29. marts 2007

UPA 07/21

 

Illuliortiternernut aningaasalersuineq pillugu Inatsisartut peqqussutissaattut siunnersuut

pillugu

Inatsisartut Attaveqaqatigiinnermut Ineqarnermullu Ataatsimiititaliaata

ISUMALIUTISSIISSUTAA

siunnersuutip aappassaaneerneqarnerani saqqummiunneqartoq

Inatsisartut Attaveqaqatigiinnermut Ineqarnermullu Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Godmand Rasmussen, Atassut, siulittaasoq
Inatsisartunut ilaasortaq Olga P. Berthelsen, Inuit Ataqatigiit, siulittaasup tullia
Inatsisartunut ilaasortaq Palle Christiansen, Demokraatit
Inatsisartunut ilaasortaq Agnethe Davidsen, Siumut
Inatsisartunut ilaasortaq Jørgen Wæver Johansen, Siumut

Peqqussutissatut siunnersuutip siullermeerneqarnerani siunnersuummi siunertarineqartut Inatsisartuni partiit akornanni naliginnaasumik tapersersorneqarnerat Inatsisartut Attaveqaqatigiinnermut Ineqarnermullu Ataatsimiititaliaata maluginiarpaa.

Siunnersuutip tusarniaassutiginera
Peqqussutissatut siunnersuut A/S Inissiaatileqatigiiffik INI-mut, KANUKOKA-mut, Iserit A/S-imut, Aningaasaqarnermut Pisortaqarfimmut, SIK-mut, Sulisitsisunut, Ilik-mut, Nusukamut, PPK-mut, PIP-mut, AK-mut, IMAK-imut, ASG-mut, Grønlandsbankenimut, Sparbank Vestimut, Ejendomskontoret Igdlomut kiisalu Grønlands Ejendomskontorimut tusarniaassutigineqarpoq.

Tusarniaanermit akissutit kattuffinnit suliffeqarfinnillu ukuninnga tiguneqarsimasut ataatsimiititaliap maluginiarpaa: A/S Aningaasaqarnermut Pisortaqarfik INI, KANUKOKA, Aningaasaqarnermut Pisortaqarfik, SIK, Sulisitsisut, Ilik, Nusuka, PPK, AK, IMAK Grønlandsbankilu. Tusarniaanermit akissutitut tiguneqartut nalinginnaasumik nassuiaatini erseqqinnerusumik taasamik ilanngunneqarlutillu oqaaseqarfigineqarsimanerat ataatsimiititaliap pitsaasutut isigaa.

Siunnersuutip imarisai
Innuttaasut amerlanerusut inissiamik imminut pilersorsinnaanissamut periarfissinneqarnissaannik Naalakkersuisut Inatsisartullu naalakkersuinikkut kissaatigisaannut anguniagaannullu siunnersuut matumani pineqartoq naapertuuppoq. Inissianik aningaasalersuisarneq pillugu Inatsisartut peqqussutaat maanna atuuttoq nr. 4, 30. oktober 1998-imeersoq siunnersuutitut saqqummiunneqartup taarsissavaa. Aalajangersakkat inissiamik aningaasalersuinissami innuttaasut taarsigassarsisinnaanermut periarfissaannut tunngasut peqqussutissatut missingiummi Naalakkersuisut erseqqissarniarsimavaat. Taamaallilluni tamanna inatsisip oqaasertaani peqqussutissatullu siunnersuummut nassuiaatini erseqqissumik takuneqarsinnaalerluni.

Inissiat mikinerusut peqqussutissatut siunnersuummi immikkut isiginiarneqarnerat
105 kvadratmeterisut angissusilinnik nutaanik inissialiornissaq peqqussummi maanna atuuttumi annertuumik kaammattuutigineqartutut oqaatigineqarsinnaagaluartoq inissiat mikinerusut aningaasalersorlugillu sananissaasa pilerinarsinnaanerat peqqussutissatut siunnersuummi ammaanneqarpoq. Tamanna kvadratmeterinik siullernik 65-inik sananermi taarsigassarsiarisinnaasat qaffasinnerutinnerisigut inissiallu angineruleriartornerani taarsigassarsiat appariartuaartinnerisigut Naalakkersuisut siuarsaaviginiarpaat. Tapiiffigineqarsinnaatitaasulli annertunerpaaffiatut killigitinneqartoq 105 kvadratmeterimit 110 kvadratmeterimut qaffanneqassaaq.

