Illuliassanut sanaartugassanullu neqeroortitsisarneq pillugu Namminersornerullutik Oqartussat nalunaarutaat nr. 15, 5. juli 2007-imeersoq

Suliariumannittussarsiuussisarnermut Inatsisartut inatsisaanni nr. 3-mi, 6. april 1992-imeersumi § 6 naapertorlugu imatut aalajangersaasoqarpoq:

 

Atuuffia

§ 1. Nalunaarut una atuuppoq:
1) Namminersornerullutik Oqartussat illuliassaataannut sanaartugassaataannullu taakkununngalu atasumik pisiassanut tunniunneqartussanut.
2) Illuliassanut sanaartugassanullu Namminersornerullutik Oqartussanit tapiiffigineqartunut, utertitsissuteqarfigineqartunut, taarsigassarsititsivigineqartunut qularnaveeqqusiivigineqartunulluunniit, tamatumani inatsimmik allamik atuutitsisoqanngippat.
Imm. 2. Nalunaarut atuutinngilaq:
1) Piginneqatigiilluni inissiaatit namminersortunit sanaartortinneqartut aningaasalersorneqartullu tamatumalu kingorna piginneqatigiilluni inissiaatillit peqatigiiffiannut tunniunneqartut.
2) Namminerisamik inissialiat, Inatsisartut aningaasaqarnermut inatsisaanni oqaasertaliussat naapertorlugit taarsigassarsititsinissamik neriorsuuteqarfiusut.
3) Pisiassat tunniunneqarnissaannut piffissap sivisuvallaarnera pissutigalugu suliariumannittussarsiuussinissaq sioqqullugu inniminnerneqartariaqartut.

 

Nassuiaatit

§ 2. Pisiassat tunniunneqartussat imatut paasineqassaaq suliarinninnerit tassaasut pisiassat tunniunneqartussat aammalu sanaartugassanik suliassinneqartoq tassaasoq tunisisoq.

§ 3. Suliassamut piukkunnaatilinnik ujaasinertalimmik neqeroortitsineq paasineqassaaq illuliassanik sanaartugassanillu suliarinninnissamut neqerooruteqartussatut kissaatigineqartunik toqqaanissamik tunngavissat ataatsimoortut tunngavigalugit neqeroortitsisup toqqaanera.

 

Neqeroortitsinermi pissutsit tunngaviusut

§ 4. Pisuni AP-p atorneqarfigisinnaasaanni tamaginni neqeroortitsinerit "Kalaallit Nunaanni sanaartornermi suliassat atortussallu tunniunneqartarneri pillugit ataatsimoortumik piumasaqaatit" (AP) malillugit pisassapput.

§ 5. Illuliassat sanaartugassallu tamanut ammasumik neqeroortitsissutigineqassapput, taamaattorli takuuk §§ 7 aamma 8.
Imm. 2. Akiligassanngortitamik illuliortitsineq sanaartortitsinerlu imm. 1-imi pineqartunut ilaanngilaq. Akiligassanngortitamik illuliortitsineq sanaartortitsinerlu atorneqarsinnaavoq taamaasiornissamut immikkut pissutissaqarpat imaluunniit illuliortitsineq sanaartortitsinerlu annerpaamik 300.000 koruuninik naleqarpat.
Imm. 3. Immikkut pissutissaqartitsisut, tak. imm. 2, assersuutigalugu tassaasinnaapput sanaqqiinerit, iluarsaanerit allanngortiterinerillu, annertussusaasa, pitsaassusissaasa qaqugulu naammassineqarfissaasa siumoortumik aalajangiunniarnerat ajornakusuungaatsiartoq.

