kingorna malittarisassanut tunngaviusunut, tak. ilanngussaq 1 aamma 2, ilaatinneqalernerisa saniatigut sunniutaasussanik annertuunik allanik kinguneqarnissaa naatsorsuutigineqanngilaq.

8. Naalagaaffeqatigiinnermut namminersulerniarnermullu pissutsit
Peqqussutissatut siunnersuut Naalagaaffeqatigiinnermut namminersulerniarnermilu suliniutit ingerlanerannut sunniuteqartussatut naatsorsuutigineqanngilaq.

9. Oqartussaasunut kattuffinnullu il.il. tusarniaaneq
Peqqussutissatut siunnersuutip allaqqaarnera ukununnga tusarniaassutigineqarpoq: A/S Inissiaatileqatigiiffik INI, KANUKOKA, Iserit A/S, Aningaasaqarnermut Pisortaqarfik, SIK, Kalaallit Nunaanni Sulisitsisut Peqatigiiffiat, Nusuka, Ilik, PPK, PIP, AK, IMAK, ASG, Grønlandsbanken, Sparbank Vest, Ejendomskontoret Igdlo kiisalu Grønlands Ejendomskontor.

A/S Inissiaatileqatigiiffik INI, KANUKOKA, Iserit A/S, Aningaasaqarnermut Pisortaqarfik, Kalaallit Nunaanni Sulisitsisut Peqatigiiffiat, Nusuka, AK aamma IMAK tusarniaanermi akissuteqarput.

Teknikkimut tunngatillugu kukkunerit, kiisalu oqaatsitsigut kukkunerit amigaatillu, tusarniaanermi akissuteqartut erseqqissaatigisaat aaqqinneqarput. Matumunnga atatillugu tamatumunnga sukumiinerusumik nassuiaateqarnissaq pisariaqanngilaq.

Kisianni tusarniaanermi akissuteqartut siunnersuutip imaanut oqaaseqaataat pingaarnersiorlugit matuma kinguliani issuarneqarput oqaaseqarfigineqarlutillu. Ineqarnermut Attaveqarnermullu Pisortaqarfimmit tusarniaanermi akissutit siunnersuummi tulleriiaarneri malillugit oqaaseqarfiginissaat naleqqunnerpaatut isumaqarfigineqarpoq.

Siunnersuut ataatsimut isigalugu

Nusuka-miit erseqqissaatigineqarpoq peqqussut sapinngisamik naalagaaffiup aningaasaleeqataaffigisimanngisaanut tunngatillugu Inatsisartut inatsisaattut qaffanneqartariaqaraluartoq. Tamatumunnga tunngatillugu oqaatigineqassaaq Namminersornerullutik Oqartussat inissianik pilersuineq, inissialiortiternermut tapersiissuteqartarneq, inissianik attartortitsisarneq il.il. pillugit inatsit nr. 944, 23. december 1986-imeersoq naapertorlugu ineqarneq danskit naalagaaffiannit tapiiffigineqarluni tigusimammagu, taamaattumillu suliassaqarfik tamanna peqqussutit atorlugit maleruagassiuunneqartariaqarluni, Inatsisartut inatsisaat atornagit.

Siunnersuutaasimasumi § 1, imm. 2-mut

Kalaallit Nunaanni Sulisitsisut Peqatigiiffiata siunnersuummi § 1, imm. 2-mi immikkoortoq siulleq paasiuminaatsippaa, taanna Kalaallit Nunaanni Sulisitsisut Peqatigiiffiata isumaa malillugu ilaatigut init inuussutissarsiutinik ingerlataqarfiusut tamarmik pineqalernissaannik kinguneqartussaammat. Aalajangersakkami imm. 2 peerneqarpoq, taamaalillunilu peqqussutip atuuffissai nalorninarunnaarsinneqarlutik. Tamatuma peqatigisaanik peqqussutip atuuffissaa oqaaseqaatini sukumiinerusumik erseqqissarneqarpoq.

Kiisalu Kalaallit Nunaanni Sulisitsisut Peqatigiiffiata tikkuarpaa, ilaqutariinnut arlalinnut inissiani inissiat, ilaatigut Naalakkersuisunit kommunalbestyrelsimilluunniit tapiiffigineqarlutik sanaartorneqarsimasut, tak. siunnersuutaasimasumi § 1, imm. 2-mi immikkoortup aappaa, inissiatut nammineq pigisatut allanngortinneqassagunik siunnersuummi § 2-mi pineqareermata. Ineqarnermut Attaveqarnermullu Pisortaqarfiup atuuffissaa oqaaseqaatini erseqqissaaffigaa.

Siunnersuummi § 4, imm. 3-mut

IMAK-ip isumaa malillugu inissiat nammineq pigisat tamarmik immikkut tammarnaveeqqusiinermut uppernarsaammik salliutitsiviusumik allakkiorfigineqarnissaannik piumasaqaat taamaallaat inissianut nammineq pigisanut siunissami pisiarineqartarumaartussanut atuuttariaqartoq, inissiani nammineq pigisani taarsigassarsiat akilersorneqartut piginnittut peqatigiiffiannut tammarnaveeqqusiinermut salliutinneqartumut uppernarsaammit tunulliunneqartassappata tamanna piginnittunut ataasiakkaanut aningaasaqarnikkut eqqugaanerlunnermik kinguneqarsinnaammat.

