Namminersornerullutik Oqartussat nalunaarutaat nr. 17 ulloq 16. oktoberi 2007 Piareersarfinni qitiusumik ingerlatsiviit suliaminnik ingerlatsinerat il.il. naliliisarneq pillugu
Suliffissaaleqisunik sulilersitsiniarneq pillugu Inatsisartut peqqussutaanni nr. 14, 12. november 2001-imeersumi § 14, imm. 3 naapertorlugu, aamma Suliffeqarnermi innersuussisarneq il.il. pillugit Inatsisartut peqqussutaanni nr. 10, 18. december 2003-imeersumi § 2, imm. 2, § 3, imm. 3, § 5, imm. 5, aammalu § 12, imm. 2 naapertorlugit aalajangersarneqarput:
Piareersarfiit pilersinneqartarnerat akisussaaffiillu§ 1. Kommunimi suliffeqarnermi ilinniarsimasutsikkullu suliniutit nukittorsarsinnaajumallugit kommunalbestyrelsi qitiusumik Piareersarfiit ingerlatsiviannik pilersitsisinnaavoq, suliffissarsiuussisarnermi, ilinniagaqarnissamik suliffeqalernissamik, piginnaanngorsaanermik sulisorisallu nutaamik ilinniagaqarnissaannut suliniutitsigut siunnersuisinnaajumalluni, tassunga ilanngullugit pineqartut ataasiakkaarlugit suliniuteqarfigineqarnissaannut inuttut pilersaarusiuussineq, ilinniagaqarnissamik suliffeqalernissamilluunniit siunertaqartoq.
§ 2. Kommunalbestyrelsip akisussaaffigaa Piareersarfiup pilersinneqarnera aamma ingerlanneqarnera Piareersarfimmilu suliniutit pingaarnertigut tulleriiaarneqarnerat.
Isumaqatigiissuteqarnermi tunngaviusut§ 3. Suliffeqarnermut Inuussutissarsiutinullu Ilinniartitaanermut Pisortaqarfiup aamma kommunalbestyrelsip kiffartuussinissamut isumaqatigiissut naammassisanut atasumik isumaqatigiissutaasoq suliarissavaat, tassanilu Piareersarfiup suliassai immikkuualuttuilu aalajangersarlugit.
Imm. 2. Kiffartuussinermut isumaqatigiissummi minnerpaamik nalunaarneqarsimassapput:
1) Suliffeqarnermi ilinniartitaanermilu suliniutissani angusassatut siunnerfigisat.
2) Suliffeqarnermi ilinniartitaanermilu sullitassatut siunnerfigisat.
3) Ingerlatsinermut aningaasartuutinut tapiissutissat aningaasanut inatsimmi akuersissut tunngavigalugit.
4) Naliliinerni uuttuutissat suuneri.
5) Kiffartuussinissamut isumaqatigiissutip sivisussusissaa.§ 4. Suliffeqarnermut Inuussutissarsiutinullu Ilinniartitaanermut Pisortaqarfiup kiffartuussinissamut isumaqatigiissut atorunnaarsissinnaavaa, §§-it 6 aamma 7 naapertorlugit nalunaarusiortoqanngippat.
Imm. 2. Kiffartuussinermi isumaqatigiissummi aalajangersakkanik unioqqutitsisoqartillugu pisussaaffiliisinnaaneq kiffartuussinermut isumaqatigiissummi aalajangersaavigineqassaaq.§ 5. Kommunalbestyrelsip ukiumoortumik kiffartuussinermut isumaqatigiissummi pisussaaffiit naammassineqarsimanerat pillugu Suliffeqarnermut Inuussutissarsiutinullu Ilinniartitaanermut Pisortaqarfimmut nalunaarusiortassaaq, nalunaarullu ingerlatsinermut aningaasaliissutit naatsorsuusiornerannut ilanngullugu nalunaarut ukiumoortumik nassiuttassavaa, § 13 naapertorlugu.
