08. marts 2007

UPA 2007/21

 

Peqqussutissatut siunnersuummut oqaaseqaatit

Oqaaseqaatit nalinginnaasut

1. Aallaqqaasiut
Peqqussutissap illuliortiternernut aningaasalersuineq pillugu Inatsisartut peqqussutaat nr. 4, 30. oktober 1998-imeersoq, Inatsisartut peqqussutaatigut nr. 1-ikkut, 21. maj 2002-meersukkut aamma Inatsisartut peqqussutaatigut nr. 5-ikkut, 15. april 2003-meersukkut allannguuteqartinneqartoq taarsissavaa.

Aalajangersakkanut maannamut atuuttunut naleqqiullugu najoqqutassatigut allannguisoqarpoq, tamatumalu nassatarisaanik inatsisitigut tunngavissanik allannguisoqarluni. Tamanna pingaartumik iluarsaassinissamut, pitsanngorsaanissamut alliliinissamullu taarsigassarsisinnaanermut, kiisalu piginnittut nikinneranni inatsisitigut inissisimanermut tunngassuteqarpoq.

Tamatumunnga peqatigitillugu annertussuseq tapiissuteqarfigineqarsinnaasoq 105 kvadratmeterimiit 110 kvadratmeterimut annertusineqarpoq, aammalu kvadratmeterimut tapiissuteqarfigineqarsinnaasumut akigititaasoq annertusineqarpoq, taamaalillunilu Naalakkersuisut kommunalbestyrelsillu taarsigassarsisitsinissaannut taarsigassarsiniartup inissiaq aningaasalersuiffigitinniarlugu qinnuteqarfigisaa 65 kvadratmeterit sinnerlugit imaluunniit inorlugit annertussuseqarnersoq maanna apeqqutaasussanngorluni.

Maleruagassat arlallit oqaasertaat erseqqissarneqarput aammalu maleruagassat inatsisitigut inissisimanernik allanngortitsiviunngitsumik ilusaasa aaqqissuunnerat allannguuteqartinneqarlutik.

2. Peqqussutissatut siunnersuutip pingaarnersai
Peqqussutissatut siunnersuutip atuuffissai erseqqissarneqarput, taamaalilluni inatsisitigut piginnaatinneqartut tamarmik, tassalu inuinnaat aamma inatsisitigut pisinnaatitaasut pisussaatitaasullu inissianik nutaanik sanaartornissamut aningaasalersuutissanik taarsigassarsinissamik qinnuteqarsinnaanerat, kiisalu inuinnaat kisimik maanna inissiami najukkaminni iluarsaassinissamut, pitsanngorsaanissamut alliliinissamullu aningaasalersuutissanik taarsigassarsinissamik qinnuteqarsinnaanerat erseqqissumik allassimalerluni.

Kapitali 2-mi, inissianik nutaanik aningaasalersuisarnermut tunngasumi pisortat taarsigassarsititsinerini annertussusissanut aningaasartaritinneqartussanullu killissarititaasut allanngortinneqarput. Annertussuseq tapiissuteqarfigineqarsinnaasoq 105 kvadratmeterimiit 110 kvadratmeterimut annertusineqarpoq. Taassuma saniatigut aningaasanut killiliussaq 65 kvadratmeterinut siullernut sanaartornermut aningaasartuutinit tamakkiisunit annerpaamik kvadratmeterimut 15.500 koruuninut, aammalu 45 kvadratmeterinut tullernut, tassalu 66 kvadratmeteriniit 110 kvadratmeterit tikillugit 10.250 koruuninut annertussusilerneqarpoq. Peqqussummi atuuttumi aningaasanut killiliussaq 105 kvadratmeterinut siullernut 13.500 koruuninut annertussusiligaavoq. Siunnersuutip atuutilerneratigut taarsigassarsisup kvadratmeterinut siullernut akisunernullu aningaasaliiffigineqarnissaa qulakkeerneqarpoq. Naalakkersuisut kommunalbestyrelsillu taarsigassarsiarititassaasa annerpaaffissaat annertunerusumik allanngortinneqanngillat.

Nutaatut inissianut nutaanut aningaasalersuutissanik pisortanit taarsigassarsiarititassat piginnittut nikinneranni akiligassanngortinneqartarunnaarput.

Maanna iluarsaassinermut pitsanngorsaanermullu taamaallaat inissianik pioreersunik, piffissamit qinnuteqarfiusumit ukiut 20-it qaangiutsinnagit sananeqarsimasunik, aammalu 95 kvadratmeterit sinnernagit annertussuseqartunik piginnittunut taarsigassarsititsisoqarsinnaalerpoq. Pisoqaassutsimut kvadratmeterinullu killiliinermi siunertaavoq taarsigassarsiassarititaasut illunut minnerusunut pisoqaanerusunullu, iluarsaanneqarnissamik pitsanngorsarneqarnissamillu pisariaqartitsisunut atugassatut siunniunneqarnissaat.

Kiisalu peqqussutissatut siunnersuut Naalakkersuisut inissianik pioreersunik alliliinissamut taarsigassarsititsisinnaanerinut inatsisitigut tunngavissamik nutaamik imaqarpoq. Tassani piumasarineqarpoq inissiap piffissamit qinnuteqarfiusumit ukiunit 20-nit siusinnerusukkut sananeqarsimanissaa, aammalu allilerneqannginnermini 95 kvadratmeterit sinnernagit annertussuseqarnissaa, alliliinerullu kingorna 110 kvadratmeterit sinnerlugit annertussuseqalinnginnissaa. Pisoqaassutsimut kvadratmeterinillu killiliinermi siunertaavoq taarsigassarsiassarititaasut illunut minnerusunut pisoqaanerusunullu, allilerneqarnissamik pisariaqartitsiviusunut atugassatut siunniunneqarnissaat.

Siunnersuutip kapitaliani 4-mi aalajangersakkamik nutaamik ikkussisoqarpoq, taamaalillunilu inissiat taarsigassarsititsiviusut sukkulluunniit minnerpaamik ikuallattoornissamut anorersuarneranilu ajoqusernissamut sukkulluunniit sillimmaserneqarsimasussaangortinneqarlutik.

Kiisalu siunnersuutip kapitaliani 5-imi Naalakkersuisut kommunalbestyrelsillu taarsigassarsiniarluni qinnuteqaatit suliarinerinut, kiisalu qularnaveeqqusiissuteqarluni taarsigassarsinermut allakkiap atsiorneqarneranut atatillugu suliarinninnermut atatillugu akitsuummik akiliisitsiniarsinnaanerannut inatsisitigut tunngavissamik ikkussisoqarpoq.

3. Pisortanut aningaasaqarnikkut allaffissornikkullu sunniutissat
Peqqussutissatut siunnersuutip pisortanut aningaasaqarnikkut sunniuteqarnissaa naatsorsuutigineqarpoq, nutaatut Naalakkersuisut kommunalbestyrelsilu taarsigassarsianut aningaasalersuinermut atatillugu suliarinninnermut akitsuumik akiliisitsisinnaalermata. Kiisalu Naalakkersuisut kommunalbestyrelsilu piginnittut nikinnerannut, taarsigassarsiallip taarsigassarsiaanik allanngortitsinermut, kingornussassat suliarineqarnerinut aammalu qularnaveeqqusiussaqarluni taarsigassarsinermut allakkiaq tunngavigalugu akiliisitsiniarnermut atatillugu akitsuummik akiliisitsisinnaalissapput.

Peqqussutissatut siunnersuutip pisortanut allaffissornikkut sunniuteqarnissaa naatsorsuutigineqanngilaq.

4. Inuussutissarsiornermut aningaasaqarnikkut allaffissornikkullu sunniutissat
Peqqussutissatut siunnersuutip inuussutissarsiornermut aningaasaqarnikkut imaluunniit allaffissornikkut sunniuteqarnissaa naatsorsuutigineqanngilaq.

5. Innuttaasunut aningaasaqarnikkut allaffissornikkullu sunniutissat
Peqqussutissatut siunnersuut innuttaasunut aningaasaqarnikkut sunniuteqarsinnaavoq, tassani taarsigassarsiassanut killissarititaasut allanngortinneqarmata. Innuttaasut inissianik 110 kvadratmeterit inorlugit angissusilinnut aningaasalersuiniartut peqqussutissatut siunnersuutip atuutilerneratigut peqqussummut maanna atuuttumut sanilliullugu pisortanit annertunerusunik taarsigassarsisinnaalissapput, kiisalu innuttaasut inissianik 110 kvadratmeterinik taakkunanngaluunniit annertunerusunik sananiartut pisortanit taarsigassarsinerminni maanna peqqussut atuuttoq malillugu killiliussat annertoqqataannik taarsigassarsisinnaalissallutik.

Nutaatut Naalakkersuisut kommunalbestyrelsilu taarsigassarsiniarluni qinnuteqaatip suliarineqarneranut taarsigassarsiniartup akiliisinneqarnissaa piumasarisinnaalerpaat. Kiisalu Naalakkersuisut kommunalbestyrelsilu piginnittut nikinnerannut, taarsigassarsisimasup taarsigassarsiaanik allannguinissamut, kingornussassanik suliaqarnermut aamma qularnaveeqqusiussaqarluni taarsigassarsinermut allagartap atsiorneranut atatillugu suliat suliarinerannut akiliisitsinissamik piumasaqarsinnaapput.

Peqqussutissatut siunnersuutip innuttaasunut allaffissornikkut sunniuteqarnissaa naatsorsuutigineqanngilaq.

6. Avatangiisinut pinngortitamullu sunniutissat
Peqqussutissatut siunnersuutip avatangiisinut imaluunniit pinngortitamut sunniuteqarnissaa naatsorsuutigineqanngilaq.

7. Sunniutaasinnaasut annertuut allat
Peqqussutissatut siunnersuutip allanik annertuunik sunniuteqarnissaa naatsorsuutigineqanngilaq.

8. Naalagaaffeqatigiinnermut namminersulernissamullu tunngasut
Peqqussutissatut siunnersuutip Naalagaaffeqatigiinnermut imaluunniit namminersulerniarluni suliat ingerlanerannut sunniuteqarnissaa naatsorsuutigineqanngilaq.

9. Oqartussaasunut suliniaqatigiinnullu il.il. tusarniaaneq
Peqqussutissatut siunnersuut ukununnga tusarniaassutigineqarpoq: A/S Inissiaatileqatigiiffik INI, KANUKOKA, Iserit A/S, Aningaasaqarnermut Pisortaqarfik, SIK, Sulisitsisut Peqatigiiffiat, Ilik, Nusuka, PPK, PIP, AK, IMAK, ASG, Grønlandsbanken, Sparbank Vest, Ejendomskontoret Igdlo kiisalu Grønlands Ejendomskontor.

Tusarniaanermi A/S Inissiaatileqatigiiffik INI, KANUKOKA, Aningaasaqarnermut Pisortaqarfik, SIK, Sulisitsisut Peqatigiiffiat, Ilik, Nusuka, PPK, AK, IMAK aamma Grønlandsbanken akissuteqarput.

Tusarniaanermi akissutit, teknikkikkut kukkunernik kiisalu oqaatsitigut kukkunernik amigaatinillu imaqartut annertunerusumik oqaaseqarfigineqaratik siunnersuummut ilanngunneqarput.

Tusarniaanermi akissutit allat, siunnersuutip imaanut tunngassuteqartut annertunersaat matuma kinguliani issuarneqarlutik oqaaseqarfigineqarput. Ineqarnermut Attaveqarnermullu Pisortaqarfiup tusarniaanermi akissuteqaatit siunnersuummi tulleriiaarineq malillugu oqaaseqaateqarfigineqarnissaat naleqqunnerpaatissimavaa.

Siunnersuut ataatsimut isigalugu

Nusuka-mit oqaatigineqarpoq, peqqussutissaq ajornanngippat naalagaaffiup aningaasaleeqataaffiginngisaannut tunngassuteqartut Inatsisartut inatsisaattut qaffanneqartariaqaraluartut. Tamatumunnga tunngatillugu oqaatigineqassaaq, Inatsisartut inatsisaasa aamma Inatsisartut peqqussutaasa assigiinngissutaannut pingaartumik Namminersornerullutik Oqartussat suliassaqarfimmik danskit naalagaaffiannit tapiiffigineqarlutik imaluunniit tapiiffigineqaratik tigusisimanersut tunngavigineqarmat, tak. Namminersornerullutik Oqartussat pillugit inatsit nr. 577, 29. november 1978-imeersoq. Namminersornerullutik Oqartussat inissianik pilersuineq, inissialiortiternermut tapersiissuteqartarneq, inissianik attartortitsisarneq il.il. pillugit inatsit nr. 944, 23. december 1986-imeersoq tunngavigalugu ineqarneq pillugu suliassaqarfik tapiissutitalimmik tiguaat, taamaattumillu suliassaqarfik taanna inatsisartut inatsisaannik aalajangersaaffigineqarani peqqussutit atorlugit inatsisiliuunneqarsimalluni.

Siunnersuummi § 1, imm. 2-mut

SIK-miit "inuussutissarsiutit minnerusut namminersorfiusut" suunersut ersarissumik nassuiaasioqquneqarput. Oqaaseqaatit tamanna tunngavigalugu erseqqissarneqarput.

Siunnersuummi § 4, imm. 3-mut (siunnersuummi tusarniaassutigineqartumi § 3, imm. 2)

KANUKOKA-miit siunnersuummi § 3, imm. 2-mi allannguut, inissiat annertussusaasa kvadratmeterimullu tapiissutit annerpaaffilerneqarneranut tunngasoq akuersaarneqarpoq, kisiannili taarsigassarsiat aningaasat nalingisa appartarnerannut/qaffattarnerannut iluarsiisarnissaq amigaatigineqarpoq.

Naalakkersuisoqarfimmit aningaasat nalingisa appartarnerannut/qaffattarnerannut ingerlaavartumik iluarsiisarnissaq kissaatigineqanngilaq. Taarsigassarsiassanut killissarititaasut taaneqartut peqqussutikkut aalajangersagaapput, taamaattumillu Inatsisartut peqqussutaannut allannguutissamik peqqussusiornikkut aatsaat allanngortinneqarsinnaallutik.