Ineqarnermut Attaveqarnermullu Pisortaqarfimmiit ernialiussat annertussusaannut taarsigassarsiap tammarnaveeqqusiinermi salliutitsivittut nalunaarsorneqarsinnaanera nalunaarsorneqarsinnaannginneraluunniit apeqqutaanissaa pillugu IMAK-ip isummiussai isumaqatigineqarput. Kisiannili Ineqarnermut Attaveqarnermullu Pisortaqarfik isumaqarpoq tamanna tammarnaveeqqutitut uppernarsaatinik piginnittut peqatigiiffiannut tammarnaveeqqutitut uppernarsaammit tunulliunneqartunik nalunaarsuisarneq, tak. siunnersuummi § 4, imm. 3, eqqarsaatigalugu taamatut isummerneq atorneqarsinnaanngitsoq, piginnittut peqatigiiffiannut tammarnaveeqqutitut uppernarsaat 45.000 kr.-it sinnerlugit aningaasartaqartartussaanngimmat, tak. siunnersuummi ilanngussaq 1 aamma 2, § 18.

Inissiani nammineq pigisani taarsigassarsiat erniaasa annertussusaat piginnittut peqatigiiffiannut tammarnaveeqqusiinermut salliutitsilluni uppernarsaammut nalunaarsorneqarsimanersut sunniuteqarneq ajorpoq, aningaaseriviit realkredittimillu taarsigassarsititsisarfiit akornanni nalinginnaasumik 45.000 kr.-it tikillugit piginnittut peqatigiiffiinut salliutitsiviusumik tammarnaveeqqusiinermut uppernarsaammik nalunaarsuisoqartarnera ilisimaneqareermat. Ineqarnermut Attaveqarnermullu Pisortaqarfiup suleriaatsimik nassuiarneqartumik paasinninneranut tapertatut Sparbank Vest aamma Grønlandsbanken suliamut attuumassuteqanngitsutut allakkatigut oqaaseqartinneqarput, taakkulu oqaatigaat siunnersuummi § 4, imm. 3 maannatut iluseqarluni maanna suleriaasiusumut naapertuuttoq, aammalu piginnittut peqatigiiffiannut tammarnaveeqqutitut salliutitsilluni uppernarsaatit inissiami nammineq pigisami taarsigassarsiat allat erniaannut sunniuteqassanngitsut.

Siunnersuummi § 6, imm. 2-mut, tassunga atasumut ilanngussaq 2-mut

KANUKOKA-p piginnittut peqatigiiffii marlunnik ilaasortaqartut qanoq ingerlasinnaanerat apeqquserpaa.

Iserit A/S-imiit illuni affarleriinni piginnittut peqatigiiffii marluk sinnerlugit piginnittoqarsinnaanngitsut peqatigiiffii ataatsimeersuarnissamik piumasaqarsinnaatitaasut, siulersuisoqartut, sinniiseqartut, ukiumoortumik naatsorsuuteqartut kingumullu misissuiffiusinnaasut qanoq ingerlasinnaanersut eqqumiigineqarpoq. Kiisalu Iserit A/S isumaqarpoq illumi affarleriimmi ingerlatsineq aqutsinerlu ataatsimut susassaqarfiummat piginnittut peqatigiiffianni pilersitsinissap piumasaqaatiginissaanut tunngavigineqarsinnaanngitsoq. Tamatumunnga taarsiullugu Iserit A/S aaqqiissutissamik, ataatsimut piginnittuunissamut isumaqatigiissummik tunngaveqartumik siunnersuuteqarpoq, tassanilu nalunaarut, illuummi piginnittunut immikkut piumasaqaateqarfiusutut nalunaarsorneqartoq atorneqarsinnaasoq.

Tamatumunnga tunngatillugu oqaatigineqassaaq, illuni affarleriinni malittarisassanut tunngaviusut taamaallaat piginnittut allamik aalajangigaqarsimanngippata nalunaarsugaqarsimanngippatalu atorneqassammata. Taamaalilluni peqqussutissatut siunnersuummi piginnittut namminneerlutik isumaqatigiissinnaatitaanerat anguniarneqarpoq. Illumi affarleriimmi piginnittut ataatsimut pigisaqarnissamut isumaqatigiissut imminerminnut pitsaanerusutut isumaqarfigippassuk, illuummi taamaattumik aalajangiinissaannut nalunaarsuinissaannullu akornutissaqanngilaq. Kiisalu illuni affarleriinni malittarisassanut tunngaviusut ilaqutarinnut arlalinnut illuni malittarisassanut tunngaviusunut naleqqiullugit naleqqussagaapput paasiuminarsagaallutillu, taamaalillunilu piginnittut marluinnaanerat eqqarsaatigineqarluni.

Siunnersuummut ilanngussaq 1-imi § 6-imut

Iserit A/S-imiit piginnittut peqatigiiffianni taasisinnaatitaanerit agguaqatigiisitsinermi kisitsisit tunngaviusut aallaaviginagit piginnittunut agguarneqarnissaat, taamaalillunilu piginnittoq ataaseq illuummi inissianik arlalinnik pigisaqaraluarluni ataasiinnarmik taasisinnaatitaasarnissaa naammagineqanngitsoq malunnarpoq. Tamatumani kukkuneq ersarissoq pineqarpoq, taannalu iluarsineqarpoq, taamaalillunilu ilaasortat tamarmik inissiamut nammineq pigisamut ataatsimut ataatsimik taasisinnaatitaalerlutik. Taamaalilluni piginnittoq illuummi inissianik nammineq pigisanik tallimanik pigisaqartoq tallimanik taasisinnaatitaavoq.

 

Peqqussutissatut siunnersuummi aalajangersakkanut ataasiakkaanut oqaaseqaatit

§ 1-imut

Oqaaseq "inissiaq" nalinginnaasumik oqariaatsini najugaqarfinnut attuumatinneqartarpoq, kisiannili siunnersuut aamma inissianut nammineq pigisanut inuussutissarsiornermut atorneqartunut atuutsinneqarpoq. Taamaalilluni siunnersuummi init inuussutissarsiornermut atorneqartut tamarmik pineqanngillat, taamaallaalli init inuussutissarsiutinut atorneqartut inissiani nammineq pigisani inissisimasut pineqarlutik.