Naliliinissami paasissutissanik nalunaaruteqartarneq§ 6. Piareersarfiit suliaannik naliliinissamut atorneqartussanik kommunalbestyrelsip minnerpaamik ukiup affakkaartumik 1/1 aamma 1/7 makkua Suliffeqarnermut Inuussutissarsiutinullu Ilinniartitaanermut Pisortaqarfimmut nalunaarutigisassavaat:
1) Inuussutissarsiutinut ilinniartitaanermut qinnuteqartut amerlassusii, tassunga ilanngullugit ilinniagaqalertussatut akuerineqartut amerlassusii, inuussutissarsiutinut ilinniartitaanerni ilinniarnerminnik aallartitsisut amerlassusii, kiisalu akuerineqartunit ilinniagassaminnik aallartitinngitsoornerit sunik peqquteqarnersut.
2) Ilinniagaqarnissamut inissat qassit Piareersarfimmut immikkoortinneqarsimanersut, inissallu qassit atorneqarnersut. Ilinniagaqarnissamut inissat qassit pineqarnersut imatut paasineqassaaq Ilinniagaqartunut inissat ilinniagaqarnersiutitalerlugit Suliffeqarnermut Inuussutissarsiutinullu Ilinniartitaanermut Pisortaqarfimmit akuersissutigineqarsimasut.
3) Pineqartut ineriartornissaannut pilersaarusiat Piareersarfimmik atuisunut tamanut suliarineqarsimanersut.
4) Suliffissaaleqisut qassiuneri.
5) Suliffissaaleqisut qassit suliffeqarnermi sulilernissamut piareersimasuunersut.
6) Inuit qassit Piareersarfiup susassaqarfiini pikkorissarnissamut innersuunneqarsimanersut.
7) Inuit qassit ilinniagaqalernissamut piareersarnissamut ilinniakkanullu ingerlaqqiffiusunut innersuunneqarsimanersut.
8) Suliffissaaleqisut qassit suliffissamut innersuunneqarsimanersut.
9) Suliffissaaleqisut qassit suliffeqalersimanersut.
10) Sulisinnaanngorsarneqartut amerlassusiat.
11) Piareersarfiup suliffeqarnermut ilinniartitaanermullu sammisunik suliniutai, Suliffeqarnermut Inuussutissarsiutinullu Ilinniartitaanermut Pisortaqarfiup ilitsersuutai naapertorlugit.
12) Nalunaaquttap akunneri suliffiusut pillugit ilinniartitsisut suliassanut pilersaarutaat aallaavigalugit nalunaarsuutit.
13) Piffissap atuartitsinermut siunnersuinermullu atorneqartup annertussusia pillugu nalunaarsuutit.
14) Suleqateqartoqarsimappat suleqatigisimasat pillugit nalunaarsuutit.
Imm. 2. Minnerpaamik imm. 1-imi nalunaaruteqarnerit pineqartut ilaat ataaseq aamma imaqassaaq
1) Piareersarfimmi suliat pillugit ataatsimut naliliinermik,
2) Piareersarfimmut sammisumik kommunip nammineq suliniutaasa naliliiffigineqarnerannik, aammalu
3) kommunip nammineq suliffeqarnermi ilinniartitaanermilu 15-25-inik ukiulinnut suliniutaanut tunngasumik ataatsimut takussutissiinermik.§ 7. Kommunalbestyrelsip § 6-imi imm. 1-imi nalunaarusiornera qarasaasiat atorlugit programmit Suliffeqarnermut Inuussutissarsiutinullu Ilinniartitaanermut Pisortaqarfimmit atugassanngortinneqarsimasut tunngavigalugit ingerlanneqassaaq. Kommunalbestyrelsip aamma § 6, imm. 2 naapertorlugu naliliineq nassiutissavaa.