Siunnersuummi § 6, imm. 3-mut (siunnersuummi tusarniaassutigineqartumi § 5, imm. 3)

KANUKOKA isumaqarpoq, taarsigassarsiniarluni qinnuteqartup nammineerluni sulinera inissiap sananeqarneranut aningaasartuutaasunut tamakkiisunut ilaasariaqartoq, taamaalilluni innuttaasunit amerlanerusut inissiamik namminerisaminnik pisisinnaanissamut periarfissinneqassammata.

Ineqarnermut Attaveqarnermullu Naalakkersuisoqarfimmiut KANUKOKA-mit isummersuutaasut paasilluarneqarsinnaapput, kisiannili taarsigassarsiniarluni qinnuteqartup nammineerluni sulinera sanasutut illersorsinnaasumik suliarineqarsimanersoq nalileruminaatsinneqarpoq, taamaattumillu taarsigassarsiniarluni qinnuteqartup nammineerluni sulinera qanoq iliorluni, tamannalu pissappat qanoq nalilerlugu sanaartornermut aningaasartuutinut ilanngunneqarnissaa aqukkuminaatsinneqarluni. Taamaattumik taarsigassarsiniarluni qinnuteqartup nammineerluni sulinerata nalingata sanaartornermut aningaasartuutinut tamakkiisunut ilanngunneqannginnissaa aalajangiusimaannarneqarpoq.

Siunnersuummi § 8, imm. 1-imut (siunnersuummi tusarniaassutigineqartumi § 7, imm. 1)

KANUKOKA isumaqarpoq, pisortat taarsigassarsiarititaat piginnittut nikinneranni akiligassanngortinneqartariaqanngitsut.

Ineqarnermut Attaveqarnermullu Naalakkersuisoqarfimmiit siunissami inissiat tunineqartarnissaat eqqarsaatigalugu aalajangersagassatut siunnersutigineqartoq isumaqatigineqarpoq.

Aalajangersagaq peerneqarpoq (siunnersuummi tusarniaassutigineqartumi § 7, imm. 4)

KANUKOKA isumaqarpoq siunnersuummi § 7, imm. 4 siunnersuummi § 7, imm. 1-imut akerliusoq, pisortanit taarsigassarsiarititat akiligassanngortinneqaratik piginnittut nikittarnissaasa, tak. imm. 1, aamma Naalakkersuisut kommunalbestyrelsilu piginnittut nikinnerannik akuersisarnissaasa, tak. imm. 4, akornanni naapertuutinngitsoqarmat. Aalajangersakkani imm. 4-mi akuersisarnissamut piumasaqaat peerneqarpoq, taamaalilluni siunnersuummi § 7 ataqatigiissutut isikkoqalerluni.

Siunnersuummi § 9, nr. 2-mut

Piumasaqaat atuutilernermini qanoq aqunneqassanersoq SIK-mit paaserusunneqarpoq. Oqaaseqaatini tamanna pillugu nassuiaasoqarpoq.

Siunnersuummi § 11-mut

KANUKOKA-miit inissiamik piginnittup inissiamik najukkaminik sananermi kingorna aatsaat ukiut 20-t qaangiunnerini inissiamik iluarsaassinissamut, pitsanngorsaanissamut alliliinissamullu taarsigassarsisinnaanera paasiuminaatsinneqarpoq, maanna inissiat pigineqartut pitsaanerpaamik aserfallatsaaliorneqarnissaat inuiaqatigiit soqutigisarissammassuk. Inissiat pitsaanerpaamik aserfallatsaaliortariaqarmata, tamanna pillugu Naalakkersuisut KANUKOKA isumaqatigaat, kisiannili inissiat namminerisamik pigineqarput, taamaattumillu tunngaviusumik inissianik piginnittut ataasiakkaat inissianik pigisaminnik aserfallatsaaliuineq isumagisariaqarpaat. Kisiannili pingaartumik inissianik sanaartornermut tapersiissuteqartarneq naapertorlugu illuliat pisoqqat siunissamissaaq piuvinnassagunik iluarsisarialinnik amigaateqarput, taamaattumillu inissiat pisoqqat taakku iluarsaannissaannut pitsanngorsarnissaannullu taamaallaat taarsigassarsisitsisoqartartussaavoq.

Siunnersuummi § 11, imm. 2-mut (siunnersuummi tusarniaassutigineqartumi § 12, imm. 2)

SIK-miit aalajangersakkamut tamakkiinerusumik oqaasertaliinissaq kissaatigineqarpoq, taamaaliornikkut suliat assigiiaarnerusumik suliarineqartarnissaat qulakkeerneqartussaammat. Kissaatigineqartoq malinneqarpoq. Tamatumunnga peqatigitillugu Naalakkersuisut kisimik suliassanik aalajangersimasunik suliaqartarnissaat erseqqissaatigineqarpoq, taamaalillunilu assigiinngiaartumik suliaqartarnissap ilimagineqarsinnaanera annikillisinneqarluni.

Siunnersuummi § 12-imut (siunnersuummi tusarniaassutigineqartumi § 13)

SIK-miit alliliinissamut qinnuteqaatit aamma nutaanik sanaartornissamut qinnuteqaatit alliliinermi inissiap qanoq annertutigilersinnaaneranut killiliinikkut assigiinngitsunik suliarineqartarnissaat naleqqutinngitsutut isumaqarfigineqarpoq, nutaanik sanaartornissamut atatillugu killiliussaq allaanerummat. Naalakkersuisut assigiinngissutaasumut tunngavilersuutitut oqaatigaat, inissiaq sananeqareersimasoq tunngavimmigut namminerisamik inissiaatigineqartartoq, taamaattumillu piginnittup inissiamut aningaasartuutissanik tamaginnik isumagisaqarnissaa naatsorsuutigineqarluni. Taamaattorli Naalakkersuisut ilisimaaraat, pingaartumik BSU-mit taarsigassarsilluni illuliat pisoqaanerusut ullumikkut pitsaassuserititassanut naleqqiullugu mikivallaartartut, taamaattumillu BSU-mit taarsigassarsilluni illulianik mikisunik pisoqaanerusunik piginnittunut, 110 kvadratmeterit tikillugit annikitsunik alliliinissamik kissaatigisaqartunut taarsigassarsisitsisoqartassasoq. BSU-mit taarsigassarsilluni illuutillit allat, annertunerusumik alliliinissamik kissaateqartut inissiamik namminerisamik piginnittutut alliliissutissatut kissaatigisaminnut namminnerlutik aningaasalersuisarnissaat naatsorsuutigineqarpoq.

Siunnersuummi § 13-imut (siunnersuummi tusarniaassutigineqartumi § 14)

KANUKOKA-mit aamma GA-mit inissiani pioreersuni iluarsaassinissamut, pitsanngorsaanissamut alliliinissamullu tunngavimmigut piginnittut nikinneranni akiligassanngortinneqartarnissaat paasiuminaatsinneqarpoq, tamanna inissianik nutaanik aningaasalersuinissamut taarsigassarsianut tunngaviusumik atorneqartussaanngimmat. Tamatumunnga assigiinngissutaasumut tunngavilersuutigineqarpoq, inissianik nutaanik aningaasalersuinissamut taarsigassarsiat ukiuni 20-ni erniaqartinneqaratillu akilersugassaanngimmata, tamatumalu kingorna taarsigassarsiat ukiuni tulliuttuni 15-ini akilersugassaallutik, kiisalu inissianik pioreersunik iluarsaassinissamut, pitsanngorsaanissamut alliliinissamullu taarsigassarsiat assersuutigalugu piginittut nikinnissaasa tungaanut erniaqartinneqaratillu akilersugassaanngimmata, tamatumalu kingorna taarsigassarsiat tamakkiisumik akiligassanngortinneqartussaammata.

Siunnersuummi § 15-imut (siunnersuummi tusarniaassutigineqartumi § 17)

Piumasaqaat atuutilernermini qanoq aqunneqassanersoq SIK-mit paaserusunneqarpoq. Oqaaseqaatini tamanna pillugu nassuiaasoqarpoq.

Siunnersuummi § 18-imut (siunnersuummi tusarniaassutigineqartumi § 20)

SIK-mit suliassamik suliarinninnermut akitsuut taarsigassarsinissamik qinnuteqaammik suliaqarnermut atatillugu allaffissornermut aningaasartuuterpianut naapertuunnersoq paaserusunneqarpoq. Oqaaseqaatini tamanna pillugu nassuiaasoqarpoq.

Siunnersuummi § 20, imm. 3-mut (siunnersuummi tusarniaassutigineqartumi § 21, stk. 3)

SIK-miit maleruagassat ataatsit malillugit Naalakkersuisut kommunalbestyrelsillu suliamik suliarinninnerat neriorsuuteqarnermik itigartitsinermillu assigiinngitsunik inerneqarsinnaanerat qanoq ililluni pisinnaanersoq eqqumiiginartinneqarpoq. Aalajangersakkami oqaaseqaatit erseqqissarneqarput, taamaalillunilu maanna Naalakkersuisut kommunalbestyrelsillu taarsigassarsititsisoqassanersoq aalajangiisussanngortillutik tunngavissat suut pingaartissaneraat ersarissumik allassimalerpoq. Kiisalu allaffissornikkut suleriaatsit assigiinngitsut assigiinngitsunik inerneqarsinnaapput, tamatumani maleruagassat ataatsit aallaavigalugit sulineq ingerlagaluarpalluunniit.

Siunnersuummi § 24-mut (siunnersuummi tusarniaassutigineqartumi § 25)

GA-miit § 25-imi atorunnaarsitsinissamut aalajangersakkamik, inissianik aningaasalersuisarneq pillugu Inatsisartut peqqussutaannik kingusinnerusukkut allannguuteqartinneqartumik atuuttumik atorunnaarsitsissutaasussamik amigaateqartoqarnera tikkuarneqarpoq. Tamanna naapertorlugu aalajangersakkamik atorunnaarsitsissutaasussamik ilanngussisoqarpoq.

 

Peqqussutissatut siunnersuummi aalajangersakkanut ataasiakkaanut oqaaseqaatit

§ 1-imut

Imm. 1 Inatsisartut peqqussutaanni nr. 4-mi, 30. oktober 1998-imeersumi § 1 oqaasertamigut allannguuteqartinneqarluni § 1-ip assigaa, kiisalu imm. 2 nutaajulluni.

Imm. 1-imut

Nr. 1-ip atuutilerneratigut Naalakkersuisut kommunalbestyrelsilu inatsisitigut piginnaatitaasunut tamanut taarsigassarsititsisinnaapput, tassalu inuinnarnut taamatullu inatsisitigut pisinnaatitaasunut pisussaatitaasunullu, tamakkiisumik ilaannaasumilluunniit naalagaaffimmit, Namminersornerullutik Oqartussanit, kommunimit ataatsimit imaluunniit kommunit kattuffiannit, kommunalbestyrelsit aamma nunaqarfinni aqutsisut il.il. pillugit Inatsisartut peqqussutaanni § 64-imi taaneqartunut, aktiaatileqatigiiffinnit, anpartsselskabinit piginneqatigiiffinnit assigisaannillu pigineqartunut. Inissiat ilaqutariinnut arlalinnut inissiatut, inissiatut uiguleriittut, inissiatut uigulukuttutut, ilaqutariinnut ataatsinut illutut illutullu affarleriittut sananeqarsinnaapput, aammalu assersuutigalugu nammineq inigisatut, inissiatut attartortittakkatut imaluunniit sulisunut inissiatut atorneqarsinnaallutik.

Tamatuma saniatigut siunnersuummi kapitali 3-mi maleruagassat malillugit inissiani nammineq pigisani qanorluunniit ittuni iluarsaassinissamut, pitsanngorsaanissamut alliliinissamullu inuinnarnut taarsigassarsisitsisoqarsinnaavoq, tassalu ilaqutariinnut ataatsinut illuni illunilu affarleriinni, inissiani uiguleriinni, inissiani uigulukuttuni aamma ilaqutariinnut arlalinnut inissiani, tak. nr. 2. Iluarsaassineq tassaavoq inissiami atortulersuutinik imaluunniit inissiap ilaanik pioreersunik taarsersuineq iluarsaassinerluunniit. Pitsanngorsaaneq tassaavoq inissiami nutaanik atortulersuusersuineq inissialluunniit ilaanik ikkussuineq.

Aalajangersakkami qinnuteqartumut piumasaqaatit marluk saqqummiunneqarput, ilaatigut qinnuteqartoq inuinnaassalluni inissiamik piginnittoq, ilaatigullu qinnuteqartup inissiaq taarsigassarsinissamik qinnuteqarfiusoq piffissami pineqartumi najugaqarfigissallugu.

Imm. 2-mut

Imm. 2-p atuutilerneratigut inissianik inuussutissarsiutinik ingerlataqarfiusunik imaluunniit ingerlataqarfiulersussanik sananissamut, iluarsaassinissamut, pitsanngorsaanissamut alliliinissamullu taarsigassarsititsisoqarsinnaassanngilaq. Inuussutissarsiutinik oqarnermi isumagineqartoq tassaavoq inissiaq inuussutissarsiummik ingerlataqarnermut atorneqartoq. Taamaattumik inissiaq tamakkiisumik ilaannaasumilluunniit inuussutissarsiummik ingerlataqarnermut atorneqarpat taarsigassarsititsinissamut itigartitsisoqassaaq. Taamaattorli inissiamit najukkamit inuussutissarsiutinik annikinnerusunik namminersorfiusunillu ingerlataqarneq akuerineqarsinnaavoq, inissiaq pingaartumik najugarisatut atorneqarpat. Tikeraanut angerlarsimaffiit imaluunniit tikeraanut ineeqqat, motelit, cabinit, akunnittarfiit assigisaallu najugarisat ataanni inissisimanngillat.