Utoqqarnut inissiat, innarluutilinnut inissiat aamma inuusuttunut inissiat aalajangersakkami immikkut taaneqanngillat, piginnittoqarneq apeqqutaallu aalajangersakkamut ilaatinneqarmata.

Kiisalu maleruagassat illuutinut, pisortat inissiaataattut attartortittakkatut atuussimagaluarlutik Namminersornerullutik Oqartussat kommunillu inissiaataannik inissiatut nammineq pigisatut allanngortinneqartarnerat pillugu Inatsisartut peqqussutaanni maleruagassat naapertorlugit inissiatut nammineq pigisatut allanngortinneqarsimasunut atuutissapput. Taamatullu maleruagassat illuutinut nammineq pigisanut allanut, inissianik nammineq pigisanik inissiartaqartunut, ilaatigut inissianik aningaasalersuisarneq pillugu Inatsisartut peqqussutaanni maleruagassat naapertorlugit Naalakkersuisunit imaluunniit kommunalbestyrelsimit aningaasaliiffigineqarlutik sananeqarsimasunut atuutissapput, kiisalu inissianut nammineq pigisanut, inissialiortiternermi tapersiissuteqartarneq pillugu maleruagassat naapertorlugit sananeqarsimasunut atuutissallutik.

Aalajangersakkami inissiat nammineq pigisat inissiatut immikkut pigineqartutut nassuiarneqarput. Inissiat nammineq pigisat illuni affarleriinni, illuni uiguleriinni illuniluunniit ilaqutariinnut arlalinnut inissiani inissisimasinnaapput.

§ 2-mut

Aalajangersakkami siunertarineqarpoq illuummi ataatsimi Namminersornerullutik Oqartussat kommunillu inissiaataannik ataasiakkaaginnarnik Namminersornerullutik Oqartussat kommunillu inissiaataasa attartortittakkat inissiatut nammineq pigisatut allanngortinneqarnissaat pillugu Inatsisartut peqqussutaanni maleruagassat naapertorlugit inissianik ataasiakkaaginnarnik inissiatut nammineq pigisatut allannguisoqarsimatillugu attartortut piginnittullu akornanni aaqqiagiinngissutaasinnaasut pinaveersaarneqarnissaat. Tamatumanili piumasaqaataavoq illuutip tamakkerluni inissianut nammineq pigisanut agguarnissaa, taamaalillunilu inissianit nammineq pigisanit sinneruttunit inuinnarnit pigineqanngitsunik piginnittut tassaalissapput Namminersornerullutik Oqartussat kommuniluunniit. Namminersornerullutik Oqartussat kommunilluunniit inissiamik piginnittutut inissiaq nammineq pigisaq attartortumut attartortissinnaassavaat.

Imm. 1-imut

Piginnittut attartortullu akornanni inatsisitigut inissisimaneq ersernerluttoq siuliani taaneqartoq pinngitsoorniarlugu imm. 1-imi aalajangersarneqarpoq, inissiat nammineq pigisat taamaallaat illuutini tamakkiisumik isigalugu inissianut nammineq pigisanut agguarneqartuni pilersinneqarsinnaasut. Taamaalilluni inissiat akornanni ataatsimut pissusiusussat siumoortumik aalajangersarneqareerput, tamatumani pisortat inissiaataat ataasiakkaat kisimik inissiatut nammineq pigisatut allanngortinneqarnerat, sinneruttullu Namminersornerullutik Oqartussanit kommunimilluunniit pigineqaannarlutik attartortinneqarnerat apeqqutaatinnagu.

Namminersornerullutik Oqartussat kommunilu illuummik tamakkiisumik aallaqqaataaniilli piginnittuusimasutut inissianik piginnittoqarnermikkut allanngortinneqanngitsunik suli piginnittuussapput, aammalu inissianik nammineq pigisatut allanngortinneqartunik piginnittut assigalugit piginnittut peqatigiiffiannut ilaassallutik.

Imm. 2-mut

Aalajangersakkami imm. 2-mi aalajangersarneqarpoq inissiaq nammineq pigisaq tassaasoq immikkut illu pigisaq immikkoortoq, tamannalu pingaartumik nalunaarsuisarneq eqqarsaatigalugu pingaaruteqarpoq. Taamaattumik inissiamik nammineq pigisamik piginnittoq tunngaviatigut inissiamik nammineq pigisamik tamakkiisumik atuisinnaatitaavoq.

§ 3-mut

Imm. 1-imut

Aalajangersakkami imm. 1-ip atuutilerneratigut inissiamik nammineq pisigamik atuisinnaatitaaneq tassaassaaq inissiamik nammineq pigisamik piginnittussaatitaaneq. Taamaattumik piginnittup immikkut illumik pigisaqarnermi pisinnaatitaaffiit tamaasa pisinnaatitaaffigai, tassalu tunniussinissamut, sallunaveeqqusiinissamut, attartortitsinissamut aammalu inissiami nammineq pigisami inatsisitigut atuinissamut atugassarititaasut allat pisinnaatitaaffigai. Piginnittulli atuisinnaatitaanera piginnittumut immikkut piumasarisanit nalunaarsorneqarsimasinnaasunit imaluunniit piginnittut peqatigiiffianni malittarisassatut aalajangikkanit nalunaarsukkanillu killilerneqarsinnaavoq, tak. siunnersuummi § 6.

Piginnittoq nalinginnaasumik inissiap nammineq pigisap iluani allanngortiterisinnaavoq, tamanna illup ilusilersugaaneranut nammattunut, pilersuinermi aqqusersuutinut ataatsimoorussanut assigisaannulluunniit akornutaanngitsumik pissappat, kiisalu illup silataata isikkuanik allanngortitsissanngippat. Kiisalu allanngortitsinerit annertuut annertunerusulluunniit pissappata, pisortanit akuersissutinik piniaqqaarnissaq akuttunngitsumik pisariaqartinneqartarpoq.