Innuttaasut namminneq aningaasaleeqataassutissaat annertusissanngilaq
10-40-50 malillugu aningaasalersueriaatsip attatiinnarneqarnissaa Naalakkersuisut peqqussutissatut siunnersuummi aalajangiusimavaat. Taamaalilluni innuttaasut namminneq aningaasaleeqataassutissaat qaffanneqanngilaq. Namminersornerullutik Oqartussanit kommuninillu taarsigassarsiarisinnaasat annertunerpaaffiat peqqussummut atuuttumut sanilliullugu allanngorani aalajangiusimaneqaannarpoq. Aaqqissuussinissatulli siunnersuutigineqartumi nutaamik illuliornermi kvadratmeterinik siullernik 65-inik sananermi taarsigassarsisut annertunerusumik "akikillisaaviigineqassapput". Inissianik niuernermi inissiat mikinerit piumaneqarnerisa annertunerulernissaanut periuseq taanna Naalakkersuisut pitsaasutut isigaat.

Taarsigassarsisut namminneq suliaqarnerisa naleqassusia peqqussummi ilaatinneqanngilaq
Taarsigassarsiallit illuutiminnik pitsanngorsaallutillu allilerisimasinnaanerat illumik sananermi tamakkiisumik aningaasartuutit naatsorsornerini ilaatinneqanngillat. Tamatumani aallaaviuvoq taarsigassarsiallip pitsanngorsaataasa sanaap tungaanit isigalugit illersorneqarsinnaassuseqarnerannik naliliinissaq annertuumik ajornakusooruteqarsinnaammat. Taamaattumik taarsigassarsitinneqarnissamik qinnuteqaammut sanilliullugu taarsigassarsiallit namminneq pitsanngorsaataat qanoq naleqartiginersut nalileruminaapput.

Piginnittut nikinneranni taarsigassarsiarititat akiligassanngortinneqassanngillat
Peqqussutip atuuttup akerlianik taarsigassarsiarititat pisortanit aningaasalerneqarsimasut piginnittut nikinneranni akiligassanngortinneqassanngillat. Allannguut taanna piginnittut nikinnerini tamani atuuppoq.

Ataatsimiititaliap siunnersuummik suliarinninnera
Inissianut tunngatillugu anguniakkat siunnersuummut tunuliaqutaasut ataatsimiititaliamit ataatsimut isigalugu tapersersorneqarput. Peqqussutissatut siunnersuut iliuusissanik pitsaasunik isumatuunillu amerlasuunik imaqartoq ataatsimiititaliaq isumaqarpoq. Peqqussutissatut siunnersuut manna aqqutigalugu Innuttaasut amerlanerusut ukiuni aggersuni inissianik imminut pilersornissamut periarfissaannik ammaassineq ataatsimiititaliap ataatsimut isigalugu tapersersorpaa.

Inissiat aserfallassimasut nutarsarneqarsinnaaqqullugit aserfallatsaaliorneqarsinnaaqqullugillu inissianik ukiut 20-it sinnerlugit pisoqaassusilinnik iluarsaanissamut tapiissuteqarsinnaanermik peqqussutissatut siunnersuummi periarfissiisoqarnera ataatsimiititaliami amerlanerussuteqartut Siumumeersut, Inuit Ataqatigiinneersut Atassummeersullu tamakkiisumik taperserpaat. Inissiat mikinerusut peqqussutissatut siunnersuummi immikkut isiginiarneqarneranut tunngatillugu, Inuit Ataqatigiinniit kissaatigineqarpoq, inissiat 65 m2-t annertunerusumik tapiiffigineqartalernerisa kingunerisinnaagaa, inissianik mikisunik sanaartornerup akitsoriarnera. Tamanna pinaveersaartinneqartariaqarpoq, Naalakkersuisullu tassuuna malinnaaqqissaartariaqarput.