Naalakkersuisut kommunalbestyrelsilu pisuni tamaginni inissiaq pingaartumik najugarisatut atorneqarnersoq naliliisassapput. Najoqqutarineqartartut malillugit inissiami inimit ataatsimit amerlanerunngitsoq inuussutissarsiummik namminersorfiusumik aaqqissuussisoqarsinnaavoq, soorlu ineeraq ataaseq nutserinermut atorneqarsinnaalluni. Ataatsimut isigalugu inissiap inuussutissarsiutinut annikinnerusunut namminersorfiusunullu atorneqarfigisaa annikitsuinnaassaaq. Inuussutissarsiuutinut annikinnerusunut namminersorfiusunullu assersuutitut taaneqarsinnaapput kukkunersiuisoqarfiit pilerisaarusiortarfiillu annikitsut, pingaartumik illup avataanut sullitanik attaveqarfiusartut, namminersorluni meeqqanik ulluunerani paaqqinnittarfeqarneq imaluunniit isikkanik passussisarfeqarneq.

§ 2-mut

Aalajangersakkap najoqqutassatigut annikitsunik ikittunik allannguuteqartinneqarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 3 assingaa. Naalakkersuisut kommunalbestyrelsilu inissianik sananissamut, iluarsaassinissamut pitsanngorsaanissamut alliliinissamullu taarsigassarsititsisinnaanngillat, sanaartugassaq sanaartornermut pilersaarusiornermullu inatsisinut naapertuutinngippat. Tamatumani pingaartumik taarsigassarsisup illuliornermut malittarisassanik aamma nunaminertanik atuineq pilersaarusiornerlu pillugit Inatsisartut peqqussutaannik malinninnissaa eqqarsaatigineqarpoq.

§ 3-mut

Aalajangersakkap najoqqutassatigut allannguuteqartinneqarluni, oqaatsitigullu erseqqissaavigineqarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 7, imm. 2 assingaa.

Aalajangersakkakkut qulakkeerniarneqarpoq Naalakkersuisut kommunalbestyrelsillu sanaartugassamut taarsigassarsititsisoqassanersoq pillugu suliamik suliarinninnerisa suliamullu aalajangiinissaasa sanaartornerup aallartinnginnerani naammassineqarnissaa. Taamaalilluni aalajangersakkap atuutilerneratigut Naalakkersuisut kommunalbestyrelsilu sanaartukkanut aallartereersunut imaluunniit naammassineqareersunut taarsigassarsinissamik qinnuteqaatinut itigartitsisalissapput.

Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 7, imm. 1 ingerlateqqinneqanngilaq, aalajangersagaq pisariaqartinneqanngimmat. Siunnersuummi § 20, imm. 3-mi allassimareerpoq, Naalakkersuisut kommunalbestyrelsilu paasissutissatut nassiussat tunngavigalugit qinnuteqaammut isummertassasut.

§ 4-mut

Aalajangersakkami Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 2, imm. 1aamma 2, aammalu § 4 ataatsimut allanneqarput, tassanilu inissianik aningaasalersuisarnermi aaqqissuussinermut qitiusumik tunngavissarititaasut killissarititaasullu nassuiarneqarput. Aalajangersakkap atuutilerneratigut siornatigut inatsisitigut inissisimanermut naleqqiullugu najoqqutassanik arlalinnik allannguisoqarpoq.

Aalajangersakkami allassimavoq pisortat inissianik nutaanik sanaartornermut aningaasalersuutissatut annertussutsimut tapiiffigineqarsinnaatitaasumut sanaartornermut aningaasartuutit tamakkiisut 40%-iat tikillugu taarsigassarsititsisinnaasut. Qinnuteqartup nammineerluni sanaartornermut aningaasartuutinit sinneruttut nammineerluni aningaasalersussavai, soorlu aningaaserivimmit taarsigassarsinermigut, realkredittimit taarsigassarsinermigut aningaasalersuisinnaasunilluunniit allanit taarsigassarsinermigut.

Imm. 1-imut

Imm. 1 ilaatigut nutaajuvoq, ilaatigullu Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 4, imm. 1-imik aamma 2-mik ataatsimoortitsiviulluni. Tassani Naalakkersuisut kommunalbestyrelsillu inissianik nutaanik aningaasalersuinissamut taarsigassarsiarititaasa pineqarnerat erseqqissarneqarpoq.

Nutaatut imm. 2-mi 3-milu annertussusissamut aningaasartarititassanullu killissatut aalajangersarneqartut iluanni pisortat taarsigassarsiarititaat sanaartornermut aningaasartuutit tamakkiisut 40 procentiinik annertussuseqartut tunngavigalugit Naalakkersuisut kommunalbestyrelsilu tamarmik immikkut 20 procentinik taarsigassarsititsisinnaalerput. Taarsigassarsiniarluni qinnuteqartup Naalakkersuisunit aamma kommunalbestyrelsimit ataatsikkut taarsigassarsinissamik neriorsuuteqarfigineqarnissaa piumasaqaataanngilaq. Taarsigassarsiniarluni qinnuteqartoq Naalakkersuisunit kommunalbestyrelsimilluunniit taarsigassarsinissamik neriorsuuteqarfigineqarnissaminut itigartinneqarpat, taarsigassarsiniarluni qinnuteqartup nammineerluni sanaartornermut aningaasartuutit taakkununnga tunngasortai ilanngullugit akilissavai.

Naalakkersuisut kommunalbestyrelsilluunniit illuatungiliuttoq aningaasaliissutissat affaannik aningaasaliisinnaatinnagu tamarmik immikkoorlutik pisortanit taarsigassarsiarititassat tamakkerlugit akilersinnaajunnaarpaat. Maannamut periarfissaasimasoq taanna, Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 4, imm. 2-mi maleruagassiorneqarsimagaluartoq peqqussummi matumani peerneqarpoq, periarfissaq taanna suliat ingerlanneqarneranni atorneqanngisaannarsimammat.

Sanaartornermut aningaasartuutit tamakkiisut sunik imaqarnissaannik sukumiisumik killiliinerit pillugit siunnersuummi § 6, imm. 2-mut oqaaseqaatit innersuunneqarput.

Imm. 2-mut

Imm. 2 nutaajuvoq, aammalu annertussutsinut allannguuteqartinneqarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 2, imm. 1-imut assingusuulluni.

Imm. 2-mi Naalakkersuisut kommunalbestyrelsillu taarsigassarsiarititassaannut annertussutsinut killiliussat aalajangersarneqarput. Annertussutsimut taarsigassarsititsiviusinnaasumut annerpaaffissaq 105-imiit 110 kvadratmeterimut qaffanneqarpoq.

Imm. 3-mut

Imm. 3 nutaajuvoq aammalu aningaasat annertussusissaat allannguuteqartinneqarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 2, imm. 1-imut annertunerusutigut assingusuulluni.

Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi annertussusissamut aningaasartaliussassanullu killiliussat 105 kvadratmeterimut aamma kvadratmeterimut 13.500 koruuninut aalajangersarneqarsimapput, tamatumalu nassatarisaanik Naalakkersuisut kommunalbestyrelsillu taarsigassarsiarititaat annerpaamik 283.500 koruuninik (=(13.500 kr. X 105 kvadratmeterit) 20 procentii) amerlassuseqarsinnaallutik.

Siunnersuummi 65 kvadratmeterinut siullernut aningaasaliissutissanut killiliussat 15.500 koruuniupput, 45 kvadratmeterinullu tulliuttunut, tassalu 66 kvadratmeterimiit 110 kvadratmeterit tikillugit aningaasaliissutissanut killiliussat 10.250 koruuninut aalajangersarneqarlutik. Killiliussat nutaat tamakkerlutik nassatarisaanik Naalakkersuisut kommunalbestyrelsillu taarsigassarsiarititaat 293.750 koruuninik (= 20 procent af (15.500 koruunit x 65 kvadratmeter)-it + (10.250 koruunit x 45 kvadratmeter)-it 20 proncentiinik) annertussuseqarsinnaapput.

Taamaalilluni Naalakkersuisunit kommunalbestyrelsimillu taarsigassarsiaritinneqarsinnaasut annerpaaffissaat annertunerusutigut pigiinnarneqarpoq, kiisalu taarsigassarsiarititaasut katitigaanerat allannguuteqartinneqarluni. Peqqussut atuuttoq naapertorlugu Naalakkersuisunit kommunalbestyrelsimillu 65 kvadratmeterinut siullernut taarsigassarsiarititaasut kvadratmeterimut 2000 koruuninik amerlanerusut taarsigassarsiaritinneqartalissapput, kiisalu 45 kvadratmeterinut tullernut taarsigassarsiarititaasut kvadratmeterimut 3.250 koruuninik ikinnerusut taarsigassarsiaritinneqartalissallutik. Tamatumani siunertaavoq inissiat minnerusut, amerlanertigut inissianut annerusunut naleqqiullutik kvadratmeterimut akisunerusartut aningaasalersorneqarsinnaanissaat.

Imm. 4-mut

Imm. 4 najoqqutassatigut allannguuteqartinneqarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 2, imm. 2-p aamma § 4, imm. 3-p aamma 4-p assingaat. Aalajangersagaq malillugu pisortanit taarsigassarsinissamut taarsigassarsisup sanaartornermut aningaasartuutit tamakkiisut sinnerinik nammineerluni aningaasalersuinissaa piumasaqaatigineqarpoq. Imm. 4 tunngavigalugu taarsigassarsisoq 110 kvadratmeterinit anginerusumik aammalu 65 kvadratmeterinut siullernut 15.500 koruuninit akisunerusumik, kiisalu 45 kvadratmeterinut tulliuttunut 10.250 koruuninit akisunerusumik sanasinnaavoq, taarsigassarsisoq taasigassarsiarineqarsinnaatitaasut saniatigut aningaasartuutinik tamakkiisunik aningaasaliisinnaaguni.

§ 5-imut

Aalajangersagaq nutaajuvoq, tassanilu inissiani ataasiakkaani inissiap annertussusaata qanoq iliorluni naatsorsorneqarnissaa aalajangersarneqarpoq. Inissiap annertussusaa pisortat taarsigassarsiarititassaasa naatsorsornerinut tunngavigineqartussat ilagaat, taamaattumillu inissiat tamarmik annertussutsimikkut naatsorsorneqarnerminni assigiimmik uuttorneqartarnissaat pingaaruteqarpoq.

Imm. 1-imut

Aalajangersakkami inissiap annertussusaata tamakkiisup qanoq iliorluni naatsorsorneqarnissaa aalajangersarneqarpoq. Suliffeqarfik namminersortoq ilaqutariinnut arlalinnut inissiamik arfinilinnik initalimmik sananissamut taarsigassarsinissamik soorlu Naalakkersuisunut kommunalbestyrelsimullu qinnuteqarpat, inissianillu taakkunannga pingasut 100 kvadratmeterinik annertussuseqassappata pingasullu 140 kvadratmeterinik annertussuseqassallutik, pisortat taarsigassarsiarititassaasa annertussusissaat ininut ataasiakkaanut agguarlugu naatsorsorneqassaaq.

Pequusivik, biilinut oqquisitsisarfik, aneerasaartarfik biililluunniit unittarfiat qulisaq teknikkimut tunngasortaat eqqarsaatigalugit najugassatut oqorsarlugit atorneqarsinnaappata, kisiannili nunaminertamik tunineqarsinnaannginneq imaluunniit pissutsit pilersaarusiornermut inatsisinik uniuippata pequusivik, biilinut oqquisitsisarfik, aneerasaartarfik biililluunniit unittarfiat qulisaq najugassatut naatsorsuinermi ilanngunneqassanngillat, taamatut najugassamik ilanngussineq nunaminertanut pilersaarusiornermullu inatsisinik uniuinerussammat.

Imm. 2-mut

Aalajangersagaq inissiap naqqup ataani, inini quleriinni nalinginnaasumik atugaasumi aammalu qaliani init annertussusaannik qanoq iliorluni naatsorsuisinnaanerup teknikkimut tunnganerusortaanik imaqarpoq.

Imm. 3-mut

Aalajangersakkap atuutilerneratigut naqqup ataani qalianilu init najukkatut naatsorsuinermut ilaatinneqarsinnaapput, taakku inigisatut iluarsaanneqarsimappata, tassalu oqorsarneqarsimappata.

Imm. 4-mut

Annertussutsimik aalaakkaasumik nateqanngitsumik oqarnermi pineqartoq tassaavoq inissiami annertussuseq killiligaq, nateqarani putoqaannartoq. Assersuutigalugu inissiaq inip inissisimaffianik qulereeqarsinnaavoq qaliaqarlunilu. Qaliani teqeqqut ilaanni ineqarpoq sinaakkutinik killilerneqarsimasumik, taannalu nateqanngissinnaavoq, tassanngaanniillu inimut alakkartoqarsinnaalluni. Teqeqqoq taanna aalaakkaasumik nateqanngilaq, taamaattumillu majuartarfeqanngikkuni inissiap annertussusaata uuttortarneqarnerani ilanngunneqartussaanani.

Imm. 5-imut

Paarliit ataatsimoorussat, majuartarfiit majuartarfiillu sangoriaat annerpaamik 11 kvadratmeterimik annertussusilerlugit ilanngunneqarsinnaapput, tassalu 110 kvadratmeterit taarsigassarsititsiviusinnaasut annerpaaffissaata 10 procentiannik annertussusilerlugit. Inissiaq 110 kvadratmeterinit annertuneruppat, paarliit ataatsimoorussat, majuartarfiit majuartarfiillu sangoriaat suli annerpaamik 11 kvadratmeterimik annertussusilerneqassapput.

§ 6-imut

Aalajangersakkami imm. 1 aamma 2 najoqqutassatigut allannguuteqartinneqarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 2, imm. 3-mut aamma 4-mut assingusuupput, kiisalu imm. 3 nutaajulluni.

Imm. 1-imut

Imm. 1 najoqqutassatigut allannguuteqartinneqarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 2, imm. 3-mut aamma assingusuuvoq. Imm. 1-imi agguaqatigiisitsilluni naatsorsueriaaseq, inissiap kvadratmeterimut akiata naatsorsorneqarnerani atorneqartartoq nassuiarneqarpoq. Inissiap kvadratmeterimut akia agguaqatigiisitsilluni naatsorsueriaaseq atorlugu inissiap sananeqarnerani aningaasartuutit tamakkiisut inissiap annertussusaanut agguarnerini nassaarineqassaaq.