Inissiamut nammineq pigisamut piginnittussaatitaaneq ataatsimoorfiusuni, illuummi inissianik nammineq pigisanik inissiartaqartumi pisariaqartinneqartuni piginneqataassutinik sukumiinerusumik aalajangersarneqartunik (agguaqatigiisitsinissamut tunngaviusut) ilaqartinneqarpoq. Illuut inissianut nammineq pigisanut agguarneqartussanngorpat agguaqatigiisitsinissamut kisitsisit tunngaviusut piginnittunit aalajangersarneqassapput. Nalinginnaasumik agguaqatigiisitsineq inissiat nammineq pigisat ataasiakkaat angissusaat tunngavigalugit aalajangersarneqartarpoq. Inissiat nammineq pigisat angeqqatigiippata, tamanna pigisanik atortunillu ataatsimoorussanik annertoqqatigiinnik piginnittussaatitaanermik kinguneqassaaq. Piginnittut peqatigiiffiata kingusinnerusukkut agguaqatigiisitsinermi kisitsisinut tunngaviusut allanngortinniarlugit kissaatigissappagu, tamanna pillugu ataatsimeersuarnermi taasititsisoqassaaq, aammalu piginnittut tamarmik tamanna pillugu isumaqatigiissapput, agguaqatigiisitsinissamut kisitsisinik tunngaviusunik allanngortitsineq piginnittut ilaasa piginnittussaanerannik annikillisitsisussaammat, piginnittullu ilaannut pigisanik atortunillu ataatsimoorussanik piginnittussaatitaanermik annertusititsisussaalluni. Agguaqatigiisitsinissamut kisitsisit tunngaviusut aalajangersarneqarsimanngippata, piginnittut ataatsimoorfiusuni annertoqqatigiinnik piginneqataassuteqassapput. Piginnittut ataasiakkaat ataatsimoorfiusuni piginneqataassutaat piginnittut ataasiakkaat atuisinnaatitaanerannut isumaqanngitsutut isigineqartariaqarpoq.

Aappaatigut piginnittoq piginnittunit allanit sapinngisamik annertunerpaamik attuumassuteqarfigineqarani inissiamut nammineq pigisaminut piginnittussaatitaasariaqarpoq, aappaatigulli illuummi ataatsimoortumi nammineq pigisanik inissiartaqartumi ataatsimoorneq, assersuutigalugu illunik uiguleriinnik piginnittut akornanni ataatsimoornermit annertunerujussuussasoq ersarippoq. Tamanna pisinnaatitaaffinnut, tassalu piginnittut ataasiakkaat ataatsimoorlutik pigisat atortullu ataatsimoorussat pigisarimmatigik illup silataasa qarmaanut, qalianut, majuartarfeqarfinnut, atortulersuutinut ataatsimoorussanut, naqqup ataani ininut assigisaannullu atuuppoq, taamatullu pisussaaffinnut, tassalu piginnittut ataatsimoorlutik pisussaaffinnut ikiuuttariaqarmata atuulluni.

Imm. 2-mut

Aalajangersakkami imm. 2-p atuutilerneratigut pinngitsaaliissutaasumik ataatsimoorfiusut piginnittut peqatigiiffiannik, taamaallaat aqutsinermi ataatsimoorfiusutut atuuttoq taaneqarpoq, piginnittut peqatigiiffiata piginnittut sinnerlugit sulisussatut ataatsimut susassaqarfiusut aqutarisussaammagit. Taamaattumik piginnittut peqatigiiffiat peqatigiiffiunngilaq nalinginnaasoq.

Piginnittut peqatigiiffiat imminermini pisussaaffeqartinneqanngilaq, inissianik nammineq pigisanik piginnittut namminneerlutik ataatsimut aningaasartuutinut akiliisartussaammata, kisiannili piginnittut peqatigiiffiat nammineerluni atini atorlugu eqqartuussivikkoortitsisinnaavoq. Piginnittut peqatigiiffiat nammineq atini atorlugu eqqartuussivikkoortitsippat, piginnittut peqatigiiffiat taamatullu piginnittut ataasiakkaat tamanna tunngavigalugu pisussaaffilerneqassapput.

Piginnittut peqatigiiffiat pilersitsiviusumik ataatsimeersuarnikkut pilersinneqassanngilaq, kisiannili peqqussut tunngavigalugu atuutissalluni, tamatumanilu piumasaqaatituaavoq illuummi inissiat Namminersornerullutik Oqartussat kommunillu inissiaataannik attartortittakkanik inissiatut nammineq pigisatut allanngortitsinissaq pillugu maleruagassat naapertorlugit pisortat inissiaatigisimasaasa inissiatut nammineq pigisatut allanngortinneqarnissaat, imaluunniit illuummi inissiat nammineq pigisatut sananeqarsimanissaat tunineqarsimanissaalluunniit.

Piginnittut ataasiakkaat apeqqusiinertaqanngitsumik piginnittut peqatigiiffiannut ilaasortaassapput, tassunga atasunik pisinnaatitaaffeqassallutik pisussaaffeqassallutillu.

Imm. 3-mut

Inissiamik nammineq pigisaqarnissamut pisinnaatitaaffik tamakkiisoq pingasunik immikkoortortaqarpoq, tassani ilaatigut inissiamut nammineq pigisamut piginnittussaatitaaneq, ilaatigut pigisanut atortunullu ataatsimoorussanut piginneqataasussaatitaaneq, kiisalu piginnittut peqatigiiffiannut ilaasortatut pisinnaatitaaneq pisussaatitaanerlu. Imm. 3-mi piginnittussaatitaanerup aammalu pisinnaatitaaffiit pisussaaffiillu allat eqqartuussivikkut suliakkiinermi immikkoortinneqarsinnaannginnerat aalajangersarneqarpoq.