Imm. 2. Kommunalbestyrelsip isumannaassavaa paasissutissat nassiunneqartut eqqortuuneri nutaajunerilu.§ 8. Suliffeqarnermut Inuussutissarsiutinullu Ilinniartitaanermut Pisortaqarfiup nakkutilliissaaq kommunalbestyrelsimit paasissutissat nalunaarutigineqartut pillugit.
§ 9. Paasissutissat nalunaarsorneqartut Pisortaqarfimmut nassiunneqartut kiffartuussinissamut isumaqatigiissummi anguniagassatut aalajangersarneqarsimasunut sanilliunneqassapput, Piareersarfiup anguniagassaatut siunniunneqartunut naapertuunneri nalilersorsinnaajumallugu.
Tapiissutit naatsorsuutillu§ 10. Aningaasanut inatsimmi aningaasaliissutaasut iluanni Namminersornerullutik Oqartussat Piareersarfimmut ingerlatsinermut tapiissuteqassapput, kiffartuussinermut isumaqatigiissummi suliassat aalajangersarneqarsimasut suliarineqarnissaat siunertaralugu.
§ 11. Ingerlatsinermut aningaasartuutinut tapiissuteqarnermi piumasaqaataavoq kommunalbestyrelsip
1) Piareersarfimmi suliassat suliarineqarnissaannut sulisussanik atorfinititsinissaa,
2) Piareersarfimmut naleqquttunik ininik isumaginninnera, aammalu
3) ukiumoortumik aningaasartuutissanut missingersuusiornermi qitiusumik ingerlatsiviup aningaasartuutissaanut missingersuusiortarneq.
4) §§-it 6 aamma 7 naapertorlugu nalunaarusiortarnissaminik isumaginnittarnera, aammalu § 13 naapertorlugu naatsorsuutinik nassiussisarnera.§ 12. Ingerlartsinermut aningaasartuutinut tapiissutit akuersissutigineqartarlutillu aqunneqassapput Suliffeqarnermut Inuussutissarsiutinullu Ilinniartitaanermut Pisortaqarfimmit.
§ 13. Kommunalbestyrelsi ukiut tamaasa 1. februar nallertinnagu ukiumi siuliani ingerlatsinermut tapiissutit akuersissutigineqarsimasut naatsorsuutaannik nassiussaqartassaaq.
Imm. 2. Ingerlatsinermut tapiissutit 80 %-ii ukiut tamaasa kingusinnerpaamik 1. februar tunniunneqassapput, ukiumullu aningaasanut inatsisip atuuffianut tapiissutaallutik.
Imm. 3. Ingerlatsinermut tapiissutit sinneri 1. oktober tunniunneqassapput, kiffartuussinissamut isumaqatigiissummi anguniagassatut siunnerfiit naammassineqarpata.§ 14. Suliffeqarnermut Inuussutissarsiutinullu Ilinniartitaanermut Pisortaqarfiup nakkutigissavaa ingerlatsinermut aningaasaliissutit tapiissutigineqartut atorneqarnerat.
Imm. 2. Paasineqassagaluarpat ingerlatsinermut tapiissutit akuersissutigineqarnertik saneqqullugu allanut atorneqartut, Suliffeqarnermut Inuussutissarsiutinullu Ilinniartitaanermut Pisortaqarfiup ingerlatsinermut tapiissutinik tunniussisarneq unitissinnaavaa, piumasaralugulu ingerlatsinermut tapiissutit tamakkerlugit ilaannakortumilluunniit utertinneqarnissaat.
Atortuulerfia§ 15. Nalunaarut una atortuulerpoq 1. november 2007.
Imm. 2. Tassunga ilutigitillugu Namminersornerullutik Oqartussat kommunini inuusuttut sulliviinut tapiissutit pillugu nalunaarutaat nr. 37, 29. december 1995-imeersoq atorunnaarpoq.
Namminersornerullutik Oqartussat, ulloq 16. oktoberi 2007
Siverth K. Heilmann/
Palle Frederiksen