Imm. 2-mut

Imm. 2 Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 2, imm. 4-p assingaa. Imm. 2-mi aningaasartuutissat suut taarsigassarsiniarluni qinnuteqartup aningaasartuutissanut tamakkiisunut ilanngutissanerai aalajangersarneqarpoq. Aningaasartuutissanut aalajangersakkami taaneqartunut assersuutigalugu aningaaserivimmut taarsigassarsinermut aningaasartuutit, eqqartuussissuserisumut akiliutit, qularnaveeqqusiussaqarluni taarsigassarsinermi allakkamut ilassutip naqissuserneqarneranut nalunaarsorneqarneranullu aningaasartuutit, sanaartornermik nakkutilliinermut aningaasartuutit, aningaasartuutillu allat sanaartornermut tunngassuteqartut ilaapput. Taarsigassarsiniarluni qinnuteqartup aningaasartuutissat attuumassuteqartut tamarmik naatsorsuinermut ilanngunneqarnissaat akisussaaffigaa. Naalakkersuisut taarsigassarsinissamik neriorsuutaat taarsigassarsiniarluni qinnuteqartup aningaasartuutissat pillugit paasissutissiissutai tunngavigalugit naatsorsorneqassaaq.

Imm. 3-mut

Imm. 3 nutaajuvoq, aammalu taarsigassarsiniarluni qinnuteqartup nammineq suliaasa nalinginut tunngasuulluni. Taarsigassarsiniarluni qinnuteqartup nammineq sulinerata nalingata sanaartornermut aningaasartuutinut tamakkiisunut ilanngunneqannginnissaata toqqarneqarneranut peqqutaavoq, taarsigassarsiniarluni qinnuteqartup nammineerluni sulinera sanasut suliaattut illersorneqarsinnaanersoq nalilissallugu ajornarmat. Taamaattumik tamanna pissappat taarsigassarsisup sulinerata sanaartornermut aningaasartuutinut ilanngunneqarnermini qanoq naleqarnissaa aqussallugu ajornartussaavoq.

§ 7-imut

Aalajangersakkap najoqqutassatigut annikitsunik allannguuteqartinneqarluni Inatsisartut peqqussutaanni nr. 4-mi, 30. oktober 1998-imeersumi § 5, imm. 1, 2 aamma 4 assingai.

Imm. 1-imut

Imm. 1-ip najoqqutassatigut annikitsunik allannguuteqartinneqarluni Inatsisartut peqqussutaanni nr. 4-mi, 30. oktober 1998-imeersumi § 5, imm. 1-ip immikkoortua siulleq assingaa. Imm. 1-imi pisortanit iluarsaassinermut, pitsanngorsaanermut alliliinermullu taarsigassarsiat, katillugit 40 procentinik annertussuseqartut piffissap qanoq ilinerani tunniunneqarnissaat aalajangersarneqarpoq. Taarsigassarsisup sanaartornermut naatsorsuutit inaarutaasut inummit allamit, suliamut attuumassuteqanngitsumit suliarineqarnissaat atsiorneqarnissaallu akisussaaffigaa. Sanaartornermut naatsorsuutit, assersuutigalugu taarsigassarsisup aningaasalersuinermi siunnersortaanit, kukkunersiuisuanit, sanatitsisutut siunnersuisuanit imaluunniit sanasumit, sanaartornermik isumaginnittuusimasumit atsiorneqarsinnaapput. Taarsigassarsisup nammineerluni, imaluunniit taarsigassarsisup eqqartuussissuserisuata, aningaaseriviata taarsigassarsisumulluunniit siunnersortaasup allap Naalakkersuisut taarsigassarsiarititaannut qularnaveeqqutitut qularnaveeqqusiussaqarluni taarsigassarsinermut allagartap suliarineqarnissaa, tamatuma ataani qularnaveeqqusiussatut allagartap Akileraarnermut Pisortaqarfimmit naqissuserneqarnissaa aammalu Kalaallit Nunaanni eqqartuussiviup nalunaarsuisarfianut nalunaarsorneqarnissaa isumagissavaa, tamatumalu kingorna qularnaveeqqusiussaqarluni taarsigassarsinermut allagartap naqeqqaarnera Naalakkersuisunut, taanna tunngavigalugu taarsigassarsianik tunniussisussanut nassiutissallugu. Kiisalu taarsigassarsisup inissiap sillimmaserneqarnissaa, aammalu sillimmasiissutip qularnaveeqqusiussamik piginnittup nalunaarutaani allanneqarnissaa isumagissavaa, tamatumalu kingorna taarsigassarsisup sillimmasiisarfia inissiamut sillimmasiissut assersuutigalugu piginnittut nikinnerisa imaluunniit sillimmasiissummut akiitsoqarnerup kingunerisaanik taamaatinneqarpat, tamanna pillugu Naalakkersuisunut nalunaaruteqartussanngussaaq.

Nutaatut imm. 1-imi Naalakkersuisut taarsigassarsiarititaasa siusinnerpaamik piffissap qanoq ilinerani tunniunneqarsinnaanerat erseqqissarneqarpoq. Naalakkersuisut 2009-mi taarsigassarsiarititassanik neriorsuuteqarsimappata, taarsigassarsinissamik qinnuteqartup Naalakkersuisut taarsigassarsiarititassaasa tunniunneqarnissaat 2009-mut utaqqisariaqassavaa, tassani iluarsaassineq, pitsanngorsaaneq alliliinerluunniit 2008-mi naammassineqarsimagaluarpat inatsisillu malillugit atorneqalersimagaluarpat.

Imm. 2-mut

Imm. 2-p imamigut Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 5, imm. 1-ip immikkoortuata tullia assingaa. Pisortanit taarsigassarsiarititat inissiap, Kalaallit Nunaanni qularnaveeqqusiisarneq pillugu inatsit naapertorlugu nalunaarsorneqarsimasoq qularnaveeqqusiullugu qulakkeerneqassapput. Pisortanit taarsigassarsiarititat inissiap qularnaveeqqusiunneratigut qulakkeerneqarpata, pisortanit taarsigassarsiarititat tulleriaarnerisa inissisimaffissaat aalajangersakkami aalajangersarneqarput. Qularnaveeqqusiussaqarluni taarsigassarsinermut allagartami qularnaveeqqusiussamik pigisaqartup pingaarnerup akiitsut annertusissutaanik nalunaaruteqarnissamut periarfissaa allassimavoq. Kalaallit Nunaanni qularnaveeqqusiisarneq pillugu inatsit aamma qularnaveeqqusiisarneq pillugu maleruagassat nalinginnaasut tassani atuupput.

Imm. 3-mut

Imm. 3-p annikitsunik oqaasertamigut allannguuteqartinneqarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 5, imm. 2 assingaa. Aalajangersakkami pisortat taarsigassarsiarititaasa qanoq akilersorneqarnissaat nassuiarneqarpoq. Ukiuni 15-ini taarsigassarsiat akilersorneqarfissaanni erniarititassaq aalajangersimavoq. Erniarititassaq piffissamut akilersuiffiusussamut tamakkiisumut atuinissamut akuersissutip ulluata kingorna ukiuni 20-ni diskonto 3 procentpointinik ilallugu aalajangersarneqassaaq.

Imm. 4-mut

Imm. 4-p oqaasertamigut allannguuteqartinneqarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 5, imm. 4 assingaa. Aalajangersagaq Naalakkersuisut pisortanit taarsigassarsiat akilersornissaannut maleruagassanik aalajangersaasinnaanissaannut tunngaviliivoq. Piginnaatitsissut suli atorneqanngilaq. Peqqussut naapertorlugu taarsigassarsinissamut neriorsuutit siulliit 1998-imi tunniunneqarsimappata, aammalu ukiuni 15-ini erniaqaratillu akiligassaanngippata, tamatumalu kingorna 1998-imi taarsigassarsiarititaasut 2013-imi akilerneqartussanngorpata, piginnaatitsinermut aalajangersakkap piffissaq tamanna sioqqullugu atorneqannginnissaa eqqarsaatigineqarpoq. Piginnaatitsinermut aalajangersakkap atorneqarnissaata tungaanut taarsigassarsiat akilerneqartussanngortut kontomut pingaarnermut 20.10.22-mut, "isertitat allat"-nut isertitatut nalunaarsorneqassapput, tamatumalu kingorna Nunap Karsianut tutsinneqassallutik.

§ 8-mut

Aalajangersakkami imm. 1 nutaajuvoq, aammalu Inatsisartut inatsisaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 5, imm. 3-p immikkoortuanut siullermut taartaalluni. Aalajangersakkap imm. 2-a nutaajuvoq.

Imm. 1-imut

Imm. 1-imi nutaatut aalajangersarneqarpoq, pisortanit taarsigassarsiarititat piginnittut nikinneranni akiligassanngortinneqassanngitsut. Aalajangersagaq piginnittut nikinnerannut qanorluunniit ilusilinnut atuuppoq, assersuutigalugu inuinnaat akornanni, inatsisitigut pisinnaatitaasut pisussaatitaasullu akornanni piginnittut nikinnerannut imaluunniit inuinnaat inatsisitigullu pisinnaatitaasut pisussaatitaasullu akornanni piginnittut nikinnerannut.

Inatsisartut inatsisaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 5, imm. 3-p immikkoortuani siullermi malitassaq pingaarneq tassaavoq Naalakkersuisut kommunalbestyrelsillu taarsigassarsiarititaat piginnittut nikinneranni akiligassanngortinneqassasut, tamatumani Naalakkersuisut kommunalbestyrelsilu allamik aalajangigaqarsimanngippata. Suleriaaseq malillugu § 5, imm. 3-p immikkoortuata siulliup aqunneqarnerani taarsigassarsiat akiligassanngortinneqaratik piginnittut nikinnissaat akuerineqartarpoq, tamatumani piginnittut nikinnerat tunisisup inuinnaasup aammalu pisisup inatsisitigut pisinnaatitaasup pisussaatitaasullu, peqqussut malillugu atuuttunik taarsigassarsiaqareersup akornanni pisimanngippat. Maannamut suleriaasiusimasoq peqqussutissatut siunnersuummut toqqaannartumik allanneqarpoq, tassani pisortat taarsigassarsiarititaasa piginnittut nikinneranni akiligassanngortinneqartarunnaarnissaat allannguutigineqarluni, tamatumani illuatungeriit piginnittumik nikisitsiffiusut kikkuugaluarpataluunniit.

Inatsisartut peqqussutaat nr. 4, 30. oktober 1998-imeersoq, kingusinnerusukkut allannguuteqartinneqartoq naapertorlugu taarsigassarsiarititat aamma siunnersuummi aalajangersakkanut ilaatinneqarput, taamaalillunilu taakkuttaaq piginnittut nikinneranni akiligassanngortussaajunnaarlutik.

Imm. 1 piffissap qanorluunniit ilinerani piginnittut nikinnerannut atuuppoq, tassalu inissiaq sananeqartoq suli naammassinngitsoq piginnittut nikinnerat imaluunniit inissiaq naammassereersoq piginnittut nikinnerat apeqqutaatinneqarani.

Imm. 2-mut

Imm. 2-mi piginnittut nikinneranni taarsigassarsiat ataatsit arlallilluunniit Naalakkersuisut kommunalbestyrelsillu taarsigassarsiarititaannit salliutinneqartussat annertussusissaat aalajangersarneqarput. Naalakkersuisut kommunalbestyrelsillu taarsigassarsiarititaannit taamaallaat salliutinneqassapput taarsigassarsiat aammattaaq inissiaq qularnaveeqqusiullugu qulakkeerneqarsimasut. Piginnittoq nutaaq nutaanik taarsigassarsissaaq imaluunniit piginnittuusimasup taarsigassarsiai tigussallugit.

Atuuffissaa imatut assersuusiorlugu takutinneqarsinnaavoq:

Tunisisoq inissiamik 110 kvadratmeterimik, kvadratmeterimut 16.000 koruuninik akeqartumik sanasimavoq.

Inissiap sananeqarneranut aningaasartuutit tamakkiisut 1.760.000 koruuniupput, taakkunanngalu 283.500 koruunit Naalakkersuisunit taarsigassarsiaapput, aammalu 283.500 koruunit kommunalbestyrelsimit taarsigassarsiaallutik, kiisalu taarsigassarsisup aningaasartuutinit sinneruttut 1.193.000 koruuniusut taarsigassarsinermigut, amerlanertigut kreditforeninginit taarsigassarsiaasartunik, nammineerluni aningaasalersorsimavai.

Inissiap sananeqarneranit ukiut tallimat qaangiuttut piginnittup inissiaq tunivaa. Inissiaq 2.200.000 koruuninik nalilerlugu tunineqarpoq. Pisisoq piginnittut nikinnerannut atatillugu 2.200.000 koruunit 90 procentiinik kreditforeninginit nutaanik taarsigassarsinissamut periarfissaqarpoq, taakkunanngaanniillu 283.500 koruunit marluk, tassalu Naalakkersuisunit kommunalbestyrelsimillu taarsigassarsiat annertoqataat ilanngaatigineqassapput. Tassalu pisisoq kreditforeninginit annerpaamik 1.413.000 koruuninik, taakkulu Naalakkersuisunit kommunalbestyrelsimillu taarsigassarsianit salliutinneqassapput.

Pisisup nutaanik Naalakkersuisunit kommunalbestyrelsimillu taarsigassarsianit salliutinneqartussanik taarsigassarsiassaasa annerpaaffilerneqarnera ilanngunneqarpoq, piginnittut nikinneranni Naalakkersuisut kommunalbestyrelsillu qularnaveeqqusiiffigineqarnerisa ingerlaannarsinnaanera qulakkeerniarlugu.

§ 9-mut

Nr. 1-imi aamma 2-mi aalajangersakkat oqaasertamikkut annikitsunik allannguuteqartinneqarlutik Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 5, imm. 3-p immikkoortuata siulliup tulliullu assigaat, kiisalu nr. 3, 4 aamma 5 nutaajullutik.