Piginnittut peqatigiiffiannut ilaasortatut pisinnaatitaaffiit pisussaaffiillu piginnittup isumagisassarai, inissiaq nammineq pigisaq attartortinneqarsimagaluarpalluunniit. Taamaattumik piginnittut ataasiakkaat attartortumik malittarisassat torersaarnissamullu malittarisassat illuummi atuutsinneqartunik malinninnissaat akisussaaffigaat.

§ 4-mut

Imm. 1-imut

Aalajangersakkami imm. 1-ip atuunneratigut piginnittut ataasiakkaat annertoqqatigiimmik aammalu agguaassinissamut kisitsisit aalajangersarneqartut tunngavigalugit pisussaapput, illuummi ingerlatsinermi aningaasaartuutinut ataatsimoorussanut tamanut akiliisassalluni, assersuutigalugu ataatsimut pigisat atortullu, soorlu illup silataani iikkat, qaliaq, majuartarfeqarfiit, atortulersuutit ataatsimoorussat, naqqup ataani init assigisaasalu aserfallatsaaliornerinut aningaasartuutinut.

Akileeqqusissummi akiligassat annertussusissaat akiliinissarlu piginnittut peqatigiiffiata malittarisassaani aalajangersarneqassaaq. Ataatsimut aningaasartuutissat nalinginnaasumik qaammammoortumik akilersinniarneqartarput.

Paarlattuanik inissiap nammineq pigisap iluani aserfallatsaaliuineq kiisalu inissiamut nammineq pigisamut atatillugu iluarsaassinerit aamma inissiami nammineq pigisami atortulersuutit piginnittumit namminermit akilerneqartussaapput, taamaattumillu ataatsimoorussatut aningaasartuutaasussaanatik.

Imm. 2-mut

Imm. 2-mi aalajangersarneqarpoq inissiani nammineq pigisani piginnittut ataasiakkaat namminneerlutik suliaqarnerisa kingunerisaanik ataatsimoorussamik aningaasartuutit annertusissappata, tak. imm. 1, annertusissutit piginnittup nammineerluni akiligassarigai.

Aalajangersakkap atuuffissai annikitsuararsuupput. Tamatumani pineqartut tassaasariaqarput aningaasartuutaanerusut toqqaannartumik uppernarsarneqarsinnaasut. Aalajangersagaq agguaqatigiisitsineq atornagu ataatsimoorussamik aningaasartuutissat ilaasa piginnittut ataasiakkaat akornanni inissiat ilusilersugaanerannik imaluunniit suliarineqartumik atuinissaq iluaquteqarnissarluunniit eqqarsaatigalugu agguarneqarsinnaanerinut piumasaqaateqarnissamut tunngaviliinngilaq.

Aalajangersagaq assersuutigalugu piginnittut ilaata inissiami nammineq pigisamini atortulersuutinik immikkut ittunik akisuunik ikkussuinerani, tamatumalu kingunerisaanik sillimmasiinermut ataatsimut akiliutissat qaffanneranni atorneqarsinnaavoq.

Imm. 3-mut

Piginnittut peqatigiiffiannit aalajangersakkani imm. 3 naapertorlugu inissiat nammineq pigisat ataasiakkaat imm. 1 naapertorlugu ataatsimoorussamik aningaasartuutinut akiliisinnaanissaat qulakkeerneqarpoq. Kiisalu piginnittut peqatigiiffianni inissiat nammineq pigisat ataasiakkaat, ilaasortat ataasiakkaat inissiani nammineq pigisaminni iliuuserisimasaasa, tak. imm. 2, kingunerisaanik piginnittut peqatigiiffiata ilaasortanut ataasiakkaanut piumasaqaatigisinnaasaasa suulluunniit akilerneqarnissaat qulakkeerneqarpoq.

Periaaseq aalajangersimasoq malillugu realkredittimut taarsigassarsisarfiit aningaaseriviillu annaasaqannginnissamut uppernarsaat 45.000 kr.-it tikillugit aningaasartaqartoq akuerisarpaat. Annaasaqannginnissamut uppernarsaat nalunaarsorneqassaguni aningaasat annerpaaffissaannik nalunaarsuiffigineqassaaq. Annaasaqannginnissamut uppernarsaat tassaavoq tammarnaveeqqusiinermut uppernarsaat, taannalu uppernarsaasiortup (inissiamik piginnittup) tammarnaveeqqusiissummik pigisaqartumut (piginnittut peqatigiiffiannut) akiitsorisinnaasaannut qularnaveeqqusiissutitut tunniunneqassaaq.

Aalajangersagaq annaasaqannginnissamut uppernarsaatip aalajangersimasumik aningaasartaqartinneqarnissaanut piumasaqaammik imaqanngilaq. Tamatumani piginnittut peqatigiiffii, annaasaqannginnissamut uppernarsaammik aalajangersakkami aningaasartaliussassatut killiliunneqarsinnaasut inulaarlugit aningaasartaqartumik uppernarsaasioreersimasinnaasut eqqarsaatigineqarput. Kisiannili ersarippoq piginnittut peqatigiiffianni ilaasortap, annaasaqannginnissamut uppernarsaammik 1.000 kr.-inik aningaasartaqartumik sanasimasup aalajangersakkami piumasaqaat naammassisinnaanngimmagu, annaasaqannginnissamut uppernarsaat piginnittut peqatigiiffiata ilaasortanut ataasiakkaanut piumasaqaataanut qularnaveeqqutitut atorneqarsinnaasussaammat. Kisianni piginnittut peqatigiiffiannut ilaasortap annaasaqannginnissamut uppernarsaammik 30.000 kr.-inik imaluunniit 35.000 kr.-inik nalilimmik sanasinnaanera akornutissartaqartinneqanngilaq, tamatumani tammarnaveeqqusiinermut uppernarsaatip nalingata peqatigiiffimmut pisussaaffiit illuatungilersinnaassagai taamaallaat piumasaqaataammat.