Ataatsimiititaliami ikinnerussuteqartup Demokraatit ilaasortaatitaata aalajangersagaq taanna naapertuutinngitsutut isigaa, tassa inissiap qanoq annertutigisumik aserfallatsaalineqarsimassusia aallaavigineqartariaqarmat.

Illoqarfinni inissiat sanaartukkat mikinerusut akikinnerusullu amerlanerulernissaannik Naalakkersuisut anguniagaat ataatsimiititaliap ataatsimut tapersersorpaa. Tassami inissiani 105 kvadratmeterisut angissuseqartuni tapiissuteqarsinnaanermut periarfissat tamakkiisumik atorluarneqareersorinarmata.

Ataatsimiititaliap inassuteqaatai

Ataatsimiititaliami amerlanerussuteqartut Siumumeersut, Inuit Ataqatigiinneersut Atassummeersullu siunnersuut iluserisamisut iluseqartoq akuersissutigineqassasoq inassutigaat. Nunatsinni inuit amerlanerusut namminneq pigisaminnik inissiaqalernissamut periarfissaat peqqussutissatut siunnersuutikkut siuarsarneqartut ataatsimiititaliami amerlanerussuteqartut isumaqarput. Aningaasaleeriaatsit atorneqartut ingerlaavartumik nalilersorneqarlutillu misissuiffigeqqissaarneqartarnissaat pingaaruteqarpoq.

Peqqussutip aningaasaqarnikkut sunniutai ingerlaavartumik nalilersorneqartassasut ataatsimiititaliami amerlanerussuteqartut Naalakkersuisunut kaammattuutigissavaat. Kiisalu taarsigassarsinissamik sulianik allaffissornikkut pisariaqartumik suliarinninnermi, pisortat tassunga atatillugu aningaasartuutigisaannut naapertuuttumik, Naalakkersuisut kommunalbestyrelsillu peqqussut aallaavigalugu akiliuteqartitsinissamut tunngavissinneqarnerat ataatsimiititaliami amerlanerussuteqartut aamma taperserpaat.

Ataatsimiititaliami ikinnerussuteqartup Demokraatit ilaasortaatitaata ataani allassimasunik oqaaseqaateqarluni siunnersuutip akuersissutigineqarnissaa inassutigaa. Peqqussutissatut siunnersuut iliuusissanik pitsaasunik isumatuunillu amerlasuunik imaqartoq ikinnerussuteqartoq isumaqarpoq. Inissiarli nutarternissamut allilerneqarnissamulluunniit akuerineqassaguni ukiunik 20-nik pisoqaassuseqarlunilu 95 kvadratmeterinit mikinerunissaanik aalajangersagaq peqqussutissatut siunnersuummit peerneqartariaqartut ikinnerussuteqartoq isumaqarpoq. Aalajangersakkat naammaginarsorinanngillat, ikinnerussuteqartummi naliliinera malillugu suliat ataasiakkaat aallaavigineqartariaqarmata. Taamatuttaaq §§ 18-ip 19-illu peqqussutissatut siunnersuummit peerneqarnissaat ikinnerussuteqartup kissaatigaa, taamaaliornikkut taarsigassarsinissamik suliat pisortanit suliarineqarnerannut atatillugu akiliuteqartitsisinnaanermut piginnaatitsissut peerneqarsinnaaqqullugu.

Allannguutissatut siunnersuummik taakkununnga naapertuuttumik peqqussutissatut siunnersuutip aappassaaneerneqarnissaanut saqqummiusseqqullugit Naalakkersuisunut ikinnerussuteqartumit kaammattorneqarput.

Taama oqaaseqaateqarluni Inatsisartut Attaveqaqatigiinnermut Ineqarnermullu Ataatsimiititaliaata siunnersuut aappassaaniigassanngortippaa.

 

	Godmand Rasmussen Siulittaasoq
Olga P. Berthelsen Siulittaasup tullia		Agnethe Davidsen
Palle Christiansen		Jørgen Wæver Johansen