Aalajangersakkami qanoq pisoqartillugu Naalakkersuisut kommunalbestyrelsillu taarsigassarsiarititaasa akiligassanngortinneqarsinnaanerat allassimavoq.

Nr. 1-imut
Taarsigassarsisup piffissaq eqqorlugu ernianik akilersuutinillu akiliinnginnerata kingunerisaanik taarsigassarsiat akiligassanngortinneqassapput. Taamaattumik taarsigassarsisoq taarsersukkaminik akilersuisinnaanngikkuni Naalakkersuisunut kommunalbestyrelsimulluunniit akilersuinissamik isumaqatigiissusiorsinnaanngilaq.

Kalaallit Nunaanni qularnaveeqqusiisarneq pillugu Inatsisartut inatsisaat atuuttoq malillugu piffissap naannginnerani pigisamik aalaakkaasumik qularnaveeqqusiussaqarluni taarsigassarsinermut allagartaq malillugu ernianut akilersukkanullu akiliisimassaaq, taarsigassarsisoq tamanna pillugu allakkatigut, Naalakkersuisunit kommunalbestyrelsimilluunniit nassiunneqartukkut saqqummiunneqartukkulluunniit peqquneqarnerminit kingusinnerpaamik ullut arfineq marluk qaangiunnerini ernianut akilersukkanullu akiliisimaguni. Naalakkersuisut kommunalbestyrelsilluunniit akileeqqusissutaat ullup akiliiffissap eqqortup kingorna saqqummiunneqarsimassaaq, tassanilu ersarissumik allassimassalluni, piffissarititaasup naannginnerani erniat akilersuutillu akilerneqarsimanngippata aningaasaatit akilerneqassasut. Akileeqqusissut akiitsulimmut anngutsinniarlugu Kalaallit Nunaanni inoqarfiit akornanni, aamma Kalaallit Nunaata naalagaaffeqatigiinnermilu nunat ilaasut akornanni nassiunneqassappat, akiitsullip akileeqqusissummik tigusaqarneraniit akiliinissamut piffissarititaasoq ullunik arfineq marlunnik sivisussuseqarpoq, tamatumani akileeqqusissut nalunaarasuartaatitigut atortut atorlugit akiitsulimmut nassiunneqarsimanngippat.

Nr. 2-mut
Taarsigassarsisoq pisussaavoq inissiaq illersorsinnaasumik aserfallatsaalissallugu. Taamatut oqarnermi eqqarsaatigineqarpoq, taarsigassarsisup pisariaqartitsinermi illup ilaanik taarsersuisussaanera imaluunniit iluarsaassisussaanera, tamannalu amerlanertigut soorlu qilaap ussiitsup imaluunniit igalaat ussiitsut taarsersortariaqalernerisigut pisarpoq. Kiisalu taarsigassarsisoq inissiami tulleriaaraluni aserfallatsaaliuisussaavoq, soorlu inissiap silataa pisariaqalerfiatigut qalipattartussaavaa. Suleriaaseq malillugu Naalakkersuisunit kommunalbestyrelsimillu qularnaveeqqusiussamik piginnittup misissuiffigisarneratigut nr. 2 malitsinneqarpoq, tassanilu qularnaveeqqusiussaq pigineqarnersoq aammalu aserfallatsaalineqarnersoq misissorneqartarpoq.

Nr. 3-mut
Nutaatut inissiap ikuallattoornissamut anorersuarneranilu ajoqusernissamut sillimmaserneqannginnera taarsigassarsiat akiligassanngortinneqarnissaannut tunngavigineqarsinnaalerpoq, inissiami sillimmasigaanngitsumi annertuunik ajoqusertoqassappat, Naalakkersuisut kommunalbestyrelsillu qularnaveeqqutaata annertuumik nalikillineranik kinguneqarsinnaammat. Ikuallattoornissamut anorersuarneranilu ajoqusernissamut sillimmasiinissaq pillugu piumasaqaatip sukumiinerusumik nassuiarneqarneranut § 17-imut oqaaseqaatit innersuunneqarput.

Nr. 4-mut
Nr. 4 naapertorlugu nutaatut inissiamik attartortittakkamik namminersortunit pigineqartumik attartortitsinermi, taarsigassarsisup aningaasartuutit malillugit attartornermut akiliutissamit qaffasinnerusumik akeqartitsilluni attartortitsinera taarsigassarsiat akiligassanngortinneqarnerinut tunngavigineqarsinnaalerpoq. Tamanna tunngavigalugu taarsigassarsisoq annerpaamik aningaasartuutit naapertorlugit attartortitsinermut akigititassaq, inissianik attartortitsisarneq pillugu Inatsisartut peqqussutaanni nr. 2-mi, 12. maj 2005-imeersumi aalajangersarneqartoq taarsigassarsisup aningaasalersuinermut aningaasartuutai uppernarsarneqarsimasut, ingerlatsinermut aningaasartuutai uppernarsarneqarsimasut aammalu inissiap teknikkikkut aningaasaqarnikkullu nalinganut erniarititat, diskontop affaanik naleqartut pillugit aalajangersarneqartut tunngavigalugu annertussusilertussaavaa.

Kiisalu pisortat inissiaataannik attartortittakkamik, taasigassarsisut sinnerisa inissiamut aningaasartuutaannit qaffasinnerusumik akeqartitsilluni attartortitsineq taarsigassarsiat akiligassanngortinneqarnerinut tunngavigineqarsinnaalerpoq. Tassalu taarsigassarsisup inissiaq aki, ilaatigut taarsigassarsisup aningaasaatinut iluanaarutissanut aningaasartuutaanut kiisalu ingerlatsinermut atatillugu, tassungalu ilanngullugu allaffissornermut akiliummut aningaasartuutinut ilaatitsiffiusoq atorlugu attartortissinnaavaa.

Inissianik attartortitsisarneq pillugu Inatsisartut peqqussutaanni pisortat namminersortullu inissiaataanni attartortittakkani attartornermut akiliut allanngortinneqarpat, siunnersuummi matumani nr. 4-mi innersuussutaasoq inissianik attartortitsisarneq pillugu Inatsisartut peqqussutaanni pisortat namminersortullu inissiaataanni attartortittakkani attartornermut akiliutip naatsorsorneqartarnera pillugu maleruagassanut sukkulluunniit atuuttunut innersuussutitut paasineqassaaq.

Ineqarnermut akiliutip aalajangersarneqartarnera pillugu attartortitsinermut peqqussummi aalajangersakkani pineqaatissiisinnaanissaq pillugu aalajangersaanissaq immikkut pisariaqartutut isumaqarfigineqarpoq, siunnersuummi matumani Naalakkersuisut kommunalbestyrelsilu taarsigassarsititsisutut ineqarnermut akiliutip attartortitsinermut peqqussummi ineqarnermut akiliummik aalajangersaasarneq pillugu maleruagassat uniorneqarnerat uparuarsinnaammassuk, kiisalu attartortitsinermut peqqussummi attartortup ineqarnermut akiliutip annertussilernerani attartornermut peqqussummi tamanna pillugu aalajangersakkat uniorneqarnerat saqqummiussinnaallugu.

Kiisalu Naalakkersuisut kommunalbestyrelsilu taarsigassarsititsisutut taarsigassarsisumut attartortitsisumullu, akit naapertuutinngilluinnartut atorlugit inissiaatiminnik attartortitsisumut pineqaatissiisinnaanissat kissaatiginarpoq.

Nr. 5-imut
Naalakkersuisut kommunalbestyrelsilu taarsigassarsisoq inissiami najukkamini inuussutissarsiummik ingerlataqassanersoq pillugu suliamut tunngatillugu naliliisassapput. Tamatumanissaaq siunnersuummi § 1, imm. 2-mut oqaaseqaatit innersuunneqarput.

§ 10-mut

Aalajangersakkami imm. 1-ip aamma 2-p najoqqutassatigut arlalinnik allannguiffigineqarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 9, imm. 1 aamma § 2, imm. 4 assingai, kiisalu imm. 3 nutaajulluni.

Imm. 1-imut

Imm. 1-ip najoqqutassatigut allannguuteqartinneqarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 9 imm. 1 assingaa. Aalajangersakkami Naalakkersuisut iluarsaassinermut, pitsanngorsaanermut alliliinermullu taarsigassarsititsisinnaanerat aalajangersarneqarpoq, nutaatullu aamma inissianik pioreersunik alliliinissaq ilanngunneqarluni. Tassani Naalakkersuisut taarsigassarsititsinissaat kisimi periarfissaavoq.

Inuinnaat inissiamik pigisaqartut piffissamilu pineqartumi inissiami tassani najugaqartut tamarmik taarsigassarsinissamik qinnuteqarsinnaapput. Tassani aamma assersuutigalugu inissiat, attartortumiit piginnittumut aaqqissuussineq malillugu tiguneqarsimasut pineqarput, tak. Namminersornerullutik Oqartussat kommunillu inissiaataasa attartortittakkat inissiatut nammineq pigisatut allanngortinneqartarnerat pillugu Inatsisartut peqqussutaanni maleruagassat.

Kisiannili BSU-mit taarsigassarsilluni illuutilik, akilersukkaminik taarsigassarsiaqartoq iluarsaassinissamut, pitsanngorsaanissamut alliliinissamullu taarsigassarsinissamik qinnuteqarsinnaanngilaq, BSU-mit taarsigassarsilluni illuliaq akilersorneqartunik taarsigassarsiviusimasoq inissiatut nammineq pigisavittut inissisimanngimmat, tak. inissialiortiternermut tapersiissuteqartarneq pillugu Inatsisartut peqqussutaanni maleruagassat. Taarsigassarsiat akilersorneqartut tassaapput taarsigassarsiat, piginnittoq akilinngitsuukkaminik akiitsoqaraluarpat akiitsoqanngikkaluarpalluunniit, aammalu taarsigassarsiat inissialiortiternermut tapersiissuteqartarneq pillugu Inatsisartut peqqussutaanni maleruagassat malillugit allanngortinneqarsimagaluarpataluunniit suli ingerlasut, taamaattumillu piginnittoq taarsersukkaminut akiliisanngikkaluarpalluunniit piffissamut sinneruttumut nalikillineqartarput.

Imm. 2-mut

Imm. 2 Inatsisartut peqqussutaanni nr. 4-mi, 30. oktober 198-imeersumi, kingusinnerusukkut allannguuteqartinneqartumi § 2, imm. 4-p assingaa. Imm. 2-mi aningaasartuutissat suut taarsigassarsiniarluni qinnuteqartup aningaasartuutissanut tamakkiisunut ilanngutissanerai aalajangersarneqarpoq. Aningaasartuutissanut aalajangersakkami taaneqartunut assersuutigalugu aningaaserivimmut taarsigassarsinermut aningaasartuutit, eqqartuussissuserisumut akiliutit, qularnaveeqqusiussaqarluni taarsigassarsinermi allakkamut ilassutip naqissuserneqarneranut nalunaarsorneqarneranullu aningaasartuutit, sanaartornermik nakkutilliisoqassappat tassunga aningaasartuutit, aningaasartuutillu allat iluarsaassinermut, pitsanngorsaanermut alliliinermullu tunngassuteqartut ilaapput. Taarsigassarsiniarluni qinnuteqartup aningaasartuutissat attuumassuteqartut tamarmik naatsorsuinermut ilanngunneqarnissaat akisussaaffigaa. Naalakkersuisut taarsigassarsinissamik neriorsuutaat taarsigassarsiniarluni qinnuteqartup aningaasartuutissat pillugit paasissutissiissutai tunngavigalugit naatsorsorneqassaaq.

Imm. 3-mut

Imm. 3 nutaajuvoq, aammalu taarsigassarsiniarluni qinnuteqartup nammineq suliaasa nalinginut tunngasuulluni. Taarsigassarsiniarluni qinnuteqartup nammineq sulinerata nalingata sanaartornermut aningaasartuutinut tamakkiisunut ilanngunneqannginnissaata toqqarneqarneranut peqqutaavoq, taarsigassarsiniarluni qinnuteqartup nammineerluni sulinera sanasut suliaattut illersorneqarsinnaanersoq nalilissallugu ajornarmat. Taamaattumik tamanna pissappat taarsigassarsisup sulinerata sanaartornermut aningaasartuutinut ilanngunneqarnermini qanoq naleqarnissaa aqussallugu ajornartussaavoq.

§ 11-mut

Aalajangersagaq nutaajuvoq, tassanilu Naalakkersuisut iluarsaassinissamut pitsanngorsaanissamullu taarsigassarsititsisarnerannut killissarititaasut saqqummiunneqarput. Aalajangersakkap Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 9, imm. 4 taarserpaa, taannalu Naalakkersuisut iluarsaassinermut pitsanngorsaanermullu maleruagassanik sukumiinerusunik aalajangersaasinnaanerannut tunngavissanik imaqarpoq.

Imm. 1-imut

Imm. 1-imi iluarsaassinissamut pitsanngorsaanissamullu taarsigassarsinissamik qinnuteqarnermi piumasaqaataasut aalajangersarneqarput. Piffissaq qinnuteqarfiusoq tassaavoq piffissaq qinnuteqaatip Naalakkersuisunit tiguneqarfia aammalu allakkatut isertinneqarfia.

Pisoqaassusissamut kvadratmeterinullu killiliussanut siunertaasoq tassaavoq, taarsigassarsiat illunut minnerusunut pisoqaanerusunullu, iluarsaanneqarnissamut pitsanngorsarneqarnissamullu pisariaqartitsiviorpiartunut siunnerfeqarnissaat, kiisalu illunik nutaanerusunik piginnittut iluarsaassinernut pitsanngorsaanernullu aningaasalersuisinnaassuseqarnissaasa naatsorsuutigineqarnera.