Kiisalu inissianik piginnittuusut piginnittut peqatigiiffiata pisussaaffiinut toqqaannartumik, namminneerlutik nammaqatigiillutillu akiliisartussaapput, ataatsimoorlutillu agguaqatigiisitsinissaq siunnersuummi § 3 naapertorlugu aalajangersarneqarsimasoq tunngavigalugu akiliisartussaallutik.

§ 5-imut

Aalajangersakkap atuutilerneratigut piginnittut peqatigiiffiat taassumaluunniit sinniisaa pisariaqartillugu akiliisitsiniartartumik ikiorteqarluni inissiamut isersinnaavoq. Aalajangersakkap assersuutigalugu sanasup atortulersuutinik misissuiniarluni iluarsaassiniarluniluunniit inissiamut isernissaanut, inissiaq nammineq pigisaq uuttortaaffiginiarlugu isertoqarniarnerani imaluunniit inissiaq nammineq pigisaq torersaarnissamut maleruagassani killissarititaasut iluanni atorneqarnersoq tunngavissaqarluartumik misissuiffiniarlugu isertoqarniarnerani piginnittup itigartinneqarnerani atorneqarnissaa eqqarsaatigineqarpoq.

Assersuutigalugu piginnittup unioqqutitsilluni uumasuuteqarnera tunngavissaqarluartumik pasitsaassimaneqarpat, imaluunniit atortulersuutit ataatsimoorussat nutaat pilersaarutaasumik ikkussuunneqassappata tamanna pisinnaanersoq misissuiffiginiarlugu isernissaq pisariaqarsinnaavoq.

§ 6-imut

Imm. 1-imut

Aalajangersakkami imm. 1-ip atuutilerneratigut malittarisassanut tunngaviusut, tak. ilanngussaq 1, piginnittut peqatigiiffiinut inissiat marluk sinnerlugit ilaasortaqartunut atuuttussaapput, tamatumani piginnittut peqatigiiffiat malittarisassanik aalajangersaasimanngippat nalunaarsuisimanngippallu.

Malittarisassanut tunngavissat tamakkiisut piginnittut peqatigiiffiinut, malittarisassanik aalajangersaasimanngitsunut nalunaarsuisimanngitsunullu atuutsinneqassapput. Kisiannili malittarisassanut tunngavissat susassaqarfinnut kimeqanngitsunik malittarisassaqarsinnaasunut atuutissanngillat. Tamatumani peqatigiiffinni pisinnaatitaaffinnut inatsisit allanneqanngitsut atuupput.

Malittarisassat qanoq imaqartariaqarnerannut illuutip angissusaa qanoq issusialu malillugit assigiinngitsorujussuusinnaapput, taamaattumillu aalajangersakkami tunngaviatigut piginnittut namminneerlutik malittarisassiorsinnaanerat periarfissinneqarpoq.

Piginnittut peqatigiiffianni aqutsisut aqutsinerlu pillugit aalajangersakkanik naleqquttunik peqartuarnissaq qulakkeerniarlugu malittarisassanut tunngaviusut atuutsinneqarnissaat aalajangerneqartassaaq, tamatumani piginnittut peqatigiiffianni malittarisassanik allanik aalajangersaasoqarsimanngippat nalunaarsuisoqarsimanngippallu.

Malittarisassanut tunngavissat ilaatigut kingumut misissuisarnissamut aalajangersakkanik sukumiinerusunik imaqarput. Oqaaseq "misissuineq" oqaatsimut "kingumut misissuineq"-mut nalingitillugu atorneqarsinnaavoq. Naatsorsuutinik kingumut misissuisarnermi siunertaavoq, kukkunersiuisup iliuuserisat, kukkunersiuinermi isumannaassutsip assinganik piumasaqaateqarfiunngitsut, naatsorsuutit pingaarnersaasa tamarmik naatsorsuusereriaatsimi killissarititaasutut aalajangersarneqartut iluanni suliarineqarsimanerannut uppernarsaataasut tunngavigalugit suliarineqartut pillugit pissutsinik ilisimatinneqarnermini nalunaaruteqarsinnaanissaa. Malittarisassanut tunngaviusoq kingumut misissuinissamik piumasaqaatinik imaqarpoq, taamaalilluni kukkunersiuisup naatsorsuutinik misissuineraniit kukkunersiuisumut piumasaqaatit ikinnerusut piumasarineqarsinnaammata. Piginnittut peqatigiiffiata naatsorsuutit sukumiinerusumik misissorneqartarnissaat kissaatigiguniuk, malittarisassanik kingumut misissuinissaannaq pinnagu kukkunersiuinissarpiamik piumasaqaateqarfiusunik aalajangersaasinnaavoq.

Malittarisassat malittarisassanut tunngavissanit allaanerusut atorsinnaassagunik nalunaarsorsimasariaqarput. Tamatumani siunertaavoq malittarisassani aalajangersakkat nalunaarsorneqanngitsut atuutsinneqarnerini malittarisassat piginnittunut ataasiakkaanut assigiinngitsumik atuutsinneqarnissaasa pinngitsoortinneqarnissaa.

Imm. 2-mut

Aalajangersakkami imm. 2-p atuutilerneratigut piginnittut peqatigiiffianni, illumi affarleriimmi inissianit nammineq pigisanit marlunnit ilaasortaaffigineqartumi malittarisassanik aalajangersaasoqassanersoq nalunaarsuisoqassanersorlu nammineerluni aalajangerneqarsinnaavoq. Piginnittut peqatigiiffiata malittarisassanik aalajangersaasoqarnissaa nalunaarsuisoqarnissaalu kissaatigiguniuk, malittarisassanut tunngavissat, tak. ilanngussaq 2, atorsinnaavai imaluunniit malittarisassanik nammineerluni sanasinnaalluni.

Malittarisassanut tunngavissat malittarisassaasinnaasuni allanik aalajangiisoqanngippat atorneqassanngillat, taamatullu piginnittut peqatigiiffiini malittarisassanik aalajangersaasimanngitsuni nalunaarsuisimanngitsunilu atuutsinneqassanatik.