 

Tamanut ammasumik neqeroortitsineq

§ 6. Tamanut ammasumik neqeroortitsinermi pineqarput tamanut ammasumik suliariumannittussarsiuussineq aamma suliassat tamakkerlugit tamanut ammasumik neqeroortitsineq.
Imm. 2. Tamanut ammasumik neqeroortitsinerni kikkulluunniit neqerooruteqarsinnaassapput.
Imm. 3. Tamanut ammasumik neqeroortitsinerit katillugit minnerpaamik 5 millioner koruuninik nalillit aviisitigut aammalu tusagassiutinut elektroniskiusunut nuna tamakkerlugu saqqummersartutigut nalunaarutigineqartassapput. Illuliortitsinermi sanaartortitsinermilu suliassaq annerpaamik 5 millioner koruuninik naleqaraangat neqerooruteqaqqusinerit minnerpaamik najukkami aviisitigut allagarsiinikkulluunniit nalunaarutigineqartassapput.

 

Killilimmik neqeroortitsineq

§ 7. Killilimmik neqeroortitsinermi pineqarput aalajangersimasunik neqerooqqusilluni suliariumannittussarsiuussineq aamma suliassat tamakkerlugit killilimmik neqeroortitsineq.
Imm. 2. Killilimmik neqeroortitsineq atorneqarsinnaavoq sanaartugassanik suliassinneqartartut aalajangersimasuinnaat suliassap suliarinissaanut pisariaqartumik pisinnaassuseqarpata imaluunniit pisariaqartumik immikkut ilisimasaqarpata, imaluunniit siumoortumik, tamanut ammasumik suliassanut piukkunnaatilinnik ujaasinerup nalunaarutigineqareernerata kingorna.

 

Suliaqartinniakkat ilisimatereerlugit neqeroortitsineq

§ 8. Suliaqartinniakkat ilisimatereerlugit neqeroortitsisoqarsinnaavoq:
1) Illuliortitsinermi sanaartortitsinermilu suliassap annertussusaa, pitsaassusissaa imaluunniit qaqugu naammassineqarfissaa neqeroortitsinermi tunngavigisani aalajangerniaruminaatsunut, soorlu sanaqqitassanut, iluarsagassanut allanngortitigassanullu.
2) Illuliortitsinermi sanaartortitsinermilu suliassanut 500.000 koruuninik imaluunniit taakku inorlugit nalilinnut.
3) Sanaartugassanik suliassinneqartartoq ataasiinnaq suliassap suliarinissaannut pisinnaappat.
4) Immikkut allanik pissuteqartumik sanaartugassanik suliassinneqartartoq aalajangersimasoq toqqarneqarsimappat. Immikkut pissutaasutut isigineqarput ilaatigut sanatitsisup sanasussallu suliassamut akigitinneqartussatut isumaqatigiissutaannik sanaartugassanik suliassinneqartup allartereersimasaanik nangitsineq, aamma illuliat misileraanertallit imaluunniit illuliortarnermik siuarsaanissaq siunertaralugu sanaartornermi annertuumik inerisaanertallit.

 

Tunniussinissamut tunngavissat

§ 9. Tamanut ammasumik suliariumannittussarsiuussinermi akikinnerpaamik neqerooruteqartoq tamatigut toqqarneqartassaaq, neqeroortitsisup neqerooruteqartunit nangaassutaasinnaasut nalilersussavai, neqeroorutaasoq sorleq akikinnerpaanersoq aalajangersinnaajumallugu.
Imm. 2. Taamaattorli neqeroorutip appasinnerpaap tigunngitsoornissaanut neqeroortitsisoq pisinnaatitaavoq, neqerooruteqartup suliassaq naammaginartumik pitsaassusilimmik, naleqquttumik piffissarititaasorlu eqqorlugu suliarisinnaanngikkaa ilimagilluinnaruniuk. Neqeroortitsisup neqeroorummut itigartitsinerminut tunngavilersuutaa allakkatigut nalunaarutigineqassaaq.

§ 10. Toqqaalluni suliariumannittussarsiuussinermi, neqeroorutaasumik akikinnerpaamik toqqaanissamit allaanerusumik toqqaanissaq aalajangiunneqassanngilaq.

§ 11. Suliassat tamakkerlugit neqeroortitsinermi neqerooruteqarnissamut najoqqutassani toqqarneqarnissamut piumasaqaatit tunngavigalugit neqeroorut aningaasatigut iluaqusiinerpaasussaq toqqarneqassaaq. Toqqarneqarnissamut piumasaqaatit neqerooruteqarnissamut najoqqutassani paasissutissiissutigineqarsimassapput.