Imm. 2-mut

Imm. 2-mi iluarsaassinernut pitsanngorsaanernullu taarsigassarsititsiviusinnaasunut assersuutit arlallit saqqummiunneqarput. Assersuutini takutinneqartutut iluarsaassinerit pitsanngorsaanerillu taarsigassarsititsiviusinnaasut inissiami atortunut tunngaviusunut tunngasuunerusarput. Taamaattumik igaffik nutaanngitsuusimanngippat atoruminaatsuusimanngippallu, aammalu igaffik nutaaq nalinginnaasuussanngippat inuulluataarniutaasunillu atortulersuutinik ilalerneqarpat nutaamik igaffittaarnissamut taarsigassarsisoqarsinnaassanngilaq. Pisulli ilaanni taamatut taarsersuinissaq suliassat aalajangersakkami ilaatinneqartut suliarineqarnerinut atatillugu pisinnaavoq. Assersuutigalugu eqqiluisaarnermut atortunik taarsersuineq ikkussuinerluunniit inissiap imermut igitassamut kuuffiata suliarineqarneranut atatillugu pisinnaavoq, taamaalillunilu suliassanut taakkununnga taarsigassarsititsisoqarsinnaalluni.

Ataatsimut isigalugu iluarsaassinernut pitsanngorsaanernullu inuulluataarniutinik atortoqartunut taarsigassarsititsisoqarsinnaanngilaq, soorlu uffarfinnik supoortulinnik, saunanik, igaffinnik akisuunik, uffarfinnik akisuunik aammalu atortulersuutinik immikkut ittunik akisuunik. Naggataagulli suliamut aalajangersimasumut naliliineq tunngavigalugu Naalakkersuisut aalajangiisussaapput.

§ 12-imut

Aalajangersagaq nutaajuvoq, tassanilu Naalakkersuisut inissianik pioreersunik alliliinissamut taarsigassarsititsisarnerannut killissarititaasut saqqummiunneqarput. Pisoqaassusissamut kvadratmeterinullu killiliussanut siunertaasoq tassaavoq, taarsigassarsiat illunut minnerusunut pisoqaanerusunullu, alliliiffigineqarnissaminnut pisariaqartitsiviorpiartunut siunnerfeqarnissaat.

Kvadratmeterinut killiliussat marluk atorneqarput, tassalu inissiaq allilerneqannginnermini annerpaamik 95 kvadratmeteriusussaavoq, aammalu allilerneqareernermi annerpaamik 110 kvadratmeteriusussaalluni. Inissiap angissusaa killiliussat taakku uniorsimappatigik, alliliinissamut taarsigassarsititsisoqarsinnaanngilaq. Tamatumani soorunami taarsigassarsisup nammineerluni alliliinermut tamarmiusumut aningaasalersuinissaa akornusersimaneqanngilaq.

Kvadratmeterimut killiliussinermi siunertaasoq tassaavoq, taarsigassarsiat inissianut minnerusunut pisoqaanerusunullu, angissutsimikkut killeqarnertik peqqutigalugu alliliiffigineqarnissaminnut pisariaqartitsiviorpiartunut siunnerfeqarnissaat. Aalajangersagaq pingaartumik inissianut nutaanngitsunut amerlanertigullu mikisuusartunut, soorlu namminerisamik aningaasalersorlugit imaluunniit inissialiortiternermut tapersiissuteqartarneq aqqutigalugu sananeqarsimasunut, kisiannili pisortanit taarsigassarsiat akilerneqareersimanerat peqqutigalugu aaqqissuussinermit peerneqarsimasunut tunngatinneqarpoq.

§ 13-imut

Aalajangersakkami imm. 2-4 najoqqutassatigut arlalinnik allannguuteqartinneqarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 9, imm. 2-p aamma 3-p assingai. Imm. 1, 5 aamma 6 nutaajupput.

Imm. 1-imut

Imm. 1 nutaajuvoq, tassanilu Naalakkersuisut iluarsaassinermut, pitsanngorsaanermut alliliinermullu annerpaamik 283.500 koruuninik taarsigassarsititsisinnaanerat aalajangersarneqarpoq. Taamaattumik taarsigassarsisup taarsigassarsitinneqarsinnaassaguni aningaasartuutai tamakkiisut 708.750 koruuniussapput, taakkunanngalu 40 procentit imaluunniit 283.500 koruunit Naalakkersuisunit taarsigassarsiarititaassapput.

Imm. 2-mut

Imm. 2-p Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 9, imm. 2 assingaa. Aalajangersakkap atuutilerneratigut taarsigassarsisup nammineerluni taarsigassarsiarititat saniatigut aningaasartuutissat tamaasa aningaasalersortartussanngussavai. Tassani taarsigassarsisup aningaasartuutissat sinnerisa qanoq iliorluni aningaasalersussanerai piumasaqaatigineqanngilaq. Tamanna aningaasanik nammineq akiliinikkut, aningaaserivimmit taarsigassarsinikkut imaluunniit realkredittimit taarsigassarsinikkut pisinnaavoq.

Imm. 3-mut

Imm. 3 imamigut Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 9, imm. 3-p immikkoortuata siulliup assingaa. Taarsigassarsiat erniaqartinneqanngillat akilersugassaanatillu, tamatumanilu aamma siunertaanngilaq Naalakkersuisut taarsigassarsiarititaasa siunissami piffissap aalajangersimasup ingerlanerani akilersorneqarnissaat, taamatullu Naalakkersuisut kommunalbestyrelsillu inissianik nutaanik aningaasalersuinissamut taarsigassarsiarititaat pineqarlutik.

Imm. 4-mut

Imm. 4 najoqqutassatigut annikitsunik allannguuteqartinneqarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 9, imm. 3-p immikkoortuata tulliata assingaa. Inatsisitigut inissisimaneq maannamut atuuttoq ingerlateqqinneqarpoq, taamaattumillu taarsigassarsiarititat tunngaviusumik piginnittut nikinneranni akiligassanngortinneqartassallutik. Maannali peqqussutip oqaasertaanni toqqaannartumik allassimalerpoq aappariit akornanni piginnittut nikinneranni Naalakkersuisut taarsigassarsiarititaat akiligassanngortinneqassanngitsut, tamannalu maannamut periaasiusumut naapertuuppoq. Kiisalu taarsigassarsititsisoq pisuni allani piginnittut nikinneranni taarsigassarsiat akiligassanngortinneqannginnissaannik aalajangiisinnaavoq. Tamatumani pingaartumik taarsigassarsisoq toqusimappat, aammalu taarsigassarsisup aapparisaata inissiami najugaqaannarnissani toqqarpagu piginnittut nikinnerat pineqarpoq. Tamanna aappariit akornanni piginnittut nikinnerannut, taamaallaat aappariit suli inuusut akornanni piginnittut nikinnerannut tunngasuusumut toqqaannartumik attuumassuteqanngilaq.

Imm. 5-imut

Imm. 5 nutaajuvoq, tassanilu inissiamut ataatsimut iluarsaassinissamut, pitsanngorsaanissamut alliliinissamullu ataasiinnarnik taarsigassarsititsisoqarsinnaanera aalajangersarneqarpoq. Kingusinnerusukkut piginnittut nikikkaluarpaluunniit tamanna atuutissaaq. Taamaattumik iluarsaassinissamut, pitsanngorsaanissamut alliliinissamullu arlalinnik taarsigassarsisoqarsinnaanngilaq. Aalajangersakkami tamatumani Naalakkersuisut kisimik inissiami iluarsaassinernut annertunerusunut, pitsannguinernut annertunerusunut kiisalu alliliinernut taarsigassarsititsinermikkut aningaasalersuisinnaanerat siunertarineqarpoq. Tassani piginnittup inissiami aserfallatsaaliuinermut ingerlaavartumut aningaasartuutaanut Naalakkersuisut taarsigassarsititsisinnaanerat pineqanngilaq. Tamatumunnga aningaasartuutit piginnittup nammineerluni akilertariaqarpai. Siusinnerusukkut peqqussutit oqaasertaani piginnittup qanoq akulikitsigisumik iluarsaassinissamut, pitsanngorsaanissamut alliliinissamullu Naalakkersuisunit taarsigassarsisinnaanerat allassimanngilaq, taamaattumillu taarsigassarsisarnermi aaqqissuussinerup aqunneqarnerani nalorninartorsiortitsisarsimalluni. Nalornissuteqartarneq tamanna iluarsiiffiginiarlugu maanna peqqussutip oqaasertaani tamanna toqqaannartumik erseqqissarneqarpoq.

§ 14-imut

Aalajangersagaq nutaajuvoq, aammalu maannamut suleriaasiusut inatsisillu akornanni naapertuuttunngortitsinissaq pilersinniarlugu ikkutaalluni.

Imm. 1-imut

Aalajangersakkami iluarsaassinermut, pitsanngorsaanermut alliliinermullu taarsigassarsiat piffissap qanoq ilinerani tunniunneqarnissaat aalajangersarneqarpoq.

Taarsigassarsisup sanaartornermut naatsorsuutit inaarutaasut inummit allamit, suliamut attuumassuteqanngitsumit suliarineqarnissaat atsiorneqarnissaallu akisussaaffigaa. Sanaartornermut naatsorsuutit, assersuutigalugu taarsigassarsisup aningaasalersuinermi siunnersortaanit, kukkunersiuisuanit, sanatitsisutut siunnersuisuanit imaluunniit sanasumit, sanaartornermik isumaginnittuusimasumit atsiorneqarsinnaapput. Taarsigassarsisup nammineerluni, imaluunniit taarsigassarsisup eqqartuussissuserisuata, aningaaseriviata taarsigassarsisumulluunniit siunnersortaasup allap Naalakkersuisut taarsigassarsiarititaannut qularnaveeqqutitut qularnaveeqqusiussaqarluni taarsigassarsinermut allagartap suliarineqarnissaa, tamatuma ataani qularnaveeqqusiussatut allagartap Akileraarnermut Pisortaqarfimmit naqissuserneqarnissaa aammalu Kalaallit Nunaanni eqqartuussiviup nalunaarsuisarfianut nalunaarsorneqarnissaa isumagissavaa, tamatumalu kingorna qularnaveeqqusiussaqarluni taarsigassarsinermut allagartap naqeqqaarnera Naalakkersuisunut, taanna tunngavigalugu taarsigassarsianik tunniussisussanut nassiutissallugu. Kiisalu taarsigassarsisup inissiap sillimmaserneqarnissaa, aammalu sillimmasiissutip qularnaveeqqusiussamik piginnittup nalunaarutaani allanneqarnissaa isumagissavaa, tamatumalu kingorna taarsigassarsisup sillimmasiisarfia inissiamut sillimmasiissut assersuutigalugu piginnittut nikinnerisa imaluunniit sillimmasiissummut akiitsoqarnerup kingunerisaanik taamaatinneqarpat, tamanna pillugu Naalakkersuisunut nalunaaruteqartussanngussaaq.

Nutaatut imm. 1-imi Naalakkersuisut taarsigassarsiarititaasa siusinnerpaamik piffissap qanoq ilinerani tunniunneqarsinnaanerat erseqqissarneqarpoq. Naalakkersuisut 2009-mi taarsigassarsiarititassanik neriorsuuteqarsimappata, taarsigassarsinissamik qinnuteqartup Naalakkersuisut taarsigassarsiarititassaasa tunniunneqarnissaat 2009-mut utaqqisariaqassavaa, tassani iluarsaassineq, pitsanngorsaaneq alliliinerluunniit 2008-mi naammassineqarsimagaluarpat inatsisillu malillugit atorneqalersimagaluarpat.

Imm. 2-mut

Alliliinernut taarsigassarsiat tunniunneqarnissaannut aammattaaq atuilernermut uppernarsaat piumasarineqarpoq, taannalu alliliinerup naammassineqarsimaneranut alliliinerullu illuliornermut inatsisit atuuttut malillugit suliarineqarsimaneranut qulakkeerissutaasussaavoq.

§ 15-imut

Aalajangersagaq nutaajuvoq, akiligassanngortitsinissamullu tunngaviusussanik tallimanik imaqarluni.

Nr. 1-imut
Aalajangersakkami nr. 1-imi allassimavoq, inissiap aserfallatsaalineqarsimannginnera peqqutaalluni Naalakkersuisut qularnaveeqqusiussaqarluni taarsigassarsinermut allagartami isumannaariffigineqarnerat nalikillisimasoq paasineqarpat, Naalakkersuisut taarsigassarsiarititaat akiligassanngortinneqassasut. Inissiamik sumiginnaanermut aserfallatsaaliuinnginneq ilaavoq. Suleriaaseq malillugu Naalakkersuisunit qularnaveeqqusiussamik piginnittup misissuiffigisarneratigut aalajangersagaq malitsinneqarpoq, tassanilu qularnaveeqqusiussaq pigineqarnersoq aammalu aserfallatsaalineqarnersoq misissorneqartarpoq.

Nr. 2-mut
Aalajangersakkami nr. 2-mi allassimavoq, inissiaq Naalakkersuisunit iluarsaassinermut, pitsanngorsaanermut alliliinermulluunniit taarsigassarsititsivigineqarsimasoq ikuallattoornissamut anorersuarneranilu ajoqusernissamut sillimmaserneqarsimanngippat, tamatuma kingunerisaanik taarsigassarsiat akiligassanngortinneqassasut. Ikuallattoornissamut anorersuarneranilu ajoqusernissamut sillimmasiinissamut piumasaqaatinut nassuiaatit sukumiinerusut pillugit siunnersuummi § 17-imut oqaaseqaatit innersuunneqarput.

Nr. 3-mut
Imm. 3 naapertorlugu inissiamik attartortitsinermi taarsigassarsisoq aningaasartuutit naapertorlugit attartortitsinermut akigititaassaq sinnerlugu akeqartitsilluni attartortitsippat, tamanna nutaatut taarsigassarsiat akiligassanngortinneqarnissaannut tunngaviusussanngorpoq. Tamanna tunngavigalugu taarsigassarsisoq annerpaamik aningaasartuutit naapertorlugit attartortitsinermut akigititassaq, inissianik attartortitsisarneq pillugu Inatsisartut peqqussutaanni taarsigassarsisup aningaasalersuinermut aningaasartuutai uppernarsarneqarsimasut, ingerlatsinermut aningaasartuutai uppernarsarneqarsimasut aammalu inissiap teknikkikkut aningaasaqarnikkullu nalinganut erniarititat, diskontop affaanik naleqartut pillugit aalajangersarneqartut tunngavigalugu annertussusilertussaavaa.