Malittarisassanut tunngavissat piginnittut peqatigiiffiini malittarisassanik namminneerlutik sanasimanngitsuni atuutsinneqartussaannginnerinut peqqutaavoq, illumi affarleriimmi piginnittut akunnerminni aaqqiagiinngissuteqalissagaluarpata peqatigiiffiit pillugit malittarisassat allanneqanngitsut atorluarsinnaammata.

Illumi affarleriimmi inissiat nammineq pigisat nappaarissumik avitaappata, piginnittut nalinginnaasumik ataatsimut aningaasartuuteqartussaanngillat, aammalu pigisanik atortunillu, soorlu illup silataata qarmaanik, qaliaanik, majuartarfeqarfinnik, ataatsimut atortulersuutinik, naqqup ataani ininik assigisaannillu ataatsimut pigisaqartussaanatik, taamaattumillu malittarisassiuussinissaq nalinginnaasumik pisariaqartussaanani. Kisiannili illumi affarleriimmi inissiat nammineq pigisat nallarissumik avitaappata, piginnittut nalinginnaasumik ataatsimut aningaasartuuteqartussaapput, aammalu pigisanik atortunillu, soorlu illup silataata qarmaanik, qaliaanik, majuartarfeqarfinnik, ataatsimut atortulersuutinik, naqqup ataani ininik assigisaannillu ataatsimut pigisaqartussaallutik, taamaattumillu taamatut pisoqartillugu malittarisassiuussinissaq nalinginnaasumik pisariaqartinneqartussaalluni. Akerlianilli aamma piginnittut allat ataatsimut susassarisanik allatut aaqqiinissaq kissaatigineqarsinnaavoq, soorlu aalajangersimasunut tunngasunik isumaqatigiissuteqarnermikkut.

§ 7-imut

Aalajangersakkap atuutilerneratigut piginnittut peqatigiiffiat torersaarnissamut malittarisassanik atuutsitsilersimanngippata, torersaarnissamut malittarisassat, tak. ilanngussaq 3, piginnittut peqatigiiffiinut peqqussummi matumani pineqartunut atuutissapput.

Torersaarnissamut malittarisassat qanoq imaqartariaqarnerannut illuutip angissusaa qanoq issusaalu tunngavigalugit assigiinngitsorujussuusinnaapput, taamaattumillu aalajangersakkami piginnittut torersaarnissamut malittarisassanik namminneerlutik ilusilersuisinnaanerat periarfissinneqarpoq.

Torersaarnissamut malittarisassani silami antennilersortoqarsinnaanersoq, uumasuuteqartoqarsinnaanersoq allagartalersuisoqarsinnaanersorlu isummerfigineqanngilaq. Piginnittut peqatigiiffiat nammineerluni torersaarnissamut malittarisassanik pissutsinut taamaattunut isummerfiusunik aalajangersaasimanngippat torersaarnissamut malittarisassanut tunngavissat atuutsinneqassapput. Tamatuma kingunerisaanik piginnittut peqatigiiffiata pissutsinik taamaattunik pilersoqartillugu tamanna pillugu aalajangiisassaaq, soorlu uumasuuteqarsinnaanermut tunngasunik. Taamaalilluni piginnittut peqatigiiffiata torersaarnissamut malittarisassat pillugit aaqqiagiinngittoqalissappat aaqqiiniartussaavoq, assersuutigalugu piginnittut marluk pinnatik.

Tunngaviatigut torersaarnissamut malittarisassanik atuutsitsisoqarnissaa qulakkeerniarlugu, torersaarnissamut malittarisassanut tunngaviusut tamakkiisumik atuutissanersut aalajangerneqassaaq, tamatumani piginnittut peqatigiiffiat torersaarnissamut malittarisassanik allanik aalajangersaasimanngippat. Tunngaviusumilli torersaarnissamut malittarisassat immikkoortui tamarmik inaarutaasumik ilusiligaanngillat, kisiannili suliassaqarfiit ilaanni aaqqiagiinngissutaasinnaasut, piginnittut peqatigiiffiata isummerfigisariaqagai erseqqissarneqarlutik.

§ 8-mut

Aalajangersagaq piginnittup inissiamik nammineq pigisamik piginnittutut pisussaaffimminik annertuumik akulikitsumilluunniit sumiginnaasarnerani piginnittut peqatigiiffiata pisussaaffiinut pisinnatitaaffiinullu maleruagassanik imaqarpoq.

Imm. 1-imut

Piginnittut peqatigiiffiat, piginnittumik naammaginartumik piffissaqartitsilluni nooqqusinissamik kissaateqartoq tamanna pillugu peqqusinnginnermini piginnittoq pissuseq imaluunniit pissutsit piginnittup inissiamik nammineq pigisamik piginnittutut piginnittut peqatigiiffiannut taassumaluunniit sinniisaanut annertuumik imaluunniit akulikitsumik sumiginnaasarnerani pineqartut iluarseqqullugit allakkatigut peqqussuteqarfigissavaa. Imm. 1-imi piginnittut peqatigiiffiata piginnittoq pisussaaffimminik annertuumik akulikitsumilluunniit sumiginnaasarnerani naammaginartumik piffissaqartitsilluni piginnittup inissiamit najukkaminit nooqqusisinnaanera aalajangersarneqarpoq. Tassani piginnittup pisussaaffini annertuumik sumiginnarsimanerai piginnittut peqatigiiffiata malittarisassaasa torersaarnissamullu malittarisassaasa ilusiligaanerat apeqqutaassapput. Attartortoq inissiamik nammineq pigisamik piginnittumit attartorsimasoq annertuumik imaluunniit akulikitsumik pisussaaffimminik sumiginnaasimaguni, piginnittup inissiamit nooqquneqarsinnaaneranut piumasaqaatit assinginik atugassaqartinneqarpoq,

Tamatumani piginnittussaaneq eqqartorneqarmat assersuutigalugu inissiami attartortittakkami attartorunnaarsitsisarnermut sanilliullugu piginnittup peersinneqarnissaanut piumasaqaatit sakkortunerusariaqarput. Tassani piginnittut peqatigiiffiat kisimi inissiamit nuunnissamik piumasaqaateqarsinnaavoq, inissianik allanik piginnittut ataasiakkaat pinnatik.