 

Neqeroortitsisumut piumasaqaatit

§ 12. Illuliortitsinermi sanaartortitsinermilu suliassani minnerpaamik 3 millioner koruuninik ataatsimut naleqartuni neqeroortitsisoq neqerooruteqarnissamut najoqqutassani piumasaqassaaq, minnerpaamik atorfinitsitsisoqassasoq:
1) Ilinniartumik 1-mik, suliassaq minnerpaamik 3 millioner koruuninik kisiannili 6 millioner koruunit inorlugit naleqarpat.
2) Ilinniartunik 2-nik, suliassaq minnerpaamik 6 millioner koruuninik kisiannili 9 millioner koruunit inorlugit naleqarpat.
3) Ilinniartunik 3-nik, suliassaq minnerpaamik 9 millioner koruuninik naleqarpat.
Imm. 2. Ilinniartunik piukkunnaatilinnik pissarsisoqarsinnaanngitsoq Piareersarfimmit uppernarsarneqarsinnaappat, sanaartugassanik suliassinneqartup ilinniartunik imm. 1-imi piumasarineqartunit ikinnerusunik atorfinitsitsisinnaavoq.
Imm. 3. Ilinniartut tassaapput ilinniartut, suliffimmik misiliisut, pikkorissartut aammalu atuartut Kalaallit Nunaanni sanaartornermut ilinniarfinni ilinniarnerminnik ingerlatsisut.

§ 13. Iluliortitsinermi sanaartortitsinermilu suliassap tunniunneqarnerani sanatitsisup sanasussallu suliassamut akigitinneqartussatut isumaqatigiissutaanni isumaqatigiissutaasumik sanaartugassanik suliassinneqartoq pisussaaffilerneqassaaq:
1) inuussutissarsiornermi imaluunniit tunisassiornermi akisussaasutut sillimmasersimanissamik, kiisalu inatsisit malillugit pisussaaffiusumik sulisut ajoqusersinnaanerannut sillimmasersimanissamik inuussutissarsiornermilu napparsimasinnaanermut sillimmasersimanissamik (AES), aamma
2) sanaartugassamik suliassinneqartup sulisuisa, illuliortitsinermi sanaartortitsinermilu suliassanik isumaginnittuusussat, isumaqatigiissutit ataatsimoortut malillugit sulisuusut akissarsiaat sulinerminnilu atugassaat, suliani ataasiakkaani isumaqatigiissutini atugassarititaasunit ajornerutinneqassanngitsut.

 

Nakkutilliineq

§ 14. Illuliortitsinermi sanaartortitsinermilu suliassap neqeroortitsivigineqarnerata tunniunneqarneratalu nalunaarut naapertorlugu ingerlanneqarnissaat pisortaqarfiup suliaqartitsisussap tapersiissuteqartutut oqartussaasutut isumagissavaa.

 

Pineqaatissiisinnaaneq

§ 15. Neqeroortitsisup maleruagassat § 5, imm. 1-imi, § 12, imm. 1-imi, aamma § 13-imi aalajangersarneqartut malinngippagit, illuliortitsinermi sanaartortitsinermilu suliassanut Namminersornerullutik Oqartussat tapiissutaasa, utertitsissutaasa, taarsigassarsititsissutaasa imaluunniit qularnaveeqqusiisutaasa atorunnaarsinneqarnissaannik Naalakkersuisut aalajangiisinnaapput.

 

Atortuulersinneqarfia

§ 16. Nalunaarut 1. august 2007-imi atuutilerpoq. Tamatumunnga peqatigitillugu Sanaartugassanut neqerooruteqartitsisarneq pillugu Namminersornerullutik Oqartussat kaajallaasitaat, 1. oktober 2000-imeersoq atorunnaarpoq.

Namminersornerullutik Oqartussat, 5. juli 2007

Kim Kielsen

/

Olafur P. Nielsen