Inissianik attartortitsisarneq pillugu Inatsisartut peqqussutaanni inissianik attartortittakkanik namminersortunit pigineqartunik attartortitsinermi aningaasartuutit naapertorlugit akeqartitsisarnermut aalajangersakkat allanngortinneqarpata, siunnersuummi matumani nr. 4-mi innersuussutaasoq inissianik attartortitsisarneq pillugu Inatsisartut peqqussutaanni inissianik attartortittakkanik namminersortunit pineqartunik attartortitsinermut akiliutip naatsorsorneqartarnera pillugu maleruagassanut sukkulluunnit atuuttunut innersuussutitut isigineqassaaq.

Nr. 4-mut
Naalakkersuisut kommunalbestyrelsillu taarsigassarsisoq inissiami najukkamini inuussutissarsiummik ingerlatsisinnaanersoq naliliiffigisartussanngorpaat. Tamatumanissaaq siunnersuummi § 1, imm. 2-mut oqaaseqaatit innersuunneqarput.

Nr. 5-imut
Aalajangersakkami nr. 5-imi allassimavoq Naalakkersuisut iluarsaassinermut, pitsanngorsaanermut alliliinermulluunniit taarsigassarsiarititaat taarsigassarsisup inissiaq qimallugu nuunnerani akiligassanngortinneqassasut. Tassalu tamatumani taarsigassarsiat akiligassanngortinneqassanngippata piumasaqaatigineqarpoq, taarsigassarsisup piffissami pineqartumi inissiami taarsigassarsiffigisamini najugaqarnissaa. Taamaalillunissaaq taarsigassarsisup inissiaq pigigaluaraa, taarsigassarsisup taarsigassarsiat ingerlaannarnissaat kissaatigiguniuk taarsigassarsisup inissiaatiminik attartortitsinissaa akornuserneqarpoq.

Nalinginnaasumik inissiat amerlasuut inoqutigiinni inummit ataatsimit pigineqartarput, inoqutaasut sinneri inissiami najugaqartutut inuit allattorsimaffianni nalunaarsorneqarsimasarlutik, inissiamik piginnittutut nalunaarsorneqarsimanngikkaluarlutik. Aalajangersagaq malillugu Naalakkersuisut taarsigassarsiarititaat akiligassanngortinneqassapput, inoqutigiinni inissiamik piginnittutut nalunaarsorneqarsimasoq inissiaq qimallugu nuuppat, inoqutaasullu sinneri inissiami najugaqaannarpata. Siunnersuummi § 13, imm. 4-mi aalajangersagaq, taarsigassarsisup piginnittut nikinneranni taarsigassarsiat akiligassanngortinneqannginnissaannik aalajangiisinnaaneranut tunngasoq pingaartumik piginnittup plejehjemmimut nuunnerani, aammalu piginnittup katissimanagu inooqataata imaluunniit piginnittup meeraasa angerlarsimaffimmi najugaqartut inissiamik tigusisussanngorneranni atorneqarsinnaasutut eqqarsaatigineqarpoq. Tamannattaaq piginnittup inooqatigiinnermik kipisinerani, aammalu tamatumunnga atatillugu piginnittup inooqatigisimasaata inissiamik tigusinerani atuutissaaq.

§ 16-imut

Aalajangersagaq najoqqutassatigut arlalinnik allannguuteqarluni aammalu oqaasertaasigut allannguuteqalaarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 8-mut assingusuuvoq.

Imm. 1-imut

Imm. 1 Inatsisartut peqqussutaanni nr. 4-mi, 30. oktober 1998-imi, kingusinnerusukkut allannguuteqartinneqartumi § 8, imm. 1-ip assingaa, tassanili ilassutigineqarpoq maanna piginnittup inissiamik pioreersumik iluarsaassinissamut, pitsanngorsaanissamut alliliinissamullu taarsigassarsinermini piginnittup inissiamik illersorsinnaasumik aserfallatsaaliuinissamut pisussaaffilerneqarnissaa. Illersorsinnaasumik aserfallatsaaliuinermik oqarnermi eqqarsaatigineqarpoq, taarsigassarsisup illup ilaanik taarsersuisussaanera imaluunniit iluarsaassisussaanera, tamannalu amerlanertigut soorlu qilaap ussiitsup imaluunniit igalaat ussiitsut taarsersortariaqalernerisigut pisarpoq. Kiisalu taarsigassarsisoq inissiami tulleriiaaraluni aserfallatsaaliuisussaavoq, soorlu inissiap silataa pisariaqalerfiatigut qalipattartussaavaa. Tunngaviatigut taarsigassarsisup nammineerluni taarsersuinissaq iluarsaassinissarluunniit pisariaqarnersoq aalajangertartussaavaa. Tamatumanili inissiamik aserfallatsaaliuinnginnerup kingunerisaanik taarsigassarsisup qularnaveeqqusiussaqarluni taarsigassarsinermut allagartaata nalinga annertuumik nalikillippat imaluunniit sumiginnarneqarpat, taarsigassarsiat akiligassanngortinneqassapput.

Taamaalilluni taarsigassarsititsisoq naggataatigut aalajangiisuussaaq, qanoq ilinerani inissiaq illersorsinnaasumik aserfallatsaaliorneqarunnaarnersoq.

Imm. 2-mut

Imm. 2 oqaasertamigut annikitsunik allannguuteqartinneqarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 8, imm. 2-p assingaa, aammalu inatsisitigut inissisimanermik atuuttumik ingerlatitseqqiffiulluni. Inissiap iluani allannguineq, taarsigassarsisup illuliornermut maleruagassani peqqussutit, nunaminertanik atuineq pilersaarusiornerlu pillugit Inatsisartut peqqussutaat tunngavigalugu suliarineqarsimasut naapertorlugit suliarissappagu allannguineq sanasut suliaattut isumannaassuseqassaaq.

§ 17-imut

Aalajangersagaq nutaajuvoq, aammalu taarsigassarsisoq minnerpaamik inissiaatiminik ikuallattornissamut anorersuarneranilu ajoqusernissamut sillimmasiinissaanik pisussaaffilerneqartartussanngorpoq, tamatumani taarsigassarsisoq inissiamik nutaamik imaluunniit inissiamik pioreersumik iluarsaassinissamut, pitsanngorsaanissamut alliliinissamulluunniit aningaasalersuinissamut taarsigassarsinersoq apeqqutaatinneqarani. Taamaalilluni taarsigassarsisup nammineerluni annertunerusumik atuuffilimmik sillimmasiissanerluni aalajangersinnaalerpaa.

Taarsigassarsisup minnerpaamik ikuallattoornissamut anorersuarneranilu ajoqusernissamut sillimmasiisussaaneranik piumasaqaateqarneq, taarsigassarsisup inissiamik qularnaveeqqusiussaqarluni taarsigassarsinissamut allagartamik qulakkeerinissamut soqutigisaqarnissaa tunngavigineqarpoq. Ikuallattoornissamik anorersuarneranilu ajoqusernissamik oqarnermi sillimmasiissut, pigisap aalaakkaasup ikuallattoornissamut anorersuarneranilu ajoqusernissamut sillimmasiissutaasartoq nalinginnaasoq eqqarsaatigineqarpoq.

§ 18-imut

Aalajangersagaq nutaajuvoq.

Imm. 1-imut

Nutaatut imm. 1-imi Naalakkersuisut kommunalbestyrelsillu pisortanit taarsigassarsiarititat tamakkiisut 0,5 procentiinik sulinermut akitsuummik akiliisitsisinnaanerannut inatsisitigut tunngavissamik ikkussisoqarpoq. Taamaalilluni inissiamik nutaamik aningaasalersuinissamut taarsigassarsinissamik qinnuteqaammik suliaqarnermi akitsuut 0,5 procentiusoq annerpaamik (2 x 283.500 kr.) = 2.835 koruuninik annertussuseqassaaq, kiisalu iluarsaassinissamut, pitsanngorsaanissamut alliliinissamullu taarsigassarsinissamik qinnuteqaammik suliaqarnermi akitsuut 0,5 procentiusoq annerpaamik 283.500 koruunit = 1.417,50 koruuninik annertussuseqassalluni.

Suliarinninnermut akitsuutip annertussusissaanut pisortanit taarsigassarsiat inaarutaasut annertussusaat apeqqutaasassaaq, tunngaviusumillu suliap suliarineqarnerani aningaasartuutaasimasut sinnerlugit matussutissaassallutik.

Imm. 2-mut

Aalajangersakkami taarsigassarsisup piffissap qanoq ilinerani suliarinninnermut akitsuummik Naalakkersuisunut kommunalbestyrelsimullu akiliinissaa taaneqarpoq.

§ 19-imut

Aalajangersagaq nutaajuvoq.

Imm. 1-imut

Imm. 1 Naalakkersuisut kommunalbestyrelsillu qularnaveeqqusiussaqarluni taarsigassarsinermi allagartap atsiorneqarneranut atatillugu akitsuummik 1.250 koruuninik annertussuseqartumik akiliisitsisinnaanerannut inatsisitigut tunngavissamik imaqarpoq. Siunnersuummi § 8, imm. 1 naapertorlugu piginnittut nikinneranni akiitsulik allanngortarpoq, tamatumalu nassatarisaanik qularnaveeqqusiussaqarluni taarsigassarsinermut allagartamik pioreersumik sivitsuinermut uppernarsaammik sanasoqartussaalluni. Akiitsullip sivitsuinermut uppernarsaammik suliaqartoqarnissaa akisussaaffigaa. Sivitsuinermut allagartami inissiap piginnittuata nikinnera, taamaalillunilu Naalakkersuisunut kommunalbestyrelsimullu akiitsullip allanngornera allassimassaaq. Tassanissaaq taarsigassarsiallip taarsigassarsiaanik allanngortitsinermut, kingornussassanik suliarinninnermut akileeqqusillunilu atsiornermut atatillugu qularnaveeqqusiussaqarluni taarsigassarsinermut allagartamik sivitsuinermut uppernarsaammik suliaqartoqassaaq.

Imm. 2-mut

Imm. 2-p atuutilerneratigut Naalakkersuisut kommunalbestyrelsillu tamarmik immikkut aningaaserivik ataaseq amerlanerusulluunniit qularnaveeqqusiussaqarluni taarsigassarsinermut allagartat, imm. 1-imi pineqartut atsiornissaannut, kiisalu akitsuumik 1.250 koruuniusumik, imm. 1-imi taaneqartumik akiliisitsinissamut piginnaatitsissummik tunisinnaavaat. Tamatumanili ersarippoq qularnaveeqqusiussaqarluni taarsigassarsinermut allagartap atsiornissaanut tunngaviusumik aalajangiisussaq tassaammat taarsigassarsititsisoq, tassalu Naalakkersuisut imaluunniit kommunalbestyrelsi. Tassalu inuup nammineerluni atsiornissaa kisimi aningaaserivimmit isumagineqassaaq.

§ 20-mut

Aalajangersagaq oqaasertaasigut erseqqissarneqarluni najoqqutassatigullu allannguuteqartinneqarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 10-mut assingusuuvoq.

Imm. 1-imut

Imm. 1-imi Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 10, imm. 1-ip immikkoortuanut siullermut naleqqiullugu inissianik nutaanik aningaasalersuinissamut § 4, imm. 1 naapertorlugu taarsigassarsinissamik allakkatigut qinnuteqaatit ingerlaavartumik nassiunneqartarsinnaanerat erseqqissarneqarpoq. Inatsisitigut inissisimaneq atuuttoq allannguuteqartinneqarani ingerlaannarpoq. Maannamut taarsigassarsinissamik qinnuteqaatit allaganngorlugit tuniunneqartarput, kisiannili allaganngorlugit tunniunneqartarnissaannut piumasaqaat maanna peqqussutip oqaasertaanut ilanngunneqarpoq.

Imm. 2-mut

Imm. 2 oqaasertamigut najoqqutassatigullu allannguuteqartinneqarluni § 10, imm. 1-ip immikkoortuanut 2-mut, kiisalu § 10 nr. 1-4-mut assingusuuvoq. Taasigassarsinissamik qinnuteqaammut piumasaqaatit oqaasertaat allanngortinneqarput, taamaalillutik suleriaatsimut naleqquttunngortinneqarlutik. Suliassamut nassuiaat nalinginnaasumik tassaasinnaavoq, taarsigassarsisoq ingeniørimik atorfinitsitsisimappat taassuma suliaa. Aamma sanaartugassamut aningaasartuutissanut tamakkiisunut missingersuut qinnuteqaammut ilanngunneqassaaq. Aningaasartuutissat ukiunut agguarneqarnissaat piumasaqaatigineqartarunnaarpoq. Taasigassarsisup nalinginnaasumik sanasumit neqeroorut akuerisaq ilanngussinnaavaa, imaluunniit aningaasartuutissanut tamakkiisunut naatsorsuusiornerat taarsigassarsisup aningaaserivimmit attaveqarfigisaaneersoq ilanngussinnaallugu. Kiisalu taarsigassarsisoq nammineerluni uppernarsaasiorsinnaavoq, aningaasartuutissanut tamakkiisunut nassuiaateqarfigisaminik. Taamatuttaaq taarsigassarsinissamik qinnuteqaammut nunaminertamik inniminniinermut uppernarsaat imaluunniit kommunalbestyrelsip nunaminertamik tunniussineranut uppernarsaat ilanngunneqassaaq, kiisalu nammineerluni aningaasalersuutissanik pissarsisinnaanermut uppernarsaat ilanngunneqassalluni. Nammineerluni aningaasalersuutissanut uppernarsaat amerlanertigut tassaasarpoq taarsigassarsinissamik qinnuteqartup aningaaserivianit uppernarsaat naatsoq, tassanilu taarsigassarsisup nammineq aningaasalersuutissaminik pissarsisinnaanissamut periarfissaqarnera allassimasarpoq, tak. § 4, imm. 4. Kiisalu qinnuteqaammut qinnuteqartup kinaaneranut ersarissoq ilanngunneqassaaq. Qinnuteqartoq inuinnaappat qinnuteqartup cpr. normua qinnuteqaammut ilanngunneqassaaq, kiisalu qinnuteqartoq inatsisitigut pisinnaatitaasuuppat pisussaatitaasuuppallu qinnuteqartup GE-normua, SE-normua, CVR-normua imaluunniit kinaassutsimut uppernarsaat ersarissoq taakkununnga assingusoq ilanngunneqassaaq.