Piginnittut peqatigiiffiat taamaallaat inissiamit nuunnissamik piumasaqarsinnaapput, inissiap nammineq pigisap tunineqarnissaanik piumasaqarsinnaanani. Taamaattumik inissiamik piginnittoq inissiamit nuuttoq piginnittut peqatigiiffianni ilaasortaaginnassaaq, inissiarlu pigisani allanut atukkiussinnaallugu attartortissinnaalluguluunniit. Piginnittup inissiamit nuunnermini ataatsimut aningaasartuutinut akiligassani akilinngitsoorpagit, inissianik allanik piginnittut illuummi akiligassanik akiliigallassapput, eqqartuussivitsigullu tamanna anguneqassappat inissiaq pinngitsaaliissummik tuniniaanikkut tunisinnaallugu.

Matuma kinguliani piginnittut peqatigiiffiata piginnittup imaluunniit attartortup inissiamit nammineq pigisamit anisinneqarnissaanut piumasaqarsinnaaneranut assersuutit pingasut saqqummiunneqarput:

1) Piginnittoq piginnittut peqatigiiffiannut akiligassaminik arlaleriarluni akileeqquneqartaraluarluni akiliinngippat.

2) Piginnittoq unnukkut unnuakkullu pisorpalutsitsilluni nipiliortarpat, aammalu arlaleriarluni eqqissisimanissamik inanneqartaraluarluni iluarsiinngippat. Tamatumanili nipiliornerup nipiliukulasartuunissaa piumasarineqarpoq, qaqutigoortumik nuannattoqarnerani nipiliornerinnaat pineqaratik.

3) Inissiaq nammineq pigisaq inissiisarfittut imaluunniit attartortittakkatut atorneqarpat, aammalu najugaqartut eqqissisimanissamik peqquneqartaraluarlutik torersaarnissamut maleruagassanik unioqqutitsisarpata.

Imm. 2-mut

Imm. 2-mi aalajangersakkap piginnittut peqatigiiffiata piginnittoq imm. 1 naapertorlugu piginnittut peqatigiiffiannit peqquneqarnerminik naammassinninngippat piginnittup peqatigiiffiata piginnittumik anisitsiniartillugu eqqartuussivimmit ikiorserneqarsinnaanera periarfissinneqarpoq. Attartortoq inissiamik nammineq pigisamik piginnittumit attartorsimasoq piginnittup anisitaasinnaaneranut piumasaqaatit assinginik atugassaqartinneqarpoq.

§ 9-mut

Aalajangersagaq siullermeerluni tunisinermut taamatullu kingusinnerusukkut tunisinermut atuutissaaq.

Aalajangersakkami tunniusisup paasissutissiisussaatitaanera aalajangersarneqarpoq. Taamaalilluni maleruagassakkut tunniussisup pisisoq paasissutissanik aalajangersakkami nassuiarneqartunik sukumiisumik tunniussinissaanut kaammattorneqarpoq. Tunniussisup paasissutissiisussaatitaanini malinngippagu pisisup taarsiissuteqartarneq pillugu inatsisitigut maleruagassanik nalinginnaasunik atuisinnaanerminik suaarutigininninneranik tamanna kinguneqassaaq.

§ 10-mut

Imm. 1-imut

Siunnersuutigineqarpoq peqqussut 1. juli 2007-imi atuutilissasoq.

Imm. 2-mut

Imm. 2-mi aalajangersagaq ikaarsaarnermut maleruagassamik imaqarpoq, taannalu malillugu piginnittut peqatigiiffii, illuni affarleriinni inissianik nammineq pigisanik marlunnik ilaasortaaffigineqartut 1. juli 2007-imi peqqussutip atuutilernerani pioreersut, kingusinnerpaamik ukiup ataatsip qaangiunnerani 1. juli 2008-mi siunnersuummi §§ 6-imi aamma 7-imi ilaatinneqalissapput, tamanna sioqqulugu piginnittut peqatigiiffii torersaarnissamut malittarisassanik aalajangersaasimanngippata, kiisalu piginnittut peqatigiiffiisa malittarisassaannik aalajangersaasimanngippata nalunaarsuisimanngippatalu.

1. juli 2007-imiit 1. juli 2008-p tungaanut piginnittut akornanni ingerlatsinermut inatsisitigut tunngavissat nalinginnaasut, kiisalu piginnittut peqatigiiffiata inuullu allap akornanni isumaqatigiissuteqartarnermut pigisanullu nalilinnut inatsisitigut tunngavissat nalinginnaasut atuutissapput.

Imm. 3-mut

Imm. 3-mi aalajangersagaq ikaarsaarnermut maleruagassamik imaqarpoq, taannalu malillugu piginnittut peqatigiiffii, illuni affarleriinni inissianik nammineq pigisanik marlunnik ilaasortaaffigineqartut 1. juli 2007-imi peqqussutip atuutilernerani pioreersut, kingusinnerpaamik ukiup ataatsip qaangiunnerani 1. juli 2008-mi siunnersuummi § 7-imi ilaatinneqalissapput, tamanna sioqqulugu piginnittut peqatigiiffii torersaarnissamut malittarisassanik aalajangersaasimanngippata.

1. juli 2007-imiit 1. juli 2008-p tungaanut piginnittut akornanni ingerlatsinermut inatsisitigut tunngavissat nalinginnaasut atuutissapput.