Imm. 3-mut

Imm. 3 Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 10, imm. 2-imut najoqqutassatigut allannguuteqartinneqarluni assingusuuvoq. Imm. 3-mi Naalakkersuisut kommunalbestyrelsilu immikkoorlutik § 4 imm. 1 naapertorlugu taarsigassarsinissamik qinnuteqaatinut isummersinnaanerat aalajangersarneqarpoq. Taamaalilluni pisortanit taarsigassarsititsisartut immikkoorlutik taarsigassarsinissamik qinnuteqaatini sanaartornermut aningaasartuutit tapiiffigineqarsinnaatitaasut 20 procentiinik taarsigassarsititsinissaminnut tunngatillugu suliaqartalissapput. Qinnuteqaatit imminnut attuumassuteqanngitsumik suliarineqartassapput, taamaattumillu assersuutigalugu qinnuteqaat Naalakkersuisunit itigartitsissutigineqarpat, tamanna taarsigassarsinissamik qinnuteqaatip kommunalbestyrelsimit suliarineqarneranut sunniuteqassanngilaq, aammalu paarlattuanik pisoqassalluni.

Naalakkersuisut kommunalbestyrelsillu qinnuteqaammik suliarinninneranni suliassamut nassuiaatit, suliassanut aningaasartuutissanut tamakkiisunut missingersuutit, kiisalu qinnuteqartup nammineerluni aningaasaliissutiminik pissarsisinnaaneranut uppernarsaat immikkut ittumik pingaartinneqassapput.

§ 21-mut

Aalajangersagaq oqaasertaasigut erseqqissarneqarluni najoqqutassatigullu allannguuteqartinneqarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 11-mut assingusuuvoq.

Imm. 1-imut

Imm. 1 Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 11, imm. 1-imut assingusuuvoq. Inatsisitigut inissisimaneq atuuttoq allannguuteqartinneqarani ingerlaannassaaq. Maannamut taarsigassarsinissamik qinnuteqaatit allaganngorlugit tuniunneqartarput, kisiannili allaganngorlugit tunniunneqartarnissaannut piumasaqaat maanna peqqussutip oqaasertaanut ilanngunneqarpoq.

Nutaatut inissiamik pioreersumik alliliinissamut taarsigassarsinissamik qinnuteqartoqarsinnaalerpoq.

Imm. 2-mut

Imm. 2-mi taarsigassarsinissamik qinnuteqaammut suut ilanngunneqassanersut aalajangersarneqarpoq. Taarsigassarsinissamut qinnuteqaammut piumasaqaatit oqaasertaliornerat allanngortinneqarpoq, taamaalilluni suleriaatsimut naapertuuttunngortinneqarlutik. Taarsigassarsinissamik qinnuteqaammut iluarsaassinissamut, pitsanngorsaanissamut alliliinissamullu kissaatigisanut nassuiaatit ilanngunneqassapput. Nassuiaat tassaasinnaavoq taarsigassarsisoq ingeniørimik siunnersortaasumik atorfinitsitsisimappat taassuma nassuiaasiaa. Nassuiaat aamma pappiaqqamut allanneqarsinnaavoq, tassanilu taarsigassarsisup soorlu pitsanngorsaanissamut suliassatut kissaatigisani naatsumik nassuiassavai. Aamma suliassamut aningaasartuutissanut tamakkiisunut missingersuut ilanngunneqassaaq. Taasigassarsisup nalinginnaasumik sanasumit neqeroorut akuerisaq ilanngussinnaavaa, imaluunniit aningaasartuutissanut tamakkiisunut naatsorsuusiornerat taarsigassarsisup aningaaserivimmit attaveqarfigisaaneersoq ilanngussinnaallugu. Kiisalu taarsigassarsisoq nammineerluni uppernarsaasiorsinnaavoq, aningaasartuutissanut tamakkiisunut nassuiaateqarfigisaminik. Taamatuttaaq suliassamut pineqartumut nunaminertamik atugassiinissaq pisariaqartinneqarpat taarsigassarsinissamik qinnuteqaammut nunaminertamik inniminniinermut uppernarsaat imaluunniit kommunalbestyrelsip nunaminertamik tunniussineranut uppernarsaat ilanngunneqassaaq. Nalinginnaasumik illup qalliutaanik iluarsaassinermi nunaminertamik tunineqarnissaq piumasarineqartarpoq, taamatullu alliliinissamut nunaminertamik tunineqarnissaq piumasarineqartarluni. Tamatuma saniatigut qinnuteqaammut nammineerluni aningaasalersuutissanik pissarsisinnaanermut uppernarsaat ilanngunneqassaaq. Nammineerluni aningaasalersuutissanut uppernarsaat amerlanertigut tassaasarpoq taarsigassarsinissamik qinnuteqartup aningaaserivianit uppernarsaat naatsoq, tassanilu taarsigassarsisup nammineq aningaasalersuutissaminik pissarsisinnaanissamut periarfissaqarnera allassimasarpoq. Kiisalu qinnuteqaammut qinnuteqartup cpr. normua, qinnuteqartup kinaaneranut ersarissumik uppernarsaataasoq, kiisalu najugaqarneranut uppernarsaat, qinnuteqartup maannarpiaq inissiami najugaqarneranut uppernarsaataasoq ilanngunneqassapput.

Imm. 3-mut

Imm. 3 Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 11, imm. 2-mut assingusuuvoq, taamaalillunilu inatsisitigut inissisimaneq maannamut atuuttuusimasoq ingerlateqqinneqarluni. Qinnuteqaatit suliarineqarnerini Naalakkersuisut suliassamut nassuiaatit, suliassanut aningaasartuutissanut tamakkiisunut missingersuutit, kiisalu qinnuteqartup nammineerluni aningaasaliissutiminik pissarsisinnaaneranut uppernarsaat immikkut ittumik pingaartittussaavaat.

§ 22-mut

Aalajangersakkami imm. 1 najoqqutassatigut allannguuteqartinneqarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 11a, imm. 1-imut assingusuuvoq, kiisalu imm. 2 aamma 3 nutaajullutik.

Imm. 1-imut

Imm. 1-ip atuutilerneratigut Naalakkersuisut §§ 20 imaluunniit 21 naapertorlugu taarsigassarsinissamik qinnuteqaammut akuersippata, Naalakkersuisut taarsigassarsinissamik neriorsuutitut allakkiaq suliaralugu taarsigassarsisumut nassiutissavaat. Kiisalu Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 11 a-mut naleqqiullugu, aammattaaq kommunalbestyrelsi § 20 naapertorlugu taarsigassarsinissamik qinnuteqaammut akuersippat, kommunalbestyrelsip taarsigassarsinissamik neriorsuutitut allakkiaq suliaralugu taarsigassarsisumut nassiutissavaa. Kommunalbestyrelsi § 11 a-jusimasumi taaneqanngikkaluartoq, aalajangersagaq malillugu aqutsinermi Naalakkersuisut kommunalbestyrelsilu tamarmik pineqarput. Peqqussutip allanngortinneratigut maanna periaaseq tamanna peqqussutip oqaasertaanut ilanngunneqarpoq.

Nutaatut maanna imm. 1-imi taarsigassarsinissamik neriorsuummi taarsigassarsiarititassat annertussuserigallagassaat allassimalerpoq.

Imm. 2-mut

Taarsigassarsiarititassat inaarutaasumik annertussusissaat aatsaat sanaartornermi naatsorsuutit inaarutaasut uppernarsarneqarsimasut pigineqalerpata naatsorsorneqarsinnaapput. Taarsigassarsisup inuup allap suliamut attuumassuteqanngitsup sanaartornermut naatsorsuutinik inaarutaasunik suliaqarnissaa atsiuinissaalu akisussaaffigaa. Sanaartornermut naatsorsuutit taarsigassarsisup aningaasalersuinermi siunnersortaanit, kukkunersiuisuanit, sanaartortitsisutut siunnersuisuanit imaluunniit sanasumit, sanaartukkamik isumaginnittuusimasumit suliarineqarsinnaapput atsiorneqarsinnaallutillu.

Imm. 3-mut

Imm. 3-mi taarsigassarsiniarluni qinnuteqartup aningaasartuutissanut missingersuutaani, Naalakkersuisunit kommunalbestyrelsimillu taarsigassarsinissamik neriorsuuteqarnermut tunngaviusumi, aammalu sanaartornermi, iluarsaassinermi, pitsanngorsaanermi alliliinermiluunniit aningaasartuutit inaarutaasut tamakkiisut akornanni naapertuutinngitsoqarsinnaanera pineqarpoq. Taarsigassarsisoq pisariaqanngitsumik kinguarsaanertaqanngitsumik nikingassutaasoq pillugu taarsigassarsititsisumut nalunaaruteqassaaq. Taamaalilluni taarsigassarsisoq iliuuseqarnissamut pisussaaffilerneqarpoq, taannalu malillugu taarsigassarsisoq nalinginnaasumik aningaasartuutit missingersuusiornerisa aningaasartuutillu inaarutaasut tamakkiisut akornanni naapertuutinngitsoqarneranik paasisaqarnermi kingorna qaammat ataaseq qaangiutsinnagu taarsigassarsititsisumut nalunaaruteqartariaqarpoq.

§ 23-mut

Aalajangersagaq oqaasertamigut annikitsunik allannguuteqartinneqarluni Inatsisartut peqqussutaanni nr. 4-mi, 30. oktober 1998-imeersumi, kingusinnerusukkut allannguuteqartinneqartumi § 11a, imm. 2-5 assingaa.

Imm. 1-imut

Imm. 1-imi neriorsuutitut allakkiap atorneqarnissaa atorunnaarnissaaluunniit qulakkeerniarlugu ilanngunneqarpoq. Neriorsuutip suliarineqarnerani taarsigassarsinissamut aningaasaliissutissat Sanaartugassanut Iluarsagassanullu Aningaasaateqarfimmut nuunneqassapput. Suliap naammassinerani taarsigassarsiarititassat aningaasaateqarfimmiit akilerneqassapput. Suliaq naammassinngippat, taarsigassarsinissamut aningaasaliissutissat aningaasaateqarfimmiit utertinneqarlutik siunertanut allanut tulleriiaarneqarnissaat pingaaruteqarpoq.

Imm. 2-mut

Imm. 2-mi taarsigassarsisup taarsigassarsinermini suliassatut siunniussaminik aallartitsisimanera pillugu Naalakkersuisunut uppernarsaasussaatitaanera pineqarpoq. Taarsigassarsisoq nammineerluni uppernarsaasiorsinnaavoq, kisiannili aamma taarsigassarsisup ingeniørimik siunnersortaasumik atorfeqartitsisoqarsimappat taanna taamaalioqqullugu qinnuigisinnaavaa. Uppernarsaat suliassap aallartissimaneranik aallartissimannginneranilluunniit paasissutissiissummik naatsumik imaqassaaq, tassanilu sanaartukkap sumut killissimanera sukumiisumik nassuiarneqartariaqanngilaq.

Imm. 3-mut

Imm. 3 taarsigassarsisup atuilernissamut akuersissutip assilineranik Naalakkersuisunut nassiussisussaatitaaneranut tunngasuuvoq. Taarsigassarsisup nammineerluni akuersissutip assilinera Naalakkersuisunut nassiussinnaavaa, kisiannili aamma taarsigassarsisup ingeniørimik siunnersortaasumik atorfeqartitsisoqarsimappat taanna taamaalioqqullugu qinnuigisinnaavaa.

Imm. 4-mut

Imm. 4-p atuutilerneratigut Naalakkersuisut pisuni immikkut ittuni piffissamut killiliussatut imm. 1-mi taaneqartut uniorneqarnissaannut immikkut ittumik akuersissuteqarsinnaapput. Immikkut ittumik akuersissuteqarsinnaatitaanermi aalajangersakkat pingaartumik sanaartornerup aallartilluaruttornerani kiisalu atuilernissamut akuersissummik tunineqarnissap kisimi utaqqineqarnerani atorneqartussatut eqqarsaatigineqarpoq. Aalajangersakkami tamatumani eqqarsaatigineqartoq pingaarneq tassaavoq, aningaasat Sanaartugassanut Iluarsagassanullu Aningaasaateqarfimmut nuunneqarsimasut atorneqarnissaasa qulakkeerneqarnissaa, taamaalilluni sanaartugaq piffissamut pilersaarut uniorpallaarnagu sananeqarsinnaassalluni.

§ 24-mut

Aalajangersagaq atuutilerfissamut aalajangersagaavoq. Tamatumunnga peqatigitillugu Inatsisartut peqqussutaat nr. 4, 30. oktober 1998-imeersoq, Inatsisartut peqqussutaatigut nr. 1-ikkut, 21. maj 2002-meersukkut allannguuteqartinneqartoq, kingullermillu Inatsisartut peqqussutaatigut nr. 5-ikkut, 15. april 2003-meersukkut allannguuteqartinneqartoq atorunnaassaaq.

§ 25-mut

Aalajangersagaq ikaarsaanermut aalajangersagaavoq. Taarsigassarsinissamut neriorsuutit peqqussutip atuutilernissaa sioqqullugu tunniunneqarsimasut aningaasartamikkut allannguiffigineqassanngillat, akerlianilli siunnersuummi aalajangersakkat sinneri ullup atuutilerfiusup kingorna taarsigassarsititsinissamut neriorsuutinut taakkununnga atuutissallutik. Qinnuteqaatit peqqussutip atuutilerfissaanut piffissaliussap iluani nassiunneqarsimasut, kisiannili ullormi atuutsitsilerfiusumi taarsigassarsinissamik neriorsuuteqarfiusimanngitsut peqqussummi aningaasanut killissarititaasut pillugit aalajangersakkat naapertorlugit taarsigassarsinissamik neriorsuuteqarfiussapput, tak. siunnersuummi §§ 4 aamma 10.